|
|
|
 Re: ســـلمـى الشيخ ســـلامــة (Re: حيدر حسن ميرغني)
|
صاحبي سلمى
كان بيننا مودة وضحكةممتدة
لي أحلامنا
كان بينناحكايات لاتنتهي
وونسةضل ضحى
نكات متناثرة
ومواضيع جادة عن كل شئ
مقددين الشيطنة
وجالدين حصص الوهم
وفاتحين أبواب الروح
للناس الحلوة
نهترش بي مسرحيات
وأفلام ومسلسلات
وفن مافي واحد عملو
صاحبي سلمى
هذه الأيام والدوحة تبدل جلدها
بجلد شفاف زي الساكوبيس
للصيف الحراق
فاتح قلبي
عل همبريبك
انسم اوردة الفؤاد
محبتي
| |
 
|
|
|
|
|
|
|
|
Re: ســـلمـى الشيخ ســـلامــة (Re: حيدر حسن ميرغني)
|
حيدر حبيبى
(مرة عميرى كان بغنى فى اغنية لفنان مشهور فقام سالنا الاغنية دى حقت منو ؟ قلنا ليهو اسم الفنان قال : الله يقرفو غناى شديد) هسى الله يقرفنى
وما وجدت فرصة اجمل من هذه لاعتذر لك عن امر تجده
فى بوست العميرى الحضور العاصف
وتجدنى نادمة على ما قلت
فلك حبى واعتذارى لمليون سنه ضوئية
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
صديقنا السني
سلامة الشيخة سلمي
أو العكس
فترة طويلة يا أخي منذ تلك الايام
والشفق الغريب ومحاولاتنا لاحتواء الهجوم علي استاذنا هاشم صديق
ما ازال اتذكر تلك الايام يا سليمان، ومقالة الدوش المدافعة عن المسلس
وعصمان شنقر ايضا..وقيل جلال البلال..
شكرا لمؤازرة سلمي
فهي البنت الحديقة أيضا
في زيارتي الاخيرة للبلد
نتلاقي يوميا ونحكي عن القاهرة وامريكا
وتلك الايام التي نداولها بين الناس
سلمي مكتبة سوداني
فيها القصص
والحكايات
والصحافة
والوفاء السنوي المنتظم
للعميري
وهي الاذاعة
والمسرح
والعرافة
بالمبدعين
وكل شئ
أي شئ
وشوقي ليك ولسلمي
ة
| |
|
|
|
|
|
|
|
|
|
Re: ســـلمـى الشيخ ســـلامــة (Re: صلاح شعيب)
|
عزيزى محمد
Quote: سلمى الشيخ سلامة
أخونا في الإنسانية
محمد ولد
الحبوبة الوناسة
الجمال النقي
سلمى الشيخ ســلامـة |
كلمات بسيطة ولكنها مقالة كاملة عن هذه الإنسانة الجميلة
كفيت ووفيت - أحمد ساطور
ولك ودى - ياراجل نحن نمرق من السعودية تقوم تجى
| |
|
|
|
|
|
|
|
|
|
Re: ســـلمـى الشيخ ســـلامــة (Re: ترهاقا)
|
(ساتور ) كيفك يازول يا ندى ؟
فاكرة ايام المعهد، والعمارات
ومدنى وزواج خالة الفاتح حسين وصلاح ابا يزيد عليه الرحمة، قلنا له ( تمشى ؟ قال وين ؟ قلنا مدنى ، كان مايزال يتثاءب من نوم متقطع ، لكن قال: نمشى مش انتو ماشين ؟
والدرديرى الشيخ رقصته التى تشبه رقصات من كان به معجبا (مارفن قى ) ، وعادل الصديق وصوته الباهر ، والنو يلعب البيز برشاقة العارف ماخدا من من كان معجب به (فى ذلك الحين بوب مارلى ، ويوم تلك الحفلة فى دردق وغناء ما زال يخفق به القلب (مساويك الصباح فى كراسى الحفلة ) واخلاص برتش تعبق المكان بالصخب وحكاياتك عن ( حنان لبط )
ما زال كل شئ فى القلب وضحكات صلاح ابا يزيد حين تعبر الذاكرة يرتجف القلب لوعة على الفقد الباكر لفنان كان يحلم بموسيقى جديدة وحياة اجد ، وكاريكاتير كنا نضحك له فى صباحات ( النادى الجاد)
واميقو يلعب ( كرة القدم والنو ) ومصارعة مضحكة وطريفة بين النو واميقو له الرحمة ، النو كان ( يوقف عادل الصديق واميقو ويلعب بينهما ركلات لكرة شراب كنا نتففن فى صنعها
يا لتلك الايام يا صديقى
ولكنها محفورة فى القلب كما انتم لك مودتى
| |
|
|
|
|
|
|
|
|
|
Re: ســـلمـى الشيخ ســـلامــة (Re: صلاح شعيب)
|
صلاح يا شعيب ايها الولد الجميل
ما بقدر اقول غير انى شبعانه بجميل كلامك
واتمنى ان نلتقى ثانية على ضفاف النيل ويكون شاهدا على لقاء الوفاء الزبير سعيد
ففى مكتبه تفوح كل الاشجان بعطرها
واحمد عبد المكرم الفتى الاكثر روعة من كل الكلمات
ويغنينا علاء الدين السنهورى
ويقرا شعره ذاك الولد المجنون بالوطن فاضلابى
وينقلنا بمونتاج احلى محمد مصطفى الامين بحديث (زاه كما يقول زهاء الطاهر) عن السينما
وتجود علينا ابتسامه صلاح الدين مصطفى ببريقها الناصع الرقيق
ونقعد الى ظهر مكتب فى جريدة الخرطوم نقرا ما كتبت يد ذات اخضرار عن النقد والاغنية ويحلق بنا صوت مصطفى وضحكات العميرى كما كانوا يفعلون دوما
ونشرب ( البيبسى اب حديدة )حاملا اياه رمزى، بعد غداء بالطحنية والجبنة او سلطة قطعتها ذات نهار يد الفتاة الدلوعة الجميلة وجدان
ويجئ محمد اسماعيل حاملا ( صحن طعام ورغيف فى يديه )
ونعود للدار سراع نرتاح تحت شتل الهنا
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
شكرا عم السني ...
