كتب الكاتب الفاتح جبرا المتوفرة بمعرض الدوحة
|
|
 أوكامبو يده مغلولة ولا يستطيع القبض على الرئيس السوداني
|
المدعي العام للمحكمة الجنائية الدولية لا يستطيع القبض على الرئيس السوداني المتهم بارتكاب جرلئم تدخل
في اختصاص المحكمة من دون تعاون جميع الدول الأاطراف وغير الاطراف في نظام روما الأساسي وهو
النظام الأساسي الذي تم بموجبه إنشاء المحكمة الجنائية الدولية لمعاقبة الأفراد الذين يرتكبون جرائم تدخل في اختصاص
المحكمة وهي جريمة الابادة الجماعية والجرائم ضد الانسانية وجرائم الحرب وجريمة العدوان وذلك بموجب المادة الخامسىة من
النظام الأساسي للمحكمة , وهذه المحكمة هي هيئة قضائية دائمة لها السلطة لمحاكمة الأشخاص وليس الدول وهي مكملة للولايات القضائية
الوطنية وذلك بموجب المادة الأولى من نظام روما الأساسي.
وتلزم المحكمة جميع الدول الأطراف في نظام روما الأساسي التعاون مع المحكمة للقبض على المتهمين الفارين من وجه العدالة, إلا أن الدول غير الأطراف
غير ملزمة بذلك... وحتى الدول الأ طراف لا تستجيب لأوامر المحكمة اذا كانت مصالحها تتطلب التقرب من رئيس دولة مطلوب القبض عليه..
ومما يزيد من صعوبة القبض على الرئيس عمر البشير أن الولايات المتحدة دولة غير طرف في نظام روما الأساس,,,
والأمر الوحيد الذي سيمكن المحكمة من القبض على الرئيس السوداني هو صدور قرار واضح من مجلس الأمن الدولي يطلب المجلس بموجبه من جميع الدول الأعضاء
في الأمم المتحدة التعاون مع المحكمة للقبض على الرئيس السوداني لأنه وفي هذا الأمر فإن الدولة التي لا تيتجيب لقرار مجلس الأمن سيتعرض لعقوبات صارمة
من المجلس,,,
ولكن على الرغم من ذلك فإن الدول الحليفة للسودان ستطالب المحكمة بإدانة المسؤولين الاسرائيليين تحت بند جريمة العدوان ولا سيما وان المؤتمر
الاستعراضي لإستعراض مواد النظام الأساسي للمحكمة قد قرر بإضافة جريمة العدوان إلى الجرائم التي تختص بها المحكمة لأن هذه الجريمة
لم تكن قد أجيزت بعد خلال المؤتمر الدبلوماسي الذي عقد في روما في عام 1998م وتقرر في ذلك الوقت الانتظار حتى ايجاد تعريف واضح لجريمة العدوان
وذلك لأن اسرائيل والدول العظمى وقفت عقبة في ذلك الوقت أمام إضافة جريمة العدوان للدرائم التي تختص بها المحكمة,,, والآن وقد أجاز جمعية الدول الأطراف - خلال المؤتمر الاستعراضي الذي عقد في كمبالا - اوغندا- فإن المسؤولين عن جرائم العدون, وفي مقدمتهم المسؤولين الاسرائيليين, سيواجهون تهما
تحت بند جريمة العدوان....
ونزيد بأنه من الصعوبة بمكان أن يصدر مجلس الأمن قرارا بإلزام الدول الأعضاء في الأمم المتحدة التعاون من أجل القبض على الرئيس السوداني من دون موافقة الاتحاد الروسي والصين لأن هاتين الدوليتين لهما حق الفيتو- حق النقض- لنقض أي قرار يصدر من المجلس ..إلا اذا مارست الولايات المتحدة ضغوطا عليهما
و لايبدو أن الادارة الأمريكية ستيعى من أجل ممارسة هذه الضغوط لأنها أصلا لا تعترف بالمحكمة الجنائية الدولية على الرغم من أنها تصرح
من وقت لاخر بأن على الرئيس السوداني التعاون مع المحكمة والمثول أمامها لتبرئة نفسه....
ولذلك نجد أن الرئيس السوداني يسافر خارج السودان دون خوف من امكانية القبض عليه لأنه يعلم بأن الدول الأ طراف في المحكمة لا تريد وضع نفسها أمام تهمة قرصنة جوية, وخاصة فرنسا والمانيا وبريطانيا التي تمتلك القدرات الجوية لاعتراض اي طائرة في الأجواء الدولية و لاتريد أن تفعل ذلك دون أوامر من أمريكا
ولكن اذا قررت أمريكا فعلا تقديم الرئيس السوداني للمحكمة بالقوة فهي قادرة على ذلك ولكن بعد الحصول على تعاون الاتحاد الروسي والصين ,,, وفي حالة رفض الصين وروسيا فإنها يمكن التأثير على الدول الأوروبية واسرائيل بالقيام بالقرصنة الجوية لاختطاف طائرة الرئيس السوداني حتى من الأجواء السودانية,,,
وحتى يحين الغضبة الأمريكية وصدور قرار من مجلس الأمن الدولي فإن الرئيس السوداني في مأمن كامل,,, ولكن هل سيطول الانتظار,,, الكل ينتظر ما سينجم عنه
استفتاء عام 2011م.
|
|
 
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: اميرة السيد)
|
الاحالة من مجلس الامن الى الجنائية
والجنائية الى مجلس الامن
ليهدف مجلس الامن بقوة ممزقا شباك السودان مستخدما الفصل السابع
هذه هى الالية واذا لم يتعاون السودان فانه سيدخل فى شرنقة عقوبات لن ترفع الا بعد ثلاثة قرون!
اى كلام فير دا يا اميرة ما تاخدى بيهو!
ظللت فى هذا المنبر اهاجم اوكامبو وجنائيته واحذر ان المستهدف هو السودان وليس البشير وتمنيت على المؤتمر الوطنى والبشير ان يترفقا باهل السودان ويخرجاه من هذه الورطة!
والان وقد صدرت المذكرة الثانية وهى تهمة ثقيلة وغليظة لافكاك منها ولم يعد من الوقت متسع للمماطلة والبشير راسه والف سيف فقد ضاع السودان والبقية فى حياتكم
جنى
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: jini)
|
| Quote: ظللت فى هذا المنبر اهاجم اوكامبو وجنائيته واحذر ان المستهدف هو السودان وليس البشير وتمنيت على المؤتمر الوطنى والبشير ان يترفقا باهل السودان ويخرجاه من هذه الورطة! |
يا جني، طالما إنت مقتنع بأن المستهدف هو السودان ، طيب كيف عاوز البشير يسلّم نفسه أو يتنحي؟؟!!
طالما المستهدف هو السودان حسب قولك فمعناتها سواءَ قعد البشير أو رقد فإن غلوتية المحكمة الجنائية لن تنتهي لأنهم سيطالبون ببشير آخر وآخر .. حتي تتحقق أهدافهم ..
الغرض الرئيسي من هذا التربص هو تعويم السودان في الفوضي مثل العراق وافغانستان والكونغو حتي يسهل نهبه بواسطة أمراء الحرب .. وتعويم البلاد في الفوضي هو أسهل طريقة لطرد الصين وطرد الاستثمارات وجعل البلاد مرتعاً للصوص اليورانيوم والمعادن والنفط وتجار السلاح والمخدرات ووو أي حاجة ممكن تدمِّر الإنسان الأفريقي سلالة القرود - حسب مفاهيمهم - وخاصة لو كان ذاك الافريقي مسلم، وبالأخص لو كان عربي !!! ..
عصابات المعادن الشغالة في الكونغو طياراتهم تنقل السلاح بالغالي للأفارقة الأغبياء هناك وياخدوا منهم الكوبالت والمعادن النفيسة ببلاش .. لوران ديزيريه كابيلا في أثناء زحفه علي كينشاسا كان already باع ثروات الكونغو للشركات الغربية بالكوم مقابل حفنات من الذخيرة والرشاشات ..وبعد فترة بسيطة من انتصاره علي موبوتو سيسيسيكو كوتاقونقي موزابانقا عرف إنو الدنيا آخرها كوم تراب وما شال منها التكتح !!..
وده برضو ممكن يحصل في الجنوب .. يبيعوا ليهم السلاح لقتال الشمال وهم يلغفوا البترول .. وممكن نفس الفلم يتكرر في دارفور .. طبعاً هم يوماتي بيخترعوا أنواعاً متطورة من السلاح يحتفظون بها ويبيعوا القديم لبهايم افريقيا عشان يكتلوا بعض بأيديهم وما يخسروا فيهم طلقة ..
الشغل واضح وضوح الفيلة ..
.
.
وتحية للأخت أميرة ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
منير:
Quote:
وده برضو ممكن يحصل في الجنوب .. يبيعوا ليهم السلاح لقتال الشمال وهم يلغفوا البترول .. وممكن نفس الفلم يتكرر في دارفور .. طبعاً هم يوماتي بيخترعوا أنواعاً متطورة من السلاح يحتفظون بها ويبيعوا القديم لبهايم افريقيا عشان يكتلوا بعض بأيديهم وما يخسروا فيهم طلقة ..
