|
*** الضحية فى السودان لحمة وشربوت***
|
العيد مبارك عليكم علينا وعليكم يتبارك العفو لله والرسول... اها يا اهلنا العيد معروف فى السودان لحمة وشربوت لحمه قالوا مافى الشيربوت نشربوا ولا نخلى ؟؟ وهو زاتو ما بتخلى نسوى شنو؟؟ نشربوا على لحم بطنا يجيب لينا فقعان مرارة كمان ولا نسوى اضان الخروف طرشة ونضبح ونشوى وناكل ونرجى الله فى ترع الجنيد اتصلت بى ناس بيتنا قلت ليهم اها كيف تجهيزات العيد اول شىء قالوا لى الشيربوت حيكون رهيــــــــب قلت لى امى ما قالوا مافى ضحية السنة دى قالت لى ببساطة ما عندنا شغلة فى ناس الحكومة يا بت دايرين يتحكموا فى ضحيتنا كمان ** متاوقة ماشة اعيد فى الجنيد يا ناس دعواتكم لى اصل بالسلامه والقى اهلى كلهم طيبين وسالمين وكل سنة وانتو طيبين تحياتى اسماء الجنيد/ مسقط
|
|
|
|
|
|
|
|
Re: *** الضحية فى السودان لحمة وشربوت*** (Re: salma subhi)
|
Quote: الشاعرة الجميلة ...سوما
عيد بدون لحم أكيد طعمو مختلف لكن يبقى العيد هو لمة الناس مع الناس
اجازة سعيدة.....
تقديري |
الرقيقة سلمى صبحى طلتك براها عيد يا غالية وكل سنة وانتى طيبه يا رب ربى يجمعنا فى كل الاعياد بمن نحب
صدقتى والله العيد هو لمة الناس وفرحتهم ربى يجعل ايامك كلها افراح شكرا باقة ملونة وتسلمى يا سلمى
| |
|
|
|
|
|
|
Re: *** الضحية فى السودان لحمة وشربوت*** (Re: إيمان صالح)
|
Quote: ان شاء الله تصلي بالسلامة يا السمحة وعديلة وتلقي اهلك كلهم طيبين وقالدي لي امك واشبعي لي منها وكل سنة وانتي وهم طيبين وتضبحوا وتفطروا على خير
ايمان |
الحبيبه ايمان سلام بى قلدة محنة ليك وحشة ولى نضميك الحنين زيك يعلم الله كل سنه وانتى طيبه والعيد الجاى نتلاقى فى السودان وسط الحبان تسلمى يا يمه على حنيتك السمحة وبقالد ليك امى وحاتك .. تسلمى يا غالية من بطن الاهل
| |
|
|
|
|
|
|
Re: *** الضحية فى السودان لحمة وشربوت*** (Re: Adil Osman)
|
سوما
ما عارف الضحية منو
نحن الضحينا بي بلدنات وسافرنا وبعدنا
ام خروف العيد
عيد سعيد مقدما وامانة عليك كتري لي من المرارة والدكوة وشية الجمر
وبصراحة كدي الشربوت ده لينا منو سنين بالله (جففيهو زي الحلو مر ورسلي لينا منه كرتونة) والله الكرتونة دي اكان جاتنا ام فتفت ما تفكها مننا
العيد الجاب الناس لينا ما جابك
| |
|
|
|
|
|
|
Re: *** الضحية فى السودان لحمة وشربوت*** (Re: جمال السنوسي)
|
Quote: سوما ما عارف الضحية منو نحن الضحينا بي بلدنات وسافرنا وبعدنا ام خروف العيد عيد سعيد مقدما وامانة عليك كتري لي من المرارة والدكوة وشية الجمر وبصراحة كدي الشربوت ده لينا منو سنين بالله (جففيهو زي الحلو مر ورسلي لينا منه كرتونة) والله الكرتونة دي اكان جاتنا ام فتفت ما تفكها مننا
العيد الجاب الناس لينا ما جابك |
جمال سلامات العيد مبارك عليك العفو لله والرسول هسه انت لابس كده ماشى صلاة العيد ولا شنو ؟ ما شاء الله ما تقول سوما سحرتنى بعدين الشربوت البجففوه ده ما سمعنا بيه بتخيل ريحته فى الطيارة تقلقل المسافرين فى الكراسى وانت هسه لوما فى جده ..كان سويت شنو ؟ جده دى زاتها ما ام بدة بس كدى قول بسم الله وطفر البحر وتعال عيد مع اهلك شكرا على الطلة وكل سنة وانت طيب يا رب
| |
|
|
|
|
|
|
Re: *** الضحية فى السودان لحمة وشربوت*** (Re: Deng)
|
Quote: نظام شربوتكم ده كيف السنة دي؟
بتقدموا في كباية ولا في كورية ولا عبار؟ |
جورج سعادتو
دايماً ردودك مريبه حتى في المواضيع الإجتماعية والودية...
متين يالله تبقى لينا دينق وما جورج؟؟؟؟؟ الشايقي
| |
|
|
|
|
|
|
Re: *** الضحية فى السودان لحمة وشربوت*** (Re: Al-Shaygi)
|
الشايقى الحنين سلامات العيد مبارك عليك يا دخرى الاهل تعرف ياالشايقى يا خوى قراصتك والملاح الاخضر ده ما اقل من الخروف زاتو يعنى انا لو قالوا لى خلاص مافى لحمه بقول ليهم خلاص اعملوا لينا قراصة بملاح الشايقى ده وجيبوا الشربوت تسلم يا الشايقى وكل سنة وانت طيب
| |
|
|
|
|
|
|
Re: *** الضحية فى السودان لحمة وشربوت*** (Re: Kostawi)
|
الأخت العزيزة سوما تحية طيبة سلااام كل سنة وانت طيبة تقبل الله منا ومنكم صالح العامل
يا بخت من عيد بين الأهل في السودان هذه السنة
نحن هنا يوماً كركبيت ويوماً عشانا ربيت ويوماً نكتل التابّا وعليها نبيت
تحياتي ومودتي سوماخالد
| |
|
|
|
|
|
|
Re: *** الضحية فى السودان لحمة وشربوت*** (Re: عواطف ادريس اسماعيل)
|
Quote: عاد يا سوما يا بتي دة إسمو كلام دا ؟
خليتينا نعبش في أوهام خيالنا ونقول الليلة العيد ,, تصوري هسة أنا متخيلة الشية والمرارة والكمونية
وداك يا جك الشربوت ,,, اريتو يا يمة حال السرور ,,, |
عوااااااااااطف الحبيبه حبابك يمه العيد مبارك عليك يا غالية من بطن الاهل معنى الكلام ده انك معيدة فى السودان يا ريت والله يا عطوفة وان شاء الله نتلاقى ما تخافى انتو يا ناس البندر كان ما ضبحتوا .. تعالوا لينا نحن ناس الاقاليم خاصة ناس الجنيد قالوا ما عندهم شغلة فى الحيكومة تسلمى يا عطوفة وكل سنة وانتى طيبه يا رب ربى يحقق احلامك ويديك الفى مرادك
| |
|
|
|
|
|
|
Re: *** الضحية فى السودان لحمة وشربوت*** (Re: خالد علي محجوب المنسي)
|
Quote: الأخت العزيزة سوما تحية طيبة سلااام كل سنة وانت طيبة تقبل الله منا ومنكم صالح العامل يا بخت من عيد بين الأهل في السودان هذه السنة نحن هنا يوماً كركبيت ويوماً عشانا ربيت ويوماً نكتل التابّا وعليها نبيت
تحياتي ومودتي سوماخالد |
ود المنسى حبابك يابا العيد مبارك عليك ..علينا وعليك يتبارك العفو لله والرسول.. والله لى زمن من العيد مع اهلى.. وخاصة عيد الضحية مناى كل الناس تعيد وسط اهلها وحبانها وان شاء الله يا خالد ياخوى العيد الجاى وسط اهلك ولمة عيد وفرح وجديد ضحتكنى بالربيت .. لووووووووول زمن ما سمعت الكلمة دى.. بتذكر فيها نكتة ظريفة جينا فى احدى الاجازات من القضارف للجنيد وصادف لمة اهلنا كلهم فى عيد اضحى عندنا خالى زول نكتة وبحب المقالب بعد الفطور واكل الشية وشراب الشربوت والشاى والقهوة خلااااااااص الناس رخمت ودايرين يمشوا ينوموا قعد فى المطبخ وجاب باقى ملاح الفطور التقلية وختاه جمبو ونادى شباب الحوش مجموعه قال ليهم حرم كل واحد فيكم يشرب ليه كمشة الجماعه بكوا عديـــــــــــــــــــل قال ليهم لا لا انا حلفت طبعا غمضوا وشربوا الملاح كانه جردقة مررة الملاح الكانوا الصباحية بياكلوا فيه بى مزاج طلعوا ليهم من نفسهم حبوبه قالت ليه يا ولدى مالك عليهم .. فى واحد من الشباب متزوج قال ليها خليه بتسدى فيه العصر الناس اتغدت متأخرة وشربت الشاى طبعا الغدا فيه كمية من اللحمه برضو بعد شراب الشاى .. زولنا القبيل الكان ناوى لى خالنا ده جاء داخل المطبخ .. متابع ناس البيت لما سخنوا شحم الخروف وطلعوا الربيت شال الدهن المسخن يا دوووووب بقى دافى وجاء للخال المقلبهم قبيل قال لى حررررررم تشرب ليك كباية دهن ربيت وتخيل المنظر توبوا ليك لى يوم الدين من المقالب دى تحياتى اخى خالد وشكرا على الطلة يا ود الفريق والحلة
| |
|
|
|
|
|
|
Re: *** الضحية فى السودان لحمة وشربوت*** (Re: Kostawi)
|
Quote: عيد مبارك
يا جماعة كيف يصنع الشربوت?
