دعواتكم لزميلنا المفكر د.الباقر العفيف بالشفاء العاجل
|
|
 الخدود الشاربة من لون الشفق عند المغارب
|
ها هي تفئ بوعدها .. والشمس تلوح بيدها مودعة .. فتنكسر صورتـها على بسـاطٍ أزرق يتبختر .. ورمـلٍ ( يتبرك ) بلمسةٍ تلو لمسة يكاد يتشبث بكل خطوة ترتسم عليه فتحيل بريقه ولمعانه الي توهج .. تتهاجن الألوان .. فيرتوي خدها بخمر الشفق المذاب .. عند المغارب
يتمدد الشاطئ بزرقته الحالمة .. تتعانق الأمواج بلهفة المحب الملتاع .. تخرج النغمات أنيناً موجّعا .. تلفظ نغمة رشيقة أنفاسها .. لمتنح الحياة لنغمة أخرى .. كلما ذاب موجُ في حضن موج .. تنهمر دمعه تنسرب إلى حواف الشاطئ .. تروي ظمأ الرمال العطشى .. فيزداد اشتياقها لوقع أقدام تفوق الحرير ملمس ..
( الرمال الناعمة .. تشتاق لمشيك )
… لا أستمع لهذه الأغنية إلا وبدأت أمامي مشاهد حية كفلم على شاشة السينما .. رغم بساطة الكلمات إلا انها تتميز على كثير من أغنياتنا بالصورة الحية المتحركة أمامك .. ها هو الشاطئ بموجه .. ورماله .. وتلك الكاعب الحسناء وهي ( تتبختر ) بينما الغروب بأشعته السحرية يهيمن على المكان .. أليس ذلك مشروعا لفديو كليب
.. كذلك أغنية ( الجريدة ) للأستاذ محمد الأمين تحمل مضامين قصة متكاملة في مخيلتي
.. قصدت بهذا الموضوع فتح باب النقاش حول الإنطباعات التي تتركها أغانٍ معينة أو مشاهد تظل عالقة بأذهاننا كلما استمعنا لها .. وبالتالي هل فكرة ( الفديو كليب ) تجور أحيانا لتشيه ما يختزنه كل مستمع في مخيلته .. وما هي الأغاني التي يمكن أن يضيف لها ( الفديو كليب ) بعداً اضافيا.. لتكتمل الصورة في أعيننا
طـال علينا فراقكـم ..والله يا غايبين
قدر ما ننسى العلينا .. برضو مشتاقين
رحمابي
(عدل بواسطة AlRa7mabi on 08-02-2003, 02:30 PM)
|
|
 
|
|
|
|
|
|
|
 Re: الخدود الشاربة من لون الشفق عند المغارب (Re: AlRa7mabi)
|
تعرف يا رحمابي
التكنيك السينمائي دا
في الكتابة
مدهش
وحميم
الأيام دي بقرأ في رواية الخريف ياتي مع صفاء
رواية احمد الملك
حاجة مدهشة جداً
لا تملك سوى متابعة الشريط إلى اخره
عند الانتهاء منها ساعود لها في بوست منفصل
لوووووووووووووول على الكاعب الحسناء
اشمعنى كاعب
بالمناسبة
بطلة ينسرب العشق
برضها بت خمستاشر سنة
( كاعب اخري(
بغتسن حجرك الكواعب ديل
خليها للجنة
مش كلنا قالوا هناك بنبقى كواعب
تحياتي
الجندرية
| |
|
|
|
|
|
|
|
|
 Re: الخدود الشاربة من لون الشفق عند المغارب (Re: AlRa7mabi)
|
الرحمابي
حلاااات كتابتك وانت راااايق
وانا مرات زي الحرامي بمشي افتش البوستات القديمة واستمتع بقراءتها...وتجدني اقف ساعات في ابوقطاطي الشفيف المتفرد ...واجدك تلفت انتباهنا للروائع ...وهذه موهبة ان تحس بالعمل الجميل قبل ان ينتبه له الناس
اكتر شي بقيف عندو في اغانينا الغنا المسرحي
فسيد خليفة عندما يقول انا قلبي بدق تكاد تسمع نبضه...ويلهب احساسك عندما يقول
يا جميل ما ليك حق والله
ما ليك حق والله
وابو الامين في عايز اقوووول
اقووووول
اقوووووول
وبلطف شديد
بحبك
يا يا يا
حالة من الانتشا العجيب
وما عارف الايام دي طوااالي بردد غنية ابو عبيدة حسن
يمكن نسى
ويمكن قسى
ويمكن ظروف المدرسة
ودائما ما يحتج من يسمعني ارددها على رداءتها
تسلم
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: garjah)
|
عزيزي الرحمابي : تحياتي.
