|
|
 إستعدوا للفضائح..!!!
|
في مؤتمر صحفي عُقد منذ فترة , أعلنت شركة يابانية أنها بدأت بالفعل في تطوير جهاز قادر على قراءة أفكار العقل البشري.
و قد صرٌح رئيس الشركة بأن هذا الجهاز يمكنه النفاذ إلى الأفكار التى تدور في ذهن الإنسان و ترجمتها إلى عبارات مفهومة. و توقع أن يصبح الجهاز جاهزاً لتجربته على متطوعين من البشر في غضون الخمس سنوات المقبلة...!!!
تصدقوا الخبر ده زعٌلني زعل أصلو ما معقول...
قولوا لي ليه؟؟؟!!!
|
|
 
|
|
|
|
|
|
|
|
Re: إستعدوا للفضائح..!!! (Re: mamkouna)
|
الإنسان كائن إجتماعي...و لكسب الصداقات و إتقاء شر الكثيرين لابد من بعض النفاق الإجتماعي .
تخيلوا معي هذه المواقف.....
زوج و زوجة و حلة محشي...الزوج يتناول أول لقمة و يبتسم راضياً مرضيا..
الجهاز : (( لا نافعة في طبيخ لا نافعة في غيره...ده مقلب شنو الأنا إتمقلبتو ده؟ ))
الزوجة تتناول لقمة و هي تبادله الإبتسام...
الجهاز : (( تاكل السم اليهري مصارينك...ده وش يطبخو ليهو ده؟ ))
زميلين في عمل..
الأول : مبروك الترقية يا فلان...تستاهلها..
الجهاز (( أصلك حرامي و مرتشي و معروف إنك إنتهازي و متسلق ))
التاني: الله يبارك فيك يا فلان..عقبالك..
الجهاز (( إنت من يومك حاسد و حاقد عشان كده عمرك ما ح تتقدم و لا تنفع ))
صديقتين إتقابلوا بعد طول غياب...
الأولى: مشتاااااقة ليكي يا هناية شوق ما عادي .
الجهاز : (( كنت مرتاحة من وشك المزلوط ده...ده يوم شنو النحس ده ))
التانية : و الله بالأكتر يا هناية...مالك بقيتي سمحة كده ؟
الجهاز : (( بقيتي عاملة زي الفيل و وشك قدر الطبق.. )) ....
يمكننا تخيل المئات من المواقف المُحرجة و المافي ليها داعي...
حقو اليابانيين ديل يخلونا كده...
بدل ما نواجه حقائق إن تبدو لنا.... تسوءنا...
عليكم الله ما لي حق أزعل....؟؟!!!!
| |
|
|
|
|
|
|
|
|
 Re: إستعدوا للفضائح..!!! (Re: Tagelsir Elmelik)
|
تي.إتش.الملك..
سلامات.
الجهاز دا ح يكون مشكلة كبيرة مع جماعتك بتاعين (( فلان جبدوا فلان)) !
ح يجي واحد يسأل التاني:
الزول : ولدك ده ما بيشبهك...ملامحو دُقاق شوية.
الجهاز : قول الحمد لله ..الما جبدت ولدك ب راسك الغليد و عيونك المفنجطات ديل !!!
| |
|
|
|
|
|
|
|
|
 Re: إستعدوا للفضائح..!!! (Re: Salah Waspa)
|
ممكونة
عندما إنتصر كاسباروف بطل الشطرنج العالمي في مباراة مشهورة على إنسان آلي وضع فيه عدد من أشهر اساتذة الرياضيات كل حيل
اللعبة
قال كاسباروف إنه سعيد جدا لانه إنتصر للعقل البشري
ما اعظمه من عقل
| |
|
|
|
|
|
|
|
|
|
Re: إستعدوا للفضائح..!!! (Re: Salah Waspa)
|
الاخت ممكونه وبعد داك تبدا الناس تصنف على حسب الحاله
واحد يقول والله فلان قلبو طيب خلاص. التانى يقول ليه رابط
جهاز ولا لا. يقول لا. يرد عليه ات ماعارف اى حاجه لو رابط
جهاز كنت بصدقك.الجهاز بربطو وين ياممكونه اختى ؟
صناعه يابانى تجميع الصين ده عندنا مابشتغل.
| |
|
|
|
|
|
|
|
|
|
Re: إستعدوا للفضائح..!!! (Re: خالد المحرب)
|
| Quote: الجهاز بربطو وين ياممكونه اختى ؟ |
خالد المحرب..
