|
|
 هوانم جاردن سيتي !!!!!
|
صبحكم الله بالخير يا أمة الأمجاد وبارك خطاكم أينما حللتم ..
الليلة عندي ليكم شمار أخدر ومغربل .. بس ركزوا معاي شوية وسيبكم من السياسة البتجيب الجلطة دي ..
عارفين هوانم جاردن سيتي أو سيدات المجتمع المخملي كما يطلق عليهن في أبوظبي هن منو ؟؟
الإجابة ساهلة وما عايزة درس عصر .. الواحدة من ما تقابلك في الشارع وتسلم عليك بآخر نفس .. ترفع
حاجب وتنزل حاجب وتعاين ليك من راسك لرجليك عشان تعرف إنت لابس شنو ؟ ومن أبو كم وتحاول بكل الطرق
توريك إنها لابسة راتي ولا شيفون طبيعي ,, والشبشب والشنطة من ناين ويست , والعطر الفايح من باريس
جالري تعرف على طول إنها من هوانم جاردن سيتي ..
في الحقيقة يا أخوان ويا أخوات هوانم جاردن سيتي ديل بعض السيدات السودانيات اللواتي خدمهن الحظ
يعني أزواجهن جوا ابوظبي زمن الزمن كان زين والشعر مغطي الإضنين ..فالرجال ديل مهما كانت مؤهلاتهم
هم بجد عندهم خبرة ممتازة جدا لذلك تم استيعابهم في المصارف وشركات البترول والدوائر الخاصة
لأصحاب السمو وأولياء العهود والمستشفيات العسكرية وغيرها وكان ذلك في السبيعنات والتمانينات
الأمر الذي جعل لهم وضعا خاصا جدا .. أما الزوجات فأغلبهن غير عاملات , ولكنهن يتباهين بمناصب
أزواجهن .. ( القرعة بتقول شعر بنت أختي )
هوانم جاردن سيتي أفراحهن مبالغات ما حصلت وأتراحهن أيضا مبالغات لم تحصل بعد .. فضلا عن ذلك
الواحدة لو سألتها توبك دة من وين دغري تقول ليك من فرنسا ولا أمريكا أو سويسرا مع أنه قد يكون من
الباقة أو بوتيك أو عبدالله حسين خنجي ,, ولكن عشان هي ما عايزة حد غيرها يلبسو تقوم تشتري الطاقة
كلها إنشاء تحرق الباقي المهم تضمن إنه ما في واحدة تانية لابسة زيها أما إذا مشت صالون الحنة
أول حاجة تعملها تحذرالحنانة من مغبة تكرار هذه الرسمة لأي سيدة أخرى وطبعا الحنانة المسكينة
توعدها بذلك خصوصا بعد ما تقوم سيدة المجتمع المخملي بكشكشة الأسورة اللي مشترياهم من داماس ولا
الرميزان وبعدما تخلص الحنة تقوم تعصر للحنانة عشرة دراهم لزوم ما تكرري الحنة دي وكدة !!!
و طبعا أولاد سيدات المجتمع المخملي ما بقروا في مدارس خاصة عادية, على الرغم من أنها نسخة من بعض
لكن عشان عندهم قروش ما عارفين يودوها وين بشوفوا أغلى مدرسة , من أبوظبي الدولية أو ال(AIS )
كما يحلو لطلابها وطالباتها أن يسمونها فما فوق .. عليكم أمان الله أنا واحد من أولادي متطلع شوية أصر
إنه يقرا في المدرسة دي .. وحاتكم سنة واحدة دفعت فيها الوراي والقدامي وطلعته منها وحلفت
عليه ما يصاحب ود شيخ ولا ود مجتمع مخملي .. لكن هو مشكلتو إنه لطيف والناس ديل بحبوه قمت
طفشتو من البلد عشان ما يجيب لي الجلطة وارتحت من طلباته الكتيرة ومسيخة و اللي ما عندي ليها
قدرة وكمان ريحت روحي من كلو مرة عايز الموبايل الفلاني والابتوب العلاني ..
خارج النص : أعراس ناس هوانم جاردن سيتي دايما بتكون حدث عشان كدة خلوها مع المداخلات لو لقيت
زمن .. ومعليش لو اتأخرت عليكم في الرد الأيامات دي مزنوقين زنقة فيلة وكلو ساعة المدير جاي لينا
بفنون جديدة وربنا يستر ..
