|
|
 شـعر جــذاب من غير عـذاب
|
اول الحكــي
كنت بحتاج ليك بشده وانت عني بعيد
مافيش عيشه بلاك بتبقى
مافيش بهجه وريد
والهوا الجمبك عرفته
عاطفه ملتهبة وجنون
ماهو باين في العيون
وين ح نهرب مني وين
الهوى البعث الليالي العامره
بي زاد الشجون
الكلام :فضل الله محمد ، الغناء : ابو الامين
___________________________
يخبرونك دائما ان الاشياء التي تفوق طاقاتك يجب ان لا تعافرها ولا تهابشها ..وانت تصرين على ان الذي تحمله بين جمجمتك لا ينقصه شيئا من (امخاخ) الناس التانين .. وعندما تعييهم الحيلة التي يقنعونك بها .. يتشدقون ويغيظونك .. انك مجرد امرأة وفي النسوان فتاة وفي الفتوات مازلت آنسة صغيرة لم تتزوجي .. يا لهذا المنطق الذي يشبه (اضانك وينها) ؟؟ .. وانا اهرب الى الكتب افتش عن النساء الخوالد لكي اثبت ان المرأة لا تقل عقلية عن ا لرجل …ويأتونني بمعجزات اخرى .. المرأة ناقصة عقل دين ووو ..
ذات ضهرية ما _وفي زمان لم اعد اذكر تماما اقريب ام بعيد خالص _والاحرف تتطاير امام عيني ..والنصوص والمعادلات تخرمج عقلي ..رميت بالكتب ولعنت كل الذين اكتشفوا المدارس والاختبارات ..فتحت كيسا من التسالي وقرمشته ، لم يجد ولم يذهب زهجي .. اخرجت رزمة من اللبان ومدغتها ومدغتها وطلعت كل زهجي فيها فما نفعتني ايضا ..ولم تذهب عني (دبرستي) قيد انملة هربت الى الاستريو استمع احدى العبيطات وهي تغني ، كرهتني كوني امرأة وملت للرأي الذي يقول ان النساء ناقصات عقل دين .. وجاءتني اصوات جاراتنا (يتسامرن) مع امي في (صالتنا) لاحظوا معي يتسامرن في عز الظهر .. او دعونا نقل انهن يهرجلن ..وجدت ذلك مدعاة لان اطلع فيهن كل جنوني وعقدي .. الانسان يموت مرة واحدة فقط .. يللاا .. ماذا يحصل .. رابعة العدوية امتشقت سيفها وحاربت .. مهيرة إمطتت فرسها وربطت شعرها الي طرحتها وكوركت في الرجال تحمسهم للقتال ، وبما انني شايقية وربما تكون مهيرة هذه جدتي .. قلت محدثة نفسي والتي غالبا ماتدخلني هذه النفس العجيبة في تشابيك شريريه المسلك اقلاها ضررا ان اتمني ان املك قنبلة زكية من نوع توم هوك اقذفها صوب القصر الجمهوري فلا تقتل الا الذين تسببوا في المنا وماساتنا فقط ، حتى انها من زكاتها لا تهدم حيطه واحدة ولا ترمي كرسي واحد ، اذ انني برضو احتاج هذه الكراسي ، فمن يجلس عليها غيري عندما يسود الفراغ السلطوي في قصرنا الجمهوري وغيظة في الناس البشجعوهم ، اقلع لافته القصر الجمهوري (كدي تعالوا النسالكم ياجماعة انت في القصر الجمهوري مافيش لافته ليه ؟ حتى احضر كرسي وبنفسي اطلع وبي بوهيه بخاخ اكتب عليها الاسم الجديد (بيت الهيصه والكلاوي) لانني واثقة انه عمرنا ما نتعلم كيف نمارس حكم انفسنا بروح عادله او حتى متسامحه دون ان نضطر لان (نفجخ ) بعضنا مثلما قيل هنا .
