تــساؤل

والله لا في صنعاء ولا من يحزنون .. كلّو سفر .. وبعدين أنا بحب السفر .. شنو يعني لو الواحد بقى حياتو كلها مسافر؟ وبعدين يا خواننا الداير السودان أهو داااااك .. والله اي زول داير يمشي يمشي وما في اي قرد ح يعترض طريقو .. خلونا من الكلام الغريب ده

أنا مسافر كده غايتو .. وبحب السفر وبحتار في الناس البيبكوا ديل!! تبكوا على شنو؟ وشروق شمس شنو؟ غداَ شنو .. والله العظيم نحن ديل الله يهدي سرّنا ساي لكن في جوطاتي دي كلها في العالم ما لقيت ناس مثقفاتية زينا

يازول انا ما داير صنعاء دي تب .. هدا طرفي منها

ود الخاتم .. ما تقوم تزعل مني وتقول كلامي ده داير اغيظك بيه .. علي الطلاق لا وستين لا .. بس روحي حرقتني ياخي .. اي واحد يكتب لينا عن المرافئ .. وواحد عن المدائن الحلم .. وواحد عن المطارات والنزوح .. وواحد عن البنفسج .. وواحد عن هجرته العشرينية مع انو ما في اي زول شغال بيه لو رجع السودان أو رواندا!!!! ه

ياخي والله حاجة تجيب المغص .. غايتو انا ما لاقوني ناس بنفسجيين زي السودانيين ديل .. اي واحد ركب ليه مركب قاطعها من راسو .. ويتوجع بطريقة غريبة على الوطن والنزوح والهجرة القسرية!!! علي بالدين 90% كضابين ودجالين .. لانو الباب فااااااتح للسودان وللاي حتة الواحد عوز يمشي ليها. سيبونا من التهويم الذي لا يجلب غير المرض النفسي

انا مسافر .. واحلى حاجة اني أكون مسافر .. السفر ده الأمم كلها بتستمتع بيه وانا مستمتع بيه .. بس بتبوظوه علي بحكاية المنافي والمرافي دي .. الواحد يجي يبكي ويقول ليك الحكومات الدكتاتورية!!! وهو تلقاهو طلع من السودان من عهد الانجليز

أيها الشعب البنفسج .. انت شعب فارغ .. لا أعني الشعب تحديداً .. بل أعني مثقفيه ومثقفاتيته ومتعلميه . .. الشعب أوعى من متعلميه .. والله هذه حقيقة

قال بنفسج ووجع المرافئ وحمى الدريس. ياخواننا اقعدوا في التراب ده أول حاجة .. ملعون أبو السودان لو ما قعدتو في التراب ده وخليتو التهويمات الما عندها معنى دي

ود الخاتم .. والله أنا حقرت بالبوست بتاعك ده قلت اتفشّ فيه بس .. أها ما تاخد فيها حاجة
ولك الود

يا ناس هيييييييي .. والله انتو ناس عديمين شغلة.السودان مفتوح اي واحد عامل فيها خلاص الحنين ملكو يركب اقرب طيارة ويسافر. أها ما تقولوا لي الجبهجية والانقاذ: دي انتهت . . والله كايسين ليكم بالقروش

انا عاوز أغير جنسيتي دي لصيني .. في طريقة؟

(عدل بواسطة Shinteer on 09-23-2003, 02:26 PM)
(عدل بواسطة Shinteer on 09-23-2003, 02:27 PM)
(عدل بواسطة Shinteer on 09-23-2003, 02:29 PM)
(عدل بواسطة Shinteer on 09-23-2003, 02:32 PM)