دايرين إجابة سريعة لأنو العيد قاعد يدق في باب الحوش |
كوستاوى سلامااااااااات كل سنه وانت طيب وعيدك مبارك والعفو والعافيه انا غايتو بعرف ليك كيف يقرطع الشربوت اما كيف يصنع دى خلينى امشى الجنيد واجى راجعه بكتبها ليك غايتو حسب معرفتى نفس مكونات الابرى + بلح والله اعلم وبرضو راجيه معاك اجابة من العارفين شكرا كوستاوى شكرا دعوات اهل يوم العيد
| |
|
|
|
|
|
|
Re: *** الضحية فى السودان لحمة وشربوت*** (Re: مدثر محمد ادم)
|
Quote: الشاعرة الرائعة سوما
عيد سعيد ونشاءالله ترجعي بالسلامة
والسنة دي الضحية فراخ وسمك
وكتري الشربوت |
الشفيف مدثر محمد آدم سلام واحترام كل سنة وانت طيب ان شاء الله والعيد الجاى نلتقى جميعا فى ارض الوطن الغالى شكرا على الطلة اخى مدثر مالك علينا مضحى لينا بفراخ وسمك ما صدقت يا مدثر انا سايبة الحاجات دى وراى من ما اصل ما آكل الا كسرة وعصيدة رغم الم المصران وموية من الزير بس ..ما تقول كمان الجو بااااااارد والصباح تلقى الزير نقاعه يناغمك بى حنية لو مافى لحم زاتو ما مهم البركة فى الكسرة والطماطم لكن لومك على الشربوت ما بخلى شكرا مدثر جك شربوت بااااااااااارد
| |
|
|
|
|
|
|
Re: *** الضحية فى السودان لحمة وشربوت*** (Re: AnwarKing)
|
Quote: الأميرة الجميلة سوما... كل عام وانت بخير...وتحياتنا للأهل في الجنيد والسودان ككل... ان شاء الله من العايدين المبسوطين... وابقي اكتبي من الجنيد...
خالص المودة أنور |
انور يا انور والله الشوق محكر كيفك ياخ ليك وحشة والله وانت طيب يا انور يا طيب يا حليلك وحليل ايام جلسات الشعر وانت تتفنن فى التسجيل وتنزل العمل بى خلفيه تخلى الزول يرقص براه تسلم ان شاء الله يا انور واكيد الكتابة من الجنيد ليها نكهة خاااصة جدا وسط الخلاات والعمات الحبوبات والجارات يااااااااااه الله يوصلنى بالسلامه بس شكرا انور شكرا قدح العيد صباحية على الاقل لو بقى مافى ضحية تكون لميت فى القدح
| |
|
|
|
|
|
|
Re: *** الضحية فى السودان لحمة وشربوت*** (Re: ismeil abbas)
|
Quote: ألأخت/أسماء
كل عام وأنتى وألأهل طيبين قبل الزحمة وأكل ألحمة. وربنا يوصلك بالسلامة.
الجنيد نورت.
إسماعيل محمد احمد عباس. |
اسماعيل الزول السمح كان زرعوه فتريتة بقوم قمح تسلم يا العشا وكل سنة وانت طيب وربى يحقق كل امنياتك ان شاء الله والعيد الجاى مع اهلك ووسط حبانك .. قول آمين تسلم اسماعيل اخوى وشكرا دعوات عيد
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
الجميلة سوما : وباااااااااااااااااااااااع يا خروف العييييد .. بااااااااااااااااااااع يا خروف العيد.. نحن زاااااااااااتنا في السعودية هنا ضحيتنا بقت في تلتلة .. الخروف إحتمال يلحق 1200 ريال يعني زيّو زي أقساط الكامري .. انا السنة نويت أجيب لي خروف محترف وغالباً حا يكون برازيلي ..الله الواحد بقا ما عارف دي ضحيّة ولا كورة .. الخروف البرازيلي رخيص (ومنّا منّا) (من هنا من هنا) كما يقول السعوديين ممكن يطلع لي الخروف بي 200 ريال .. والله لكن يا خروفنا السوداني عفيت منك هييييييييييييع .. الواحد مننا بقا يشتغل عاااادي بي 800 ريال في الشهر في حين إنو خروفنا بقا أغلى مننا والسبب هذه النزفية التي إستنزفت جيوبنا .. أتوقع معظم السودنيات اللي حا يجو بعد العيد ماف زولة حا تجي شايلة طلح ولا شاف كللللو شرموط ولحمة ناشفة .. ومرحباً بي أخوان كاكا في الضحية تخريمة : يا حمامة مع السلامة ضللت دربك الغمامة
| |
|
|
|
|
|
|
Re: *** الضحية فى السودان لحمة وشربوت*** (Re: حمد فتح الرحمن)
|
Quote: يا حمامة مع السلامة ضللت دربك الغمامة |
Quote: دا شنو يا عمر شكلك ناوي للزولة دي على غونتانمو ما السودان
اسماء و عمر و الجميع عيدكم سعيد ان شاء الله |
العزيز حمد فتح الرحمن حبابك يا ركازة الضيفان كل سنه انت وطيب ياخوى ربى يديك افلى مرادك ان شاء الله
قلت لى يا حمامه مع السلامه شكلها كده زى متوجهه على غونتنامو؟ كر يا حمد ياخوى كان كده انت قايل بلدنا زاتها ما فيها جناح غونتنامو 5 نجوم كمان الله يستر بس تحياتى اخى حمد وكل سنه وانت بالف خير وشكرا لمة اهل وفرحة عيد
| |
|
|
|
|
|
|
Re: *** الضحية فى السودان لحمة وشربوت*** (Re: عمر الفاروق)
|
Quote: الجميلة سوما : وباااااااااااااااااااااااع يا خروف العييييد .. بااااااااااااااااااااع يا خروف العيد.. نحن زاااااااااااتنا في السعودية هنا ضحيتنا بقت في تلتلة .. الخروف إحتمال يلحق 1200 ريال يعني زيّو زي أقساط الكامري .. انا السنة نويت أجيب لي خروف محترف وغالباً حا يكون برازيلي .. الله الواحد بقا ما عارف دي ضحيّة ولا كورة .. الخروف البرازيلي رخيص (ومنّا منّا) (من هنا من هنا) كما يقول السعوديين ممكن يطلع لي الخروف بي 200 ريال .. والله لكن يا خروفنا السوداني عفيت منك هييييييييييييع .. الواحد مننا بقا يشتغل عاااادي بي 800 ريال في الشهر في حين إنو خروفنا بقا أغلى مننا والسبب هذه النزفية التي إستنزفت جيوبنا .. أتوقع معظم السودنيات اللي حا يجو بعد العيد ماف زولة حا تجي شايلة طلح ولا شاف كللللو شرموط ولحمة ناشفة .. ومرحباً بي أخوان كاكا في الضحية تخريمة : يا حمامة مع السلامة ضللت دربك الغمامة |
عمر الفاروق الرجل الذوق حبابك يا ضى شبابيك القبيلة وحات الله طلتك عجبتنى بالحيل تسلم اخوى ود ملوك النيل العيد مبارك عليك وتتبارك ايامك قول آمين غايتو اقساط الكامرى دى بالغت فيها قريت مداخلتك دى وانا فى الشغل ضحكت لامن دمعت ..والحولينى كلهم يعاينوا واظنهم فى سرهم يقولوا الليلة الزولة دى مالها من الدغش والكلام خروف البرازيل لوووووووول عارف يا عمر ياخوى ذكرتنى طرفة حصلت جد والله فى حلتنا الجنيد طلعوا اهلنا لى سوق البهايم قبل العيد بيومين يشتروا الاضحية كل واحد قدر قدرته جاب خروفو وجاء متكامل البوكسى كلو يدغى ويجعر كلو حسب الحجم عندنا قريبا لينا زولا لذيذ بالحيل ومحمول عيال قال قدر قدرتى بجيب لى بهيمه صغيره لقى ليه حمل صغير اشتراه والناس المعاه شجعوه عليه ورجع بيه الحلة وقفوا قدام دكان التعاون والركاب نزلوا بى بهايهم جاهم عمنا الحاج الكبير الله يرحمه ويغفر ليه قال ليهم الحمل الصغير ده هول منو ؟ رد اخونا قال ليه انا يا عم فلان .. مسك الحمل من راسه وفتح ليه خشمه وقبل على صاحب الحمل قال ليه يا خوى هوى .. البهيمه دى ما بتضحى ليك صاحبنا رد ليه بى استنكار ليه يا عمى ؟ قال ليه الحمل ده ما مسن .. (يعنى لسه صغير ) ما بضحى ليك طوالى زولنا رد قال ليه شنو يا حاج ما مسن ؟ مسن ولا ما مسن انا ما عندى فيه شغلة اصلى داير ادخلو كلية الهندسة ؟؟؟
ود الفاروق تسلم يابا وربى يحقق كل امنيات والعيد الجاى وسط الاهل والحبان وشكرا ليك لمة اهل تحت ضل نيمه صباح العيد
| |
|
|
|
|
|
|
Re: *** الضحية فى السودان لحمة وشربوت*** (Re: د.محمد حسن)
|
Quote: كل سنة وكل آل الجنيد بالف خير
الخروف ينفعكم |
الشفيف د/ محمد حسن وانت طيب ياباوكل اسرتك ان شاء الله والعيد الجاى معانا بى جاى يا رب.. قول آمين تحياتى عبرك للشبيبه وتسلم يا ذوق على الطلة شكرا كعك العيد ...لو مافى خروف
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