سلمي حاجة تاني شكل تاني
صحبي واختي حبيبتي
ما تحتاج الي تاشيرة او جواز سفر الي قلبها المليان محبة
اشوف اسمها في بوست ارتاح
معجونة بكل ابداعات واوجاع وانسانيه واخلاص وعفوية وشفافية احسن ما في الانسان السوداني
عرفتها متاخر ولكن يبدو انا ارواحنا عرفت بعضها زمان زمان
تكتب ضحك عيونك تدمع
تكتب وجع قلبك ينزف
دي سلمي وبس
_____
حاشية : اولاد سكة حديد وابواتنا كانو نظار محطات
| |
|
|
|
|
|
|
|
|
|
Re: ســـلمـى الشيخ ســـلامــة (Re: abubakr)
|
ساكنين السكة حديد
وابواتكم نظار محطات
محطات الدنيا كلها لفيتوها
ودلوقت كل واحد فيكم رمى التابلت بتاعوا
وقرش قطروا في محطات بعيدة من البلد
وقريبة لي كل قلوب عشاقكم
سر الدنيا في الروح
تتلاقى ارواحنا
وتتقالد في الفضاء الرحيب
بحبك يابوي ويااخوي الكبير
وبحب كل ناسك العزاز
يا ابو التاريخ والناس الحلوة
متع بصيرتك في حروف سلمى
| |
|
|
|
|
|
|
|
|
|
Re: ســـلمـى الشيخ ســـلامــة (Re: abubakr)
|
صحبى الباهى ابوبكر سيد احمد
يا لى من انسانه من حقها ان تفرح طوال حياتها القادمة
لانك تدخل كالطل على يومها تندى كل حر وزنخ الغربة
ترطب لى ما تبقى من العمر بندى الجمال الذى تسبله على شجيراتى
التى كادت ان تعجف لكنها مفرهدة بك
هل اوفيتك ؟ بالقطع انت اكبر من كل الكلمات يا اجمل الكائنات طرا
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
سلمي
معين الود الذي لا ينضب
ومشلعيب الانسان الدفاق
كسعن اللبن كلما (خج) تزايد سمناً وقشطة
هي .. إلى ما نهاية
وحين تكون هو ... تدرك أن النهايات أبتعدت إلى مالا نهاياتها
هي .. نفاج ضوء هاديء
كلما ابتعدت عنه ... صادك
لا زلت أذكر اماسينا ..
اضحك حتى تهتز سيارتك برغم الحمولة
انت .. هي .. انا
انجراف أوزان داخل في سيارة صالون
حتى ... معقول ياسلمي قدر ده ....
رحلت من الدوحة ..
وبصماتها لا زالت تتشتت هنا وهناك
لسلمى ودنا
ولك الشكر
| |
|
|
|
|
|
|
|
|
|
Re: ســـلمـى الشيخ ســـلامــة (Re: mohmmed said ahmed)
|
يا السني سلام عليك في الفنانين
وسلام لاحبابك كلهم
ست سلمي وكفي
الوفاء
الحنين
المحبة
النبل
الوضوح
اشراق
روح
جمال
كل شي
سلمي
بتذكر مع سلمي عم محجوب وهو بردد :-
كل الجروح بتروح
إلا التي بالروح
خلي القلب شباك
نحو الامل مفتوح
وسلمي ذاكرة للحكايات النبيلة
ذاكرة بطعم اناشيد الحياة
والانسانية
سلمي
وكفي .
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
سفيان الحبيب
لا اعرف كيف اسوق اليك الكلام ، لكنك تدهشنى بمتابعة اعجز ان اصفها سوى انها متابعة تشى بانك حميم الى القلب هذا القلب الذى يكن حبا للجميع ولمحجوب ود مريم محمود حبى واغريه سلامى وقول ليهو جلابيتك ما شلتها يشيلنى البلا
طبعا جلابية محجوب دى قصة طويلة
يوم كنت نايمة معاهن ، ضرب كم زول محجوب يشيل ويقول
ـ تعرفوا الليلة معانا سلمى الشيخ ولابسة جلابيتى لانه مافى زول قدرا تلبس معاهو
بقت الجلابية مشهورة شهرة الدنيا والعالمين كونى لابساها وكونها كل زول فى الدنيا من اركانا الاربعة عرف انى لابسة جلابية محجوب
تلبسك العافية يا محجوب محل ما تقبل وتغتيك وتخليك لينا يا حبيب الكل
وتخليك لينا يا سفيان
| |
|
|
|
|
|
|
|
|
|
Re: ســـلمـى الشيخ ســـلامــة (Re: mohmmed said ahmed)
|
والله يا محمد سيداحمد فترنا من التكريم بعد ما افوت الأوان
ياخي ملوا لو لمعنا ناسنا واديناهم حقهم
نحن قلنا كلمة واحدة مافيها
وبرضوا مقصرين
الزي سلمى لو كانت عن ناسا تاني كانوا عملوا ليها تمثال
هي والرعيل الول من نسوان بلادنا
| |
|
|
|
|
|
|
|
|
|
Re: ســـلمـى الشيخ ســـلامــة (Re: mohmmed said ahmed)
|
الاخ محمد سيد احمد يستاهلك الخير لكن تعرف بخاف من الحاجات دى بتجيب خبر الزول هسى بقيت افكر انى خلاص (حاتلحس) قريب لكن احسن الزول يشوف ناسو من حياتو
عندى زول صاحبى من ناس عطبرة قال فى واحدة جارتهم ماتت ، وما شين يودوها المقابر
اها فى السكة ( ترترب ) قعدت فى عنقريب (الجنازة )
قومى يا المرة عيشى تانى سنين
قالو اول ماجات البيت سالت بناتا
ـ اها الجات ساعة الجنازة حارة منو؟
ـ الجات ساعة الجنازة شا يلنها منو ؟
ـ الجات بعد العنقريب ما رجعوه منو؟
( انشا الله ما اموت قول يا مين )
| |
|
|
|
|
|
|
|
|
|
Re: ســـلمـى الشيخ ســـلامــة (Re: bayan)
|
بيان لك الحب ايضا من هنا الى ان يرث الله الارض فلقد جعلنا المعهد ابناء ام واحدة حتى مع اختلافاتنا وتباين مشاربنا لكنا كنا ابناء تلك الام التى ما كفت عن اجتراح الحب بيننا
| |
|
|
|
|
|
|
|
|
 Re: ســـلمـى الشيخ ســـلامــة (Re: Yassir Hamid)
|
صباحات سلمى يا السنى
سلمى صديقتى الحنينة، سلمى الانسانة، المرأة القوية الابداع الذى يتدفق بوعى وانحياز للانسانية فى مداها البعيد، حكت لى كثيرا عنك فى ليلة بعيدة وضحكنا يومها كثيرا وبجنون، وبكينا ونحنا بنضحك، حكت لى عن صديقها {السنى الثمين جدا}
غايتو اليوم داك بيكون ابوالشهيق كلكل روحك لمن شهقت {اعفى لينا}.
سلمى دى فيها حتة منى ولى معاها ذكريات جميلة هى ذادى الآن، المحيرنى انها لسه قادرة تبكى وتجلجل ضحكتها وده كان قاسم مشترك بيناتن، لنا صديق مشترك اسمه عبدالوهاب، كان لمن يشوفنى وسلمى بيقول قولته المشهورة {مظاهرات الضحك جات}، فضلت سلمى كدة وبعيد عنك انكشطت ضحكتى.
خارج من داخل السياق
لى زمن بكتب فى موضوع سميته {البت محمد ولد} منطلقة فيه من أسئلة موضوعية تدور حول المرأة القوية، المرأة التى حين تفعل افعال يظن بانها افعال رجال، اتناول فيه هذه المعايير، لمن الله يهون واكمله عليك الله اقراه
يوما طيبا معطرا بسلمى الانسانة يالسنى الثمين جدا
إشراقه
| |
|
|
|
|
|
|
|
|
|
Re: ســـلمـى الشيخ ســـلامــة (Re: Ishraga Mustafa)
|
حبيبى السنى انت دائما فى الوقت المناسب و المكان المناسب و تتكلم عن الانسان المناسب
سلمى الشيخ هى سلمى الشيخ.....؟؟؟؟
بحثت عنها ...جاءتنى بعيدة بعيدة
فى المكان و الزمان
كتبت لها فاصابنى العطش
توقفت ..... فهاجمنى العذاب
و غبار ايام تحكرت تراقبنى بلا رحمة
بذكريات لا تندمل جراحهاو افراحها
الكواليس الزرق و الكيو الاخدر
و الركح.... الذى رقص عليه روبرت زولنزيما
ابتسم يا رجل الا تعرف الابتسام.
