بلحيته المعهودة دوما ( مكرهنا في عيشتنا) وهو سائق في ذات المهنة الماخور اي مهنة التاكسي وهو فيها مخضرم لاكثر من عشر اعوام ودوما هو صوت الحق وصوت العقل وسيد الايمان والدفاع عن العقيدة عندما يتصدر المجالس والكلام عن الدين والايمان والمشروع الحضاري في سودان الهوس واللوثة .... وهو دائما ما يحثنا على مغادرة هذه المهنة التافهة بل الحرام لانها تعرضنا لمواقف تتعارض وديننا الحنيف..... اذ كيف نتعامل مع نساء سافرات ونختلي بهن في الطرق الوعرة البعيدة وابليس بالتأكيد ثالثنا و( حقنتنا) وكيف نحمل بشرا من الكفرة المخمورين وكيف نحمل الزبائن الى اندية معرروف عنها انها مرتع الرذائل والفاحشة وكيف نتعامل ب( credit card) هذه البطاقة الربوية المحرمة... والاغرب في الامر صديقنامستمر في ذات المهنة لاكثر من عشرة اعوام ولم يجهد نفسه عناء البحث عن رزق حلال غير رزق التاكسي....( وبيني وبينكم صاحبنا مرطب في الشغلانية ومتجدع فيهاومكنكش فيه للطيش... لحد ما اهنق حمار الوادي حتين افكها)..
كان يكتب علي زجاج نافذة سيارته( ممنوع ركوب الكلاب) وعندما سألته هل هو مصاب بفوبيا الكلاب... اجاب بالنفي واوضح لي بان السبب ديني بحت حيث ان الكلب حيوان نجس اذا لعق ماعونا ينبغي عليك ان تغسله سبع مرات وهو حديث مؤكد وصحيح روي عن النبي ( ص) ولذلك فهو حرام يجتنبه ولن ينجس سيارته بهذا المخلوق النجس؟؟ سألته :/ لماذا لم تكتب ممنوع ركوب سيدات سافرات او ركوب افراد سكارى او انك لا تتعامل بالكريدت كارد البطاقة الربوية او انك ترفض ان تحمل راكبا لمرقص او كباريه؟؟ وهل حملك للكلب في سيارتك اكثر تحريما من تلكم الاشياء؟؟
اجابني انه لا يستطيع فعل ذلك لانه يتعارض مع القوانين و حريات الناس وعاداتها في هذه البلدان الكافرة.... اللهم الا اذا قام نظام شرعي هنا في هذه البلاد الكافرة؟؟
سألته وانت يا اخوي الجابرك شنو على الجهجهة دي ومطلع دينك فوق شنو ما اخير ليك ترجع هناك بلد المشروع الحضاري والتطهر والايمان والبشر الرساليين وتفك راسك من الخوتة دي؟؟) اجاب دي كلها بلاد الله ... والله قال : وجعلنا لكم الارض ذلولا فامشوا في مناكبها)
قلت له طيب يا اخوي ما تخلوا الخلق لخالقها وكل شاة معلقة من عصيباتها)
سألته طيب يا اخوي الورقة بتاعة انك ما بتركب كلاب دي ما في داعي ليها والناس ديل هنا بحبوا الكلاب ديل زي وليداتهم)
اجابني بتشدد الا دي ما بخليها ودي وراها حديث صحيح ومؤكد)
المهم بعد اسابيع اتصل بي هذا الزميل قائلا الليلة اخوك مزنوق زنقة شديدة وكدي اديني رايك بالله بسرعة عشان ناس الشركة اتصلوا بي وعطلوا جهاز الكمبيوتر بتاعي بتاع التكسي وطلبوا مني الحضور فورا للمكتب بتاع الشركة)
سألته: الحاصل شنو؟؟
اجابني: والله ادوني call واكتشفت ان الزبون اعمى ومعاهو كلبو عشان كده اتصلت علي الشركة ووريتهم لايه رفضت اشيلو لاني ما بقدر اشيلو لانو حرام علي اشيل كلب وده بتعارض مع الدين بتاعنا والدستور بتاع البلد دي بحترم حرية الاديان؟؟ سألته: وقالوا ليك شنو ناس الشركة؟ اجاب: قالوا لي كونك ترفض انك تشيل كلب بتاع زول اعمي وهو كلب مدرب على مساعدة الناس العميانين ده بتعارض مع قانون فيدرالي بحمي الناس العميانين وبلزم اية جهة نقل ان تسمح للعميانين بالركوب ومعاهم كلابهم؟ سألته: وتاني قالوا ليك شنو؟؟ اجاب: سالوني عن ديني وقلت ليهم انا مسلم وديني بمنعني اتعامل مع الكلاب لانها نجسة؟؟
واضاف: كلهم استغربوا في كلامي ده وواحد منهم لئيم قال لي معقول دينكم بسمح ليكم ما تساعدوا الناس العميانين..
