|
|
 هناك تركني قلبي .. حدث بوطني ذات مساء حزين ...!!!
|
(*)
الخرطوم ليلة رأس السنة :
قاعة (المريديان) مع (شروق) حتى (الشروق) , كانت ليلة رأس السنة , وكانت الخرطوم وكأنها خرطومنا التي نعرف , نظيفة , وريفة , يتحرك أهلها حولها دون (عسس) , يتهامسون دون خوف , يتسامرون دون أن يخشون أن يدركهم (شهريار الحادية عشر ) , ..
غنت لنا (شروق) , وغنينا معها , ..
صديقي د. معز عمر بخيت ..
وصديقي د. محمد المشرف ..
وشقيقي (مجدي علي الزين) الذي لم أره منذ سبعة عشر عاماً هي عمر الإنقاذ , جاء من (بولتون) وكان محظوظاً حيث أنه لم يدرك زمان (الجهاد والنصر والشهادة ) وغلبة جيشنا (جيش الهنا) , الذي هزمه (جون قرنق ) 10 _ صفر ..
كانت ليلة تشبه وطناً جميلاً مختطفاً ..
حتى أدركنا الصباح , ..
غفونا قليلاً , ثم أفقنا على نبأ مقتل ( عجاج ) ..
فعدنا إلى ماقبل (شروق ) , وجدنا (شروق) ولم نجد زماننا الجميل المزعوم ...!!
(عدل بواسطة كمال علي الزين on 01-29-2008, 09:21 PM)
|
|
 
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(**)
بانت شرق :
غادرنا منزلهم وأتجهنا صوب منزل (هاشم صديق) ...
(عمر سعد ) في جلبابه الأبيض , وجتته التي تكاد تلتصق بالأرض , نكاد نعدو عدواً .. وجدناه كما هو ..
(هاشم صديق) ذو اللون الواحد , (هاشم صديق) الذي لم يتعلم بعد أن يكون محايداً ..
كان سيغادر إلى الدوحة بعد يومين ..
راح يتساءل في وضوح صار في حكم العدم هذه الأيام :
جماعتكم ديل حا يقولوا لي قول كده وماتقول كده ولا حا أقدر أعبر عن حاجاتي بحرية ؟؟
أجبته قبل أن يحاول (عمر سعد ) البحث عن أجوبة دبلوماسية :
أمشي (الله يعينك )..!!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(***)
ذات مساء حزين :
مركز الخاتم عدلان( للإيه كده ما أعرفش) :
كنت في طريقي إلى صحيفة المشاهد , المشاهد أيضاً لم أجدها كما تركتها , ذهب عنها صديقي العطبراوي العظيم (عبدالمنعم شجرابي ) , ووجدت صديقي الآخر (الرشيد علي عمر ) في طريقه إلى (غانا) لمساندة المنتخب الوطني , ودعته وأنا أسأل عن عنوان (شجرابي ) الجديد , لأبدأ البحث عن صحيفة جديدة ستولد عملاقة على يد (شجرابي ) وسيتركها تتداعي على أربعاتها بعد أن يختلف مع الإداري أو الرأسمالي في سيناريو يتكرر , دون أن يمل (شجرابي) أو يمل (الإداري ) أو(ربنا يهدي الرأسمالي ) ..!!
مررت ب(حليوة ) علني أجد (ماسا ) أو (شذى بلة) , و(حليوة) ياسادتي لمن لا يعرفها , ليست (حليوة ) القرية التي أتى منها شاعرنا الفذ (القدال) والتي غنى لها (والله باكر ياحليوة) , لكنها سيدة يلتف حولها رواد (المركز الألماني ) مساءً , يحتسون الشاي ويلتهمون اللقيمات , في إنتظار الفرج ..!!
الحمد لله أنني وجدتها , (حليوة ) لم يأت بعد من يقرر أنها تجمع حولها عناصر تتآمر على الدولة , أو , أو , أو ... (إن حدث هذا وليس ببعيد فأرجو أن لا أكون صاحب الفكرة) ..
وجدت (شذى بت بلة ودالمهدي ) بشحمه ولحمها , يداها ملطختان بزيت اللقيمات , ما أن صافحتها حتى أخبرتني أن أتوجه إلى مركز (الخاتم) الذي يحييي ذكرى الشهيد محمود ..
توجهت إلى (مركز الخاتم ) , ...
والتفاصيل ببوست آخر ...
تحية محبة للأخوة الجمهوريين , ولأهل (حق) ..
وللزعيمة (هالة عبدالحليم ) ...
كانت أمسية مختلفة , قيل فيها كل شئ ..
إلا أن المجرم الذي قتل (محمود) , لازال يحوم حول المكان ..!!
(عدل بواسطة كمال علي الزين on 01-29-2008, 07:29 PM)
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(****)
ليلة رحيل (عزالدين) .. مساء حزين آخر :
معرض الخرطوم الدولي , سيتغنى في إفتتاح فعالياته (محمد وردي) , (نسخة 2008) , .. (ودالشريف) صاحب الدبابيس لا يحفل بشي (في المخروبة دي ) سوى بالمريخ ووردي وأشياء أخرى لا تقال ..!!
سألني أن أرافقه إلى حفل وردي , ورافقته , وغنى (وردي) وكان (مغنياً ) جيداً كعادته , إلا أنه لم يكن (وردي ) الذي أحب منذ (حادثة غناءه للجماعة إياهم) ..!!
إنتشى (ودالشريف) , وخرج وكأن الأرض كلها تغني (من غير ميعاد) ..
هاتفنا أحدهم .. يحمل نبأ رحيل (عزالدين عثمان) , ..
تلطخ مساءنا (الوردي) , بحزن فقد (عزالدين ) , ..
(عزالدين عثمان) , و(هاشم عثمان) , و(جعفر عثمان) وصهرهم الجميل (صلاح حاج سعيد ) صاحب (الحزن النبيل) , (ونور بيتنا) .. كانوا ذات يوم إحد أهم محطاتنا التي نغشاها في طريقنا إلى منزل الراحل (صلاح حمدالله) , ...