سومة الحنينة كل سنة وانتي واسرتك الكريمة بالف عافية وخير
اذا جاية السودان في العيد ، لازم تمري علي في الخرطوم اي نعم خروف العيد ما معانا حتى لا نلقي بانفسنا في التهلكة
لكن يا ستي شوفتك بالدنيا وبنديكي شربوت مع سمك مشوي
| |
|
|
|
|
|
|
Re: *** الضحية فى السودان لحمة وشربوت*** (Re: ايهاب)
|
Quote: سوما احنا بناكل ليكم اللحمه وانتو اشربو لينا الشربوت كيف معاك
كل سنه وانتي واهلك طيبين |
ايهاب لا حولااااا وين انت ياخ سلامات يا الغائب سنوات اصلك ما بتقلع ليك بى فايدة هسه غايب الزمن ده كلو عشان تجى تقول لى بناكل ليك اللحمة ؟ جنك اكل انت .. مره لحمه ومرة كعك.. يوم غايتو بتفطس ليك بى اكلة بعدين اقول ليك حاجة .. خروف المغتربين ده زاتو ما نافع معاى انا دايره خروف يكروه ويجروه جر من الزريبه ويتكوه يضبحوه ويعلقو فى فرع النيمه يسلخو ويكوركوا لينا جيبوا الصوانى والكنش بمناسبة الكنش دى انا زمان كنت فاكره الكنش ده عشان يهددوا بيه الخروف يقيف للضبح معناها لوما وقفت بنضبحك وبنجضك وكمان بنسوطك بالكنش ده غبا شديد ايهاب سلام شديد بالله لى عمى السنى وكل سنه وانتو طيبين والعفو لله والرسول
| |
|
|
|
|
|
|
Re: *** الضحية فى السودان لحمة وشربوت*** (Re: العوض المسلمي)
|
Quote: الشربووووووووووووت بدون لحم بهلك الشربوووووووت لالالالالالالالالالالالالا اللحم مافيه شئ اكلووووووه ساهي |
العوض سلامااااااات العيد مبارك عليك ياخوى القابلة على امانيك ان شاء الله مالك ياخوى هارشنى كده ومخوفنى من الشربوت سمح مدام اللحم مافيه شىء ناكل ساى .. الشربوت مالو ؟ انت قايل شربوتنا نوع الزول بشوف 10 - 10 داك ؟ لا لا نحن نوع بتشوف 3 - 3 بس تحياتى يا العوض والعيد مبارك عليك يابا
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
Quote: ديـــــــــنـق سلااااااام ياخ والله مشتاقين ضحكتنى بى نظام شربوتنا كيف انا غايتو بقرطع بالجك ما عندى شغلة يقدموه كيف كل سنة وانت طيب يا دينق والعيد الجاى فى السودان وسط الحبان تحياتى ومعزتى شكرا دينق شكرا شية جمر |
الغالية سوما.
والله شغلكم نضيف. كلو عرفنا إلا نظام القرطعة بالجك ده. تمنياتي لك وللاسرة الكريمة بقضاء عيد سعيد والله يوفقكم وتجدوا خروف صحي معافي.
دينق.
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
Quote: دايماً ردودك مريبه حتى في المواضيع الإجتماعية والودية...
متين يالله تبقى لينا دينق وما جورج؟؟؟؟؟
الشايقي |
الشايقي.
البيني وبين سوما معرفة قديمة ونحنا فاهمين بعض كويس.
بعدين الشربوت ده ما داير ملاح وقراصة, داير لحوم وشيات وزيوت لنظام الهضم والترخيم.
لكن كده بس قول لي: الشبربوت ده بتشدو كيف في السعودية؟ يعني رجال الهيئة ممكن يصدقو أن الشربوت ده شراب عادي؟
دينق.
| |
|
|
|
|
|
|
Re: *** الضحية فى السودان لحمة وشربوت*** (Re: Deng)
|
Quote: الشايقي.
البيني وبين سوما معرفة قديمة ونحنا فاهمين بعض كويس.
بعدين الشربوت ده ما داير ملاح وقراصة, داير لحوم وشيات وزيوت لنظام الهضم والترخيم.
لكن كده بس قول لي: الشبربوت ده بتشدو كيف في السعودية؟ يعني رجال الهيئة ممكن يصدقو أن الشربوت ده شراب عادي؟ |
الاعزاء الاخ دينق والاخ الشايقى حبابكم وكل سنه وانتو طيبين اعتز جدا بخوتكم والله يا ابناء بلدى الاوفياء الاخ دينق .. الشايقى ده زول حنين جدا شايف من قراصته الفوق دى اديك احساس الحلييلة الماشة عل المراح ولو قامت عليه الهاشميه حقت اهلنا الشوايقة بجيب لينا قصيدتين 3 من محنة اهلنا الطيبين له التحيه تناطح نخيل بلادى وانت اخى دينق عهدتك من زمن ابو عتيق اخو حوبات لكن ياخ مالك وقفت من البال ولا بتجى اندر كفر حقيقى اخوى الشايقى الاخ دينق اخ كريم بس اتعلم المكاواى دى من زمن ابو عتيق الله يطراه بالخير عارف يا دينق الشربوت لو لقوه ناس السعوديه بزاحمونا فيه لكما التحية بعمق النيل الخالد والعيد مبارك عليكم والعفو لله والرسول
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
العزيزة الغالية سومه
كل سنة وانتى طيبة مقدما يا ستى
اتابع التلفزيون باستمرار وكل يوم يصر ناس الحكومة انه لا وجود لهذا المرض فى السودان وانه كل بهائم السودان خالية من هذا المرض لكن المشكلة بقت فى الناس البقوا خايفين خوف رهيب جدا ...
بينى وبينك الكاتل الله والحاي الله ويازوله دى حالة ما بتتفوت ابدا عليكم بالشواءات المعتبرة واهضموها بالشربوت الكارب
والله كريم عليكم وعلينا نحن الفاتتنا كل الهيصات دى ...
ادعى لينا يرد غربتنا قريب ...
وعيد سعيد يا ستى وعمر مديد
| |
|
|
|
|
|
|
Re: *** الضحية فى السودان لحمة وشربوت*** (Re: قرشـــو)
|
Quote: العزيزة الغالية سومه
كل سنة وانتى طيبة مقدما يا ستى
اتابع التلفزيون باستمرار وكل يوم يصر ناس الحكومة انه لا وجود لهذا المرض فى السودان وانه كل بهائم السودان خالية من هذا المرض لكن المشكلة بقت فى الناس البقوا خايفين خوف رهيب جدا ...
بينى وبينك الكاتل الله والحاي الله ويازوله دى حالة ما بتتفوت ابدا عليكم بالشواءات المعتبرة واهضموها بالشربوت الكارب
والله كريم عليكم وعلينا نحن الفاتتنا كل الهيصات دى ...
ادعى لينا يرد غربتنا قريب ...
وعيد سعيد يا ستى وعمر مديد |
ياااااااه العمدة الحنين قرشو طلتك دى براها عيديه يعلم الله كيفنك يا الحنين يا دخرى الوالدين ليك وحشة والله بحجم ابداعك وطيبة قلبك يا شفيف مش بالله يا قرشو يا خوى .. ناكل ونتوكل على الله والله انت احسن زول ..مافى زول رحمنى زيك انشاء الله العيد الجاى تكون مع اهلك وتشوف روعة العيد وحلاوته وسط الاهل كل سنه انت واسرتك الكريمه وكل الاهل بالف خير وعافية والقابلة على امانيكم ان شاء الله شكرا قرشو اخوى شكرا صحنين شيه ومرارة وجردل شربوت اها قصرت معاك ؟ تحياتى عبرك للاسرة الكريمة
| |
|
|
|
|
|
|
Re: *** الضحية فى السودان لحمة وشربوت*** (Re: خالد علي محجوب المنسي)
|
سوما مالك علينا بتذكرينا اهلنا
والله انا في الغربة كلما انتكي براااااااااااااى واحكل كراع في كراع واعاين فوق لسقف الشقة بقول ود شيقوق افو افو افو افو امانة ما ربك غضب عليك يا حليل عرش بيوت أهلك النجاض البعلقوا فيهو تواريب الهواميك فوووووق ( العنكوليب والعشريف والتبش ) ويا حليل المزارعيين الصحي صحي زى حاج احمد الرفاعي القلتو لي يا اسحاق اخوى مما كملوا حشهم ربطوا حديد نجاماتهم وملوداتهم وواسوقهم في شوال ماهل و مرات كمان يعلقوهو في اضان شعبة امينة البيت وما بنزلوهو الا الرشاش ووقت يجوا يدلوهو يلقوا ليك ابو الدنان سكن في قرينات الشوال . قمت طلعت يا اسماء اختي برة البناية مع الصباح مع طلعة الشمس اتلفت جاى وجاى وجاى غير الهنود والبنغال ما لقيت الحبة تاني رجعت بتكلم مع نفسي ود شيقوق حليلك هسع قدلة زى دى ما تستاهل تكون قدلة زولا وسط عولو بشهّل في حالو لسدرة الخلاء وتقوم أم أولاده النجيضة تشهلو بملاح ورق بكمونية بايت ليهو يومين معلق في المشلعيب وعليهو كسرة بااااااااايتة نصفها لين ونصفها يابس ويختوا ليك جنبو ليمونة صفّرة عينة الليمون البقع براهو من فروعو وكتين يستوى . وكان بخيت تكون كسرتك حمّرة والطاحونة فاطة فيها تلاتة اربعة حبات وتقوم كدى تنعدل متوجه حواشتك .