ابتسم يا حبيبى ابتسم
لقد مر الزمان...و اعترف باننى قد عشت.
| |
|
|
|
|
|
|
|
|
|
Re: ســـلمـى الشيخ ســـلامــة (Re: حاتم محمد محمد صالح)
|
حاتم محمد محمد صالح
قال رجل من البوشمن
ان عمري الحقيقي
بقدر الأحلام التي حققتها والتي لم أحققها
نحن بأيام المعهد
عشنا الحلم الزاهي
لونا الفضاء الركحي بالأمال العراض
دوزنا النغم علة لحنية متناسقة التوافق
كنا عصافيرا تلون الأفق بتغريدها
ونحلق للجمال
وسلمى معانا
تتذكر كيف كان الحال
النقد والجرائد الحائطية والمناقشات المتتدفقة
والثقة العالية حتى في العدو
كنا عصافيرا تلعب مع الأشجار
وترقص مع الرياح
ونعيش الحرية ومعانا سلمى
| |
|
|
|
|
|
|
|
|
|
Re: ســـلمـى الشيخ ســـلامــة (Re: حاتم محمد محمد صالح)
|
حاتم حبيبى
لكم ازهو الان انك كنت من فتح على قلب الجديد فى القراءة عينى ، من شدنى من ضفائرى باتجاه العالم الفسيح وطالعت معك ما لم توفره لى كل كتب العالم
علمتنى معنى ان يكون الانسان اخا وصديقا دون الانزلاق الا الى فوهة العالم المعرفية
كنت تعلمنى معنى ان اطالع الانجيل ليس لانه كتاب دينى لكن لان لغته عالية افدت منها كثيرا
كلما اوغلت فى الحنين فتحت مجامر القلب وتدفات بتلك الايام يا صديقى الابدى
| |
|
|
|
|
|
|
|
|
|
Re: ســـلمـى الشيخ ســـلامــة (Re: Ishraga Mustafa)
|
إشراقة اشرقت شمس فرحتك
وينك ياست الكتابة البساطة
مرورك اسعدنا وجمال ضيك
نور ونستنا
ليك وكل الخلايق الحلوة
أمنياتي العذبة
وجميل مشاعرنا
ومظاهرات الضحك
ما طلت لحدي الان علينا
ونطل على محمد ولد البوست
وبرد عليك فيه
مودتي
| |
|
|
|
|
|
|
|
|
|
Re: ســـلمـى الشيخ ســـلامــة (Re: Yassir Hamid)
|
ياسر حامد
الزول العسل سلمى
تترك بصمتها في كل الدنيا
ولافتات مكتوب عليها
سلمى مرت من هنا
في مهرجان المسرح الخليجي
لموا فيني الوفد البحريني
جاني العم الفنان السعداوي
الراجل المليان فن
وقال السني الزولة السمحة المليانة كتابه وفن وين
سلمى
وغطاقشت المشاعر والمواقف والذكريات والضحك الصادق
وكا ن القاسم المفرح المشترك
سلمى
| |
|
|
|
|
|
|
|
|
|
Re: ســـلمـى الشيخ ســـلامــة (Re: Yassir Hamid)
|
يا( سر) الكلام الذى لا يعرف كم احبه ، الدوحة ،
يا لتلك البقعة التى وهبتنى حب الناس واول حب كان لدنكم ،
يا لك ايها الود الولد، طبعا ما تزال تلك (البرازيلية) تطوف بالذاكرة
ومؤتمر السكان فى القاهرة ، ما زالت الصور معى اتاملها كلما فاض بى سكر الشوق
كانت تلك الايام بطعم الانسانية والناس الذين جاءوا من كل فج لنتعارف وتعارفنا الى كل من استطعنا الى لغته وصولا
تانى الدوحة والمطار كان اخر محطاتى معك
لم اتوقع ان تاتى لوداعى
لكنك اتيت
كنت حزينا وكنت حزينة
لكننا سنلتقى ذات ضياء يعم الكون فى سماء بلادنا
نجترح الجمال ونغنيه ونمضى به الى مشارف لم تصلها يد ولا سمعتها اذن
لك حبى ابدا يا احلى ضحكة
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
غايتو انا طالب ايدهاهنا وبالعدم اصبعين وقلم مبرى
البنية بالله بتور نفس الحروف والحكى عديل
بعدين ما ملاحظين هى ما بتكتب هى بتحجى ساكت
وحات الله حجا بى فليو....
شكرا يا ثنى يا ثمين
رعاها الله من مشوطنة،،،
| |
|
|
|
|
|
|
|
|
|
Re: ســـلمـى الشيخ ســـلامــة (Re: صديق الموج)
|
قابلتها أول مره بالقاهره في بداية التسعينات..
حين كانت القاهره مستقر وملاذ لآلاف السودانيين..
التقيتها في الندوات الثقافيه وسعدت بوجودها والأستماع لها..
سلمه أنسان معجون بالشقاوه والطيبه والقوه...
وديعه..لطيفه..رقيقه..
وقويه لدرجة المواجهه الشرسه حين يتطلب الأمر ..
اخرجت لنا سوميتا الجميله..
ففرحنا بانسانين بدلا من واحد..
سلام يالسني..
| |
|
|
|
|
|
|
|
|
|
Re: ســـلمـى الشيخ ســـلامــة (Re: Muna Khugali)
|
شكرا لمؤازرة سلمي
فهي البنت الحديقة أيضا
في زيارتي الاخيرة للبلد
نتلاقي يوميا ونحكي عن القاهرة وامريكا
وتلك الايام التي نداولها بين الناس
سلمي مكتبة سوداني
فيها القصص
والحكايات
والصحافة
والوفاء السنوي المنتظم
للعميري
وهي الاذاعة
والمسرح
والعرافة
بالمبدعين
وكل شئ
أي شئ
| |
|
|
|
|
|
|
|
|
|
Re: ســـلمـى الشيخ ســـلامــة (Re: Muna Khugali)
|
منى يا منى الاحلام التى التقت فى زمان القاهرة ، تلك ايام بلون الصفا وتعب الرحيل الى مدن لم نخبرها من قبل
كنا نحلم ان (نجتث معا نظام قاتل من جذوره ) لكنا كما يبدو الان لم يعد الاوهما
لكنا سنقاتل لاسترداد حقنا فى العيش الكريم فى وطن نحبه وله نكن ما لم يكنه احد لوطن
| |
|
|
|
|
|
|
|
|
|
Re: ســـلمـى الشيخ ســـلامــة (Re: صديق الموج)
|
الموج
ياخي انت مداقرنا في اي حتة زمان قلت انا خطفت
اميرتك الجميلة
وحسي عايز تعرس اميرتنا الجمبلة سوميتا
اعرس ركبيك يا جهوله ام ساكس
شوفت انا قديم زيك كيف
قال اعرس قال
انت عارف سوميتا ما غنت
الشايب ده الله بيني وينو
عارغ ولا ما عارف
قال شنو عرس !!