أسعدنا (وردي ) ..
وأبكانا (عزالدين) ..
رحمهما الله ...
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
كمال ود الزين ..
عوداً عديلا يا رجل .
أمتعني تقافزك فوق بؤر الخرطوم الناشطات ( حباً و غصبا ) ..
و ليتك لم تفِزّ نافراً من تجاعيدها المُحدثات و كهولتها المغتغتة بفعل المكياج الكثيف ..
أمي - يديها العافية - تقول عن مثل غانيتنا الخرطوم : ( جهولة أُم سكاسِك ) ..
ما مِن سكسكة و خرزة و لونٍ رخيص إلا و وضعوه عليها , فناءت بحمل السجم و الرماد ..
الله كريم .
....
ما يزال الشتاء هنا يا كمال ..
وبعض الطنين العالق فوق الناس ..
فحدثني بعد عن خرطومٍ بين ظهرانيها أنا , و هي غياب .
مودتي .
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: هشام هباني)
|
Quote: اهلا وحمدا لله علي سلامة العودة يا قريبي كمال الزين
ومشتــــــــــــــــاقون نسمع منك كتير عن وطن المليون حرامي!
قريبك ظاااطو |
ياقريبي ..
إنك لن تستطيع إحصاءهم , فبعد أن كانوا (مليوناً) بالقديم , صاروا أيضاً يحسبون على قرار العملة , إذاً فهم مليار ... !!
كنت في زيارة لأهلنا في (الشقيق) ,بادية عبدالله ودجادالله ودبليلو , (كسار قلم مكميك) , لذنا بهم عند شراء الأضاحي , فأغاثونا وأهدونا (كباشاً) من حلال (أولاد عتمان ودعبدالله ودجادالله) , وكانت كما تعلم , حرة ومليانة لحم وشحم , وأدونا ياها ورسلوا معانا الضباح , عفيت منهم ...
ومنك ...
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Emad Abdulla)
|
Quote: كمال ود الزين ..
عوداً عديلا يا رجل .
أمتعني تقافزك فوق بؤر الخرطوم الناشطات ( حباً و غصبا ) ..
و ليتك لم تفِزّ نافراً من تجاعيدها المُحدثات و كهولتها المغتغتة بفعل المكياج الكثيف ..
أمي - يديها العافية - تقول عن مثل غانيتنا الخرطوم : ( جهولة أُم سكاسِك ) ..
ما مِن سكسكة و خرزة و لونٍ رخيص إلا و وضعوه عليها , فناءت بحمل السجم و الرماد ..
الله كريم .
....
ما يزال الشتاء هنا يا كمال ..
وبعض الطنين العالق فوق الناس ..
فحدثني بعد عن خرطومٍ بين ظهرانيها أنا , و هي غياب .
مودتي .
|
عماد عبدالله
أصدقك القول , كنت أسعد الناس , إن وجدتك هناك , (عماد عبدالله ) , الدنقلاوي أبشنب , الديامي الضكران , الود الفنان , الكاتب القلمو (صعلوك) ونفسو (مأدبة) ..
(عمدة ) والله لم أسأل عنك هناك ..
لأن غيبة الخرطوم من جنس غيبتكم , ..
فإن وجدت هذا الذي وصفته , فأخرج للناس فإن لم تجد الخرطوم , وجدتك الخرطوم , وهذا أول الطريق
إلى خرطومنا الضائعة ..
أحبك يارجل ..
لكني أبحث عنك ..؟؟
وسأصمت فربما إن تداعيت إستعصى فهمي على آخرين , لكنك إن لم تفهمني , فربما ستستشعرني , ولا أقبل بغير الأخيرة ..
محبتي ...
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: خضر حسين خليل)
|
Quote: ياحمدلالك بالسلامة ياكيمو ياخ
والله إفتقدناك هنا وهناك
أكتب ياخينا ومرق النضمي السمح دة وورينا خبيرات الشوارع
الكلاكلات ودريبات القبة أوربا وسوق أبدومة
وميدان الكورة واللفة والبنات السمحات
والساسة وأخبار البلد ياصاح
حأجيك هنا تاني وتالت بس التكمل تصاويرك |
هدر هسين هليل ( هكذا يناديه أهله الهلفاويين )
صديقي الذي ما غيرته الليالي ..
كان مقدراً على أن أكون (ودالكلاكلة القبة) و(دالعرضة أمدرمان) و(الثورة الحارة 11) ... وود حتات كتيرة من حتات السودان ده ...
ألم ترى ياصديقي أن أخانا (طارق عمر مكاوي) , (الكوز ) الطيبان داك , قد جاءنا هنا بأرجله ؟؟
(طارق عمر مكاوي) , صديق قديم , كوز محير , صاحبنا في حوش المدرسة , وفي بيتم لما نزوروا , وفي بيوتنا لما يزونا , يمشي يجاهد في الجنوب , ونمشي نحن المعتقلات , ونرجع كما كنا , أصدقاء ..
علي طاري البنات الحلوات .. طارق ده , .. (كوز) لكن بحبهم وبحبنوا ..
أنا البي إنتا عارفوا ..
بجيكم راجع الإتنين ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(****)
شارع المستشفى .. وسط الخرطوم  1)
والطائرة تحط بنا أرض مطار الخرطوم .. نظرت إليه وأنا أحمل همه , الشيخ / محمد بن طلال بن أحمد آل ثاني , إبن العائلة الحاكمة القطرية , كنت أتساءل وهو الذي عرفنا هنا , وكون أنطباعه عنا نحن السودانيين دون أن يرى من أي أرض أتينا , وبأي شوارع تعلمت أرجلنا المشي , وكيف صرنا هكذا , أناس لسنا كالآخرين , بنا كل متناقضات البشرية , إلا أنه (وسبحان الله) يحبنا دون شعوب الأرض , ويظن أننا أفضل الناس , وأصدقهم , ...!!
خفت على هذه الفكرة , أن يبدلها إصتدامه بسودانيي (الداخل ) على طريقة (فلسطيني ) الداخل , خاصة وأن الرجل ذاهب في رحلة رسمية , بدعوة من (حكومة السودان) , التي بيني وبينها ماصنع الحداد ..
