|
|
 يا ناس ألحقوني في واحدة جابت لي الجلطة !!!
|
الأخ بكري عاين لي هنا وأسمعني كويس عشان عايزة أقول ليك المنبر دة بعد الشفتو اليوم أحسن توديه
أسماء في حياتنا وتترحم عليه ولا توديه متحف التاريخ الطبيعي عشان أنا كنت قايلة الكتابة
البنكتب فيها كل يوم دي جايبة همها لكن والله بعد السفتو الليلة لقيت روحنا بنأذن في مالطا,, طبعا الشمار كاتلكم وعايزين تعرفو الحاصل شنو؟؟ المنبر دة أمانة مافيهو ناس بحبو الشمشرة والشمار لدرجة إنهم مش الفول بس حتى الحلو والجلي بختو فيهم شوية شمار ,,, يا أخونا قبل ما أقول ليكم
الحاصل شنو طبعا أنا عودتكم أكتب كلو جمعة لكن الشفتو في السوبر ماركت الخمسة نجوم الجنب بيتي
خلاني ما أصبر 24 ساعة و5 دقايق و3 ثواني وبعدين قبل كل حساب أعتذر للرجالة اللي شلت حالهم ونقحت طارهم في البشتنة وما ادراكما البشتنة لأني الليلة لقيت بشتنة النسوان عينة مش تجيب الضغط والسكري
دي تجيب الجلطة عديل كدة , بتصدقو اليوم أول مرة في حياتي يغلبني الكلام وأفغر فاهي من الدهشة
لدرجة الهبالة لامن شفت واحدة سودانية لابسة توب بني وسفنجة خدرة وشراب أبيض أظنو حق زوجها وعاملة
شعرها كعكات كلو كعكة أكبر من التانية ولمن جات داخلة خلت الما يشتري يتفرج وهي آخر همها قادلة
جنس قدلة عجيبة ولمن وصلت الكاشير إتصادفت أنا وهي للأسف وجها لوجه طبعا ناس الكاشيير وكل العاملين
فلبينين وهنود قعدو يعاينو ليها ويعاينو لي لأني بعرفهم كلهم وهي بدل ما تستحي على دمها وعلى
السفنجة الخدرة والشراب الأبيض والشعر المربطاه كلو كعكة بي لستكة بيضا قعدت توزع ليهم في البسمات
شمال ويمين وهم يعاينو ليها ويرجعو يعاينو لي قلت أحسن أمشي عليها وأقول ليها عيب إنت بتمثلينا
يا أخوانا والله رجلي ما شالني وما قدرت أتكلم إتبكمت واتلجمت وبعدين هي شكلها كدة نوع بتشاكل
ضلها قلت تقوم تشرشحني قدام الناس وتخليني ما أسوى بيزة والله يا جماعة الخير في ناس مسحو بينا
الأرض في الغربة وخلونا مضحكة وسط الناس يعني مثلا في نسوان تلقى الواحدة في البيت قردة وفي الشارع
وردة وواحدات قرود في البيت وفي الشارع كثير جدا تصادفني سودانية في السوق لابسة توب وتحتو قميص
نوم قطن ولا بتاع بيت وبتفتكر إنه ما ظاهر أو الناس ما واخدة بالة أو تلاقي واحدة لافة شعرها بالرول
وجاية السوق عشان مسافرة ولا عندها حفلة وماعايزة تفك شعرها ولا تلاقي واحدة تتكلم في السوق أو مكان
عام بأعلى صوت دون مراعاة للناس اللي من حولها ,, مرة صادفت واحدة في السوق كلما سألت عن سعر حاجة
قميص ولا بنطلون وقال ليها السعر بي كدة تنط تقول ليه لييييه بجيب لندن؟؟ البياع المسكين هندي
وما عارف الهبلة دي بتقول في شنو كمان في حاجة عجيبة لمن يمشوا المسجد لصلاة الجمعة أو التراويح
النسوان كلهم بلبسن أحسن لبس للمسجد إلا الكثير من السودانيات أي حاجة ما ليها علاقة باللبس بلبسوها
ولما تلفت نظر الواحدة تقول ليك يا اختي بلدا ما بلدك أمشي فيه عريان! ياأختي الشايفنا منو بعدين
لمن نمشي السودان محل اللبس نلبس حاجاتنا الجميلة ,, وطبعا ديل نوع الواحدة تشتري كمية من التياب
والدهب وتمشي تخزنهم في السودان للحرامية بدل ما تلبسهم وتستمع بيهم ,, ياناس شوفو لي حلل لازم
نوقف هذا العبث وكلو واحد من الليلة يشوف واحد ولا واحدة مبشتنة طوالي يمشي عليها ويكلمها وزي
ما قال الفنان اللي بدو يصير يصير ولا شنو رايكم ؟؟ عموما حأرد عليكم الليلة لغاية نهاية اليوم عشان بكرة ماشة الشارقة أرجو من بقية المتداخلين ما يزعلو ينتظروني لغاية السبت ورغم الجلطة الحاسة بيها جوة قلبي أقول ليكم فتكم بعافية .