المهم دعونا من هذه المدعوكة المسماة خطأ سياسة ، الله يقصها قصاص الحبان ، وقلت لما لا اقتدي بها ؟؟ وكنت قبل مدة قصيرة جدا أقرأ كثيرا في كتب الحديث والسيرة والتاريخ .. ولما رأيت جاراتنا يغتصبن (وقت) رجالهن ويضيعن مجهوداتهم ويطيرنا فلوسهم الاصلن هي طائرة ..ولما رأيت المرأة السودانية المغتربة ، على هذا الحال لا تتغير ابدا .. من ملايات الى تياب باب شريف وياقلبي لا تحزن !!
ثم تنتهي الى مجرد امرأة متذبذبة بين الاقامة والتلصق مع زوجها رغم سوء الحال وارسال اولادهن الى الديار وحيدين يدرسون .. تتجاذبهم رياح الهوى والممكن والمستحيل ..
وبما انني اصلا متحيلة وغالباني القراية وغالبني الاعملوا والمتحيل بتبكيه الريشة .
نويت عليهن يفكهن الشديد القوي الليلة مني ..
ثم اني فكيت بلبلة شعري المعكوص مثل شجرة صبار الى صنقوع راسي ، وابدلت نظارتي الزرقاء حتى تظهر تحميرة عيوني التي اصلا من السهر مثل شجرة حهنميه ..ولبست (البوت) الذي ينتهي عند ركبتي .. وتحوقلت وشرعت انادي الىّ ال سجم ، الىّ ال رماد الى آل عواليق
هلموا الى يا نشامي ، اليوم يوم الحاره في الوقت الذي اكان من الفصاحة ان اقول اليوم يوم الترطيبه لانو الجو كان باردا من اثر المكيفات التي كانت مدورة من امس ليلا
والله اكبرعلى من طغي وتجبر..
شكلي يشبه شكلي ، جني يشبه جني .. حتى ملابسي التي ارتديها رأيت انها تشبهني .. واظنني استغربت شوية كيف دخلت في هذه الهدوم .. ونفيت بذلك هذا التساؤل واثبته بالبرهان .. يا بت يا شيري انتي مجنتره ؟؟ كيف يعني ما هدومك ماهو مقاسها قدر مقاسك .. وتذكرت مادة ( مدخل الى علم الجولوجيا) واتجننت اكتر .. وبدأت اغني مع المغنية (يا الدكاتره يا السته .. اكشفوا لي النفس المسك حته حته ) رغم ان السودان كله منفردا او مجتمعا مع السعودية لا يمكن ابدا ان تجد ستة دكاترة في نبطشيه واحده ، ومع مشيتها ليها هذه المغنيه الهبله ، لاني لحظتها اكتشفت انه لا يمكنني ان اصبح مغنية ولا مؤذية ..
جاءتني من الباب الموارب قهقهتن وجوطتهن التي تفوح منها قطيعتهن .. نظرت الى شكلي وجدت انه لن يقنعهن …بالذي نويت ان افعله .. نتفت من شعري (البُلبُلة) وبيد واحدة جعلت تسريحة شعر الحصان خاصتي تنقلب الى وش العفريت .. وجري شعري كل خمسة شعرات اقمن تحالف ضد الاخريات وانفرقن دون ان يكون هناك رسم لخطوط الاممم المتحدة التي تقيمها بين الدول المتحاربة .. توجهت اليهن والنظريات العلمية تفور برأسي فوراً …
|
|
 
|
|
|
|
|
|
|
|
Re: شـعر جــذاب من غير عـذاب (Re: shiry)
|
هذا الراس المدوقـس يصلح فقط للخصام
