|
|
 ركن المضطهدين بوردياً
|
كل ما أحاول الكتابة في البورد اجد نفسي في هيبة منه
زمان كنت اكتب وين ما كان كيف ما كان ولا أفكر أحياناً فيما اكتب
اكتب ساي كده
الآن ومنذ وضعي مع (الرعيل الأول)، وأنا في حالة من تقمص الجدية والركزان، فلا يجوز وأنا في هذه المرحلة النقية من الرعولة الأولى أن أكتب كلام الطير في الباقير الذي عهدت على كتابته زمان
ختيتونا في حتة ضيقة والدنيا براها حر
وعليه
وبما اني تجاوزت – كما يبدو- مرحلة الحنكشة والبت اللذيذة البتكسر الناس، فعليه، أنا افتح هذا البوست للرعيل الأول المضطهد والرعيل الجديد المضطهد برضو ، لأنه فعلاً البورد يعطي احساس الاضطهاد
وآآآآآآآآآآدي صنقرة
|
|
 
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قضيم
ووووووووووووووووووووووووووووب علي
يا حليلك يا بت أمي ... و ياحليل أيامك
اها أخبارك شنو؟ انشاء الله مبسوطه
وحاة الخوة المابيني و بينك ... الشوق مطر
و الله لا جفا لا حفا ..... لكن انا طبعا انقطعت فتره من البورد ... وجيت اسي كاتلني الحنين زيك كده
لقيت الناس الزمان اتشتتوا .... لكن الناس الجداد برضو حلوين
المهم يابت قضيم انا زاتي اتوهطت معاك من الليله و الزارعنا غير الله اليجي يقلعنا
على جمب
"""""""""""""""""""""
بت قضيم ... شنو الرعيل الاول و الحركات بتاعتك دي؟
نحن لسه شباب زي الورد ... و طقم السنون المركبنه ده مافي زول فارزه ....
لوووووووووووووووووووووووول
| |
|
|
|
|
|
|
|
|
|
Re: ركن المضطهدين بوردياً (Re: BitAlhana)
|
اليوم
أعلنت أنه إجازة
أعطيت نفسي إجازة سودانية، فلأني قدمت من السودان قريب، ولأني في الأيام الأخيرة في السودان كنت أفكر ماذا اشتري لزملاء وزميلات يقيمون في بلد كل حاجة فيها
الغالي والرخيص
أسواق اسواق اسواق
حتى تمنيت لو أنني كنت مقيمة في أم الضبان الخاصة بهم، أم الذباب بالسعودي يعني، وطبعاً قطعت الأسم من راسي، لكنهم طبعاً أكيد عندهم بت الضبات أو أمها أو بت عمها المهم قريبتها، وأكيد هي قرية بعييييييدة مضطهدة ولا تملك كل هذه الأسواق الموجودة في مدينة جدة، وهااااكم قد عرفتم معلومة جديدة عني وكأن أحد يهتم، نعم أنا مقيمة في مدينة جدة
فكرت كثيراً وجاني الصداع، فإحدى زميلاتي قدمت لي مرة جهازاً تكنلوجيا ًجميلاً أحضرته معها من ماليزيا في إجازة صيفية كانت تعاني فيها من قلة مورد مالي فقررت مع (العايلة) أن تقضيها في ماليزيا حيث ماليزيا حسب ما جاء في أقوالها (مررررررررررررة رخيصة، وأهي أحسن من مافيش)
وقدموا لي مرة عطر فرنسي راقي قادم جديد لنج من كازبلانكا،
حتى المصرية بت الذينا بهرتني بجلابية نانسي عجرم مصرية
وهكذا
عندي بعض دناوة اعترف، قبلت بالهدايا وقلت (يحلها الحل بلة الما عارفاه اتحل من شنو بالضبط)
ويوماً ستمر الضائقة المالية حسب ما استبشر الشاعر المتفائل وقال (بكرة يا جيبي الحزين تلقى السعادة)واسافر في إجازتي الصيفية لأم صفق في دولتي الفاضلة السودان، وأجيب ليهم هدايا بالكووووووم والرااااادوم
مششششششششششششششج (دي مصمصة قونقليز كان تعرفوها يا الرعيل المضطهد)
أحسن مني هم؟؟؟!!!
مشششششششششششششششج
كلكم يا ناس السعودية تعرفون بالتأكيد ماذا يعني قضاء إجازة في السودان
" قضاء وقدر"
وجلست في هم ونكد اتساءل، يعني لو فرضنا أن عندي قروش أشتري بيها، ماذا سأشتري؟؟ قضيم وقونقليز وكركدي وكزبرة وحنة؟؟؟!!!!
وتساقطت أنهار دموعي زرافاً زرافاااااااا
وزاد النحيب لما تذكرت أن جارتي السقيلة الحامل تتوحم في فسيخ وكنت أنا فارسها الذي من المفترض يجيب ليها الفسيخ عسى ما يشوف جنينها شر ويطلع وشهسمكة بيرانا وسنونه سمكة قرش
فسيخ!!!؟؟؟
أمممممم؟؟؟؟
فقلت بحردي عوير واضح (وحاة الله ما اشيل العواليق دي) واستغفر الله من نعمة قد يحرمها الله علينا...
ما اطول عليكم يا الرعيل المضطهد
في الآخر ، ولأني أساساً ما عندي قروش، قررت أن آخذ هدية (إجازة)
وما تستغربوا
حاوضح تحت في مشاركة أخرى ، أزيد بها عدد الردود بحصافة ، ذي بعض رعيل يجيد زيادة عدد الردود، فعبد الحميد مثلاً، يكتب بوست، عدد ردوده يتجاوز المائة ويفيض، فتدخل لتكتشف أن كل البوستات ، الأصل والتقليد، أقصد البوست والرد كلها لعبد الحميد، حتى الكحة سبحان الله كحة عبد الحميد
عبد الحميد أخير مني؟؟؟!!!
مششششششششششششششج
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
أييييييييييييييييييييييييييييييييييييييييييييييييييي (ماسكه راسك وبعزيك)\
مصابنا واحد يا بت قضيم، الكتابه غالباني تب.. اجي اقرااااا، لما اتنفخ.. واجدع لي تعليق تعليقين.. وامشي ... \
تهميش شديد
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
ناس السودان مضهبين
الضهب الجميييييييييل
تخيلوا أنني احتجب لبعض معاملات ورقية حكومية في السودان، فبدأتها يوم الأربعاء، ولاستلامها يوم الخميس، اكتشفت أن الدوام قصير، يوم الخميس نص دوام، والدوام أساساً ينتهي الساعة 2 ظهراً، يعني نص دوام ينتهي الساعة عشرة صباحاً، يعني داب ما تشرب كباية الشاي وتتنيها بفنجان القهوة ثم تستحم في ساعة لأن الماء (سرسارة) هذا إن وجد أصلاً
ثم تسخن كفتريا شاي ليس لتشرب الشاي مرة ثانية مع أنه ما بطال، بل لتستخدم الكفتريا هذه المرة لتكوي ملابسك، ولا يسألني أحدكم كيف أن كفتيرة الشاي بديل المكوة
ثم وأن تجد أمجاد بترخيص ملاكي حتى تستطيع أن تقطع كبري
و لمن لا يعلمون، فسيارة الأمجاد نوعين، واحدة تحمل لوحة أرقام بيضاء مرخص لها أن تقطع الكبري، والأخرى بلوحة أرقام خضراء غير مسموح لها سوى بالتجول داخل الأحياء
ولما سألت أحد سواقين الامجاد لماذا رد قائلاً (حسبي الله ونعم الوكيل، الوالي استورد مجموعة جديدة ولتوزيعها أعطاها اللوحة البيضاء ووضع هذا القانون، الله يفقره)
هذا ما جاء على لسان سواق الأمجاد يا جماعة وأمتي يا أمة الأمجاد والماضي العريق
ماليش دعوة
المهم لما تصل الجهة الحكومية، تجد أن الدوام خلص، نص دوام وخميس وبشكة وحركات
الجمعة إجازة
السبت إجازة
يوم الأحد تستأنف المسيرة مع كفتريا جديدة وأمجاد جديدة
يااااااااااااه
فكرة والله أن احضر لزملائي (إجازة) هدية، وهي شئ مميز، جميل ومريح، وأتحدى أن يجدوا منه حتى لو صناعة صينية
وبما أن فاقد الشئ لا يعطيه، فأنا اعطيت بالمرة لنفسي اليوم إجازة
أنا في إجازة يا ناس
وبجي
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
مافي إضطهاد بالمعنى القصدتو
كلما في الأمر في ناس بيقروا لبعض
وما بيقروا للناس التانيين
بس برضك في الناس البيقروليك
المهم تكتب
وخلي الباقي عليهم
قرولك أهلاً وسهلاً
ما قرولك في البيقرولك ..
