|
|
|
 Re: افكار امرأة خبيثة جدا.... (Re: Dina Faisal)
|
لا تبحثي عن اعذار لرجل اساء لك
فابقاء ذكرى طعنته حية فيك تمكنك من تجريده من سلاحه
الوصية دي مهمة جدا يا بنات الواحدة فيكن ما تبقى زي الكديسة المغمضة
اتوقعو اي حاجة في اي وقت,, وعلي راي المثل "حرص ولا تخونش" 
| |
 
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
الرجل لا يتعلق بامراة تبكي امامه
انما يتعلق بالمراة التي تجعله يبكي
اها يا اخوانا الكلام دة بالذات صاح, لانو اهلنا ما بقولو كلام ساي, كل ممنوع مرغوب فيه
والثمرة المحرمة حلوة,, وحقيرتي في بقيرتي,, والامثال دي كلها بتوري انو الواحدة ما تبقى
مسهتنة ومضبلنة ولازم دايما تعمل فيها عشرة بقرش والحشاش يملا شبكتو
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
دينا
عارفه والله اليوم جيت ساني سنوني ، لقيت البوست قالوا مشي الخور ، اولا ، الخور ده وين (والله ما بعرف القاه)
ثانيا
Quote: الرجل يحب من تؤذيه فلا تكوني قطة
لا تغفري له .. ادعي الغفران.. لا تبكي امامه... اجعليه يبكي
لا تكوني اكثر لهفة.. وارتدي الكبرياء... لا تصنعي منه نموذجا للكمال
|
| Quote: فابقاء ذكرى طعنته حية فيك تمكنك من تجريده من سلاحه |
ياستي لماذا تسعي المرأة ان تصور حياتها مع الرجل او بشكل اعم (الحياة مع الرجل ) كأنها معركة ، لابد فيها من منتصر ومنهزم ، لا ، الحياة بين الاثنين من المفترض ان تكون اكثر عمقا وحميمية ، بعدين المرأة ح تقعد مع الراجل حياتها كلها ، اها ما بتتعب من التآمر الكثير ، وحياتها كلها تحسبها بالحتة ، محجوب شريف عندو قصيده اسمها سمبلاية ، كان ما قريتيها ، عليك الله اعملى بحث في المنبر ح تلقيها ، زمااااان انا نزلتها في المنبر ، وكم واحد اشار اليها ، القصيدة كلها بتتكلم عن الحياة الزوجية ، وفيها جملة لخصت القصيدة بقول فيها ( وسوا بنطيع الصاح).
في ظل الظروف والبوست داك ، عجبني العنوان واصبح جاذب جدا .
| |
|
|
|
|
|
|
|
|
|
Re: افكار امرأة خبيثة جدا.... (Re: رقم صفر)
|
رقم صفر
تسلم والله عارفاك ما بتقصر
اولا: الخور تمشي ليهو عن طريق المستطيل التحت المكتوب جنبو "show" وبيكون ظاهر ليك "المنبر
العام" تقوم تفتش الخيارات, وتقريبا اخر خيار, بيجيك "منبر خاص باعضاء/ات سودانيزاونلاين.
ثانيا: والله انا زاتي قلت زي كلامك دة لكن لسة ما اتضح لي الصاح منو بالضبط, كدي النشوف اراء الناس
وبعدين نقرر.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
حاذري ان تكوني اكثر لهفة منه بعد الخصام
ولا تظهري له اثار طعنات جسدك فبذلك تصبحين اشهى واجمل وانت تتسربين من بين اصابعه.
يعني بس غايتو الواحد قبل ما يجي داخل علي اي قصة حب يجهز معاهو معداة حربية كاملة
وما ينسى الدروع والدبابات وصندوق الاسعاف والذي منو.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
دينا ..
Quote: الرجل لا يتعلق بامراة تبكي امامه
انما يتعلق بالمراة التي تجعله يبكي |
بما انو الروح البشرية تحب وتكره
وتنتقم فاحذرى يابت حواء من ان تجعلى الرجل
يبكى .. لانك سوف تبكين اكثر .... (من الواقع)
______________
ابقى تقيل ابقى تقيل
لما شربت مويت الغسيل ...
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
يحب الرجل الالم
لذا يحب من تؤذيه لانه بذلك يختبر رجولته ومقدرته على الصبر
يبحث الرجل عن امراة تنازله.. انه محارب سابق,, يحتاج الى امراة صعبة المراس.
صحي يا اخوانا الكلام دة؟؟؟؟؟
والله دي تبقى مشكلة عديييل كدة,, يعني الواحد يمشي يركب وش الككو والا ايه؟
| |
|
|
|
|
|
|
|
|
|
Re: افكار امرأة خبيثة جدا.... (Re: بدر الدين الأمير)
|
يا ود الامير
الاية شاملة اكيد لكن ما عارفة هنا ح نقدر نطبقها كيف؟
لانو بصراحة الزمن دة معايير الطيبة بقت مختلفة
دة بالاضافة لانو الخبث مرات بيكون مطلوب وطبعا اكيد ما الخبث الربنا قاصدو في الاية.
وبعدين الطيبون ديل مرات بيعرسو الطيبات ويمشو بعد دة يفتشو للخبيثات!