الشغل واضح وضوح الفيلة ..
|
و مال الصين تبيع بطاطس لحكومة السودان مقابل كركدي؟؟!!
الصين هي أكبر مشتري لبترول السودان و الصين هي أكبر مورد أسلحة لحكومة السودان ...
ما ياهو الفيلم ده شغال منذ الإستقلال و الآن الشغل واضح وضوح الفيلة: حكومة النخبة المكنكشة في الحكم تبيع البترول برخص التراب و تستورد أسلحة فتاكة تقتل بها مواطنيها في دارفور و الجنوب و الشرق و جبال النوبة و النيل الأزرق ...
هسي بس بقت ليكم حارة و الشغل بقي ليكم واضح وضوح الفيلة عندما قررت دول الغرب دعم دولة الجنوب الوليدة بأسلحة تدافع بها عن نفسها؟؟!!
إنتو يا ناس كريت ... السويتو في القرض تلقوه في جلدها ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Mohamed Suleiman)
|
| Quote: هسي بس بقت ليكم حارة و الشغل بقي ليكم واضح وضوح الفيلة عندما قررت دول الغرب دعم دولة الجنوب الوليدة بأسلحة تدافع بها عن نفسها؟؟!! |
أبو الزفت .. محمدسليمان - ما شاء الله - جايي بمكنة معمَّرة .. حمدللالك بالسلامي آزول ..
الفرق بين الصين والغرب أن الصين تريد التعامل مع بلد واحدة مستقرة لتفيد وتستفيد .. بينما أولياؤك عاوزنها خربانة ومفرتقة ويقتل فيها بعضتا بعضاً علي أسس دينية وعرقية وجهوية .. الصين ما عندها معانا صراع حضاري بينما أولياؤك تحركهم الصهيونية الذين قال الله فيهم "لتجدن أشد الناس عداوة للذين آمنوا اليهود .." .. الصين تريد العمل مع الافارقة بينما أولياؤك يريدوننا مخزن موارد ونفايات في نفس الوقت ..
وفي الآخر لا أولياؤك ولا الصين كايسين مصلحتنا عشان خاطر عيوننا - لكين طالما هم شايفننا بهايم ممكن نقتل بعضنا عشانهم ونبيع ليهم مواردنا ببلاش ، يبقي ما بيهمهم - إن شاء الله نعدم نفاخ النار باللغة بتاعة بقي ليكم حار وبقي ليكم بارد دي ..
هدفهم يخلوا العراق، مثلاً، غرقان في الدماء كده بينما البترول ينزف منه بلا حساب .. هدفهم يخلوا افغانستان كده لايصة مابين كرزاي وطالبان بينما ينهب الليثيوم اطنان أطنان .. ممكن بكرة يصرفوا للجنوب تعويضات ويغروه بالإنفصال وبدء الحرب علي الشمال ويفتحوا ليهو مخازن السلاح البايت يحارب بيهو الشمال مقابل السيطرة علي حقول النفط .. وهكذا إنت برضو ممكن يستفيدوا من حقدك ويغذوه لغاية ما تطرشق ويدوك سلاح بالكوم لغاية ما تبيع ليهم دارزغاوة بلاش .. المهم عندك إنهم يضربوا ليك ناس الشمالية أو يدوك سلاح تضربهم إنت ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: jini)
|
Quote: البشير ذريعة اذا ذهب فسيحرج امريكا واذا لم يذهب فابشر بالفصل السابع
جنى |
طيب يا جني وصِّل كلامك للآخر .. إذا كان غرضهم الفصل السابع المانعهم شنو؟ يعني لو البشير سلّم نفسه وناس المؤتمر الوطني ديل الواطة دي إنشقت وبلعتهم حيحصل شنو؟؟ وهم مستهدفين السودان علي شنو؟ ومستهدفين فيهو شنو؟؟ .. هل مستهدفين الناس أم مستهدفين موارد السودان ؟؟ .. إذا كانوا مستهدفين الناس يبقي قاصدينك إنت وقاصدين ذريتك كلها .. ولو ذهب المؤتمر الوطني أم لم يذهب كله عندهم واحد .. ولو قاصدين موارد السودان مافي زول منعهم ولم يعترضهم أحد .. إلاّ يكونوا عاوزين السودان يطرد الصين التي تمكنت بعمق في افريقيا من بوابة السودان .. يعني بالواضح كده يا تطردوا الصين يا نطربقها فوق راسكم - ما مهم الرئيس يكون منو .. البشير أو الصادق أو غيرهم ..
الخازوق الكبير الركبته الإنقاذ للغرب هو تمكين الصين في افريقيا وهو مهدد رئيسي للغرب وهيمنة الغرب ..
لو بكرة البشير مشي ليهم وقال أنا أهو حاكموني وخلوا السودان حيقولوا جيبوا رئاسة القوات المسلحة كلها، وبعدها مجلس الوزراء كله وبعده موسي هلال وبعده جيبوا لينا الصادق بتاع مذبحة الضعين، وبعده عبدالرسول النور وبعده وبعده .. وسبحتهم ألفية.. الغرض واضح وضوح الفيلة ..
ياخ أمريكا ذاتها ما معترفة بالجنائية وترفض تسليم مجرميها لها وهم الذين ظلت جرائمهم متلفزة علي مر السنين .. يمين ديل تديهم إيدك يقطعوها ليك ويقولوا ليك جيب كراعك كمان ..
قال يحرجهم قال .. إنت قايل ديل كمان بيعرفواالحرج .. ديل ماشين بحكمة البتقدر عليه ولا حرجاً عليه !! ..
يازول ديل عندما قرروا غزو العراق ما اشتغلوا بالعالم كله الطلع مظاهرات في كل أنحاء المعمورة ضد بوش وضد الغزو .. وفي الآخر بكل بساطة جو قالوا اسلحة الدمار الشامل كانت كذبة كبيرة .. وبكرة حيجوا يقولوا مالقينا إبادة جماعية في دارفور، لقينا يورانيوم مخصَّب ساكت ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
| Quote: ولذلك نجد أن الرئيس السوداني يسافر خارج السودان دون خوف من امكانية القبض عليه |
أميرة الســـيد أزيك
وين قاعد يســافر الزول دا بره من غير خـــوف؟
سفراتو دي زي الزول القاعد يلعب أم الحفــر  كدا خليهو يفط ليهو واحد من حدود دول الجـــوار ديل
ليس من مهمة أوكامبو القبض على البشير فأوكامبو قد قام بما يليه على أكمل وجه ، ومسألة مثول الرئيس أمام المحكمة ليست أكثر من مسألة وقت فقط والمجتمع الدولي صبر 18 سنة حتى تم القبض على رادوفان كراديتش الزعيم الصربي السابق الذي ارتكب المجازر في البوسنة والهرسك ، ولذلك فإن البشير سوف يمثل أمام المحكمة عاجلاً أم آجلاً وما راح يحلو منها إلا الموت ، تعامل الإنقاذ مع ملف المحكمة الجنائية تعامل غير سليم أطلاقاً إذ ينبغي أن يتعاون السودان مع قرار المحكمة ، وما تقولي لي سيادة ورمز السيادة والاسطوانة هذه المحكمة لا تصــدر قراراتها على حسب الجنس أو النوع أو الديانة وبالتالي علينا فقط الانتظار... الخلاف بين ما ذهب إليه أوكامبو وبين السودان هو فقط في مسألة تقدير عدد الضحايا الذين سقطوا وليس في ارتكاب الفعل أو الجرم وذلك باعتراف الحكومة السودانية نفسها .. ويتحمل البشير المسؤولية بصفته القائد الأعلى للقوات المسلحة التي تأتمر بأمره ، حاجة أخيرة يجب تثبيتها وهي اثبات مبدأ المحاسبة والعدالة لكل من يرتكب جرما في حق الشعب السوداني كله أو جزء منه ودي حاجة مهمة جدا .. عشان اي واحد تسول نفسه ارتكاب انتهاكات يرعوي قبل أن يقدم على فعله.
تحاياي
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: الامين موسى البشاري)
|
| Quote: ولكن على الرغم من ذلك فإن الدول الحليفة للسودان ستطالب المحكمة بإدانة المسؤولين الاسرائيليين |
الجنايئة لا تحقق فى اى قضية من تلقاء نفسها بل تحال اليها القضايا من جهات اخرى اهمها مجلس الامن كما فى حالة السودان
و فى حالة اسرايئل بالذات فقد رفضت حكومة ابو مازن احالة تقرير تحقيق دولى شهير الى مجلس فى صفقة
فساد تتعلق بابنه لذى كان يدير شركة اتصالات لها مصالح مع اسرايئل,و بهذا تم تفويت فرصة تاريخية كانت كفيلة بوضع زعماء الدولة العبرية فى نفس مكان البشير
امر اخر يا سيدتى, العبرة ليست بتمكن اكامبو من القبض على البشير, بل فى الوضع المحرج و غير المسبوق الذ يعانيه السودان, اذ لا يتمكن راس الدولة من زيارة معظم دول العالم و خصوصا التى تقرر مصائر البشر فى كرتنا الارضية. انه امر بائس و محزن و مثير للشفقة ان تكون مجرد زيارة الريئس لدول الجوار امر يعد فى مصاف الفتوحات و الانتصارات التاريخية
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
حبيبنا منير
تحيه وتقدير
شكلنا كده البوست ده حنقعد فيهو كتير مع بعض
| Quote: الفرق بين الصين والغرب أن الصين تريد التعامل مع بلد واحدة مستقرة لتفيد وتستفيد |
يا سيدي أول حاجه قبل ما نشوف الغرب ونشوف الصين وخطتهم الجايين بيها السودان كده خلينا نتفق على حقائق معينه واحد اتنين تلاته , بعد داك نشوف ناس بره جايننا بي ياتو اجنده ...
