|
|
 الشكيــة لي الله.... فــوفــو شتمتـنـي
|
بعضكم يذكرها ...فوفو.... ابنتي الخديج..... والتي لم تحبي في طفولتها قط....من السرير للبرندة قاعدة للحوش وهي ماشة علي كرعيها.....اثرت عليها العولمة ووسائل التواصل والاتصالات من موبايلات الي دشوش ومحطات فضائية فاصبحت علاقتي وعلاقتها تنح منحا ماديا صرفا حتى خفت علي العلاقة الانسانية بين وبينها من الانكماش...لكن برضو بحبها ....
مرة من ذات المرارير....كنت ماسكها في يدي لما مرت واحدة من الجارات والتي طولت ما شفتها وسلمت علي وسلمت عليها وعلقت على الجارة بانها ازدات اشراقا..تعليق برئ لوجه الله.... سمعت صوت تحت كرعي يضحك ويقرقر دنقرت لقيت فوفو تضحك وخاتة ايدها اليمين فوق خشما... وبعد فاتت الجارة قالت لي " بابا... حنكّت خالتو محاسن؟... والله يابابا انت عندك جنس مكنات"... للامانة الادبية نقلت الجملة دي زي ما قالتا لي فوفو عمرها حسي داخل في السته سنوات...اعتبرت النضم دا من طفلة ابدت ملاحظة عابرة ولم يخطر ببالي ان تستغل فوفو هذه الهفوة لابتزازي.....بدأت تطلب مني قروش في وجود امها وبصوت عالي ولما اطنش " ترقد علي ضهرها في السرير وتقول... م...ح..ا..س...... في اللحظة دي انا انتبه واقول في سري الله يكفيني شرك يا دي البنية... وكثيرا ما اخضع للابتزازها...قررت هروبا من الابتزاز ومحاولة للضغط عليها قررت احاربا اخاصما استدعيتها وابلغتها بالقرار باني انا مخاصما وما ح اتكلم معاها تاني.....وكان في نفس يوم القرار اكتر موقف حرج لما زارتنا محاسن بعد حادثة الاطراء..كانت فوفو تقعد جنب امها وتعاين لي وتمد لسانها مشيرة الي محاسن....صراحة انا خفت محاسن تنتبه وتتحرج وتتعقد دخلت ايدي في جيبي وايدت فوفو حمسائة جنية حديدة... رفضت وطالبت برفع القيمة الي الف جنية ...وهي تترقص قدامي بكل جسدها امعانا في المكاواة وكلها ثقة في موقفها القوي.وتغني وهي تهز كتفها اليمين وترفع حاجبها الشمال مع غمزة عين تغني غنية ناسي عجرم " اخاصمك اه..... اسيبك لا"...... مشيرة الا انه سجمك وسجم قرارك..... فعلمت ان فوفو قد اجادت الالتفاف حول القرار..وعدم خرقه بصورة ذكية...يعني خاصمني لو داير تخاصمني لكن ما بسيبك حتى لو طرت السما...ايقنت انني في ورطة ما يعلم بها علا الله....قلت يا ولد صارح الام وارتاح من الهاجس دا واكتل للبنية المفعوصة دي الدش في يدها وقد كان وتقبلت الام كل مبرراتي بصدر رحب بالرغم من محاولة فوفو تصوير الموقف بانه خطر وخطر شديد....واني لما كنت بنضم مع محاسن كنت برجف لكن الله يسعلني كضابة......شفتو كضب البنية دي؟.. نان تاني ان سقتك معاي والله باريتيني لوميني....
بدات فوفو تستعمل اسلحة اخرى للحصول علي المال من العبد الفقير... وهذه المرة كانت تحاول احباطي ..مرة باني شين...ومرة بان كرعي مكعوجات وراسي كبير ومطفّق.. ومرات عديدة بمقارنتي ببقية الاباء واني ما بشبهم وهم احسن مني واضكر مني وارجل مني. العجيبة اني مرة قبضتها وهي تونس في شفع الحلة بانو ابوها اسمح زول وعندو قروش كتااااار...... ومرة جابت صورتي في الجريدة وقالت لي " يا بابا غايتو جنس شنا؟ بري منك..... شوف الراجل دا اقيف منك؟"... وكان الراجل الاقيف مني هو شخصية مهمة مهمة جدا....قلت لها في دي صدقتي..دا اقيف مني وارجل مني واضكر مني.....مليون مرة يا بنتي ما لقيتي اصلو زول غير دا تقارنيني بيهو الشكية لي الله....ومرة حاولت التمرد عليها وعدم دفع الاتاوة....فاخذت تبكي وهي تشتمني من خلف الدموع" يا شين يا عوير..يا مكعوج...... " كانت دائما تستعمل مفردة مكعّوج دي لوصفي لدرجة اني اتعقدت وشكيّت في ااني مكعوج فعلا كنت امشي في الشارع واقعد اعاين لضلي ولكرعي تحديدا علني اجد اي كعوجة..مافي اي كعوجة بس حاجة بسيطة ما تستدعي الشتيمة..... ووقفت في خشم باب الاوضة في حالة استعداد للجري وقالت لي"" امشي ... يا. ما عندك قروش.....يا.... يا سجيمان"...وهربت....