إستقبلوه جيداً , وحملونا صوب قاعة كبار الزوار , أكرموا وفادته , ثم جاءته عربة المراسم لتقلنا إلى مقر إقامته (بالهيلتون) , ..
كان برنامج الرحلة يبدأ بحفل عشاء , بمطعم لبناني قرب مستشفى الخرطوم , إسمه (الساحة) , في طريقنا إلى هناك أبى سائقنا إلى أن يمر عبر إخوتنا الذين يلتحفون السماء قرب مستشفى الخرطوم ..
رآهم صاحبنا وراح يتساءل :
من هؤلاء ومالهم ؟؟
أجبته على الفور :
ديل مصيفين .. !!
يتبع ...
(عدل بواسطة كمال علي الزين on 01-29-2008, 09:16 PM)
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(***)
بعد أن رأى أخانا (شيخ / محمد آل ثاني) , من يلتحفون سماء الخرطوم من ضحايا الحروب , حروبنا نحن وحروب الأفارقة الآخرين , فالخرطوم هي : مزبلة إفريقيا ..!!
يدلف إلى باحة مطعم الساحة اللبناني ليتناول عشاءه الفاخر , ويتفرس في الوجوه , وجوه غير كالحة , وأجساداً لم ينتهكها المرض , وصدوراً تتنفس هواءً نقياً , ...
على بعد خطوات رأى عالمين مختلفين , ..
قلت له مداعباً :
العالم يقرأ (ماركيز) ونحن نعيش داخل رواياته ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Randa Hatim)
|
Quote: يا خي موش حمدالله على السلامه ...
لأ ..
حمدالله الف .. الف .. الف .. على السلامه.
Quote: على بعد خطوات رأى عالمين مختلفين , ..
قلت له مداعباً :
العالم يقرأ (ماركيز) ونحن نعيش داخل رواياته ..!!
وتاني مرحب بيك .. |
ست البنات ..
المرة البتساوي ألف راجل ..
رندا حاتم ..
والله ليك وحشة ..
شكراً ياست الناس ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(***)
عفراء مول ... منتصف النهار :
(عبدالله الفوراوي) مرافقنا من قبل (المراسم ) , أوقف (اللاند كروزر البيضاء ) أمام عفراء مول وأعتذر عن مصاحبتي والشيخ / محمد آل ثاني إلى الداخل ..!!
إحترمنا رغبته ودلفنا وحدنا إلى قاعة (المول) الأوحد بجمهورية السودان , ولم نكد نطأ أرضه حتى فاجأتنا رائحة الصرف الصحي وهرع خلف صاحب (العقال), جمهرة من المتسولين , أحدهم وياللغرابة كان يجلس داخل إحدى محلات الصرافة , جاءنا زكتابه بيمينه , وقدم لصاحبي (أبوعقال) عرضحال يتكون من خمسين سطراً , طالباً الغوث ...
حوله إلى فأنا خبير بأهل بلدي , أعطيته وبخلت عليه , فقد كان لا يشبه السائلين الذين أعرف , أخذ المبلغ الذهيد وهو يدعو علي وعلى صاحبي ..
سألني صاحبي : ليش التسول عندكم مو بجريمة..؟؟
لم أشأ أن أجتهد ..
حولته إلى شرطة المول وسألنا أقربهم مكاناً فأجاب :
إحنا بنمسكم ونسجنم , وبعدها بتنتهي حملاتنا بإنو السجون بتتملي ومابنلقى حل تاني غير إنو نفكهم لأننا بنحتاج الحراسات للمجرمين ..!!
سألني صاحبي : هل جزاء المتسول السجن دون تهمة ؟؟
أجبته : لا أعتقد أن القانون السوداني به صفحات تستحق أن توضع للمتسولين ..
أجابني :
ليش ؟؟
أجبته :
هنا ياصاحبي من يقتل الملايين دون رحمة هو من يضع القانون ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: بهاء بكري)
|
| Quote: كمال ياود اختي اقرا كلامك اقرب اطلع مظاهرة اشوف عمايلك من سريري مااقوم |
ياخال مظاهرات عديل كده ؟؟
المظاهرات ليها ناسا , خليك في سريرك أحسن ..!!
بعدين ياخال :
عمايلي ياتا .. أبن وأفصح ؟؟
شفتني في السفارة ولا وقفت بين بين ..
ياخال ود أختك بشيل المابتقدر تقولوا لي غيروا ..
ساعدنا بشوية وضوح ..
الغدا بتاع قبيل ماعجبك ولاشنو ؟؟
جيت تهاجمني ؟؟
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Seif Elyazal Burae)
|
| Quote: اخي كمال كيف وجدت رمال الفريق.اخبروني انك حضرت ولم تجدني. تحدث فان فيك رائحة الاهل والاحباب |
الآن فقط عرفتك , (سيف برعي) ..
إصتدمت بك ببوست آخر (لكن ماجمعت ) ..
كيف ياصديقي ..
فعلاً مشيت بيتكم ومعاي (مجدي الزين) , وقابلنا الوالدة ..
بجيك بالتلفون .. عشان أعرف لقيت أمريكا كيف؟؟
ولقتك كيف ؟؟
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Randa Hatim)
|
Quote: حاشاك والله ...
ما بتركب السرجين ..
وماكا زول وشين ..
ولا بتقيف بين بين ...
بس خالك دا حمى الملاريا لسه مأثره معاهو ..
ولو عايز تتأكد اسالو قول ليهو اسمك منو؟
ح يقول ليك اسمي بهاء بكري لكن ممكن تناديني "كيكي"
حتى اسال اميرة الشيخ ... |
ست الناس
خالي ده , حب يجرب فيني (كلمة حق) غلبو يقولا لي (غيري) ..
بعدين (الحمى ) دي فكتو زمان ..
وأسي عاوزين نشوف ليهو عروس ..
أصلو (بت عم محمد عبدالرحمن )ديك باقي لي فشلت في إدارة الأزمة بتاعة المرض لحدي ماالحمى خلتو
يفلق ود أختو ..