أها يا جماعة ما أطول عليكم تملو مني وتزيدو جني .. أقول ليكم فتكم بعافية ..
|
|
 
|
|
|
|
|
|
|
 Re: هوانم جاردن سيتي !!!!! (Re: عواطف ادريس اسماعيل)
|
اختنا العزيزة عواطف
تحياتي
اسمعي الحدوته دي
طلب مني زميل في العمل ان اذهب معه الي النادي السوداني بالعين لمقابلة فنان يقيم حفل تجاري بالنادي ذلك اليوم . وزميلي هذا يريد ان يرد الجميل لهذا الفنان والذي هو ايضا ود جيرانهم و لقد غني له تبرعا في حفلة زواجه قبل عامين .
المهم وصلنا النادي قبل نهاية الحفل بقليل و وجدت احد اركان الجالية بأبو ظبي جالس علي كرسي خارج الصالة واستغربت وجوده و جلسته في ذلك الجو البارد و استفسرته فرد علي اصلوا انا جايب الفنان زيارة عندنا كان مناسبة كده عملها لينا وباركت و مشيت واخذت في خاطري انني لم تتم دعوتي .
وقابلنا الفنان وسألته عن حفلة الزواج التي اتي من اجلها من السودان وكانت المفاجأة قوله انها كانت حفلة قولة خير العرس لسه شهر سته
والله شمت ليك في الراجل القاعد مقطعه في حنانو في برد شهر 12 و عرفت انو واحد من ضحايا الهوانم
غايتو شوفي لستت الاعراس بتاعت شهر سته بيكون عندك الشمار كامل
| |
|
|
|
|
|
|
|
|
 Re: هوانم جاردن سيتي !!!!! (Re: osman righeem)
|
عثمان !!!
سلام ...
إنت في دة ولا أنا الواجعني وقاطع قلبي نقطة الدهب اللي بنقطوها لي قسمة .. شي غويشة وشي سلسل وشي
خاتم وشي أحفظ مالك وكله بي تمنو !
آخ يا عثمان الجهل مصيبة ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الاستاذة عواطف
السلام عليكم
يا حبيبة هوانم جاردن ستى ديل نسوان عايشين فى وهم ادعوا الله لهن أن يفقن من هذه الغيبوبة
دائما عند سفرى للسودان اسافر عبر دبى اشوف العجب العجاب من اللبس والذهب وسألت نفسى كثيرا
الناس دى بتجيب القروش دى من وين ؟
شكرا على الاجابة ان شاء الله ربنا يمتعهم بما اعطاهم ويسعدهم
وأن كان معيار السعادة فى نظرى بسمة ليتيم او لقمة لجائع
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الاخت عواطف
تحياتي
والله يا عواطف دايما بقول السودانين رغم انهم بينتقدوا الخليجين وفلهمتهم
لكن صدقيني ناسنا ديل لو لقوا فرقة ونعمة زي اهل الخليج حتلقيهم فظيعين وفايتين الحد اكتر منهم
لا اعتراض لدي انه الواحدة تكون راقية وانيقة وتلبس كويس ، لكن كمان في حدود انه دي حاجات شخصية وفي اطار الاهتمام بالمظهر الجيد يعني الناس التانية ما ذنبها انه يتعذبوا بالفشخرة والبوبار العبيط للنسوان السودانيات المغتربات
غايتو ديل مش هوانم قاردن سيتي
بل فقاعات قاردن سيتي
| |
|
|
|
|
|
|
|
|
 Re: هوانم جاردن سيتي !!!!! (Re: maia)
|
ميوية الحلوة !!!
سلامات يا ست البنات ,,,
فعلا نسوان يفقعن المرارة والمشكلة أنهن فاكارات مافي زيهن في الدنيا ..
غايتو أصحاب الفنادق والمجوهرات والتياب حفظوهن , لمن تمشي محل مجوهرات طوالي صاحب المحل يقول
ليك العقدة اشترت زيه فلانة عشان يشجعك ولمن تقولي ليه بكم يقول ليك ب20 الف بس ! طوالي تجيك جلطة
عموما تبري وتستبري .. أبقي معنا ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
غايتو يا عواطف إنتى بتغطسى كده وبتجيبى كلام معسول من بيت الكلاوى ( وجه ضاحك ) ،، غايتو أنا من ناس السعودية وبالصدفة حضرت لى عرس من أعراس السودانيين فى أبوظبى ،، وأعتقد كان فى فندق الشيراتون المطل على البحر ،، غايتو كنت متخيل إنى داخل فى مكان خطأ من كثرة البهرجة وقلت يستحيل أن يكون هذا عرس واحد سودانى ،، ولكن خاب ظنى تماماَ .