كن يتحدثن بصوت واحد ويستمعن في نفس الوقت الذي يتحدث فيه كلهن .. لم تشأ أي واحدة منهن ان تعطي الاخرى فرصة للحديث وتستمع هي ، ثم تاخذ ما تبقى من الحديث لتكمله او تعلق ان طلب منها ذلك .. واردت ان اتدخل لافض هذا الاشتباك الكلامي .. وجدت صوتي ذاب وانصهر في تيارات الكلام المتطايره .. وقلت وانا اعزي نفسي كوني لم اسمع الا نفسي . (( هو عليك الله انا اقول الكلام دا لي منو؟؟ )) .. وكمن وجد ضالته هتفت وجدتها وجدتها وهرولت ناحية مكتبتي وخطفت الكتاب وفتحت صفحته .. واقسمت متحدية ، الليلة يا انا يا انتو .. كدي النشوف اخرتكن شنو .. ح تسمعوني ولا لا ؟ ولمحت في الركن طاولت المكوة تتمدد في دلال ،وفي ثواني كنت ارتقى واحتل الطاولة وانا اعتقل اسماعهن واجرهن الى ساحات الصمت المطبق المعقود بدهشة تهبل .. وبما ان سقفنا كان بعيد ، فان رأسي المزعمط لم يلاحق (المروحة) وحمدت الله ان السقف كان بعيدا ، وقرأت بصوت عالي جداً (( االنساء ناقصات عقل ودين .. ..استوصوا بالنساء خيرا .. خلقت المرأة من ضلع اعوج …فان رحت … كسرته الخ )) ايتها (االنساء الغبيانات) انصتن اليّ جيداً ،هذا اليوم هو يوم التوضيح .. كفاكن كلاما .. اخبروني ماهي الفائدة التي تجنونها من قعدتكن منذ الواحدة ظهرا .. انني على يقين ان أي واحدة منكن لم تستفيد من هذه الونسة .. كل الشمارات التي تداولتونها ، كلكن يعرفنها .. تأتون لتتفرجن على وجوه بعضكن البعض وتسألن عن الكريمات . الملايات ، الدهب … وحينما تخلصن من هذه تبدأن الشناف للغائبات منكن .. حتى اذا ما خلصتن من القطيعة بدأتن في المقابل تمدحن في انفسكن .. ورجالكن واولادكن وبناتكن ..وتسوقن العبط بتاعكن على انكن احسن نساء المدينة .. ياخي بلا خيبة ..رجالكن مديونين .. كروشهم تهدلت من مطالبكن والذين تبقى في رؤسهم من شعر اصبح قليلا مزعماً يخالطه الشيب .. من كثرة مطالبكن الثقيلة والتي لا تنتهي ابداً ..كل واحدة منكن تتدعي ان زوجها احسن من زوج الاخرى واولادها احسن من اولاد الاخرى .. وتتفشخرن .. بالذي تملكونه في السودان .. بيتنا في قاردن سيتي ثلاثة طوابق ، لا نحن ابونا قال امدرمان ما بتنفع معاهو .. اشتري لينا بيت في الصافية 250 مليون جنيه ..لا مزرعتنا مساحتها 12 فدان .. لا نحن مزرعتنا اكبر مساحتها50 فدان .. لا ولدي اخدوهو في هندسه ستة اكتوبر ، لا انا ولدى طلع الاول على دفعته في كلية الهندسة بالجامعة الامريكيه ... بتي جابوا ليها شيلة 40 ، 40 ولدي فرتكان..
حقيقي حقيقي ومن غير مجاملة انا كرهت اليوم الذي ولدت فيه (بنتا) ..ياخي عديل كده انتو بتزهجوا وبتكرهوا وماعندكم شغل ولا مشغلة …لكن اقول ليكن !! هذا هو طرفي منكم ، ومسكت (بلوزتي) ونفضتها الى الخارج .. كناية عن التنازل لهن عن حصتي في تاء التأنيث وتطليقها طلاق ثلاثة ..
ونطيت من طاولتي وانا اتخلى عن سطحها نهائيا … وفي ثواني كنت اقف في الباب ، ومنه شتت الى غرفتي .. واستلقيت على فراشي .. وحتى هذه اللحظة لم اسمع أي تعليق ولا همسا .. لا ادري ما الذي حدث من بعد مفارقتي اياهم .. غير انني لم اسمع أي تعليقا حتى ولا كلمة .. وقبل ان استعيد تفاصيل غرفتي جيدا ، وجدتها قد امتلأت بالنسوان …. وتتقدمهن امي وهي تفتش في رأسي وعيوني واذني ، وجسمي وهي تبكي .. وتبعتها صديقاتها ، بالبكاء قليلا قليلا حتى انقلب البكاء والنهيج الى عويل وصراخ .. يا خسارة عقلك يا شيري ..