قال له: لا دينا بحضنا علي مساعدة كل البشر وبما فيهم العميانين.. لكن الكلاب دي مخلوقات نجسة..
قال له الموظف: يا خي الكلاب دي مدربة مخصوص عشان تساعد الناس العميانين اكتر من البشر اولادهم وبناتهم ذاتهم تجي تقول لي دينكم بمنعكم تتعاملوا معاها؟؟
هنا قلت لصاحبي: انت عارف يا زول كلب العميان ده اشرف منك ومن الرئيس بتاعك ظااااطو لانو مفيد تقول لي كلب نجس وحرام الكلب ده يوم القيامة بخش الجنة وانت بعملتك الشينة دي علي بالطلاق حقك راح واحرجتونا بدينكم القاطعنو من راسكم ده قدام الامم ؟ قال لي : استغفر الله يا زول
في النهاية بعد ان قابلته بعد اسبوع وجدت سيارته خالية من تلكم العلامة التي تحظر ركوب الكلاب . سألته اها يا خوي مالك شلتها)؟
اجابني: يا زول هددوني وقالوا لي المرة الجاية لو عملتها بنشتكيك وبحاكموك وبرفدوك من التاكسي لانو ده بتعارض مع القانون الفيدرالي؟ قلت له: عجبني ليك السجمان اها وينو دينك القاطعو من راسك وقادينا بيهو... يا زول ما اكرم ليك ترجع محل شريعتك وجماعتك ..عوافي والله انا عافي منو تب كلب الخواجات الجهجهك وجهجه دينك... والله ده كلب اشرف من رئيسك ظااااااااطو. اجاب خجولا: يا زول استغفر الله؟؟
يا اخوى هشام اقول ليك حاجه ما تزعل منى !!!! انت البوديك تصاحب الكيزان شنو !!!! الخلا و لا الرفيق الفسل !!!!! و على بالأيمان الكلب ولا الكيزان !!!!! ان لقيتو فى النار زيدو حطب !! عبدالماجد
الكلب على الأقل ما بغدر بصاحبو لكن ديل غدروا بالديمقراطية و غدر على عثمان بزملائه فى الجمعية التأسيسيه !!!! غدر الكوز بزميله فى الدراسة و العمل و تجسس عليه و ارسله الى بيوت الأشباح و مراكز التعذيب و التشرد و المنافى و الصالح العام !!! رصاصهم اصطاد الشرفاء داخل نشاط الجامعة !!! احتفلوا بمجزرة ٢٨ رمضان و غنوا و رقصوا طربا على جثث شهداءها !!!! ليس بيننا و بينهم اى مودة او رحمة و البادى اظلم !!!! عبدالماجد
11-23-2005, 11:36 PM
ahmed haneen ahmed haneen
تاريخ التسجيل: 11-20-2003
مجموع المشاركات: 7982
Quote: عجبني ليك السجمان اها وينو دينك القاطعو من راسك وقادينا بيهو... يا زول ما اكرم ليك ترجع محل شريعتك وجماعتك ..عوافي والله انا عافي منو تب كلب الخواجات الجهجهك وجهجه دينك... والله ده كلب اشرف من رئيسك ظااااااااطو
.
آزول إت ماك نصيح بتقول كلام زي دا
حسع دي بجوك الدبابين والمجاهدين ويهدروا دمك ظاااااطــــــــــو
11-23-2005, 11:52 PM
wadalzain wadalzain
تاريخ التسجيل: 06-16-2002
مجموع المشاركات: 4701
ما يعجبنى فى بوستاتك يا هشام انك تحكى قصص من الواقع ولو اى بوردابى هنا حكى قصص من واقعه الموجود فيه من اركان الدنيا الاربعه لاستفدنا كثيرا وعرفنا كثيرا لانه المعرفه قوه وسلطه غير المتعه الذهنيه.
شكرا لك وبئس صاحبك المهووس لماذا لايذهب لافغانستان او يأتى للسودان وينضم للدبابين .