يعني بصراحة كدة الموضوع بقى جايط شديييد.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
طيب يا دينا خلينا من كلام الدين
والنرجع لكلام الدنيا
اين تجدين نفسك من خلال رويات احلام مستغانمى
ذاكرة الجسد وعابر سرير و فوضى الحواس
هل راقت لك بنفس رواق مقالها موضوع البوست
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
سلام أخت دينا,
الرجال الذين يحبون الألم أو النساء هم شريحة مصنفة نفسيا و تتطلب حالتهم الخضوع لبعض المعالجات, واحلام مستغانمى منذ أن
كتبت ذاكرة الجسد اخذت جانب بنات جنسها و صارت تعبر عن همومهن و مشاكلهن ولكن لا ينطبق كل ما تتحدث عنه على كل المجتمعات
سواء ان كانت أنثوية أو ذكورية و لا يمكن أن يكون هو القاعدة التى تبنى عليها الأشياء رغم واقعيتها , كما قال احد الإخوة لماذا
يصور موضوع العلاقة بين الرجال و النساء كأنما هو حرب لا تنتهى !!! المرأة صعبة المراس مطلوبة فى هذا الزمان الصعب و هى
موجودة دوما و منذ قديم الزمان وجدت و لكن تختلف أيضا صعوبة مراسها بإختلاف نوع الظروف المحيطة وإختلاف البيئة حولها اي أن
صعوبة المراس خشم بيوت و من تكون عنيفة في عملها و يصعب إرضائها و لا تجامل قد تكون شخصية أخرى فى محيط آخر عكس ما هو حالها
فى عملها !! ليس الكل بقادر على تقبل الأذية خاصة إذا جاءت من إمرأة كان قد امن جانبها و ليس كل الرجال ببحثون عمن
تنازلهم و تثير غريزة الرجولة الأزلية بالحرب و العراك فكثيرون يفضلون العيش فى سلام و مودة مهما بلغت درجة قوة النساء فى
حياتهم,, أيضا قد تكون قوة إمرأة مسببا لأشياء تكرهها المرأة نفسها و لله فى خلقه شئون !!! الموازنة و عدم الخروج عن طبيعية
الأدوار مطلوبة لكى يؤدى كل دوره تجاه نوعه و محيطه و هذا لا ينفى ان قوة المرأة مطلوبة كما أسلفت و هى اصلا عرفت بانها مخلوق
قد يكون رقيقا لكن لم تمنع هذه الرقة من إمتلاكها القوة و الصلابة و درجة عالية من التحمل , فى إعتقادى البسيط إن الطبيعة و
البيئه و الخلفيات تشكل نوعية الإنسان و درجات قوته و ضعفه و لكن الأدوار قد وزعت مسبقا والمرأة مرأة و الرجل رجل وإن
أختلفت أو إختلت المقاييس فى بعض الأحيان.
مع إحترامى
| |
|
|
|
|
|
|
|
|
|
Re: افكار امرأة خبيثة جدا.... (Re: أيمن الطيب)
|
يا ايمن ما اختلفنا في حتة التفرد دي
يعني الما بيناسبني ممكن يكون بيناسب زول تاني
لكن اكيد في اشياء مشتركة علي اساسها الناس عممت.
يعني النفس البشرية دايما بتميل للاشياء البعيدة عن منالها
او المتمنعة عليها,, وقوة المراة امام الرجل ممكن تكون نوع من انواع التمنع
البيخلي الرجل دايما يحاول الحصول عليها لانو ما ح يكون متيقن من امتلاكها
اما ناس يمين يمين شمال شمال ديل فاكيد ح يرقد قفا وبالتالي روح المغامرة والتشويق
ح تموت وبالتالي ح يصاب بالملل وممكن يكون دة سبب كبير يدفعه للتجديد.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
إزيك يا دينا
غاليتنا لنا مهدي عملت بوست ( تحريشي ) قبل كم يوم كدا ، تدعو فيه بنات حواء للتركيز على كتابة ( Handwriting ) الخاص بـ ( مشاريع ) الخطوبة أو ( التكييس ) .
البيكتب الهمزة مايلة كيف بتكون شخصيتو كيف
والبيكتب الراء كيف بكون ( قندف ) كيف
قمت قلت ليها
" كدا يا دوبك ( بورتي ) بنات الناس "
فيا عزيزتي
العلاقات الإنسانية دي كيمياء شديدة التعقيد . يصعب كثيراً بل يستحيل إستباط قوانين تحكم تفاعلاتها . ويصعب تعميم التجربة ، فما أتى أكله أو أدى غرضه في علاقة ما قد لا يصدق في حل مشكلة مماثلة لأشخاص قد تتماثل ظروفهم مع ظروف أصحاب التجربة الأولى . فكل علاقة إنسانية هى حالة متفردة ( Unique case ) .
و
كثير التحايا
| |
|
|
|
|
|
|
|
|
|
Re: افكار امرأة خبيثة جدا.... (Re: عاطف عمر)
|
يا عاطف لازم يكون في قاسم مشترك خلى النسوان ديل كلهن اجمعن
علي انو الرجال ما بعجبهم العجب ولا صيام رجب.
يعني تكون مسكينة ومطيعة يقول دي مملة ياخ,, تبقى شرسة وتركب راسها
يقول دي مرة قليلة ادب ما بتنفع معاي,, اها نسوي ليكم شنو؟؟؟
موت لموت اخير بكرامتنا يا اخوي
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
Quote: والله يا عبد المنعم المرة دي ارق منها ماف
واحن منها ماف والغنماية تاكل عشاها,, يعني كلمة واحدة حلوة منك
ممكن تغير اتجاهها 180 درجة, بس المشكلة انتو ما عاوزين تعملو كدة
ولما هي تفتح خشمها تقولو عليها نقناقة. |
دينا ياشفيفة
غنماية شنو دي بالتاكل عشاها؟
دي من ما تقوليها
كلام جميل..
تقول في سرها والله الزول
من ما جاب ليهو
دجل زي ده
وراهو في حاجة..
وبدل ماتغير
اتجاها نحوك 180 درجة محبة وحنية
تغير اتجاها 360
درجة ونص
في البحث عن شريكة متوهمة..