واكثر ما حيرني في كل هذه الجوطة .. عن أي شيء كانت تفتش اولئك النسوة وهن يقلبن رأسي وشعري وجضومي .. لا تحبطني وتقل لي انهن كن يبحث عن رأسي اقصد (عقلي ) اقصد مخي ؟؟..
وكل الذي خرجت به من هذه الشغلانة ، انني اعفيت من غسيل العدة وعمل القهوة .. والمذاكرة طوال اليووووووم..
وكل عام والنسوان ناقصات شغله وفارغات
الكــلام الماخمج
قمة الحيره ان يخبرونك ان مقعدك ركنا في طائرة مستديره
وقمة الحماقــة ان تقلب الطيارة فوق تحت
وتجد هذا المقعد
| |
|
|
|
|
|
|
|
|
|
Re: شـعر جــذاب من غير عـذاب (Re: bayan)
|
سلام مربع
خالتي د/بيان
عارفه كل يوم اصدق
انو حبوبتي دي ماكانت مره ساهله
خاصة لمن اعاين
فيهو وما اتامل
بالله عليك الله كدي افتحي الجريده
وشوفيهو تاني
موش بالله
مدفـــع الدلاقـــين
....
....
......
الليلة والليلة ..
موش قالوا لينا ماتتكلموا في السياسه
؟؟
| |
|
|
|
|
|
|
|
|
|
Re: شـعر جــذاب من غير عـذاب (Re: lana mahdi)
|
سلام مربع
لنا مهدي
طيب ايه رايك تجربي
بنتــين
ولا
هد اند شولدز
غايتو عن نفسي بحاول جادة
اقتحم علبة الشامبو نفسها
يمكن اطلع منها زي ماطلع
جني علي بابا من الفانوس
ولا اشيل غلاف علبة الشامبو نفسها
والصقها على شعري
يمكن ينفع
بس المشكلة كيف نحركه
كلما نسنس من الغرب هبوب
؟؟؟
| |
|
|
|
|
|
|
|
|
|
Re: شـعر جــذاب من غير عـذاب (Re: lana mahdi)
|
شوفتى يا بنايتى
معضلة الشعر دى اسألونى منها انا خمسين عاما
وانا عايزة شعرى ما يمشى لفوق
انا شعرى دا دمر كل نظريات الجازبية
يتجازى نيوتن
بدل التفاحة ما كان يقول الشعر
اها كدى النوصيكن
الكركار بس
هو البنزل الشعر دا لى تحت
لانه فيهو ودك والودك تقيل
والله جد الشعر دا معضلة
انا بتى كل يوم تجى من الروضة
تبكى عايزة شعرها يبقى زى شعر الصينين
طبعا عيلة عمرها اربعة سنة ما ممكن اكلمها عن الجينات
وعن انه نحنا هجين عربى افريقى
المهم قلتا ليها
ليه هى ما تأثر على الصينيات
ةتخليهم عايزين شعرهم يمشى لفوق بدل لتحت
المهم نجحت الفكرة البت عملت غسيل مخ للفصل كلو
واسع بقينا نمرق حق حلة الملاح
اى زول عايز
يلمس شعرها الماشى لفوق يدفع دولار
| |
|
|
|
|
|
|
|
|
|
Re: شـعر جــذاب من غير عـذاب (Re: bayan)
|
سلام مربع
د/بيان
لوووووول
والله ضحكتيني لمن اصابتين كحة هرسه صدري
اسمع هم الصينيين ديل
موش متنازلين عن بقية الاسره
يعني عندهم مولود واحد
طيب وين الفروقات
خليها تطالب بشعر المواليد اللي كانوا مفروض
يتولدوا وقاموا اتوقفوا
هاهههاهاهاهاهاهاها
تاخد بدل فروقات مواليد
عاهاهاهاهاهاها
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
يا شيرى
الفنان هو من اعطى للمراه اعتراف بوجودها
الفعلى اكثر من المراه نفسها
خليل فرح دافع عن المراه فى كل اعماله
الغنائيه
عزه قومى كفاك نومى
ما كفانا دلال يومك
00000
انت يا الكبرتوك البنات فاتوك
فى القطار الفات
00000
قومى من بدرى
ودعى الخدرى
العمل ناداك
0000
ما يحيط بالنساء من دائريه اجتماعيه والتزامات
ايضا اجتماعيه المراه هى الماقدره تنفك من هذه الدائريه
كيف الحلل ؟
كدى اسالى ام مازن
وحقيقى بوصيك خلى بالك من نفسك الارهاق الفكرى من اصعب الاشياء