| |
|
|
|
|
|
|
|
|
|
Re: ركن المضطهدين بوردياً (Re: معتصم مكاوي)
|
سلامات يا حيدر
يعني بدل أن تنفي الموضوع وتطمني تقول لي إنقراض؟؟
ما عندك نظرية؟؟!!!
لوووووووووووول
وقالوا لووووووووووووول دي زاتها بقت قديمة وبتاعت رعيل ساكت
وعن الأمثلة فالأمثلة كثيرة جداً ولا حرج
مالك داير تدخلنا في مكانات ضيقة
ويسلم تضامنك وكتر خيرك
---------------------------------
حيدر الزين
خليك قاعد يا رعيل (على وزن يا زميل)
النشوف نهايتها
يخليك
-------------------
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
شوفي يابت قضيم...
الخطة كالآتي...
اكتبي كلامك السمح ده بالقطارة.. يعني تكوني مقسماه كم حتة كدة
كل ما البوست تلاثة ارباع الصفحة تحت (Dead Area) تقومي تزلي جزء.
وخليكي لايوقة في رفع البوست
لو لقيتي نفسك بعد كتابتك دي براك اعملي مسنجرات داخلية اطلبي من البتعرفيهم يرفعوا ليك البوست...عادي جدا وقاعد يحصل وما تخجلي منها
والحل الاخير...التكتلات...اعملي شله وابقوا نابلين
وبلاها طيبة وتلقائية زمان...فالبورد كيمان كيمان
وما تحرمي الناس من طلتك وكلامك الجميل
| |
|
|
|
|
|
|
|
|
|
Re: ركن المضطهدين بوردياً (Re: GamarBoBa)
|
بت الهنا
الخوة كيف الما بينا
يخسي عليك؟؟
أسألي الكي بورد الرامي فوق كمبيوترنا ياخ (على وزن العنبة الرامية فوق بيتنا)
وبعدين الجاب سيرة الهوا منو؟؟
وطقم شنو وبتاع شنو؟؟
وحاة الله انا كمان أصغر من الأول أها رأيك شنو؟
اسمعي
والله لي ساعة بقرا في الأرشيف
ضحكت وبكيت واتنهدت وانبسطت وآآآآآآآخر تمام
عليك به
وسلمتي
---------
مريم ازيك
ما يجوك في شينة إن شاء الله
خلاص با زولة
نكتب تاني مع بعض ونرد على بعض ونتكتل (من التكتلات ما من قتل)
ويخليك يا مريم
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
الرعيل القديم ... ومضطهدين !!
مكنكشين في البورد ..
هههههههههههههههههههههههههه
كدي واصلي في اجازتك الاكلها امجادات دي...
اكيد اجازه ضاربه ..
علي كل حال متابع .
| |
|
|
|
|
|
|
|
|
 Re: ركن المضطهدين بوردياً (Re: عبدالله كع)
|
بت قضيم إزيك وما عاش البضطهدك يختي
عليك الله تمي إجازتك القالعاها دي وتعالي أعملي لينا بوست
التحلية والحلويات الإقترحتي سابقآ داك ..
وشوفي محبي/محبات البسبوسة وبلح الشام وو ... إلخ
كان ما جوا إتلمو فيك زي النحل هنا
وستجدينا في الخدمة جاهزين لأي كوبي آند بيست .. لوول
تحياتي
وشكرآ على البسمة التي وضعتيها على وجهي (المتعب)
| |
|
|
|
|
|
|
|
|
|
Re: ركن المضطهدين بوردياً (Re: Hadeer Alzain)
|
آآآآالمر
مضطهد وليس متضهد،
تحنكش ده واللا أنت من دول الشمال الأوروبي
مشششششششششج
أمبارح المذيعة في تلفزيون هارموني كانت بتكسر الكلام ولا فندق حاجة بهية
(وأنت تلوقتي – دلوقتي- يا ياسمين، حايزين نعرف كيم –قيم – الجمال عندك كيف تتتتتحسبببببيها)
الصراحة أنا زاتي اتكسرت قربت أصل رجل الكرسي القاعده عليه
ولولا ستر الله الذي أنزل عليها أن تقول فجأة في نص الكلام (يعني مثلاً –دق الشلوفة)، لولا لطف الله كان أنا لسه لللآن مكسرة تحت الكرسي، صدق!!
بالله كلمة (شلوفة) دي جاي معاها حنكشة وتنعم؟؟!!
وأنا طبعاً زينة وعاجباني بس الموضوع اني بكف العين ما يفوتك
وعلى فكرة
ونحن كمان ، لنا الله وفرش السوق، بس نحن ناس سوق عفراء ما سوق ليبيا
وسلمت للمشاركة
--------------
أيوه يا معتصم
أكيد ما الناس كلها حتقرا أي حاجة
ويمكن فعلاً الاول كان العدد المشارك بسيط وبالتالي كلنا بنعرف بعض وكلنا بنقرأ لبعض
لكن فعلاً برضو، في ظاهرة أن في كلام كتير وحلو وجميل لا حد بيقراه ولا حد بيعبره ولا يرد عليه
البوستات الناجحة بوستات الجكس، بوستات الجنس، بوستات المشاكل ، وهذه الشاكلة
وده في رأي مشكلة
والمشكلة الأكبر المجاملات المجاملات، بالجد بالجد في نوع من المجاملات يجيب الصمرقع
ولو عايز أمثلة بجيب ليك ما في مشكلة لا الموضوع فيه خجل لا فيه مساس
ما في بوستات ثقافية ناجحة على الأقل اللي قريتها أنا
بعدين طبعاً كل واحد حر في اختيارته واهتماماته، بس أن تدخل بورد نتي يعني عالمي بمعنى أو آخر، لتجد الصفحة الأولى كلها ناس ماتوا وناس نجوا من حوادث وناس نجحوا وجيتني وعزيتك وجاملتني ورديتك ، أنا في نظري –وأأكد أن نظري ضعيف – أنه مش مجاله ولا مكانه
وأيضاً فكرة عدم احترام وجهات النظر المختلفة برضو مشكلة اجتماعية كبيرة، المفروض أن بورد مثل هذا البورد ناجح نوعاً ما، يعالج مثل هذه القضايا المجتمعية، مش يعكسها ويزيدها ويصر عليها
معظم إن لم يكن الكل هنا يعتبر متعلم ومثقف، يعني هذا المكان واجهة ثقافية سودانية، لو أن مثقفينا بهذا الإصرار من الحدة والعدائية والتشبث الأحمق بالرأي، فعلى السودان السلام
ومع ذلك أقدم احتراماتي لكافة وجهات النظر المختلفة
ويخليك ويطرح البركة فيك عافية عنك وراضية عليك يا ود أمي
------------------------
وشكراً يا شمس الدين
تاعب نفسك وضاغط الرابط وشايل نفسك وتكتب سطر واحد!! سطر واحد يا شمس!!!