تقوم تتذكر انك نسيت التمباك وتاني ترجع لدكان الشريف عبد اللطيف تملأ حقتك وتخمش ليك سفة من حقتو ( بضم الحاء) قبال يسلمك حقتك وتقوم تطلع القروش ومنتظره يرجّع ليك باقيك وتقوم تاخد ليك ترة لى وراء وتلفض السفة زى لفضة الخرطوش للجبخانة وقت عقد الزواج وتجي تقول ليهو ( اديني الباقي يا حاج)
| |
|
|
|
|
|
|
Re: *** الضحية فى السودان لحمة وشربوت*** (Re: الطيب شيقوق)
|
Quote: سوما مالك علينا بتذكرينا اهلنا
والله انا في الغربة كلما انتكي براااااااااااااى واحكل كراع في كراع واعاين فوق لسقف الشقة بقول ود شيقوق افو افو افو افو امانة ما ربك غضب عليك يا حليل عرش بيوت أهلك النجاض البعلقوا فيهو تواريب الهواميك فوووووق (العنكوليب والعشريف والتبش ) ويا حليل المزارعيين الصحي صحي زى حاج احمد الرفاعي القلتو لي يا اسحاق اخوى مما كملوا حشهم ربطوا حديد نجاماتهم وملوداتهم وواسوقهم في شوال ماهل و مرات كمان يعلقوهو في اضان شعبة امينة البيت وما بنزلوهو الا الرشاش ووقت يجوا يدلوهو يلقوا ليك ابو الدنان سكن في قرينات الشوال .
قمت طلعت يا اسماء اختي برة البناية مع الصباح مع طلعة الشمس اتلفت جاى وجاى وجاى غير الهنود والبنغال ما لقيت الحبة تاني رجعت بتكلم مع نفسي ود شيقوق حليلك هسع قدلة زى دى ما تستاهل تكون قدلة زولا وسط عولو بشهّل في حالو لسدرة الخلاء وتقوم أم أولاده النجيضة تشهلو بملاح ورق بكمونية بايت ليهو يومين معلق في المشلعيب وعليهو كسرة بااااااااايتة نصفها لين ونصفها يابس ويختوا ليك جنبو ليمونة صفّرة عينة الليمون البقع براهو من فروعو وكتين يستوى . وكان بخيت تكون كسرتك حمّرة والطاحونة فاطة فيها تلاتة اربعة حبات وتقوم كدى تنعدل متوجه حواشتك .
تقوم تتذكر انك نسيت التمباك وتاني ترجع لدكان الشريف عبد اللطيف تملأ حقتك وتخمش ليك سفة من حقتو ( بضم الحاء) قبال يسلمك حقتك وتقوم تطلع القروش ومنتظره يرجّع ليك باقيك وتقوم تاخد ليك ترة لى وراء وتلفض السفة زى لفضة الخرطوش للجبخانة وقت عقد الزواج وتجي تقول ليهو ( اديني الباقي يا حاج) |
ود شيقوق برى منك الليلة يا يابا برى شيتن هضرب بيك كدى وحات الله مو هين وحالتك شلت تذكرتك وماشى باقى ليك ايام بس نان كان شربت الشربوت كنت سويت شنو ؟ كر يا يابا كر كان بدا عليك الخرف المبكر وحالتك راجى ليك عيد وربة بى مزاج غايتو عرف ليك ود الجنيد بضحك فى كلاموا الصباحية كلها واتصلت اكلمك تقرا التعليق الا ما لميت فيك غايتو زول بفهم نضميك ده غير بدر الدين شنا مافى ضمة ناس البورد ديل يا دوووووووووووب يفهموا طراطيش كلامك الكتر ده اما اخوى ابو بكر كان جاء غاشى بتمحنوا بالحيل تحياتى يا ود شيقوق وحقيقى والله عجبتنى مداخلتك الفريده فى نوعها وخاصة انك كتبتها كده بى مزاااااااااااج عالى جدا منعول ابو الغربة باخ العيد مبارك عليك يابا والعفو لله والرسول
| |
|
|
|
|
|
|
Re: *** الضحية فى السودان لحمة وشربوت*** (Re: علاء الدين حيموره)
|
علاء الدين سلامات كيفنك يا ود حيمورة العيد مبارك عليك والعفو لله والرسول ربى يجعل ايامكم كلها اعياد
** تخريمة علاء انت وموو بتشقلبوا الصور وتشكلوا منها اشكال كيف بالله ؟ مو مرسل لى صورة من لقطات حفل بورداب الرياض ما بعرفا كيف كيف تحياتى عبرك للعقاب
| |
|
|
|
|
|
|
Re: *** الضحية فى السودان لحمة وشربوت*** (Re: خالد علي محجوب المنسي)
|
Quote: سوما تحياتي الطيبات السلاااام عليك جد عرف قريبك أن يرد لخالك المقلبجي الصاع صاعين ونصف، أخوك طوّل شديد بالحيل من أعياد السودان وحتى لمات العيد صارت يكسوها الضباب في مخيلتي التي بدأت في الضعف الاضمحلال ونسأل الله العافية وباقي عمر نتلمى مع الحنينين البساط أهلنا، أذكر مرة وكان الوالدين في الحج ونحن صغار جهزنا خروف الضحية من قبل العيد بــ15 يوم والخروف مبسوط نحن مبسوطين معاهو نتتاوقه بين الحين والآخر.. قوم يوم الخروف أعملها يوم الوقفة ( التاسوعة ) بالليل بعد العاشرة الخروف ضرب تمام في البرسيم ورقد الرقدا الياها ماقام منها ( مات ) قال في سرّو قبل ما يعملوها فينا أعملها فيهم وكان ياهو مصير .. وبعدها صار المأتم والمناحات والرثاء لخروف ضحيتنا .. نجدنّا قريب لنا عنده بهائم في ليلنا داك ذهبنا له أنا وأخي الكبير في قرية وأحضرنا من البديل للاعب المصاب، شهيد الميدان ما ميدان الجماعة ميدان المعركة بين الحياة والذبح والموت الاختياري.
تحياتي ومودتي سوما |
خالد ود المنسى حبابك يابا قلت لى الخروف اتحنطر برسيم .. كررر... يا يابا كررر اتخيلت منظركم حزنانين عليه.. البركه فى رقبتكم ياخوى لكن صدقت والله .. العيد وسط الاهل ليه نكهة خااااصة وبديك احساس اللمه وبالزات فى الاقاليم والقرى من الصباح الشفع والكبار والصغار يتجاروا على الصلاة قدام الحلة والحاجات الكبار بى مصاليهن وتيابن البيضاء زى قلوب اهلنا القبيل والسبح وريحة بت السودان ولا فلور دامور لما الدنيا كانت بى خيرها احساس جميل جدااا يجوك ملمومين العيد مبارك عليكم يا ناس هوى .. علينا وعليكم يتبارك ادخلوا يا جوه العفو لله والرسول.. انتو برضو اعفو مننا يا ناس منظر بديع واحساس لا يوصفه القلم تسلم يا ود المنسى وربى يجمعك بى اهلك قريب ويجعل ايامك كلها اعياد ان شاء الله
| |
|
|
|
|
|
|
Re: *** الضحية فى السودان لحمة وشربوت*** (Re: Nasir Ahmed Elmustafa)
|
Quote: الضحية السنة دي شيشطاوق وشربوت هربا من الحمة النزفية والوادي المتصدع |
الاخ ناصر احمد المصطفى سلااااااام كل سنه وانت طيب وعيدك مبارك قلت لى شيش طاووق ؟ طيب يا ناصر ياخوى الشيش طاووق ده بعملوا بى شنو ؟ طماطم ولا بصل ؟ ما لازم لحمه برضو صاح ؟ ولاعندكم شيتا نحن ما خابرنو يا ود العم تسلم يا خوى على الطلة وشكرا ليك عيديه
| |
|
|
|
|
|
|
Re: *** الضحية فى السودان لحمة وشربوت*** (Re: محمد مختار جعفر)
|
Quote: سوما .. الفنانه الشاعرة / أسماء الجنيد
تحية عيــد مبارك ، مقدما ، والعيد عيدك بين أهلك وصحابك .. أتمنى لك سفرا سعيدا وعودا حميـدا وحفظك الله دوما ...
محمد مختار جعفر |
الاخ العزيز محمد مختار سلام بى قلدة محنة وشوق اهلنا كل سنة وانت طيب يا ذوق طلتك بدرت بى افراحنا واعيادنا ودمدمت ساحاتنا غيم ضهرى لك التحية موشحه بى طيبة السمحين ومجرتقة بالعديل والزين والشكر ليك دعوات اهل صباحية عيد
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
Quote: ماشة اعيد فى الجنيد |
بختك والله !!