ــــــــــــــ
والعجيبة كان قلت كلام حلو
لي واحدة تانية زى كلمة
شفيفة الفوق دي
تعال شوف الزرزرة
والزعل ...وياانا
يالكمبيوتر..
وحاجات كدة...
هسة بعد شوية
تعالي شوفي حالتي
تبقى كيف..
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
لكن يا عبد المنعم الغلط غلطكم من البداية
لانكم بحركات عمر والنمر بتاعتكم دي فقدتو مصداقيتكم
اها المرة بقت تعمل احتياطيها طوالي وتقول احسن اتغدى بيو
قبال ما يتعشى بي.
وبعدين الكلام الحلو دة يا اخوي لو كنت بتسمعها منو ما كان
بتزعل لما تقسمو علي خلق الله,, هسي في ذمتك اخر مرة قلت ليها
فيها "شفيفة" متين؟؟
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
تعرفى يا دينا الرجل السودانى ولا غيرو نسخة مكررة مرة فى واحد امريكى زميلنا فى الشغل قال لى ليه انتىما اتزوجتى تانى قلت ليهو الرجل السودانى ما قدرت افهمو قال لى ما السودانى براهو كلهم كده، اها يعنى نقع وين ؟ تجى للزول مسكينة يبقى ليك سكينة تبقى زولة عادية يقول ليك كده ماكويس ، تبقى فنانه يمرقك من الجنه وسقطا ، تبقى زى ما تبقى لا بعجبو العجب ولا الصيام فى رمضان ، اها نمشى منهن وين ، بعدين الطريفة اصحابى كلهم اولاد ولا رجال احسبيها زى ماتحسبيها وكلهن بقولو الرجال ديل شنو وشنو ، المهم يا دينا ما عرفنا نتحل منهم وهم ما دايرين يسيبونا فى حالنا ، لا دا عاجب ولا دا عاجب ، لكين للحقيقة فيهم ناس يتختو فى الجرح يبروه ، لكين ديل الاصحاب بس تانى ما تقول لى
| |
|
|
|
|
|
|
|
|
|
Re: افكار امرأة خبيثة جدا.... (Re: سلمى الشيخ سلامة)
|
والله يا سلمى كلام سليم مية في المية
غايتو البوست دة ح يجعلنا من المغضوب عليهن لكن والله ما بنموت بمغستنا
الرجال سنحة وقبحة ويفقعوا المرارة والتقولي عليهو موسى يطلع فرعون.
وعلى قول حبوبتي الرجال...... لكن ما بنمشي حفيانين
الليلة وووووب علي
يا اخوانا دي دينا المنفصمة البتتكلم دي
عشان ما تاخذوها وكدة
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
مرة يا يدينا فى واحد كان عامل لى هبوب راس قال الا نعرس بعض ، قمت قلت ليهو دا تلفن امى اضرب ليها ولو قالت ليك موافقة ما عندى مانع ، امى قامت قالت ليهو سلمى بتى دى عندها شعنونة اسمها (حريتا)كان بتقبلا بى شعنونتا دى اديناكا ياها انقرى ما نط ، وكويس انه عمل كده ، لانه كان زول واضح انه داير زوجة تقعد تحرس ليهو العقاب ، وحكمة الله مابقدر اعمل دا ، ومرة تانية قلت لزول صاحبى (دايرة ابقى مرة عندها كوم جهال ، وجارة توبامن بيت لى بيت والشفع وسخانين ونخرين سايلات وتشيل وتجيب فى القوالات من بيت لى بيت ، ومن دقش الرحمن عاست الكرة وشدت ملاحا وطفشت ، تجى الضهر ، تتم باقى شغلاتا ، والراجل عندو سفة كبيرة لمن تعتر ليهو ، ولا خساهو ،)قام قال لى ما بتبقى سلمى الشيخ ، اها يا دينا بت امى زى ماقلت ليك كدى ما عاجب وكدى ما عاجب النسويهو مانا عارفنو ، وامى الله يرحما كانت زولة فايته بنات جيلا كانت دايما بتقول لى الزول يبارى قلبو ، وغلب الرجال ما سمح ، وانتى ما بتقدرى عليهو نفسك حار وصعبة اخير ليك براك ، انقرى كلاما ما صاح
| |
|
|
|
|
|
|
|
|
|
Re: افكار امرأة خبيثة جدا.... (Re: سلمى الشيخ سلامة)
|
سلمى سلامات
المشكلة يا سلمي ما في الرجل
المشكلة في الزولة
البتعتقد الحب دة زهرة
بقدموها ليها مقطوفة..
وهي ناسية انو الطريقة دي
خطوة لذبول تلك الزهرة..
يعني نادر ماتلقي زولة تحب
علي طريقة "اريك افروم"
كينونة جوهر يعني ما تملك..
بعدين انا شايف البوست ده
اخد جانب جادي شوية..
وعشان نزيدو جدية
تعالو نشوف حقيقة الحب والزواج
ونختبر مفاهيمن علي مستوايات
كتيرة ..وبعدين نشوف
حكاية رجل : مرة دي ..
انا يتخيل لي في حلقة كدة
مفطوطة..وعايزة مراجعة
| |
|
|
|
|
|
|
|
|
|
Re: افكار امرأة خبيثة جدا.... (Re: bent-elassied)
|
الافكار الخبيثة في المقال دة يا مي
وطبعا خبيثة من وجهة نظر الرجال لكن حكيمة جدا من وجهة نظرنا
غايتو انا رواياتها دي ما قريتها لكن شكلي كدة ح اقراها عشان
نقعد للموضوع دة بمزاااج.