أميرة الشيخ .. دي (ظروفا شنو) ؟؟
كان مامتزوجة .. طالما أستشهدت بيها .. خليها (تنتحر ) وتعرس (الكومر ) ده .. عمل خير وكده ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
العزيز كمال ..يا صاحب النضم الغنا
نضمك يا اخوي زي سما الخرطوم وكت الزمن الجميل
لما المساء سماهو صافية ونجموا ساطعة ويجيك النسيم
بي صوت الغنا ....في عرس رائع ....وجو ممراح
زي القمر وزي القمر ...ويتمها سيد خليفة موسيقى بي خشمو
يا حليل لما الناس كانوا طيبين والنفوس صادقة
( من أعلن النعي على ذاك الزمــــان ؟)
( من أصدر الذكرى على ذاك الزمـــــــــان؟!)
(من أرهق الزمن المعاصر؟ اجترار) .....من عيون الارخبيل ..القامة هاشم صديق
واصل نضمك عن مساءات الخرطوم الرائعة....ما فضل لينا غير اجترار الذكري ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: منى على الحسن)
|
العزيز/كمال الزين..العائد مخضبابالشجن والحكايا
مرحبابالعودةالميمونة
فقدرتبت لناالمصادفة ذلك اللقاءاليتيم في الالماني ,وفي كنف
(حليوة)فنسينا حينهاان نكون علي حذر,فاحتدم الحوار,واغتني,
في معية طلال عفيفي,ماسا,وشذي بلة
وللاسف جئت الدوحة سريعا في طريقي الي امريكا,اغسطس الماضي
وكنت فد ففدت ال contact information
لذلك لم يتسني لي الاتصال كماكان الوعد
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Hisham Osman)
|
Quote: العزيز/كمال الزين..العائد مخضبابالشجن والحكايا
مرحبابالعودةالميمونة
فقدرتبت لناالمصادفة ذلك اللقاءاليتيم في الالماني ,وفي كنف
(حليوة)فنسينا حينهاان نكون علي حذر,فاحتدم الحوار,واغتني,
في معية طلال عفيفي,ماسا,وشذي بلة
وللاسف جئت الدوحة سريعا في طريقي الي امريكا,اغسطس الماضي
وكنت فد ففدت ال contact information
لذلك لم يتسني لي الاتصال كماكان الوعد
|
هشام عثمان
كيفك يازول ..
توقعت إتصالك عند وصولك (الدوحة) , ..
أرجو أن نتواصل تلفوني موجود بمكان آخر بهذا البوست ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: tarig almakki)
|
Quote: كمال الزين والوجع الما بنتهي
أولاً مبروك الجية
ثانياً أتمنى أن لا ينتهي هذا الحديث الذي حدث ذات مساء حزين برغم لهفتي للنهاية
كم جميل أن أرى هكذا قلم .. قلم تسمع صريرة بعيناك
أكمل لنرى إن دامت محبة الرجل لنا أم ............. |
طارق المكي ..
كيفك ياحبيب ..
دامت محبته لنا وأتبعها بشفقة .. فقد رآى عورات (مسنينا) و(بردالشتاء ) يأكل عظام أطفالنا , الذي تبرأنا منهم , فعادوا إلى أمهم (الأرض) ..
شكراً ياصديقي ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: hameem)
|
Quote: وإنت وين بالضبط الحين ؟؟
أو بعد حين
ياخي مشتاقين |
يازوووووول ..
عادل الهميم ..
كيفك ياراجل ووينك ..
بعدين إنتا بتستهبل ولاشنو ..؟؟
وين دي يقولا زول غيرك ..
أنا في الشقة الكنا ساكنين فيها سوى ياالعامل نايم .. عرست ورحلتا معقولة , ..
لكن نسيت عنوانك القديم ؟؟
تعال زورنا ومابنعاتبك يا(عريس ) ...
محبتنا ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
الزول النضمو غنا ود الزين سلامات
والله لي الشرف ان اكون اخت الدكتور المهمة في الوسط الثقافي
النخلة المعطاء دكتورة ناهد
شكرا للمسرحي محمد السني بجعله الدكتورة ناهد اختي لي
ومشكور يا ود الزين لجعلك شخصي الضعيف معرف لديك وكمان دكتورة ناهد اختي
رب اخ لك لم تلده امك
اتمنى ان تهديني الايام لحظة جميلة لاتعرف على شخصية الدكتورة ناهد
واقول ليها انا اختك منى
بقول ليك يا الكمال يخلق الله ...من الاسم اربعين
واصل نضمك المسائي الفرايحي اللون عن الخوطوم والله محتاجين نحس
لسه فينا روح ...لانو لسه في باقي وطن الجميل ...
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: منى على الحسن)
|
Quote: الزول النضمو غنا ود الزين سلامات
والله لي الشرف ان اكون اخت الدكتور المهمة في الوسط الثقافي
النخلة المعطاء دكتورة ناهد
شكرا للمسرحي محمد السني بجعله الدكتورة ناهد اختي لي
ومشكور يا ود الزين لجعلك شخصي الضعيف معرف لديك وكمان دكتورة ناهد اختي
رب اخ لك لم تلده امك
اتمنى ان تهديني الايام لحظة جميلة لاتعرف على شخصية الدكتورة ناهد
واقول ليها انا اختك منى
بقول ليك يا الكمال يخلق الله ...من الاسم اربعين
واصل نضمك المسائي الفرايحي اللون عن الخرطوم والله محتاجين نحس
لسه فينا روح ...لانو لسه في باقي وطن الجميل |
منى علي الحسن
كيفك .. محمد السني .. ده الظاهر (خرف) , لأنو بمثل من زمن (خالد أبوالروس)والمسرحا البولعوهو
(بالفانوس) ..
فشلني ماعافي ليهو ..
عارفا لحدي قبل خمس دقائق أنا قايل (د. ناهد أخت منى) ..
لكن مافي مشكلة ..
رب أخت لك سلبطا فيك (محمدالسني ) ..