أول حاجه انا شايف اننا كسودانيين مشكلتنا الاولى في تعريفنا للسوداني ذاتو , ودي قضيه حقيقيه صعب انكارها من اي شخص ينظر لواقعنا بتجرد .
تاني حاجه النظم السياسيه القامت في السودان جميعها ما كانت بتعبر عن كل السودانيين , ودي برضو حقيقه فكان هناك على الدوام تذمر في منطقه ما لعدم شعور الناس هناك بأن السلطه تعبر عنهم ...
تالت حاجه في مظالم تاريخيه لها جذور اجتماعيه ما وجدت اي عمل جادي لاحتوائها فكان هناك على الدوام فارق نفسي بين مكونات السودان البشريه , والفارق النفسي ده ادى لفوارق تانيه ...
اذن اسباب الصراع هي اسباب داخليه في المقام الاول قبل ما تتدخل امريكا او الصين في الموضوع ...
كيف تعاملت الدوله مع اسباب الصراع الحقيقيه؟
الدوله تعاملت مع الاسباب الحقيقيه بطريقه (بيع الريش) الشهيره , واعتمدت على حلول عسكريه و ترضيات ولم تنتهج منهج شامل واضح يعالج جذور المشكله , لذلك كل ما تنجح الدوله في تدمير حركه متمرده مسلحه , أو توقع معها اتفاق , تظهر حركه تانيه , الحال ده كان في الجنوب وهو ذات الحال في دارفور , (اضرب واقصف ,اشتري ذمم البعض !)...
الحال ده كان في الجنوب واستمر وما كان ليهو تداعيات كبيره مثل الذي حدث في دارفور , والسبب في تقديري هو ثوره المعلومات فقط , وده هو الذي ادى برضو للتدخل الدولي في القضيه لأنها اصبحت قضيه رأي عام في كثير من الدول بفعل مجهود جبار قام به ابناء دارفور ,
حتي صدرت المذكره بجلب الريس ....
اذن تعامل الدوله مع تلك الحقائق الموجوده على الارض هو الادي للتدخل الدولي , والمعروف ان الغرب لا يتعامل مع الانظمه الدكتاتوريه (الريحتها فايحه) فقط لتعرضه لضغوط داخليه في المقام الاول وده الخلى الحكومه تلجأ الى الصين , والصين دوله معروفه للجميع بأنها من اكبر دكتاتوريات العالم .
المشكله يا منير ان بعض الافراد ما قادرين يعرفوا ان مسأله العداله دي بالنسبه لأهل دارفور اصبحت مسأله اهم من المطالب الي من اجلها رفعوا الناس السلاح , ولا يمكن ان يتم توقيع سلام بدون محاسبه المسئولين عن الجرائم الكبيره التي حدثت , والساعد الناس دي ما تعرف الحقيقه دي او تحسها هو الفارق النفسي الاشرت ليك عليهو قبيل , للاسف الشديد هناك من ينظر لما حدث في دارفور بدم بارد , وكأن هؤلاء ليسوا شركاءه في الوطن , وهنا تكمن الخطوره ...
هل لو خرج بعض الشباب على السلطه في حلفا وقامت السلطه بقصف حلفا وتدمير بربر ودنقلا وقتل الالاف , هل كان سيكون موقف هؤلاء ذات الموقف ؟!! لا والف لا , ولكانو طلبوا عون اسرائل ذاتها للتخلص من هذا النظام , اذن الفارق النفسي ده هو الخطر الحقيقى الان بالنسبه لوحده البلد ...
بعض العقلاء المدركين لحقيقه طلب العداله قدموا بدائل للمحكمه الجنائيه , وهي المحاكم المختلطه , لكن للاسف برضو الدوله ونتيجه غرور ما عارف جاي من وين رفضت وتعنتت ومازلت ...
في كل ما تقدم تجد ان الدور الخارجي كان انعكاس لأوضاع داخليه وليس العكس , لا اعتقد ولا اقبل اي حديث عن عملاء وخونه و .... الخ , بل توصلت لحقيقه نتيجه تجارب خاصه ان اكثر من يردد ذلك القول هواكثر الناس خيانه لمصالح الامه , ومافي زول بيطلع من بطن أمو عميل أو خاين .... لذلك الخارج ده امر ثانوي في الصراع السوداني ...
الان ونحن واقفين على اعتاب انفصال الجنوب , هل تعتقد يا منير ان أهل دارفور وأهل الشرق الما شاعرين ان الدوله دي بتعبر عنهم وعن آمالهم وتطلعاتهم حيفضلوا في الدوله بعد ذهاب الجنوب , بذات الشروط التي رفضها الجنوب , قطعا لا ...
موضوع اوكامبو ده انا برشح انو حيكون القشه التي ستقصم ظهير البيعير الرابط بين ما سبيقى من السودان ودارفور , خاصه لو استمر تصوير ان البشير مستهدف للكيان المنتمي له وليس لشخصه , كده انت بتضع فواصل بين أمه واحده أو (مفترض تكون كذلك) وتقسمهم الى قسمين قسم يرى في مذكره الجلب عداله له وقسم يرى فيها استهداف له وعندها ستزيد الهوه وحتذهب دارفور ...
طبعا مسأله ان البشير سيستطيع الافلات لأن اوكامبو يده مغلوله كما ذهبت اختنا صاحبه البوست , فده ذاتو البنج البنغش بيهو نفسنا , اكثر من نصف الكره الرضيه الان (محرمه) على رئيس الدوله , بفعل قوانينها الداخليه التي ستلقى القبض عليه فورا , والنصف الاخر يخضع لنفوذ لاعبين كبار سيستغلون علاقاتهم للتضييق عليه أو لارخاء القبضه حسب الحاجه , وفي اخر المطاف هناك طريقين فقط للتخلص من ملاحقه الجنائيه الاولي التسليم , وانا شخصيا بأيد هذا الكلام يسلم الحكم لنائبه الثاني أو لمن يتف عليه ويمشي يسلم نفسوا ويواجه مصيرو , والتاني (ينتحر) على قول السيد ادوارد لينو ...
الا الكنكشه فيهو بدعوى الوطنيه والسياده فده هو الحيفتت السودان ... وبرضو ما حينفد من الملاحقه...
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: مجدى محمد مصطفى)
|
مرحبتين بالحبيب اللدود مجدي محمد مصطفي .. ياخ بصراحة أنا زاتو داير زمن اتناقش معاك برواقة بدون احكام إستباقية علي النوايا .. طبعاً من ناحية النوايا دي أنا وناس محمدسليمان وتاج الدين عبدالله آدم وآخرين خاتينه قرض ..
أول شئ هناك مفاهيم أنا أتناقشت فيها مع أخونا أبكر آدم اسماعيل تتعلق بمصطلح التهميش وأهل الهامش وتعريف المهمشين تجده في البوست . ابكرآدم اسماعيل: حول المركزوالهامش.
وحاولت كثيراً أن ألفت النظر أن التهميش لا يجب أن يعرَّف بالسحنات والجهات والقبليات، لكين اصحابي ديل مصرِّين بأنك إذا كنت من الوسط أو الشمال فأنت ذو حظوة بالميلاد حتي لو كنت فقير معدم، وفي المقابل إذا كنت من الغرب أو الجنوب فأنت مهمش بالميلاد حتي لو كنت ملياردير !!!..
إذا ظلت هذه هي معطياتكم ومدخلاتكم لحلول المعضلة يبقي كمن بحاول إثبات تساوي طرفي متطابقة مثلثية وبعدما يملأ صفحتين يصل للحل وهو أن الطرف الأيمن يساوي الطرف الأيمن !! .. لازم تقتنعوا أن كل السودان مهمش .. ولطالما ضربت لكم مثل بحال المواطنين الساكنين علي بعد كيلومترات قليلة من الخرطوم يتجارون خلف القطار من أجل قطعة خبز يابس يرمي لهم من ركاب القطار .. ما سمعت حميد يقول: شفَّع العرب الحياري يجروا صابقين القطارا ؟؟ ..
