|
|
 شاكوش حار ،،،،،،،،، بجميع التخصصات
|
الاسماء الوارده هنا لاتعني شخصا بعينه وانما لتكملة النص فقط ومافي داعى للشطحات
شاكوش يعني تخليك صاحبتك.. لغير الناطقين باللهجة السودانية ..
لمن يزهج الولد من البت ويفكها عكس الكتاحة بمختلف
التخصصات ولغات التخصصات
كلية طب الأسنان
لمن يحصل تسوس بالشكل ده في حياتنا يا منال...لازم نقلع اسباب التسوس من جذوره... التخدير الموضعي لآلمنا ما بحل المشكلة...ومحاولة التقويم فشلت معاكي للاسف..ودايما بتركبي لي ضرس ما ضرسك..عشان كده الجسر امتد وزاد بيناتنا ...وقدر ما حركت فكي معاكي برضو مصرة تجيبي لي التهاب في اللثة ...انتي بقيتي حشوة مؤقتة لقلبي وانا محتاج حشوة دااااااااااااااايمة
كلية علوم التغذية
منال انتي سببتي لي تسمم في حياتي ..وعلاقتنا دي ناقصة فايتمين.. ولازم تنتهي لأنو الاستمرار فيها غير صحي على الاطلاق
وبعدين انا زهجت من المحاولات الفاشلة لتعقيم علاقتنا.. و زهجت من تطهيرك لجروحي القديمة...وبقى عندي عسر في هضم شخصيتك...حتى شهيتي للونسة مع البنات اتسدت
كفانا مواد حافظة يا دي
كلية هندسة الجينات
منال...انتي عارفة انو جيناتك هي السبب؟!!...ضعف المناعة العاطفي موروث في عيلتك.. أنا آسف بس أحماضنا النووية ما بتتفق ولازم نتحلل....وكلو كروموسوماية تمشي جهة
وكلو نواة تطلع خليته
كلية علوم الطيران
منال...يؤسفني اقول ليكي اني دقيت ليكي خروج نهائي من حياتي...اعمل شنو ياخ؟...انتي عارفة انو مكنة الحب بتخرب عاجلا ام آجلا..وبعدين انا زول درجة اولى وانتي يا دااااااااااب درجة الأفق
انا وانتي طيارتنا وررررررررر اقلعت ...ما تخلينا نهبط هبوط اضطراري برة مدرجات الحياة
كلية الموسيقى و المسرح و الدراما
اسمعيني يا منال انا بحبك مووووووووووووت ومتمني أعرسك الليلة قبل بكرة...اها نمشي نشتري الشبكة متين؟
رأيك شنو في الدور ده؟...ما انفع ممثل يا منال؟
اسمعيني يا منال...بصراحة السيناريو بتاع حبنا ده فيهو خروج عن النص...حياتنا بقت نشاز...وانا بفتكر اننا لازم نفكر في الحوارات البتدور بيناتنا على مسرح الواقع.... ولازم نعزف عزف انفرادي كلو واحد براااااااااااااااهو.. فهمتيني مش؟؟
هاااااا؟؟...لأ المرة دي انا جاااااااااااااااااااادي....تمثيل شنو يا دي؟
ما تفهمي ياااااااااااخ ..الا ألحن ليك كلامي ده ؟
كلية هندسة الاتصالات
بصراحة يا منال انا كنت قايلك في السلك...لاكين طلعتي موبايل بلا بطارية... انا وانتي لازم نقطع اتصالاتنا ببعض..انتي مرات مشغولة...ودايما مقطوعة ..المسافات بيناتنا زادت..ومشاعرنا بقت مشوشة لأنو عواطفنا للأسف بقت لاسلكية
ياخي باختصار...حبنا طلع برة الشبكة
كلية الهندسة الزراعية
عارفة يا منال؟...الحب ده بذرة دايرة ليها تربة ممتازة...وموية نضيفة...واضاءة كافية شان تنمو...وانت للأسف تربتك ما نضيفة وماااااااااااااااالحة تب... و مويتك ما ارتوازية....وكان لازم نحصد الفشل في علاقتنا دي..خلينا من التفرع في المواضيع الغير مورقة....علاقتنا اصيبت باليرقات وانتي للأسف استخدمتي المبيدات العاطفية من غير ما تكلميني..بعدين بصراحة انا خايف انو براعمنا في المستقبل يطلعو زيك كدا