شخصيا شايفة كلامها سليم مية في المية
وعلي قول طمطم نفجخهم بصلة قبال يبقوا اصلة
| |
|
|
|
|
|
|
|
|
|
Re: افكار امرأة خبيثة جدا.... (Re: تماضر الخنساء حمزه)
|
والله الرجل ده مخلوق بسيط جدا و ما عندوا اي تعقيدات
كل الدايرو زوجة بسيطة خلوقة دائما مبتسمه في وشو
انيقة و مرتبة وقنوعة ....
مشكلتكم يا بنات حوا تابعتوا المسلسلات المصرية دي
و دايرات الكلام المعسول من شاكلة بحبكـ و بموت فيكـ
وده تلقنوا عن الغافل .. يعني عاوزات ليكـم راجل مراهق
على طـول ..... مافي وقت للحاجات دي
كدي يا بت افتحي لراجلك البيت وخليه يشوفكـ باسمة و نظيفة
وبيتكـ واولادكـ مرتبين in order شوفيهو لو ما اداكـ عيونوا
والعكس صحيح يديكـ بالشلوت .....
الراجل الـ بيعبر عن حبه شفاهة لزوجتو داخل و مارق بحبكـ وبحبكـ
وبموت في عيونكـ ووو... ده قليل شغلة و مراهق ساكت ......
| |
|
|
|
|
|
|
|
|
|
Re: افكار امرأة خبيثة جدا.... (Re: Ahmed Abdallah)
|
شوف عليك الله الانانية يا احمد
يعني عيونو الداير يديها ليها دي شنو اذا كانت الرومانسية
وكلمات الحب ضياع وقت وعدم شغلة ومراهقة؟؟ يا اخوي المراهقة مالها؟؟
لو اصلو كلام الحب مراهقة ان شاء الله اصلكم ما تبلغوا
اها وبعد ما استثنيت معسول الكلام,, يا ربي الجايزة ح تكون شنو طيب؟؟
بعد ما تكسر ضهرها في سباق مع الزمن عشان تنضف البيت وتنضف
العيال وتتنضف هي زي مسابقات التلمتش قبل ما سيادتو يشرف؟؟
اها وبعد داك؟؟ كدي انت ورينا الجايزة الرمزت ليها بالعيون دي ح تكون شنو؟؟
غايتو كان كنت راجلي والله كنت حيرتك فيهن
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
يا عبد المنعم
اول حاجة نبداها من الحب,, وبالله خليكم صريحين مع نفسكم
ليه الحب بيشكل مرحلة مختلفة عن مرحلة الزواج؟؟؟ وليه الحب
اصلا بالنسبة ليكم بيعتبر مشروط؟؟ يعني المراة دي تعبر عن مشاعرها متين؟؟
مرحلة الحب كان زول ساي سمعك بتتنهدي يقيموا عليك الحد,, بعد العرس
كان المرة قالت لراجلها "حبيبي" قدام اهلو والا اهلها والا اي ككو
يشيلوها ليك طيقان في عيدان "الخفيفة اللفيفة الما بتخجل الفعلتو التركتو
ام عينا بيضا".
يعني غايتو نجاض السواد والرماد الزول الا يمشي يجكس في المريخ بعد دة
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
يا نعومة ، المشكلة فى تربيتنا الغلط، من قمنا الراجل مطلعنو لينا فى راسنا ، نبداها من صينية الغدا ، الراجل ياكل اول حاجة بعدين الاطفال ، وبعدييييين النسوان ، الولد من قام هو وصى على البنات /ما قلنا حاجة ، لكين كمان الوصاية دى عذبتنا وسلت روحنا ، تجى تتزوج برضو فى وصاية عليك والوصاية بالمناسبة تشمل الطرفين عشان نعاين لنص الكباية الفاضى ،دى بت منو واهلها منو ؟متل التقول يعنى اهل الراجل مكملين ، والعكس صحيح ، بعدين اتزوجت ما انتهى الفيلم النقةمن اهل الزوج (ودى عانيت منها كتير )مثلا قالو انى (غرباوية )لانى اتربيت فى الابيض ،ومشاكل بعد داك ، الا تكون زول فاهم ، ودا عنصر غاية فى الندرة ، مش لانك انت منعم ولا غيرو ، لكين البنعانى منه الازدواجية والكيل بمكيالين ، عايز الواحد يكون ( المك نمر ) وفى نفس الوكت عايز يكون (شتراوس ) ودى مابتجى فى الحياة الزوجية ، عشان كده امكن على صعيد شخصى فشلت فى عملية التاخى والتعايش ، ودا ناتج من انى ما كنت بفكر صاح ، ودا اعتبرو نقد ذاتى ، امكن ، لانى اتزوجت وكنت صغيره من الثانوى وعرست ، لكين بعد سنين طويلة فهمت انه الحياة ما دايرة الا النفس الطويل ، وشعرة معاوية تكون شغالة طول الوكت ، مع كده الرجل السودانى فيهو عيوب ما بعترف بيها اصلا ،ولو قعدنا فى قدام مراية وعرينا دواخلنا امكن نصل لحل
| |
|
|
|
|
|
|
|
|
|
Re: افكار امرأة خبيثة جدا.... (Re: سلمى الشيخ سلامة)
|
اها شفتو الرجال زاغو طوالي؟
وانا كان ضغطو علي شوية كدة
بتخارج ...وبكون ماسك شعرة معاوية
وعارف متين ارخيها واشدها
انا يمكن احسن حظا شوية من
ناس تانين..علي الاقل
مساحات للحوار ...ولكن ده
مابينفي انو في مشكلة
معلقة بين بين..