الشئ التاني مفروض برضو نقر بأن هناك تباين إجتماعي إثني وثقافي وجهوي وكل حاجة.. الشئ الوحيد الذي يوحد بين ٨٠ في المية من أهل السودان هو الاسلام - ثم اللغة العربية - دعك من كلمة عروبة عشان ما يجينا عزام كمان ينط لينا في رقبتنا .. أها طالما العاملين ديل هما رباط وحبل متين بيننا مفروض ما نفرط فيهما .. لأنه بدونهما مافي حاجة بتلمنا مع بعض .. وذلك لأنو السودان زاتو بلد قارة والمواصلات زاتها مافي !! .. يعني أنا أهلنا في الشمالية القصوي ما بشوفهم إلاّ في الخرطوم .. والخرطوم - أو قول الوسط كله - هو وسطية السودان وبؤرة الشعور التي نأتي إليها كلنا من جميع الجهات ونتعارف وننصهر بالهداوة .. نتخلي عن طنبورنا وطارنا وام كيكينا ونسمع لوردي ومحمدالأمين وعبدالقادر سالم وعثمان حسين واسحاق الحلنقي .. وتسير الحياة في بوتقة الوسط التي نأمل أن تنجض فيها هذه العصيدة البشرية وتشمل دائرتها كل البلاد رويداً رويداً .. و الحَلّة دايرة صبر !! ..
حكاية الحكومة قاصدة ناس الغرب دي حنك ما مقنع .. وذلك لأننا شهدنا أن أكثر ناس احتشدوا لنصرة البشير حين صدور المذكرة الأولي هم أهل دارفور حيث رأينا شيوخ وعمد وفرسان قبائل الفور والزغاوة والمساليت خرجوا زرافاتاَ ووحداناَ لإستقبال البشير في الهواء الطلق وآخر عرضة ورقيص ورؤوس مربوطة بأشرطة حمراء وخضراء لزوم الجهاد !!.. ولو جينا لعنف السلطة ضد الآخرين عندك الضرب بالذخيرة للمواطنين العزل الذين خرجوا في مظاهرات سلمية ضد السدود في المناصير وكجبار .. ناس عزل في مظاهرات سلمية ضرلوهم رصاص فما بالك بجيوشكم المتمردة التي حملت السلاح وبادرت بالهجوم علي منشئات حكومية وبدأت حرب مسلحة مفتوحة ..؟؟ .. و..و..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: كمال عباس)
|
الصين هي أكبر مشتري لبترول السودان و الصين هي أكبر مورد أسلحة لحكومة السودان ...
ما ياهو الفيلم ده شغال منذ الإستقلال و الآن الشغل واضح وضوح الفيلة: حكومة النخبة المكنكشة في الحكم تبيع البترول برخص التراب و تستورد أسلحة فتاكة تقتل بها مواطنيها في دارفور و الجنوب و الشرق و جبال النوبة و النيل الأزرق ...
كلامك كلا م اعلام غربى يااخى مجدى وكلام عايم بدون ادله
ما قاله الاخ منير هى الحقيقه بعينها
السودان مستهدف من قوى صهيون العالم
وبقيادة الولايات المتحده
القضيه التاريخيه فى الجنوب زرع بزرتها الاستعمار
قضية دارفور تبنتها يهود العالم
وكذلك اتهام البشير
واغتيال جون قرنق
الحظر الاقتصادى المدمر الذى سبق كل هذه الاحداث
هى كلها لمحاوطة عنق البلاد ولاحزاب المعارضه ايضا ادوارها
فى توطين القضيه وتمكّّنها
التحيه للجميع
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: خيرى بخيت خيرى)
|
الاخ خيري
سلامات
Quote: كلامك كلا م اعلام غربى يااخى مجدى وكلام عايم بدون ادله
ما قاله الاخ منير هى الحقيقه بعينها
السودان مستهدف من قوى صهيون العالم
وبقيادة الولايات المتحده |
مع اني ما صاحب الكلام الذي بنيت عليه حديثك اعلاه لكن لا بأس سارد عليك لتوضيح بعض الحقائق ...
أول حاجه انا دايرك تتفق معاي في اننا كسودانيين تعرضنا لعمليه خداع ممنهجه مع سبق الاصرار والترصد لتمليكنا كثير من المقولات والمسلمات الكاذبه منها استهداف بني صهيون كما تفضلت ... وما يتعلق بهويتنا كسودانيين , و اجزاء من تاريخنا ايضا ...
الحاجه التانيه في السياسه الدوله والسياسه بصوره عامه ليس هناء اعداء دايمين ولا اصدقاء دائمين بل هناك مصالح دائمه , بذلك فأن كل دوله تبحث عن مصالحها مستغله الحقائق الموضوعيه والظروف الراهنه لتحقيق تلك المصالح , وقد تتعارض تلك المصالح مع مصالح دوله اخري , والحشاش بيملى شبكتو ...
التسليم بالاستهداف الخارجي ساهم في تكاسلنا عن البحث عن حلول موضوعيه لمشاكل حقيقيه موجوده في مجتمعنا السوداني منذ الاستقلال بل ما قبل الاستقلال , فموضوع الجنوب فضلنا دوما نردد في ان البذره بذرها المستعمر , وان الحركات الجنوبيه حركات مرتهنه لبني صهيون ... الخ , وده كلوا خلانا نتقاعس عن مواجهه تلك لمشاكل بعقل متفتح وبدون تنميط ... كده اسأل نفسك يا خيري ليه نيفاشا دي ما وقعت قبل 20 سنه مثلا أو 40 سنه ! ليه الدوله السودانيه ما اتخذت قرار استراتيجي بوقف الحرب بدون ضغوط خارجيه , بل لماذا تنكر الاباء الاوائل لوعودهم للجنوبيين بالكنفدراليه عند الاستقلال ! ؟ ...
كل ده لأننا ركنا للتنميط , ومن بعد وبعد ان تفاقمت المسأله وتدخلت الدول البتسميها صهيونيه دي رضينا ندي الجنوبيين حقوقهم بل نديهم تقرير المصير الما كانوا بيطالبو بيهو في يوم من الايام ...
انت نسيت ايام كانو بيصورو لينا الدكتور جون قرنق بأنه الشيطان الرجيم وبيجيبو في التلفزيون وعاملين ليهو دبلجه بصوره دراكولا ومصاص الدماء ولا لسه متذكر , مش ياهو ذاتو قرنق الانت الان بتتحسر على موتو وبتتهم بني صهيون انهم قتلو ! , هو ذاتو ولا واحد تاني !! ليه بتتحسر علي موتو الان ! مش بعد ما عرفت كذب ما لقنوك ليهو ولينا جميعا بأنه عميل وخائن و و ... الخ من الكلمات الحفظونا ليها ...
طيب انت عندك مشكلات داخليه وعندك مواطنيين حاسين بالغبن والظلم تتصرف كرجل دوله واعي وتواجه المشكله دي بأمانه ولا تخدع شعبك وتقودو الى حروبات فقط لتجر الطرف المتظلم على الرضوخ لأرادتك ؟ ...
الحقيقه الما مفترض يتناساها الناس ان السلام ونيفاشا التي اوقفت الحرب وجعلت السودانيين يعرفون حقيقه قرنق ويبكون على موته جاء بضغوط أمريكيه صرفه ولم يأتي عن قناعه كامله من الطبقه السياسيه السودانيه بأستحاله اخضاع الجنوب , لذلك نسمعا ورأينا تعنت الطرف الحكومي في النتفيذ .
يعني يا خيري بني صهيون ديل ما كلهم شر مطلق و ما اي فشل أو عجر نعاني منو معناها منهم , بني صهيون ديل عندهم حاجات سمحه كتير وانجازات كثيره لتتمتع بها البشريه كلها فأرجو ان نكون موضوعيين في انتقادنا للغرب وعدم الانسياق مع المقولات الكاذبه التي غذونا بها منذ الصغر.
كده وريني سبب واحد يخلي بني صهيون يستهدفوك , دينك مثلا!!! طيب ليه ما يستهدفوا السعوديه منبع الرساله وقبله المسلميين ,
خيراتك؟! , برضو ليه ما يستهدفو السعوديه العندها اكبر احتياطي نفط في العالم العربي والمسلم ...
اذن الموضوع موضوع مصالح , وانت عشان تأمن مصالحك وتحافظ عليها من اي طمع لازم تحافظ على تماسك بيتك أولا , اهه انت بيتك تمارس فيهو اباده جماعيه ! وداير سكان البيت ديل تفضلوا راجنك لغايه ما تبيدهم بالمره ! , ده تفكير غير عقلاني , وحيدي الاخرين فرصه ان يتدخلوا في بيتك , وما بينفع صراخك بأني مستهدف لذاتي ... لما يتدخلوا الاخرين
للدكتور جون قرنق مقولات مرحه كثيره عن الخطاب الحكومي بالاستهداف , فقد سأله صحفى عن حقيقه التهم الحكوميه لهم بأنهم يخدمون قوي اجنبيه كان رده ( اسي لو انت مشيت عشان تنوم , وقمت ربطت الناموسيه بتاعك , وما قفلتها كويس , دخلت باعوضه عملت ليك ازعاج , وممكن ملاريا , منو الغلطان ؟ انت ولا الباعوضه) ؟!!