موضوع جميل و فنان.
الحقيقة و بدون إنحياز ، غالبية الأغاني السودانية هي في مجملها فيديو كليب دون تصوير سينمائي ، لأن كلماتنا مليئة بزخم ( لامتناهي) من المعاني.
لو كانت هناك إمكانيات ، لإستمع الناس لأغانينيا في العالم قاطبة و لحصدنا جوائز نحسد عليها.
كما أنه و بدون أي مغالاة ، فإنني إلى الآن لم أستمتع بفيديو كليب ، لا عربي ولا أفرنجي ، لأن الأغنية شيء و المناظر شيء آخر ، خاصة و بعد أن إمتلأت الساحة بكمية من ( الصارقيلات الآدمية تتلوى في ألم و مغص كلوي منفر. ).
عندما غنى عثمان حسين و الكاشف و سيد خليفة و أبوداود ، أغاني بخلفية من مناظر الخرطوم ، الإنطباع كان أجمل مما نراه الآن بكثير.
في إعتقادي أن الأغنية تفقد الكثير من مغزاها اللغوي و الموسيقي لأن العين و القل ينصرفان نحو هذه الأجساد المعروضة و الحركات اللولبية و الحلزونية. و كما أعتقد بأن الإكتفاء بخلفيات من بيئة الأغنية هي الأجدى و الأنفع ، و في النهاية ، إن الموسيقى نوع من تغذية المشاعر البشرية بنوع من الدفء و الرجوع للماضي و إجترار الماضي و إستقراء للحاضر و المستقبل ، لذا فإن الإستماع للغناء بطريقة هادئة تكون أسرع في توصيلها لمنابع الإحساس و التذوق.
تسلم.
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
العزيز
عندما كنا نسجل اعمال وردي بكاليفورنيا والتي لم يحظي الناس
بنزولها الاسواق حتي الان
واثناء البروفات لاغنية عصافير الخريف
وانا اقود الاوركسترا
بكيت كالطفل فبكي الجميع بما فيهم الاوركسترا ووردي والاداريين
ونظر الامريكيين الينا في تعجب
وسالو
فقلنا لهم
ان هجرة عصافير الخريف في موسم الشوق الحلو
هيج رحيلها مع الغروب احساس غلبني اتحملو
هي وصف دقيق لحالنا كفنانين الان
فجعلو يواسوننا حتي يخففو حدة الالم
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: Elmosley)
|
رحمابي تحية
عنوان البوست كان جاذبآ فعلاقتي مع ألأغنية علاقة وطيدة ، أعود لها كلم تدلهم ليالي الغربة وتنؤء بكلكلها علي ، مرة سألت الموصلي عن رايه في ضمها إلى قائمة بشرى الفاضل ، الرصيد الغنائي ، وكذلك كانت سؤال إلى رقية الراقية وأديبة ، سألتها مستلهمآ ألأغنية ، كيف تفارق الضفة والنيل هان عليك؟
الجندريه
طال علينا تغييبكم ،، والله مشتاقين
| |
|
|
|
|
|
|
|
|
 Re: الخدود الشاربة من لون الشفق عند المغارب (Re: AlRa7mabi)
|
الرحمابي الجميل
اسعد الله لحظاتك زي ما دايما بتسعدنا بي بوستاتك دي
ومن ما قريت البوست ده بدور ليك علي الاغنية دي ..وما لامي فيها ..كانت عندي بي صوت عثمان مصطفي في شريط فيديو
يار
وانا منتظر معاك علشان اسمع ..لو عند الشباب ديل ..وكنت ناوي ازرع ليك واحده هنا للعاقب .لكن الجايات اكتر من الرايحات
وما وريتني طلبك شنو ؟؟
والبوست بتاع ابو قطاطي ده يا رحمابي ما مر علي لكن شايف عمو قرجه الجميل اتدردق ليك في البوست ده ..كدي حاولوا جيبو لينا خبرو ..او قول لي اسم الاغنية ياته الطلبتها علشان احاول اشوفه ليك ...