|
|
 
|
|
|
|
|
|
|
|
Re: الشكيــة لي الله.... فــوفــو شتمتـنـي (Re: معتصم دفع الله)
|
| Quote: باني شين...ومرة بان كرعي مكعوجات وراسي كبير ومطفّق.. |
معتصم دفع الله امانة في ظمتك دي كلام فوفو ده ما صاح ؟
تتذكر لامن كنا بناكل الكسرة المرة وحامضة في جامعة الخرطوم
كل ما اعاين لسجيمان الكسرة تبقا لي حلوة وطاعمة ومرات مرات
اودر الحموضة بتقميص شنات سجيمان بالعسل الجنبو
غايتو يا فوفو لو طلعتي بتشبهي ابوك واطاتك صبحت
حقو فوفو تطالب بقسط تامين ثابت شهريا 
| |
|
|
|
|
|
|
|
|
|
Re: الشكيــة لي الله.... فــوفــو شتمتـنـي (Re: سجيمان)
|
الغالية فوفو
نحن معك نشد من أزرك , إلي الأمام ولا نامت أعين الآباء
عمك أحمد موسي
رئيس مركزية فوفو بحجر النمل وقراها التسع المجاورة
مناشدة لبكري أبوبكر
أدّي فوفو باسوورد عليييييييييييييك الله
إنشاء بتاع منو داك ماعارف القال باسووووروا رايح
| |
|
|
|
|
|
|
|
|
|
Re: الشكيــة لي الله.... فــوفــو شتمتـنـي (Re: Ahmed musa)
|
Quote:
"" امشي ... يا. ما عندك قروش.....يا.... يا سجيمان"... |
دي حقرة وظفر..
حالة أخير منها فرجة خلق الله ومباراة كلاب الحلة..
مني منك تبدأ الشكية لطوب الأرض أولا
وعقمانية ترفع شكيتك لي ديوان الزكاة
وكان حضرت مؤتمر لاروشا .. ناس روشة .. كان فرصة تكلم ناس كونتا كونتي في الأمم المتحدة
وبعد ما تنقفل القبل الستة عشرة في طريق كعوجتك تقبل بعوجتك لي باب السماء
وأبشر إنشاء الله ربنا يهديها ويجعلها هنية ورضية ( بعد ما يعمر جيبك بالشك اللخدر) يا بركة الخدر اللخدر وهمزة والعباس الفي البحر جلاس
| |
|
|
|
|
|
|
|
|
|
Re: الشكيــة لي الله.... فــوفــو شتمتـنـي (Re: سجيمان)
|
| Quote: وبعد فاتت الجارة قالت لي " بابا... حنكّت خالتو محاسن؟... والله يابابا انت عندك جنس مكنات"... للامانة الادبية نقلت الجملة دي زي ما قالتا لي فوفو عمرها حسي داخل في السته سنوات...اعتبرت النضم دا من طفلة ابدت ملاحظة عابرة ولم يخطر ببالي ان تستغل فوفو هذه الهفوة لابتزازي.....بدأت تطلب مني قروش في وجود امها وبصوت عالي ولما اطنش " ترقد علي ضهرها في السرير وتقول... م...ح..ا..س...... |
بتك لكن ما كوزة عدييييييييييييل..
لو كلامك ده جد
عندك اعسل بت يا سي..
| |
|
|
|
|
|
|
| |
سجيمان
Elawad Eltayeb
معتصم دفع الله
Ahmed musa
المسافر
Siham Elmugammar
عواطف ادريس اسماعيل
فيس بوك
تويتر
انستقرام
يوتيوب
بنتيريست