أما عن الخرطوم , فأنا مغرم بها , وليتني أستطيع أن أبيت بها كل ليلة ..
الخرطوم التي أعرف , ليست خرطوم الإنقاذ , الخرطوم ديك .. ياحليلا ..
زارها معي (شيخ / محمد آل ثاني) فأحبها هكذا ,..
هذه الغانية , الحافية , المتسخة ..
أحبها الآن ..
إنه سحر أهلها الذين مازالوا يتنفسون ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
*****
مدينتي أنا...!!
عند كل إستواء تعامد خطه على ليلها ونهارها ,شهقةُُُُوأنتشاء ..
سماءها دون مدن الله ,مدن الدنيا جميعها (أرض )ٌ , وأرضها حناء ...
عرقنا وعرقيها كليهما مسكران ,وكلمات أهليها أيضاً, سماعها يوجب الحد جلداً وعناقاً ...
هي كل إرتعاشات صبابة ضمها كون ...
هي كل حماقةٍباسلة راودت قلباً شجاعاً ...
كبرت ,صغرت ,يبست ,إخضرت سنابل ثغرها , سيان ...
كل همٍ على صدرها إنفرج , كل بؤس تحت قدميها ,ضرب حجليها ...
زمرد وذهب ...
متبرجة ,عابسة ,متلهفة ويائسة ....
ونهرها حين فاض , ماكراً ,غادراً ...
غنينا عشقه وحفظه صغارنا وما صدقوا ..
أنه هو هو...
مدينتي أنا ..
عزراءها تنجب الأطفال كل ساعة ..
لتلقي بهم على قارعة الطريق ..!!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(**)
مدينتي أنا...!
جوعى ومناضلون ومرتزقة ومشردون ..
مقاهي وسرادق عزاء ..
وقصور وفارهات ...
ينام تحت ظلال أشجارها الحليقة من يلتحفون السماء ..
(فنجان) نرتشفه ونقلب شفاهنا ونرقب الأسفلت ..
الأسفلت يئن تحت ثقل ذات الأربع عجلات ..
وهنالك من يزحف على أربع ..
ويئن تحت هجير شمسنا وجهنم الأسفلت ..
مدينتي أنا , أيضاً تئن , على أنغام ضحكات المناضلين ..
ضحكاتهم , علينا , وعلى أنفسهم , ..
وعليها ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(***)
مدينتي أنا...!!
يتدافع الناس أمام بوابات (المشافي )...
مداخل طرق الموت السريعة ..
تلقاك هناك (سبعينية) وجهها مبلل بالدموع , مكلل بالشلوخ ..
رأسية أم أفقية كانت .. لا فرق ..
فكلاهما يؤديان إلى قلبك ..
تمد يدها صامتة ..
تقف أمامك جامدة .. تنسج من حزنها وفاقتها ثوباً من وقار ..
لايخلو من قطن عزة وكرامة .. كادت أن تهدر على أبواب المحسنين .. حين غاب الإحسان
تشير بيمينها هناك .. إلى الداخل ..
حيث يرقد جدك الذي توفى حتى قبل أن تولد ..
جسد مسجى .. وثوب قد إهترأ ..
عيناه تنتقلان .. بينك وهي ..
وفمه لا يستطيع نطقاً ..
لكن عيناه حين تصطادا عينيك ..
تسمع :
أنك لن تستطع معي صبرا ..!!!
فولي الإدبار ..
إلى حيث يتسكع المثقفون ... ويتشدق المناضلون ..
مدينتي أنا ..
تنتظر موته .. موت جدي الذي مات ,
حتى قبل أن أولد أنا ..!!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(****)
مدينتي أنا ... مساء حزين آخر :
وأنت تبحث عن مايسر الناظر ويسعد القلب ..
هناك بمدينتي أنا , لا تنسى أن تدنو من طرفه ..
طرف ذلك النيل الذي مازال يجري ..
لا يمل ..
كم كببنا على شاطئه من أوساح ..
كم إمتزجت مياهه بما زال من أوجاعنا عند تلاحمنا معه .. سابحون ..
عند ذلك الشط ..
إبحث عن ماضاع من إحسان ..
وأمن .. وأمان .. ومحبة ..
كأن ذلك النهر لاينقصه كل هذا الذي أثقل كاهله ..
الآن عند شطه ..
طفل رضيع ..
يصرخ .. يصارع ..
تحوم حوله .. الكلاب الضالة ..
تأكل من زراعه البض ..
تتلألأ أنيابها .. تهزأ بالرحمة ..
وقبلها نحن .. أيضاً
لم يعد لهذه الكلمة معنى في قواميسنا..
الرحمة ..
الرحمة ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
كم أنا سعيد بعودة كلماتك أخي كمال. أنا الان وسط بياض الثلوج التي شابت منها الأشجار, حتي الأسلاك في الشارع أراها مغطاة ببياض الثلج المتدلي منها كمااللحم المجفف (الشرموط) الذي نعلقه في السودان علي الحبال. الغربة كربة ياصديقي, لكن الأمل يحدونا بإنصلاح الأوضاع و العودة إلي الجذور حيث الدفْء مدججين بسلاح العلم و الأمل لكي نساعد في بناء الحلم السودان. المهم ايميلي:
[email protected]
أتمني رؤيتك علي المسنجر
سيف برعي البدوي
محبتي
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Seif Elyazal Burae)
|
Quote: كم أنا سعيد بعودة كلماتك أخي كمال. أنا الان وسط بياض الثلوج التي شابت منها الأشجار, حتي الأسلاك في الشارع أراها مغطاة ببياض الثلج المتدلي منها كمااللحم المجفف (الشرموط) الذي نعلقه في السودان علي الحبال. الغربة كربة ياصديقي, لكن الأمل يحدونا بإنصلاح الأوضاع و العودة إلي الجذور حيث الدفْء مدججين بسلاح العلم و الأمل لكي نساعد في بناء الحلم السودان. المهم ايميلي:
[email protected]
أتمني رؤيتك علي المسنجر
سيف برعي البدوي
محبتي |
سيف برعي
إزيك ياخوي ..