الغريب فى الأمر أننى أعرف أهل هذا الرجل ( أبو العروس ) العامل الهيلمانة دى فى السودان ،، والله أنهم أفقر من أى فقير تعرفينه ،، ويعيشون على الكفاف ،، حتى أن شقيق هذا الرجل كاد أن يهج من موطنه تاركاَ زوجته وأولاده ليمارس مع الدراويش ( الناس البيلبسوا الأخضر ديلاك ) هجيجهم تحت راية أحد العارفين بالله ،، لولا أن أغلط عليه القوم بالمكوث وعدم الهروب من مسؤولياته .
أعتقد أن البساطة مهما كنت غنياَ يذيدك علواَ فى نظر الآخرين ،، لكن كمان مش البساطة ديك لحد التقتير رغم السعة .
خالص التحية ،،
ماهر
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
عواطف ازيك
انت عارفة للاسباب الذكرتيها دى انا اصلا ما فكرت اجيب السمحة ام ولدى خفت تجى ويخربوا لي طبعها - هى مسكينة على قدر حالها اقوم اديها ليك مبلغ محترم اقول ليها امشى خمي البيعجبك كلوووو
وتفرح شدييييييد من حبي ليها وتدعو لي كل يوم.
هيييييييييييييييع قالت جاردن سيتي دا وهم
تخريمة
خليك جاهزة البوست ده بجيب ليك الهواء
| |
|
|
|
|
|
|
|
|
 Re: هوانم جاردن سيتي !!!!! (Re: الطيب شيقوق)
|
تمر السوق ,,
والله السمحة أم ولدك دي لو حاولت تعمل زي الهوانم ديل عايزة ليها على الأقل كورس مدته لا تقل عن سنة
وبعد داك عينك ما تشوف إلا النور الكلام كله نوع هاي وباي .. ومامي ودادي ,, الله ما خلقني ما سمعت
واحدة مولودة سنة 50 بتقول لأمها مامي وأبوها دادي .. سمحة المقدرة وقبح الله الفقر ..
الهوا يا ودأمي جاني بلحليل لاكين عليك أمان الله ما يضير الشاة بعد ذبحها ,, خلاص تشبعنا من العواصف.
| |
|
|
|
|
|
|
|
|
|
Re: هوانم جاردن سيتي !!!!! (Re: مصطفى احمد مختار)
|
عارف يا درش جريدة الدار جي الوحيدة اللي بتنفع معاي .. هسة إنت لقيت لي الحل ,, طول عمري بقول
لما أرجع السودان أشتغل وين .. الله يبارك فيك يا ودأمي ..
وأنا عاد من كتر ما بحب الشمار بخليه في الفول شي أساسي يعني كبايتين شمار مقابل كباية فول ,,
جرب الوصفة دي والله تاكل وما تدي الجنبك .. عليك الله كلم رئيس تحرير الدار يحجز طاولة وبنبر إنشاء
الله وممكن أشتغل مجانا بس المهم أمارس الهواية بتاعتي ,,
شكرا أخي العزيز مرورك يسعدني ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
أستاذتنا الكريمة عواطف
والله عاتب عليك لأنك قاعد تطولي الغيبة .
ماتحرمينا طلتك اللطيفة وكتابتك الجميلة .
حقيقة وبدون مجاملة أسعد جداً بمواضيعك التي تعالج الظواهر الإجتماعية السالبة في قالب مرح وخفيف ومميز .
ربنا يملأك عافية
| |
|
|
|
|
|
|
|
|
 Re: هوانم جاردن سيتي !!!!! (Re: ALazhary2)
|
أبو الزهور !!!
ما أروعك وأنت تضع أغلى صورة في العالم في بروفايلك ..
أشكرك على كلماتك الرائعة التي تمنحني الكثير من الحماس للكتابة ,, نحن بصراحة بحاجة إلى دعم
معنوي ,, وبحاجة شديدة إلى أن نحب بعضنا لأننا أصبحنا أكثر من إخوة ..