| |
|
|
|
|
|
|
|
|
|
Re: ســـلمـى الشيخ ســـلامــة (Re: صديق الموج)
|
صديق الموج هذه اخر قصصى التى كتبتها
لك هذه القصص السته القصيرات
(1 )
كنت افكر فيك ، وافكر فيك ، وافكر فيك طوال هذا اليوم الذى حسبته اطول من قامتك ، وحسبته نضيدا من نضارتك ، وحسبته انت لجماله
(2 )
حين انام احلم بصورتك ، وحين اصحو احلم بصورتك ، لا اعرف بماذا احلم حين القاك ؟
(3)
تك تك تك تك ، تتكتك الساعة المعلقة الى الجدار ، كان قلبى يدق مثلها ، دق دق دق دق ، وانفاسى تتلاحق ها ها ها ها ها ها كأنى اركض بسرعة عداء فى مضمار ،فقط لانى ذكرتك فى تلك اللحظة
( 4)
صنوبرة مخضرة فى مواجهتى ، لم اكن لاراها لو لا انى رايت صورتك معلقة بين اغصانها ، لونها كان ماخوذ من لونك ، دخلت متون اللون ، فادخلنى تحت الجلد ، دعنى اكون احد مكونات كروياتك البيضاء او الحمراء لا يهم ، المهم ان اكون فى مسرى الدم فيك
(5)
وهج خاص ، فاليوم هو السادس من ابريل ، ليس ذاك الوهج ناتج من انه كان ذات يوم تأريخا لحدث ما ، لكن لانه شهد مولدى الثانى حين التقيتك اول مرة
( 6)
ارانى اعود من غيبوبة طويلة ، اهش على جدائلى لتنسدل من جديد ، على عيونى لتبرق ، على حواسى لتنهض ، وعلى جسدى ان يعود للطفولة فمن احب سيزورنا اليوم
4/4/2007
ايوا
| |
|
|
|
|
|
|
|
|
|
Re: ســـلمـى الشيخ ســـلامــة (Re: معتز القريش)
|
معتز القريش
الناقصة الإتموها
بي دقتك
تعرس منو
كان ما كسرت ليك كاميرتك
قال شنو اعرسو ليهو سوميتا
اها طفشتها من الموقع زاتو
امشي صور روحك وانت مساهر الليل
ومجافيك النوم لانو عرس مافي !!
| |
|
|
|
|
|
|
|
|
|
Re: ســـلمـى الشيخ ســـلامــة (Re: انعام عبد الحفيظ)
|
إنعام عبد الحفيظ
ما محتاجة تعريفيها زينا
كلها مرة واحده وتقابليها
وتلقي نفسك بتعرفيها اكتر مننا
تخش فيك زي الكتاحة
وتلقي نفسك قريتي معاها مرحلة الأساس
وبعد داك تلقي روحك معلقه فيها
بت امك وابوك
بس كانو في مأمورية
عرفيتي
| |
|
|
|
|
|
|
|
|
|
Re: ســـلمـى الشيخ ســـلامــة (Re: غادة عبدالعزيز خالد)
|
الزولة المتلوم معاها
أختي غادة
كده نجمع كل الحاجات
نبارك ليك الماستر
بالمناسبة دي عندك ماستر كارد
نبارك ليك السمح
سمح اولادك
وعقبال الدكتوراه
نبارك ليك كتابة السيرة والطفولة
والحروف الصادقة
وسلمى تمد يدها لكل الناس
لانها تعرف ان بكرة له نساء ورجال
غير لهم ان يعطروا سماوات المستفبل
بالعر الندية ذات الأريج الفواح
وانت لك المستقبل
| |
|
|
|
|
|
|
|
|
|
Re: ســـلمـى الشيخ ســـلامــة (Re: بدرالدين شنا)
|
بدرالدين ياخ شيل قعونجتك دى ياخ ، المهندس قال لى القعونجة دى هى السبب الما مخلى الكومبيتر يفتح هسى انت عارف انا بسوى شنو ؟
بطبع ، اول حاجة ، برسل (لى ايميل ) اقوم امشى كومبيتر عزة ، افتح ايميلى ، واطبع تانى فى الرد ، ودا كلو بسبب قعونجتك ( القعونجة ام ٌشرابات ) دى قعونجة خطاب حسن احمد ، مرات بسمينى كده ، اها يا بدر ياخ قعونجتك الخايف عليها (نحنا ما خايف علينا ؟) ياخ بى ( ُشرابا شيلا )
| |
|
|
|
|
|
|
|
|
|
Re: ســـلمـى الشيخ ســـلامــة (Re: Raja)
|
استاذ السنى طمنى ,
سلمى الشيخ سلامة يا السنى
ندية الدواخل كما الدعاش فى بواكير امسية خريفية
انيقةالحروف تحاكى دفء الانس فى خواتيم ليلة شتوية
رقيقة الحال كاجنحة فراشات ملونة فى ضحى شمس ربيعية
| |
|
|
|
|
|
|
|
|
|
Re: ســـلمـى الشيخ ســـلامــة (Re: Nadia Elsir)
|
في المساء الدوحاي البعيد عندما اخبرني صلاح باننا اليوم سنرافق (سلمي الشيخ سلامة) الي
كرنفال سفارة جنوب افريقيا بمناسبة عيدهم الوطني...
طل في خاطري كثيرا هذا الاسم المدهش وعقد في جيل المبدعين الذين اثروا الساحة بوجدانهم الثر
وتواضعهم الشاهق وروحهم التي تحسسك بانك قد تعرفت عليها منذ الف عام في روما القديمة عندما
كانت الارواح تجوب الطرقات
نعم كانت هنالك سلمي الشيخ سلامة القادم الي ارض الدوحة من بلاد (ايوا) تتحدث كما الالحان وتذهب سريعا الي القلب دونما بطاقة سفر مثل الطيور التي ترسم علي الافق الحان المودة والحنية ودعاش
(ابو قبة فحل الديوم)...
اظنها انها تلكم الموسيقي الكلاسيكية يا سلمي التي عزفتها تلكم الفرقة (السوداء) من الهمت ذلك الحضور المتعدد الاجناس والسحنات مثل ذلك التجانس السريع الذي كنتي انتي فراشته ونجمته ذات القلب السلس فتقاطر الي مجلسنا ..افارقة نقطعت بهم سبل الافرقة وهم في صحاري العرب..رجل من بلاد سيرنكا يحن الي الدماء الاستوائية..امراءةجميلة ممشوقة القوام اتت من (خليط) الافرايطالية لا انسي (هرشاتك)
لي وانا اعبر ككائن مسكين عن جمال الانسان الممثل في تلك الامراءة الظريفة التي اتت لتبادل الحديث معنا...
ومنذ تلكم الجلسة صارت سلمي هي اختي وصديقتي وصديقي ايضا...