Quote: والقى اهلى كلهم طيبين وسالمين
|
وتامين و متلمين .... إن شاءالله ،
Quote: وكل سنة وانتو طيبين
|
و إنت و جميع أهلك طيبين و ربنا يحقق أمانيكم الغوالى .
| |
|
|
|
|
|
|
Re: *** الضحية فى السودان لحمة وشربوت*** (Re: ابوحراز)
|
Quote: ناس بيتنا عاوزين مننا قروش الضحية وكمان معاها مساخة قلت ليهم الخرفان قالوا جاتهم حمى نزفية قاموا قالوا لي إنت قاعد تاكلهن معانا رسل القروش بلا حمى نزفية بلا حمى مالطية والله انا كنت فرحان جداً باننا السنة دي حا نوفر حق الضحية ونكتفي بالمقولة { فقد ضحى عنك البشير النذير } والمشكلة ست النفر تقول عاوزين يدخلوها الجنة هسي دي خروفها لازم يكون براهو وكمان شنو املح اغبر اشعث اقرن !!! وناس بيتنا خروفهم براهو وأمي تشيل وتتكلم السنة كلها خروف عثمان خروف عثمان ونحن هنا والله نفطر بالعدس ونتغدى نووووووووووووم وياويلك لو كنت عزابي تصحى يوم العيد تدقش ليك 15 كباية قدامك كلهم يصحوا من النوم بدري والواحد يشرب الشاي ويخلي الكباية وكمان يقفلوها معاك تفتح الثلاجة تلقاها كلها { غتاية حلة } والحلة مافي نهائياً أحمد الله السنة الفاتت عيدت مع أهلي اشترينا خروفنا في الحصاحيصا ولميناهو تحت الراكوبة والله العظيم عشرين سمسار كل واحد قال عاوز حقو تقول أنا اشتريت لي { بي أم دبليو } والجزار كل ما اتذكره ضغطي يرتفع 400 درجة ومرات بس الواحد يقول ينتقم فيهو ويكتفو ويفتح ليهو القناة السودانية لمدة يومين عشان تاني مايقوم يسرق اللحم !!! اها قمت اتضرع ومشيت براي سوق الكريبة والمدينة عرب عشان خروف بيتنا الراجل عامل فيها بتاع بهائم وعارف كل شيء قوم يا ابوحراز شوف ليك خروف راسو كبير جداً وماشاء الله الضنب قدر ضنب التمساح ولمن يعاين ويحدر ليك تقول نانسي عجرم طوالي اشتريتو مشينا البيت الجماعة كلهم قعدوا يضحكوا في شنو ياشباب ؟؟ قالوا دي نعجة !!!! قلت ليهم والله الا تكون نعجة جندرية والمشكلة بعد الجندرة قالوا النعجة دي طرشاء وكمان شنو زادنا عمنا من الشعر بيت وقال النعجة دي ليها تلاتة اعياد ضحية ما اتباعت كل عيد صاحبها يرجع بيها ياحقنها حدرت فيني لمن اشتريتها !! المهم رجعنا تاني المدينة عرب واشتريت خوف وجيت فرحان ومبسوط بالله أخوي الأصغر مني كان قاشر ومظبط نفسو بي قروشي طبعاً مما شاف ليك الخروف بس تووووووووووش دخل لي ناس البيت وقام قال ليهم : زولكم المرة دي جاب ليهو { تلاتين } عشرة { 3310 } طبعاً هذا أخس انواع الموبايل !!! |
ابو حراز سلااااااااااااااام والله ضحكتنى جنس ضحك مبالغه غايتو مافى زول سبقك على النعجة دى كان فكونى انا فى السوق بطلع احسن منك و بجيب ليهم غنماية اما تلاتين عشرة اخير منها النعجة ام شلوخ ما عاجبانى ليكم حياة العزابة ام كبابى مجدعه دى يعلم الله احسن تمشى تعيد مع ست النفر وتضبح ليك ان شاء الله عتود المهم اللمه وفرحة الاهل والشربوت زاتو لو صدروه ليكم فى السعوديه ما بنفع الا فى الراكوبة ولا تحت النيمه وديك يا الونسة والجبنة المتكية يا حليلك والله يا حروزة عليك الله ما تغيب قدر ده مره مره اسطع بى نجمك اللامع واتحفنا بنوادرك الظريفة تسلم يا ابو حراز يا صافى النية والعيد مبارك عليك .. علينا وعليك يتبارك العفو لله والرسول وشكرا لمة اهل وحنة عريس ليلة العيد
| |
|
|
|
|
|
|
Re: *** الضحية فى السودان لحمة وشربوت*** (Re: مصدق مصطفى حسين)
|
Quote: والله انا في الغربة كلما انتكي براااااااااااااى واحكل كراع في كراع واعاين فوق لسقف الشقة بقول ود شيقوق افو افو افو افو امانة ما ربك غضب عليك يا حليل عرش بيوت أهلك النجاض البعلقوا فيهو تواريب الهواميك فوووووق ( العنكوليب والعشريف والتبش ) ويا حليل المزارعيين الصحي صحي زى حاج احمد الرفاعي القلتو لي يا اسحاق اخوى مما كملوا حشهم ربطوا حديد نجاماتهم وملوداتهم وواسوقهم في شوال ماهل و مرات كمان يعلقوهو في اضان شعبة امينة البيت وما بنزلوهو الا الرشاش ووقت يجوا يدلوهو يلقوا ليك ابو الدنان سكن في قرينات الشوال .
قمت طلعت يا اسماء اختي برة البناية مع الصباح مع طلعة الشمس اتلفت جاى وجاى وجاى غير الهنود والبنغال ما لقيت الحبة تاني رجعت بتكلم مع نفسي ود شيقوق حليلك هسع قدلة زى دى ما تستاهل تكون قدلة زولا وسط عولو بشهّل في حالو لسدرة الخلاء وتقوم أم أولاده النجيضة تشهلو بملاح ورق بكمونية بايت ليهو يومين معلق في المشلعيب وعليهو كسرة بااااااااايتة نصفها لين ونصفها يابس ويختوا ليك جنبو ليمونة صفّرة عينة الليمون البقع براهو من فروعو وكتين يستوى . وكان بخيت تكون كسرتك حمّرة والطاحونة فاطة فيها تلاتة اربعة حبات وتقوم كدى تنعدل متوجه حواشتك .
تقوم تتذكر انك نسيت التمباك وتاني ترجع لدكان الشريف عبد اللطيف تملأ حقتك وتخمش ليك سفة من حقتو ( بضم الحاء) قبال يسلمك حقتك وتقوم تطلع القروش ومنتظره يرجّع ليك باقيك وتقوم تاخد ليك ترة لى وراء وتلفض السفة زى لفضة الخرطوش للجبخانة وقت عقد الزواج وتجي تقول ليهو ( اديني الباقي يا حاج) |
ود شيقوق
محنك وهضربتك دى كلام زولا خلاس فات فيهو الفوات ،، أخير ليك ياخوى تلملم عقابك وتختر أهلك ،، إت الزيك الفطموهو بى عُكارة كسرة بايته تب ما بنعدل حالوا ،،، نحن هسى فى القَرِن الواحد والعشرين تقوم تمرق لينا كلاما طيروا عجمى ما قادرين نفهم منو التكتح !!!