|
|
 
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عطوف حبيبه
وهو بالله دى انتى الكنتى بتحمرى لى بالغتى مالوالشراب بالسفنجه ماحلاتو دس موضه من GUCCI
انتى الظاهر عليكى ماعايزة تجيبى الامور البر مابتوبى
بديتى تدخلى فى بعض اماكن خطرة الكلام الذى ده بيجيب ليكى الانتى عارفاه
تحياتى وتانى عيب بطلى الفتنه من تشوفى حاجه تجى جاريه لبكرى تفتنى ليهو
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
الاخت عواطف
تسلمي يا زولة من الجلطة
لكن دي يا بت امي مشاهد مالوفة ، ديل ممكن يصلوا لمرحلة انه يتشاكلوا في السوق
مرة في مسقط في السوق دخلنا محل اختي وانا
لقينا في نص المحل واحدة من ذوات الحس الكبير العالي جدا برفقة زوجها والاسوأ والامر انه داخلة مع راجلها في نقاش ، هو في الحقيقة مش نقاش بل شكلة من نوع كعب جدا
وكلمات من نوع ( انت مالك ياخي ) .. ونقنقة صعبة جدا ومعاها تكشيرة ورفع حواجب بتعالي كدافي قصة تشتري شنو وتخلي شنو!!!!
ياخي كرهتنا السوق وابو السوق
خلينا ليها المحل
احنا جاتنا ذبحة في الحقيقة
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: maia)
|
ميوية !!!
تبري وتستبري من الذبحة ,, والله شكل السوق دة عادي بين السودانيات وأزواجهن ,, عشان ما بكونو
متفقين يشترو شنو ويخلو شنو من البيت وبعدين بيني وبينك في واحدات عينن ما يملاها إلا التراب
عشان كدي الشكلة والكبسيبة قدام الناس دي حاجة طبيعية ,, سلمت يالحبيبة .
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: ماجدة عوض خوجلى)
|
عطوفة والله أحسن ليك يوم غايتو حريمك ديل بيعملوها فيك يا ضروبك في سوق او بنشرو ليك كفر سيارتك
أو عملوا ليهم عصابة عشان يكسرو ليك نخرتك , عارفة ليه لانو الضرب في الميت حرام بس انت قولي
اللهم قد بلغت اللهم فاشهد . انت شوفتي حاجة هسع نحنا بنقول ناس الإمارات راقين ومتعلمين
والله في السعودية هنا تشوفي العجب العجاب , اولا موضعوع السفنجة ده بالنسبة لي بقي حاجة عادي
جداً لكن العبايات والله العظيم أحسن يلبسو ثيابهم لانو العباية لونها اسود وتلاقي الواحدة شايلة
ولدها في صفحتها والتراع مالي ليها العباية والأوساخ في كل إتجاه أنا متاكد لو عملو ليها
تفتيش حايلاقو صراصير جواها ’ عواطف يا اختي لو باريناك نحنا زاتنا بتجينا جلطة احسن لي
انسحب عديل كده ,
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: هاشم أحمد خلف الله)
|
هشومي !!!
مداخلتك دي تحريض واضح وصريح على الإعتداء على شخصي وبعدين أشمعنى إخترت يكسرو لي نخرتي وإنت
أصلا عارفها معفصة وشينة وما محتاجة لتكسير إضافي والله ناس أبو ظبي عشان ما أظلمهم فيهم ناس قمة
في الرقي والذوق لدرجة إنو المبشتنات بكونو حاقدين عليهم لكن يا هاشم الهندام وحسن الاختيار
صفة غريزية وليست مكتسبة عشان كدة تلاقي في ناس متعلمين ومعاهم فلوس لكن مبهدلين أها ديل نعمل
ليهم شنو ؟؟.
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عواطف الجميلة قالت
(وهي بدل ما تستحي على دمها وعلى
السفنجة الخدرة والشراب الأبيض والشعر المربطاه كلو كعكة بي لستكة بيضا قعدت توزع ليهم في البسمات
شمال ويمين وهم يعاينو ليها ويرجعو يعاينو لي قلت أحسن أمشي عليها وأقول ليها عيب إنت بتمثلينا
يا أخوانا والله رجلي ما شالني وما قدرت أتكلم إتبكمت واتلجمت وبعدين هي شكلها كدة نوع بتشاكل
ضلها قلت تقوم تشرشحني قدام الناس وتخليني ما أسوى بيزة)
اعملي حسااااابك دي اكود تكون جنريتر
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
نتكلم جد شوية
اناقة الرجل في لبسه وحديثه لابد من ان تكون وراءها امراة انيقة
وكذا العكس
وتعالي شوفي عندنا وخاصة في الشارع العام بتاع غبيرة
المرة من الحفرة وللسوق
تكرهك في الدخان البنريدو
لانو الدخان ده مزاج
عنده مقدمات طويلة
وتوابع اطول
ويعطي نتائج للانف ما معقولة ولبقية الحواس احساس فردوسي
لكن البنشمه في غبيرة ده
ده دخان شوشوة ساي
ومعاك
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
الاخت عواطف
كلامك... عدل .. ونضمك ..زين..وكده اكملتي البشتنة السودانية والفضل بشتنة الشفع.
قبل ..ده كلو زمان قالو وراء كل عظيم (مرة)..الان يمكن القول وراء كل رجل مبهدل( مرة)مبشتنة.
بعدين شوفي لينا حكاية الشفع دي سريع...
ومنو الفال ليك كتابتك ما جايبه همها ...ماشفتي الناس بقوا كيف???!!!
ليك ... رجعة
معتصم العربي
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عواطف وحيث انني في معسكر عمل دائم وسامية قليلة الحركة الا في الضروريات وانا اجتماعياتي كلها صوتية واونلاين والاسواق حيث اعيش لحسن الحظ بعيدة عن سكن تجمعات السودانيين الا فيما ندر فلذا الصورة بتاعتك دى ربنا بعدنا منها ومرات مرات الواحد متحرك من مكان الي اخر بشوف مناظر بسيطة مزعجة ولكن ليس باستمرار..الامر مهم ويجب الانتباه اليه فالصورة العامة لنا في المهجر تضررت كثيرا من نهاية الثمانينات وهذا له جوانب سالبة في فرص العمل ...الاوتيلات فيها مناظر لرجال لبسهم سئ ...