ما اجملك وما اروعك يا سلمي يا صديقتي,,ولك كل الود والاحترام..وللسني كل الحب والتقدير..
| |
|
|
|
|
|
|
|
|
|
Re: ســـلمـى الشيخ ســـلامــة (Re: عفاف أبو حريرة)
|
عندي مشكلة كبيرة في البوست عشان كده ما قادر ادخل
المعذرة ودلوقت قدرت ادخل من اخر بوست
اعذروني في عدم الرد والمواصلة
***** *****
صلاح شعيب بينا الغربة الشينة
والذكريات الخالدة
والجمال الممدود في عيونك
يا خوي سلمى الصاحب
البعرف الوفا وما بخون
سلمى تعبت التعب العديل
وإتغربت الغربة الجد مش غربتنا
نحن ناس قريعتي راحت
لكن درست أيوب بالعصر
كيف إصبر
وقاومت الريح وغدر الزمن والصحاب
بالكتابة
القرا سلمى اقول زولة راقدة في الهمبريب
لكن سلمى بتعرف تداري الحزن بالبسمة
والنحيب بالضحك القرقراب
أكتبي أكتبي
الأيام دي فاقدك وماليني الشجن
ليه؟؟ الله عالم..
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
أحمد ساطور
ولا خليها ســــاتور فيها شئ من الآت الموسيقى الهندية
ليك الشوق زي خمسمية مازورة نغمية لحنها اسطل وإسلطن
شوق شوق ومحبة بي عمرنا الجميل الما برجع
وايام المعهد البديعة
نحن ما كنا قاطرين لينا قندران مليان نحس
نصل السعودية تسافر انت ؟ شفت كيف مامحظوظين !!
لكن الرحمة جات اتلمينا في حوش بكري
وفي ضل سلمى الحنينة
والله ياساتور عشنا ايام فنانين مجانين في القاهرة
صلينا في الحسين وذكرنا في حدائق الخالدين
وشربنا القهوة في الفيشاوي
وعطرنا الشوارع مع بياعين الفل والياسمين
وقرينا الجرائد وش الفجر
واتسكعنا في الشوارع المضئيةبالنيون مسارح القاهرة التي لاتنام
وقابلنا فنانين وناس عادية ودجالين وتجار شنطه وحنابلة وتنابلة وفنجرية
وسياسين ومتسيسين ورعية وسدنة
ما طاف علينا الملل
لانو معانا سلمى
| |
|
|
|
|
|
|
|
|
|
Re: ســـلمـى الشيخ ســـلامــة (Re: عبدالكريم الامين احمد)
|
عبد الكريم كيكي
شخصيات كوم الري
والناس المجنونة
المارقة مع الدغش
كايسة الرزق
الناس الغلابا
سلمى صاحبتهم
وهم اصحابه
بت النيل
المادة اوردة
لي كل الجروف
فاتحة دفقات
قلبه
غلىكل الرهود
والوديان
غازلة من شجر السيال
غند فولة القيزان الحمرا
سباته للونسة وشاي المغرب
كيكي سلام من صاحبة الحروف
ومني المودة
| |
|
|
|
|
|
|
|
|
|
Re: ســـلمـى الشيخ ســـلامــة (Re: Nadia Elsir)
|
نادية السر
السني طمني
معقول اطمنك بدون بياض
ارمي البياض
ده زمن القروش قدامك ومحمداك
تكون ياربي قروش التبرعات..
لالالاصحيح دي ما قروشك دي قروش الحملة
شوفتي كيف حسي لو كنتي رميتي البياض
كان كامتك بي المستقبل
يارقيقة الحال يارفيقة الغلابا
ليك مودة الدنيا كلها
والإحترام
| |
|
|
|
|
|
|
|
|
|
Re: ســـلمـى الشيخ ســـلامــة (Re: nourelhadi awad)
|
نور يا نور الهادى ، والعين ما بتعلى على الحاجب
انت الصديق القديم قدم الانسانية منذ كلية الفنون وتلك التوامة بين المعهد والكلية
صباحاتنا كانت تشرق بزهو الوانكم
ونشرق بمعهدنا حين ايام التخرج وانتم تحثون الخطى باتجاه اكمال الديكورات والفرح الجمعى الذى كانت تضفيه تلك الامتحانات على الجميع
والدوحة وذلك العشاء صحبتكم والسنى
لكننا مانزال نتعشم فى الباكر ان يكون اجمل
وان تعود كل الحمائم الى بيوتها
ارسمنى فى الخاطر لوحة وابعثها الى
لك كل المودة والحب
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
الرائع السنى
بك جمال لذلك ترى الجمال والحب
وبك عشق وحبور ...لذلك أنت تصنع الفرح
فأنت دائما ترى الأشياء ...
تمنيت أن أكتب عن سلمى
يوم من الايام أمسكت قلمى ..قلت أكتب شيئ عن سلمى
فشلت!!
لشيئ واحد وهو كانت سلمى أبعد من خيالى ونظامى الكتابى
هى مكان للمحايثه
كانت النقطة والخط
لم أجد محلا لأختلف معها
.........
العام المنصرم مكثت سلمى بالسودان سنة كاملة
هى ذاتها سلمى ....
سلمى ... ما أن ترانى حتى تبادرنى
(يا قور يا كوز يا معفن !!)
أغرب حاجه كنت أحس انها تقول لى يا قور يا حلو يا رايع
++++++++
حاولت وتلصصت عليها
لأعرف سر سلمى
هناك شيئ بسيط جدا
خاصية بسيطه جدا لكنها صعبة
سلمى أختارت أن تكون سلمى وبس !!
سلمى وبس!!
يعنى صراحة وصدق مع النفس
| |
|
|
|
|
|
|
|
|
|
Re: ســـلمـى الشيخ ســـلامــة (Re: Mohamed Ahmaed Olyesh)
|
العليش
دائما تجئ الى حيث تكون الاماسى ندية ، دائما تضفى علينا بريق المسرح بضرباته التى باتت خافته لكنها قوية بك ، دع المسرح فى قلبك فهو منجاتنا من العوز والفاقة فهو حلمنا الذى كلما اعيتنا الحيلة عدنا نشد اليه الرحال كن مسرحيا بقدر استطاعتك ولا تنسى اضرب على قوس المسرح وستارة الكمان سينفتحان وينشدان ( لن ننسى اياما مضت مرحا ) تلك كانت معزوفة السنى الشهية التى كنا نرددها كلما اوغل العام فى انسرابه عشمنا ان نلتقى على خشبة المسرح ونردد(جينا نخت ايدينا الخضرة فوقك يا ارض الطيبين )
| |
|
|
|
|
|
|
|
|
|
Re: ســـلمـى الشيخ ســـلامــة (Re: Abuelgassim Gor)
|
قور يا كوز يا لذيذ
انت معقول كوز لي حسي
ليه انا حاسي انك انت ما ليك علاقة
بالجوككه ولا الكبابي ولا الكيزان
عندي احساس انك مظلوم من الجهات الأربع
وزمان قلنا الفنانين ديل ما عندهم علاقة باي حتة في الدنيا
غير حزب الفن العام الجمالي
ليك المحبة والمودة
ومن سلمى ولي سلمى
موعدنا بالقاء
| |
|
|
|
|
|
|
|
|
|
Re: ســـلمـى الشيخ ســـلامــة (Re: Abuelgassim Gor)
|
قور الكوز، ازيك ، ما زلت انت نفسك نفس الزول ، لكننى ما تغيرت تعرف ليه ؟
اظنك عارف ( ياكوز يا معفن )
يوم كنا فى المعهد وكانت الدنيا زاهية بنا وباحلامنا البسيطة
التى لا تتعدى ( صحن فول لدى عبد الباقى ) عليه الرحمة
ناكله ونتم الباقى شاى او ونسة ، احيانا يكون حق الفول فى تلتله لكنها ايام بنكهة لم تعد وفيرة فى هذا الزمان
لك كل الود القديم والجديد يا صديقى رغم انك (كوز ) لكننا اهل قضية واحدة وحب لقضية واحدة ستظل شغلنا الشاغل حتى نهايات التاريخ (او كما قال فوكوياما ) (وياما) بكرة تندم
و(للاوطار) فى دم كل حر يد سلفت
| |
|
|
|
|
|
|
|
|
|
Re: ســـلمـى الشيخ ســـلامــة (Re: Azhari Nurelhuda)
|
سلمى
كنت انا ديها شيخ سلامة سلمى
وقبل أن التقيها فى الدحة سمعت عن سلمى من أصدقائى
مسعود محمدعلى
ومن مصطفى سيد احمد
ومن زهاء الطاهر
محمد السنى دفع الله
ووجدتنى أحفظ ونساتهم عنها واحتفظ بقصاصات كتاباتها
فى جريدة الاتحادى الدولية عن العميرى وعن مصطفى ...