بالفعل منو الغلطان يا خيري انت ولا الباعوضه !!!
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
اختنا العزيزه اميره السيد
تحيه واحترام
معليش خشينا المره الفاتت من غير منا نسلم عليك فعذرا
------------
حبيبنا منير ...
| Quote: أول شئ هناك مفاهيم أنا أتناقشت فيها مع أخونا أبكر آدم اسماعيل تتعلق بمصطلح التهميش وأهل الهامش وتعريف المهمشين تجده في البوست |
شكرا على الرابط المفيد وحقيقي تابعت البوست كلو وهو حوار ممتع جدا ...
انا اختلف مع المقوله الشائعه بأن كل من هو شمالي هو عروبي وهو صاحب حظوه بالميلاد , واختلافي هذا لا يتعارض مع حقائق ثابته تتلخص في ان كل من حكم السودان هو شمالي واورث أهله وذريته (الاقربون) حظوه الميلاد بسبب انتشار المحسوبيه والفساد , والحقيقه الثابته الاخري ان الدوله السودانيه تبنت العروبه والاسلام كمرجعيات ثقافيه وايدلوجيه للدوله وموجهه لها, ومع ذلك فان الاغلبيه من الشماليين ظلو مهمشين أي يفتقرون الى ابسط حقوق المواطن على الدوله مثلهم مثل الاغلبيه من سكان السودان الاخرين , واعتقد جازما انه لولا الخليج العربي الذي استوعب اغلب طاقات الشمال المتعلمه والمثقفه وغيرها لشهدنا تمرد مسلح هناك ...
جدل المركز والهامش يا منير جدل طويل وعميق ولا اعتقد اننا لدينا من الوقت ما يكفي للوصول به الى خلاصات ترضي الجميع , خاصه وان الاحداث المتلاحقه اصبحت تهدد الكيان كله ... فالجنوب بعد عده شهور سيقرر مصيره وكل الشواهد تقول بأنه سيذهب نحو الانفصال , وانفصال الجنوب سيمهد الطريق لدارفور وغيرها من المناطق التي تتصارع مع المركز حول الحقوق ...
لدينا الان قليل من الوقت للوصول الى الحد الادني من التوافق لحفاظ على هذا الكيان كمصلحه عليا لنا جميعا شماليين وجنوبيين شرقيين وغربيين مسلميين ومسيحيين ولا دينيين , ...
الوحده تحقق لنا جميعا على مختلف مشاربنا مصالح حقيقيه وتجنبا مزالق لا قدر الله يمكن ان تقودنا الى ما لا يحمد عقباه : فكيف السبيل للوصول الى الحد الادني من التوافق الذي يضمن لنا جميعا تلك المصالح ؟...
وهذا لن يتأتى الا في ظل دوله علمانيه ديمقراطيه , من شاء فاليؤمن ومن شاء فاليكفر , رغم قناعتي الشخصيه بأن الاسلام دين العدل ودين الرحمه وهو ما يجب ان يحكم به الا ان الفشل في التطبيق والاثار التي ترتبت على ذلك جعلتني انادي بالنظام العلماني الديمقراطي ...
وعلى ذلك التظام الديمقراطي القيام بالخطوات التاليه ضمن خطوات اخري لضمان الوحده :
اولا لابد من مراجعه (هويه) الدوله السودانيه التي تبنت في السابق الهويه العروبيه والاسلاميه كهويه جامعه ويتم استبدالها بالهويه السودانيه أي ان الدوله تصبح محايده مع كل الثقافات السودانيه فلا تفضل ثقافه على اخري ولا دين على اخر ولا عرق على اخر في كل ما يتعلق بالدوله , واعتقد ان هذا مطلب منطقي وواقعي و يمكن تطبيقه بعيدا عن تجاره الدين و العاطفه و سيساعد لبناء الوحده .
ثانيا لابد من معالجات تضمد جراح الماضي البعيد أو القريب للمجموعات السكانيه التي انتهكت حرماتها الدوله في سعيها لضمان الوحده , ولا اجد اي غضاضه في ان تقدم الدوله اعتذار صريح للمجموعات السكانيه التي حاربتها وارتكبت في حقها جرائم كثيره في الجنوب والغرب والشرق والشمال والوسط أي ان تغتذر للجميع لأن الجميع تضرر من تلك الحرب , وان تعمل على جبر الضرر بتعويضات جماعيه أو فرديه لأحداث نقله نوعيه في حياه المناطق التي دارت فيها تلك الحروب .
ثالثا المسائله , بمعنى انه لابد من محاسبه من قادوا البلد الى هذه النقطه وعلى السودانيين ان يحددوا خياراتهم بخصوص المسائله بوضوح فهناك الاحزاب السودانيه في المعارضه تري ضروره المسائله ولتكن من 30/6/1989 , ويري الاسلاميين (الترابي) حاليا (طبعا الشق الاخر المتسلط مازال يرفض المحاسبه) ان تكون المحاسبه منذ 1/1/1956 , فما وصل اليه السودان من خراب حتي الان شيئ يؤكد أمر واحد فقط وهو لابد من اعلاء قيمه الحساب بالقانون كمبدأ لا حياد فيه ....
وهنا تحديدا تبرز خطوره الخطاب الحكومي التي تصور مذكره الجلب للبشير بأعتباره مهدد لكيان الامه , فتسويق هذا الخطاب بهذه الكيفيه هو رفض صريح لمبدأ الحساب الذي من غيره لن تستقيم اي تسويه سياسيه مهما برع مهندسوها , فاختزال كل الاسباب الموضوعيه لصدور تلك المذكره في الاستهداف (لعروبتنا) أو (لدينا) كما يصوره البعض سيضرب في مقتل كل مجهود يقوم به العقلاء لتدارك وحده السودان , وهنا مكمن الخطوره ...
لذلك نقول لابأس من اتنقاد الجنائيه الدوليه وحتي رفضها ولكن لابد من طرح البديل !
اللغه والاسلام عامل مهم بيجمع بين السودانيين ولكن الاستخدام السياسي لهما جعلهما مصدر شقاق كبير ايضا بين السودانيين , انا شخصيا شايف ان الناس العاديين التواصل بينهم ممكن وليس فيه اي مشاكل وتتازم القضيه باضافه البعد السياسي لها... حتي في الجنوب الغير مسلم هناك مقبوليه للغه العربيه لدي الجميع بل انها في كثير من الحالات تكون لغه للتواصل بين المختلفيين عرقيا هناك ... عربي جوبا ...
ولا اعتقد ان الجنوبيين يرفضون الاسلام كدين ولكنهم رفضو الظلم الذي نمارسه ونلصقه نحن في العروبه والدين
اخلص معك يا اخي بأن موضوع اوكامبو ده لو لم تتم ادارته بعقل مفتوح وبوعي متجرد من العواطف فانه سيؤدي الى نهايه حتميه لأي امل مستقلبي في بقاء دارفور بعد ذهاب الجنوب ....
مودتي
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: الامين موسى البشاري)
|
سلمات يا أستاذة أميرة ..
اجد نفسي علي اتفاق مع ما اشار اليه البشاري من حيث عدم دقة عنوانك..
فالمدعي العام لا يملك صلاحيات القبض او الافراج عن احد..
فتلك سلطة المحكمة وليست سلطة المدعي العام حتى تنسبيها اليه..
وكما تعلمين فان اعلام اهل الانقاذ اشاع هذه الفرضية ..
ليسهل عليه انتقاد المدعي العام سواء في كفاءته المهنية او الاخلاقية كوسيلة لاقناع الرأي العام..
متبعين المثل الشائع ( شايف الفيل ويطعن في ضله)..QUOTE)
<<<<<<<<<<<<<<<<<<<<<<
اظن أن العنوان دقيق لأن أوكامبو المدعي العام هو الذي دائما يتحدث باسم المحكمة وهو الذي يصرح
دائما بأنه وراء البشير حتى القبض عليه حتى ظننا ان له ثأرا قديما ضد الرئيس السوداني ولذلك
ارجعت العنوان له,,, وبعدين أنا من رأي ضرورة تطبيق العدالة حتى ولو كان المتهم رئيس دولة لأن
العدالة يجب أن تسري على الجميع بصرف النظر عن موقع المتهم في الدولة لأن الحصانة اسقط عن المتهم
بمجرد توجيه التهمة له من المحكمة الجنائية الدولية وذلك بموجب نصوص نظام روما الأساسي,,, ولكني
اشرت فقط إلى وجهة نظري بخصوص صعوبة القبض على البشير من دون تعاون الدول الكبرى النافذة في مجلس
الأمن :امريكا وروسيا والصين وفرنسا وبريطانيا ,,, ومن دون قرار من مجلس الأمن يلزم الدول الأعضاء بالتعاون
مع المجكمة .. وحتى اذا حصل هذا فمن الذي سيقنع الصين وروسيا...