اخونا ود هباني السلام عليكم ورحمة الله وبركاته كراهيتك لي زميلك الكوز دا بتمرقك في مكان تاني لانو مافي مخلوق في الدنيا دي اكرم من الانسان قال تعالى (ولقد كرمنا بني ادم وحملناهم في البر والبحر) الاسراء/70. ولو سمحت شيل الجملة دي كلب العميان ده اشرف منك ومن الرئيس بتاعك ظااااطو قال تعالى (ولاتزر وازرة وزر اخرى) الانعام/146 وكمان دي ومطلع دينك فوق شنو قال تعالى (تلك حدود الله فلا تعتدوها) البقرة/229. ودي نصيحة لوجه الله واخوك والله ولا في يوم من الايام وقف مع كوز ولا صوت لي كوز ولا منضم لاي جهة لانو بي ببساطة الدين ما حق زول
كراهيتك لي زميلك الكوز دا بتمرقك في مكان تاني لانو مافي مخلوق في الدنيا دي اكرم من الانسان قال تعالى (ولقد كرمنا بني ادم وحملناهم في البر والبحر) الاسراء/70. نعم لقد كرم الله بنى ادم و لكن ... الكيزان داسوا على هذه الكرامة و طربوا و انشدوا و برروا ذلك الهوان الإنسانى فاطلقوا الرصاص على الطلاب العزل مثلما يقتلون الكلاب فصعدت ارواح الشهداء التاية و سليم و بشير و طلاب معسكر العيلفون بمركبهم وسط النيل و اعدموا ٢٨ ضابطا عشية العيد فيا ترى كم طفل يتم و ام رملت و بيت ( انقفل ) سبقوا كل ذلك باعدام شيخ فوق السبعين الا وهو شهيد الفكر الأستاذ محمود محمد طه !!! اين كانت تلك الإنسانية و الفتاوى الشيطانية !!!!!! فهؤلاء الكيزان ليسو الا بكلاب بل و كلاب ضاله و مسعورة كمان يجب الإبنعاد عنها و محاربتها و ابادتها !!!!! عبدالماجد
11-24-2005, 02:36 AM
JAD JAD
تاريخ التسجيل: 02-05-2002
مجموع المشاركات: 4768
Quote: اخونا ود هباني السلام عليكم ورحمة الله وبركاته كراهيتك لي زميلك الكوز دا بتمرقك في مكان تاني لانو مافي مخلوق في الدنيا دي اكرم من الانسان قال تعالى (ولقد كرمنا بني ادم وحملناهم في البر والبحر) الاسراء/70. ولو سمحت شيل الجملة دي كلب العميان ده اشرف منك ومن الرئيس بتاعك ظااااطو قال تعالى (ولاتزر وازرة وزر اخرى) الانعام/146 وكمان دي ومطلع دينك فوق شنو قال تعالى (تلك حدود الله فلا تعتدوها) البقرة/229.
ورد في الحديث أن امرأة أصابها ظمأ فنزلت بئراً فشربت ثم خرجت فوجدت كلباً يدور حول البئر ويلهث من العطش .. فقالت قد أصاب هذا الكلب مثل الذي أصابني فنزلت البئر فملأت خفها ماء وأمسكتها بأسنانها فسقت الكلب فشكر الله لها ذلك فغفر لها (أو كما ورد الحديث) ..