سلمى شلال من الدموع والاحزان وعواطف الحبوبات
حين تذكرها بأي صديق غائب ابدى او غائب جسدى
تيكى بحرقة وترجوك ان لا تنزعج من بكاها ثم تضحك وتواصل
الحكى الطاعم عنه وقد ورط نفسى مرة حين قارنت لها بين
حبها للعميرى وحب زهاء الطاهر لها .. وتلك قصة أخرى
تسلم يالسنى وتسلم سلمى
| |
|
|
|
|
|
|
|
|
|
Re: ســـلمـى الشيخ ســـلامــة (Re: بدر الدين الأمير)
|
كنت حين صارت أحد أعلام بلادي الهو بين ميادين تتعارك فيها الأيادي وغيًب ما عداها، لذا لم أكن أملك غيرأن أحب فيها الكلم النغم عند كل صباح ، تفتح مخيلتي على عشق غائب لوطن منهوب ، تقاذفتها الطرقات فحملت مستندات للتحرك وقلباً يعشق هوى بلادي غصباً عن الحلم الواهي الواهم الضد الإنسانية، كان لياسر حامد ـ أجمل من يحمل وصف النقاء ـ أن تستهويني فكرة سلمى كمال الجمال ، وغصت معها في عميريها وزهاء طاهرها ، وكل من قسم الله له جمال متفرد، كنت كما الصوفي الذي يبهره جمال حديث شيخه ، قرأت لها فكان إختلافها في تناولها لقضايا إنسان السودان عمقها الفطري الذي لبسهامن فطورها في مدرستها الاولية وطرقات العباسية ، لم أشاهد وفاءاً كما وفاءهالكل من إلتقته وترك فيها بصمة جمال ، كنت مرة أتداول معها الحديث حول شخص أخطأ تجاهها فختمت قولها بأن هناك بصيص جمال فيه يغفر له كل القبح ، كتبت عن وحدة السودان فكان لقصتها القصيرة ( من هنا يبدأ الطريق ) مدلولاتها التي لم يتمكن الساسة ومدعيينها حتى الآن من فك طلاسمها ، لكي مني الود بقدر حروفك المتوهجة في رسالاتك ، وحبي لإبن مدني القطينة ذلك السني المتأصل صوفية فطرية .
| |
|
|
|
|
|
|
|
|
|
Re: ســـلمـى الشيخ ســـلامــة (Re: عصام الدين حسين حسن)
|
البت أم قلب بضافير ..
قابلتها أول مرة في مبنى جريدة الأيام ( في طرفها عزة الشهيرة بسوميتا , حاجة صغيرونة كده و نضّامة و عسل ) ..
ما قابلتها بعد داك إلا وهي ياها سلمى زااااااااااتا ..
كبيرة قلب
رهيفة مشاعر
متينة وجدان
مليانة عافية في راسها المدردم داك
بكاية
ضحّاكة
نكّاته
كتّابة لمن تحسدها
حبوبة لمن تتخيلها بشلوفة مدقوقة و شلوخ
طفلة شافعة في شوفها للعالم لمن تفور دمك و تتمني تتفشى بعضها .
شرسة حين يستدعي
بسيطة حد الزهد
خيالها واسع لمن تعقد ستيفن سبيلبيرغ
بتحب البلد كأنها " حقتها " براها
تكلمك في السياسة بحرفنة زي ما تكلمك في الكونكان أو ورطة بابلو نيرودا
خدرة و قيافة
فصيحة في حبها للناس
أنا تعبت
بحبك يا سلمى ياخ .
و إنت زاتك بحبك يا سني .
| |
|
|
|
|
|
|
|
|
|
Re: ســـلمـى الشيخ ســـلامــة (Re: Emad Abdulla)
|
عماد عبد الله ياخ انت زول عجيب ، عندك ذاكرة عجيبة ، يوم اتلاقينا فى جريدة الايام ، كنت شايلة اول قصة انشرها رسم لى حفيظ الرسومات فى القصة كان اسمها انعتاق
انعتاق
اليوم الاول
الساعة كانت تقترب من التاسعة صباحا ، الشمس مسلطة بقوة على جبين الحياةكنت اغنى فى منتصف ذلك العنفوان الشمسى
 العمر يمضى تمرمره الحسرة
الفقر يجلس فى الساحات
يتأبط صندوقا ما ، كان يبدو كشخص متعب
كنت بين الحسرة والحسرة
دن ممتلئ بالغيظ
بارود سيخرج مفتتا ما حوله
لكنى أرجأت انفجارى الى حين
اغدو فى حالة اكثر احتشادا بالالم ،
كيف يكون الالم الا ما كنته فى تلك اللحظة
هدأت روحى بعض الشئ
فقلت لى لن ادع الغيظ يفتك بى
ما مغزى ان يموت الانسان من الحسرة ؟
ما مغزى العمر ان لم نعشه على النحو الذى يجب ؟
ما مغزى حياتنا ان لم نحب انفسنا اولا ؟
هل كنت منتفخة كبرميل بارود ؟
بارود داخلى ، كنت وحدى ارقب الظل يمتد ، كان يمتد كل ثانية اذا ما تثاقلت الشمس فى رحلة العودة ، ينام الظل اذا ما جاء الليل منسحبا على خط طولى فى البيت بانتظار اشراق جديد
كنت فى تلك اللحظة احادثنى
ـ ماذا يحدث لى ؟
ـ وارد على ّ: لا ادرى
كانت المدينة حينها ازقة مقفولة خاصة فى الاحياء الشعبية البعيدة عن مركز المدينة
المدينة لا تلوح فيها سوى لافتات الاعلانات التى أدمنت قراءتها وملاحقة ألوانها
الباهتة بفعل الشمس ، مدينتى كانت معبأة بالبشر من اصحاب الاجساد الهزيلة ، كانوا لا يقدرون على فعل اى شئ حتى تهجئة الحروف ، فكانوا كلما اعياهم حرف ضغطوا على مخارجه ليسهل عليهم نطقه
ويستطيعون قراءة الاعلانات مثلى
اليوم الثانى
جاهزة كنت للترحال عبر الغيوم ، اندسست بين السماء والغيوم فاذا بالسحب تأخذ اشكال حيوانات مسرجة وخراف معدة للذبح ، احسست جوعا مفاجئا ، معدتى انقبضت ، فلم اتذوق طعما لطعام منذ وقت ليس بالقصير ، حالى كمن يبحث فى المدينة عن رغيف خبز
