|
|
 ساخر سبيل : هواء ساااكت !
|
بينما كنت أقف صباحا أمام كشك الجرائد مع صديقى (لطفى) نتجاذب اطراف الحديث وقف أمامنا شاب فى مقتبل العمر يرتدى ملابس نظيفة ومتناسقه ولا تبدو عليه أى علامات (مش هيا) ، سألة لطفى الذى يبدو أنه يعرفه :
- وين إنت يا زول ؟
- انا مشيت للحلاق أصلّح العربية بس أول ما دخلت لقيت ليك (العجب) قاعد يشوت فى (البلنتى) والإستاد ده كلو واقف حيلو وماسك فى شماعت الحافلة والكمسارى واقف قاعد يشحن الموبايل بتاعو فى محل السندوتشات !!
- (وهو يخاطب أحد المارة) : هواء ساااكت ؟؟ طيب تعال بالله أوزن ليا (اللساتك) دى !!
(ثم مواصلاً) أها أنا قمت قلت كده ح إتأخر قمت نزلت قدام الصراف الآلى دخلت البطاقه قام بتاع الحركة عمل ليا مخالفه وقطعنى إيصال وشال منى (الحاجه البارده)
- (مرة أخرى يخاطب أحد المارة) : هواء ساااكت ؟؟ طيب تعال بالله أوزن ليا (اللساتك) دى !!
(ثم مواصلاً) : أها قمت طوالى طلعت لقيت بتاع أمجاد أشرت ليهو قام وقف قلت ليهو ماشى مشوار قال ليا ما بقدر ماشى أسدد الشيك بتاعى ده أها فى اللحظة دى قامت الكهرباء قطعت والكمبيوتر إتقفل و(الويندوز) طش قمت قلت ليهو نزلنى هنا قام نزلنى لقيت ليك نفسى قدام الدايات نزلت دخلت بتاع الموبايلات أها شربت ليا منو إتنين 3310 وواحد شيطان وركبت رجعت البيت !!
- (مرة أخرى يخاطب أحد المارة) : هواء ساااكت ؟؟ طيب تعال بالله أوزن ليا (اللساتك) دى !!
ما أن غادر (طلال) حتى وجدتنى أسال (لطفى) عن سبب هذه (الهترشة) والكلام الغير مترابط ، أخبرنى لطفى بأن (طلال) قد تعرض إلى ضغط عصبى أودى به إلى هذه الحالة كما أخبرة أحد أقربائه بذلك ، فهو أحد الخريجين الذين وقفوا ينتظرون فرصة للعمل سنين طويلة دون جدوى وعندما أصابه اليأس من فرص التعيين قام طلال بشراء (حافلة أمجاد) من أحد البنوك (السابت شغلا وبقت تبيع عربات دى) وذلك بهامش ربح للبنك يعادل أكثر من (ثلث الثمن) وقد بدأ فى تسديد الأقساط (المجحفة) وذلك بالعمل ليل نهار مما سبب له إرهاقا شديداً جعله يستعين بنوع من (الحبوب المنشطة) – يواصل لطفى- بعد القرار الأخير بإيقاف عمل (الأمجاد والحافلات) بالدخول والعمل فى (قلب الخرطوم) تدهور (أيراد الأمجاد) الشئ الذى جعل (طلال) غير قادر على تسديد (القسط) فى مواعيده مما جعل إدارة البنك تتصل به معطية أياه فرصة (اسبوع) للسداد أو تقديم (الشيك) للنيابه ، بدأ (طلال)
يعمل ليل نهار دون توقف آملا فى جمع مبلغ (الشيك) ، فى اليوم قبل الأخير وبينما كان يسير بعربته فى ساعه متأخرة من الليل فى أحد الأحياء بعد أن قام بإنزال مشوار أوقفه رجل (خمسينى) يبدو عليه الإرتباك :
- عليك الله بس عاوزين نوصل الدايات الحاجه دى بتتوجع وكده !
