|
|
 اقتراح لاختيار وكـلاء حصريين للبوستات في المنبر
|
الشعب السوداني من أكثر شعوب العالم انطباعية، فالأشياء التي يحبها سيظل
يحبها مهما طرأ عليها من تغيير سلبي، وكذلك الأشياء التي يكرهها سيظل
يكرهها دون إبداء مبرر لذلك.
وأغلبنا ننقاد وراء مدح ونقد من حولنا من الناس والأماكن والأشياء، وإذا
اعتدنا على شيء فسنظل نلازمه حتى موتنا.
ربما لا يزال البعض منا لم يغير الحلاق الذي كان يأخذه إليه أبوه وكذلك المطعم
ومحل الملابس والأحذية ونوع الجلابية والترزي باعتبارها اكتشافات خطيرة أهداها
إلينا آباؤنا ويجب أن نحافظ عليها ونحفظها في متحف التاريخ الطبيعي..
ونسبة لهذه الأحكام والمسلمات، فما زال للسودان أفضل فريق في القارة لأننا من
أسس الاتحاد الأفريقي، والسودانيون عندنا أكثر العرب والأفارقة تعليماً، وهذا
الانطباع لا تغيره السجلات التي تثبت بأن السودان من أكبر الدول التي تنتشر فيها
الأمية، ومن المسلمات عندنا أن البوكس التايوتا موديل 78 أفضل من الهمر موديل
2008 ولا يمكن أن تقنع البعض منا بغير ذلك، ولو تناقلت المجالس بأنك رجل غنيان
فسوف يظل الناس يعتقدون بذلك حتى لو وصل بك الأمر لأن تشتغل شحاد، ولربما تجد
عندها من يقول لك: يا اخ بالله عليك سلفني مليون جنيه..
أغلبيتنا يحكم على الأشياء من الانطباع الأول، فإذا أبغضت إنساناً من اللحظة الأولى
فعليك أن تبغضه على الدوام والعكس صحيح.
صعد شحاد مرة إلى حافلة في موقف المواصلات بالخرطوم وطلب الفي النصيب فتصدى
له أول شخص سأله وقدم إليه سيلاً من الشتائم، وتبعه في ذلك بقية الركاب.
قبل أن ينزل الشحاد قال لهم (إنتو يا السودانيين ناس انطباعيين، لو الزول الأول
ده أداني الفي النصيب كنتو عملتو زيو وما كان في واحد فيكم احتج، لكين نعمل ليكم
شنو ربنا خلقكم كده؟) وذهب بعد ذلك غاضباً من الجميع.
نفس منطق الانطباعية هذا ينطبق على مشاركات ومداخلات وتفاعل الأعضاء مع
ما يكتب هنا، فإذا قدر لك أن تجد قبولاً وحباً وتفاعلاً من البوست الأول فستظل تجد
هذا التفاعل حتى إذا كانت مواضيعك في غاية التفاهة، وإذا وجدت إعراضاً وانصرافاً
وعدم تفاعل مع الناس منذ البداية فستظل تطاردك لعنة الانطباع الأول. ومرات يكون
هناك بوست ظل عالقاً لا يقترب منه أحد ولكن إذا زاره أحد المشاهير وتداخل فيه سلباً
أو إيجاباً فسيتبعه الباقون وهم يرددون نفس الانطباع، بعض الناس هنا زي لواري الخريف،
يحتاجون للوري داوودي عشان يفتح ليهم الطريق ثم يتبعونه بعد ذلك..
ولما كانت هذه هي القواعد التي تحكم البورد، وحتى لا تضيع مجهودات بعض الناس
سدىً وتذهب كتاباتهم أدراج الرياح، فإنني أتقدم إليكم باقتراح هو أن يكون هناك
وكلاء بوستات (وهم بالطبع من غير المغضوب عليهم)، يقوم هؤلاء الوكلاء
بتبني بوستات الأعضاء الذين لا تجد بوستاتهم قبولاً من الأعضاء والقراء، يقوموا
بإنزال هذه البوستات بأسمائهم مع ذكر صاحب البوست الأصلي أسفل البوست حفظاً
لحقه الأدبي. وبهذه الطريقة نكون قد كسرنا الحاجز المصنوع بين الأعضاء والقراء
من جهة وبين صاحب البوست الأصلي من الجهة الأخرى، وإذا شعر هذا الأخير فيما بعد بأن
مواضيعه جابت مريسة تام زينو، فيمكنه أن يقوم بترفيع نفسه إلى وكيل، ويمكنه كذلك
أن يتبنى ويخرج بوستات أعضاء يقبعون خلف خطوط النسيان، ولا ينقص ذلك من مكانة هؤلاء
الأعضاء شيئاً لأنهم سيتفهمون عقلية الإنسان السوداني.