ذات يوم كنت وحدى فى تلك الداخلية للطالبات فى مدرسة فى بلاد اخرى ، واناس آخرين لم يكن بينهم من يعرف لغتى ، كانوا كلهم يتحدثون بلسان غير لسانى ، يأكلون دون ان يدعوا احدا لمشاركتهم ، لا يسألونك ان كنت جائعا ، كنت حين ارى الطالبات يأكلن بشهية ، انتظر ان يرحن فى ثباتهن والعق ماتبقى من الاكل فى صندوق القمامة ، لم يصدقنى احد حين حكيت اننى اكلت ذات يوم من فضلات الطالبات ، حتى انقذتنى امرأة جاءت لنفس المدرسة ، كانت سمراء نحيلة ، لكنها كانت كريمة النفس ، سألتنى :
ـ هل تحسين بمرض ؟
ـ قلت لها :لا ابدا مجرد اعياء السهر والمذاكرة
لكنها الحت ، فقلت لها اننى لم آكل منذ ثلاثة ايام
بكت ، كان اسمها خديجة ، قادتنى الى مطبخها الصغير ومنحتنى خبزا وسكاكر كانت حوزتها ، سالتنى ان آكل ، أكلت بغير شهية لاننى كنت جائعة ومتعبة
خرجت من بيتها الصغير الذى كان بغرفة واحدة ، لم اعد الى منزلى ، بل تمشيت ، لعنت الغربة والسبب الذى جعلنى اغترب عن موطنى ، كنت امشى بلا هدى ، اتوقف امام اللافتات ، والاعلانات المعلقة على جنبات الشوارع ،امام الحوانيت بمعروضاتها الغريبة والاليفة ، امام دور العرض السينمائية كنت اقرأ اسماء الافلام القادم عرضها واتمنى ان اشهد واحد منها ، فى مدخل لاحد الدور كان الفيلم اعلانه مغريا ، الوانه ، وطريقة وضعه جذابة ، وقفت اتأمل البطل المعروض على صورة ذلك الاعلان اعجبنى اسم الفيلم ( غير المتسامح )اخراج كلينت استوود ، حرضنى الاعلان على دخول الفيلم ،لكنى لم اكن احمل فلسا واحدا ، دخلت الفيلم بعد ان أوضحت لرجل الشباك كم ان هذا الفيلم مهم لى لاننى ابحث عن ، لا اعرف بماذا اغويته ليتركنى ادخل ؟فهو فيلم حاز على الاوسكار فى الاخراج ، وكنت مولعة بكلينت استوود ، وكنت متحفزة للفرجة ، لكنى سرعان ما زهدت فى الفيلم فانسللت خارجة كالظل مخافة الشمس
حلّ ظلام دامس ،خفت من تلك الظلمة ، خفت ان يكون الظلام ابديا ، لا احب الظلام ، ففى طفولتى لم اعرف النوم فى غرفة مظلمة ، بل لم انم فى غرفة حتى فى الشتاء فلقد كنت مصابة بداء لا يحتمل إزاءه جسدى الحر
وحتى الآن
هذا ما كان من امر القصة لكنى مولعة بتلك الايام سواء الجريدة او الحياة العامة يا لتلك الايام ليتها تعود ولو فى حلمنا
| |
|
|
|
|
|
|
|
|
|
Re: ســـلمـى الشيخ ســـلامــة (Re: بدر الدين الأمير)
|
بدرالدين الامير
يازول كيفك ؟ كنا فى ذلك المكتب ن مكتب يفوح بالامل ويمنحنى خلاله محمد ابوعاقلة دروس خاصة فى الكومبيتر فى غيابك
لكننى كنت احب الحكى وكنت انت احسن من يستمع تقهقه بالضحك
كنت احيانا حين اتلقى مكالمة من عزة ابكى وتواسينى ونعود للحديث وتلك الصبية ترضينى بكوب القهوة وانت تطيب خاطرى
وجدت لديك مقالات كانت بالنسبة لى شيئا غريبا ان اجدها مرصوفة الى مكتبك ولعلها كانت عن الذكرى السنوية للعميرى (مقالين فيما اذكر ) لانانيتى احتفظت بهما مع انه كان من الممكن تصويرهما ، لا عليك يا صديقى
لكنك يا اخو البنات ما تركت لى املا فى الحزن كنت تكشطه بمعرفة العارف فى فن الضحك ونضحك من قصصك ونساء جميلات يسعدنا دخولهن الى مكتبك وكنت جماليا لا ترتضى سوى الجمال
لا ارعف من اىارض تهبط بهن اولئك الجميلات وذاك العجوز الذى كان مترجم للرئيس صدام حسين على مدى خمسة وعشرين عاما كان قد جاء يحدثنا عن تجربته مع صدام
اشياء واشياء كانت تحدث فى ذلك المكتب لو جعلت منها ارشيفا لكفت لرواية لا تضاهى
وذلك اليوم كما قال السنى (لو كنتى عرفتى اللعب صاح كان هسى بقيتى حاجة فى الاتحاد الاسيوى ) يوم ان كنا فى ندوة الرياضة التى حضرها محمد (نسيت اسمه ) رئيس الاتحاد الاسيوى وكنت قد ضحكت بسخرية عالية من حديث الهندى عن اللاعب الافريقى واعتذر لى محمد وحين حدثت السنى قال ( هى دا لو زول اتنى كان القرع من الدمازين للدوحة ممدود)
يا لتلك الايام والدوحة وغبارها ورطوبتها وجمال روح اهلها من القطريين والسودانيين
| |
|
|
|
|
|
|
|
|
|
Re: ســـلمـى الشيخ ســـلامــة (Re: Azhari Nurelhuda)
|
أزهري صاحبي العسل
تذكر يايها الموسيقي الدرامي لمن مثلنا في
عروض العرايس وكمان غنينا بي صوت الحيوانات
وعملنا شئ بديع متذكر
يابتاع الرانوق والكلام البطشش الوردة
ليك الحب ولو انت في لندن لينا شوفة بإذن الرحمن ولو بعيد نتلاقى في نص المسافة
ازهري الحبيب
مودتي
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
فيكك يالنسي باصحي
كيفن يالسني ما بتذكر...؟
ده أنا حافظ حفظ الموال كله
وهي ديك أيام بتتنسي
أنا الأسد ملك الغابة
حامي حماها و أصحابة
يلاكم يلا علي التمساح
نكتلوا و يطلع لينا صباح
نلقى شمسنا الفارقناها
نحرس الغابة و نحمي حماها
أنا الأسد
لكن يالسني التمساح ما بلع الشمس
و طردنا كلنا برة الغابة
شوف الشتات ده
الله يسامحك يالسني
نكت جرحة
و نزلت دمعة.....