واصل ..واصل ..
محبتي
علاء
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: tmbis)
|
الرحمابي العزيز : تحياتي
بالفعل هناك أغاني تحتاج لطقوس معينة لتجلس لسماعها. و هناك أغاني تفعل بك فعلا مفاجئا كما ذكر الموصلي.
كنت في رحلة على يخت خاص من أسبانيا إلى المغرب ، و باليخت مسجل إستريو و سماعاته موزعة على جميع أنحاء اليخت ، و لم أكن أعلم ذلك ، فوضعت شريط وردي ( أغنية الحزن القديم ، توزيع أندريه رايدر ) ، فإذا بركاب اليخت ، يتركون كل شيء و يرخون أسماعهم ، و عندما إنتهت الأغنية ، وجدتهم بقربي و إفتضح أمري حيث كانت دمعات ( غليدة ) تستقر على خدودي.
تسلم الرحمابي. و لكل أغنية شجون.
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
يا شباب
يا جماعة
أرحمونا
والله ما فتحت هذا البوست إلا اليوم ، وأكملت كلام الرحمابي وسالت أدمعي
واستمر الحال إلى أن وصلت إلى حديث الفنان موصلي فرأيت أن أحتضنه وبكيت معه بصوت عال
لا كبكاء الرجال ولكن كبكاء طفلين تاها عن أبويهما في زحمة سوق لا يفهم لغتهما
الحاجات دي جميلة
ورائعة
لكنها تقلب مواجعنا
ويهيج أحزاننا
ونحن أصلا ما ناقصين
لكم جميعا تحياتي وودي
ويا رب ننجمع كلنا كده في بلادناونرقص على نغمات أغانينا مش فيديو كليب ولكن عيانا بيانا
ونبدأ بالرقص على ملحمة محمد الأمين
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: ودقاسم)
|
الرحمابي
أتفق معك ان الكلمة المتسمة بالباسطة تكون عميقة الدلالة وباهرة التأثير في الوجدان ، وهي رغم بساطتها فانها غير ساهلة ، السهل الممتنع ، واهديك هذا النموذج ،،
من نظرتي ألأولى
ملك فؤادي غرام
شفت الجمال صاحي
وإتحققت أحلام
باللاهي ليه يا زمان
ما تصفو لي أيام
الموصلي
الصهينه شينه يا ولدي
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
رحمابي
طبعاً متأكدة تماماً
انه الموضوع كرضرم كرضرم ساكت فقط امازحك على قولك شيري
لكن لمست اللحم الحي بحكاية الرقيب دي
طبعاً الرقيب دا ببقى اس ميه لمن يكون منتج النص كاتبة
ويرتفع لاس الف في منطقتنا
بس كويس انك اتهرشت عشان ام ضحى تخت في بطنها بطيخ صيفي
رواية احمد الملك سوف استأذنه في ارسال صورة لك
رسل لي ايملك في الماسنجر
شكراً على كل الدموع التي اسالها بوستك
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
أبو ساندرا
Quote:
شفت الجمال صاحي
وإتحققت أحلام
|
بالله عليك شفت الربط الخطير دا بين .. شفت الجمال ( صاحي ) واتحققت ( أحلام ) .. ربما كان كل ما يأمله أن يراه طيفاً في الأحلام ، لكن ( ربك رب الخير ) قد رأه عيانا بيانا ... وتحققت الأحلام .. حتى لو كانت أحلام يقظة .. يا زول الناس ديل خطيرين خلاس .. ونحن ما بنستحمل ؟؟
تمبس
أنت سامع حاجه .. ولا أنا
الجندرية
مرت كتبت حاجة كده قصة أو ما شابه .. وقبل ما أدفع بها لأحدى الصحف للنشر ( طبعا ) مررتها على الرقيب .. وأبدأ ملاحظات .. وطلب حذف بعض ( العبارات ) .. لكن أنقري ما نشرتها .. شفتي الرجالة دي .. لكن طبعا بعد تعديل ( طفيف )؟؟؟؟
aboalkonfod
مرحب بيك .. وتشكر على الذوق الجميل