نجي نشوف دة
حاتصل واشوف كيفن تمشي الشارقة وتفوتي مكان ما نحن في
دة كلام؟؟؟
ابوبكر
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: abubakr)
|
يا ود سيد أحمد !!!
معزتي ,,,
أحمد ربك إنك ما بتطلع كتير والله نحنا عشان شغلنا كلو حوامة بنشوف العجب العجاب بس خليها على الله
والله أما حكاية الشارقة دي ماشة لي لواحدة راقدة مستشفى مع بعض الصديقات عن طريق الأمارات يعني
ممكن ما ندخل دبي لكن لو دخلنا حتما سنزوركم ,,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
يا اخت عواطف
كدي.. نقيف شوية مع البشتنة السودانية دي ,ونغوص ونشوف اصلها من فصلها.
وندخل حكاية الدجاجة والبيضة(الجاجة زي ما بقول الزلمات)>
هل اصل البشتنة المرة او الرجل او العكس ?
زمان كان بقولوا فلان ده مبهدل حقوا تعرسوا ليهو مرة تعدلو!!!!
كمان بقولوا فلانة كانت نوارة الحتة وموقفة خلق الله ومشحتفه روح الكبار
والصغار...,عليك الله شوف الراجل ده بهدلا كيف?
هل انقلبت الاية????
رايك يا عواطف ...وتحليلك .. حسب الوامةالحوامة...
هل سمعتي ياعواطف..بكاتريتا..المارد ..الرهيب..الاعصار..الهبباي..?
معتصم العربي
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: معتصم عبدالرحيم)
|
عصومي !!!
والله لغاية هسة كل المحللين فشلو في معرفة بشتنة الراجل جاية من بشتنة المرة ولا العكس ؟؟ لكن أنا
بقول بشتنة الراجل رغم مرارتها بتكون مبلوعة ولكن بشتنة المرة شينة شنا ما عادية و بعدين أنا بستغرب كيف الراجل يقبل يعيش مع واحدة مبشتنة وبالمناسبة يا عاصم الحكاية لا شهادات لا تعليم في
نسوان شهادات عليا وبشتنة عدوك وبهدلة السواد والرماد وما عارفين دة من شنو يا ربي الجينات
بتاعتنا بتحمل كروسموسات البشتنة ولا شنو ,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
اختنا عواطف
ربنا يديك العافية وطولة العمر ..
كمان كلامك ده يمر ويقراءه المرة والراجل علي حد السواء ..في هذا المنبر علي اقل شيء(الراجل يفتح المجال لمرة تقراء ..كذلك المرة)..من يمتلكون الباس وورد.
اما عن البشتنة.. الله لا يوريك كمان.. الونسة, وزي ماقلتي الحكاية ماشهادات ولاسكن عواصم وحضر , الحكاية يا استاذه في الدم ما في الدم كمان لانو احيانا كثيرة تلقي البيت الواحد منتخب جاليات في اللبس والزوق والاناقة ولباقة الحديث,لدرجة مرات الواحد يتسال هل الناس ديل اخوان.
كمان شوفي الونسة...وانت مجبور تسمع.. وان ابديت اي نوع من.. من...انت مصنف ..معادي (للسامية).
المزيد.. لتصحيح الصحيح ...القامة السودانية السمحة
في احد المرات وفي الخرطوم ارجع ضابط الجوازات احد المواطين وبصريح العبارة قال له( شنطتك الشايلها دي فيها غيار ..قال نعم.. قاليهو امشي الحمام هناك اغسل وجهك واتشطف وغير ملابسك ..عشان الناس الماشي ليهم ديل يحترموك)
انتي ..في شنو يا عواطف في ناس ايام من الايام كان بيمشو لندن بالسفنجة وحدث ولا حرج....ان لم تستح فافعل ما تشاء.. وطب نفس اذا حكم القضاء.
الناس ديل ماتو
راجعلك
معتصم العربي
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
حمالة الهموم عواطف ....
سلامتك من الجلطة ... وإنشاء الله اليكرهوك.
الصورة دي للأسف الشديد بقت جزء من شخصيتنا، والناس بقوا يعرفونا بيها .. لبس غير متناسق (راجل كان أو مرة) لبس مبهدل، وأحياناً وسخان .. أطفال وسخانين .... عربية تشكي حالها لسلطات المرور .. (وجع أوتوكيت) في التعامل ..... تعدي شنو وتخلي شنو .... ما قادر أقول ليك خليها مستورة، لأنها فعلاً بقت ما مستورة.
فعلاً الحل التوعية .. بس تفتكري كيف؟ كفاية نكتب هنا .. والا عواطف تكتب ليها مقال في المجلة .. المسألة محتاجة (إعادة صياغة) عديييل.
مودتي
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: محمد أبوالعزائم أبوالريش)
|
ودابو الريش !!!
تحياتي ,, مع عميق شعوري بالمأساة التي نعاني منها والله ديل يا حمادة لو شربتهم الذوق مع الموية
مافيش فايدة ,, دي أمراض كرونك ومستعصية إلا يجي جيل جديد لنج حتى نقدر نقول يمكن الأحوال تتصلح
أمي كانت بتقول لينا لما كنا صغار عندهم أغنية بتقول أهم شي الحمام ونضافة الأجسام الزول يكون
بسام أصلو الجمال أقسام لكن تعال شوف نحنا لا نضافة لا ابتسامة ولا جمال ,, كان الله في عوننا .
