|
|
 المكالمات الهاتفية في المواصلات الداخلية (حول أدب المهاتفة)
|
وفى المواصلات العامة تحدث العجائب والغرائب من الرُكاب
النغمـــــة: اسرار بابكر (انا سوداني)
مستوى الصوت:ساوند سيستم
صوت ذكوري (وارد الجزيرة) يرد: هلووووو ، كيف الحال ، حمدلاى، والله الغش دا جابلو اربعمية الِف ، واللاي انا قتا اخير نبيعو،، آزول السوق كعب خلاس ، اها ناس الحلة كيف ؟ مافى عوجة تب
يفتح قزاز الهايس ويتف سفته
يرجع القزاز ويشمر عن ضراعه الايمن ، اسمع ، بحول ليكـ رصيد تمانين الف اديها للاولاد(والمقصود بالاولاد هنا المدام او المرة او الولية)
اها بارك الله فيك
|
|
 
|
|
|
|
|
|
|
 Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
شكرا شمائل
هذه النوع من التصرفات يجعلني دائما أطرح على نفسي أسئلة :
هل نحن شعب غير متحضر ؟
كم يلزمنا من الوقت حتى نصل إلى ما وصلت له الشعوب الأخرى الكريمة من التحضر والرقي ؟
هل تنقصنا المعايير والمقاييس السليمة لتعاملنا مع الأشياء ؟
أنت حين تتحدث بالهاتف المحمول كأنك تتحدث إلى شخص يمسك بشحمة أذنك ... إذن لماذا الصراخ حتى يسمعك الغاشي والماشي ؟
وقس على هذا فالمعايير كلها عندنا مقلوبة وحالها مائل.
وبمناسبة السفة ما هو معاييرنا للنظافة هل هي نظافة الجسم فقط أم تتعداه إلى نظافة الملبس والمكان والمشرب والمأكل وغيره.
أفيدونا أفادكم الله
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
النغمة: عصام محمد نور (ياروعة)
مستوى الصوت: مناسب
صوت نسائي يرد: الووووووووووو ، مرحبا ، اهلا ، كيف اخبارك ، تمام؟ ، منو معاى (معقولة بعد القصة الطويلة دى كلها منو معاى؟)
اهلااااااااااااااااا يامعتز (الصوت اخد منحى آخر أكثر انوثة ومياعة لزوم معتز وكدا)، كل سنة وانت طيب ، مالك ماجيتنا ، مشتاقييييييييين والله (الهايس كلها عرفت انو الزولة دى مشتااااااقة لمعتز) والسواق ماقصر نهائي خفض الصوت عشان الزولة تتكلم بارتياح
عمنا الراكب وراها دا ضاقت بيهو الواسعة وبقى يبرم فى شنبو ويتحنفش ،، وزولة معتز مازالت ترسل القهقهات فى التلفون والله بعد عرست بقيت كعب خلاص يامعتز ،،، الليلة ووب ، عمنا دا خلاص بدا يتململ الوضع ماعاجبو نهائي وانا عايشة على اعصابي واشيل واقول (يارب الشبكة تطلع فيها كديسة وتبوظها فجاة) والله زولة معتز ولا على بالها ، يحلوها كيف دي؟؟
الحمدلله الزولة نزلت وهى بتتكلم مع معتز اول مانزلت عمك مسح على وجهه (لزوم التوتر)
والله غلبنا النسوى مع البنات ديل؟؟ كلام فارغ
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
النغمة: فرفور (المشكلة)
مستوى الصوت: خليهو بس
صوت ذكوري (موظف دولة) : آلو :عليكم السلام ورحمة الله ، يا بابكر ،كيف حالكـ ، اسمعني انا الموضوع دا رايي فيهو واضح وكلمتكم وانتو مادايرين تتفهموا الوضع : انا شايف انو سمية دي تطلق بالمحكمة ، طالما اخوانا ماوقفوا معاها ، وهو بلاى امجد دا ات حاسبو مع الرجال (الموضوع جاب ليهو رجالة) ، مايفوتكم انو الـ 13 راكب الباقيين سامعين تفاصيل المكالمة
ولاى يابابكر وعلى الطلاق سمية دي وقفت مع اخوانها ديل وقفة رجال لكن الله غالب
خلاص انا هسه فى المواصلات برجع ليكـ
(ياربي راجع لشنو بعد كدا)؟؟
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: سجيمان)
|
شمائل
كل سنة و إنت مشمولة بالعافية و بالخير و الأسرة الكريمة
تعرفي نوع المكالمات دي بتذكرني بالمثل البيقول ( بلدا ما بلدك إنطلق فيها عريان ) ...