وكل من يتمرد عن هذه الدائريه النسائيه وهو الصحيح فى نظرى
ولا اقصد التمرد التطرفى انما التمرد على عاديه الاشياء
بيكون فى نظرهن جديد غير مقبول لكن بمرور الزمن ووعيكن
وصبركن الصراخ سيرد صداه
الله يحفظك يا شيرى
| |
|
|
|
|
|
|
|
|
|
Re: شـعر جــذاب من غير عـذاب (Re: HAMZA SULIMAN)
|
سلام مربع
موسيقارنا الفنان
حمزه
ده كلام صحيح ، انو كل جديد غير مرغوب
او بمعني اخر
نحن نتخوف على الدوام من
استشراف المستقبل
ويشترك مطلق الانسان معنا
في هذه الاشكاليه
ويبقى من عمل المراة دائما
هو ركونها الى الاشياء الفارغة
رغم انها تعرف جيدا ان هذا التصرف
مثلا ، ليس منه فائدة
كظاهرة شراء اثواب ، هي تعرف انها لن ترتديها هنا
مثلا ، حيث اسكن او نكن واضحين ونسميها
السعودية
وهي تعرف انه ربما لاتحين لها فرصة نزول
الى حيث يمكنها ان تلبس هذه الثياب وتتفشخر بها
في اقل من ثلاث او اربع سنوات
علىالاقل
والذي يغيظك اكثر
انها تعرف سلفا ان هذه الثياب هي نوع من الموضه
والموضه مثل ما كلنا يعرف مواسم
لا اكثر ولا ا قل
نحن نسبح في اشكال من هذه التناقضات
كنساء
سلمت ياسيدي للطله البهيه
وسلمت اكثر للمشاركة الفعاله
| |
|
|
|
|
|
|
|
|
|
Re: شـعر جــذاب من غير عـذاب (Re: زوربا)
|
سلام مربع
زوربا السوداني
من عيني يا شفيف
بس المشكلة
انا بكره ملاح الباميه
موت
وهذه هي اشكالية
النظره الذكورية الامره
التي لا تقدر
ابدا حجم التضحيات
التي تبذلها المراة
من اجل استقرار بيتها
ومع ذلك وفي اوقات كثيرة
تكون هي اول من يهدم هذه المكاسب
خد تكنيك نسائي غريب جدا
هو يابت خليك نجيضه وراجلك دا نضفي ليهو جيبوا اول باول
عشان مايجيب ليك ضره تقعد على قلبك
؟؟
وماذا وراء هذا الخراب
سنين متراكمة في غربة لا ترحم
تنتج اسره ضائعة
لا شيء لا يسند ضهرها
اذا ما اضطرتها ظروفها للرجوع
من حيث جاءت
؟؟
شفت الاشكالية دي
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
شيري بنيتي
انت بخير وما عندك عوجة ؟
أنا مش في كلام أم شيري وجاراتها ولا في كلام شير وحكايتها وطلعتها فوق طاولة المكوة ، أنا لي ساعة عايز أصل حتة بوست أ ريبلاي ما قادر ، ولمن نفسي قام مرة تسلملك لمرة وانت تسوي ليهم حبابك يا خالتي وأهلا بيك يا أختي
فقلت أن
النساء طويلات لسان وبال
وإذا اجتمعت طولة اللسان وطولة البال يكون الواحد لايوق
ومن هنا وصلت إلى أن النساء لوايييق
أعود إلى موضوعك
هل نساء المغتربين في هذا الوضع بسهمن في فعل شئ لأنفسهن ، لأولادهن ، لوطنهن ، لدينهن
منذ انضمام أم قاسم إلى فبل عشرين عاما لم تتطلع على جريدة ، ولم تقرأ كتابا وتنظر إلي شذرا وأنا انتقل من موقع إلى موقع في الشبكة العنكبوتية ، وأحدثها عن البورد فتقول لي انتو فاضين ، أحاول الكتابة فتوقفني عنها بطلبات البيت ، عندما أتأخر في العمل تربط القيامة وتقوم ولا تقعد بسبب إنك ما سائل في البيت وتاكلو علي كلو
المشكلة إنها ماعندها جارات وماعندها شلة قطيعة وبالرغم من كده هي مشغولة طول اليوم ، معفاة من الحنة والدخان يمكنها أن تطبخ مرة أو مرتين في الأسبوع فأنا لا أطالب بالأكل الجدبد بصورة مستمرة .