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عطوف
وانا كان ماصحيت من بدرى كنت بتشوفى المنظر بتاعى الجميل ده وين عارف حبيبتى هى لوجات على السفتجه بالشراب
بس ورمادى هينه والله انا مرة شوفت واحدة معقدانى ليوم الليله بتصدقى كان فى حفل استقبال داعيه ليهو مجموعه الازمات الدولية علشان يعرضو فيه كتاب عن السودان . كل السودانيين الموجدين مافاتو صوابع اليد والاغلبيه من الصحفيين والبرلمانيين ومنظمات انسانيه وحقوقيه مهتمه بالشان السودانى المهم فى نص العدد بتاع السودانيين البسيط ده كنت اناوالكارثة الجات من وين انا ماعارفه السيدتين الوحيدات من السودان وشكلنا ظاهر ومافيه مغالطه والله ياعطوف انا مهما وصفت ليكى هى عامله فى نفسها شنو مابتصدقى بتصدقى جايه لابسه ليها توب بيرقش كله بشكل غريب وبعدالحاجه دي اظن شافت انو الرقشان بتاعا ماكفايه قامت ماخلت ليها دهبايه طايرة مااتعنكشت بيها وعلشان تكون الاتار بتاعتا مدمرة تماما ميه فى الميه التوب الحاجه البترقش فيهو دى كانت بالفضي ومع الدهب الاتنين سرهم كان باتع وبعد حبيبتى تعالى شوفى الحنه وخاته ليها طن كده من الريحة والله لمن جات داخله شوفتى الخواجات الماقعدين يشتغلو باى زول لابس شنو ولا بيعمل فى شنو كلهم كانو بيعاينو للحاجه الدخلت دى انا بس دخلت فى اضافرينى ولو ماكنت لابسه توب ذيها ماكنت بسلم عليها المشكله انا الى الان ماعرفت هى كانت خاته فى راسا هى ماشيه وين اتضح بعد كده انها زوجة واحد من مستجدين النعمه من مسؤالى النظام صادف انهم فى لندن فى الوقت ده فجو مع واحد من السفارة
والله ياعطوف المنظر ده ماشفتيهو بشع كيف انتى بس حاولي اتخيلى المنظر لو ماقلبك وقف تجى تقولى لى لابسه سفنجه وشراب رمادى بالغتى عديل
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: ماجدة عوض خوجلى)
|
صحفيتنا العالقه بين بهدلة الرجال والنسوان
عطوفه،،،
نقول الجاتك من سوادنيتك سامحتك!!
مناظر علي التلاله بقي لي مناظر علي البشتنه
ومن كل لون اخذت نصيب دي يمكن موضه جديده في اللبس
والعالم كلو مقبل عليها ونحنا ناس قدام ما مودرررررررررررن
ومن البشتنه ما قتل! والله المشكله البوستات دي ما بتصل ذي ديل والا
كان بنشوف نتيجه باااااااااااااينه دايرين ناس علم النفس يفتونا؟
والمصيبه الأمثله ما بقت علي الجهله من أمتنا دي داء نجده عن البروفااات
من حملة الدكتوراه والأعلمييييييين البنشوفم في الشاشات الفضائية كمااااااان
والله زماااااااااان ياسودان أبكي وأتحسسر علييييييييييييييييييك!!!
أبوقـ مجدي عبدالرحيم ـصى
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: ماجدة عوض خوجلى)
|
مجووووووووودة !!!
صباحك فل يا ست الكل ,,, طبعا صباحك جميل ما في شك لكن أم رقاش دي حكاية عجيبة بس إنت ما شفتي العرايس البلبسن تياب السهرة بالنهار في نص السوق والعريس عشان في شهر العسل السكينة سارقاه يعاين
ليها باعجاب شديد وهي جنس دلع ما خايل فيها أما العنكشة ديك ما تديك الدرب دهبتين حقيقيات والباقي
فالصو أما الدخان والخمرة عاد المول كله يقول يا ليل وهي ما بتكون عايزة تشتري حاجة بس نوع من الفسحة والبشتنة أها رايك شنو ؟ غايتو أنا لي هسة ندمانة أني ما مشيت بي توب الصبحية حقتي السوق
عاد كان شفتيه كان لقطة !!
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
انتي اي عطوف
ماش فتي البكونن راقدات في الحدائق واولادهم لافين بين الناس واخر قلة ادب
ما شفتي البكون ماشي الصلاه او الدكان لابس ليه سفنجه وعراقي وسروال وبدون فنله داخلية
وخاتي سفه دقار لوري
وتجي للفهم البفهم زيهم منو
والمشكله تتجنبهم بقولو شايف نفسو علينا
تقرب منهم الوجع زاتو بحتار في وجعك
اتخيلي البشاكل في اي شيء واي مكان يعني لو كان في واحد واقف في نفس مكانك وانتي
بتعايني ليه واعمل مشكله مع الهندي ولا الزلمي فضيحه عديل كده
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Dr. Abdalla Siddig)
|
الأخ بكري عاين لي هنا وأسمعني كويس عشان عايزة أقول ليك المنبر دة بعد الشفتو اليوم أحسن توديه
أسماء في حياتنا
يا عواطف اسماء في حياتنا دا يودلوا منو ويخلو منو .. الجزلي ذاتو قال تاني ماداير اي حاجة زيادة
الله يكون في عونا يا عواطف من دي البهدلة .. هو بلا سفنجة خضرا الشغلانة ما جايبة حقها ...