هييي هييي انا بهزر
إن شاء الله ما نجيكم في اضطهاد يا رب
سلمتون
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
يا استاذ محمد السني دفع الله
أنا طالباك رد للآن ما وصل
متذكر موضوع التلفزيون؟؟
قلت بجي ومن ديك وعيييك
مش ده اضطهاد بالله؟؟؟
مش أضطهاد من بكري يأرشف البورد وكلامي في حلقي ما نزل؟؟
اقول ليك حاجة على فكرة، زمااان ود خالتي عزمنا على مسرحية لفرقة الأصدقاء في مسرح في أمدرمان أظن ولا أذكر أسمها، وقد كنت صغيرة وعويرة كما أنا الآن كبيرة وعويرة برضو
وبعدين الدنيا كانت عيد، وكل من ذهب للمسرح قال أن المسرح زحمة شديدة، والعميان شايل المكسح، ولا ننصح أبداً بالذهاب في موعد المسرحية بدون تذاكر
فكنا أن قررنا خلاص نخليها بعد العيد، فتشدق (تشدق دي حركة بالخشم واللا تدي الانطباع ده ساي؟؟) المهم افتى ود خالتي وقال (لا لا لا لا لا لا لا لا، السني ده، وقد كنت البطل أو الكابتن بتاع فرقة الأصدقاء مديرهم حاجة كده، المهم قال السني ده، أنا وهو، كده – مشيراً بالسبابة والجنبها ما عارفة اسمها – صاحبي شديد وأكيييييييييد حيدخلنا ما تشيلوا هم)
وديك يا القشرة
وما بعرف دخلنا ليك بي وين مش بالباب الرئيسي اللي كان فعلاً أمة لا اله إلا الله واقفة فيه، وأذكر شكل دور تاني واللا حاجة كده، وجيت أنت في الدور الثاني ونظرت لنا من عل، واتنفخ ود خالتي وقال لأ وبثقة (السني، دخلنا بالله انحنا جينا)
رديت عليه انت (طيب طيب) ومن ديك وبرضو عيييييييك ، شفتك تاني في فيلم لعادل إمام (في أروبا والدول المتقدمة)
بعد داك عرفنا أن ود خالتي مسلبط فيك ساي لا بعرفك لا ليه علاقة بيك، بس أكيدة أنا لو كنت شفتني وقتها والقشرة بالفستان أبو ربطة عشرة بلدي ونكشة الشعر (ذي شكل ربطة الجرجير كده)، أكيد كنت حتعتزل التمثيل وتموت في محراب جمالي    
وخلينا بالله .. ردي وين؟؟؟!!!
-----------
وااااااشري يا القمر بوبا
حلولك صعبة
حمانا الله شر التقطير، بوردياً كان أو بلحياً
أعمل لي شلة صعب، مسيخة وسجمانة ولديحة وقطيمة ومرات مرات شينة
أقول لي زول ارفع لي البوست، ده ما زاتو التأكيد على كبر الحال والخرف، ذكرتني النسوان الكبار في الباصات، (يا ولد، يا ولد، شيل الهناي ده ختو لي في الهناي داك وأديني إيدك النركب السجم الباص ده) والولد يكون عمرو فوق الخمسين سنة
لا لا لا لا
ما داخل علي الحلول دي، شوف لينا حل من أمثال (أديتو نظرة حياني حيتو، شفت الحنين حتى النوم أبيته) وده زاتو حل صعب، زاتو نتحنكش ونجكس في البورد ده قطعوهو لينا في راسنا جنس صور عزاز شامي ومديحة كامل ديلييك
وبعد ده كلو تقول لي ما تحرمي الناس من طلتك وهناي
باااالغت يالقمر
-----------
يا عبد الله يا كع
معليش يعني لكن اسمك ده واللا لقبك ده جعلي شديد وإذ هنا اتهمك بالعنصرية وأقوم افك فيك ناس حقوق الإنسان ومناضلي الكي البورد أجيب ليك الهوا
وقبل
الإجازة من ناحية ضاربة فهي ضاربة ومشوهة كمان
وناس الإغتراب بالجد ياكلوا هوا لأن ناس السودان أحسن منا حالاً وأكثر فرحاً وبشكة وحياة
مليانين حياة
مليانين،، مليانيين،، ما عارفة اقول شنو بالضبط
مليانيين شحم، نعم، اكزاتلي، شحمانين وناعميييييين ما شاء الله
واني وووواي يا عبد الله (ضربت معاي انجليزي) شكراً للمتابعة، وطالبني رد إن شاء الله، خلينا نشتغل ذي نسوان البكيات، طلبتني وطلبتك
يخليك
--------
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
يا هدير الزين
لا اتعب الله لك وجهاً، وسلمتي انتي وسلمت ضحكاتك وأضحكي تصحى الكهارب في الشوارع (أم الكذب يا أبو عركي)
ما لو كتبنا بوست حلويات نزيد التأكيد على اني مدوعلة، وأنا داخلة اليومين ديل في دور الناس القيافة الحبينا عشانهم اللطافة
عاملة ريييييجييييم
بس ممكن افيدكم بالجد في بوست حلويات وأكلات مبتكرة عملية،
وأقصد بعملية أنها ممكن تتعمل فعلاً سريعة وسهلة ما فيها لخ وما فيها مكونات عجيبة ما معروفة وبعدين ما بتبوظ في فرن واللا بوتوجاز
حاااااااضرين ولا يهمك ولاااا
سلمتي يا هدير
اسمك حلو يا هدير
هدير الزين
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قضيم
اقول ليك كلام انا قريت البوست دا
وعايزة اشوف حلك في هدايا لناس قاعدين في بلد فيها كل شي
لانو دي ازمتي السنوية
كدي وريني حلتيها كيف
او حتحليها كيف في نهاية الاجازة
وبجيك تاني اشوفك عملتي شنو
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
بت قضيم
سلام
مش هم بيضطهدونا
نحنا طوالي نقوم نشكل التحالف الراسخ
بين الطلاب الرعيل الاول والطلاب الرعيل الاخير
ونقوم نضطهدم نحنا
مش فكرة ....؟
خالص الود
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
شبكة الجميلة
غايتو شوفي
الكزبرة والشطة والحنة والكركدي بالجد مطلوبين
ورغم أنها حاجة بسيطة إلا أنك ممكن تتحايلي على الأمر بطريقة التغليف والاواني المستخدمة نفسها لوضعها فيها
الناس الما عندها مشاكل الحلال والحرام امليهم أبنوس ومنحوتات خشبية، ما تخلي أبنوسة في البلد إلا وشيليها
مقدرة الحاجات دي وبحبوها
الأجانب منهم بحبوا عوارات الطبق والسعف والجبنات وكوانين الصفيح النموذج والحاجات دي، أيوه وسوط العنج ومعليش اني اقول عوارات نسبة لقيمتها المادية عندنا
تجنبي المشغولات الجلدية
ريحتها عجيبة واستخدامها نفسه مزعج، غايتو أنا ماوقع لي أبداً أشيل لي شنطة جلد تمساح مثلاً
وعلى فكرة
عندي صديقات مصريات بموتوا في دهن الكركار تصدقي؟
يستخدموه ذي كريمات حمام الزيت وبقولوا ما في زيه في تنعيم الشعر