سوما
أمانه عليك أوصيك على الشيقوق تقوديهو معاك من إيدو .. اول فى التبادى تخليهو يتحنطر بى شربوت واكرميهو بى جداده خليهو يطلع بيها فوق راس البيت ياكلا ،،، وبعدين توصليه لى أهلوا ،، وتسلميه لى امه فى إيدا ،،،
| |
|
|
|
|
|
|
Re: *** الضحية فى السودان لحمة وشربوت*** (Re: ابو جهينة)
|
Quote: سوما
إنت مش قلت ماشة أعيد في السودان؟ إنت هنا ولا هناك؟
في كل الأحوال عيدك مبارك و القابلة على أمانيك ... |
ابو جهينه حبااااااااابك والله وين الحى بيك ياالحنين انا ماشة اعيد فى السودان ان شاء الله دعواتك معاى يا جلال ياخوى وان شاء الله العيد مبارك عليكم والعفو لله والرسول تحياتى عبرك للعائلة الكريمة وعيد سعيد ان شاء الله
| |
|
|
|
|
|
|
Re: *** الضحية فى السودان لحمة وشربوت*** (Re: الفاتح الجنيد)
|
Quote: سوما
أمانه عليك أوصيك على الشيقوق تقوديهو معاك من إيدو .. اول فى التبادى تخليهو يتحنطر بى شربوت واكرميهو بى جداده خليهو يطلع بيها فوق راس البيت ياكلا ،،، وبعدين توصليه لى أهلوا ،، وتسلميه لى امه فى إيدا ،،، |
ود الجنيد عليك الله ات بى صحك ؟ النبى فيك دى وصية توصينى ليها ؟؟ مالك على يا ابو الوليدات دى شبكة ما عندى ليها لا حولة ولا قوة اولا بالتبادى جداده دى عرفناها .. يطلع بيها راس البيت دى كيف ؟ وكان جاء منقشط نلموا كيفن عاد ؟ نبقى لينا فى رقبة كمان ؟؟ برىىىىىىىىى يا يابا والشى الاهم فى زمتك دى ود العريبى ده بنقاد؟ وكمان قال داير شربوت البطاحين وحات الله الا نلموا فى كرتينه ونشحنوا الدندر بالروارى ولا نفكوا عكس الهواء كدارى
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
سوما اللطيفة, كل سنة وانت واسرتك بالف خير تعرفى قبل سنتين عيدت فى رفاعة لكن لقيت ليك الخرفان سميينة وامينة.. اها جبنا واحد من جنس دا بس انتظرت لمتين الداهى ابقي في خبر كان.. تعرفي ليييه ؟ عشان انا بموت فى باقى الخروف .. الربيت الربيت بالشربوت والباسم .. تسلمى يابلديات وانشاء الله معيدة فى البلد؟
| |
|
|
|
|
|
|
Re: *** الضحية فى السودان لحمة وشربوت*** (Re: سمندلاوى)
|
بصراحة شديدة ممارسة القتل الجماعي بالتعتيم على وباء حمى الوادي المتصدع عبد الله عبد اللطيف/بريتوريا [email protected] ظهر في السودان في الآونة الأخيرة اثنان من الأوبئة الفيروسية الخطيرة المتناقلة بين الحيوان والإنسان ( Zoonosis) أي المرض الذي يصدره الحيوان، وهما وباء انفلونزا الطيور وهو من الفصيلة العالية الخطورة ( HPH5N1) والذي – بحمد الله – تم تشخيصه في مزارع الدواجن بالخرطوم والجزيرة. ووباء حمى الوادي المتصدع أو الحمى النزفية ( Rift V alley Fever) والذي هو موضوع هذا المقال. تعريف مرض حمى الوادي المتصدع في الحيوان: هو مرض حاد وشبه حاد يصيب الحيوانات المجترة في أفريقيا ومسببه فيروس يتناقل بواسطة البعوض ويتسبب في تنحر الكبد ( necrotic hepatitis) والنزيف وفي أغلب الأحيان تكون الإصابة غير واضحة الأعراض السريرية، والمرض أكثر حدة في قطعان الضأن والماعز والأبقار ويسبب نفوقاً كبيراً في القطيع وخصوصاً الحديث الولادة، ويجهض الأمهات بنسبة عالية ( abortion). وأهمية المرض تأتي من امكانية عدوى الإنسان بواسطة البعوض أو ملامسة الشخص لأنسجة وأعضاء الحيوان المريض. والمرض ليس بجديد على السودان وإنما رصدت الإصابة به في عدد من الوبائيات كان آخرها عام 2003. الموقف الراهن للوباء في الإنسان بالسودان: ظهر الوباء مطلع أكتوبر 2007 وانتشر في أكثر من 15 موقع تشمل ثلاث ولايات هي سنار والنيل الأبيض والجزيرة وهي الأكثر تأثراً. وكما هو معروف عن وبائية المرض فإن معظم الإصابات البشرية تكون خفيفة نسبياً وتظهر على شاكلة الإصابة بالانفلونزا وتكون أكثر حدة في نسبة قليلة من المرضى ويصابون بأعراض عصبية وبنزيف دموي حاد يؤدي إلى تقيؤ الدم أو عبر البراز مع حدوث نزيف من الأنف أو اللثة، والإصابة بالتهاب العيون قد تؤدي إلى العمى الجزئي أو الكلي. وأود أن ألقي بعض الإحصائيات عن درجة الإصابة وعدد القتلى مستمداً معلوماتي من المنسوب لو زارة الصحة الولائية بالخرطوم ومنظمة الصحة العالمية التي تعمل مع وزارة بالسودان منذ أن طلب منها مد يد المساعدة في أكتوبر 2007 كما جاء في الأخبار. ومن تاريخ 2 /11 /2007 إلى 23 /11/2007 (خلال 21 يوم) رصدت عدد 915 حالة إصابة وَ 347 حالة وفاة، مما يجعل نسبة الوفيات تصل إلى 38% وهذه إحصائية مرعبة مخالفة لما هو معروف عن نسبة الوفيات من المرض من تقارير أخرى. ونسبة 38% عالية جداً ويعزى هذا لأسباب عديدة منها مقدار حدة وبائية الفيروس (< /FONT> virulence) وانتشار المرض الواسع في قطيع الحيوان (الضأن خصوصاً) ولم يفصح عن الأرقام في النفوق حتى الآن، مع كثافة الناقل من البعوض وعدم الوعي بين الرعاة والمزارعين والمواطنين، مع قابلية الحيوان والإنسان للمرض. وبالنظر للإحصائية فيمكن التكهن بأن العدد الحقيقي للمصابين غير معروف مما رفع من نسبة الوفيات. والإصابات التي أمكن التعرف عليها هي الإصابات البالغة الخطورة والتي تم تسجيلها بالمستشفيات وأن غالبية المصابين هم من العامة من الرعاة والمزارعين الذين لا حول لهم ولا قوة ولا يملكون إلا الشهادة لرب العالمين وبقبول 'الابتلاء'. ماذا عن عيد الأضحى في 20 ديسمبر؟ استمعت لوزير الثروة الحيوانية مخاطباً جلسة المجلس الوطني ومرة أخرى مخاطباً مجلس الولايات شارحاً أبعاد المرض والتحوطات التي اتخذتها وزارته لدرء وباء حمى الوادي المتصدع. وذكر في التنويرين أن 'القطيع خالي تماماً من المرض، وأنه لا توجد أي علامة على المرض'...'وأن النتائج التي وصلت من المعمل المرجعي بجنوب أفريقيا تؤكد على سلامة القطيع'. أولاً: لا يمكن بأي حال أن يكون القطيع سليماً والوباء ما زال يفتك بالقطيع وعباد الرحمن حتى تاريخ 23/11 /2007 وقد تأكدت من مصدر موثوق به في السودان ( 26/11 /20 07) أن نسبة النفوق في الضأن خصوصاً تفوق المئات وأن نسبة الإجهاض في القطيع خيالية مما يؤكد على حدة المرض وخصوصاً في الجزيرة . ولم يدلي المسئولون بأي تصريح في هذا الأمر إطلاقاً وهناك تعتيم يتم بتنسيق من الجهات البيطرية والولائية والمعامل ذات المسئولية في م كافحة الأوبئة. ثانياً: التأكد من خلو القطيع من الوباء يجب إجراء مسوحات وبائية في كل المواقع المجاورة لمناطق الوبائيات المنتشرة في ثلاث ولايات ولا يمكن أن يتم ذلك في عجالة. ثالثاً: وأنا أؤكد أنه وحتى تاريخ 26/11 /2007 لم تصل المعمل المرجعي بجنوب أفريقيا - خلافاً لما ذكر الوزير – أي عينات لتأكيد أو نفي المرض. وقد اتصلت بالسفارة السودانية حسب رجاء خاص من مدير المعمل المرجعي بجنوب أفريقيا مستفسراً عن العينات المرسلة من السودان والتي سمع عنها المدير من بعض المنظمات المتابعة لخبر الوباء بالبلاد، ولم يصلني أي رد من السفارة بعد. وأنا أقولها داوية: يا وزير الثروة الحيوانية، سعادة العميد – هل أنت على علم بعدم صحة التقا رير التي أعلنتها للشعب السوداني والعالم؟ وهل رأيت بعينك واطلعت على النتائج الواردة من المعمل المرجعي ببريتوريا؟ لماذا تكذبون على الشعب – والراعي لا يكذب أهله – ولماذا تقتلون مواطنيكم البسطاء من الرعاة والمزارعين بالتعتيم على الوباء؟ وكان الأجدر أن تملكوهم الحقيقة وأن تقولوا لهم: هناك خطر حقيقي وأنتم أكثر الناس عرضة له، يجب أن تتبعوا الإجراءات الوقائية لتتجنبوا العدوى، ابتعدوا عن ذبح الحيوان المريض وكل مشتبه فيه، لا تتعاملوا مع دمه ولحمه ولبنه، ولا تساعدوا في توليد الحيوانات، واستخدموا الناموسيات الواقية من البعوض. اجعلوا منها حملة قومية لمكافحة الوباء ولا تستبدلوا أرواح العباد بدولارات التصدير. وصلتني رسائل من عدد من المعارف يستفسرون عن مصير الأضاحي والعيد على الأبواب في خلال أقل من شهر .. والرد واضح بالنسبة لي.. إصدار قرار يمنع تصدير الماشية من الولايات للخارج وخصوصاً الولايات المعنية بالوباء (سنار، الجزيرة، النيل الأبيض) إلى مدن السودان الأخرى حتى يتم السيطرة على المرض بيطرياً وليس بقرار سياسي، يجب على السلطات البيطرية مستعينة بالسلطات الأمنية من مراقبة حركة الماشية وإعلان السودان انه منطقة موبوءة حتى يتم السيطرة التامة على الوباء. وقد أرجع السبب للوباء الذي رصد في جمهورية مصر في عام 1977 - 1978 وتوفي خلاله 600 شخص لاستيراد الضان الحامل للفيروس من السودان. يجب إجراء مسح وبائي بعد شهر من ظهور آخر حالة مرضية (نحتاج لمراقبين دوليين وبعثة طبية وبيطرية أممية) للتأكد من خلو القطيع من الفيروس. بهذه المعلومة العلمية، وبما أن آخر حالة (حالياً) كانت بتاريخ 23/11 /2007 (حسب المصدر الموثوق) وأن عيد الأضحى يجيء بعد أقل من شهر من هذا التاريخ فإني وللأمانة العلمية ونظراً للطريقة التي نتعامل بها في عملية الذبح والسلخ وأكل المرارة أن يتوقف المواطنون في هذا العيد عن ذبح الخراف حفاظاً على أرواحهم .. لا تلقوا بأنفسكم للتهلكة فتهلكوا وتكونوا من ا لخاسرين. وخصوصاً أهلنا في المناطق الموبوءة وهذه ليست فتوى من شيخ (والعياذ بالله) ولكن من طبيب بيطري يعمل في الحقل والأبحاث البيطرية لأكثر من ثلاثين عاماً وما زال يعمل بالمعمل 'المرجعي' بجنوب أفريقيا.