ود الباوقة
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: ود الباوقة)
|
ود الباوقة أم زهور !!!
معزتي ,,,
عليك الله تشيل المايكرفون بتاعك دة وتطلع تعمل محاضرات يومية عن الهندام واختيار الألوان والأتكيت
وفن الكلام والاستماع وبعدين أسماء في حياتنا بس ؟؟ دة حتة خور بكري إتملا وما عافين نعمل شنو بعد دة ,,, مودتي ,,
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: abas)
|
عباس يا سيد الناس !!!
صباحك فل ,,,
أحي من البرقدو في الحدايق العامة ديل عايزات ضرب بالبسطونة وقالو في سباقات الخيل في دبي وأبوظبي التي يرتادها الناس من كل بلد السودانيات جنس بشتنة وترامس شاي ولقيمات ورقاد حدايق
والرجال ساكين الحصان الفايز عشان يكسبو الخمسمية درهم طبعا تعودنا على الكسب السهل اللي ما
عايز مجهود دة كوم والنسوان الماعندهن شغلة ما عايزة أسميهن كوم بمشن السباقات عشان يسيئن
للباقيات بسلوكن غير الأخلاقي لدرجة إنه السباق أرتبط في الأذهان بكل السلوكيات غير الحميدة ملعون أبوكي بلد,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
امبارح يا عواطف جاى بالليل من الاماب فى نص الشارع واحده مكومه التقول ميته نزلت لقيتها سكرانه و حالتها بالبلاء مشيت اجيب بسطونتى من العربيه لاقيم عليها الحد وانتهى بى الامر انو اناولها الفيها النصيب وقالت لى الله يبته (يفتح) عليك يا مندكورو (يعنى ود العرب)و قامت اتنفضت و مشت
الله يكون فى عوننا و عونكم
مودتى
هيثم
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: mamkouna)
|
ممكونة الحنونة !!!
وين يا قمر اربعتاشر ؟؟ ليك مدة مال بنتي وين إنتي ,, والله وحشتينا جنس وحشة وبعدين أبرى واستبرى
بي وين مع جنس ديل ؟؟ والله أم شلوخ وجينز دي مش تودي الإنعاش دي تودي أحمد شرفي عديل كدة ,, تبري
يا بت أمي من الإنعاش ربنا يخليك لوليداتك ويزيل عننا البلا اللي نحنا فيه دة ,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Muna Khugali)
|
Quote: يعني دي النقصت؟
يجازي محنك ..... الواحد ما عارف يبكي والا يضحك؟
المرا قالت ليك جابو ليها (جلطة) .. عايزة تجيبي ليها شنو تاني |
مسكينه توفي ..
إنت غايته لو تسمع كلامي محمد أخـوي..تضحك بس لغايه مالدنيا كلها تضحك معاك..
طيب ايه رأيك في واحـد يطلع بالعراقي الخفيف والسروال والسفنجه يحوم في شـوارع لندن في الصيف كشو كشو..
الزول مافضل ليه مع طاقيته وسفته الا يشيل صحن الفول ويدخل اي محل.. وينط الصف ويقول للزول
الشغال.. أدينا فول وكب لينا فيه جبنه وزيت سمسم!
الزول متكيف ياخ من الشخصيات التي تبحث عن مؤلف..أضحك كده
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Muna Khugali)
|
الوريفه عواطف
والله في ناس يمحنوا في الغربه وفعلاً زي ماقلتي في ناس بستغلوا المثل البقول بلداً مابلدك أمشي فيها عريان إستغلال سيء جداً وأنا أطالب بإزالة المثل ده من قاموسنا نهائياً بل وتغييره لأنو مفروض يكون المثل بقول بلداً مابلدك أمشي فيها اخر جنصصه لأنو الواحد في الغربه بكون بمثل وطنه ولابد يمثله تمثيل مشرف ....
في ناس في السعوديه الواحد تلقي لابس قميص التقول ممرقوا من خشم غنمايه والله يهدي الجميع
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
الاخت الكريمة عواطف ، بصراحة شديدة انتى لسع ما شفتى حاجة ،من اسبوعين وعند العاشرة مساء وفى احد المجمعات التجارية بالدوحة ، شاهدت حيوانتان للاسف لا بسات رجالى فنايل نص كم مع حاجة كدة لاصقة، وللاسف مع بروز تضاريس بصورة مؤسفه ، ولاننى وزوجتى ممرننا بالقرب من نفس الممر فان رائحة السجائر ضاربة ، وتلفت بصورة غربية وعجيبة ، والله يا اختى الباقى اللهم استر على اعراضنا. اكرم الله السامعين والقارئين من الباقى . اما الثانية كنت من مدة فى مطارالخرطوم لامر طارى والله واحده جاية من ماليزيا وهى تنتعل سفنجة شوف عينى ، والشعر معمول بى حاجه كده زى الشبكة لى فوق اول مره اشوفو ، ولما جاء العفش بالصوت العالى قالت لزوجها شوف الراجل السجمان ده الباقى عرفناه ، كمان ما قادر تجر الشنطة ، وواصلت قولها الله يسحامك يا ابوى ، واخونا لم يفتح الله عليه بكلمة. احد العمال فى المطار قال الله ينعل الغربة التى تبهدل الرجال بشكل دا ، سمعته وقالت اصبر انت كمان خلنى لما اخلص العفش وافضى لك . ولاننى كنت احمل اشياء خفيفة خرجت وتركت الكل .