برضو خيار
الدلكة والبخور
بموتوا فيهم وخصوصاً الهنود
يعني والله حاجاتنا ما بطالة ومميزة وما تلقيها إلا في الكرنتينة (بالنسبة لينا ناس جدة)، وهم طبعاً ما بمشوا الأماكن المخيفة دي
وسلمتي للطلة يا شبكة يا قول شيري
وأها
حتجيبي لي شنو؟؟!! :D
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بما انك مننا وفينا
لو جبت ليك طقم شاي
بيكون تمام ولي علبة بخور سوداني بتطيرك السما من الفرحة
والعجب لو لاقاني توب وعجبني واتخيلتو فيك وجبتو
ياسلام على الشي الحيحصل ليك من الفرحة
اما الريحة الباريسية اعتقد انها هدية عادية يعني ما بتفرق معاك كتير
اها لقيتي الهدايا دي كيف
نافعة ولي افكر من الاول
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
قالوا الشايقية يا شبكة جابوا ليها هدية من السعودية مصحف وسبحة
اتغاظت شديد وقالت (والله كتاب الله ما ما بينه إلا البيكم اتعرفت)
توب عديل كده
العجب لو كان واحد من تياب المذيعة عفاف ديك تبقي ما قصرتي تب
وتنفع تنفع كتير انا لاقية؟
وتسلمي يا شبكة
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
Quote: عندي صديقات مصريات بموتوا في دهن الكركار تصدقي؟
يستخدموه ذي كريمات حمام الزيت وبقولوا ما في زيه في تنعيم الشعر |
ختيتيو في المصريات ?
ما مشكله اصلنا الايام دي بنردم فوقهم..
بوست بذكرنا بى (بت قضيم)الاصلية بس ان شاء الله ما تكون بشناته ?
ولو برضك لذيذه.
| |
|
|
|
|
|
|
|
|
 Re: ركن المضطهدين بوردياً (Re: بت قضيم)
|
الأخت العزيزة بت قضيم
هذا المنبر عبارة عن شلليات ..الذي غير منحاز لشلة مهما يكتب لا يأبه به أحد .. ده كله كوم .. لكن ما يغيظني أن بعضهم لا يملك أدني مستويات المجاملة ... مثلا تشارك في أحد موضوعاته بتعليق ولكن لا يكلف نفسه بكلمة شكر ولو مقتضبة... الله يكون في العون.
تحياتي وفائق احترامي
| |
|
|
|
|
|
|
|
|
|
Re: ركن المضطهدين بوردياً (Re: Gaafar Ismail)
|
ألأخت/بت قضيم..
السلام عليكم..
وياحليل ..كد الدوم..ومص اللآلوب ..واكل القضيم...
بوست جميل ولذيذ ودمو خفيف..
مثلك لايضطهد...تضامنى معك..فى زمن العولمة الصعب ده..من منا كان يحلم بمثل ما حصل من تقنيات وتكنلوجيا فى هذا اليوم..
لك الود على هذا الجمال..................إسماعيل محمد احمد عباس...
| |
|
|
|
|
|
|
|
|
 Re: ركن المضطهدين بوردياً (Re: ismeil abbas)
|
يا بت قضيم
ياخي إنتي عسل
بنقط (نوقوط)
نقط (نوقوط)
نقط (نوقوط)
في المنبر دا!
بالله أعملي bold لكتابتك السمحة دي
عشان المعمشين من الرعيل الأول والتاني يقرو كتابتك
وردودك السمحة دي بمزاج وبدون تعب ونقنقة ..
خلاص أفتحي بوست التحلية والحلويات هسسسسا دا
وشبكة بعدو تفتح بوست التياب الما خمج
وأنا عندي بوست عطور كارررب .. حا افتحو بعدكن إنتي وشبكة
يا كمان فتحنا بوست مشترك واحد .. بتاع نسوان متبوبرات .. لوووول
شكرآ على العفوية
وعلى لطفك وظرافتك الشديدة ياأ خت العرب ..
الوش البدور داك بلصقو كيف هنا؟
| |
|
|
|
|
|
|
|
|
|
Re: ركن المضطهدين بوردياً (Re: Hadeer Alzain)
|
سلام تهميش (تعظيم) سلام يا بت قضيم
الحالة مشخصة من بدري والعلاج معروف
طبعاً مسألة الرعيل الأول بيعجل في مسألة (الرحيل) يعني على حس الرعيل الأول والتهميش الواحد يرحل وممكن يدخل (الغابة) ولا سيما لمن نشوف أنو بوستاتك في حدود الـ 1600 خلال 7 سنوات
وبوستاتي 1800 في الـ 7 سنوات ، لازم نكون من المهمشمين
النجومية واللمعان مابيظهر إلا بالأنضمام لنادي الفطاحلة والعباقرة والمختصين في شؤون الحياة
والخوف نعمل ركن ونلقى برضو ناس لسه مركونين في الركن بتاعهم .
أهم شئ النية الطيبة والله يصلح الحال
| |
|
|
|
|
|
|
|
|
|
Re: ركن المضطهدين بوردياً (Re: ولياب)
|
يعني في داعي يا بت قضيم؟
في داعي ترسليني الأرشيف؟
بكا و نخجي و نهنها عجيبه .... الله يسامحك
أها يا بت امي ... البورد ده فيه اتنين توم و جيري وحاة الله
بيهججوا القعده ....
برسلهم ليكي هنا و الله تموتي بي الضحك
و تاني في شباب و شابات ظرااااااااااااااف من الجيل الجديد
المهم انا بعمل ليك ابديتينق
ولياب تندخرررررررررررررر لك
ده حالته عيد ميلادنا واحد؟؟ مشششششششششششششششششششششششششششششششششج زي ما قالت بت قضيم
يا خوانا في زول عارف تبلدينا خبره شنو؟؟؟
| |
|
|
|
|
|
|
|
|
|
Re: ركن المضطهدين بوردياً (Re: BitAlhana)
|
سلامو عليكو
يا شبكة بالغتي معاي
على فكرة، في ظاهرة في مجتمع البنات لبس التوب
يعني زمان تقدري ببساطة تفرقي بين البنت والمتزوجة بلبس التوب
حاليا ًبنات كتير بلبسوا التوب ولم يعد التوب دلالة على الزواج
ما ملاحظة كده؟! شوفي الحفلات الحية في التلفزيون مثلاً
المهم
ظاهرة تانية أن اللبس في السودان اتطور جداً ، يعني زمان المغتربات كانوا لبيسات وتيابهم مميزه وحتى طريقة مكياجهم وتسريحات شعرهم
الآن المغتربات (مغبشات على رأي حبوبة)، ومقارنة مع المقيمين في السودان، بنات السودان (محكحكات)، يعني تحسب الواحدة فيهم (مصنفرة) لو صح التعبير، بعدين بيمشوا في الشارع والشارع كلو تراب، ورجلينهم نضيييييييييفة
ما شاء الله
بنات السودان ما خلوا لبنات بره فرقة يقبلوا عليها
التياب في أسواق السودان جميلة جداً بل خطيرة الجمال، لكن ضيق ذات اليد وذات النفس وذات الكراع وذات الذات زاتو
وأنا غايتو بنصح مقيمات جدة لما يمشوا السودان ما يشتروا من باب شريف ويضيعوا قروشهم على عواليق، بالجد الحاجات الموجودة في الخرطوم تحفة.