ويمكن لهؤلاء الوكلاء أن يجربوا نظام التخصص، فيتبنى كل واحد فيهم المجال
الذي يبدع فيه، فنكون بذلك قد أدخلنا التخصصية في ما نكتب، فنجد وكلاء معروفين
لمثل هذه المواضيع:
مواضيع العزاء والنعي الأليم وأخبار فلان الفلاني يرقد في المستشفى فادعوا له،
وهذه يكون لها وكلاء متخصصون، لأننا لو تركنا مثل هذه البوستات الاجتماعية
لأعضاء غير مشهورين لما وجد موتانا من يترحم عليهم ولا مرضانا من يدعو لهم بالشفاء.
عندنا هنا أعضاء متخصصين في إيراد أخبار الوفيات قبل أن تطلع روح المتوفين وقبل
أن يعرف أبناء وبنات المراحيم بالوفاة تسابقاً لتسجيل سبق صحفي بإيراد وفاة شخص
سيما إذا كان هذا المتوفى شخصية مشهورة، وربما أضاف صاحب البوست إيراد هذا الخبر
لسيرته الذاتية وأصبح يفتخر به بعد ذلك ..
مواضيع الأخبار السياسية وأخبار الحكومة والمعارضة
مواضيع المناضلين وتوقيعاتهم وتضامناتهم التي لا تنتهي
المواضيع الرياضية والفنية
مواضيع الشمار وكشف الحال والافتراء على خلق الله
مواضيع مدح الفنانين والمشاهير وتكسير التلج لهم
مواضيع مدح الأعضاء مثل فلان هذا من وادي عبقر أو فلان ذاك من ملائكة الأرض
الذين يأكلون الطعام ويسفون الصعوط ويمشون في الأسواق ويعاكسون بنات الثانوي،
أو مدح العضوات والتغزل فيهن مثل هناية ديك عيونها زي غابة الأبنوس أو فلانة ديك
بتشبه إيشواريا راي أو بتدي ملامح لكاترين زيتا جونز
مواضيع المثقفاتية والمنظراتية مثل البنيوية وتفكيك النص وما شابهها
المواضيع الأدبية من شعر ونثر ودوبيت
المواضيع الصحفية المنقولة من صحف أخرى (سواء بصور أو بدون صور)
المواضيع التي تحمل طابع عاجل (حتى لو كان الموضوع يخص قدماء المصريين أو
يورد أسماء شهداء كرري)
مواضيع تكفير الناس والشك في إيمانهم وتقواهم
مواضيع المسكوت عنه في الإسلام لفرج فودة وسيد القمني ونصر حامد أبو زيد
(وهذه وكيلها حصري) وأنا أحييه من خلال هذه البوست..
المواضيع التي تثير المشاكل والفتن تحتاج إلى عدد أكبر من الوكلاء والوكيلات
لأنها تمثل الغالبية العظمى من البوستات المكتوبة. وتعطى الأولوية للوكالة هنا
للأعضاء من الجنسين الذين لديهم مقدرة فائقة لإثارة المشاكل حتى في البوستات
الودية مثل بوستات العزاء والتهنئة والأغاني والبوستات التي يكون طابعها ودي..
البوستات التي تتعلق بأخبار أوباما وأوكامبو لديها وكلاء معتمدين ولا نحتاج إلى
وكلاء إضافيين.