لكن يا ود عمي .. نحن ناس جرسة في البوستات الداخلية دي بس .. البالون المعلق فوق دا ، لا يدخل ضمن حساباتنا .. خليك معانا يا جميل
تسلموا جميعاً
رحمابي
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الرحمابى
صديق الجمال
معظم صفحات كتاب الغناء السودانى، لوحات منحوتة والله على وجدان الناس، وقدر ما تمسك ليك اغنية تلاقيها اجمل من اخواتها، خاصة اغانى عبقرينا الكاشف
خد مثلا اغنية المهرجان، لوحة عذبة ومتكاملة الابعاد وزاهية الألوان
وعندك تانى اغنية رحلة فى طيارة، واغنية يوم الزيارة، وصابحنى دائما مبتسم
الكاشف انسان غير عادى طبعا ومتفرد فى كل شى
فى اغنية من اجمل اغنيات الحقيبة وهى من كلمات المبدع مسعد حنفى، وهى
الناعسات عيونن نور جبينن هلا
ما بين تبرى صافى واخدرانى اللون
الأغنية كلها وصف لحفلة زواج قاسم صديق الشاعر، وياريت لو تسمع الاغنية دى وتشوف كمية وجمال اللوحات الفيها
الكلام كتير وشجى جدا، بس خايفين على مساحة اخونا الحبيب بكرى، وما عايزين "نهير" فيها، ونخلى الباقى للزملاء الأعزاء
بس بالله اسمع الطير المهاجر
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الاخ رحمابي
كل اغنية عندما نسمعها ترتبط لدينا بالمكان والناس الذين رايناهم عند استماعنا لكلمات الاغنية والحانها
فتجد انه حتى بعد مرور السنين لو اسمتعنا مرة اخرى لهذه الاغنية تجد ذلك الحنين والشجن يخرج من بين قلوبنا لنتذكر تفاصيل مضت وما زالت تعيش فينا
عندما استمع لاغنية زاد الشجون اتذكر على الفور الخرطوم بالليل ومنظر النيل المنساب بهدوء ليلا ووجوه اهل بلدي وهم يسيرون في شوارعها وتلك التفاصيل الصغير ة التي تجدها في الخرطوم العاصمة المثلثة وتجعلك تبكي شوقا لها
واغنية الود الرائعة التي تحس معها بكل نبض فيك وهو ينادي بتراب السودان الذي فارقناه السودان زمان
شكرا لك لتناولك هذا الموضوع الجميل
ودمت بكل خير
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
أيها المطر .. تحية بنكه زخاتك الرطيبة
تعرف يا صنوى .. هذه الأحرف السودانية التي طرّزت بها لوحة أغانينا نحتاج لمطالعتها كل يوم .. لتكتشف كم أضعنا من الجمال حينما لم نتأملها بعمق .. قبل سنة أو يزيد زيّن عمنا بادي محمد طيب سماء مسقط بدرر الحقيبة وبتطريب عجيب .. فشعرت بأننا على مسافة بعيدة من تلك الأجيال التي كانت ترمي الحرف بكل عفوية فتتماسك الأحرف في سلسلة مضيئة كأروع عقدٍ ينام بحميمة على جيد الحسان .
007
يا صاحب النية الصافيه
أولا في البدء بشكرك على تصحيح المعلومة .. والأغنية هي ( الود ) ولعل أبو جهينة من نشوته تداخلت على الحروف ..
Quote:
لكن والله في اغاني كدة الواحد لمن يسمعه، لمن يحس بي دوشة وجسمه يخدر وكرعينو يبردن
|
دا ما هو المجننا نحن زاتوووو
maia
فعلا هناك الكثير من الأغاني تتحكر في دواخلنا وعقولنا .. تتشبث بذكرى أو موقف .. يقفز إليك عند أول أنة وتر .. فتزداد الشجون .. لا زلت أشعر بوخز أغنية لزيدان ابراهيم سمعتها في ربيع مخضرٍ .. مع أن قصتها لا تشملني حينا ولكن كلما يقول ( أقول اصبر على الهجران .. أقول أنساك لابدا ) أها قلبي يفرني .. مع أنو ما كان في زول زاتو عشان يهجرني .. لكن القليب رهيف نعمل شنو ..