قبل فترة لقيت ليها شغل أربعة ساعات في اليوم وبمرتب معقول ، قالت لي انت مجنون أنا أخلي البيت ده لي منو ؟ جبت ليها شغالة طفشتها لأنها ما بتعرف تنشف العدة مظبوط وخلت ليها كبايتين اتشبكوا في بعض زما اتفكوا إلا بموية حارة
نادتني ، سأقوم إليها وبعدين أرجع لكم
| |
|
|
|
|
|
|
|
|
|
Re: شـعر جــذاب من غير عـذاب (Re: ودقاسم)
|
سلام مربع
ود قاسم
هاههاهاههاهاها
اضحكتني جدا
انت تتحدث عن امراة اعرفها
خايفه اقول ليك امي
تجيني يد هون ولا كرسي يخرب زينتي
انا ذاتي ماشه اشوف الحاصل
شنو
وجايه راجعة
تاني
هاهااههاهاهااهاهاه
| |
|
|
|
|
|
|
|
|
 Re: شـعر جــذاب من غير عـذاب (Re: shiry)
|
سلام
إلى صاحبت السلام المربع
عارفة باندوث بكرى ما في
شئ ملا غير سلمك المربع دا
مواضيع الحلوة البتكسر رقيتى
ياشيرى الزمن زمن سندوتشات
هارديز البشلوها من العربية
وعلى بال ما العربية تنزل
تكون شاربتي البارد زاتووو
عارفة أخواتنا السوريات بقول الشعر
المكسبر دا انتو بتكسبروه كيف
كملو البيض عشان كسبرت
الشعر
| |
|
|
|
|
|
|
|
|
|
Re: شـعر جــذاب من غير عـذاب (Re: almohndis)
|
شيرى
تحياتى
تعرفى مرة طالعين من سوق فى نيو دلهى وكانت ماشة قدامنا واحدة هندية رابطة شعرها ضنب حصان جارى لعند الشبشب ,فقلت للشاب المعاى اسحر ليك شعر البت دى قال ايوة,قلت:- ليه زى ذيل حصان امرء القيس
ضليع اذا استدبرته
سد فرجه
بضاف فويق الارض
ليس باعزل
بس شعر الهنود مش زى الصينين عشان النسيم ممكن يبشتن شعرهن
اما الصينين خصلته سميكة يعنى الشعر مع الهواء يطلع وينزل زى العربية الشايلة ليها قصب لما تمشى فى الطريق الغير مسفلت
بس دا كله مش محيرنى
انا متحير انت بتجيبى الكلام دا من وين وبتكتبى متين ما بتنومى ولا شنو,ما عندك غسيل عدة وكمان قلت البت الواحدة وسط غابة من الاولاد
الله اديك العافية وانت هترشى ونحن نقراء
تعرفى ياشيرى انا بدخل على الموقع دا من الدوام وما عندى زمن فى البيت بس لو تابعت هترشتك دى المواضيع التانية ما بتلقى منى نصيب
وتسلمى يامبدعة
| |
|
|
|
|
|
|
|
|
 Re: شـعر جــذاب من غير عـذاب (Re: shiry)
|
الحبيبة بيان
وصفتك ممتازة
شيرى الحبيبة
ودقاسم
حبيت اداخل فى بوستك بتاع غدا العزابة لقيت مطالب العزابة هناك ولا مطالب الحكومة فى مشاكوس
قلت فى سرى
الله ليك يا شيرى
و انسحبت براااااحة
| |
|
|
|
|
|
|
|
|
|
Re: شـعر جــذاب من غير عـذاب (Re: lana mahdi)
|
الزعموطه وهتروشه
الجميله شيري
Quote: واكثر ما حيرني في كل هذه الجوطة .. عن أي شيء كانت تفتش اولئك النسوة وهن يقلبن رأسي وشعري وجضومي .. لا تحبطني وتقل لي انهن كن يبحث عن رأسي اقصد (عقلي ) اقصد مخي ؟؟..
|
لم اشاء احباطك ولكن... للأسف نعم كن يبحثن عنه
والسبب يا عزيزتي
.