كدي نختبر "الزواج" ده
كمؤسسة..متوارثة ومتخلفة في نفس الوقت
وبتضيع جواها حاجات كتيرة
جميلة ..
ــــــــــــــــــــــ
دينا
هسة انا لو قلت شفيفة لي مرتي
الغيرة تمسكن...عشان عارفين
حاتكون مليانة تمام تمام.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
Quote: يا عبد المنعم
اول حاجة نبداها من الحب,, وبالله خليكم صريحين مع نفسكم
ليه الحب بيشكل مرحلة مختلفة عن مرحلة الزواج؟؟؟ وليه الحب
اصلا بالنسبة ليكم بيعتبر مشروط؟؟ يعني المراة دي تعبر عن مشاعرها متين؟؟ |
كويس نبداها من مرحلة الحب
دة لو الحب عندو مراحل..
الحب ده انا شايف
طريقو براهو...
والزواح هو المشكلة..
عشان في ضعف في
هذه المؤسسة ..
اللسة شغالين بشروطها القديمة ديك..
يعني انتاج لزيادة الخريطة
"الديموغرافية"
عشان كدة طوالي الحب بعد الانجاب
بتحول طوالي للثمرة ..الهدف
الخلية الجديدة التي من المفترض
ان تكون فيها صورة الديمومة..
وبيناتكم خلاس مسالة الحب دي
بتكون اجرائية..غير فاعلة
او منفعلة
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
Quote: عشان كدة طوالي الحب بعد الانجاب
بتحول طوالي للثمرة ..الهدف
الخلية الجديدة التي من المفترض
ان تكون فيها صورة الديمومة..
وبيناتكم خلاس مسالة الحب دي
بتكون اجرائية..غير فاعلة |
يلا لغاية هنا احنا متفقين
فعلا دة البيحصل من الطرفين وانت هسي معترف معاي بكدة
يلا امسك شوف رد فعل كل من طرفي العملية الانتجت الخلية التالتة
الرجل,, طوالي ومن غير ما يحاول يتدخل بشكل ايجابي لارجاع الامور
الى ما كانت عليه, بيبدا يفتش علي راحتو برة,, ويتذمر من المرة
البقى كل همها اولادها ويقوم حضرتو يفتش على تجديد مراهقتو "علي قولك"
مع واحدة تانية. في حين الطرف التاني طوالي تلم عليها الخلية التالتة ديك
وتكمل رحلتها بنفس المعاناة لكن المرة دي براها من غير لا الطرف المنتج ولا
طرف اخر مساعد,, لانهم كلهم بيكونوا غم في غم وطمموا بطنها ليوم الدين
من حاجة اسمها رجال. الغريبة النسوان بيتوبو من الرجال وممكن تجربة واحدة
تخلي المرة تكرههم ليوم الدين, لكن الرجال ديل ما بتوبوا ليييييه؟؟ الواحد
يا كافي البلا نفسو مفتوحة الاربعة وعشرين ساعة
| |
|
|
|
|
|
|
|
|
|
Re: افكار امرأة خبيثة جدا.... (Re: سلمى الشيخ سلامة)
|
دينا فيصل
إزيك
أولا مبروك الشاكوش البيخلي كلام زي دا
يتمرق من آخره.
طبعا أنا قاصد أحلام مستغانمي
الأنت إرتكزت على تنظيرها البتعرفه
براها دا عن ( صنف الرجال ) على
حد زعمك.
أحلام دي كاتبة متمكنة من لغتها و
شاعريتها. ما عدا ذلك ليس لها نصيب
من الذكاء المتوافر لدى الكثير من
النسوان الكاتبات و ( المفكرات )
كمان.
أنا شخصيا ما لاقيتها لكن لدي صديق
أردني ناقد و أستاذ في جامعة هارفارد
إلتقاها عدة مرات و تحاور معاها كمان.
و دا برضو رأيه فيها.
عن نفسي شفت ليها عدة مقابلات تلفازية
في الفضائيات العربية. و ما يزال دا
رايي فيها.
لكن كدا خلينا من أحلام مستغانمي و
ثلاثيتها الشبقة. إنت دي رايك شنو في
صنف الرجالة؟ يللا كدا فكي لينا آخرك
يا بت!
ــــــــــــــــــــــ
على قناعة تامة إنه الرجل ممكن يفك
آخره بكل سهولة لكن المرة عمرها ما
بتفك آخرها. حتى لو كانت أحلام مستغانمي
و كتبت خماسية.
تماضر الخنساء:
شكرا على الأغنية الجميلة. و كان تميتي
جميلك و وريتينا الفنانين ديل ياتُم
بتكونوا استحسنتي في راجل غلبان.
محبتي ليكن كلن يا بنوت و احترامي
الأكيد
| |
|
|
|
|
|
|
|
|
|
Re: افكار امرأة خبيثة جدا.... (Re: ابوعسل السيد احمد)
|
غايتو الفنانة انا باوريك ليها يا ابوعسل
بتهيا لي عافية حسن.
ويا اخوانا بالجد شوقتوني اقرا رواياتها دي
شكلي الوحيدة المسطحة وما مثقفة وبعد دة متفلسفة
ومستدلة بمقال المرة,, يعني اقرع ونزهي
اما موضوع الشاكوش دة يا اخوي فاعفاني منو
غايتو الا شيتن يجيني بعد البوست دة
الشر برة وبعيد
| |
|
|
|
|
|
|
|
|
|
Re: افكار امرأة خبيثة جدا.... (Re: تماضر الخنساء حمزه)
|
تماضر الخنساء حمزة؛ الشاعرة
سلمت يا سيدتي من مزاحي الخشن.