سلمتي
--
يا محمد الملك كلك نظر
بت قضيم الأصلية بأي حال من الأحوال أنا ما شبهه والله يرحمك يا الفاضل سعيد
هوووي يا ولد (على قول حبوبة) أنا سمحة اشبه البي والبزيد عليه
مششششششششششششج
واسمع
المصريات ما أخير منا، سماحة جمل الطين بتاعتهم دي ما بتخارج معانا
واحترامي للجميع لكن مقارنة المصريات بالسودانيات من ناحية النظافة العامة فطبعاً السودانية أنضف
سيبك انت
دهن الكركار، أنا شخصياً مؤمنة به بغض النظر عن اني بستعمله أو لا
حاجات كتيرة موغلة في السودانية أنا مؤمنة بها وبقدرها لكن..
المشكة فقط في طريقة عرضها أو استعمالها لو صح التعبير
يعني الكركار بالجد دهن جميل جداً ومفيد جداً لطبيعة شعرنا، لكن ريحته نفاذه وبتضايق الناس الحواليك
والغريبة في السودان دايماً عندنا حاجات جميلة ومفيده لكن طريقة استخدامها أو عرضها لا يحترم الناس الحواليك
الصعوط مثلاً، في أحلى من الصعود؟؟؟ يعني حاجة جميلة و، يا سلاااام ممتعة، لكن طريقة دردمتها ووضعها وتفها في وش الناس ما ظريفة
لووووووووووول
بهزر يا هناي
سلمت
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
جعفر
روق ما تزعل
أسباب عدم رد أحدهم على الآخر كثيرة، منها الغبا والدروشة وما بالضرورة يكون اضطهاد، ومرات المشاركة نفسها لا تحتمل رد، وطبعاً مرات موضوع الشلة يحكم
وموضوع الشلة نفسها فيه سلبيات وإيجابيات،
من الإيجابيات أن تجد مجموعة تؤمن بفكرة معينة وطبعاً الاتفاق عليها – الفكرة- ينشرها ويقويها، وحيكون شي سلبي لو كانت الفكرة سيئة، مثل الأفكار العنصرية والقبلية مثلاً
أما مسألة الشلليات من ناحية الصحوبية والصداقة والحاجات دي، فاعتقد أن ده سلوك طفولي غير مبرر في مكان عام ومنبر من المفترض انه حر ذي هنا
وبما انه حر، خليهم يا زول حرين، والله ما نمشي ليهم في طهور العاقب
لوووووووول
سلمت
--------
إسماعيل عباس
ولك الود على هذه الكلمات الطيبات
رفعت معنوياتي الله لا يهبط لك معنويات
وذكرتني بالذي مضى
الدوم واللالوب، بس القضيم ما اوعدك، ما كان بنفع معاي، مع أنه الآن يستخدم لناس الأنيميا والدم الضعيف
تبلوا وتشرب عصيره ( ذي القونقليز) وبقولوا فعلاً بغذي الدم
واللالوب له منافع تخصيبية، يزيد خصوبة الأنثى (بالجد ما هزار)
لكن الدوم غير كسير السنون ما بعرف ليه حاجة تانية
ومرة تانية
شكككككككككررررررن كثيييرن
-----------
يا هدير بالغتي
عاملة نتية وما عارفة تلصقي حتة وش بدور؟؟!!
لووووووول
غايتو انا زيك حلفت ما اعرف كيف الصق وشوش هنا
رغم علمي الإلكتروني الواسع (وش كضاب)
ومرة سألت اعمل وش كيف وما ردوا عليا وتاني خجلت وعملت فيها البت عندها اسلوب وبقيت الصق وشوش بالكتابة زيك كده
وقامت جات واحدة حنكوشة جميلة مشهورة بقت تلصق الوشوش بالكتابة قمت خفت اعمل كده يقولوا سراقة افكار حرامية أساليب
برضو الواحد في الزمن ده ما يضمن أبداً مصايب الدهر والزمن
وعن بوست الحلويات والتياب والريحة والله ما عندي أي مشكلة
خليه بوست واحد علشان ما نتجهجه الواحد يكتب بوست هسه الصباح ده، الساعة 12 يلقاه مشى صنقعت
وبعدين يا هدير، حيدر الزين ده اخوك واللا تشابه بوردي ساكت؟؟
ويخليك يا عزيزة
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
يا ولياب جبت سيرة البحر
سبعة سنين وهناي شنو معاك
أنا أصلوا لما اشتركت في البورد ده كان عمري عمر الزهووووور عمر الهوى
ده موضوع
الموضوع التاني أن النية زاملة سيدها كما قالت حبوبتي مرة، وزاملة سيدها دي متهيأ لي – وانا بفتي – أن سيدها فقط هو العارفها فلا يجوز أن تفرضها على ناس تانية بما أن النية شئ داخلي سري لا يعرفه إلا أنت
واختصار الفلسفة دي أن زمن النيات ده زمن فات وراح وانا بتكلم عن عموم الحياة وليس هنا فقط
وفيما يخص الشهرة والعباقرة والفطاحلة، فما ضروري، كتير لأن في مشاهير هنا برضو ما شغال بيهم زول
بس أشارطك اني لو دخلت – خصوصاً اني انثى – ببوست من عينة عناوين الأسرة والعناقريب وما شابه، ناس من بوردات تانية قد تشارك معاي مش بس هنا
الموضوع إثارة وفك زهج ،مرات مرات ما ليه علاقة بالشللية
متهيأ لي كده
وعموماً يا ولياب
أنا بتذكرك
كيفك وكيف أحوالاتك وحبابك ال الله جابك وإن شاء الله يجيب عقابك
--------
يا بت الهنا تبلدينا ما أهونداك يقدل في البورد عامل صورته الوجيهة دي
غايتو استديوهات (ماجستيك) ما عملت فينا خير
الواحد وشو ذي شارع زلط سوداني تلقيه في الصورة ممسح وملمع ومدوووووعل يحمد الله
وما قصدي شي يا تبلدينا ما تصر لي
يا بت الهنا
وفي بوست بتاع (شايننج استار) اسمه (وبعد ضحكة قصيرة حاجة كده جبريل)
تموتي رسمي بالضحك
جد بوست مكتوب بمزاج
والناس الجداد متابعة بعضهم لكن ما خاااااالص كده
بنلقاهم ما تخافي
ويندخرلو ولياب مرتين إن شاء الله
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قضيم
كلنا مضطهدين ومهمشين
لكن انتي بي خبرتك حقو تلحقي نفسك
جمعي كمية عبر الرسائل التحتانيه (مسنجر) حسب وصيه قمر بوبا
وطالبو بقسمة السلطه والثروه
وكان ادوك مستشارية
ما تنسينا
ـــــــــــــــــــــــــــــــــــــــــــ
بالجد كده : بوست جميل وانيق اتوقع ليه الاستمراريه ولك علي حق التعتيل
اخوك
مهمش خالص
| |
|
|
|
|
|
|
|
|
 Re: ركن المضطهدين بوردياً (Re: بت قضيم)
|
..