شكرا مرة أخرى ,, كم أنا سعيدة بك وبوجودك هنا .. كتر الله من أمثالك ليتغير لون وطعم وشكل المنبر ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
العزيزة عواطف
تحياتي
استعدي
اليلة مشيت ليك النادي وقصدت ليك عديل ركن رجال جاردن خالدية
اصلهم مما بشوفني في النادي يبدو في طلب القهوة السادة
و سلمت عليهم
و عملت رايح و فتحت ليك فيهم نيران صديقه
وزعت عليهم الموضوع ( بدون اسماء)و قلت ليهم دي في النت
غايتو ما اشتغلت بي رد الفعل
لكن و انا مارق سمعت ليك تعليق
زي بطلعك من الموضوع
و انا المتهم بالكتابة
لكن لحدي بكره
بكون انا المحتاج للدعم
| |
|
|
|
|
|
|
|
|
 Re: هوانم جاردن سيتي !!!!! (Re: osman righeem)
|
عثمان يا راجل الحوبات والمهمات الصعبة أنا عارفة إنك أدها وأدود .. بس ما ملاحظ إنه باشوات جاردن
سيتي ديل بقوا زي الديناصورات و ما عايزين يستسلموا أبدا رغم انطفاء البريق ؟ عجيبة !! أما الهوانم
فما زلن يقاومن عوامل التعرية والزمن والبركة في كلينك وكريستيان ديور .. والله من حقهن يظهرن
ويحافظن على شبابن بس الفلهمة والقرضمة مافي ليها داعي .. الليلة وووووووووب !! خليكم مستعدين
للهجوم المباغت ما يبقى كلام منابر ساكت !!
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الأخت الحبيبة عواطف
سلام على روحك الطيبة
سمعتي (بالبوبار وغز الأرْيَلْ في بيت الإيجار )!! .. واحد أخونا وزميل دراسة مهندس شاب وسيم إتزوج ليهو واحدة خريجة أبتدائي .. منفوشة دايماً زي الديك الرومي .. جننت النسوان بتميزها بما تمتلك من تياب ودهب .. ولما ما تلقى حاجة تعملها تعمل ليها ( بوشة حريم ونعمة كريم ) يعني قعدة خاصة للزوجات المصاحباهم عشان تبدأ بالتفاخر والتعالي عليهم بما تملك من أشياء لا يملكها غيرها من الثياب والدهب والحنة ونقشاتها .. المهم أخونا مديون للبنك بقروض تشيب .. ومجرجرنوا في قضايا في الحقوق المدنية .. الزوجة الصالحة مفكرة أنها تسافر الهند وتقيم هناك حيث ترغب في إلحاق إبنتها بأحد الجامعات لإنحدار مستوى التعليم الجامعي في العالم العربي على حسب زعمها (مع رجائي الإنتباه لمستواها التعليمي ) !! المهم قلت ليها بحضور زوجها الصديق برضو تضرب عصفورين بحجر واحد وهما تتعلم نقشات حنة من الهند لم تسبقها عليها سيدة وممكن تطور التوب السوداني التقليدي بالساري الهندي.. الزميل الصديق فكر جدياً فيما قلت وقال والله فكرة ممكن الواحد يعمل منها(بزنسس) ويحل منها ديونه المتلتلة!!
عافانا الله وشفا كل زوجة تميزها الأشياء ولا تميز الأشياء .. وآخر دعوانا أن الحمد لله رب العالمين!!
| |
|
|
|
|
|
|
|
|
|
Re: هوانم جاردن سيتي !!!!! (Re: ابوبكر يوسف إبراهيم)
|
الأخ الغالي بكري ,,,
سلام من الله يغشاك أولا وثانيا تلفونك مالو ؟
ثالثا في واحدة هنا نفس النامونة ومن عجايب أمرها قالت لو زوجها اتفنش من الدفاع ما حتمشي السودان
عشان التعليم هناك متخلف جدا لسة بقروا تاريخ وجغرافيا بعدين بدت تسأل نفسهايعني شنو عثمان دقنة
ولا مهيرة بت عبود؟ وليه ما عندهم رياضيات حديثة ؟ أما الإنجليزي فحاجة تكسف !! تصور وهي في الأصل
من أمدرمان وحي شعبي كمان .!!!