الاخ الغالى خالص خالص بن العم ود هبانى؟؟ يا جماعة الكلام فيه حقيقة ومجاز.. بيحكى عن المعاملة وربنا لما قال(ولقد كرمنا بنىء ادم) ما حدد لونه عرقه دينه مسلم ولا كافر المهم بنى ادم) والرسول صلى الله عليه وسلم قال(الدين المعاملة) وكان صلى الله عليه وسلم جالسا مع اصحابه وجاءت جنازةمارة فقاما صلى الله عليه وسلم من مجلسه فقالت له الحاشيه هذه جنازة يهودى كان رده صلى الله عليه وسلم قمة الاحترام اليس هذا من خلق الله) وربنا قال (ولو شاء ربك لامن من فى الارض كلهم جميعا افانت تكره الناس حتى يكونوا مؤمنين)قال جل وعلا (فانما عليك البلاغ وعلينا الحساب) (ادعوا الى سبيل ربك بالحكمة والموعظة الحسنة) ( فذكر انما انت مذكر لست عليهم بمصيطر) مع خالص ودى وتقديرى وامتنانى وتقدير؟؟؟
11-24-2005, 09:26 AM
Saifeldin Gibreel Saifeldin Gibreel
تاريخ التسجيل: 03-25-2004
مجموع المشاركات: 4084
هشام هبانى يا رائع طبعآ انا زميل مهنة ايضآ انا اعمل بالتاكسى فى مدينة سان فرانسيسكو وهى من المدن الجميلة على الاطلاق فلقد تجولت وزرت العديد من دول العالم وخاصة الاوربية منها فلم اجد اجمل من هذه المدينة وطقسها المعتدل طوال السنة وعلى فكرة ان مدينة سان فرانسيسكو هى مدينة ال Gay والسحاقيات حيث 60% من الذين يعيشون فى هذه المدينة من هؤلا ومن خلال تجربتى هم اناس غاية فى الاحترام والرقى فى التعامل وهم كانو اول وقود للاحتجاجات التى قامت وانطلقت من سان فرانسيسكو ضد الحرب فى العراق بل ولهم تاريخ ناصع فى الوقوف مع الحق حيث اول مظاهرة ضد الحرب فى فيتنام انطلقت من Heyt Ashbry وهو حى صغير واصبح من معالم سان فرانسيسكو التى يفد لها السواح من جميع انحاء العالم وهو معقل من معاقل البوهيمين فى حين ان كل المحلات واحانات التى تبيع الخمر جلهم من العرب المسلمين وكانو يتفرجون من النوافز كأن الامر لا يعنيهم. وفى المستقبل الغريب سوف افرد بوست خاص لهذه التجربة انشاءلله.
سيف الدين جبريل
11-25-2005, 08:48 AM
هشام هباني هشام هباني
تاريخ التسجيل: 10-31-2003
مجموع المشاركات: 51288
انت عارف ما في غضاضة اكون الزول الكوز ده صديق ربما ( اخلي الشغلانية) في اقرب لفة وفعلا عند اول محك ترك الشغلانية وركع للقانون الفيدرالي واستعلى علي شرع الله وقال الروب عديل روب بملاح فاصوليـا ظااااطو؟؟ محبتي واحترامي
العزيز ود حنين
تحياتي واحترامي
يا ود حنين ات موهوم ولسه مصدق انو في دبابين هو كان في دبايين البلد بقت ادبخانة عديل لقاذورات ( الكفرة الفجرة) لتدفن برفقة المشروع الخرائي ؟؟
العزيز والزميل التكاسي /سيف
يا سيف خلينا نعمل رابطة عالمية للتكاسة السودانيين لمناقشة مشاكلنا وتحديات المرحلة وما في زول في البلد الهامل دي احسن من زول امكن اجي يوم نحن التكاسة نمسك السلطة السجمانة دي عشان بعد داك نحدد مواصفات الزبون الراكب ..حنركب الكوز ولا الكلب..
محبتي واحترامي
الاخ/ جاد
جزاك الله عنا كل خير
محبتي
احونا / الامين
كتر خيرك علي النصيحة وربنا اهدي الجميع
محبتي
الاخ/ ود الزين
كتر خيرك يا رائع علي المرور وزي ما قلت افضل شيء لفضح هذه النماذج من واقع مشاهدات ومعايشات يومية من الواقع.. محبتي
الرائع/ عبد الله
كتر خيرك علي التوضيح علهم يفهمون...
محبتي واحترامي
الاخ/ محمد الامين
يا اخوي انا ما جمال هباني اظنك حلمان ولا بتتخيل؟؟
محبتي
11-26-2005, 01:36 AM
JAD JAD
تاريخ التسجيل: 02-05-2002
مجموع المشاركات: 4768
Quote: وعلى فكرة ان مدينة سان فرانسيسكو هى مدينة ال Gay والسحاقيات حيث 60% من الذين يعيشون فى هذه المدينة من هؤلا ومن خلال تجربتى هم اناس غاية فى الاحترام والرقى
ياجماعة الخير مطلوب واحد راقي يشرح معنى الرقي المقصود في الفقرة أعلاه ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هشام هباني
وانت يا اخوي الجابرك شنو على الجهجهة دي ومطلع دينك فوق شنو ما اخير ليك ترجع هناك بلد المشروع الحضاري والتطهر والايمان والبشر الرساليين وتفك راسك من الخوتة دي؟؟)
ahmed haneen
wadalzain
JAD
محمد الامين احمد
Saifeldin Gibreel
فيس بوك
تويتر
انستقرام
يوتيوب
بنتيريست