كيفك مع (الغربة البطالة) ..
بجيك بإيميل ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Mutwakil Mahmoud)
|
Quote: تركني سندي وعوني...... خارج وطني......في غربة ظلماء.....ذات يوم حزين.....وأنا أحوج ما أكون إليه....
أنالفافات... الصبر كملتها....
وا حسرتي....ووجعي علي وطني
لم أري في عيوب الناس عيبا.....مثل عجز القادرين علي التمام
ربما تجمعنا أقدارنا ذات يوم بعد أن عز اللقاء
أخوك د. متوكل محمود |
حبيبنا متوكل محمود
موجوع , ومتوجع , ونازف ..
(في غربة قالوا تكون شفائي) ..
أم (سفري السبب لي أزايا) ..
أم ..
أم ..
تقطعت بنا السبل .. كيفك يازول ياجميل ...
محبتي ...
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(*****)
ليلة وفاة .. (الولد البناي ):
(1)
أنهكه العمل , لم يجد متكأً له سوى الحائط مال إليه وأسند ظهره وأسلم روحه ..!!
كان صغيراً على هذا الموت الباكر , كان كثيراً علينا موت أحدهم في ميعة صباه داخل جدران بيتنا الذي
أردنا تحديثه وتعميره , ليس هنالك ثمة علاقة بين الموت والتعمير سوى هذه الحادثة التي بسببها
تصدرنا صفحات (الدار ) ...
جاءنا ذلك الفتي بحثاً عن عمل , لم يتجاوز العشرين عاماً من العمر , تزوج حديثاً , وخرج يبحث عن قوت
يومه , أراد أن يعمر بيتاً جديداً , فجاء مشاركاً أيضاً في تعمير بيتنا , خمس ساعات قضاها بيننا ..
ثم أسند كتفه على الجدار ... وماهي إلا لحظات حتى تصايح الصغار :
(البنا) مات ...!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(2)
جاءنا (صديق) وهو مقاول الشركة التي تعمل على تعمير بيتنا مكفهر الوجه حاملاً نبأ وفاته , وماهي
إلا دقائق معدودات حتى أذدحم شارعنا وفناء بيتنا برجال الشرطة والمتتطفلين والنائحين والمعزين ..!!
جيراننا وأهل الحي أحالوا الأمر إلى عزاء , حتى أن المارة حملوا على الإعتقاد أن المتوفى أحد سكان
البيت ..!!
جاء أهل الفتى وهم من (البرقو الصليحاب ) , ولكنهم لم يستطيعوا أخذ جثمانه لأن الأمر صار أمرنا
والمتوفى أحدنا ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: مازن الجمّال)
|
Quote: الزول الجميل
كمال على الزين
عندك مقدرة عجيبة بتجبر بيها الزول انو يبتدي القراية وما يقيف
اتلاقينا في الخرطوم
لكن
كانت سريعة وخاتفة ( كف نف )
......................
سعيد بتواجدنا في مكان واحد
المشلهت ( زي ما سموني في منتدى تاني ) |
العزيز / مازن
تحيات ومحبة
سعدت بالإستماع إليك ذاك المساء (بقاعة المرور) ..
لم تسعفني ظروف العمل بحضور حقيقي لإحتفالات عكس الريح ..
فقد كانت زيارتي للسودان كالعادة (مسد كول)
سعيد بيك يازول ياجميل ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Mutwakil Mahmoud)
|
Quote: حبيبنا كمال
كيفك ياسمح ...يازين
إذافاتك مقصدي وأنت الأديب الأرب القدير
فعلا...هو سفرك ...مش سبب ليك أذاك ...وكمان لخبت ليك مخك....
What is going on?
عشان كده عازرك لحدي ما أسمع منك...وبسرعه....وإلا ألحقك الزينيين...مش زين واحد
تلفوني 0113103497010
ومن الشوق رسول بيننا
أخوك د.متوكل |
صديقي الجميل / د. متوكل
والله .. السودان لا تستطيع الجزم بأنه وطنك الذي تركته فعلاً , أم أنه منفاً آخر ..؟؟
حكاية تلخبط فعلاً ..
بينا تلفون ياعزيزي ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(**)
ما أعجب , ذلك ..
ما أعجب أنني طوال تواجدي بالصيفية (بوطني ) (ببيتي) وسط أهلي وعشيرتي , كنت أحس بأنني ربما بغربة أخرى , ربما ..ربما أيضاً خالجني شئ من الإحساس بإنعدام الأمان ..
ما أن عدت إلى الدوحة وفتحت باب (بيتي ) بها , حتى أحسست بأنني أخيراً قد عدت ..
عدت إلى (بيتي) وأطمأنت نفسي ..
نمت وصحوت وتفكرت في أمري ..
(الله .. ما أقسى أن يكون المنفى وطن ) ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Shayma)
|
Quote: وراجين تجي ريحة (العرضة) في الحكي دة
حمد الله ع السلامة
|
شيماء
تحياتي
(ريحة العرضة) ..
هكذا , دون إستغفار ؟؟
لا أحب أن أتمشى هناك كثيراً حين أعود , حتى أن صديقي (بشرى ودناس أبوالغيث) دعاني لزواجه , كنت غائباً عن العرضة حتى صباح باكر جداً , وجدت أن (القصة ) خلصت , خجلت فقد كنت يوماً جليساً دائماً أمام دكان (أحمد ) الذي ببيتهم , إكتشفت ياسيدتي , أنني فعلاً (غريب) ..!!
بيتنا الذي يطل على ميدان النجوم , إكتشفت أنني لم أشاهد مباراة أو تمرين بميدان النجوم منذ 10 أعوام على الأقل , (سينما العرضة) دخلتها آخر مرة (في الثمانينيات , إستاد المريخ على مرمى حجر لم أدخله منذ (سانتو قلب باكورت جابا) ..
شيماء ..
مات (خليل والعافية) .. وذهبت للتعزية مرتين , فاجأني (مامون حسن حامد) و(محمدأبراهيم الجد) , بأنني جئت معزية بإجازتي الماضية ..!!