لا أتوفر الآن على ثلاثية أحلام مستغانمي. و إلا لقمت
بإرسالها إليك بلا تأخير. إقتسمها أصدقاء أحن إليهم
و أحترمهم.
في أحد أجزاء الثلاثية يوجد إهداء إلى ( مالك حداد)
و هو كاتب جزائري كان يقيم في فرنسا و يكتب بالفرنسية.
هذا الرجل كتب رواية جميلة جدا اسمها ( ليس في رصيف
الأزهار من يجيب ). الشخصية الرئيسة في هذه الرواية
هي (خالد بن طوبال). بعد أزمنة من قراءتي لثلاثية مستغانمي
أتيح لي قراءة رواية (مالك حداد). هالني حجم السرقة يا
سيدتي! حتى (خالد بن طوبال) هو أحد شخوص الثلاثية، و
علاقته بإحدى الشخصيات النسائية تشبه إلى حد مريب
علاقة خالد بن طوبال مع ( الراوية).
لو لم تخني الذاكرة فإن مستغانمي في ذلك الإهداء
تقول: إلى مالك حداد الذي أقسم ألا يكتب بلغة غير لغته.
عشت يا سيدتي
| |
|
|
|
|
|
|
|
|
|
Re: افكار امرأة خبيثة جدا.... (Re: سلمى الشيخ سلامة)
|
المشكلة يا اخوانا في الموروثات
يعني احنا "رجال ونسوان" اتخلصنا من كتير من المفاهيم البائدة
والموروثات القديمة الا فيما يخص علاقتنا ببعض.
وبالذات اخواننا الرجال,, لانو المفاهيم القديمة طبعا بتصب في مصلحتهم
مستحيل يتخلوا عن دور سي السيد بسهولة وما ح يقبلوا ببديل طبعا
واماتنا كمان الله يخليهن ما قصرن في التمسح للرجال,, خربن علينا
بمسكنتن وانكسارتن دي,,الواحدة فيهن مما شمسها تشرق لمن تغيب هي بتؤدي
في فروض الولاء والطاعة للبعل بتاعها,, حتى الحاجات الاخترعنها للتجميل
ما كان الهدف منها راحتهن بقدر ما حرصن فيها علي ارضاؤه,, يعني حاجات
كلها شقاوة في شقاوة,, الواحدة تلقيها بعد العواسة وكسرة الضهر في النضافة
واكل العيال والضيوف الما بيكملو والشاي والقهوة تجري تتمدد ليك ساعتين زي
العود الناشف في الحنة لمن يجيها شد عضلي,, وتجري بعد داك تنكمد في حر الله ورسوله
والعيون يحمرن بالدخاخين والنخرين كابة والعرق يقتطر,, عليكم الله هسي فرقن شنو
من السخرة الكان مشغلن محمد علي في جبال بني شنقول
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
!Dina, I came across this text two days ago in one of our daily newspapers ,its appropriate I guess
معلمة الأسبانية وقفت تشرح للفصل أن هذه اللغة ، بخلاف الانجليزية ، تذكر وتؤنث الأسماء ، فمثلاً (المنزل) أنثى جنla casa ، بينما (القلم) ذكر el lapiz .. وهكذا.
رفع طالب إصبعه وسألها: ''وما يكون جنس الكمبيوتر يا أستاذة''؟ بدلاً من الاجابة بنفسها وزعت الفصل على فريقين ، أولاد وبنات ، وطلبت أن يجيب كل فريق على السؤال مع ذكر أربعة أسباب.
أجاب فريق الأولاد بأن الكمبيوتر لا بُد أن يكون أنثى اla computadora للأسباب الآتية: (1) لا أحد ، غير خالقه ، يستطيع أن يفهم منطقه الداخلي (2) لديه لغة خاصة يتواصل بها مع الكمبيوترات الأخرى ، ولا يفهمها غيرهم (3) يحفظ لك أتفه الغلطات ، بذاكرة طويلة الأمد ، حتى يمكن اجترارها مرة أخرى (4) ما أن تختار لنفسك واحداً حتى تجد أنك مضطر لأن تنفق نصف دخلك على إكسسواراته!
بالمقابل ، أجاب فريق البنات بأن الكمبيوتر ، دون شك ، ذكر امسel computador ، والأسباب هي: (1) لكي تفعل معه أى شئ لا بُد لك أن تديره أولاً (2) رغم أن لديه الكثير من المعلومات ، إلا أنه لا يستطيع التفكير من تلقاء نفسه (3) في حين يُفترض أن يساعدك في حل مشاكلك ، تجد أنك تهدر نصف وقتك في حل مشاكله هو (4) ما أن تختار لنفسك واحداً حتى تكتشف أنك لو كنت تريثت قليلاً لكنت حصُلت على آخر أفضل منه!
وفاز فريق البنات! بيوت
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
الاخت دينا فيصل
كيفك
Quote: الرجل لا يتعلق بامراة تبكي امامه
انما يتعلق بالمراة التي تجعله يبكي |
طبعا بكينا وجرينا
وفى الاخر طلعنا بقد القفة...
اسمعى انا بعرس بعد عشرة سنة انشاء الله اذا ربنا وفق...
وبعداك اشوف استنتجاتك ...
تسلمى
| |
|
|
|
|
|
|
|
|
|
Re: افكار امرأة خبيثة جدا.... (Re: عاصم ابوبكر حامد)
|
Quote: لغريبة النسوان بيتوبو من الرجال وممكن تجربة واحدة
تخلي المرة تكرههم ليوم الدين, لكن الرجال ديل ما بتوبوا ليييييه؟؟ الواحد
يا كافي البلا نفسو مفتوحة الاربعة وعشرين ساعة |
انت عارفة مسالة المجازفة برة برة دي
بالنسبة الرجال هو نوع من
الانتقام غير مقصود؟
لي مشاعرو المنحورة
يعني بتولد نفسيا ..