لابد لي أن أورد بعض النقاط المهمة في هذا الصدد:
ـ يمكن أن نسمي صاحب البوست الأصلي بالكاتب، بينما نسمي وكيل البوست بالمخرج
قد تنجح هذه الفكرة وقد تفشل إذا عاد الناس لنمطيتهم وبدؤوا في قراءة البوست
بالمقلوب. عندنا واحد قريبنا ولدو في السعودية، كان لما يرسل ليهو جواب بنادي
ولدو التاني، فيبدأ الولد في قراية المقدمة والسلام ، فيقول ليهو أبوهو: كدي
أقراهو لينا من النهاية، ليتأكد من وجود تحويلة من عدمها..
ـ ربما النفس الأمارة بالسوء تأمر المخرجين بالتغوّل على حقوق الكتاب، عليه يطلب
من الكتاب أن يشهدوا اثنين من الأعضاء العدول أو أربع من العضوات العديلات الطيبات،
على ملكيتهم للبوست قبل الدفع به للمخرج ليقوم بإخراجه للناس النمطيين
ـ على الكتاب ألا يتحسسوا إذا عدل أحد المتداخلين في رأيه من الإيجابي إلى السلبي بعد
أن يعرف الكاتب الحقيقي للبوست كما فعلت الحرم بت النور.. الحرم هذه امرأة شريرة
امتلأ قلبها بالحسد والغيرة، كانت تكره جارتها سكينة بت بابكر كراهية عمياء حسداً لها
على حب الناس لها ولنجاح أبنائها وبناتها .. مرة الحرم مشت لجارتها التانية آمنة بت
وداعة والتي أصرت على الحرم بأن تقعد تتغدى معاها.. الحرم دخلت يدها في الأكل وقعدت
تشكر وتمدح في البامية المفروكة حقت آمنة بت وداعة.. حاجة آمنة شكرتها على شعورها
الطيب وقالت ليها (والله النصيحة المفروكة دي عملتها سكينة وجابتها لي.. الله يديها
العافية)..
فانتفضت الحرم كمن لدغتها حية وقالت لحاجة آمنة: ما خاتي ملحها يقطّع الورادين..
- تبخيس أشياء الناس ماركة مسجلة يشتهر بها هذا المنبر.
|
|
 
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: Nasruddin Al Basheer)
|
عزيزي نصر الدين
إزيك وكيفن حالك
عارف المنبر دة زي السوق ، سوق الله أكبر الواحد دة أها الواحد بيمش لسوق ويتغشي مرة ومرتين
لحدي ما يعرف الدرب زين ، بقول ليك الكلام دة وإنا متفق معاك لدرجة كبيرة في مجمل ما كتبته
ودة في تقديري عندو علاقة بمجمل ما يطرح في هذا السوق الكبير، بمعني آخر أنا بالنسبة لي شخصياً
بقيت إعتمد في قراءتي هنا علي الأسماء يعني وعارف إنو الفكرة دي غلط لكن علي الأقل الواحد بيقرأ
ليهو حاجة معقولة تسندو في غربتو دي .
ياخ والله بوستك دة مفترض يكون مرجعية لكيفية القراءة والكتابة في المنبر
لك الشكر والتقدير
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: خضر حسين خليل)
|
Quote: عارف المنبر دة زي السوق ، سوق الله أكبر الواحد دة أها الواحد بيمش لسوق ويتغشي مرة ومرتين
لحدي ما يعرف الدرب زين ، بقول ليك الكلام دة وإنا متفق معاك لدرجة كبيرة في مجمل ما كتبته
ودة في تقديري عندو علاقة بمجمل ما يطرح في هذا السوق الكبير، بمعني آخر أنا بالنسبة لي شخصياً
بقيت إعتمد في قراءتي هنا علي الأسماء يعني وعارف إنو الفكرة دي غلط لكن علي الأقل الواحد بيقرأ
ليهو حاجة معقولة تسندو في غربتو دي .
ياخ والله بوستك دة مفترض يكون مرجعية لكيفية القراءة والكتابة في المنبر
|
الأخ العزيز خضر
لك التحية والاحترام وسعداء بعودتك إلى المنبر بعد أن عزلتك قافية السلطان..
