|
|
 تسجيل مكالمة مع سارة.. بوست توثيقي.. يوجد شهود وصور وفيديو كمان...
|
حضر رفيقي ببراري البيرتا معاوية المدير لمباركة بنيتي الاولي سارة..
تلفت يمينا ويساراً ليكتشف انو ما جاب ليها هدية ،
بفطرته وانسياته المعروفة للكثير اصر ان لا يخرج دون ان يهديها شي موقتا،
وواعداً ان ياتي لها بهدية اخري في اليوم القادم.
استلف من ذاكرته الخربة  نص قديم اهداهو في ما مضي لبنت احد الاصدقاء ،
وكانت لحسن الحظ تحمل بنت الصديق نفس الاسم، اسم بنيتي "سارة".
.
.
.
.
فالي النص.. والتسجيل.. والصور التوثيقية..
.
.
يتبع
|
|
  
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: rani)
|
*
*
*
مكالمة مع سارة
معاوية المدير
.
.
.
هلو ســــارة...
أسمعي مني أحكي ليك
عن نآسـا
قالوا الغربة غدآرة
بتخلي الزول أكان
برآها يفارق أرضو
وأكان غرق
يسيب فرضـو...
وقالوا لينـا :
أوعو الغربة وأشرآرها
بتشقي الزول
تحرقوا بلهيب نآرها...
أبيت أسمـع
نصيحة أهلي يا بنية
قلـت كـلام
بيحكو بيهو عصرية
ويفرقوا بيهو
وكـت الضيق
مع الجبنة النهارية
وأديتهم قفاي ومشيت
وفي دروب الفراق طشيت
وجيت في الغربة إتضآرا
قالت لي: إنت ربحته
إنت لقيـت
ومن شبك العذآب فكيت
تعال أدخل حبابك جد
ركزته تمآم وفته الحد
ولومك بيآ
حآلك ضمة ما بنهد
نظمت لي
قصيد وكـلام
وسبحت بي
في عآلم من الأحلآم
وهدت حيلي بالأنغآم
.
.
.
يتبع
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: rani)
|
(2)
.
.
.
ومره العام
ورآهو العآم
وفجأة صحيـت
لقيت الدنيا
حولي ضـلآم
وإنفتحت علي الآلآم
أقسم الليل أعانيها
وباقـي الليـل
أفكر في كـلآم أهلي
القبيل قآلوهو ياسآرة
بقيت في نفسي أتضارآ
ولقيت الغربة جد حآرة
ولقيتك إنت يا سارة
وحآسي بيك
جيوش الوحشة عآصرة عليك
بكرة تهـون
وترجعي للبسترو الحآل
بلد ترجآكي بالشبآل
فيها العم وفيها الخآل
والعمآت والخآلآت
والجـآرآت
الداخلآت والمارقآت
يشيلوك ويطايبوك
وبي فلليل يحجوك
وتكرفي نسمة الوديان
وتسمعي نفحة الآذآن
والنسمآت تجيك مآرة
تنومي وتصحي يا سآرة
يلاقوكي الصباح بالشآي
وبدل من رنة التلفون
بتسمعي رنة الكبآي
وتنبسطي ويجوك بجآي
يجوك بجـآي
وتقدلي فـوق
ربي أمدرمآن
وتلقي الـدنيا
قايمة أمآن
وقآعـدة أمان
.
.
.
يتبع
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: خالد المحرب)
|
Quote:
الاخ رانى الرضاعة الطبيعيه حصن منيع صعب اختراقه فعليكم بالرضاعه الطبيعيه
التحيه لك ولى ام ساره ولى ساره .... ربنا يخليها |
سلام مرة تانية المحترم خالد المحراب
حقيقة ما كان عندي فكرة عن موضوع الرضاعة الطبيعية.. لكن امها هي القررت انو ترضعها رضاعة طبيعية.
لكن الاطباء نصحونا بان نعطيها اللبن الصناعي من فترة لفترة.
سلام من ام سارة
راني السماني
| |
|
|
|
|
|
|
|
|
 Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: معاوية المدير)
|
Quote: وعد يا بت الشيخ، وحق في الرُقاب
كان رب العباد هوّن.
إنت بس جيبي البنيونة ولومك بي
تب ما نقصر معاها. باقي إنت
زولتاً ما هينة... |
معاوية المدير ,,,,,,, سلام
عارفة ومتاكدة ما حتقصر وانا بعتبر هديتك وصلت لمجرد الرد والاحساس الجميل دا
غايتو كسبنا خال قبل الهدية ,,,,وربنا يديم المحبة والتواصل الجميل بين الناس
معرفتك فى حد ذاتها هدية ومكسب كبير,,,,,,
تقدير الاخر هو اكبر هدية ممكن تقدم على الاقل بالنسبة لى,,
شاكرة ياسيدى ..