والبمشي بفتش ليهو مرة عشان يتتزوجا تاني
بكون ارعن...
يعني كدة كدة ما عندك طريقة
غير تكيف حالك
وتترزع ..او تفتش نفسك في
حاجات تاني زي
علي حسب موهبتك
يابقى همك تلم قروش كتتتتتتتتترة
كدا ويتحول حبك لي مظهر تاني..
ــــــــــــــــــــــ
برضو مسالة تخزين القروش
دي من الحاجات المتوارثة
الدايرة نقاش...
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
وليه يا عبد المنعم ما تبدو new era بين الرجال والنساء؟؟
يعني بدل ما تعيش الفاضل ليك من عمرك في نكد ما تحاول تصلح
العلاقة وترجعها لعصر الرومانسية الرقيقة. حاول وما ح تخسر حاجة
على راي المثل "الارضة جربت الحجر".
يا ريت لو حاولتو تفهمو الحتة دي,, المراة ما في حاجة بتجيبها
وتخليها اطوع من بنانك وتوفر ليك الراحة والامان غير الكلمة الحلوة
واحساسها بانك مقدر الهي بتعملو والتعب البتتعبو.
يااخوي ربنا دار الشكر وقال "ان شكرتم لازيدنكم" فما بالك بالمراة؟؟
هسي في ذمتكم كم واحد فيكم انتبه لانو مرتو ممكن تكون تعبت من الغسيل
والنضافة وشغل البيت؟؟ كم واحد ساهر جنبها وهي عيانة وخدمها زي ما
هي بتعمل ليكم وانتو شداد ولضاد؟؟ ممكن تمسك منها شغل البيت في الفترة
الهي عيانة فيها؟؟ من غير عيا,, ممكن تشيل صينية الغدا الاكلت انت فيها
وترجعها المطبخ وتضايرها وتغسلها؟؟؟ يا اخوانا خليكم منصفين واقعدو مع
روحكم, الظلم حرام ياااخ.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
دينا فيصل الراقية الرقيقة
شكرا على اسم الفنانة ( و نسيان المعاها
طالما رجال) .
كلامي بخصوص الشاكوش ما قاصدك بيه يا بت
الناس. كان ما مصدقة أرجعي أقري كلامي تاني.
كلامي عن أحلام و ثلاثيتها يا هو الأنا قاصد أرد
عليك بيه، مش الأخت تماضر الخنساء كما ورد
خطأ.
عموما يا ستي يا ها لخمة الحياة و النسوان
و هجومهن غير الرحيم على الرجل ( المسكين
دائما) تخلي أكتر من دا يحصل لينا.
المهم يا بت الحلال، الكلام الكبيتيهو هنا دا
كله أصبح زيه زي الوثائق البيفرج عنها
البنتاغون بعد ثلاثين سنة. يعني ما في مخافة
من ضرره.
أنا لسع مقتنع إنه العوين ديل الشايلاتينه
جوا قلوبهن و عقولهن لينا معشر الرجال تقيل
شديد.
ودادي الأكيد
| |
|
|
|
|
|
|
|
|
|
Re: افكار امرأة خبيثة جدا.... (Re: ابوعسل السيد احمد)
|
بوعسل ياجميل
كيفك
Quote: أنا لسع مقتنع إنه العوين ديل الشايلاتينه
جوا قلوبهن و عقولهن لينا معشر الرجال تقيل
شديد.
|
ما دا المجننا زاتو..
المهم نحنا
بنحاول نزح التهمة من
من قدام بيتنا
ونحتها في ملعب
تاني ..
يعني نحنا لعنة المجتمع الذكوري
دي ما فايتانا مافايتانا
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
صديقي منعم
المشكلة المتحمدانا إنه هل
نحن بكل هذا التعقيد بالنسبة للنساء؟
أم نحن كائنات بسيطة التركيب الذهني
بالنسبة لهن؟
يتخيل لي لو النسوان قدرن يصلن لتعريف
واقعي لماهيتنا، بعد داك ما في مشكلة.
من ناحيتنا كرجال مقتنعين أن نؤجل محاولة
فهم المرأة لآلاف السنين القادمة.
المهم في الآخر ما في ليهن مفر مننا و ما في
لينا مهرب منهن. البتقول غير كدا تمشي
تقنع الديك في الأول.
| |
|
|
|
|
|
|
|
|
|
Re: افكار امرأة خبيثة جدا.... (Re: ابوعسل السيد احمد)
|
Quote: من ناحيتنا كرجال مقتنعين أن نؤجل محاولة
فهم المرأة لآلاف السنين القادمة. |
وان شاء الله احنا من هنا للالاف القادمة دي ناكل نيم والا ايه؟؟
ولا نقعد نفهم فيكم ويبقى علينا المثل "يلقطها النمل وياطاها الفيل"
يا اخوي احنا دايرين اصلاح فوري,, يعني يبدا من الشفيفة
القاعدة معاك في البيت وينتهي بالمدلل الالله قاسموا لينا
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
Quote: وان شاء الله احنا من هنا للالاف القادمة دي ناكل نيم والا ايه؟؟
ولا نقعد نفهم فيكم ويبقى علينا المثل "يلقطها النمل وياطاها الفيل"
يا اخوي احنا دايرين اصلاح فوري,, يعني يبدا من الشفيفة
القاعدة معاك في البيت وينتهي بالمدلل الالله قاسموا لينا |
تعرفي يا دينا ما قصدي إنه النسوان لوحدهن ينكون بمحاولة الفهم
دي. قصدي ببساطة إنه المرأة انسان شديد التعقيد بالنسبة لنا
معشر الرجال. يعني مستوى التفكير و طريقة التعامل عند المرأة
متطورة و بالغة التعقيد. مثلا يمكن لثلاث نساء جالسات معا أن يتكلمن
في نفس الوقت و بنفس درجة علو الصوت و القدرة المذهلة على فهم
ما تقوله كل واحدة منهن و متابعة الحديث مع بعضهن. نحن الرجال
الله ما قسم لينا قدرات زي دي. عقلنا بشتغل linearily و إنتن عقولكن
بيشتغلن كـ network . من الظلم لأي من الطرفين إفتراض الطرف الآخر
أنه لديه نفس مستوى و طرق إشتغال العقل.