صدقت في وصفك المنبر بسوق الله أكبر وهو وصف يصور حال المنبر بكل صدق، وهذا
ما دفعنا لأن نقترح دخول السماسرة في ترويج بضاعتنا لأن هناك من يعتقد بأن
موبايلات النوكيا التي يبيعها المحل الفلاني أفضل من التي يبيعها جاره العلاني
مع أن الماركة واحدة.
لا ألومك في اختيارك بعض الأسماء والقراءة لها لأن هناك بعض الزملاء ما زالوا
ملتزمين بتقديم الجيد والمفيد من المواضيع..
وأؤكد لك أن هذا البوست لو كتبه أحد غيري ربما وجد تجاوباً وتفاعلاً بصورة أفضل
من قبل الأعضاء والقراء معاً..
أشكر لم مرورك ومرحباً بعودة قلمك في هذا الفضاء الفسيح..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: Salahaldeen Nadir)
|
Quote: الزولة دي سرها باتع؟
|
إنت بس جرب .. الكمدة بالرمدةQuote: بعدين الثلاثة حروف دي حروف الأسم الحركي وللا الأسم الحغيغي؟
|
أنا ما بقصد إنسانة بعينها، لكن حسب خبرتي الدنيوية،
كل ما الواحدة قلت حروف اسمها كلما قل النوم من عيون الحواليها..
لأنها بتكون كهرباء بس..
كدي شوف أسماء زي مي .. مها.. هناء.. عبير.. إلخ..
تاني أي واحدة اسمها هالة بتكون هالة من الجمال والحسن..
قال بت المنى قال..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: محمد البشرى الخضر)
|
Quote: حسي عايز اشيد بمصطلح اللوري الداوودي فاتح الطريق
خلي بالك انا ح آخد توكيل لمصطلحاتك |
الاخ ود البشرى خلاص بديت التوكيلات ولا شنو ؟
تحية للاخ نصر الدين البشير محمد احمد حسب الاسم الرسمي .
انت عارف يا ود البشرى ، نصر ده واحد من الناس الذين جعلوا من الجامعة مكانا لا نقوى على فراقه.
حكاياته عن حلتهم الوادعة قرب مدني لا تنتهي .. وكثيرا من مصطلحاته تلك ومعها مصطلحات اخونا
معاذ منصور عضو المنبر اصبحت عندنا لغة للتفاهم ايام الجامعة ، لا يستطيع ان بفك شفرتها
احد سوانا لان لكل مصطلح قصة ودلالة.
شكرا يا نصر على المقترحات وعلى امتاعنا بقصصك الطريفة.
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: محمد البشرى الخضر)
|
Quote: نصر الدين كل سنة وانت طيب و الاسرة الكريمة...
بتفق و بختلف معاك في نفس الوقت , خلي التفاصيل لبعدين
حسي عايز اشيد بمصطلح اللوري الداوودي فاتح الطريق
خلي بالك انا ح آخد توكيل لمصطلحاتك
|
كل سنة إنت والأولاد والهلال بخير يا ود البشرى
كان من المفروض أن تقدم المصطلحات في عطاءات،
لكن طالما إتقدمت ليها إنت حأديك ليها برماد وشها
حرررم مافي شي يغلى عليك يا غالي..
المرة دي ما فيها رحلة في العيد؟
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: osman righeem)
|
Quote: كل العام وانت بخير
مافي لمة في العيد ؟
|
كل سنة وإنت بخير يا عثمان
حتى الآن مافي برنامج مقترح،
لكن نكون على اتصال عسى ولعل..