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
والله شوف عيني و سمع اضاني فيك يا ابوظبي الام و اربعه بنات عشان يمشوا عرس في شاطئ الراحه اخدت البنت الكبيره سلفيه 20000 درهم عشان التياب للام و فساتينت البنات و عملوا تقليعه في الصبحيه كلهم لبسوا جلابيات من اوقوديف بتاع المارينا مول ابو 3000 الجلابيه الكوافير, الشئ الغريب انهم بيكروهوا ناس العروس كراهيه شديده و يقطعوا فيهم الليل و النهار, و لي عوده
| |
|
|
|
|
|
|
|
|
 Re: هوانم جاردن سيتي !!!!! (Re: Dania Elmaki)
|
دندون !!!
يسعد صباحك ..
جنس ديل كتار يا بعد عمري وطبعا بكونو مشوا مخصوص عشان يغيظو ناس العروس .. لكن ما عليك بتروح
السكرة وبتجي الفكرة وبعدين الندامة ... ما تتاخري في انتظارك ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
Quote: هوانم جاردن ستى ديل نسوان عايشين فى وهم ادعوا الله لهن أن يفقن من هذه الغيبوبة
دائما عند سفرى للسودان اسافر عبر دبى اشوف العجب العجاب من اللبس والذهب |
والله ياأخت عواطف دا كله كوم ويوم السفر للسودان دا كوم على قولة الأخت انتصار ودا ياهو البقع مرارتي انا لاني قعدت في ابو ظبي أحد عشر سنة ما في شي زهجني قدر يوم سفري للسودان لان ناس الاعراس وناس النادي السوداني وناس شنو وشنو دي ترى الله فاكني منها ومابهوب ناحيتها
لكن يوم السفر دا يوم المغص العالمي
جنس عباطة حريم وجنس لبس حريم وجنس تياب حريم وجنس بنات حريم وجنس بناطلين بنات حريم وجنس ديكة مبارين الحريم واسمهم في النهاية رجال
غايتو حكاية عجيبة
وشكرا لك أختي عواطف على طرق مثل هذه المواضيع المهمة لعلها تصحي بعض النيام وإن شئت قولي بعض الأموات
| |
|
|
|
|
|
|
|
|
|
Re: هوانم جاردن سيتي !!!!! (Re: كمال عكود)
|
كيمو !!!
سلام ,,,
والله ضربت الوتر الحساس ,, فعلا في المطار بفقعوا المرارة .. جنس دهب وحنن وشابشب أما العيال فديل
كوم تاني يطيروا ويقعوا في العين والأم والأب بعاينو ليهم بفخر واعتزاز ,, آآآآآآآآآآآآخ يا كيمو
من زي ديل وا أسفاي ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الحبيـة عـواطـف
باللـة عليـك لسـة فـي ناس عايشـين الدور دة
طبعـا يـاعواطـف احنـا نسينـا كـل الحاجـات الحكيتـي عنهـا ديـة
انـا لابسـة لـي بنطلـوجنـز
لـى تسـعـة سنيـن ومـا اظـن ح يطلـع بسـهولـة الا لـو ربنـا سهـل كـدة
بعـد ما اتحصـل علـي الماجستيـر ولـو لقيتـي لـي وظيفـة كـدة ماكنـة
و ابقـي كـدة زئ البتحكـي عنهـم ديلـة
و اعيـش الدور ولـو ليـوم واحـد فقط
باللـة دعواتــك انتـي والباقيـن اباص الامتحـان
لكـئ ودئ
اختـك هـدي
| |
|
|
|
|
|
|
|
|
 Re: هوانم جاردن سيتي !!!!! (Re: Huda AbdelMoniem)
|
هدهد ..
يسعد صباحك الجميل ..
بنطلونك دة يا حبيبتي بعدين وديه متحف الشمع خلي يلبسوه لمدام تيسو وتعالي عندنا هنا عشان البنات
يا بت أمي بلبسوا من زارا وجوردانو آل جينز آل .. بس كملي ماجستيرك وتعالي .. هسة حاجزين ليك
دهب بي 100 ألف درهم من الرميزان .. عشان لزوم الفشخرة وتياب من بسمة لزوم الكشخة وأحذية من ناين
ويست لزوم القدلة وعدسات ملونة من نظارات يتيم عشان تجاري الموضة .. أها قصرنا معاك ؟؟؟
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
اخونا حمد
تحايتي
الخطوط الجوية السودانية
فرزوا ليها مطار عديل كده - تيرمنال 2
و تيرمنال 2 فيه السودانية و الباكستانية و اليمنية بس
نظرة ثاقبة من هيئة الطيران المدني الاماراتي
ابه رأيك
مسافر واحد معاه 15 مودع
وتسع وعشرين شايلين موبيلات عايزين يرسلوها
ولدي في الجامعة ممكن توصل ليهو التلفون ده؟
ومن الاهمية بمكان يكون وزنك زائد
| |
|
|
|
|
|
|
|
|
|
Re: هوانم جاردن سيتي !!!!! (Re: وضاحة)
|
وضاحة !!!