حيث يكون المتحدث في مأمن من أي معارف أو جيران أو أصدقاء أو أهل فيطلق العنان لكل خصوصياته ..
تخريمة أولى : واحد إتعرف على واحد في البص عندما سمعه يتحدث عن خصوصيات تخص واحد هو بيعرفه .. و المتحدث لم يفطن لوجوده .. فكان موقفا محرجاً للغاية
تخريمة ثانية : في البوست داك قلتِ : أنا قايلاك شاب ... ( و الدهن في العتاقي يا شمائل  )
أخوك لسع في شبابو .... دعواتك
تحياتي
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
الحافلة بشارع الحلفاية ..
التلفون الأول بت جامعة ..
الو .. اهلا ..
انت وين
انا في الجامعة وبرجع زي الساعة خمسة كدة ..
وقفلت الخط ..
الراجل التاني ..
الو .. زول بيهناك .. اتأخرت ليه؟
هو: لا لا انا قريب ليك في الشهداء ...
خمسة دقايق معاك .
ـــــــــــــــ
تلفون تالت
ألو بابا ات وين ...
والله انا ما عارف روحي في الشهداء ولا الجامعة
وضجت الحافة بالضحك ..
وفيها كضب أمام الجميع يا شمايل ..
وكل سنة وانت طيبة
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: نيازي مصطفى)
|
شمايل ازيك
بوست خفيف من بدايته لنهايته...
السؤال؟
الزول اول واحد ده شمر ساعده ليه..عشان حيحول رصيد ولا عشان قفل القزاز
عمنا الكبير الكان مصاقر البنية وهي بتلوم في معتز هل كان متضايق من الحنك ام حاقد علي معتز
الزول موظف الدولة ده عايز سمية تتطلق في المحكمة يعني ما فارقة لو قال الكلام في هايس ولا حافلة كوستر
من الحاجات الضحكتني شديد من التعليقات:
Quote: بوست مسئ للشعب السوداني
ومسئ للصعوط
انا ما عارف بكري دا ما بيسحب بوستات زي دي ليه؟؟...... |
| Quote: والله انا ما عارف روحي في الشهداء ولا الجامعة |
| Quote: ناس امستردام ديل دوما مفترين على ناس الجزيرة |
يديكم العافية
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: عبداللطيف حسن علي)
|
شمايل ,, بت القبايل ,,
كل ثانية وانتى طيبة ,,
| Quote: يفتح قزاز الهايس ويتف سفته,, |
اها نقول كدى نحن درون,,
آها ,, انا متخيلك ضاربة البتاعة ,, وفى العصرية كدى راكبة ليك حافلة ,, ورن تلفون الزول/ ة اللى جنبك ,, ومن قوة البتاعة طاف بيك الخيال واحات ورك فى واحة بكرى لتتحفينا بهذا البوست الحلو ,, ولكن أغلب الظن أن ذلك التلفون أزال حالة الاستمخاخ ,,فكانت منك تلك الغضبة المضرية ,,
تعرفى أنا لوكنت مكانك كان عملت فيه شنو?? كنت فكيتو بفردة الجزمة زى ماعمل الصحفى العراقى,,
انتى تعرفى ياشمايل أنا اللى بيغيظنى فى المواصلات العامة شنو??