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: هجو الأقرع)
|
أخي العزيز هجو !!!
معزتي ,,,
بالنسبة للسجاير الفي الحفلة داير بقى عادي في المعادي وكذلك في الزمالك أما الملابس الضيقة دي
اسوة باللبنانيات و تقليدا للموضة تقليدا أعمى دون وعي بطبيعة أجسادنا ذات التضاريس العجيبة
و فيما يتعلق السفنجة والله العظيم شفت واحدة جاية تستقبل زول في مطار الخرطوم بسفنجة وعباية أيه رايك ؟؟
أما قصص نهير الرجال وذلتهم قدام الناس دي ما بعملوها غير بعض السودانيات عشان الواحدة توري إنها
مستلمة راجلها وخاتاهو تحت جزمتها زي ما بقولن ولا مؤاخذة من هذه الألفاظ السقوية فللضرورة أحكام
تصور الجنسيات التانية حتى لو الراجل خيخة عديل كدة تحترمو قدام الناس وترفع من قدرو لامن يصدق
نفسو شوف ديل وين ونحنا وين ؟؟ شكرا علىى عبورك .
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عواطف
انشاء الله تسلمي من الجلطة و البيجيبن الجلطة
و انشاء الله تسلمي من الجليطات و تجيهن هن الجلطة ....أريتن ما تنن
والله يا عواطف يومها في "ديرة سيتي سنتر" أشوف ليك تلاتة مش واحدة...تلاتة مرة واحدة و التقول داخلات
منافسة مفتوحة غير مشروطة في البشتنة و البهدلة....و اختاروا يوم الجمعة و دا أكتر يوم زحمة في
المول.
و هاك يا كلام بصوت عالي و عرفت أسباب و أسرار وجودهن في المول و الحاجة الوحيدة الغلبني أعرفها
هو فصيلة الدم حقتن ...لكن عرفت أنهن ما عندهن فصيلة دم ....لأنهن ما عندهن دم...
بعدين يا عواطف أنا عندي سؤال: ليه السودانيات عندهن رأي في أي شئ ..في البخصهن و الما بخصهن و
الاصرار الشديد (مصحوبا بصرة وش) على المواضيع الفارغة؟؟؟؟
و أسوأ جزء في كلامهن لما قالن (أها نآكل شنو؟؟) و تعالي شوفي التنظير الما يديك الدرب....
"ياختي جداد ...اللحمة دي ما عارفينها جايه من وين...لحم كلاب ولا لحم حصين...الجداد ياهو جداد"
"هسه الناس ديل ملمومين في الأكل الصيني دا في شنو؟؟؟ يا هناية دا مش جراد ولا صراير بالخضار؟؟ الله
يقرفهم" "أرح..أرح نآكل من اللبناني دا...جدادهم بلدي ما زي حق كنتاكي يجيب ضربة القلب"
و لو لاحظت يا عواطف السودانيات كلهن بيلبسن نفس الهدوم ...اسكريت طويل ..بلوزة أو قميص رجالي
بأكمام طويلة حسب المزاج...شبشب واطي زحاف...و أخيرا "الطرحة" الدخيلة علينا منذ بداية الانقاذ...
و ألوان متنافرة ...
و دايرة يا عواطف تموتي بالضحك ...لما مشوا يشترن "آيس كريم" لأنو حسب رآيهن "باسطة" اللبنانيين
ناااشفة و مسييييخة ولا كنافتهم البجبنة...بس كيفن يعني...هو حلو...يختو فيهو جبنة؟؟؟؟
علي بالأيمان أنا شفقت على الآيس كريم...لكن حبيت الآيس كريم لأنو بهدلن بهدلة شديدة و رد قليلا من
كرامتنا...
الله يسامحن
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Kamal Abdu)
|
كمال عبدو !!!
معزتي ,,,
إنت مهندس ولا مخرج يا ربي لكن ما الوصف عندك غايتو يوسف شاهين يخلي ليك الإخراج ,, نسوانك ديل قمة
في الإحراج وديل مش يجيبو الجلطة ديل يجيبو الجن الكلكي اللابس ملكي البخليك تقوم من محلك وتمشي
تقلع منهن الآيسكريم وتدهيهن بالألم زي ما بقولو المصريين ,, داهية تاخدهن ,, مول شنو البمشن ليه
ديل المفروض يمشن سوق الجمعة,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
عواطف أختي...
أنت متأكدة إنو الزولة بالوصف ده ما من طاقم برنامج الكاميرا الخفية عايزين نرفزوك شوية
يمكن!!! لأنو في البشتنة في النسوان شينة خلالالالاس.!!!
وبعدين يا عواطف أنت أظنك نقشت لبس الشراب!!
الولية زي ما قلتي الظاهر ماشة حفلة عرس.. ولا أربعين .. ومتحننة طازة.. وعشان الحنة ما تتطلع في
السفنجة.. دي زولة ناصحة...
بالله بقميص النوم؟؟؟.. عاد الولية ما دقست دقسة شديدة وحيرت البشتنة في عضمها...
بس أنا مصر أنو ده كان برنامج الكاميرا الخفية بس أنت خفت تسألي الولية ساكت...
تعرفي ده أنموذج من النساء.. غريب..
الحمد لله شوفنا نسوان الواحدة أول ما تصبح الصباح وبعد الأستحمام اليومي.. وتسريح الشعر
وربطه من وراء حتى تدخل المطبخ ..والله ما كذبت يومي.. يومي..