الأمين
انا ما نزلت في أي محطة ولكن متابعة تعليقاتكم بالحرف
وجاياكم بمهلة
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: محمد على طه الملك)
|
منير
| Quote: الغرض الرئيسي من هذا التربص هو تعويم السودان في الفوضي مثل العراق وافغانستان والكونغو حتي يسهل نهبه بواسطة أمراء الحرب .. وتعويم البلاد في الفوضي هو أسهل طريقة لطرد الصين وطرد الاستثمارات وجعل البلاد مرتعاً للصوص اليورانيوم والمعادن والنفط وتجار السلاح والمخدرات ووو أي حاجة ممكن تدمِّر الإنسان الأفريقي سلالة القرود - حسب مفاهيمهم - وخاصة لو كان ذاك الافريقي مسلم، وبالأخص لو كان عربي !!! .. |
انا اختلف معك كليا فيي ما ذهبت اليه اعلاه وسأعود لابين وجهه نظري
كن بخير
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Elawad Eltayeb)
|
Quote: الأمين
انا ما نزلت في أي محطة ولكن متابعة تعليقاتكم بالحرف
وجاياكم بمهلة |
أميرة السيد .. مساء الخير
منتظرين عودتك أكييد ... وأنا بحرر ليك في البوست بس
المهم أرجو ان اسمع اجابتك على هذا الســــؤال؟
هل ترين البشير مذنب فيما نسب إليه أم لا؟
ودا مربط الفرس لأن أهل الضحايا يهمهم في النهاية تحقيق العدالة والقصاص من البشير بغض النظر عن من سيحقق لهم ذلك...
كوني بخير
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: الامين موسى البشاري)
|
هل ترين البشير مذنب فيما نسب إليه أم لا؟Quote)
>>>>>>>>>>>>>>>>>>>>>>>>>>>>
الأمين بن موسى البشاري
تحية طيبة
أولا المذنبون هم من حكموا السودان في الفترة التي سبقت انقلاب عام 1989م
والذين فرطوا في النظام الديمقراطي ولولا الطريقة العشوائية التي كان يدير بها رجال الأحزاب
دفة الحكم في السودان لما استطاع عمر البشير والجبهة الاسلامية الاستيلاء على الحكم والدليل أن الشعب السوداني
جميعه رحب بالبيان الأول للمجلس العسكري دون أن يعرفوا هوية من قاموا بالانقلاب وكأنهم كانوا يقولون:" حتى واو
جاءنا الشيطان سنقبل به" وهو نفس الأمر الذي حصل بالنسبة للعراق فقد رحب الشعب العراقي بالغزو الأمريكي للتخلص من نظام
صدام حسين والآن يتباكون على نظام صدام... وكذلك الأمر بالنسبة للسودان تخلص الشعب السوداني من نظام الأحزاب السياسية
وقبول الحكم العسكري تحت قيادة عمر البشير والترابي والآن يتباكون على نظام الأحزاب والديمقراطية...
هؤلاء هم المذنبون الاوائل ... اما عن إدانة عمر البشير ... يجب أن نسأل هذا السؤال أولا: هل من قاموا بتدمير القرى في الغرب
وأغتالوا النساء والأطفال فعلوا ذلك بأوامر مباشرة من الرئيس عمر البشير؟ فإذا كانوا فعلوا ذلك بأوامر مباشرة وهناك شهود بذلك فهو مذنب ويجب
أن يقدم للمحاكمة العاجلة... ولكن من المعروف أن الجنود يتلقون الأوامر من قائدهم المباشر وربما هذا القائد المباشر تصرف من تلقاء نفسه
دون الرجوع للقيادة العليا أو رئيس الجمهورية نفسه ,,, لأنه من الصعوبة ان يتلقي القائد الميداني الأاوامر مباشرة من رئيس الجمهورية وفي هذا
الحال فإنه يتبغي محاكمة قادة الميدان أولا... وبما أن المحكمة الجنائية الدولية لا تحاكم الدول ولكن تحاكم الأفراد فقد كان من الأفضل اسناد المحاكمة لمحكمة
العدل الدولية وهي المسؤولة بمحاكمة الدول وليس الأفراد وفي هذه الحالة فغن ممثلي الدولة هم رئيس الدولة وأعوانه وهم كانوا سيمثلون أمام المحكمة
بقوة السلاح لأن محكمة العدل الدولية عندها الوسائل لذلك بعكس المحكمة الجنائية الدولية التي لا تمتلك سوى التعاون الطوعي للدول..
فما رأيك يا الأمين؟؟
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: اميرة السيد)
|
Quote: اما عن إدانة عمر البشير ... يجب أن نسأل هذا السؤال أولا: هل من قاموا بتدمير القرى في الغرب
وأغتالوا النساء والأطفال فعلوا ذلك بأوامر مباشرة من الرئيس عمر البشير؟ فإذا كانوا فعلوا ذلك بأوامر مباشرة وهناك شهود بذلك فهو مذنب ويجب
أن يقدم للمحاكمة العاجلة... ولكن من المعروف أن الجنود يتلقون الأوامر من قائدهم المباشر وربما هذا القائد المباشر تصرف من تلقاء نفسه
دون الرجوع للقيادة العليا أو رئيس الجمهورية نفسه ,,, لأنه من الصعوبة ان يتلقي القائد الميداني الأاوامر مباشرة من رئيس الجمهورية وفي هذا
الحال فإنه يتبغي محاكمة قادة الميدان أولا... |
حسب اوكامبو ان البشير رفض تسليم احمد هرون و كوشيب كما رفض محاكمتهم داخليا وبالتالي احس
المدعي العام او وصل لقناعة ان الامور كلها او من ورائها البشير. لذلك وجه الاتهام لرأس الحية.
اذا لم يكن البشير مذنبا فمن حقه ان يبعث من مالنا محاميا للترافع عنه. اما حكاية لا يحاكموا مشتبه ولا يسألوه دي ما بتركب في المخ
لانو من ناحية اسلامية لا يوجد مخلوق فوق المساءلة.
كما ان القانون (الوضعي) يعلو ولا يعلى عليه. لو كل واحد مسئول كبير يجرم او يحمي المجرمين ثم يحتمي بمنصبه فما فائدة المحاكم؟ هل هي على بسطاء
الناس فقط؟
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Zoal Wahid)
|
زول واحد
تحية طيبة
لا كبير فوق القانون... وخاصة أن القانون هنا يقف وراءه محكمة دولية مسنودة من الأمم المتحدة
بموجب معاهدة دولية ابرمت في روما لتأسيس المحكمة ولا مجال هنا لأي حصانة دبلوماسية لأن
الحصانة الدبلوماسية تسقط بمجرد توجيه الاتهام كما ذكرت ذلك مسبقا ... ولكن لكي لا نتهم المحكمة بأنها
مسيسة وتنفذ أوامر الدول الكبرى فيجب عليها أن تبحث أولا على من ارتكبوا الفعل المباشر بدلا من أن تبحث عن رأس الدولة أولا
ولكن اذا ثبت بأن رئيس الدولة هو من أعطى الأمر المباشر بقتل النساء والأطفال فينبغي محاكمته وتنفيذ اقسى عقوبة بحقه وعلى المسؤولين
السودانيين أن يتمثلوا بما قاله الرسول صلى الله عليه وسلم:" لو أن فاطمة بنت محمد سرقت لقطعت يدها"".
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: اميرة السيد)
|
Quote: لكن اذا ثبت بأن رئيس الدولة هو من أعطى الأمر المباشر بقتل النساء والأطفال فينبغي محاكمته وتنفيذ اقسى عقوبة بحقه وعلى المسؤولين
السودانيين أن يتمثلوا بما قاله الرسول صلى الله عليه وسلم:" لو أن فاطمة بنت محمد سرقت لقطعت يدها"". |
الاخت اميرة
ماذا نفعل اذا هذا المسئول يحتمي بوظيفته ويرفض المثول امام القضاء او تخويل من ينوب عنه؟
ان من يحمي مجرما فهو بلا شك شريك في الجريمة. الان عندنا في المحاكم اذا اخفى مواطن مجرما فالقانون يحاكم المواطن حتى ولو كان ساذجا.
فما بالك برئيس دولة يرفض محاكمة المشتبه بهم ويقول انهم تلقوا التعليمات منه؟؟
الادلة على تورط البشير كثيرة جدا و اشهرها عبارته التي قالها على الهواء مباشرة للجنود(ما عايز جريح او اسير).
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: اميرة السيد)
|
اميرة السيد ...
مرحب بيك من تأني ... ومع إنك لم تجيبي على السؤال المباشر ولذلك سوف أعيده
| Quote: هل ترين البشير مذنب فيما نسب إليه أم لا؟ |
والإجابة لا تخرج من احتمالين هما
1. مذنب وعليه الامتثال لأمر المحكمة لمحاكمته على ما اقترفت يداه
2. غير مذنب وعليه أيضا الإمتثال لأمر المحكمة ليثبت براءته للجميع.