كامل احترامى,,
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: دينا خالد)
|
Quote:
لوووووووول يا رانى والله لو ح تبارى البلى دا كدا بالثانية
وبالدقيقة وباليوم .. اشهد انه سيكون اضخم من بوست الشعبيه و
الهندسة والمعمار وما شابه من البوستات ...
الف مبروك ياخ شكلها الاولى .. هسه لو سميتها دينا خالد كنا جبنا ليها
عقد ذى بت معتز القريش ..
ـــــــــــــــــــــــ
رانى ؟؟ فى اى طفرات جينية ولا الموضوع عادى ؟؟؟ |
لا حولا.. بالله معتز سمي بنتو دينا؟
لو منك كنت مشيت غيرت اسمي.. اتخيلي الناس تتلخبط في الدينتين ويقولو دينا ياتا فيهم بنت الظلامي ولا التانية لوووووووووووووول
اما بالنسبة ضخومة البوست اكدي تمام دا حيضرب بوست الشعبية في اقل من ما تتخيلي.
البنية دي حتكبر في البوست دا انشالله.
.
.
اما الحتة الاخيرة خالص حقيقة ما فهمتك.
سلامي
راني السماني
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: وجن)
|
Quote:
الله بوست دااااافئ ومعبرشدييييد
يارب تكبر سارة وتشوف نفسه أموره كيف
ربنا يحفظه ليكم ويغتيها من العين
وما أوصيك حصنه ليل ونهار
ولمعاوية اقول ليه ما قصرت والله لا ماديا ولا معنويا تعيش وتجيب |
تسلمي وجن
وبمناسبة التحصين دي معاوية المدير كل يوم يقول لي البنت دي انت بتسحرها.
طبعاً كل يوم طالعة ليها بي حاجة جديدة البنية من تاسع يوم ليها بقت تحضر تلفزيون
تقعد تبكي نقوم نشغل ليها فلم كرتون تسكت وتندمج مع الفلم، نقفل منها الفلم تقعد تبكي تاني. قايتو ماشاءالله عليها.
شكراً مرة تانية علي المرور
راني السماني
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: ياسر إدريس حسن)
|
حوار بين سارة و ME
عذراً صغيرتي سارة لم اتوفق في مواصلة التوثيق، نسبة لرحيل اخي نزار السماني
17/1/2010
عندما كنا نحتفل والاصدقاء بسمايتك،
اتاني خبر رحيل عمك نزار،..
فكان لابدّ ان انسحب في صمت.. حتي لا افسد علي اصدقائى ليلتهم
انزويت في غرفة بعيدة، وبكيت وحدي علي رحيل صديقي، دون ان تعلمي صغيرتي ماذا حدث..
كان الجميع فرحون في الخارج، ودونهم كنت انتحب.
اتاني صديقي معاوية المدير في غرفتي ليكتشف ماذا حدث.
قالدني ، ثم اتصل علي جدك السماني معزياً..
.
كان ما يربطني ونزار ياسرويتي،
علاقة الدمى الكبري،
غناء عيوشة
مطاردة الارانب والسواسيو
بكاء اخوتي الصغار وحق اللبن
عشق المصطفي
"ود سيد احمد"، صدق الكلمة، احلام الفقراء الصغار، ولحن الطفولة .
.
.
هكذا صغيرتي حكمت عليّ الأقدار أن أودعك في اليوم التالي لأشد رحال الحزن
ميمماً صوب الخرطوم لأودع عمك الوداع الآخير، وأحكي له عنك. أحكي له
عن مدى حبي لك، وعن إشتياقك للنوم في أحضانه..
عذراً صغيرتي.. كُتب لك ان لا تريه.. واعلم سرويتي.. كم هو حزين لعدم لقيأك... ايضاً.
وكم هي حزينة طفلة العامين( همس )، همس بنت عمك ياسر ياسارة
همس التي كانت لايطيب لها النوم الا عندما ترقد بجانب عمك نزار..
اتدرين سرويتي، ان نزار كان من اقرب الاخوان اليّ.. بل اكثر ما تجمعني به ذكريات الطفولة...
عند عودتي العام الماضي صغيرتي، جلسنا كثيرا انا وعمك نزار نجتر الماضي .. ونتذكر اصدقاء لنا كان يجمعنا بهم
حوض اتحاد السباحة المحلي.. كان دوماً يحضر ذاكرتنا صديقنا السنهوري، سيف الشايقي، همري،
ابقرشين، ابوطالب، بشير كني، سندوتشات السوق العربي، محل الباسطة ، احاول انوم يقول لي
راني تتذكر اسانسير عمارة وزارة التجارة ونقعد هههههههههه نضحك في برآة كما تضحكين
يا صغيرتي..