النوع اللى تلقى درجة الحرارة بره الحافلة 40 وجواها 45 يقوم يولع سجارة
دى انا زمان كنت بروح فيها القسم طوالى,, وفى القسم تلقى العسكرى ذاتو مولع سجارة ,, غايتو الشكية لـى الله,,
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: عبدالعزيز الفاضلابى)
|
شمائل سلامات
والله انا من وارد الجزيرة لي اخر سطر بضحك اما الاخ البيسأل
Quote: كم يلزمنا من الوقت حتى نصل إلى ما وصلت له الشعوب الأخرى الكريمة من التحضر والرقي ؟
|
ارد عليه بطرفة رواها السيد الصادق المهدي في اواخر التسعينات
قال سال سعودي الكمبيوتر متى ينصلح حال بلادي
فرد الكمبيوتر بعد عشرين سنة فبكى السعودي
ثم سأل مصري الكمبيوتر متى ينصلح حال بلادي
فرد الكمبيوتر بعد خمسين سنة فبكي المصري
ثم سأل سوداني الكمبيوتر متى ينصلح حال بلادي
فبكى الكمبيوتر.
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: mohmmed said ahmed)
|
تعرفي ياشمائل الحتة الوحيدة في السودان
الانا بكون مرتاح فيها ومستمتع بالجد هي المواصلات العامة
لما يتم فيها من تفاعل باصوات عالية..تنظير..تحليل ..سرعة بديهة
والذ حاجة لمن تحصل اي حادثة بسيطة و تذوب الثلج و يبداء
التنظير من العيار الثقيل ومع الاندماج تقوم تشحد ليك سفة
من اقرب زول و تعدل القعدة وتدلي برائك في طبقة الاوزون وانواع
الخلايا الجذاعية
ويتم الحوار بشكل دمقراطي دون النظر للوضع الاجتماعي والمادي
وما بين اراء غاية في الحصافة واخرى غاية في السذاجة
الزول يكون راسو نمل من السفة ياسلااااام شعور ولا احلى
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: عبدالعزيز الفاضلابى)
|
عزيزي جدا الفاضلابي
وانت بخير يارب
| Quote: آها ,, انا متخيلك ضاربة البتاعة ,, وفى العصرية كدى راكبة ليك حافلة ,, ورن تلفون الزول/ ة اللى جنبك ,, ومن قوة البتاعة طاف بيك الخيال واحات ورك فى واحة بكرى لتتحفينا بهذا البوست الحلو ,, ولكن أغلب الظن أن ذلك التلفون أزال حالة الاستمخاخ ,,فكانت منك تلك الغضبة المضرية ,, |
ماخليت لى حاجة اقولها
والله اقوليكـ يافاضلابي ، السيجارة دى ورغم الجيوب الانفية اخير لى بمية مرة من مكالمة على شاكلة النوع أعلاه
معا للارتقاء بالانسان السوداني
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: عبداللطيف حسن علي)
|
عبد اللطيف
ازيكـ وكل سنة وانت طيب
تعرف لاشعوريا ، اول ما النغمة تبدأ فى الرنين ، كل الركاب بيكونوا صفا انتباه ، ثم انو اساسا مافى حاجة نسمعها غير المكالمات ،، والله لو هم عارفين انو المسالة دى حيوانية ومتخلفة ورجعية قدر شنو ما يكرروها خالص ،، ومايغيظني ياعبدو ، انو الونسة ملحوقة فى اى وقت ليه فى المواصلات ، عشان كل الركاب يعرفوا قصة حياتكـ
الحمدلله على ما اراد الله
وياريت الرعاع يفهموا
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
Quote: النغمة ( حمادة بت )
الصوت : طبعاً واضح من النغمة ..
الوووووو .. (بمياعة ما بعدها مياعة) تجعل كل الانظار تتوجه اليها ابتدا من الحاج بنظارته السميكة وصولاً الي الكمساري المعلق في طرف الباب .. مرورا بالحسناوات اللواتي يتطلعن الي صاحب الصوت الانثوي باندهاش
ليواصل : هلا حمودي .. وين يا عسلي انت .. مشتاقين مووووووت .. ما تدينا طلة عشان نديها بلة ..