كلية علم البصريات
منال انتي عارفة اني زول عندي بعد نظر..وشايف اننا ما بننفع لبعض...اقول ليكي أنا ما قادر اكمل.. حاكتب كلامي على ورقة...ركزي معاي وحاولي تقري الحروف دي
I
H
A
T
E
U
أها غمضي العين الشمال...وافتحي اليمين...قريتيها؟ ...... كلك نظر يا منال
كلية علم الكيمياء
شوفي يا منال لمن تحصل أكسدة بيناتنا ده معناتو اني قلوي...وانتي حااااااااااااااااااااااامضة ..انتي زمان كنت فلذة كبدي...لاكين انا بطلت أطلع مع اشباه الفلذات.. وبعدين القال تتفاعلي كدة منو؟...انتي ما عارفة انو التفاعلات العاطفية بتحول محلول المشاعر الى محلول لا لون له ولا رائحة؟
الحكاية دي فجرت معمل حبنا للأسف ...وبعدين انا اكتشفت لي عنصر مشع...وما مستعد اخليها عشان عنصر خامل زيك انتي
كلية علم الاقتصاد
عارفة يا منال...المشكلة ومافيها انو حصل ركود لمشاعرنا....والاسعار العاطفية انخفضت...حتى أسهم القلب بقت بمعدل سهم واحد لكل 100 نبضة....وبعدين البضاعة العاطفية ما لعبة ياااااااااااخ
انتي مش عارفة انك حسب قانون العرض
والطلب لمن تزيدي في كمية الحنان ممكن يحصل نقصان في سعر العاطفة؟
كلية الآداب قسم علم الآثار
منال اسمحي لي انك تحفة مزيفة...الجكس كلهم تحف عتيقه و نادرة الا انتي.. ما عندك غير فك الرموز بالطريقة التعجبك...تنقبي عن المشاكل تنقيب...وبعدين انا وانت اساسا حضاراتنا مختلفة من البداية...وافتكر حقو ندفن البيناتنا بعد ده.... هووووووووووي مالك بتعايني لي كدا...ما فهمتي؟...ليــــــــــــه أنا بتكلم لغة مسمارية ولا شنو؟...شنو لعنة الفراعنة الانا اتبليت بيها دي
كلية الفيزياء قسم العلوم الفلكية
اسمعي يا منال انتي ما لاحظتي انو سنتنا الضوئية مرت بسرعة؟
يا بت الحلال الشمس والقمر ما بتلاقو في سما وااااااااحدة...يعني
باختصار نجم حبنا أفل... وبعدين انا كنت قايلك مجرة مختلفة عن باقي المجرات...كنت قايل ما ليك زي في الكون...طلعتي ثقب اسود في حياتي...وانا بالشكل ده ح الف معاك مدارات الحياة من غير اي هدف
أفتكر كلامي واضح وضوح كوكب الزهرة الساعة 4 الفجر
كلية علوم البحار
اسمعي هنا ده... مركب فيهو قبطانين بغرق عديــــــــــــــــــــــــــــــــــــــــــــــــل كدة...وبعدين انتي ما ملاحظة اننا دايما ماشين عكس التيار؟...وانو أمواج الحياة بترزع في مركبنا ده يمين وشمال من غير اي سبب...انت ليــــــــــــــــــــــه مصرة تغرقيني معاك يا منال؟... ياخي انا زهجت من المد والجزر الحاصل لي بسببك
يلا بعد ده نزلي شراعك من حياتي
...واقطعي خطافك عني
البحر ملاااااااااااااااان اسماك
منقول مع بعض الاضافات
|
|
 
|
|
|
|
|
|
|
 Re: شاكوش حار ،،،،،،،،، بجميع التخصصات (Re: جمال هباني)
|
العزيز جمال !!!