سلام ,,,
عاد يا بت أمي جنس ديل هنا بالكوم والردوم وعاد يوم التفنيش بيت بكا عديل كدة لزوم ما سوينا بيت
في السودان وعندنا سلفية أكبر من المستحقات وبخصوص السرميك واحدة رحلت في بيت سراميك أول يوم
وقعت كسرت يدها وخلي الباقي على الله ..
سعيدة بمرورك اللطيف ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
تـوفـي ياحبيبـة....
لكــن مـابالغتـي وفتحتـي نفـسي لامتحـان بكرة
كـل الحوافز القدمتيهـا مـا بتشجعـل و تخلينـي اكمـل الماجستير اسـرع
واثبتـي انكـم نسـاء ظريفـات و كريمـات
لكـن ياتوفـي عندي سؤال........
انتـوا الرجـال المغتربيـن فـي ابوظبط بتلاقـوهـم ويـن .....
انـا طبعـا مـاعايزة اقـول غشـانـي ياعمدة وعرسنى
لكـن اغترابنـا اغتراب عـدوك دولار مافيـة عمــار
بالمنـاسبة...
كثير مـن الاخوات
المقيمـات بالمــلايـــات المتحدة
الامريكيـة بقضـوا فترة نقـاهـة فـي بلدكـم السمحـة قبـل مـا ينزلـوا
السودان و يضحكـوا علـي دولارهـم المـافيـة عمـار
المهـم شكـرا علـي العرض الجميل و انـابرضـوا بقدم ليـك دعـوة رسميـة
تجـي تشحططـي شـويـة معـانـا
Have a Good Weekend
Love
huda
| |
|
|
|
|
|
|
|
|
|
Re: هوانم جاردن سيتي !!!!! (Re: Huda AbdelMoniem)
|
الجميلة هدهد !!!
سعيدة بوجودك الحلو معانا في هذا البوست اللي ما جايب همه ..
والله هدى الرجال الفي أبوظبي ديل لقيناهم من السودان بعضهم فيه عمار والأغلبية عينك ما تشوف إلا
النور .. نوع غشاني يا عمدة .. وقال لي شغال في شركة بترول وطلع بتشتغل في الدفاع .. عموما يا ستي
تشرفي وتنوري ولو ما شالتك الشقة , تشيلك رموش العين .. بس إنتي كيف تجي وحتى بدون دولار , نوعدك
وعد صادق إقامة ونقاهة وفسحة وكل حاجة ..
مع صادق محبتي ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
العزيزه عواطف
تحياتي
يلا نشوف الاثار المترتبة علي مثل هذه السلوكيات
- توقف كثير من البنوك من منح القروض الشخصية للسودانين
- الذين انتهت خدماتهم بالدولة و لم يتمكنو من المغادرة لأن قيمة مكافأة نهاية الخدمة
لا تكفي القرض المأخوذ من البنك يعني بعد اغتراب عشرين تلاتين سنة لم يتمكن من العودة بسبب الديون
و الحريم شالو دهبهم وساقو الاولاد ومشو السودان و المسكين قاعد يدور في حلقة مفرغه
و نواصل
| |
|
|
|
|
|
|
|
|
|
Re: هوانم جاردن سيتي !!!!! (Re: osman righeem)
|
يا تنقاسى السوق
| Quote: و الحريم شالو دهبهم وساقو الاولاد ومشو السودان و المسكين قاعد يدور في حلقة مفرغه |
والله افتكر الحكاية من الرجال ما تجلطوها فى النسوان الراجل الفالح زى ما بتقول جدتى بعرف يمشى مرتوا مش هى تمشية ولا شنو؟؟؟
طبعا دا بنطبق على النسوان الفارقات والجارين وراء السوق ومخلوعات يعنى تعرف تنظمها وتمشيها على قدرتك مش هى تبرمجك ولما ما عجبها تركب الظلط
| |
|
|
|
|
|
|
|
|
|
Re: هوانم جاردن سيتي !!!!! (Re: وضاحة)
|
البيعرفونا ما يحضرونا
\
اختي وضاحة
تحياتي
حبوبتك ما قالت ليك السعفة بعقدوها وهي خضراء و لكن عقد السعفه ده راح هس
و السبب من الزيجات الغير متكافأة أو الوعود التي قدمت قبل الزواج
وكانت لقبل فترة قصيرة البنت تتنازل عن حاجات كتيره بس عشان العريس اخوه مغترب
وطبعا ده قبل اسهم المغتربين تنخفض في البورصةبالسودان
و راجع
| |
|
|
|
|
|
|
|
|
 Re: هوانم جاردن سيتي !!!!! (Re: osman righeem)
|
وفي واحدة اتنازلت عن واحد متعلم عشان المامتعلم مغترب في الخليج .. قام المتعلم بقى وزير
والمامتعلم الشغال في الدفاع فنشوه بعد حرب الخليج التانية , فتحت بيت بكا وقعدت تقول ياريت
لو عرست فلان هسة كنت ساكنة في بيت الحكومة .. لاكين الليلة لا بيت لا حقوق نهاية خدمة وعلى فكرة كانت
بتزعل من اللي ما بعزيها .. دنيا !!