يتواصل المنظر بافواه تكاد تصل الحناجر و لعاب يسيل من البعض و طرح تتلملم و اتواب تترفع و كمساري يدخل من الهواء الخارجي للنسيم الداخلي .. مع حركة تكاد تصدر صوت كالكمنجات تحت السراويل
و صاحب نغمة حمادة بت منفعل مع التلفون في اسلوب يتحدي طباخين عمر الفاروق لينطلق
واااااااااااااااااي انا منك .. اها لي بعدين يا سكر
يتبع السكر موسيقي تصويرية من لساتك الحافلة بصرير عالي جدا و صوت اصطدام الحافلة بالمجروس امامها
و صوت سواق الحافلة وهو يقول : ليه بعدين ما هسي حار حار |
-----------------------------------------------------------
والله انت عسل عديل كدة ...
| |
|
|
|
|
|
|
|
|
 Re: المكالمات الهاتفية في المواصلات الداخلية (حول أدب المهاتفة) (Re: عابدون محمد عابدون)
|
عارفة يا شمايل ركبت جنب واحدة من الجماعة إياهن أول حاجة عملتها نظرت إلي شذرا ودورت وشها الناحية
التانية نظام ما عندي بيك شغلة رغم إننا في الغربة كسودانيين بنسلم على بعض وبنخلق علاقة سريعة ولو
مؤقتة ولكن ما أن بدأ رنين الهاتف الذي لم يتوقف حتى عرفت السالفة ودي واحدة من المكالمات
- ألو ..
* ألو !
كيفك يا حبة ؟ شوق مطر ! معقولة تفوتك قعدة زي دي ؟ والله سهرة صباحي ! لغاية سبعة أنا بس من
القعدة وعلى البص طوالي ..
- صاحبك أمبارح بدع __ سكر وعدم فكر غايتو الله يعينو ..
أها الخميس الجاي كيف ؟
* ...
- أوعك تعمل مهم وتفتح لينا زي الخميس دة !
- معليش يافردة عندي خط تاني !
مع الخط التاني ..
ألو !!
- كيفك يازميلة !
إنتي تلفونك دة دايما فاضي وتعملي في المسكولات ؟
ياخي الدراهم النازلة مطر دي ما تفكيهاولا حولتيها عملة صعبة ؟
- أنا غايتو حالفة من الليلة ما أرد على مس كول !
- قلت ليك صاحبك الوصلني المحطة داك طلب رقم تلفوني .. طبعا أديتو نمرة غلط .. زي دة أعمل
بيه شنو ؟ مفلس ووشو زي وش القرد !!
- هي هي خلاص رصيد قرب يخلص باي ياحبة !!
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: عابدون محمد عابدون)
|
عابدون
حمدلله على سلامة الشوفةوهاكـ المكالمة دى هدية ، وعليك الله لو لميت فى تراجى اديها نسخة
النغمة: نغمة جهاز
صوت ذكوري خشن (وارد دارفور) يرد: ألوو،، وينك يازول ،، والله الايام دى عطلة الف ، والله العربية دايرة كونات والجلابي المعفن دا مادير يدفع ، داير الايراد من غير ما يخسر ، الله يحرق د... الجلابة
مكالمة كلها عنصرية
ملحوظة: المتحدث سائق روزا وصاحب الروزا جلابي جيعان
عابدون: الكمساري قال كان سارح من واحد من الركاب
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
الو شمائل ازيك
انتظريني انا في الكبري وما بتاخر
بس في شوية زحمه في الشارع
وكان مستعجله برضو ما بتاخر ساعه ولا ساعتين بكون وصلت ,,,,
وبعد ساعتين ::
الو شمائل كيفك ,,معليش اتاخرت شويه بس ناس الحركه اخروا الحركه بحركاتهم البائخه يااااخ ,,
الو قلتي شنو ؟؟
الو خلاص يا شمائل امشي البيت بخلي عمو تبلدينا يوصلك ,,
مكالمه من زول سوق زائغ من مطالبات ماليه
____________________________________________________
ولدنا تبلدينا بسلم عليك
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
الاستاذة شمائل
تحياتي لك وكويس انك فتحتي الموضوع وهو بوست خفيف الظل ولكن يبدو ان المواصلات والاماكن العامة اصبحت مثل المسلسلات المصرية .. شوية في دوار العمدة وشوية في الجامعة وشويتين في المحكمة .. المهم في الموضوع كمان حكاية الكذب .. تصوري تكوني في حالة الزول الجنيك يرن الموبايل نغمة عادييية .. ومستوى الصوت يمكن صامت .. يطلع الموبايل ويطالع الرقم ويتلفت عليك يقول ليك بالله الزول دة قول ليهو انو صاحب الموبايل دة نساهو هنا وفات ..