أنا غايتو بتخيل الجهاز ..محمول في الكف زي الموبايل
ممكن تقفلو..و ممكن تفتحو...و ممكن تعملو (( صامت ))...
و بيشتغل (( هزٌاز )) مع كل كضبة !!!
| |
|
|
|
|
|
|
|
|
|
Re: إستعدوا للفضائح..!!! (Re: Salah Waspa)
|
صلاح واسبة
مرورك شرٌفني كتير.
قلت لي تكتيكات عسكرية و أمنية و تفجيرات و سيارات مُفخخة ؟؟!!!
طيب كيف معاك أثناء الدعايات الإنتخابية؟؟؟
هل تتخيل كمية الفضايح و المُرشح يصرخ بأعلى صوته:
إنتخبوني...من أجل حياة أفضل..؟؟؟!!!
| |
|
|
|
|
|
|
|
|
|
Re: إستعدوا للفضائح..!!! (Re: mamkouna)
|
الاخت العزيزة ممكونة
اسعد الله صباحاتك بكل خير
عارفة اكتر ناس حيتجهجهوا نحنا الشعب السوداني ديل
كميات الف من القطيعة حتطلع لبره
وخاصة وسط النسوان
غايتو خمس سنوات لقدام دي شوية بتطمن ولغاةي ما تصل السودان عاوزة ليها خمسة تاني
قبل ما كل شيقن ينكشفن ويبان
تسلمي
| |
|
|
|
|
|
|
|
|
|
Re: إستعدوا للفضائح..!!! (Re: maia)
|
Quote: ولغاية ما تصل السودان عاوزة ليها خمسة تاني
قبل ما كل شيقن ينكشفن ويبان |
منو القال ليك يا مايا؟؟!!!
لو حسسسسييييييييييي جهازنا دا طلع في اليابان..
بكرة بيصل دبي..
بعد بكرة الدلاليات و تجار الشنطة بيجيبوهو السودان !
| |
|
|
|
|
|
|
|
|
 Re: إستعدوا للفضائح..!!! (Re: mamkouna)
|
عندي زول صاحبي ياممكونة بيقول لي نحن والله يا بلقيس الا يبنجونا ( بنج ) برة البلد دي !!
تأثيرات وهضربة مابعد العملية
عشان كدا لم انقل ليهو الخبر دا حا يزعل أكتر منك
انا برضو زعلت طبعا
ماتقولي ليه
| |
|
|
|
|
|
|
|
|
|
Re: إستعدوا للفضائح..!!! (Re: Adil Al Badawi)
|
السوال البطرح نفسو هنا يا ممكونة ...
هو لغة الجهاز البترجم ليها شنو ...
لو ترجم بالياباني ...((يصطفلو)) على قول الخليجيين ...
و احنا ما فاضين لحدي ما نسعى لينا نسخة بالعربي ....
و حلك لحدي ما يطلعوه بالعربي نكون اتكلنا ...
| |
|
|
|
|
|
|
|
|
|
Re: إستعدوا للفضائح..!!! (Re: mamkouna)
|
انا .. المنبر بتاعكم زى العسل اليومين ديل ..
الجهاز ... ده منبر شنو الكلو قعدات وعرقى وسكرجيه ..!!
والله يا ممكونة انتى بتاعت محن ومشاكل ...!!!
الناس دى كلها ح تطلع بترش رش تقيل خلااااااااااااااس ...
يعلن أبو التكنولوجيا ظاااااااااااااااااااااااااااطا...
| |
|
|
|
|
|
|
| |
mamkouna
Tagelsir Elmelik
خالد الطيب
Salah Waspa
حيدر حسن ميرغني
خالد المحرب
bayan
محمد المرتضى حامد
ملكة سبأ
Sobajo
Muna Khugali
سفيان بشير نابرى
فيس بوك
تويتر
انستقرام
يوتيوب
بنتيريست