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
والله يا عطوفا شى يحزن
فى واحد سودانى كان مرتوا مبرمجة لدرجة قف اتخيل قام ضغطوا ارفتع وجاتوا جلطة وراح فيها تعرفى المؤسسة الشغال فيها حزنوا عليه لدرجة لانوا كان ممتاز فى مجال شغلوا لكن في بيتوا مسكين مابقدر يقول لى مرتوا لا اى شى موجاب
بعد وفاتة المرحوم طلعت حقوقوا 150 الف ريال قطرى وكان مديون للبنك 30 الف ريال اتخيلى رفضت تدفع للبنك اشترت تلاجات وديفريز وحاجات وشحنتها السودان وطلبت من المؤسسةالجوازات علشان تعمل حجز وتطلع التذاكر قاموا في المؤسسة طلبوا منها تعهد بدفع الفلوس للبنك رفضت ولحدى الان قاعدة مشحوطة رافضة تدفع شفتوا فضايح زى دى
| |
|
|
|
|
|
|
|
|
|
Re: هوانم جاردن سيتي !!!!! (Re: وضاحة)
|
وضاحة ..
محبتي الزايدة عن حدها .. يا ربي دة من شنو ؟
والله يا بت الحلال في قصص كتيرة زي دي المراحيم كتروا بسبب الضغط والعصبي من قهر الزوجات وبعدين
لاحظتي إنهم بفقدوا روحهم بس ؟ كلها أربعة شهور وعشرة يوم وحاتك آخر لبس وشياكة وشعور تام بالراحة
يبدو إنه المرحوم كان جاثم على الصدور .. ربنا يرحمهو ويغمد روحه ( الينة )
سلام , زآسفة على تأخير الرد ..
| |
|
|
|
|
|
|
|
|
|
Re: هوانم جاردن سيتي !!!!! (Re: osman righeem)
|
عثمان !!!
يسعد صباحك الحلو ...
والله إنت المفروض تكون باحث اجتماعي في شئون السودانيين العاملين بأبوظبي لأنه فعلا كل ما ذكرته صحيح
وبعدين لما يحصا التفنيش تعال شوف الجرسة والله في بعض الأزواج جمعوا ليهم حق التذكرة عشان يسافروا
وواحدين دخلوا إمارة عجمان واختفوا هناك ..
شكرا عثمان وجودك يسعدني ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
عطوفه بالمناسبه محل بسمه للثياب ده بسمع بيه سمع, جماعتنا ناس السلفيه حلفوا ما يوروني ليه عشان مامتهم بتشتري من هناك,
انت عارفه هوانم قاردن سيتي ديل الخلوني ما اعارف اي زول في ابوظبي و شردوني منها بعد 8 شهور بس يا كافي البلا رجعت امريكا بتوبين بس, على قول واحده صاحبتي ما صبرتي لينا لمن تعرفي محلات الصنديله و الثياب.
| |
|
|
|
|
|
|
|
|
|
Re: هوانم جاردن سيتي !!!!! (Re: Dania Elmaki)
|
دندون !!
يسعد صباحك الحلو ..