حتي ايام الكمبوني كنا نجتر ذكرياتها، حيث كان يحضرنا وجه سلطان كيجياب وهو غاضباً باحثاً
عني والسنهوري ونقعد هههههه نضحك مرة اخري.. ونقول يالها من ايام.
عذراً صغيرتي، كنت ناوي التقاط صور لكِ بشكل دائم على مدار اليوم، لكني لم اعد قادراً.
رجعت من الخرطوم ، ولكن عفواً، لم اعد قادراً كما كنت ..
لم اعد قادراً علي تحمل بكائك ايضاً كما كنت.. عذراً صغيرتي، صرت لا اطيق بكائك عندما تبكين...
هل صار بكائك مرتبطاً برحيله، انت ايضاً؟
صدقيني كنت لا اطيق رؤيتهم عندما كان يبكون صديقي نزار..
وكنت اكرههم بشدة عندما كانو يقولون الحمد لله..
كانت تعني لي الحمدلله دوما حدوث خبر جميل..
او سلامة، او شي مفرح. هل يفرحهم رحيل اخي حتي يقولون "الحمد لله؟"
تركتهم يفعلون ما يشأوؤن، وخفت ان يفضح عقلي ستر صمته، لذا قررت ان لا ألوم احداً.. علي شيء..
بل قررت الصمت حتي لا يتهمني احدهم بالمروق و السريالية او ربما الجنون.
فالكل هنالك.. كان يرتكب حينونته كما قدر له ان يفعل.
تقبلت الحمد لله بل صرت ارد عليهم " الحمد لله"
الحمد الله
حمدو ربنا صغيرتي لرحيله.. كانو يرون في نزار زول آخره ســـــاكت، ومازول دنيا.
هل كان لتدين نزار وتمسكه بكتاب الله ومناصرة رسوله في سنوات عمره الاخيرة، علآقة للحكم عليه بأنه زول آخرة، او رحيله؟؟؟؟؟
رحل عمك ياصغيرتي دون ان يترك لنا من يحمل اسمه، قبل ان يتزوج، قبل ان يكمل عامه الثاني وثلاثون،
كان صغيراً مثلك ياصغيرتي، كبير الانسان في داخله ويعني الاعمق اللا محدود، وهل يوجد مطلق؟
مدي اتساع الكون ياصغيرتي تمدد الحزن في دواخلنا.
زبحة
صدرية
اخذته
مننا،
هكذا اقر اطباء بلادي، " أصابته جلطة في الدم قبل شهر ولم يشعر بها او تاثر فيه الي ان وصلت
الي القلب واحدثت به جرح عميق في الخلف". قالها الطبيب وختم حديثه بسبحان الله!!!.
فعلاً سبحان الله..
حاولو ترميم قلبه علي حسب قولهم باخذه للخارج ووضع قلب اصطناعي..ولكــــــن.
ولكـــن، ياصغيرتي.. بكل أسف توقفت العروق من ضخ الدماء والشرائح الذكية الي قلبة... ونـــام.
هكذا حكاها لي اخي معذ.
ابتسمي صغيرتي ودعي عنك البكاء،
ياااااا بنتي ما خلاص، قلت ليك ما تبكي... خليهو الينوم عمك شوية.
هل تعلم.. ان لا احد يمكنه النوم ان لم يكن قلبه آمنا في صدره؟
نعم سارة، اعلم ان النائمون وحدهم .. يسمعون كل شيء.
دعينا من فلسفة الاشياء صغيرتي.
بل اصمتي لانني فقط اريده ان يرتاح و يعلم انني احبه جداً رغم علمي التام
باني سوف لن التقي به مرة آخري.
صدقيني " سوف لن التقيه ..."
بابا، يبدو انك مرهق.
"بابا"؟
اخيراً ها انت تنطقين بها!.
كنت اعتقد طيلة سنوات عمري التي مضت ان اثنان لا ينطقان " الصغار" و "الموتي".
نعم ياصغيرتي اني مرهق ومتعب جداً الآن.. واتمني لو استطيع ان اشهر علمي الابيض للحياة.. كي لا انطق،
ولكن شيئاً ما يمنعني.. شيئاً يشبه وجهك ياسارة.
شربت كثيراً ذاك المساء.. او ربما اسرفت..
كنت اتناوله دون وعي محاولاً ان اقع من قمة حزني الي قاع الهامش ويتكسر القلب في داخلي.. ولا يغلبني النوم.