Quote: كدي جرب وكيل
غايتو انا كنت برشح ليك وكيله
لكن خايف بس من عماد |
أنا ذاتي كان عندي اقتراح أدي البوست ده لهناية
لكن خفت تمكر علي.. إنت عارف إنها انسانة مكارة..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: عادل عبدالعزيز عبد الرحيم)
|
Quote: الفكرة حلوة لكن تطبيقها صعب
غايتوا لو وصلت لتوليفة كويسة لتطبيقها ارجو ان تبحث لى عن وكيل
زى وكيل وارغو يجيب دخل صاح
|
تحياتي يا عادل والعيد مبارك عليك
النفوس لو اتطايبت التطبيق حايكون ساهل
يعني ممكن يكون في توليفة بين الكتاب وبين المخرجين
وممكن كمان نعمل ثنائيات زي الثنائيات بتاعة الشعراء والفنانين
ويكون البوست الفلاني من كلمات نصر الدين البشير مثلاً غناء
وإخراج عادل عبد العزيز، والفكرة حاتأتي أكلها بعد فترة
وحانخلد بوستاتنا للأجيال القادمة - بعد خرف إن شاء الله
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: Nasruddin Al Basheer)
|
نصر الدين سلام
والله مرة انا فكرته في الفكرة دي
كدي شوف نجربها سوا بالتعاون مع ذوي الحروف الثلاثة
نمشي نفلفل الارشيف وما شرط الارشيف البعيد
يعني اخر دورة مثلا
نختار موضوع كاارب وما يكون فيه ولا مداخلة واحدة
وللتاكيد ممكن نختار موضوع تعب صاحبه في اببته
يعني عمليه ups كتيرة
نتفق مع واحدة من ذات الحروف الثلاثة او وكيل ذكر
الكلام ده كله مسنجرات
يتم الاتفاق بان يقوم الوكيل/ة بانزال البوست من جديد
وننظر لنرى
تحياتي
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: محمد البشرى الخضر)
|
Quote: إقتراح جيد يا الطاهر
أسمح لي أرشح البوست دا طلب لجوء سياسي من سودانيز أون لاين .. إنحيازاً لبيان!!!!
لأنو صاحبو اجتهد في تأبيبو لكن ما لقى حظو من النقاش و البقاء عل الصفحة الأولى
إذا أوكي معاكم ممكن نتناقش في الوكيل المناسب و كدا |
يا ود البشرى أنا برشحك إنت شخصياً لتكون وكيل لهذا البوست المنسي
وأعدك بأن أقوم بدور اللوري الداوودي فور إنزالك لهذا البوست
وستكون النتيجة إيجابية بإذن الله..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: حسن البشاري)
|
يا عمك
كل سنة و إنت طيب و العيد مبارك عليك
ممكن ترسل لينا مرارة ب DHL لأنو بصراحة ما ضابحين لأنو الحكومة أبت تديينا عشان نشتري الخروف وبصراحة كده سألنا شيخ من الدومينكان فأفتى بجواز أن تكون الضحية شندوسات بيرغر حلال على أن تكون أثنان للرجل وواحد للمرأة والفرنش فرايز للأطفال
| |
|
|
|
|
|
|
|
|
 Re: اقتراح لاختيار وكـلاء حصريين للبوستات في المنبر (Re: Yassir Tayfour)
|
نصر ..
عيدك سعيد ..
بوست زي العسل .. والله أحلى من العسل ..
بالفعل في بوستات محتاجة لوكلاء حصريين وفي بوستات محتاجة لرعاة ( sponsers ) يكونوا قاعدين حارسين
البوست كلما وقع يرفعوه بمداخلة عشان يكون في الصفحة الأولى عشان في بعض من الأعضاء لا بعجبهم العجب
ولا الصيام في رجب , يعني مهما كان الوكيل الحصري محبوب برضه بقيفوا يتفرجوا وبس عشان كدة مهمة
الرعاة ضرورية ولا تقل أهمية عن مهمة الوكلاء الحصريين ..
شكرا يانصر على هذا البوست خفيف الظل ..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: عواطف ادريس اسماعيل)
|
Quote: بالفعل في بوستات محتاجة لوكلاء حصريين وفي بوستات محتاجة لرعاة ( sponsers ) يكونوا قاعدين حارسين
البوست كلما وقع يرفعوه بمداخلة عشان يكون في الصفحة الأولى عشان في بعض من الأعضاء لا بعجبهم العجب
ولا الصيام في رجب , يعني مهما كان الوكيل الحصري محبوب برضه بقيفوا يتفرجوا وبس عشان كدة مهمة
الرعاة ضرورية ولا تقل أهمية عن مهمة الوكلاء الحصريين ..
شكرا يانصر على هذا البوست خفيف الظل .. |
الأخت العزيزة عواطف
كل عام وأنتم بخير وعيد مبارك
والله حرام أن تذهب بعض البوستات المهمة إلى الصفحات الخلفية،
لأن هذه البوستات يبذل فيها أصحابها جهداً كبيراً والهدف منها
هو طرح الفكرة ومناقشتها وليس أن تجد التجاهل والنسيان..