يعني في الحالتين لازم يمثل امام المحكمة ... ولو عندك احتمال ثالث هاتيهو
| Quote: أولا المذنبون هم من حكموا السودان في الفترة التي سبقت انقلاب عام 1989م |
هؤلاء سيحاكمهم الشعب والتاريخ ... والديمقراطية مع الأسف لم تعطى الفرصة الكافية لكي نحكم عليها بصورة نهائياً ودائما العسكر ينقضون عليها ، ورثت الإنقاذ حرباً واحدة في الجنوب تعالي الليلة دي هناك حرب في الشرق وفي دارفور وفي جبال النوبة وجنوب النيل الأزرق وحتى أهل الشمال لم يسلموا من أذى الانقاذ كالنوبة والمناصير.
Quote: هل من قاموا بتدمير القرى في الغرب
وأغتالوا النساء والأطفال فعلوا ذلك بأوامر مباشرة من الرئيس عمر البشير؟ |
بلحيل يا أميرة أليس هو القائد الأعلى للجيش والجيش يتأمر بأمره؟
Quote: الأفضل اسناد المحاكمة لمحكمة
العدل الدولية وهي المسؤولة بمحاكمة الدول |
محكمة العدل الدولية ليس من مهمتها محاكمة الدول ولكنها مختصة فقط بفض النزاعات بين الدول في مسائل الحدود... أرجو أن تراجعي معلوماتك بهذا الشأن .
سؤال تاني يا أميرة هسي لو في وكيل نيابة وجه ليك تهمة بتدافعي عن نفسك ولا بتقولي دا قاصدني وما عارف شنو؟
حددي مواقفك عشان نعرفك شايتة وين يا أميرة ... تحقيق العدالة شئ مهم جدا ولمصلحة كل الشعب السوداني ، الصباح كان في بوست مولع ما عارفك شفتيهو ولا ما شفتيهو
تحاياي
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: مجدى محمد مصطفى)
|
حبيبنا اللدود مجدي .. أشكرك علي مطالعة ذاك البوست مع دكتور أبكر .. ويبدو أني سأستعير الكثير مما كتبته هناك لتوضيححه هنا أيضاً ..
أولاً حكاية حظوة دى كما قلت لك حقوا تتجاوزوها .. فكلنا نعلم أن المستعمر قد ركز جهوده الإعمارية في وسط السودان حيث ملتقي النيلين وأرض الجزيرة والقطن .. أدخل التعليم النظامي الحديث لرفد دواوينه بموظفين يخدمون النظام الانقليزي الحديث .. وحيث أن أهل الوسط كانوا الأقرب فقد كانوا سبَّاقين في الإلتحاق بالتعليم الحديث وملء دواوين الحكومة بينما ظل أهالي الأقاليم بعيدين عن النظام الجديد .. أهل الشمالية كانوا أيضاً سبَّاقين في التعليم الحديث وذلك لطبيعة نمط الحياة التي اضطرتهم للقدوم مبكراُ للوسط ولأن الوسط ذاته خليط من قبائل الوسط والقبائل الشمالية .. والمهم في الموضوع أن المنافسة علي وظائف الحكومة النظامية كان حراً أساسه الشهادة السودانية ومنها الى الجامعة .. وأظنك تتفق معي أن التعليم في السودان ما فيهو واسطة، وامتحانات الشهادة السودانية مافيها محسوبية .. ولازم تقتنع بأن معظم الأقاليم وخاصة في الغرب تجد أن شغل الشباب في الرعي ومراعي القبيلة كان له الأولوية علي التعليم الذي يستدعي إنفصال الأبناء عن بيئتهم والتوجه بعيداَ لتلقي التعليم .. إذاً الشغلانة ما عندها علاقة بمحسوبية وأوهام بحظوة ناس الشمالية وناس الوسط .. وحتي وقت قريب كان أغلبية طلاب الجامعات شماليين واوسطيين، حتى انفتح الآخرون وتغيرت انماط تفكيرهم وسهل التواصل مع مركز السودان وانخرط أولاد الغرب في التعليم المنظم وملأوا الجامعات ووجدوا حظوظهم في دواوين الحكومة .. يجب أن نلحظ هذه النقطة جيداً ..
أنا لاحظت أنك كثيراَ ما تلقي كلاماً غير دقيق علي عواهنه بأن أهل الشمال أقلية.. وذلك قول مغلوط - وإذا جينا للدِّقة أقول ليك بأنك تدعم قولي بأنهم كانوا سباقين للقدوم للوسط حتي أصبحوا أغلبية في الوسط وانتشروا في كل بقاع السودان ينشرون السودانوية التي تلهثون وراءها .. وحتي الآن فإنك تجد أن روابط طلاب الشمالية في الجامعات رغم تشرذمها فإنها دائماً أكبر الروابط عدداً ونشاطاً .. ناهيك عن طلاب الشمال الأدني وناس الوسط .. كلامى أنا بقوله ليك عشان تعيد النظر لنظرية الحظوة دي بنظرة منصفة بعيداً عن الحمية الجهوية ..
مسألة علمانية الدولة ودينيتها ليست الخلاف الرئيسي بين عوام الشعوب السوداني .. وتعلم يقيناً أن معظم عوام الشعب إما منتمون للحزب الديني الاتحادي، أو حزب الأمة الديني .. وهما يمثلان أغلبية أهالي السودان .. وهؤلاء الأقوام إذا حكموا البلاد وخيروهم بين علمانية ودينية سيطلبونها دينية مية مية .. مافي زول شغال بعلمانية ودينية سوي حفنة خريجين يرون أنهم أولي بزعامة العوام ويظنون أنهم أوصياء علي الشعب ويتعصبون لرأي يرونه صائب بالبداهة ويريدون فرضه علي الناس غصباَ عنهم ظناَ منهم أن الخريج أرقي وأكثر فهماَ من الآخرين، وكل طالب جامعي شايف نفسه أفهم من أبوه وأمه وجده وحبوبته !! .. وإنت زي ما عارف إنو القلم مابيزيل بلم ، والعلم الحقيقي مقرون ب 'واتقوا الله ويعلمكم الله' .. وبسبب هذه النظرة الاستعلائية تبادل الاستعلائيون اليساريون واليمينيون - شيوعيون وكيزان - حكم البلاد.. تارة يفرضون علمانية فجة وتارة دينية متشددة .. ٦ سنوات علمانية زائداً ١٦ سنة علمانية زائداً ٢١ سنة دينية منذ الاستقلال .. ده حال الحكم منذ الاستقلال .. حكم المتعلمين للعوام بعد الإطاحة بخيارات هؤلاء العوام الديمقراطية في تلات فترات منقوصة ..
مافي زول فارض ليهو هوية بل أن الاسلام واللغة العربية فارضين نفسهم بدون قهر من أحد .. لو بقت علي أدوات الدولة التواصلية مع شعبها فعليك الله ورينا الحكومة حتخاطب السودانيين بشنو؟ باللاوندي؟؟ .. ياخ رغم أن كل مكاتبات وأوراق وإيصالات البلد باللغة العربية إلاّ أنك تجد مع كل ترويسة بالعربي اليمين قصادها واحدة بالانجليزي بالشمال .. وأي فورم حكومي بالعربي تلقي الانقليزي مرفق معاه كلمة جنب كلمة .. اسه أنا في تجديد جوازي عندي خيار أملأ الفورم بالعربي أو بالانجليزي بدون أي حرج .. لكين تعال شوف لمن أجي أجدد إقامتي في أي بلد غربي.. تقعد تفتش في الزول اليترجم ليك .. وتعال شوف أي مهاجر للغرب حتلقاه غصباً عنه يتعلم اللغة ولو ما جاب شهادة الجواز يشمه قدحة ..
يازول مافي أي زول فارض هوية إسلامية عربية .. وحتي لو فرضنا ذلك فإنك تجد أن الناس أساساً لا تنفر من الاسلام ولا العروبة .. بل أنك تجد أن أكثر ناس متعصبين للعروبة والاسلام هم متشددين من غير العرب .. خليل ابراهيم ده كان رائد مشروع العروبة والاسلام ودبدب فيهو دبابة .. وكذا المرحوم الزبير محمدصالح، وكذا علي الحاج وكل كيزان المؤتمر الشعبي .. ولتجدن من أكثر المعارضين للمشروع الاسلامي والعروبي عرب صر .. زي معظم المعارضين للحكومة وكثير من معارضي الكيبورد في هذا المنبر .. فتشهم كلهم تلقاهم جعليين وشايقية !! ..
بالنسبة للجنوب فهو حالة خاصة .. وتأكد بأن حكام الشمال حاربوا ضد انفصال الجنوب من باب أداء الواجب .. أي حكومة في الدنيا تحارب الانفصاليين والمتمردين بلا هوادة .. عاين للدنيا دي كلها شوف فيها كم دولة مشغولة بحرب ضد متمردين وانفصاليين !! .. ابداها من امريكا زاتها - ومر علي المملكة المتحدة مع الايرلنديين وحتي الفولكلاند .. مر علي الروس مع الشيشان ، ناهيك عن حروب البلغان الانفصالية، وإنت ماري علي اكراد تركيا وناس الباسك والصحراء الغربية وبيافرا واريتريا وناس اليمن ، وأكراد العراق، وشوف كشمير وناس التاميل والفلبين والمسلمين العاملين شمطة في الصين و..و.. هذه الحكومات تحارب التمرد والانفصال كأداء واجب، ومافي حكومة تريد أن يكتب التاريخ أن الإقليم الفلاني انفصل في عهدها - وفي عهد ذلك الرئيس الضعيف وو.. وزي ماشايف هسه الموال already بدأ مع ناس الإنقاذ .. الناس من هسه ابتدأت النقنقة بأن الحكومة فرطت في وحدة البلاد وو ما ادراك من الزعيق الذي يتناسي مقررات أسمرا ..