| |
|
|
|
|
|
|
|
|
|
Re: ســـلمـى الشيخ ســـلامــة (Re: Azhari Nurelhuda)
|
ازهرى عبد القادر ،ياصديق يا ، تعرف ما زلت متعلقة بتلك القلعة الاسمها معهد الموسيقى والمسرح وما اظن اتخلى عن تعلقى بها ، وانت بتكتب بالراندوك اتذكرت مدثر بابكر ،لا اعرف اين هو الان ؟
التقيته اخر مرة فى السودان بعد حرب الخليج الاولى عائدا من الكويت
ولم اسمع عنه حتى الان
متذكرة يوم غنينا لغاية الصباح وكنت مسافرا صباح اليوم التالى كانت بيننا زينب الحويرص يا لتلك الفنانة التى لا اعرف كيف تدور بها الاحوال فى كندا ؟ فهى لا تتصل ولا تسال لكنها فى القلب يا صديقى
شكرا لك انك ما زلت تحمل تلك( الضلعة المكسورة )بين حناياك
| |
|
|
|
|
|
|
|
|
|
Re: ســـلمـى الشيخ ســـلامــة (Re: omer abdelsalam)
|
عمر عبد السلام
تحية واحترام
ولأختك نجاة السلام
والمودة
وكل الأمنيات لك بالفوز والنجاح
في غربتك غرب افريقيا
في البلاد التي خرج منها ابن بطوطة
طنجة المتوشحة بالزخارف الصحراوية والبحرية
بلاد الجمال والموسيقى الخماسية
وطرق الصوفية المحلقة للسما
والفرسان والخيول الأصبلة
والجمال الممتد الى مجاهل افريقيا
لك المودة وسعيدين بالمرور
| |
|
|
|
|
|
|
|
|
|
Re: ســـلمـى الشيخ ســـلامــة (Re: omer abdelsalam)
|
عمر عبد السلام
للعين ان تخفت دموعها لانها التقت بشخص مثلك له رهافتك ورقتك التى تدل على انسانية لاتحد كلما تذكرت المغرب جئت فى اول الصور مصحوبا بصديقى الاعز كمبال اغريه عنى السلام ولكما جزيل الحب
| |
|
|
|
|
|
|
|
|
|
Re: ســـلمـى الشيخ ســـلامــة (Re: Adil Osman)
|
عادل عثمان
ما زال سؤالك عالقا فى الذاكرة (بماذا تكتبين ؟) حقيقة اكتب بحناياى ودواخلى كلها تكون مستغرقة معى اكون فى لحظة خارج سياق العالم لكنى لااشطب كلمة ولا ازيد كما هى (تمشى المطبعة ) احيانا تجدنى ابكى لحظة ما انتهى من مادة ما سواء بسواء قصيدة، مقاله ،قصة، ايا كانت المادة المكتوبة ، من الورقة الى القارئ اللهم الا حين تكون هناك اخطاء املائية او نحوية اكون (شاكة ) فيها اخضعها للزملاء فحصا وتصحيحا
احب الكتابة عموما احيانا تنزلق الى روحى وحدها اجدنى اكتب فى نومى اصحو مفزوعة ابحث عن قلم وورقة بت احرص على وضعهما الى جانب سريرى ، ثم تطورت الفكرة الى الكومبيتر
فبات نديمى هو الاخر
| |
|
|
|
|
|
|
|
|
|
Re: ســـلمـى الشيخ ســـلامــة (Re: محمد سنى دفع الله)
|
السنى الثمين اقول ليك ( وااااااااااااااى ) تتذكر الجملة دى قلتها وين ؟ فى محطة التلفزيون الاهلية، وكان وراك مرايات كتيرة ولمن عاينت ( ليك ) قمت قلت واااااااااى )
هسى يا السنى انا قلت وااااااااى من الناس الجميلة وزى ما بقول صديقنا عادل عبد الرحمن ( الليلة وووب ) هسى يا سنى دى ما مدرسة عدييييييل بى درس العصر والمدرس البشاغل البنات
ما كنت قايلة انى ممكن اكون زولة كويسة وبتحبها الناس ، يا الهى ، هسى اقول يا منو ، مش عليك الله واااااى ؟
اول حاجة ما قادرة اعبر عن مشاعرى لانى اول مرة اتخت فى 0(برنامج على الهوا)ومع ناس كل واحد اجمل من اى حاجة فى الدنيا ، ياخ بحبكم كلكم وبجيكم واحد واحد ، وين عاد الليلة
بالجد يا سنى يا ثمين مقدرة ليك حبك لى وحبى ليك ( حب ما اعتيادى )
احكى ليك بمناسبة خليل اسماعيل ( مرة كنا بنسجل ليهو ايام الدنيا بى خاترا والقعونجة بى راجلا ، بعد التسجيل كان معاى فى الاستديو الزميل طارق البحر ،ومشغلين الشريط وبنتونس معاهو ، جا داخل خطاب حسن احمد ، خليل قام قال لى خطاب : يا خطاب ما تشوف سلمى وطارق ديل هارينى بى كبف ؟
هسى انت يا السنى داير تهرينى بى ؟ اها عاد استحمل الهرية الجد جد
برضو ما قادرة الا انى اقول ليكم وااااااااااااى بحبكم كلكم وبجيكم واحد واحد وبحبكم زى ما بحب الهوا والموية
وبمناسبة الموية مرة كنا فى الدوحة فى المسرح معاى ياسر حامد طبعا ما بمرق كان ما شلت (قزازتى )حقت الموية ، اول ما طلعت القزازة يا سر حامد الساعة اليهيج فينى ( بت الشيخ كمان ... ) قلت ليهو عليك الله هاك شمها )
| |
|
|
|
|
|
|
|
|
|
Re: ســـلمـى الشيخ ســـلامــة (Re: سلمى الشيخ سلامة)
|
احبكم انتو الاتنيين
و أحب الناس الفوق ديل كلهم
لانهم بحبوكم
أشتاق اليكم كاشتياق الغريق الى الماء
يا سلمى
فى هواك ما سويت غلط ياالشعرك دقداق شارع الظلط
يا السنى
على بوفيه الاذاعه جلست ومعى أحد الرفاق
فطلب لى شرابا حلو المذاق
و عند دفع الحساب وجدته زاق
لما الواحد يتزكر الايام الجميله بقى يضحك بالقلبه
بقينا لما نقول حاجه الا نقوله مرتيين عشان يفهموها
والله أفتقدكم كثيرا
-----------------
قولو عشان نقول
| |
|
|
|
|
|
|
| |
محمد سنى دفع الله
حيدر حسن ميرغني
سلمى الشيخ سلامة
صلاح شعيب
ترهاقا
abubakr
bayan
mohmmed said ahmed
سفيان بشير نابرى
Ishraga Mustafa
صديق الموج
Muna Khugali
Mustafa Mahmoud
Mohamed Abdelgaleel
انعام عبد الحفيظ
مامون أحمد إبراهيم
نهال الطيب
معتز القريش
بدرالدين شنا
غادة عبدالعزيز خالد
Raja
عبدالكريم الامين احمد
عفاف أبو حريرة
Abuelgassim Gor
Mohamed Ahmaed Olyesh
Azhari Nurelhuda
بدر الدين الأمير
Emad Abdulla
omer abdelsalam
Adil Osman
فيس بوك
تويتر
انستقرام
يوتيوب
بنتيريست