.
بتنا بت الهنا ..
| Quote: يا خوانا في زول عارف تبلدينا خبره شنو؟؟؟ |
بتنا بت نفسها ..
Quote: يا بت الهنا تبلدينا ما أهونداك يقدل في البورد عامل صورته الوجيهة دي
غايتو استديوهات (ماجستيك) ما عملت فينا خير
الواحد وشو ذي شارع زلط سوداني تلقيه في الصورة ممسح وملمع ومدوووووعل يحمد الله
وما قصدي شي يا تبلدينا ما تصر لي |
خلاص اتلميتن يا الحروم.. لكن كم يوم ؟؟ انا باقى بقيت اشوف طشاش
طشاش وقعدتكن دا ما شفتها الا حسسسسسسسسسسى
الواحد بقول انتو مافى لكن لقاكن شاربات البورد شراب شايفات الطالع
والنازل .. والخضرا والصفرا ..
منطلقات فى شوارع البورد زى الركشات .. تتقاطعن من شارع لزقاق
خبر شنو الدايرات تعرفنو منى ..
قاعد .. فى ام بنايتن قش دى .. السفر مره فى السنه
انتو تجوا ونحن نمشى .. خطوط ستظل متقاطعة فى كل الاعوام
التى جمعتنا بكم فى اركان الاحباط .. والاضهاد والكسمبر ..
عموما..
لا نقيم نفسنا من المضهدين فالمنبر منبرنا ونحن سيادو
نقوم ونقعد على كيفنا ونكرم كل عضو جديد ونعتبرو ضيفنا .. ( عجيب يا ابوصلاح )
ابو صلاح دا انا ما سيد عبدالعزيز ..
عشان كدا اتلموا .. ولعوا كوانيكم وشدو قهوتكم
جيبوا مسلة ومساير .. انتو حبوبات قدام وخلو جنا الوزين
يقدل فى الساحة .. مع انى اشك انو بقي فى جنا ووزين هنا
المنبر دا كلو بقى ( خرد ) ككوستاوى تماما ..
ان استثنيناء مزن النيل وهبه الماحى وشبكة كيلا تشبكنى فى حنكى ..
الباقى حبوبات ..
ياريت تجيكم دومه وبسم الله ابتدينا ( اسمها منو الزولة دى ) !!؟
لها العذر ..
__________
وانا ماشى ما عرفت تحت خطى المعهود ماذا اضع ولكن :
غنى القمري على الغصون .. ذكرنى الدر المصون ..فريد عصرو الما متله شئ ..
قمرنا الليك متربصون ..يا الغصن البزرى الغصون ..ملاكـ موصون داخل غصون ..
شمس الكون تشبه وشيه .. جميل مثلك ما أظن يكون .. حياء وعفه ورقة وسكون ..
جميل خلقه ومتجلى لون ..تخافوا يجذب من تيه لون .. معاطفه دلال يتمايلون ..
عوم الوز يشبه مشيه .. هواى فى هواكـ ذات العيون .. يا الساحرة اللافته العيون
من غير مناسبة كدا هذا ان اعتبرناكم قمارى ..اقسموها بيناتكم
وكل واحجدة تشيل الجزء المتاح 
بختكم ..
| |
|
|
|
|
|
|
|
|
|
Re: ركن المضطهدين بوردياً (Re: Tabaldina)
|
على فكرة يا تبلدينا القمري ده زاتو ما حلو
وجني وجن الكعوجة في المشي باعتبارها رقة وأنوثة وعذوبة
وعليه اختار جزئية (الساحرة اللافته العيون )
حيث أنا سحرية جداً
وبعدين حبوبة دي أنا؟؟؟!!!
أجي اطبظ ليك عيونك أطير ليك وجاهتك في حق الشيطان؟؟
قادر الله
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قضيم كيفنك
وحمد الله سلامة
عارفة ؟
الزمن دة لازم تدافري و في رواية أخري تجيبي طوبتك و تحجزي في الصفحة الأولي
ولازم تتعلمي سياسة فوق الأستراتيجية الضرورية لرفع البوستات البايركس
يختي البورد بقي مكابسة
ولازم تجي بدري
اول ما بكري يفتح الحوش
انتي تروحي داخلة
و ختي العناوين الختيرة
توجد فياغرا
يوجد سرير
ولا يوجد غفير
المهم
كوني بخير
| |
|
|
|
|
|
|
|
|
|
Re: ركن المضطهدين بوردياً (Re: حبيب نورة)
|
كنت بخير
تسلم يا حبيب نوره
انت نوره دي منو؟؟؟
المشكلة السياسة ما لي فيها، لا بفهم فيها طظ من سبحان الله
غايتو بجرب إن شاء الله فكرة العناقريب دي
ولو بار البوست برضو، يبقى الغلط ما علينا الغلط على العنقريب
لوووووووووول
شكراً يا حبيب نوره وكون انت بخير يا ود أمي
-----------
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
Quote: سلامو عليكو
يا شبكة بالغتي معاي
على فكرة، في ظاهرة في مجتمع البنات لبس التوب
يعني زمان تقدري ببساطة تفرقي بين البنت والمتزوجة بلبس التوب
حاليا ًبنات كتير بلبسوا التوب ولم يعد التوب دلالة على الزواج
ما ملاحظة كده؟! شوفي الحفلات الحية في التلفزيون مثلاً
المهم
ظاهرة تانية أن اللبس في السودان اتطور جداً ، يعني زمان المغتربات كانوا لبيسات وتيابهم مميزه وحتى طريقة مكياجهم وتسريحات شعرهم
الآن المغتربات (مغبشات على رأي حبوبة)، ومقارنة مع المقيمين في السودان، بنات السودان (محكحكات)، يعني تحسب الواحدة فيهم (مصنفرة) لو صح التعبير، بعدين بيمشوا في الشارع والشارع كلو تراب، ورجلينهم نضيييييييييفة
ما شاء الله
بنات السودان ما خلوا لبنات بره فرقة يقبلوا عليها
التياب في أسواق السودان جميلة جداً بل خطيرة الجمال، لكن ضيق ذات اليد وذات النفس وذات الكراع وذات الذات زاتو
وأنا غايتو بنصح مقيمات جدة لما يمشوا السودان ما يشتروا من باب شريف ويضيعوا قروشهم على عواليق، بالجد الحاجات الموجودة في الخرطوم تحفة.
سلمتي
|
بالله رجعت تاني موضة لبس التوب لغير المتزوجات
اها زي ما قلتي يفرزوهن كيف
لو قلتي لي بالحنة
اقول ليك صعب
لانو بسبب الشغل النسوان خلوا الحنة بالذات حديثات الزواج او البنات الصغار بقوا ما شغالين بموضوع الحنة دا كتير
وكمان حقيقة ناس السودان بقوا لبيسات انتي عارفة السبب شنو !!!!
السبب انو الناس برة السودان قاعدين على الماهية من اول يوم في الشهر تعرف ترتب شهرك للاخر
يعني معروفة انها ماشة وين واقساطها كم ...
يعني ما في مجال ل الله كريم او قدر ظروفك اومعلقة فازلين بي 500 جنيه ....