واقتراحك فكرة وجود رعاة للبوستات بالإضافة إلى وكلاء حصريين
فكرة صائبة بالتأكيد وتمنح البوست فرصة التواجد في الصفحة
الأولى وبالتالي تجد حظها من القراءة والمتابعة..
أشكر لك تكرمك بزيارة البوست وممنون للإشادة والمجاملة اللطيفة..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: Yassir Tayfour)
|
Quote: نصرالدين كل سنة وإنت طيب ..
بي أمانة كده، بوستك ده فيهو سماحة شكلة، حجازها ياخد عكاز، قول عووك بس، خلينا نستدرج فيهو الأعداء؛
|
كل عام وأنت بخير يا ياسر
وربنا يحقق أماني الجميع
والله المشاكل بقت منتشرة في أغلب البوستات والناس أرواحها محرقاها
ما عارف الحاصل شنو.. الواحد يكون مهروش في البيت يجي يتفشى فينا
هنا بدون سبب.. وزي ما قال الحبشي: مطرة يسب في سحافة يقول جابها
حبشي..
هنا قوات الكوماندوز بتاعة فرتقة البوستات جاهزة على طول ربنا
يبعدهم مننا.. وكان اتضايقنا بنقول ليكم يا ابو مرووة..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: أسامة الفضل)
|
Quote: كل سنة و إنت طيب و العيد مبارك عليك
ممكن ترسل لينا مرارة ب DHL لأنو بصراحة ما ضابحين لأنو الحكومة أبت تديينا عشان نشتري الخروف وبصراحة كده سألنا شيخ من الدومينكان فأفتى بجواز أن تكون الضحية شندوسات بيرغر حلال على أن تكون أثنان للرجل وواحد للمرأة والفرنش فرايز للأطفال |
كل سنة وإنت بخير يا اسامة
عساك والأسرة بخير..
تعرف نحن عشان بلدنا حلوة، فمحرم علينا المرارة بالمرة
تمشي تضبح في المسلخ يدوك الخروف خالي عفشة يعني مرارة ليس..
طالما شيخكم ده من الدومينيكان ما بستغرب لو أفتي بأن تكون
الضحية سلطعون مصحوب بقزازة ويسكي.. الناس ديل بحبوا البيرة
بشكل رهيب.. ناسنا برضو بحبوها لكين بحبوها باااااردة..
أنا يا اسامة المصران ما خلاني استمتع بلحم الضحية
فكنت ضحية للمصران.. اللحم كان يعاين لي واعاين ليهو
في النهاية قلت ليهو: الله يسعدك مع غيري..
| |
|
|
|
|
|
|
|
|
|
Re: اقتراح لاختيار وكـلاء حصريين للبوستات في المنبر (Re: طارق جبريل)
|
Quote: يا اخوي المنبر دة ام دفسو ساكت
تعال شايت ضفاري
ومحل ما تجي تجي
انا غايتو شغال كدة
بجي شايت تووووووووف
واليحصل يحصل |
يا طارق ربما لا تكون صاحب تكتيكات معينة في مشاركة الآخرين
لبوستاتهم وهذا شيء جميل، لكن بعض الناس هنا يختلفون عنك وعني
وهؤلاء هم الذين جعلونا نطرح مثل هذه الأفكار..
أنا شخصياً أتبنى نفس سياستك، لكن يظهر بقينا نحتاج لبعض التكتيكات..
لك الشكر والتقدير..
| |
|
|
|
|
|
|
| |
Nasruddin Al Basheer
خضر حسين خليل
الرفاعي عبدالعاطي حجر
Salahaldeen Nadir
osman righeem
محمد البشرى الخضر
حسن البشاري
Maawya Hussein
عادل عبدالعزيز عبد الرحيم
الطاهر عثمان
أسامة الفضل
Yassir Tayfour
عواطف ادريس اسماعيل
طارق جبريل
فيس بوك
تويتر
انستقرام
يوتيوب
بنتيريست