الإصلاح الفوري بيبتدئ من هنا دا إنه نحن مختلفين لبعض لكن مكملين
لبعض.
ثانيا لازم نرفع شعار ( لا لسيطرة طرف على الآخر ) مستغلا قدرات
مادية أو ذكائية أو بدنية. كمان لازم أمينين جدا في رفع الشعار و
تطبيقه. و دا بيبتدئ بالصراحة و الشفافية.
داير أسمع منك قبال ما نمشي لي قدام. سمح؟
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
Quote: المهم نحنا
بنحاول نزح التهمة من
من قدام بيتنا
ونحتها في ملعب
تاني ..
يعني نحنا لعنة المجتمع الذكوري |
الاعتراف بالحق فضيلة
وقلنا ليكم ابدو انتو بمحاولة التغيير
كان البينا تعمر والارضة جربت الحجر
_____________
ذكرتني واحد رسل لخالي في السعودية قال ليو "انا قلت ارسل
ليك تشوف لي اقامة معاك واهو الارضة جربت الحجر"
| |
|
|
|
|
|
|
|
|
|
Re: افكار امرأة خبيثة جدا.... (Re: ابوعسل السيد احمد)
|
Quote: أنا لسع مقتنع إنه العوين ديل الشايلاتينه
جوا قلوبهن و عقولهن لينا معشر الرجال تقيل
شديد. |
غايتو يا ابو عسل بس هن عورة ساااي
غايتو لو بسمعن كلامي,, من بكرة مافي واحدة فيهن
تشد ليها حلة في النار,, والشغل يكون النص بالنص
ايوة يا اخوي ما فيش حد احسن من حد ولا جلدكم انتو حلو
وهن الما بشعرن! وكان كمان جينا للحق مفروض تعب الحمل والولادة
دة يكفي تماما,, يعني تاني الواحدة قشة من ا
ما ترفعها
وانتو تخدموهن حفيانين.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
Quote: دة يكفي تماما,, يعني تاني الواحدة قشة من ا ما ترفعها
وانتو تخدموهن حفيانين. |
خدمة البيت فايتانا وين؟
والله يا مسحنا ..وغسلنا عدد..
واكلناهن كمان ..
دي اصلو مالمشكلة ..
المشكلة مرات بيحصل ابتزاز منهن
ونحنا نقدر وندفع فاتورة
اجدادنا الاضطهدوهن....
لكن طوالي هن عايزات
المسالة دي تمشي علي كدة..
باعتبار الفاتورة لسة ما خلست
| |
|
|
|
|
|
|
|
|
|
Re: افكار امرأة خبيثة جدا.... (Re: عبد المنعم ابراهيم الحاج)
|
Quote: لكن طوالي هن عايزات
المسالة دي تمشي علي كدة..
باعتبار الفاتورة لسة ما خلست |
عايزات شنو؟؟ والله الزمن دة الرجال عايشين في نعيم
لانو المرة بقت تشتغل, يعني القروش الزالننا بيها دي
بقت ما فارقة,, ولا دايرة منك توب جديد ولا ملايات ولا عدة
يا اخوي الكلمة الطيبة فقط والحسنة معطت شارب الاسد
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
يا دينا الرقيقة.
كلامك دا ماني مختلف معاك فيه تب.
عن تجربة شخصية مع العزوبية الطويلة
إلى الآن، وصلت إلى قناعة تامة بأنني
لازم أطبخ و أغسل و أنضف بنفسي و للا
ما حالقى طعم للحياة. ما عندي مانع
إنه بت الحلال ( لامن تسخى و الله يجيبها)
إنه تتقاسم معاي دا كله. و كمان تربية
العيال و الاعتناء بيهم من نظافة و تغذية
و (هوم ويرك) أكيد لازم نتقاسمهم.
الحمل و الولادة ديل الله قسمهم للعوين.
نحمد الله إنه إختصهن بهذه المسؤولية العظيمة
و وفرنا نحن للمسؤوليات الأسهل.
| |
|
|
|
|
|
|
|
|
|
Re: افكار امرأة خبيثة جدا.... (Re: Dina Faisal)
|
قالوا الجمــال راسمال
قسم
الله اكفينا شر كتابة الليل ام كراعا بره
الليلة الخميس موووش
ثمح
حنرفق بالباندوث
_____
طمطم وللا ود النمير ضرب في المليان طوااالي
بنضرب جيش نضرب بوليس
بجهز الكتيبة وجايييكم
كيكي وسيليكون ااااانتباه
استرح
| |
|
|
|
|
|
|
| |
رقم صفر
Deng
فيصل نوبي
بدر الدين الأمير
أيمن الطيب
د.محمد حسن
عاطف عمر
عبد المنعم سليمان
سلمى الشيخ سلامة
bent-elassied
Ahmed Abdallah
ابوعسل السيد احمد
Ahmed Suliman
عاصم ابوبكر حامد
فيس بوك
تويتر
انستقرام
يوتيوب
بنتيريست