تحياتي
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Kamal Karrar)
|
ود كرار يانور النوار !!!
أولا تحية خاصة عشان خاطر مداخلتك الظريفة ,,,
ثانيا الزولة دي لا بتمثل لابتعرف التمثيل ولا سمعت بي حاجة إسمه الكاميرا الخفية دي من نوع واحدة كانت في بيت عرس والنسوان بحكن عن برامجهن اليومية في واحدة قالت بقوم من النوم الساعة ستة أول حاجة بعملها بقرا الجريدة نطت قالت ليها تقري الجريدة إنت راجل ؟؟ الجرايد ديل حقات الرجال مش
الحريم !!! وبعدين تعال هنا يا كيمو إنت ناقش حركات النسوان كلهاوبي صورة تدعو للعجب أريت كان لاقيتها إنت بدلا عني كان خففت لي شوية الجلطة الحاسة بيها على العوم فعلا بشتنة النسوان ما مبلوعة
أبدا لكن ما باليد حيلة ,,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: محمد أبوالعزائم أبوالريش)
|
عطووووووووووفه،،، يابت أمي
المدي البعيد ده نجيب ليه صبر من وين؟
وبعدين نقول لفرفور المشكله بتاعت البشتنه دي ما مشكله
المشكله أنو الطفل البيجي من ناس ذي ديل دي المشكله؟
جيناتوا بتكون خليط بهدله وبشتنه وفيها بعد نظر وطول وكمان عمي الوان!
والبيحلنا شنو أنا بقترح أنو يعملوا مصل مضاد لهكذا بشتنه يأخدوا الزول المنسق عشان
يستحمل شويه من غير ما تصيبوا عدوا البهدله والبشتنه دي والله يدينا الصبر،،،
بعود ليكي بعد فاصل من البشتنه العندنا هنا وجااااااااااي.
أبوقـ مجدي عبدالرحيم ـصى
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
الأاستاذة المرآه عواطف
اللهم لا شماتة ... بعد ما أديتي (بعض الرجال) حقهم ، كمان برضو أديتي (بعض النساء) حقهن من لفت النظر المفيد ... ليتنا نلتفت لمظهرنا .. فشكرا لك.
| Quote: ولما تلفت نظر الواحدة تقول ليك يا اختي بلدا ما بلدك أمشي فيه عريان! |
ليت الكل يعلم أنه علم لبلاده متحرك ...
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: Kamal Mahjoob)
|
تبري يا يُمَّة إنتي من الجلطة
.. الجلطة أريتا فوقا هي بتاعة
الكاشير والشعر الكعكات .. أم رِويس
مقطوعة الطاري .. أريتني كان
لمّيتْ فيها كان أنقي ليك شعيرا...
....
أخت / عواطف :
دُمتِ لنا نبراساً
يضيءُ لنا الطريق َ
وحالكاتِ الليالي ..
وصواباً لمن فارقَ
الطريقََ يوماً ..
لكَ وُدِّي واحترامي
وكوني دائماً
كذلك يا أصيلة ...
ولا عدمناكِ قلماً ....
أخوك / محمَّدزين ...
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: othman mohmmadien)
|
سلامات يا عواطف إخيتى
أهاااااااااااا،، بديتى تتدخلي فى "لبس" الحريمات فى الخليج؟؟؟ عاد الله يرحمك كان كدة... الفاتحة يا شباب !!!
و الله لكن ضحت ضحك من المنظر الخلعك و قطع قلبك دة !! هههههههههههههههههههههاييي..
كمان لسانك طويل و خوافة؟؟؟
كان تقولي ليها: يا زهرة مالك ؟؟ جابو ليك خبر؟؟؟و لا طلقوكى يختى ؟؟ إن شاء الله خير !!
و نحن الواحدة مما طلعت برة بلدها زمان بنقول إنو إي واحدة و واحد "سفير" لبلدو،، بس الظاهر فى ناس يختي "مقطوعة" من شجرة ...لا بلد و لا بطيخ
ضحكنى كلام هاشم شديد وو صفه لبعض النسوان فى السعودية ..
Quote: وتلاقي الواحدة شايلة
ولدها في صفحتها والتراع مالي ليها العباية والأوساخ في كل إتجاه |
كرهتنا الولاده زاتها ياخى ... ههههه،،غايتو كان سمعوك رجال الحريم ديل كانوا حرموا عليهن العباية و "الكسحى" في الشوارع...
بالله يا عواطف إكتبى و قولى رأيك عن كل البيحصل في الدول النحن فيها عما لا يسر عدو و لا صديق ،، و كلنا يدنا فى يدك لدحر هذه النوعيات من النساء الغير غيورات على سمعة "هويتنا" السمحة....
الله معاكى يا غالية
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: نوسة)
|
نوووووسة الننوووووسة !!!
تحياتي ,,,
والله المسألة يا بعد عمري ليست خوف ولكن احترام للذات يعني لو واحدة زي دي قامت شرشحت قدام الناس
أكيد بتتمنى الأرض تنشق وتبلعك مش كدة ؟؟ وبعدي زي ديل شكلهن ما بفهمن وما عندهن استعداد للفهم
وبتشوف نفسها صاح ونحنا الغلط و لا شنو رايك ؟؟ إنت يا نوسة دحين ما شفتي البلبسن تياب معولقة ومبشتنة في المطار وأول ما الطيارة تقرب لمطار الخرطوم تقوم تطلع التوب السمح والدهب والمكياج
وهاك يا تسريح لزوم شوفوني يا ناس السودان ,,
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: othman mohmmadien)
|
أخي العزيز عثمان !!!