(ريحة العرضة) .. ؟؟
(الله .. شيماء , حين أخرج ماراً بدكك اللبن , أو زريبة البالوظة , أو شارع ناس آمنة عامر حيث كنت أحب هناك , إنه عالم آخر الآن ...)
شارعنا الآن من الماضي ..
يبدأ بسبيل كتب عليه (سبيل المرحوم المربي الفاضل حمدالنيل) ..وتتوسطه (حديقة صغيرة زرعها علي الشيخ القرشي) , وجلس يراقبها وحده بعد ذهاب بناته (شذى وشهيرة وشاهيناز) وسفر أخته (عايدة) .. وشوارع العرضة كلها تعبق بروائح الماضي ..!!
أنا لا أحتمل ,الغياب ..غاب عنها كل شئ ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
Quote: شيماء ..
مات (خليل والعافية) .. وذهبت للتعزية مرتين , فاجأني (مامون حسن حامد) و(محمدأبراهيم الجد) , بأنني جئت معزية بإجازتي الماضية ..!! |
الحالة دي باين حالة عامة!! ذكرتني موقف مشابه حصل ليّ مع زولة صديقتي والمصيبة من اعز صديقاتي كمان. اتوفى ابوها لكن باين عشان ما مشينا بيت البكاء الفي السودان وما شفنا الصيوان داك بي عيوننا، القصة دي مااااا وقعت ليّ، فبعد كم شهر كدة نسيت ليك الموضوع دة نهائيا وفاجأتها ليك وهي بتقول ليّ ماشين (كلنا) نأجز في الامارات بسؤالها: وابوك ماشي معاكم؟ (البت يعني مهتمة عشان الراجل كبير وكدة ). طبعا يا كمال ما اظنك محتاج اوصف ليك (منظري) لمن ردت عليّ : ابوي ما اتوفى يا شيماء!!! بعد مشت الجماعة قالوا ليّ والله لو ما شفناك عندها ايام البكاء ديك كنا شكينا انك عزيتيها في ابوها دة!!
دة الميدان الفاتحة فيهو مدرسة العرضة (الكرتون) ؟ ..دة بس عشان يوم العرس نجي عديل ما نروح
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: Shayma)
|
| Quote: الحالة دي باين حالة عامة!! ذكرتني موقف مشابه حصل ليّ مع زولة صديقتي والمصيبة من اعز صديقاتي كمان. اتوفى ابوها لكن باين عشان ما مشينا بيت البكاء الفي السودان وما شفنا الصيوان داك بي عيوننا، القصة دي مااااا وقعت ليّ، فبعد كم شهر كدة نسيت ليك الموضوع دة نهائيا وفاجأتها ليك وهي بتقول ليّ ماشين (كلنا) نأجز في الامارات بسؤالها: وابوك ماشي معاكم؟ (البت يعني مهتمة عشان الراجل كبير وكدة ). طبعا يا كمال ما اظنك محتاج اوصف ليك (منظري) لمن ردت عليّ : ابوي ما اتوفى يا شيماء!!! بعد مشت الجماعة قالوا ليّ والله لو ما شفناك عندها ايام البكاء ديك كنا شكينا انك عزيتيها في ابوها دة!! |
عارفا إنتي أحسن حالاً مني كتير ياشيماء , لأنو أنا كان ممكن بعد مايقولوا لي أبونا مات , أرد أقول ليهم أها وحا تسوقوامعاكم (الإمارات ) ولا لأ ..
| Quote: دة الميدان الفاتحة فيهو مدرسة العرضة (الكرتون) ؟ ..دة بس عشان يوم العرس نجي عديل ما نروح |
أيوة ياهو ياشيماء , بس ماتنسي تجيبي معاك أبوصاحبتك (المات) داك لأنهم شكلهم كدة ماسايقنوا الإمارات ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: حليمة محمد عبد الرحمن)
|
Quote: كمال الزين يا زين..
اولاَ..حمدا لله على سلامة العودة..
اما حالة الوطن الحزين، فذلك اشبه بعُوَّارة الجوف.. ما بتتحكَ..
برجع لـ(حدث بوطنى ذات مساء حزين...!!!) كان الكريم مَدَّ في الايام..!
حليمة |
ياسلام ياحليمة .. والله القلوب عند بعضها (بفتش تلفونك من يومين) ..
وشوقي ليك برضو عامل زي (عوارة الجوف .. مابتحك) ..
منتظرك ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
Quote: أجبته قبل أن يحاول (عمر سعد ) البحث عن أجوبة دبلوماسية :
أمشي (الله يعينك )..!!! |
احقاقا للحق هذا ما ذكر ولا كن لا ضير بين التغطية والاعانة فالتغطية اشمل .......
حقيقى ما عرفت اقول ليك شنو ؟.......لكن كدى انتة احق الحق ...فى تناول الخبر.....
مؤتمرى ما زى مؤتمر كيكى انا مشيت مؤتمر الصحة العربى الخامس .....
تلفونك يا حبيب خارج الخدمة.......لو فى تلفون جديد رسل رقمو .....لك الود
كيف حبايبك الحلوين وانا ما داير حلوين زى ديل بزورونى.....................
احكى لنا عن لقاءك بتاع الشيرتون ......
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: عمر سعد)
|
Quote: احقاقا للحق هذا ما ذكر ولا كن لا ضير بين التغطية والاعانة فالتغطية اشمل .......
حقيقى ما عرفت اقول ليك شنو ؟.......لكن كدى انتة احق الحق ...فى تناول الخبر.....
|
ياسيدي زور على راحتك , ما إنتا زعيمنا وممثلنافي الجالية ...