انتي عارفة في السودان !!!
ممكن تلبسي من جارتك ...
ممكن تستلفي حق الحنة ...
ممكن من دكان قدر ظروفك تأجري اكسسوار كامل بلبستو كمان ...!!!
عشان كدا التغير عندهم وارد وقادرين عليهو ويومي كمان من كترة المناسبات بقوا جاهزين طوالي ومحكحكين
لكن المغتربات ياحليلهن
يخلصن من الاقساط يبقن في التعليم والحجل بالرجل مع الراجل ما يقدر يشم نفسو عشان يزيد دخلو
يحطمن فيهو وهو اصلا ما كان محتاج زيادة تحطيم
وبجيك تاني الكلام كتير
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
..
.
| Quote: على فكرة، في ظاهرة في مجتمع البنات لبس التوب |
دا ووين دا .. الا لو بنات الشيخ الطيب !!
انا متأكد ابوصلاح لو شافن
كان قال
يا الشافعات اللابسات توب الحرير
وحياة صغر عمرك وكلامك المعسول
التوب احلى فيك من التونك والله ما معقول
| Quote: يبقن في التعليم والحجل بالرجل مع الراجل |
ما شفتو الحجل بتاع اليومين دى
مرة دهب ومره حنه .. عجييب !!
____________
والله يتابع التوب دا يقعن يزلطن جوه
عرباتن السايقاتها دى ..
قال توب .. غايتو ما توب حرير
بكون درع من القماش
| |
|
|
|
|
|
|
|
|
|
Re: ركن المضطهدين بوردياً (Re: Tabaldina)
|
والله يا تبلدينا حالتك صعبة حالتك تحنن
كدي أرفع راسك شوووووية من الحجول تشوف التياب على طول
اتاري حادث الحركة مااااااا براه
ومسعول من الخير يا ده
من القائل
(الحجل) بال(رجل) يا الأفندي سوقني معاااااااااك
أبو صلاح واللا سواق الركشة بتاع الحادث؟؟!!!
وسلامتك
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
والله نصهن متحننات لو ما كلهن
وأنا غايتو بفسر اهتمام سيدات السودان بأنفسهن تفسير تاني
أحياناً بحس انهن مليانات حياة
عايشين حياة صاح
ومقارنة مع لهاث العمل والاغتراب الذي نمارسه هنا، أقول احنا بالجد حيواتنا مملة ولا طعم لها
اتكلم طبعاً عن مجتمعي أنا وناس السعودية تحديداً
انت عارفة أن لبس العباءة هنا بقى مرتبط بالبشتنة والعشكبة، الواحدة لابسة عباية يا لطيف لو قلعتها، قمصان باب شريف أمات 10 ريال ما تديك الدرب
ده غايتو الأغلبية العارفاها
غير كده ، مسألة الدين والاستلاف يمكن، ما عندي فكرة ، لكن برضو بقول أن الواحدة تتعب وتستدين وتستلف وتشتري فازلين بالملعقة برضو لأنها مليئة حياة
لنا الله مضطهدين الغربة (بقى بورد وغربة لاحظي)
واسمعي هنا يا شبكة
شبكتيني في بوست الحلويات كتبت الوصفة الوحيدة البعرفها كويس وزغتي سبتيني براي
الزميل شابكنا وصفة الإسباجتي وأنا لايصة وانت ولا هنااا
هوووووي يا بت تعالي ختي يدك البورد سد ورد (على وزن الدنيا سداية ورضاية)
واشوفك
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قوقو ...
سلام ...
موضوع ظريف ..
أسعدتينا ربنا يسعدك ..
في الحقيقة نحنا ما مهمشين من منبريا ولا مضطهدين إسفيريا ولكن نعاني من تهميش إقليمي واضطهاد
اجتماعي فكيف الدبارة ؟؟؟
| |
|
|
|
|
|
|
|
|
|
Re: ركن المضطهدين بوردياً (Re: عواطف ادريس اسماعيل)
|
حبيبتنا بت قضيم
مشتاقين كميات
بخسوس التهميش مافي زول يقدر يهمشك ولا يضطهدك انتي وراك رجالة وحرووم
بخسوس الهدايا اشتري كردكي يوم بحضر في لقاء مع واحد من السفارة اليابانية بالخرطوم قال لي مقدم البرنامج انا بشيل معاي كركدي من السودان لليابان لانو خفيف في الوزن وتقيل في المنفعة لووول
شفتي اليابانيين ديل فهمهم عالي كيف
بي خسوس الاجراءات
مشيت اجازة برضو وحاولت اطلع شهادة جامعية تانية
مشيت الجامعة ومنها للخدمة الوطنية اذن استخراج شهادة ودفعت رسوم وجيت الجامعة ودفعت رسوم استخراج وتوثيق بعد استلمت الشهادة قالوا لي تمشي البحث العلمي ولا شنو ماعارف توثقها من هناك مشيت هناك قالو لي لازم تجيب اعفاء من الخدمة اذن توثيق مشيت تاني الخدمة عملت اذن توثيق وجيت وقفت في الشباك
وباقي عشرة دقائق والشباك يقفل شفت لي اقرب بت واديتها الشهادة ماقصرت اها ادتني ورقة ومشيت الشباك التاني قال لي ياخي اسمك ماموجود في جامعة السودان لوووووووووووول يكه اها قال لي لازم تمشي الوزارة وتجيب شهادة سودانية قلت ليهو ماموجود كيف يعني شهادتي مزورة ولا شنو قال لي لا ماكده
اها قلت ليهو ياخي انا ترتيبي من اوئل الدفعة بتاعتي طيب الموجود منو لو انا مافي قال لي دقيقة طق طق طق خبت على الكي بورد قال لي اسمك موجود جيب الرسوم اديتو الرسوم وجيت بكره استلمتها ومشيت على الخارجية وقفت في الصف اديتو الشهادة قال لي وين اذن التوثيق بتاع الخارجية من الخدمة الوطنية لوووووووووووول يكه قلت ليهو تاني اعفاء من الخدمة الوطنية المهم مشيت طوالي الخدمة الوطنية وطلعت اعفاء توثيق شهادة جامعية من الخارجية وجيت وثقتها في الخارجية ومشيت شربت لي كباية ليمون احتفالا بتوثيق الشهادة لووووووووووووووووول يكه
لحدي هنا بتخيل لي كفاية استخراج الشهادة ح ياخد وقت طويل عشان تقريهو
اشتقنا لي كتاباتك بتاعة زمان
زاتووووو
| |
|
|
|
|
|
|
|
|
|
Re: ركن المضطهدين بوردياً (Re: ALZOLZATOO)
|
| Quote: وبما اني تجاوزت – كما يبدو- مرحلة الحنكشة والبت اللذيذة البتكسر الناس، |
يا بت قضيم
تحياتي واحترامي ،،،
o (الفيهم ) اتعرفت .
o المشكلة دائماً فى البدايات ، يعني كان دخلتي من الاول (باسم مستعار) يكسر الجماعة (وعمر مستعار) عمر الزهور ، كان لقيتي بوستاتك فووووووووووووووووووووووووووووووق.