بس أغنية عثمان مصطفي موضوع البوست هذا .. وهذا ما أسعى لوضيحه هي نفسها تحمل مشاهدها .. كلماتها كلمات ( فوتغرافية ) كأنها أعدت أصلا لعمل مرئي .. أليس كذلك .
مخرجنا الرائع
Abd-Elrhman sorkati
ويمنحك مما تمنيته لي أضعاف مضاعة
ويا ريت لو تنثر قليلا من رؤياكم حتى تعم الفائدة
ويا ريت لو أمدنا أحد العارفين بشاعر هذه الأغنية والملحن حتى تكتمل الصورة .. يا موصلي ما تقول لينا منو؟
وتسلموا جميعا
تمبس
عفوا الأغنية مسموعة .. ويديك العافيه .. يا لهذا العاقب الرزين .. ربنا يرحمه رحمة واسعة
رحمابي
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الاخ الرحمابي
عفوآ
لم استطع الوقوف بالباب طويلآ
فدخلت دون استئذان
لا أحتمل ان استمع لجميل الكلم والنغم( و أمسك خشمي علي-او بالاصح امسك اصابعي من النقر علي الكيبورد)و
البوست و البوست المصاحب
مليان...مليان...مليان
دموعنا كملن من يوم خشينا البورد وقراية متل كلامكم دة
وسماع اغنيات الوجع دى
سنموت يومآ بالسكتة القلبية ونحن نقرأ أو نستمع
.....ولكن
برضو واصلوا
فنحن نهوي تعذيب انفسنا
لكم الود
حنينة
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
. . [qb]
رحمابي انا من اول يوم نزل البوست دا منتظر واحد ينزل الاغنية دي
الظاهر اني حانزل النسخة العندي حتي لو كانت غير واضحة تماما
يكفي ان الشريط اتمسح من كثرة الاستماع..لا اخفيك سرا لقد كان معي لمدة 13 سنة بالتمام
ولا اعتقد ان هناك تعليق يكفي لمثل هذه السنوات وتاثير الاغنية اعتقد الاستماع اليها يغني عن كل تعليق
ولكم الود
تنقو
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
العزيز رحمابي وبقية الأعزاء
ليتكم وضعتم شارة تنبيه لصاحبات وأصحاب ا لقلوب من نوع كسرة الأمهات الرهيفة.
دا بوست مسيل للدموع ، المشكلة ان البمبان يسيل الدموع ولكن القلب يكون ثابتا ومتحديا اثناء المظاهرات ، أما مظاهرات شوقنا للضفة والنيل فنترك ل ( الجرسة ) فيها العنان. أها يا أبو ساندرا ، البسكت الناس ديل كلهم منو؟ شيل شيلتك.
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: sympatico)
|
رحمابى والبقية
سلامات كتاااار
ما عارفة لكن انا اليومين ديل معلقة معاى
من يوم ما رايتك ضاق قلبى السعادة
فى محراب جمالك واليت العبادة
وبهديك يا جندرية منها
انا حبيت خدودك وحبيت الفصادة
وبرضو كمان بحبك لو خلوك سادة
احبك نور حياتى حب العين سوادها
عاجبانى جدا الاغنية دى وبسمعها كل يوم بصوت عباس تلودى
كنوز
تسلمو
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
sympatico
كم كنا ننتظر هذه المعلومة القيمة .. والآن يزدد تعلقنا وقناعتنا بهذا العمل ولماذا كتب له النجاح المبهر .. وكما ذكرت أنت .. كيف يجتمع هذا الثلاثي دون تعم السعادة كل هذا الحضور بل والغياب .. لك عميق الود وشكري موصل لك أيضا بفتح ذلك البوست والتحية الخاصة لي .. وإن كنت لم اسمع الأغنية بصوتك لدى مشكلة فنية .. أتمني أن اسمعها وحينها سأمر عليك في ديارك .. هناك ، تسلم
dreams
Quote:
انا حبيت خدودك وحبيت الفصادة
وبرضو كمان بحبك لو خلوك سادة
|
يعني يا دريمز .. سيك سيك مشلخة ولا ساده
رجاءً عبرك .. تحياتي لكل بورداب الخرطوم وكنا معكم بكل احاسيسنا .. وربنا يجمعنا معكم على خير .. وتسلمي للطله .. اليس هذه الجملة الأخيرة للأخت شيرى .. ليتها تعود ، وأهديها هذا البوست بأكمله ونقول لها
والله مشتاقين.