| Quote: والسواق ماقصر نهائي خفض الصوت عشان الزولة تتكلم بارتياح |
اما سواق الحافلة دة ما خفض الصوت عشان تتكلم بارتياح لكن عشان يسمع بارتياح .. اهو مسلسل واقعي
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: Shamael Elnoor)
|
مرة واحد في المواصلات 000
اتصل علي000 مرتو00(زوجته)000
انت وين؟
عند ناس فلانه000
انا مش قلت ليك تاني ما تمشي للناس ديل؟
انت ومرة مابتسمعي الكلام 000 وراسك ناشف 000 ومابتنفعي معاي!!!
يعني شنو؟؟؟
يعني طلقانه 000 وما ترجعي البيت!!!
بس طوالي الجنبو 000
يا راجل استهده بالله كدي 000واطرد الشيطان!!!
طوالي التاني الجنبوا كدي جيب التلفون ده!!!
معليش يا حجه 000الراجل ده في حالة انفعال وما قاصد000
سواق الحافلة وقف الحافله 000 يا راجل حرم مرجوعة في مسماها!!!
وقبل ما يصل محطتو كان الراجل رجع زوجته!!!
تحياتي شمايل؟؟؟
| |
|
|
|
|
|
|
|
|
|
Re: المكالمات الهاتفية في المواصلات الداخلية (حول أدب المهاتفة) (Re: طارق عبد اللطيف نقد)
|
Quote: مرة واحد في المواصلات 000
اتصل علي000 مرتو00(زوجته)000
انت وين؟
عند ناس فلانه000
انا مش قلت ليك تاني ما تمشي للناس ديل؟
انت ومرة مابتسمعي الكلام 000 وراسك ناشف 000 ومابتنفعي معاي!!!
يعني شنو؟؟؟
يعني طلقانه 000 وما ترجعي البيت!!!
بس طوالي الجنبو 000
يا راجل استهده بالله كدي 000واطرد الشيطان!!!
طوالي التاني الجنبوا كدي جيب التلفون ده!!!
معليش يا حجه 000الراجل ده في حالة انفعال وما قاصد000
سواق الحافلة وقف الحافله 000 يا راجل حرم مرجوعة في مسماها!!!
وقبل ما يصل محطتو كان الراجل رجع زوجته!!!
تحياتي شمايل؟؟؟ |
إنت جاد؟؟
طيب كويس مادام فى اصلاح اجتماعي ، وحبيبتى المرجوعة فى مسماها دى ياربي عرفت بالظروف دي؟؟؟
| |
|
|
|
|
|
|
| |
جعفر محي الدين
حسين محي الدين
سجيمان
ابو جهينة
القلب النابض
نيازي مصطفى
GamarBoBa
عبداللطيف حسن علي
عبدالعزيز الفاضلابى
mohmed khalail
mohmmed said ahmed
حسين نوباتيا
حمور زيادة
Osama Ahmed
عابدون محمد عابدون
عواطف ادريس اسماعيل
العوض المسلمي
Abdelraheem Hamed
هشام حسن
elfadl abdellatif
طارق عبد اللطيف نقد
فيس بوك
تويتر
انستقرام
يوتيوب
بنتيريست