دعواتكم لزميلنا المفكر د.الباقر العفيف بالشفاء العاجل
|
|
 حمد .. و الولد .. و الجمل .
|
يا ( حمد ) ..
يا مسكين .
حمد ( ضرب ) شجر النبق ..
( سقط ) الورق و النبق .
حمد ( أكل النبق ) ..
و ما أكل الورق .
الورق زمانئذٍ ينبت من شجر الناس ( قل أعوذُ برب الناس ) :
ورق جرائد , ورق كتب , ورق برنسيس , ورق سوليفان , ورق رسم , ورق حائط , ورق بيانات , ورق مقالات , ورق مُلاح , ورق حجبات , ورق عقود , ورق قرارات , ورق إستمارات , ورق أسمنت , ورق لف الهدايا , ورق أصفر , ورق صقيل , ورق ثقيل , ورق شفاف , ورق نشاف , ورق روشتات , ورق بخرات , ورق معاهدات , ورق وعظ , ورق تخدير , ورق تهديد , ورق منشورات , ورق محكمة , ورق لعب , ورق رئاسي , ورق نخاسي , ورق .. ورق .. ورق .
و النبق النبق ..
من سدرة ورمك يا حمد ..
نبق تريان شحمان .. كضّاب .
قادر الله يا حمد ( سدرة المنتهى لا تثمر نبقا ..سدرة المنتهى تثمر إنذارا و وعيدا ) ..
يا سدرتك الضبلانة و وحيدة ..
وين قبّلت .. قدامك و وراك الصّي .
ثمراً نبقاً , يأكله حمد من جوعٍ فيحبل .. ( و كل أعوامك جوع يا صاحبي ) .
( تحبل الرجال .. و الديكة تبيض بيضة وحيدة في العمر , بيضة عجزها ) ..
يحبل حمد من ( اكل ) النبق الذي ( سقط ) مع الورق ..
و يكون حملا كبيرا كاذبا ..
يقول الناس : يا هزيل يا حمد , يا حامل يا حمد ..
تبدو في هزالك كالصارقيل البالع نبقة يا حمد ..
ثم يكون حملك خارج الرحم يا حمد ..
رحم الحلم ..
الحلم !! ( أيّ الأحلام صَدَقَتْ .. يا أيها المنجمون ؟؟ ) .
و بعد ده كلو ..
جمل حمد ظلع !!
حمد أب نبقة ..
الترابة دي فوق خشمك يا حمد ..
طيب .. وين الولد ؟؟؟
** إنتهى الدرس ..
من كتاب ( العربي ) في المرحلة الأولية ..
جمهورية السودان **
|
|
 
|
|
|
|
|
|
|
|
Re: حمد .. و الولد .. و الجمل . (Re: عامر تيتاوى)
|
عامر تيتاوي ..
ماذا تظن يا صاحبنا الجميل ؟؟
كيف الورق الصقيل يكون باردا ..
و .. نصلاً مشحوذا لذبح الحلم ؟؟
الكلمات الكلمات الكلمات ..
حمد ليس له في أهواء الكلمات ولا تعنيه في شيْ .
حمد حامل يا عامر ..
من جراء تغرغر آلاف المحايات و استنشاق البخرات و تعليق الحجبات ..
طلع حمله فشنك , و الامر لله .
أدعٍ له : الله يحلك بالسلامة يا حمد .. أخانا أب نبقة .
| |
|
|
|
|
|
|
|
|
|
Re: حمد .. و الولد .. و الجمل . (Re: طلال عفيفي)
|
تيتو يا صاحبي ..
يمسيك بالخير ..
الشكية لله .. يا طلال
السموم دي لمتين ؟؟
حتى اللهاة إتشققت .
( و تناسلت الأيام ..
منذ حروب البدو المدنيين ..
و حتى آخر ديناصور .
أيامٌ تتناسل بين سرير الطفل و مئذنة الجامع ..
و الثوري الحالم .
أيام الموتُ الكاكيُّ , الكوميديُّ الكافرْ ..
و المكتظ بأهواء مخبولةْ )
- عوّاد ناصر -
| |
|
|
|
|
|
|
|
|
|
Re: حمد .. و الولد .. و الجمل . (Re: مامون أحمد إبراهيم)
|
مساء الخير يا مامون ..
حمدنا ..
نبقه مسموم .. ورقه ملغوم .
و اللعنات تصاحبه .
( في اليوم الواحد ..
يحدث أن تأكلني نفسي ..
على عدة دفعاتْْ .
يحدث ان أصحو من نومي ..
و أرى أعصابي ..
يتطايرُ منها الدخانْ .
يحدث هذا .. و الفضل لغيري ..
في اليوم الواحد عشراتِ المراتْ ) .