Quote: مؤتمرى ما زى مؤتمر كيكى انا مشيت مؤتمر الصحة العربى الخامس .....
|
ياراجل (كيكي ) برضو قال كده
| Quote: احكى لنا عن لقاءك بتاع الشيرتون ...... |
أبييييت , لما إنتا و(كيكي) تحكي لينا عن مؤتمراتكم 
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: هجو الأقرع)
|
| Quote: كمال الزين ، صاحب الكلام الشجى ، خسارة كبيرة ما بقيت مؤتمر وطنى ، كمال زى ما قالك ود العم عمر سعد هواتفك كلها ما( بترد) حتى الرقم الموجود فى هذا البوست ، سلامات يا راقى . |
العزيز/ هجو الأقرع
ونحمدالله على هذه الخسارة (المكسب)
ياناس تلفوني ده شغال ونص وخمسة بس إتو أضربوهو كويس
بالمناسبة ياهجو ماشفناك مع (شيخ حسن) في زيارتو دي ..؟؟
أها المرة الجاية حايجي بعد المصالحة ولم الشمل .. (الله يقدرك ماتجي )
والمرة الجاية دي طبعاً نحنا ماناسو ..
إنشاء الله إنتا كويس ووليداتك وأهلك ..
محبتي ..
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
شيراتون الدوحة .. غرفة (1112):
كان يتوسط المكان , لم يكن بعد غد إستبدل عباءته التي أطل بها علينا عبر (بلا حدود) مع
(أحمدمنصور) , ..
حوله حوارييه , خاشعون مأدبون ..
لحقنا بهم حين كان الرجل يتحدث عن (سدرة المنتهى) .. حديثاً مثيراً , جريئاً , كعادته حين يحلق
بعيداً ...
قال شيخهم :
أن (سدرة المنتهى) ليست سوى شجرة بطرف (مكة) , وأن الله إن أراد أن يزرع شجرة عنده في السماء لأختار
(بلخاً ) مثلاً , بدلاً عن هذه الشجيرة البائسة ..
وهم يستمعون في خشوع ,..
كنت أفكر: مالنا وهذه (الشجيرة) , أترى إن كانت بالأرض أو بالسماء , هل ستعيد هذا الوطن إلى سابق
عهده , أم تراها تعيد من دفعوا ثمن (مغامرة العراب .. وظلم بنيه) ..؟؟!!
لم أكن أحتاج إلى فتاوى جديدة .. لم تعد الفتاوى مثيرة .. بعد أحاديث الرضاعة وبعد أن أمت
السيدة (أمينة) رهطاً من ذوي اللحى والشوارب ..!
د. الترابي بدأ يحدثنا عن (السدرة) المفقودة .. وعن (عودة المسيح المزعومة) ..رافضاً أن تكون
الأولى بالسماء فعلاً .. بل مرجحاً كونها شجيرة بطرف مكة , بطريق الشام , يرتاح تحت ظلها المسافرون ,
وهذا ماكان منأمر (نبينا ) محمد (ص) ..
ثم طفق يسخر من جهل أمة الإسلام وميلها إلى خلق معجزات كمعجزات (بني إسرائيل ) .. و ..
مالنا وهذا , فما حاق بنا لم يكن شوك (سدرة) , ومن ذبح منا , لم يمت على أيدي بني إسرائيل ..
رجحت أن (العراب .. في متاهة) ..
أو أنه يريد أن يصرفنا عن أمرنا .. ويخبئ لنا المذيد ..؟؟
وعن عودة المسيح المزعومة , والتي أنكرها (العراب) , .. حيث أنه يستند إلى قوله تعالى :
(وما محمدإلا رسول قد خلت من قبله الرسل ) , و(خلت ) هذا تنفي عودة المسيح المزعومة ..!!
كان يتحدث ذلك الحديث الساحر الطلي كعادته , وعيناه تحومان حول المكان , ..
فجأة تحدث عن الحكم والحكام ..
عرفت أنه أيضاً يحفل بالقصر الرئاسي وساكنيه , أكثر من عودة المسيح أو (سدرة المنتهى) ..
وهكذا بدأنا نتفق ..!!
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمبورة)
|
Quote: الاخ كمال سلامات وعوافي
فعلا نحمد الله على الخسارة [المكسب ] |
أستاذنا / محمد عثمان , كيفنك ..
المؤتمر الوطني ده مامحتاج ناس تاني , لأنو الناس بتنفذ في أجندتو بدون ماتنضم ليهو
يعني أسي في زمتك الجاليات دي البتسوي فيهو لي المؤتمر الوطني بلقاهو من ناسو ؟؟
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(**)
الدوحة هذا المساء:
تعودنا على مرور أغلب أدباءنا وشعراءنا بالدوحة في طريقهم إلى مختلف منافي الأرض , وكان الإحتفاء مختلفاً , كماً وكيفاً , ترى لماذا كان حضور ليلة الأستاذ (عفيف إسماعيل ) (مركز أصدقاء البيئة)بهذا التواضع رغم أنها كانت جيدة على مستوى المضمون ؟؟
واليوم ترى هل سيعاني (صالون أبنوسة) ركوداً آخر ؟
الغريب أن صديقي / محمد عبدالرحمن الذي كان عضؤاً بكل لجان التحضير تغريباً غاب عن هذه الليلة , فهل سيتغيب اليوم أيضاً ..؟
| |
|
|
|
|
|
|
|
|
|
Re: هناك تركني قلبي .. حدث بوطني ذات مساء حزين ...!!! (Re: كمال علي الزين)
|
(**)
الخرطوم هذا المساء :
أعلن فخامة الرئيس السوداني (عمر البشير) حفظه الله
الحرب على دولة (الدنمرك) الغاشمة , وقد هدد فخامته
بإجتياح (شعيرية) و التحريض على (غزو إنجمينا) إذا تمادت
الدنمرك في الإساءة إلى مشاعر المسلمين ..!
____________________________________________
هاك (خليفة المسلمين) ...ده
| |
|
|
|
|
|
|
| |
كمال علي الزين
Emad Abdulla
هشام هباني
خضر حسين خليل
مجاهد عبد الرحمن
بهاء بكري
Hisham Osman
د.محمد حسن
انعام حيمورة
المسافر
طارق عمر مكاوي
tarig almakki
hameem
Mutwakil Mahmoud
مازن الجمّال
Shayma
حليمة محمد عبد الرحمن
عمر سعد
هجو الأقرع
كمبورة
Faisal Al Zubeir
فيس بوك
تويتر
انستقرام
يوتيوب
بنتيريست