عذراً.. صغيرتي لا وجود لأي شيء شخصي في هذا اليوم المشئوم..
اكملت قارورتي الثانية ولم يحالفني حظ الغمده.. وقفت لاجمع شظاياي، وما تبقي من دموع.
مسكت التليفون محاولاً مرة اخري.. ابوي الووو ، " الو راني خد اخوك معتز، معتز خد يوسف، يوسف خد ياسر، ياسر خد معذ...
آ آ آ آ آ آ آ آ آه
قذفت التليفون علي اتجاه الحايط المقابل ، فصمت.
صارعني النوم مرة اخري ،فصرعني ونومت.
استيقظ وعيي بالسرقة الحثيثة التي دوماً ما يمارسها علينا القدر، فبكيت صغيرتي خاصة وانه لا توجد وسيلة بعد لمنع هذا
السارق بالتقسيط من التهامنا لقمة لقمة دون أن ينجدنا احد، وان استنجدنا.
كفكفت دموعي فصارت الرؤية محجوبة واللون الرمادي يعلو كل الاشيئا.
نام وعيي كي تستعيد ذاكرتي الخربة بعض من الحان الموت و الشوق والحنين.
تذكرت كل شي مات بالماضي...
ارنبي الالماني الضخم الجثة، صديقي علي يوسف واخته مودة، قاسم امين، خالتي سلافة،
عبدالخالق المحجوب، سيدنا يوسف والذئب، وايضاً تذكرت صديق دراستي اسعد عبدالعزيز،
هوتيل رواندا، جدي عبدالله، ود جيرانا اسعد التجاني، عمو ابشارب، شهداء الفكر، الحزب، وكادحي الطبقة العاملة،
مصطفي سيد احمد، استاذ خالد جقوال، غنماية خالتو عائشة زراع،،،، صديق الروح واللون والدم ميرغني حمزة والاعدموهم لصوص هذا الزمن.
استغفرت ربي كثيراً ودعوت لهم جميعاً،
نمت وأعيني تذرف دمعا، لا ينقطع على ذكرى لن تنقطع وذات رحلت وأخذتني معها دون أن أشعر.
.
.
.
وعداً صغيرتي، ساواصل..
راني السماني
قراند بريري، البيرتا، كندا
فبراير 2010
.
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: فايزودالقاضي)
|
Quote:
راني ....معاوية ... سلامات ...
اولاً حمداً لله على سلامة ام سارة ...والف الف مبروك الامورة ... تتربي في عزكم ومن المستورات ان شاء الله ...
لكن اتلومتو مع صحبي يحي بنعوف ..يوم الرز عمل مشكلة كبيرة .. اها في الخروف ده الا يعلن الجهاد ..زول متمرد من زمان ومعروف ..
مبروك لمعاوية الخالوية ...
تحياتي للجميع ...
فايزالقاضي . |
الله يسلمك اخ فايز..
| |
|
|
|
|
|
|
|
|
|
Re: تسجيل مكالمة مع سارة.. بوست توثيقي.. يوجد شهود وصور وفيديو كمان... (Re: Mohammed Ibrahim Othman)
|
Quote:
rani ياجميل ..
ياأخي مبروك سارة ..
ياأخي فرحتك حلوة بيها ..
تخلي الواحد يحبك وانت تستاهل ..
بجد البنات حلوات ..
هسي انا من اجي خاشي البيت بناتي بيستلموني وهاك يادلع ..
الله يكبرها ليكم،ويديكم الصحة والعافيةانت وامها تربوها وما تحوجها لشيء وتطلعو من حفها يارب..
تاني مبروك ياحبيب.. |
الوديع محمد ابراهيم عثمان
سلام وتحايا، كيف اخبارك والبنيات؟
ربنا يخليهم ليك انت برضو...
شكرا كتير علي الاماني والكلام الجميل.
راني السماني
| |
|
|
|
|
|
|
| |
rani
ياسر بيناوي
نجلاء سيد أحمد
وجن
كمال ادريس
ALGARADABI
AnwarKing
دينا خالد
سيف الدولة كامل
اساسي
SHIBKA
كمال علي الزين
willeim andrea
معاوية المدير
سيف اليزل برعي البدوي
كمال عباس
عشة بت فاطنة
نيازي مصطفى
salee
ياسر إدريس حسن
علاء الدين حيموره
الصادق خليفة
Mohammed Ibrahim Othman
Abureesh
فايزودالقاضي
معاوية عوض الكريم
omar arbab
Afraa Sanad
فيس بوك
تويتر
انستقرام
يوتيوب
بنتيريست