عارفة محل بسمة دة وين ؟ جنب ناس الباقة أصلو عندي صاحبتي بتشتري تياب عيد زواجها من هناك ,,
وطبعا عيد الزواج بكون حدث الكاترنج من الهيلتون مع الطاقم كله أما الفنان فمن كابلي فما فوق
عاد يا بتي حدث عديل كدي ..
أتاريك يا دينا هربتي وخليتينا نواجه غطرسة هوانم جاردن سيتي برانا ؟ هسة أنا قايلاك قاعدة هنا
بخصوص الصندلية .. صندلية شنو يا بت أمي عليك أمان الله العلبة الكانت بي 90 بقت بي ألف و200
عشان كدة أخير تشوفيها في المحل أو تتصوري جنبها وترجعي بس .. آل صندلية آل !!
شكرا دندون أسعدتينا بوجودك الظريف ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الملفت للنظر في الهوامش بعول الهوانم قدرتهم الفائقة للتاعيش مع وضعهم الغريب و لذلك تتوحد مفرداتهم تجاه كل وضع طبيعي من حق رب الاسرة و لهم قدرة تدميرية هائلة في اغتيال شخصية من يخرج خارج دائرتهم بوسائل لا يحدها دين ولا اخلاق و يرمون الغير بما فيهم وينسلون .
وضعهم دائما يدعوا للشفقة و التناقض القئم بين موقعهم الوظيفي و موقعهم البيتي يحنن ( يكاكو في البيت و يعوعو في المكتب )
وبدأت البساطات تسحب بحكم السن أو التجمد الوظيفي ومقبل الايام لونه .............. وجاءت لحظة اليوم الذي لم يحسب حسابه
| |
|
|
|
|
|
|
|
|
 Re: هوانم جاردن سيتي !!!!! (Re: osman righeem)
|
ما تنسى إنه أولاد وبنات الهوانم يسيرون على نفس الدرب ونفس النهج ( يعني باختصار حيكملو المشوار)
على فكرة حيقولو نحنا غيرانين منهم من منطلق المابتلحقوا جدعوا .. وش زعلان !!!
| |
|
|
|
|
|
|
|
|
|
Re: هوانم جاردن سيتي !!!!! (Re: osman righeem)
|
السلام عليكم
غايتو أحنا أتعقدنا من connection) عبر مطاراتكم لأننا بنكون غبش ولابسين (catual( والأحذية التى من غير كعوب ويد تحمل حقائب وبالأخرى تدفع كرسى الطفل
أها الجماعة : يا الحنة والدهب الكبار مالى الزراعين ومغطى الصدر والكعب العالى العشرين سم واللهم لا حسادة
غايتو بنضحك من روحنا
لكن أفتكر حتى لو سكنا فى الخليج ما أظن حنقدر عل برنامج الشو دا
خلاص أتعودنا على الغبشة
والله يعين
| |
|
|
|
|
|
|
|
|
|
Re: هوانم جاردن سيتي !!!!! (Re: rosemen osman)
|
وحياتك إنتو أحسن ناس عشان متصالحين مع نفسكم وما شغالين بالفارغة ولا المقدودة خليكم
كدة على طول قال الشاعر
إذا كانت النفوس كبارا
تعبت من حملها الأجسام
أرقدو عافية وهنيئا لكم البساطة .. ولما تجوا الخليج الغبش كتار رغم اللوشنات والكريمات ..
| |
|
|
|
|
|
|
|
|
|
Re: هوانم جاردن سيتي !!!!! (Re: عواطف ادريس اسماعيل)
|
الأخت عواطف
سلام
في الخليج عندكم قاردن سيتي؟ أنا في الأول افتكرتها بتاعة القاهرة...
النسوان ديل لا يتذكرن الماضي؟؟
لا يتذكرن البداية....
لا يشاهدن حال المواطن الكادح في السودان؟...
ما عندهم أهل في الوطن...
لا يتذكرن أن لهم جيرانا...
| |
|
|
|
|
|
|
| |
عواطف ادريس اسماعيل
osman righeem
doma
khaleel
انتصار محمد صالخ بشير
الطيب شيقوق
مصطفى احمد مختار
ALazhary2
Dania Elmaki
كمال عكود
حمد فتح الرحمن
وضاحة
rosemen osman
Abdlaziz Eisa
الرشيد البصيلى
فيس بوك
تويتر
انستقرام
يوتيوب
بنتيريست