معاذ
| |
|
|
|
|
|
|
|
|
|
Re: ركن المضطهدين بوردياً (Re: SHIBKA)
|
سلامات للجميع
مساءاتكم خير ومنقة
يا عواطف انتظري شوية بكرة تركبي بص التهميش معانا
بس اقدمي شوية
وحمانا الله وإياكم من التهميش الاجتماعي
يعني والله ما اقدر افيدك كان افدت روحي في الاول من التهميش الإسفيري
واضحكي يا زولة وانبسطي
الدنيا فوقها شنو؟؟؟
---------
يا سلام يا زاتوووو زول
أبشر بالخير آآآ جنا
الفيكم مشهودة
و(بخسوس) الإجراءات دي
طبعاً اتخيلت الحر والعرق والزهج والمواصلات وزحمتها (واللا العربية وكندشتها)
أنا غايتو قالوا لي مرة ما عندك شهادة ميلاد
رسمي كده عايزة أطلع شهادة ميلاد بدل فاقد، قالوا أنا ما مسجلة في سجل المواليد
غايتو من زمان شاكة في روحي اني مبدلة لكن ما ظنيت للدرجة دي
وبعدين يعني اشتقت لكتابة زمان وكتابة هسه ما كويسة؟؟؟
يخليك
----------
يا معز
يحرء حريشك
القال ليك انا ما عمر الزهور منو؟؟!!!
غايتو عمر الزهور ده أصلو ما بنخليه إن شاء الله لو زهور صبار برضو مكنكشة فيه
ومنو القال ليك بوستات عمر الزهور فوق؟؟؟
بالعكس
علشان عمر الزهور بقول ليها يا بت انزلي تحت ده كلام ناس كبار
لووووووووووول
عاين
ما تعمل لي فيها التياب بتعمل حساسية والدهب بجيب وجع اضان
لأن التياب لا تفرق شئ عن مرض الجلابية المصاب به الرجل
والدهب أحسن من ضياع الفلوس في الفاضي والمليان، على الأقل ضمان للزمن
تشتروا لنسوانكم وتجوا تعملوا فيها بعدين متضايقين
مشششششششششششششج
--------
ويا بلاير الله يعافيك
وأضيف
أن كل شئ في الدنيا، كل شئ قابل للتغيير، عدا قانون التغيير هو القانون الثابت الوحيد الذي لا يتغير
أم الفقلصة
لقيتني كيف وأنا سقراطة
تعيش
------------
شبكة ازيك
| |
|
|
|
|
|
|
|
|
|
Re: ركن المضطهدين بوردياً (Re: بت قضيم)
|
بت قضيم الانيقة
اري ان بوستك ماشاء الله قد عبر الخمسين وما يزال يتقافز الي المائة
حلوة يتقافز دي عجبتني امن اتكيفته براي
مع اني قاعد براي
وما عندي موضوع
فجأه ات>كرته البوست ده
قلته ما دام الحكاية اضطهاد وتحميش علي وزن تهميش اقوم اكبس لي حرف حرفين
لكن فجأة الكلام طار
زكرني ايام امتحانات الشهادة زمااان
كنت بنسي كتير
بقرا طول الليل واليوم
ومن ما يوزعو الورق خاصه التاريخ
احس انه راسي بقي فاااااضي
واعاين للجنبي
القاهم منكبين في الورق
وراشين رش شديد
وانا المسكين بقيت دايش
افتش في راس خيط
زي ما تقول عاوز ادور وما قادر
جارنا كان عنده لوري
كل يوم لازم نصحي علي صوت التدويره
وريحة الجاز مارق من العادم
ادمنتا ريحه الحريق بتاع الجاز
بقيت لازم مع شراب الشاي بالعيش لازم يكون في ريحه جاز محروق
يوم والدنيا شتا
صحينا وجابو لينا الشاي
لكن ما كان في ريحة جاز , استغربته وقمته تاوقته
من باب الشلاقه وحب الاستطلاع
لقيته بحاول يدور المكنه
والمكنه مابيه تدور
واحد خبير , وما اكثر الخبرا عندنا
قال ليه تعرف: العربية دي لازم تشممه
قال ليه لكن بتدور
قال ليه ايوه
احترته انا
يشممه يعني شنو
سألته
انت حا تشممه شنو
قال لي بنزين
عشان تدور المكنه
اثناء الامتحان جاني خاطر اني محتاج شمومه
يمكن العقل يدور
بت قضيم
انا شكلي شطحته
حقو انزل المحطه الجايه
مودتي
| |
|
|
|
|
|
|
|
|
|
Re: ركن المضطهدين بوردياً (Re: Faisal Elrasheed)
|
بت قضيم
والله مشتاقين مع كثير السلام
برافو ارشحه ليكون بورد عام 2009 فبل الارشفه
ولكن طيلة الفترة التى اكتب فيها للبورد لم اشعر بالاضهاد بعدم المداخلات فانا اكتب لعلى اوصل فكرة او خبر وكل امالى معلقة بقراء البورد ولا اصدقك القول فكثيرا عبر المداخلات اجد منفعة ولكنى لا اكترث
شكرا
| |
|
|
|
|
|
|
|
|
|
Re: ركن المضطهدين بوردياً (Re: بلدى يا حبوب)
|
بت قضيم
حبابك عشرة يابت امى مشتاقين كتير ياناس الرعيل الطاعم،المضطهدين عدوينهم ان شاء الله
كان عارفاك فى السودان كان جيتك ،ويمكن نكون اتلاقينا فى واحدة من مناسبات السودان الكتيرة
أنا ما عارفة الناس دى هناك ما بتتعب من المناسبات ولا شنو؟؟غايتو أنا فى الأخير بقيت أقول لاخواتى
أعتذروا لى، التعب ما مشكلة بس التياب زاتها ما بتكفيك وكان شافوك لبستى التوب مرتين تبقى فى
النجيهة.
بمناسبة الدهب:
قالوا واحد مغترب مشى يطلع تاشيرة الخروج، الموظفة لابسة الغوايش الماخمج سمعته بقول لصاحبه :(حقو الواحد يعرس ليه واحدة من موظفات الجهاز ديل، اتلفتت على زميلته وقالت ليها:( منو دى البتعرس ليها مغترب دى؟!!!بسسسسسس)
تحياتى
| |
|
|
|
|
|
|
|
|
|
Re: ركن المضطهدين بوردياً (Re: مهيرة)
|
يا بت قضيم
| Quote: لأن التياب لا تفرق شئ عن مرض الجلابية المصاب به الرجل |
o فى زمتك الجلابية بتكلف كم؟ وبتمشي معانا كم ؟
o انتوا فى اية مناسبة عاوزين توب.
o كل اجازة عاوزين تياب ، عاوزين تغيرو الدهب.
بالمناسبة قبل اتزوج كنت بناقش خالتي فى موضوع العرس قلت ليها احسن الواحد يريح راسه ويتزوج ليه بنغالية(بنغلاديش) لما تطلب ايه حاجة اهز راسي واقول ليها مافي معلوم!!!
معاذ
| |
|
|
|
|
|
|
| |
بت قضيم
حيدر حسن ميرغني
HAIDER ALZAIN
مريم بنت الحسين
معتصم مكاوي
شمس الدين ساتى
محمد سنى دفع الله
عبدالله كع
Hadeer Alzain
SHIBKA
ياسر بيناوي
محمد على طه الملك
Gaafar Ismail
ismeil abbas
ولياب
Faisal Elrasheed
حبيب نورة
عواطف ادريس اسماعيل
ALZOLZATOO
moaz elsir
PLAYER
بلدى يا حبوب
مهيرة
فيس بوك
تويتر
انستقرام
يوتيوب
بنتيريست