الرحمابي
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الرحمابى
رفقة الجمال العالى
مفتون أنا أيضا بصوت المتفرد الذى ذهب مبكرا، الجابرى، ولهذا الجابرى صوت من سلسبيل الطرب النادر، ذهب الجابرى وفى القلب منه حسرات وأمنيات، كنا نود أن يوفيها لنا، لكن دوما الطيبون يذهبون أولا
كنت فى حضرته مساء الأمس وهو يشدو بغناء عذب رقراق ويجسد كلمات كامل عبد الماجد لسيد الإسم
أنا فى العيون ببنيله دارين من مودة ومن منى
وبضمه فى قليبى انبساط ومحبة فياضه وهنا
لا ردت غيره ولا هو راد زولا سواى أبدا أنا
نظراته كيفن بوصفا دى الفى عيونى مدونه
همساته تحنان القمارى الراجعه للعش والجنا
بسماته لو شفتو البروق لحظة تشع تبرق سنا
وتضوى والليل انهزم
الدنيا يا ناس تنقسم
الفرحة تملاها وتعربد فيها والشوق يترسم
وتحايا ملونة ليك ولمبدعى بلادى
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: THE RAIN)
|
رحمابي والشلة الرائعة
لكم مني دفق الشوق والمودة والحنين
اثرتم فينا من كل لوحة شجن
وشربة آكتفيد
ورونا كيف ننزل الاغاني المطلوبة
وحا تكون معاكم علي الهواء في دقائق
طريقة بكري ما نفعت
Browse and up load
وستحصل علي عنوان الاغنية لتنقله في الصفحات الالكترونية
عندي كم اغنية جغمت في صفحات النت
ويكون هسي في خواجة بسمع فيها
من بينهن
اشتقت ليك ساعة المساء
فرد الجناح لملم مصابيح النهار
والشوق شرب لون الجراح
والعتمة نامت في الدروب
والليل لبس اجمل وشاح
في اللحظة ديك اشتقت ليك
شوق السحابة الراحلة
في جوف الشتاء عطشانة
تحلم بالخريف
وبقيت ضعيف مديت معابر شوقي ليك
وحنين حنيني الصافي ليك
واشتقت ليك
علموني كيف انزل ليكم الاغاني
حدي معاكم
حبي انا ليك كان زادي
وكان جوة الحنايا دفين
كنت بداري من الناس
وكنت
دي فيديو خطر لو قدرت اعرف انزلها يا رحمابي
دموعك بجدولن ايها الرجل الشفاف
مع اصدق تعابير حبي لكم
يا جماعة وين شييييييييييييري؟؟؟؟؟؟؟
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
أهل العوض -- أهلنا
والرحمابى وبواسق الناس
التحايا بحجم المحبة، لكم وللوطن
أهل العوض
ساعة الشمس يا دوب بتطلع، وحين يبدأ شجر السنط بإهداء البرم، تراه يبتسم وتتراقص الفروع وكأنها تلون لوحة الأرض بلون أصفر رقيق، ساعتها، يتوقف العمر للحظات هى العمر، ويطول
النازلة ماشه على البحر، ساعة الحلب، وكمان ساعة الملائكة تكون تداعب فى خصلات شعر النجيلة والسنابل الصبية، وعندما تبدأ الشمس إيتسامها اليومى، تأبى الغيمات إلا أن تشارك فى كرنفال العشق والإصباح، فتهب المطر، والشمس شاهدة والله شاهد ونحن شهود
الللللللللللللللللللللللله
مرفأ ندى والله يا رحمابى يتشكل هاهنا، والله أنى أكاد أشتم رائحة الطين والحشائش، وأرى زوجين من الفراش الملون بألوان مستحيلة، جيئة وذهابا وكأنهما يكتبان توقيع الخالق على لوحة اهدانا اياها
ونصلى فى هيكل العشق
والتحية تحملها المحبة، أهديكم
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: Rawia)