| |
|
|
|
|
|
|
Re: *** الضحية فى السودان لحمة وشربوت*** (Re: مزاحم الضوي)
|
Quote: وللأمانة العلمية ونظراً للطريقة التي نتعامل بها في عملية الذبح والسلخ وأكل المرارة أن يتوقف المواطنون في هذا العيد عن ذبح الخراف حفاظاً على أرواحهم .. لا تلقوا بأنفسكم للتهلكة فتهلكوا وتكونوا من ا لخاسرين. وخصوصاً أهلنا في المناطق الموبوءة وهذه ليست فتوى من شيخ (والعياذ بالله) ولكن من طبيب بيطري يعمل في الحقل والأبحاث البيطرية لأكثر من ثلاثين عاماً وما زال يعمل بالمعمل 'المرجعي' بجنوب أفريقيا |
الاخ مزاحم الضوى حبابك الف وكل سنة وانت طيب وشكرا للمعلومة العلمية القيمة والسرد المفصل للحالة التى آل لها الوضع الصحى فى بلدنا الحبيب جد الوضع مخيف اهلنا الغلابة الغبش ليهم الله بس يحفظهم ويغطيهم منو البقرا الاحصائيات دى ؟ مافى اى توعية مافى اى نصح بالحقيقة المره ربنا يشفى ويحفظ الجميع ان شاء الله ويجعل العيد فال خير وفرح بدل الخوف والرعب الممكن يواجهم بسبب هذا المرض اللعين تحياتى اخى مزاحم وشكرا مره اخرى
** متاوقة انا ما حا آكل مرارة ... شية جمر بس تنفع يا مزاحم ياخ ؟؟ لزوم الشربوت وكدة ..
| |
|
|
|
|
|
|
Re: *** الضحية فى السودان لحمة وشربوت*** (Re: سمندلاوى)
|
Quote: سوما اللطيفة, كل سنة وانت واسرتك بالف خير تعرفى قبل سنتين عيدت فى رفاعة لكن لقيت ليك الخرفان سميينة وامينة.. اها جبنا واحد من جنس دا بس انتظرت لمتين الداهى ابقي في خبر كان.. تعرفي ليييه ؟ عشان انا بموت فى باقى الخروف .. الربيت الربيت بالشربوت والباسم .. تسلمى يابلديات وانشاء الله معيدة فى البلد؟ |
سلااااااام سمندلاوى كيفك يا بكرى يا قريبى وود اهلى الحنان يا حليلك والله ليك وحشة اريتك كان معيد العيد ده مع الاهل عشان نتلاقى يا الحنين خلاص انا بقوم بالواجب بالنيابة وبمشى رفاعه شارع شارع اطايب ليك الحبان ببدأ من شارع اللبن قلت لى بتريد الربيت ؟ والله طلبك هين بالحيل خلاص الربيت شحنو ساااااااااهل بنرسلوا ليك تب بس رسل العلوان شكرا بكرى الانسان الفنان كل سنه انت واسرتك بالف خير رد الله غربتنا جميعايا رب شكرا صلاة عيد فى الحلة الجديدة بين رفاعه والجنيد
| |
|
|
|
|
|
|
Re: *** الضحية فى السودان لحمة وشربوت*** (Re: الطيب شيقوق)
|
Quote: وحقيقى والله عجبتنى مداخلتك الفريده فى نوعها وخاصة انك كتبتها كده بى مزاااااااااااج عالى جدا |
انت قايلة انا بعد قبضت تذكرتي عندى هم تاني ؟ والله مشنق طاقيتي وحائم منتظر بس تقولوا لينا انعدلوا اتكاملوا الطيارة . هسع عليك الرسول يا سوما قولى لي بصراااااااااحة . اكان ما بقيتي سوما القروكي اهلك وصرت تسفرى الناس بالهواء مش اكان هسع تكونى تابعة البهمان ؟
| |
|
|
|
|
|
|
Re: *** الضحية فى السودان لحمة وشربوت*** (Re: الطيب شيقوق)
|
Quote: هسع عليك الرسول يا سوما قولى لي بصراااااااااحة . اكان ما بقيتي سوما القروكي اهلك وصرت تسفرى الناس بالهواء مش اكان هسع تكونى تابعة البهمان ؟ |
ود شيقوق حبابك اريتنى يا يابا كان تبعت بهمان اهلى وتبعت المراح من الصباح قبال الملاح .. : اريتنى كان بقيت زى اهلى الغبش عليك الله فى احلا من عيشتهم وسماحتهم ومحنتهم وعفويتهم وطيبتهم البتخدر بلد شكرا ود شيقوق شكرا محنة
تخريمة اوعك تجينى ناطى وتقولى غيرى الحجز العيد بقى يوم الاربعاء كونو مخ العروب دائما ما بحسبها صاح مى شغلتى تب
| |
|
|
|
|
|
|
Re: *** الضحية فى السودان لحمة وشربوت*** (Re: Ahmed Yousif Abu Harira)
|
Quote: سوما كيفنك والعيد مبارك عليك مقدما..
شربوط البطاحين
الطيب ده كان جاكم زيدوا لو الشربوت "بقنية" ووصلوه مباشرة لموقف "باظات" الدندر ... لا يجيبلنا رقبه.. |
احمدود اب حريرة حبابك اخوى يا سليل الجود والكرم
العيد مبارك عليك يابا والعفو لله والرسول وصل سلامى ومعايدتى لى كل اهلى البطاحين بى طرفكم ربى يحقق امانيكم ويعود الايام ان شاء الله
دحن يا احمد يا خوى العريبى ود شيقوق ده مو دايرلو شبكة براه؟ دحن هسه يكوس لى شربوتنا ويغنى عليه وبى غادى يكوس لى فرقة اولاد اهلنا البطاحين يمشوا يغنوا ليه فى الدندر غايتو اهلك اليوم داك بتمحنوا تب من سماحة النضمى والغنا والصقرية اللت اهلنا الغبش هيــــــــع عفيت منكم اهلى السمحين شكرا ود اب حريرة سند القبيلة
| |
|
|
|
|
|
|
Re: *** الضحية فى السودان لحمة وشربوت*** (Re: الطيب شيقوق)
|
Quote: هو تاني بعد ده بنقاد ما علا يمشى حبيان من شربوط البطاحين المعّّم بالفلاني يا فتوحي |
ود شقوق هوى يا زول هوى انت البطاحين ديل كان ما طريتهم ماك بترتاح انت ناسى اهلى ناس اب حريرة ؟ هيـــــع وحات الله اعمل بى وصية اخوى احمد اب حريرة دى الا تقعد بى عمرك ده كلو ترقص (الوابور جاز خلى اليشتغل والشغل شربوت خلى اليشتغل )
قال بطاحين قال اخيرلك تختانا يا عريبى
| |
|
|
|
|
|
|
Re: *** الضحية فى السودان لحمة وشربوت*** (Re: محمَّد زين الشفيع أحمد)
|
SomaQuote: مَرَرْتُ مِنْ هُنا فأحببْتُ أنْ أُلْقي
التَّحيَّةَ عليْكِ وعلى كُلِّ الأهلِ
" بالجنيد " ..
" والعيدُ مُبارَكٌ عليكْ "
وكُلُّ عامٍ وأنْتِ بخيْر ..
احترامي ،،،
أخوك / محمَّد زين ... |
الاخ محمد زين حبابك يا دخرى الوالدين طلتك بالحيل عجبتنى والله نجيك فى السمح ان شاء الله والعيد مبارك عليك .. العفو لله والرسول اخوى محمد شاحده الله بركة قبايل العيد تلقى الفى مرادك ..يخدر دربك ويسهل امرك وان شاء الله السعاده تبقالك رفيق طول الطريق والعافية تبقالك هدم يا ود العم قول آمين شنو ليك لقيتنى حبوبة ولا لا ؟ تسلم الاخ محمد وشكرا محنة
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
الاستاذة / اسماء كل عام وانتى بالف خير وتصلى وترجعى لينا بالسلامة
ده خروف الكرامة
اما حق الضحية الما معروف الي الان ، على اي اساس حيعملوا الشربوت ؟ الشربوت عادة بتعمل على اساس الخروف مضمون ، لكن السنة الوضع بختلف . غايتو شيلى ليكي كم علبة تانج احتياطى ، يمكن الشربوت ذاتو يكون مافى .