الله يمسيك بالخير يا صاحبي .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
الهنود "الحمر" عندهم اغنية مطلعا بقول
it is a good day to die
و لان عماد يكتب كما نحب ان يكتب وكما يحب هو كتابته و كما الكتابة تشتهى ان يكتبها عماد ... هكذا ...
يمكن الغناء
انه يوم جميل ... كى نحيا
سلام عماد
سلام طلال
سلام يا اصحاب
| |
|
|
|
|
|
|
|
|
|
Re: حمد .. و الولد .. و الجمل . (Re: esam gabralla)
|
| Quote: it is a good day to die |
هو كذلك يا عصام ..
كل صباح يدعو للموت ..
صباح الخساراتً .. طبتَ صباحا..
و أنت تُجمّعني ..
و تطلقني ..
على شرفاتك طيرا قتيلا .
صباح الغريب القتيلِ ..
صباحاً جميلا .
صباح المدينة تعبرني إلى الآخرينْ .
صباح الطوابق و العرباتْ .
تمهّل قليلاً ..
يا صباحاً رموه على الطرقاتْ
كالمعاني ..
يا صباحاً يخبُّ .
يا صباح أخي ..
يا صباح صديقي المنافق .. طِبتَ صباحا ..
يا صباحاً فقيراً إلى الله , يا ابن زانيةً ..
و ربيبُ الشوارعِ ..
أين ستمضي بهذي الجموعْ ؟
إلى أيّ منعطَفٍ ؟
حيثُ ذاك الرقاد العظيمْ ؟
هذا .. و الحمد لله يا عصام أنك هنا .
تمد - مثلي - رأسك ليتحسسها الهواء ..
ثم - بعد تأكد الهواء من وجوده - يعود الرأس إلى القوقعة ..
و السلحفاة لطول العمر البلا فايدة .
تليفونك يا عصام , خرمان ونسة .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
عرفنا حمد والاوراق
طيب وين تعالوا قريب
أنا عندى كلام
أوعك تقول الخروف ما ضبح
مسعود حتى ولو هو السالخ
من غير سيلاخنة:
ياشيخ تلب
أنزل كبو كب
ورمى الحترب
وبين القدال
وقدله فى شارع
النصر دوحة ودوخة
عماد يكفى أم أفتوا
| |
|
|
|
|
|
|
|
|
|
ورقة ووظيفة ... (Re: Emad Abdulla)
|
والمعالجة لطيفة وناقدة وفنانة ودمها خفيف ، لكن تعال النسألك ياعمك ، حكاية "ورق لف هدايا" دي شنو، فجاءة !في نص مابتكتب ،يعني كان صعب تكتب ورق هدايا؟ من غير لف ودوران ؟ الحاجات كلها ورق الافعال وورق الأشياء ورق الأسماء ورق ، ورقة ووظيفة ورقة ووظيفة ورقة ووظيفة . دي مالها بقت تلاتة كلمات ( ورق- لف- هدايا )؟ ولا ده التمييز الإيجابي للملفوف ، وملفوف علي ملفوف مايلفش 
.Quote: الورق زمانئذٍ ينبت من شجر الناس ( قل أعوذُ برب الناس ) :
ورق جرائد , ورق كتب , ورق برنسيس , ورق سوليفان , ورق رسم , ورق حائط , ورق بيانات , ورق مقالات , ورق مُلاح , ورق حجبات , ورق عقود , ورق قرارات , ورق إستمارات , ورق أسمنت , ورق لف الهدايا , ورق أصفر , ورق صقيل , ورق ثقيل , ورق شفاف , ورق نشاف , ورق روشتات , ورق بخرات , ورق معاهدات , ورق وعظ , ورق تخدير , ورق تهديد , ورق منشورات , ورق محكمة , ورق لعب , ورق رئاسي , ورق نخاسي , ورق .. ورق .. ورق . |
أسمع مرة في القاهرة شفت لي ورق نضارت
فيه صورة لبوبمارلي ، وإسمو "شاشماني "
ورق للف النضارات !!!
جميل التصرف موش كده ، وقديماً قالوا : التصرف رئتان ، رئة للمؤلف الميت ورئة للكتابة ذاتها .
__________________________________
1-فرحة ساي ، فتحت البوست ، أظنها هسه في في زيادة وورق ياعماد ...
2-حكاية " النضارات" دي ما تفتكرها خطأ إملائي لاسمح الله ،
بس انا ما بتكيف لكلمة "النظارات " دي بتذكرني مصطفي لحاج !
| |
|
|
|
|
|
|
|
|
|
Re: ورقة ووظيفة ... (Re: Hussein Mallasi)
|
| Quote: دي بقت تلاتة ورقات!! |
لعبتها أول مرة - اتذكر - في توتي ..
و أنا صبي و الزمان زمان مايو ..
الملوص الكبير , و التلات ورقات الأصلية .. و قصص .