إنطلقت الأمجاد تحمل (الرجل) وزوجته ذات (البطن المنتفخ) التى ما فتئت تتأوه صوب (الدايات)
- إن شاء الله الحاجه تتحلا بالسلامة
- الله يسلمك يابنى ... تعرف أنا عندى ستة بنات وبفتش للولد
- ربنا إن شاء الله يرزقك ولد يا حاج
- تعرف يا إبنى الظاهر إنت وش سعد تعرف لو المولود جاء ولد أنا ح أديك (إتنين مليون) ولو كمان ربنا (جابا بت) أنا ما ح أقصرمعاك برضو وح أديك (مليون) جنيه
توقفت الأمجاد فى تلك الساعه المتأخرة من الليل أمام الدايات .. دخل الرجل وزوجته ... تشاغل (طلال) بتنظيف زجاج (الأمجاد) و(البودى) بفوطه كان يحملها وهو يقوم بتكسير الوكت ممنيا نفسه (بالجائزة) التى وعدها به الرجل والتى فى حدها الأدنى (لو جات بت) سوف تساعده فى تسديد (شيك البنك) التى أزفت مواعيده وتبعده عن شبح (النيابة) والسجن والتلتلة .. ده لو ما (جاء ولد) والأمور بقت آخر (عسل) .
لم يقطع تفكير (طلال) إلا منظر (الرجل) وهو يخرج من (بوابة الدايات) متجها صوب الأمجاد :
- شنو بشر؟ إن شاء الله يكون ولد
- (فى حزن) : لا
- أها (بت) مش كده
- ولا بت !
- أها طيب شنو
- الحمل طلع هواء .. هواء ساااكت !!
|
|
 
|
|
|
|
|
|
|
|
Re: ساخر سبيل : هواء ساااكت ! (Re: sama7)
|
هواء .. هواء...
بالليل ده ماشي وين الهواء ده..
ذكرتي واحد ليبي ربنا يرحمه حياً ميتاً
أوقفت في الطريق بعد منتصف الليل ( الغالبية لا تمانع عادة في إيجار سياراتهم الخاصة)..
وحضر معي للبيت ونقلنا (الحاجة) للمستشفى للوضوع..
لكنه رفض أخذ الإيجار وأصر على الإنتظار بالموقف حتى يعرف آخر المطاف..
وفي الثلث الأخير من الليل بشرته ...
بنت..
| |
|
|
|
|
|
|
|
|
|
Re: ساخر سبيل : هواء ساااكت ! (Re: الفاتح يوسف جبرا)
|
اســـتاذنا الكبير الفاتح ( ابوناجي). .
ســـــلامات . .
| Quote: . فإنك يا صديقي . . رائد الأدب الساخر.. هذا الأدب الذي يغوص في اعماق قضايا المواطنين . . فيترجم احاسيسهم . . ويعكس معاناتهم . . ويرسل رسائل إعلامية قوية . . ذات اهداف واضحة . . ومؤثرة . . بإسلوب عميق المعاني . . سلس وجذاب . . وساخر . . يعكس تراجيديا الواقع . . في لوحة رائعة . . نتلقفها في لهفة . . وشوق . . |
قمة في الإبداع . . تجسيدا للواقع . .
| |
|
|
|
|
|
|
|
|
|
Re: ساخر سبيل : هواء ساااكت ! (Re: الفاتح يوسف جبرا)
|
| Quote: فإنك يا صديقي . . رائد الأدب الساخر.. هذا الأدب الذي يغوص في اعماق قضايا المواطنين . . فيترجم احاسيسهم . . ويعكس معاناتهم . . ويرسل رسائل إعلامية قوية . . ذات اهداف واضحة . . ومؤثرة . . بإسلوب عميق المعاني . . سلس وجذاب . . وساخر . . يعكس تراجيديا الواقع . . في لوحة رائعة . . نتلقفها في لهفة . . وشوق . . |
هذه يا صديقى د. عبدالرحيم كلمات أعتز بها أيما إعتزاز فهى صادرة من نطاسى بارع وطبيب إنسان مترع بالفن ... حبى لك وتقديرى !
| |
|
|
|
|
|
|
|
|
|
Re: ساخر سبيل : هواء ساااكت ! (Re: الفاتح يوسف جبرا)
|
تعرف بوابة الدايات دى .. زى جامعاتنا الخرتومية ..
بقت تخرج (كلااام ساكت)
و الغريبة الساكت ده زمان كان شيطان اخرس ..
هسع بقى ليهو هيلمان ..
و يطراك بالخير يا خميس كلام ساكت .. و يا قمر سكسك (والله دي اسماء حقيقية لناس بعرفهم !)
و فى الزمن ده الما عندو لستك أحسن يشوف ليهو لستك !!
| |
|
|
|
|
|
|
| |
الفاتح يوسف جبرا
اسعد الريفى
عواطف ادريس اسماعيل
sama7
المسافر
Abdelraheem Hamed
فيس بوك
تويتر
انستقرام
يوتيوب
بنتيريست