| |
|
|
|
|
|
|
Re: *** الضحية فى السودان لحمة وشربوت*** (Re: عبد الدائم سيد أحمد)
|
شاعرتنا الراقية سوما تصحبك السلامة..وتجدى الاهل بخير وسلمى لينا على كل الاهل..من ود الجنيد لى الحصاحيصا لينا16 سنة من ضحية السودان وشربوتو بس انشاء الله الشربوت السنة دى يانا الساونو فى شقتنا..فى مدينة تورنتو..وضاربين اللحم بتاع المزارع..اصلو الخروف ممنوع ..ينضبح فى المنزل ولا الشارع يمشوا الناس من الدغش على المزارع يرجعوا بالليل شايلين خروفن..العيد زاتو يكون نصو راح نتمنى ليك اجازة طيبة وسط لمة الاهل والحبان والجيران وترجعى بالسلامة وكل سنة انت والاسرة بخير..والامانى محققة
| |
|
|
|
|
|
|
Re: *** الضحية فى السودان لحمة وشربوت*** (Re: عبد المنعم سيد احمد)
|
Quote: من الصباح الشفع والكبار والصغار يتجاروا على الصلاة قدام الحلة والحاجات الكبار بى مصاليهن وتيابن البيضاء زى قلوب اهلنا القبيل والسبح وريحة بت السودان ولا فلور دامور لما الدنيا كانت بى خيرها احساس جميل جدااا يجوك ملمومين العيد مبارك عليكم يا ناس هوى .. علينا وعليكم يتبارك ادخلوا يا جوه العفو لله والرسول.. انتو برضو اعفو مننا يا ناس منظر بديع واحساس لا يوصفه القلم تسلم يا ود المنسى وربى يجمعك بى اهلك قريب ويجعل ايامك كلها اعياد ان شاء الله |
سوما الفاضلة تحية طيبة سلااااام عليك يوم التاسوعة كما يحلو لنا تسمية ليل الوقوف بعرفة ( أوعدنا يا رب ) له نكه خاصة من الصباح ...مرقو العدّا من الفضية غسلوها من تراب السجم اللامي فيها من كتاتيح الشهر المضى. وشي مكوة وغسيل ت بي غادي بنية كاربا راسا بي إشاربي ومعلقا المكشاشا في عود قنايا ( تزعف في حيان ) يا سلااااااااام والنضافة سهرة صباحي ... بس كنت بكره لما يقولوا شيل الكرشا دي فضيها في حفرة كنت دوماً اشيل هم عيد الأضحى عشان الكرشا دي ورغم ذلك بكون سعيد.
| |
|
|
|
|
|
|
Re: *** الضحية فى السودان لحمة وشربوت*** (Re: خالد علي محجوب المنسي)
|
Quote: سوما الفاضلة تحية طيبة سلااااام عليك يوم التاسوعة كما يحلو لنا تسمية ليل الوقوف بعرفة ( أوعدنا يا رب ) له نكه خاصة من الصباح ...مرقو العدّا من الفضية غسلوها من تراب السجم اللامي فيها من كتاتيح الشهر المضى. وشي مكوة وغسيل ت بي غادي بنية كاربا راسا بي إشاربي ومعلقا المكشاشا في عود قنايا ( تزعف في حيان ) يا سلااااااااام والنضافة سهرة صباحي ... بس كنت بكره لما يقولوا شيل الكرشا دي فضيها في حفرة كنت دوماً اشيل هم عيد الأضحى عشان الكرشا دي ورغم ذلك بكون سعيد |
خالد اخوى حبابك يا عشا الضيفان ذكرتنى حاجات سمحة بالحيل رغم المعاناة والتعب ما بتحس بى ارهاق الفرحه كانت اكبر من كل الظروف اظرف شىء زحمة التجهيزات والضيق فى آخر لحظه تلقى الناس تتمنى انه العيد ما يكون بكره عشان هم لسه حاجاتهم ما خلصوها فيهم الما حلق للشفع واللسه عنده غسل شبابيك وابواب والما كنسوا قدام الحوش وحاجات كتيره..رغم انه عارفين من سنه انه العيد جاى بكره خالد اخوى لقيتك امين بالحيل على البوست ده دحن ابقى عشرة وما تتوصى خيتك ماشة العيد ان شاء الله ما عليك الا تجى تاوق مره مره كان لقيت زول طايبو ودخلوا يا جوة اعمل حسابك بكرى ده باقى اليومين ديل ملخوم شديد ما يقوم يلفحوا لى للارشيف ابقى عشرة ولى قدام تسلم يا الحنين
| |
|
|
|
|
|
|
Re: *** الضحية فى السودان لحمة وشربوت*** (Re: عبد الدائم سيد أحمد)
|
Quote: الاستاذة / اسماء كل عام وانتى بالف خير وتصلى وترجعى لينا بالسلامة
ده خروف الكرامة |
سلام اخوى عبد الدائم ادام الله عليك نعمة الصحة والعافيه قول آمين ما قصرت معاى ياخوى تب ما يقصرن ايامك ان شاء الله كمان كرامة قبال الضحية ؟ عفيت من يا ود ملوك النيل
وما شاء الله عينى بااااااردة امانة خروفك مو كارب يشهى فى الشية .. والربيت لى اخوى بكرى السمندلاوى
Quote: اما حق الضحية الما معروف الي الان ، على اي اساس حيعملوا الشربوت ؟ الشربوت عادة بتعمل على اساس الخروف مضمون ، لكن السنة الوضع بختلف . غايتو شيلى ليكي كم علبة تانج احتياطى ، يمكن الشربوت ذاتو يكون مافى |
عاد يا عبد الدائم يا خوى دحن التانج بسد محل الشربوت ؟ كفانا خروفك الفوق ده .. بنعمل ليه تيراب وحيد هول شربوت تسلم اخوى عبد الدائم والعيد مبارك عليك علينا وعليك يتبارك العفو لله والرسول شكرا أردب محنة
| |
|
|
|
|
|
|
Re: *** الضحية فى السودان لحمة وشربوت*** (Re: محمد أبوالعزائم أبوالريش)
|
الاخ محمد سلامات يا حنين واهنئك على قرارك الارتجالى قرار سليم مية بالمية والله ان شاء الله تتهنا وسط الاهل والاحبة يا رب وكل سنة وانت طيب يا رب قلت لى نحن فى الجنيد وانت فى الخرطوم مدنى مافى ولا شنو يا عم ؟ اقول ليك ... جايبه ليك معاى بقجة من السنى اها رايك فى البقجة دى ؟ تكون ليك سنين من كلمة بقجة اها لقيتنى غبشة جد جد ولا لا تحياتى .. وامانة عليك لو اتصلت بالحنين السنى قولى احكى لى قصة رقم سوما الموبايل ؟؟ شكرا اردب محنة
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
سوما ازيك يا بنت أهلي الحنان .. وانتي ماشه كده على الجنيد تقومي تقشي القلقالة وتبلغيهم سلامنا .. غايتو نحن اعياد السودان دي حاربناها زمان إلا مره مره كده .. كل سنة انتي والأهل كلهم بخير ..
بالسلامة إن شاء الله ..
| |
|
|
|
|
|
|
Re: *** الضحية فى السودان لحمة وشربوت*** (Re: معتصم دفع الله)
|
الرائعة سوما
كل عام وأنت والأسرة بألف خير. العيد مبارك علينا وعليكم. تصوري عيدت التلات مرات الأخيرة مع أهلي بالسودان. ما أجمل العيد في الوطن وما أجمل الناس. هذا العام مع وجود حمى الوادي المتصدع، سيتردد الأهل ألف مرة قبل أن يذبحوا خرافهم! اللهم وقهم من شرور الأمراض وعجز الحكومات قادر يا كريم.
أنشاء الله تصلي وترجعي بالسلامة وقولي لينا الجديد في عيد هذا العام.
| |
|
|
|
|
|
|
Re: *** الضحية فى السودان لحمة وشربوت*** (Re: soma)
|
الغالية الأستاذة / ســــــــــــوما
كل عام وأنت والأسرة الكريمة بألف خير ...
تحياتي لهم فرداً فرداً من البنطون إلى الجنيد الحله ...
ولو أمكن رسلي لينا جركانة كده كاربة لأنو معاي أخواني معتصم وتمبس ما بنفعني براهم .
| |
|
|
|
|
|
|
Re: *** الضحية فى السودان لحمة وشربوت*** (Re: أبووجيدة)
|
Quote: العيد مبارك عليكم علينا وعليكم يتبارك العفو لله والرسول... اها يا اهلنا العيد معروف فى السودان لحمة وشربوت لحمه قالوا مافى الشيربوت نشربوا ولا نخلى ؟؟ وهو زاتو ما بتخلى نسوى شنو؟؟ نشربوا على لحم بطنا يجيب لينا فقعان مرارة كمان ولا نسوى اضان الخروف طرشة ونضبح ونشوى وناكل ونرجى الله فى ترع الجنيد اتصلت بى ناس بيتنا قلت ليهم اها كيف تجهيزات العيد اول شىء قالوا لى الشيربوت حيكون رهيــــــــب قلت لى امى ما قالوا مافى ضحية السنة دى قالت لى ببساطة ما عندنا شغلة فى ناس الحكومة يا بت دايرين يتحكموا فى ضحيتنا كمان ** متاوقة ماشة اعيد فى الجنيد يا ناس دعواتكم لى اصل بالسلامه والقى اهلى كلهم طيبين وسالمين وكل سنة وانتو طيبين تحياتى اسماء الجنيد/ مسقط |
سوما اختي لكن ما بتبالغي عديل كده جمعتي حاجتين مع بعض فرحة وهضربة الله يكتب ليك السلامة إنشاء الله وتشبعي في اللحم وتكركعي من الشربوت .
| |
|
|
|
|
|
|
|