تتذكر الملوص ؟؟
المهم , أسمع هذا قبل أن يضرب جرس الحصة الأخيرة و يفكونا :
( تختبيء في عشبِ الصيفْ .
مثل طيرٍ مذعور ..
و أصابع غيرك على الفأس موشومة ..
تُخفي نيتها و تنزلُ على الرقبة .
فخاخٌ هي اللغة .
و الكلمات التي تنحتها مكررة ..
ينصبها صياد محبٌ للطيور ..
و انت
قد خبِرتَ الكلماتْ ..
هي .. مجرد كلمات .
تمضي بها إلى الممالك القديمة ..
ثم , ترجعها إلى الأرض ( بالحكمة التي لاتجدي ) ..
لكن الأرض - كما ترى - أرضٌ ..
و هكذا العناصر الأخرى ..
لا تتغبر ) .
- مؤيد الراوي -
أظنها لعبة ذكية في خبث ( أعني التلات ورقات ) .
و .. برضو ..
حمد أكل النبق و ما أكل الورق .
| |
|
|
|
|
|
|
|
|
|
Re: ورقة ووظيفة ... (Re: Ibrahim Algrefwi)
|
( ورق - لف - الهدايا ) يا صاحبنا المطموس ..
فقه لا يعرفه العنقالة امثالك ..
( إتعلمتو في كبري ده ) ..
و هو يختلف عن ورق اللف .. تخيّل !!!
ملوّن و دلوع و يسكن إلى أكف الناس التي مصايرنها بُيُض - و رؤوسها كذلك - .
و هو لا يشبه ( ورق البرنسيس ) ..
ولا تلف به تلك المحتويات المساعدات على الهضربة التي تعرف .
ولا يلف قراطيسا لبيع النبق ( أو الأفكار ) ..
و عنده - كما العساكر - شرايط ..
و فيونكات - كما ببيونات السادة النبلاء -
( ملفوف ) على ملفوف .
| Quote: حكاية " النضارات" دي ما تفتكرها خطأ إملائي لاسمح الله |
سأعتبرها ..
صاحبي محمد الشيخ يقول و هو جاد .. عربي جاد من جهة في البلاد أكثر جدية و .. فقرا :
زول مسغف سغافة .. لمن عندو نظارات .
رأيت هنا - كما يرى النائم - ورقا يا ابراهيم ( للف المحارم الورقية بعد الإستخدام ) ..
أي و الله .. إسمها الرسمي المطبوع عليها يقول بذلك .
شخصيا أفضل عليه موية الله و الرسول دي ..
أو صعيدا طاهرا .
ثم تستكثر على ( ورقي ) ان يلف الهدايا ... يا راجل !!
ورق نضارات شاشماني يا ابراهيم .. !؟؟ و فيهو صورة بوب مارلي ؟؟
غايتو الحيكومة دي شديدة شدة .
| |
|
|
|
|
|
|
|
|
|
Re: ورقة ووظيفة ... (Re: Emad Abdulla)
|
أبشركم بقدوم اديب كبير على فضاءات الكون كاتب مدهش بحق
لديه المفتاح . ينهض على الورق. ويجرى خلف الحبر_ كاتب
ماكر . سباق ( جراى مركب ماكينة حاج ابراهيم) .
( لو فى زول عمل من الفسيخ شربات) (عماد عمل من الهلوسة
شعر)
يحاول أن يحفر فى الارض بئرآ ليدفن فيها السماء.
( يمكن دا الجن الكلكى الابس ملكى؟
تحياتى استاذ عماد
اخيك عثمان
| |
|
|
|
|
|
|
|
|
|
Re: ورقة ووظيفة ... (Re: Osman Musa)
|
صباحاتك عافية و خير أخي عثمان ..
تراني أعجز عن شكرك ..
فتقبل كثير امتنان لك .
السماء دفنها من دفن ..
و صاحبك حمد لا يلتحف شيئا الآن ..
إلا قليل إيمان يقيم صلبه ( إداماً و لحافا و وسادا ) ..
و يعصر الجابرة إنتظارا ..
تحياتي يا عثمان و تقديري الكبير .
| |
|
|
|
|
|
|
|
|
|
Re: ورقة ووظيفة ... (Re: Emad Abdulla)
|
عماد ..
الورق ( خشم بيوت ) ..
غريب أنني لم ألحظ كل هذه الانواع من الاوراق
ورق (هذا الزمن) غير ..
في الماضي كان (الورق - القرطاس) من جلود الحيوانات والبردي وغيرها
تكتب فيه الرسائل والوصايا وغيرها ..
أما الآن ، وبدلاً من جلود الحيوانات ( فانهم) يستخدمون جلود البشر (كورق) لتدوين انتهاكاتهم لحقوقه(عليه)..