.
.
اردن تقسيمه بينهن قسمة ضيزي
.
.
.
والجساس يملئ شبكتو
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
العـزيـزة اللـذيـذة شـيـري ســلام و إحترام
و الله بتجيبي المواضيع دي من وين أنا ما عارف لـكـن كلها جميلة
النـضـم دا كـلـو بتجيبيهو من وين الله أعلم لكن كلوا نضم حلو
أسلوبك ظريف جـدا و ساخر جـدا خاصة لم تتكلمي عن نفسك غيرك
بتكلم عن نفسوا عكس الكلام اللي إنتي بتقوليهو دا .
بوستاتك بتجبرني غصبا عني أدخل فيها و لأني ما بحب المواضيع
الطويلة لكن مواضيعك كلها مطبوعة علشان أقدر أقراها كويس
و كتيرين معاي بقوا مرضانين بي بوستاتك.
الله إديك العافية و إحقق ليك كل أمانيك .
و تسلمي .
| |
|
|
|
|
|
|
|
|
|
Re: شـعر جــذاب من غير عـذاب (Re: benyya)
|
يا شيرى انت لسع صغيرة وجاهلة
فى موضوع نضيف جيب الراجل عشان ما يجيب ليهو
ضرة
دا موضوع حيويى وخطرى
انا مشيت السودان
لقيت فى شعار
سيدتى
توفيرك لزوجك يعنى توفيرك لضرتك
واها ودحين حبوبتنا كانن بيقولن من الشمارة
للخمارة
يعنى يا بتى دى حكم متوارثة
كابر عن كابر
فى بيتنا الفى البلد
فيهو 9 اوض ويقال لها عوض
وعرفت ان بعض هذه الغرف بنيت لمان
التمر جاب قروش زيادة
عشان جدى ما يفرح ويجيب لحبوبتى ضرة بقت افلح منو
كل ما التمر يجيب زيادة
هى تجيب الطيانة
بعد دا كلو يجو الرجال يقولو هم اذكى من النسوان
دا سر يا شيرى يا بتى
نحنا اذكى منهم بس بنتظاهر اننا اغبياء
عشان الايقو بتاعهم
بالله ما تلكمى اى راجل
| |
|
|
|
|
|
|
|
|
|
Re: شـعر جــذاب من غير عـذاب (Re: bayan)
|
سلام مربع
خالتي الحبيه
ذ/بيان
نسيبهم في عماهم احسن
اتخيلي انا مراقبه الحته دي كويسه
وكل يوم بكتشف
شيء يمخول عديل كده
في تكنيك اسمه
شغل نســـوان
تحت تحت
دا علم مفروض يدرس في الجامعات
عشان يااااامنوا
| |
|
|
|
|
|
|
|
|
|
Re: شـعر جــذاب من غير عـذاب (Re: ABUHUSSEIN)
|
سلام مربع
خوه الصفاء
وصحبة الورد
سلام مربع
المهندس
انا ذاتي نفسي اكتب شوية
شويه
نفسي في يوم من الايام
اكتب حاجة وتطلع
زي ساندويتش الهامبرغر
واحد وعشرون سندويشت
مايسدوا رمقك
حلوه رمقك دي
كنت عايزه اكتب الظما
لقيت انو اللغة تعطش
وقلت احيييي انا من لوايقتي دي
يعني لازم اكتب الكلام دا كلو
عشان ارد ليك
ايه رايك اقول ليك
اظني مابرااااي زي مابتقول بت قضيم
دا اهم استنتاج
اتخيل لي بنتظروهو ناس
هوبليس وابو حسين
سلمت ياسيدي للاطراء
ابو قوته
الغريبة يا قوته الناس ديلك اصلوا مابنسحروا
والمحيرني اكثر انو شعرهم كل يوم بقوم
واتخيل لي لو مازيت الدابر
البرشوه بيهو دا ،والتوكات
والربط البعكصوهو بيهو
اتخيل لي كان زمان طار بصاحباتو
مثل طير الرهو
حصل شفت طيرة الرهو
انا ما شفتها عشان كده
كتبتها هنا
انا علي اكتب وانت علي تعرف
ايه رايك ..