معزتي ,,,
شكرا لعبورك المميز ودعني أختلف معك في بعض الأمور وأتفق معك في البعض الآخر ,, أولا حكاية دور الإعلام
هو فعلا جهاز في غرفة الإنعاش وفي حالة موت سريري والضرب على الميت حرام ولا يرجى منه فهل يا ترى
نجلس في بيوتنا وننتظر دور الإعلام ليعلمنا كيف نلبس وكيف نتصرف ؟؟ أم نستفيد من غيرنا ونترك العنجهية و حكاية نحنا السودانيين ونجنا السودانيين أما حكاية العنوان الصارخ أو الحاد واللي ما مفروض يجيب الجلطة دي فالحكاية فعل ورد فعل فما يدهشني ليس بالضرورة أن يدهش غيري فقد ترى أنت
مسألة السفنجة عادية أما أنا فأرى عكس ذلك خصوصا في بلد غريب يفترض أن أمثل فيه بلدي بصورة مشرفة
ثانيا حكاية النساء اللواتي يلبسن التوب السوداني فلا أعتقد أن هناك وجه شبه كبير بين السوداني
والموريتاني لدرجة تجعلني لا أعرف السودانية من الموريتانية إلا إذاكنت هندية مثلا عشان الهنود لا يفرقون بين السوداني والصومالي والموريتاني أما مسألة قبول الآخر لا أعرف من هو الآخر الذي تتحدث
عنه هل الشخص المبشتن أم الآخر الأجنبي ؟ فإذا كنت تقصد المبشتن فهذا يعني أن نسقط رسالتنا في الحياة ونقبل الجميع بعلاتهم ,, شكرا عثمان عبورك يفرحني
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: ismeil abbas)
|
ود عباس !!!
معزتي ,,
شكرا على مرورك الجميل ,, بتصدق في ناس كتار يتصلو ويقولو ليك معقول الكلام دة بيحصل في أبوظبي ؟
لو قلتي جدة معليش وكأن أبوظبي معصومة من الخطأ طبعا لا أعني المدينة ولكن الناس عشان كدة أود أن
أقول الناس أجناس وعاصمة كبيرة مثل أبوظبي أكيد بتكون لامة بس المهم كيف نعالج أخطاء من يمثلونا
سواء كانو في أبوظبي أو باريس ,, شكرا
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
Quote:
وكلو واحد من الليلة يشوف واحد ولا واحدة مبشتنة طوالي يمشي عليها ويكلمها وزي
ما قال الفنان اللي بدو يصير يصير ولا شنو رايكم ؟؟
==================
حنتشـــرشــــححححح يا عواطــف صدقيني !!!!
انسـي حكاية تمشي تقولي لزول ولا زولة النصيحة دي لأنه النوعية دي أسأليني منها
أنـا انتي قايلة هم لبســوا كــده من شــوية .
تحيــاتي ،،،،
نصيحتي تنزلي السوبر ماركت ده وانت لابسـة زي الننجـا عشان ترتاحي من الهم ده .
صـــلاح واســبه
| |
|
|
|
|
|
|
|
|
|
Re: يا ناس ألحقوني في واحدة جابت لي الجلطة !!! (Re: عواطف ادريس اسماعيل)
|
العزيزة أم مجاهد
التحيات الطيبات
يا خي الزولة برضو ما قصرت
كونها تلبس شرابات دا والله إجتهاد كبير منها
لأنو شكلها كدا من النوع أبو ( سكاكات ... سكاكات دي حلوة مش ...ضحكتني شديد والله) وعراقيب وعصبات تقطع الـ....
في دي تستحق الإشادة
يعني لو جاتك بدون شراب كان يجيك ما هو أفظع من الجلطة
الحمد ربنا لطف
رعاك الله من شر السكاكات وأصحابها
مودتي
| |
|
|
|
|
|
|
|
|
 Re: يا ناس ألحقوني في واحدة جابت لي الجلطة !!! (Re: مجاهد عبد الرحمن)
|
إبني الحبيب مجاهد !!!
ليك مدة ما بنت وين إنت ؟؟
ولكل مجتهد نصيب يا مجاهد إنت عارف السودانيات عندهن الإجتهاد الشديد البجيب نتايج عكسية في أغلب
الأحوال ,, وكمان جابت ليها سكاكات والله يا مجاهد بالغت عديل كدة يعني بشتنة وسكاكات دي مش تجيب
الجلطة دي تودي غرفة الإنعاش حقت ممكونة ,,
| |
|
|
|
|
|
|
| |
عواطف ادريس اسماعيل
saif massad ali
ماجدة عوض خوجلى
Nader Abu Kadouk
هاشم أحمد خلف الله
د.محمد حسن
معتصم عبدالرحيم
abubakr
Muna Khugali
محمد أبوالعزائم أبوالريش
مجدي عبدالرحيم فضل
abas
نهال الطيب
mamkouna
رقم صفر
محمد فرح
هجو الأقرع
عامر تيتاوى
Deng
حمور زيادة
محمد المختار الزيادى
Kamal Karrar
محمَّد زين الشفيع أحمد
othman mohmmadien
نوسة
ismeil abbas
Salah Waspa
رأفت ميلاد
خالد العبيد
مجاهد عبد الرحمن
salma subhi
فيس بوك
تويتر
انستقرام
يوتيوب
بنتيريست