محكمة جنائية شنو يا مجدي العاوزها تجيب عدالة لأهل السودان؟؟ عليك الله بينك وبين نفسك كده إنت مقتنع بهذا النجس الإسمو أوكامبو؟؟ .. واللاّ مقتنع بهذا الكيان الشرير المسمي محكمة جنايات؟؟ ..ياخوي كدي أديها صنة..
والله هذا الكيان الشرير لا يريد إلاّ الشر وتعويم الفوضي في السودان !!! .. ديل كلما قارب أهل السودان علي الاتفاق يبرزون الراية الحمراء لإيقاف أي تقدم في خطا السلام .. وبالنسبة لي الاهداف بتاعتهم ذاتها ما محتاجة ليها ذكاء لمعرفتها .. ياخي نحن بعدما شفنا بأعيننا خروج الآلاف المؤلفة من أهل دارفور وخاصة القبائل المفتري بإسمها لنصرة البشير متلفزة لايف ورقصوا وعرضوا وألقوا كلماتهم تأكدنا أن الزوبعة الجائية دي هي أخس وأحقر وأوضح صور الفتنة والاستهداف ضدنا . وأنا مستيقن تماماَ بأنهم يعبثون بأمننا واستقرارنا ويريدون لنا الموت الزوؤام بأيدينا نحن ونذبح بعضنا بعضاً كما العراق وافغانستان .. وبيئة الفوضي ، منطقياً كده، هي انسب طريقة لإيقاف التنين الصيني الذي بدأ خطوات واسعة في استقطاب الدول الافريقية التي ظلت لقرون تحت الهيمنة الفرانكفونية والكومونولثية ..
الصين جاااتهم ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
لسه يا جني ما وريتنا المطلوب من البشير بالضبط شنو؟؟ يسلِّم نفسه ؟؟ يكنكش فيها؟ أم ينبطح ..
داير الحكومة تحل نفسها وتسرح الجيش وتمنعه من الدفاع عن البلد ضد العنصريين ودايرها تطلق البلد للفوضي عشان تعيث فيها جيوش التمرد والموت يبقي في الشوارع - عشان خاطر اوكامبو وامريكا؟؟ .. إنت آزول بصحك؟؟
شايفك شابكنا في المنبر بين كل سطر والتاني إنو البشير منبطح ومنبطح .. وكترت النغمة دي ..
تصدق الزول ده لو كان منبطح ما كان حصل البيحصل ده ..
يخيل لي إنت الغايظك إنو ما داير ينبطح ..
إنت دايرو ينبطح ياخ وهو مخيب ظنك !! ..
عشان كده قلنا ليك نوعك ده لو مسَّكوه البلد حيبيعنا ببلاش ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: Munir)
|
Quote: أن يقدم للمحاكمة العاجلة... ولكن من المعروف أن الجنود يتلقون الأوامر من قائدهم المباشر وربما هذا القائد المباشر تصرف من تلقاء نفسه
دون الرجوع للقيادة العليا أو رئيس الجمهورية نفسه ,,, لأنه من الصعوبة ان يتلقي القائد الميداني الأاوامر مباشرة من رئيس الجمهورية وفي هذا
الحال فإنه يتبغي محاكمة قادة الميدان أولا |
طيب يا اميرة خالف الجنود او القادة الميدانيين اوامر القائد !
القائد مفروض يسوى ليهم شنو ؟؟ ولا لسه ما عارف انهم خالفوا او تصرفوا
من تلقاء نفسهم ؟؟؟؟؟
من الذى سيحاكم قادة الميدان ؟؟؟
اذن سيحاكم لانه لم يحاكم قادة الميدان !!
Quote: ولكن اذا ثبت بأن رئيس الدولة هو من أعطى الأمر المباشر بقتل النساء والأطفال فينبغي محاكمته وتنفيذ اقسى عقوبة بحقه وعلى المسؤولين
السودانيين أن يتمثلوا بما قاله الرسول صلى الله عليه وسلم:" لو أن فاطمة بنت محمد سرقت لقطعت يدها"". |
كيف يعنى شخص بيحاكم بعد ما يثبت انه اجرم ؟؟؟
الشخص بيقدم للمحاكمة عشان يا ثبتت عليه التهمة او برء
منها مش كدا ؟؟؟ ما بتثبت اول التهمة بعدين يحاكمو !!!
يتهم اولا
مرحلة الاثبات مرحلة لاحقة للتهمة
ــــــــــــــ
اتمنى يا اميرة ان تقرى المداخلات بعقل مفتوح ولا تلجئى
للتبريرات فى اتجاه ما كتبتى حتى تعم الفائدة وشكرا ..
| |
|
|
|
|
|
|
|
|
|
Re: أوكامبو يده مغلولة ولا يستطيع القبض على الرئيس السوداني (Re: omer osman)
|
كيف يعنى شخص بيحاكم بعد ما يثبت انه اجرم ؟؟؟
الشخص بيقدم للمحاكمة عشان يا ثبتت عليه التهمة او برء
منها مش كدا ؟؟؟ ما بتثبت اول التهمة بعدين يحاكمو !!!
يتهم اولا
مرحلة الاثبات مرحلة لاحقة للتهمةQUOTE)
>>>>>>>>>
العزيزة دينا خالد
أنا لم أقل أنه يحاكموه بعدما يثبتوا عليه التهمة .. ولكن القانون اساسا بيقتضي أن توجيه التهمة
تكون بناء على توفر معلومات أن شخصا ما ارتكب الجريمة.. وفي هذه الحال فإن الرئيس السوداني
لم يرتكب الجريمة بنفسه بل ارتكبه أفراد من القوات المسلحة ... والسؤال هو: هل تم ذلك بعلم الرئيس
أم لا؟ وقد عنيت بمداخلتي أنه اذا كانت هناك معلومات تشير أنه من أعطى الأوامر المباشرة فعليه
المثول أمام المحكمة لنفي ذلك أو اثباته...
والمعروف ان اختصاص المحكمة الجنائية الدولية اختصاص تكميلي .. أي مكمل للقضاء الوطني في أي دولة
واذا عجز القضاء في أي دولة محاكمة أي مسؤولين في الدولة اتهموا بارتكاب جرائم تدخل في اختصاص المحكمة
فإن على المحكمة الجنائية الدولية التدخل لتنفيذ العدالة... وفي حالة التهم الموجهة لعمر البشير .. كان على القضاء السوداني
التحقق من أنه أعطى الأوامر المباشرة ولكن كما نعلم لا مزاهة للقضاء السوداني والقضاء غير مستقل.. ولذا تدخلت المحكمة
الجنائية لتنفيذ العدالة ولكن بتوجيه من مجلس الأمن... يعني أن المحكمة لم تأمر بنفسها التحقيق في الجرائم المنسوبة للرئيس السوداني ولكن تم
بأمر من مجلس الأمن... والسؤال هو هل تحققت المحكمة من توفر معلومات من أن الرئيس أعطى الأوامر بتنفيذ المذابح في دارفور..
ففي حالة وجود مثل هذه المعلومات فعلى الرئيس الامتثال للعدالة وتبرئة نفسه,, ولكن في حالة عدم وجود معلومات تشير إلى هذا ,,, وأن الغرض
النهائي من المحاكمة شئ آخر .. فإن المحكمة تنفخ في قربة مخرومة وسوف لن تتحقق العدالة,,, لأن نصف الدول الأعضاء في الأمم المتحدة
لديها شكوك بأهداف المحكمة التي لم تباشر أي تحقيقات جنائية سوي في جمهورية الكونغو الديمقراطية, وأفريقيا الوسطى والسودان وصربيا..
وليبيريا.. أي الدول المستضعفة..
وأريد أن أؤكد هنا باننى لا أدافع مطلقا عن الرئيس عمر البشير لانني مؤمنة بأن العدالة ينبغي أن تأخذ مجراها على أي مجرم في العالم بصرف النظر
عن مركزه الاجتماعي والسياسي,,, ومن أجل هذا تم انشاء المحكمة الجنائية الدولية... وعلى الرغم من ظلال الشكوك المحيطة بأهداف المحكمة الحقيقية
إلا أنها في حد ذاتها خطوة ايجابية هامة لردع الرؤساء الدكتاتوريين الذين يذلون الشعوب ...
| |
|
|
|
|
|
|
| |
jini
Munir
Mohamed Suleiman
الامين موسى البشاري
مجدى محمد مصطفى
عبد المنعم سليمان
محمد على طه الملك
كمال عباس
Elawad Eltayeb
دينا خالد
omer osman
فيس بوك
تويتر
انستقرام
يوتيوب
بنتيريست