نصف شغالتنا السيرلانكيه ، تعرف انها من عقدي المتاصله فيني
لذلك كثيرا جدا ما تنشحط في مرايتي وهاك يا تسليك
وهاااك يا شد
وفي احيان كثيرة تناديني عشان
اثبت ليها الشعر
مايطير بها
انشاء الله اريتها بطيارة سودانير
عارف ياسيدي انا ذاتي ماعارفه
متين بكتب الك
هوبليــس
عديل كده ياهوبليس
تحدفها في وشي
طيب انا مخاصماك
وماشه من دربي دا
اشتكيك لي ماما بيان
ابو حسين
غريبه الليلة يا ابو حسين
مالك ؟؟
حاسي بي حاجة
ما من عوايدك
الحنيه دي
سلامتك والبورد كرامتك
حصل شنو في الدنيا
بلغ كتير من سلامي المربع
وكتير من تحياتي
لكل الذين يسالون عني
سلمت ياسيدي
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
شيرى اللذيذه
اتحجبوا ياختى .. افضل وسيله ليكون شعركم جذاب وبلا عذاب
انا اتخيل لى انو انحنا الوحيدين الشفعنا بيبكوا من التسريح
بعدين مفروض شركات الشامبو دى تجيب لينا سودانيه مننا فى الدعايه
ويدخلوها فى برميل شامبو وبعدين تقوم كدى وتفر شعرا بعد التحسين
زى الحرير ...لوووول عشم ابليس فى الجنه
لكن برضو تعرفى نحن بنحب الخدار والشعر القصار
وكمان خدره وعليها بدره .. تكون فى السلك
وركزى على الودك زى ماقالت بيان
ماسمعتى صلاح ابن الباديه بيقول
سال من شعرها الودك
لوووول
ديكو
| |
|
|
|
|
|
|
|
|
|
Re: شـعر جــذاب من غير عـذاب (Re: DEEK_ALJIN)
|
سلام يا شيرى
بس خلى بالك
الايام دى حايمة اشاعة
انه حواء
هى الاتخلقت اول لكن عشان
الجماعة مايزعلو
قالوا ليهم انتو الاول
وطبعا بنظام شغل النسوان
النسوان عارفات وساكتات
قومة النفس فوق كم
خليهم يعملو فيها هم الاول
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
شـيـري ســـلام و إحـتـرام تاني و تالت و رابع و خامس
يعني يا شيري لا أسـود عجبك و لا أبيض عجبك نجرب الرمادي و لا شـنـو ؟؟؟؟؟؟؟؟؟؟؟؟؟؟
يا شيري الحقيقة غصبا عننا نقولها و تسلمي
و حـقـك علينا نقول ليك رأينا فيك يا ست الناس
| |
|
|
|
|
|
|
|
|
|
Re: شـعر جــذاب من غير عـذاب (Re: shiry)
|
سلام شيري
ابداااااع
انتي من افضل الاقلام التي اقرأ لها وربما تكوني الافضل
لك التحيه
عن شعر الصينيين امس شاهدة في التلفزيون انهم لما يلدوهم بيحلقو الشعر ويعملو فرش رسم
وبيهدوهم الفرش دي في اعياد ميلادهم ومناسبه الزواج
اما بمناسبه شعر بناتنا انا عندي ليهم فكرة مفروض لمن الواحدة يلدوها اهلها يربطوا ليها في شعرها متقلات عشان ينزل لي تحت
لكم التحيه
| |
|
|
|
|
|
|
| |
shiry
lana mahdi
bayan
HAMZA SULIMAN
زوربا
ودقاسم
almohndis
abuguta
ABUHUSSEIN
benyya
Tumadir
فيس بوك
تويتر
انستقرام
يوتيوب
بنتيريست