يا ود يا ظريف والله بوستك غاية في الروعة وخفة الدم ويدل على إنك إنسان خفيف الظل حبك شكلو هندسي
ومزروع على شغاف القلب ولوكان ماشي عكس التيار لأنك بصراحة عزفت لحن انفرادي وأخدت دور البطولة فكنت النجم الأوحد خصوصا وأن جيناتك تؤكد صفاء روحك التي لم تتلوث بأي كيماويات أو نفايات طبية
لذلك طيرانك كان سهلا لعدم وجود مطبات هوائية أو ضباب يعتم الرؤيا ,, شكرا جمال فقد أمتعتنا.
| |
|
|
|
|
|
|
|
|
|
Re: شاكوش حار ،،،،،،،،، بجميع التخصصات (Re: جمال هباني)
|
هذة القصيدة قالهاواحد من اسرة حلمنتيش .فى حفل تخرج لخريجى كلية الطب فى السبعينيات .هذا الطالب الخريج تقدم لخطبة زميلتة بالكلية(وهى بنت عمة ومن قرية واحدة بل من حوش واحد بالقرية).لكن البنت تمنعت ورفضت الارتباط بة ولما سالوها عن السبب من قبل اهلها واهلة قالت بكل بساطة هو لسة متخلف(يعنى ما مواكب الموضة فى ذلك الزمان لانو محافظ على عاداتو وتقاليدو والاهم من ذلك دينة.فصاحبنا لم عرف ذلك لم يقل شيئا,حتى هذا الحفل وفجر المكتوم بهذة القصيدة::::قاليها:::من بكرة خلاص حا اربى الشعر , افركو واكوية واسوى معاهو ظفر ,واسوي بنطلون عجيب من فوق شبر ومن تحت متر(زمن الشارلستون) ,وقميص هيبيز الوانة زى طيف المطر , فى صدر بومة وديك اعوعى , واعمل صليب عجيب اعجبك عند الصدر(كناية على الحضارة الغربية) ,دة كلو عشان ابقي ليك حبيب , حتى اسمة اغيرو ابقى جونى بلاش على و بلاش عمر , واتنكر على اخوك حسن وابوى ابكر بعمتو اللفيها فوق راسو وشاقيها العمر ,وامسح صورة يدو الماديها لى يوم السفر ,خليك فارس خليك همام خليك رجل , لكن انت يا غجرية يا حسرة الدهر , اتكلمى وباي باي شوقر ,اتذكرى انك بديت رحلتك للجامعة بحمار مرات حرن ومرات عتر ,استرى لحالتنا حالت عدوك المابتسر ,زيرنا نملاة يوم وننساة شهر ,ونعلب النار بباقى البعر ,ولبسك كل يوم زايد خطرمره بالماكص و الميدى والمينى الخطر ,بجاكسة فى خط ستة ,وجاكسة فى خط خمسة ,ومرات جاكسة فات خط الصفر ,كان قلبك اصبح فندق صحارى والهيلتون المنتظر(زمن فندق الهلتون تحت الانشاء)زيديهو طابق وكمان طابق ,وكترى عدد الحجر ,امكن اشيل الالف فارس ,وامكن إسكن مليون نفر , لكنى واللة لو جاء عيسى هادى البشر ما اظنى ارجع واجيك منكسر؟؟؟؟؟؟؟؟؟
| |
|
|
|
|
|
|
| |
عواطف ادريس اسماعيل
نهال الطيب
فيس بوك
تويتر
انستقرام
يوتيوب
بنتيريست