|
الحبيب الرحمابى
والاحباب المداخلين
كنت قبل ان اسجل بالمنبر
قد قرات هذا البوست
الجميل وقد لفتت نظرى
معلومة اعتقد انها خطا - حسب معلوماتى - وهى
تتعلق بملحن هذه الاغنية وهو عازف الكمان الشهير
عبد الله عربى وليس وردى كما ورد بالبوست وقد تغنى بها
وردى وعثمان مصطفى لالتباس يحصل كثيرا بين الفنانين
وطبعا كانت النفوس طيبة
ولكم المحبة
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الأخت حنينه
العفريته واحدة من رواد هذا الإشتياق
لذا نعذرها جميعا ونشكرها
الأخت راوية العباسي
أمسكي قوي في عمك تنقو ، وكذك تمبس هما وحدها
يملكان هذا الألق
أنا زول كلام ساااكت
تسلمي مرة أخرى
الأخ عبدالرحمن قوي
ننتظر حتى يتم تأكيد أو نفي هذه المعلومة
أنا شخصيا غير متأكد من صحتها
لك دفق من الود والشكر
عمك تنقو
يا صاحب هذا الفرح والإشتياق
نعمل شنو مع ناس هالة قوتة الحنينة دي
كلنا مشتاقين
تسلموا
رحمابي
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
الأخ .. أحمد
قولوا للنيل ضفة . ضفة
والعشيات لما تصفه
ربنا يهون الليل .. والغربة
عشة بت فاطنة
قنصت ليك ليلة البارحة في النادي السوداني
بس ما شفتك .. لقيت سوما حايمة
ليلة ابدع فيها الشاعر التجاني حاج موسى
بقراءات جميلة لمعظم كلماته التي تغني بها العديد من الفنانين
شكرا يا عشة
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: AlRa7mabi)
|
إخوتي رواد الجمال .. والكلمات المدمخة بريحة الدعاش المشبع بي عبق النال العاول.
لمن شفت عنوان البوست .. بيني وبينكم جيت راخي أضاني عشان أسمع نغمة نغمتين من الأغنية وخاصة بصوت الفنان عثمان مصطفى.
من الواضح أن حنيني لهذه الكلمات هو حنيني لأزمنة محببة.. فهذه الأغنيات هي كبسولة الزمن التي امتطيها في الانتقال الافتراضي التوهمي فأعيش هناك لحظات جميلة قبل أن تقطعها رنة هاتف.
يا جماعة بالله واحد يمدني بريل بلير كان مثبت وضاع ..
تحياتي،،
أخوكم .. جاد
| |
|
|
|
|
|
|
|
|
|
Re: الخدود الشاربة من لون الشفق عند المغارب (Re: الجندرية)
|
الرحمابى
الاخوة والاخوات الاحباب
الحق يقال ان هذه الاغنية دفقة من حنين
اسمعها فتزوى راحة البال ويصيبنى البلبال
الرمال الناعمةتشتاق لى مشيك
الطيور الراحلة فى ضل المساء بتسال عليك
كيف تفارق الضفة والنيل هان عليك
تأملوا معى هذه المحنة وهذه الصورة العجيبة
وماذا لو علمتم اننى من سكان الضفاف وبيتنا على مرمى حجر
من الضفة الشرقية للنيل الاذرق بابى حراز.
شكرا للرائع الراحل اسماعيل حسن وللفنان عبد الله عربى
وللعملاقين وردى وعثمان مصطفى وهم جميعا ينثرون علينا هذا العبير
ولكم الود من قبل ومن بعد
| |
|
|
|
|
|
|
| |
AlRa7mabi
تراث
garjah
ابو جهينة
Elmosley
أبو ساندرا
tmbis
ودقاسم
الجندرية
aboalkonfod
THE RAIN
Abd-Elrhman sorkati
haneena
aba
nazar hussien
Rawia
Giwey
HOPEFUL
ahmed
عشة بت فاطنة
bayan
JAD
فيس بوك
تويتر
انستقرام
يوتيوب
بنتيريست