والظاهر أنو جمل حمد أكل كل الورق ، ولم يترك لحمد سوى ورقة توت واحدة
ترى ماذا سيفعل بها ؟؟
| |
|
|
|
|
|
|
|
|
|
Re: ورقة ووظيفة ... (Re: Salah Abdulla)
|
يا ابن أم ..
و ما يزال صوت أستاذي محمد خير ( حِربِش ) يتحاوم في طبلتي :
آآآ أسد , بااا بلد , جااا جمل , حااا حمل , وااا ولد ..
فتأمل ..
أسد و بلد و جمل و حمل و .. ولد !!!
في عامنا الاول , و مدارس أولية , حروفٌ أولية , و بلد أول العشق ..
( ماذا تخبيء الأشجار خلف لحاءها ؟ ) .
أسد و بلد و جمل و حمل و .. ولد !!!
معطيات المعادلة الأزل ..
لكن ..
يستأسد الحمل , و جملٌ ظليع , و أسدٌ يلعق مؤخرته , و ولدٌ بايظ , في بلدٌٍ مخير الله عليهو ..
إقرأ معي ما كتبه إبراهيم حرمرم ( طيشنا المجيد ) أوائل السبعينات :
نحن جند الله .. جند الوطن
إن دعا داعل في الفدا لم نقل ..
نتحدي الموت عند المحن
نشتري النجدة بأعلى تمن
هذه الأرض لنا فليعش سوداننا عالما بين الأمم
يا بني السودان هذ رمزكم
يحمل العبل و يحمي أرضكم .
| Quote: دلاً من جلود الحيوانات ( فانهم) يستخدمون جلود البشر (كورق) لتدوين انتهاكاتهم لحقوقه(عليه).. |
صدق إبراهيم .. هذا بلدٌ يحمل العبل و الشكية لله .
| |
|
|
|
|
|
|
|
|
|
Re: حمد .. و الولد .. و الجمل . (Re: ALGARADABI)
|
قردابي ..
اليوم جمعة ..
يومٌ كمثل أيام الله الباقيات الصالحات ..
غير أنه مثلها ..
غرائي و ملبوك بالملل .
تقول أمي : غايتو كان ما كان يوم الله .. و الله ولا بتشكر ولا شيتين .
من الحيطة للحيطة يا صاحب , ضهرك و البطن واحد .
لو تعودنا أيام الخرطوم الجديدة !!
لو يكون بربر هنا , مرسيدس , طاشين , أسامة عبدالعزيز , أو حتى ناجي الجنينة ..
مساءاتك دايما حلوة يا زول يا حلو .
| |
|
|
|
|
|
|
|
|
|
Re: حمد .. و الولد .. و الجمل . (Re: Elbagir Osman)
|
Quote: حمد أب نبقة ..
الترابة دي فوق خشمك يا حمد |
عماد با مدهش
جننت الورق جن
وجننت حمد وجننت الورق
وجننتنا معاك
...ويانا الفارشين ورق جرائد ومقهين في باحة الاسفير في انتظار كرنفال الورق
وعودة عماد والريشة الماسية
| |
|
|
|
|
|
|
|
|
 Re: حمد .. و الولد .. و الجمل . (Re: Bushra Elfadil)
|
قال الجدول طلوع النخلة
مرور الريح واحد
لكن الريح بيعانق حقل
ونحنا بنطلع نخلة وننزل
ونكتب في ذاكرة الصفق الاخضر
سجنا الريح في الورق الأبيض
وجهناها ضد التمر الناعس
يسقط زي قبعة الحارس
زي الكان بيناتنا وفات
عماد عبدالله
تجينا إبداع ترفرف فوقنا نستناك بالموال
| |
|
|
|
|
|
|
|
|
|
Re: حمد .. و الولد .. و الجمل . (Re: عبدالرحمن عبدالله أبوشيبة)
|
يا فرحنا يا عماد ... بعودتك الوريفة ,
حيث إحتجبت معك الأحرف الشهبية وتلك اللغة الأسطورية ... كما قالوا.
من قبل كتبت قصيدة إسمها أوراق ... فهل يتسع ملفكم هذا لثمة ورقة ؟
أوراق
بحثا عن صبر
أجتث به العتمة
وأوقد فى النهر
إحتمال إختراق
كللت أتعاب الهوى
حرقنى على جلدى
إنقباض مسامه
آلمنى الافتراق
تجبر فى خاطرى جزع مودة
فأحال أنفاسى حطبا
واعدا بضريم واحتراق
بصحو يهتك الاحلام
بقلم يتعاطى مفردة
ويؤذن بالتحلل
قيد أوراق رقاق
من ثمرة فى أحشاء لحظة للوفاق
أحسست بشىء افتقده
تنامت فى مخيلتى رغبة
أن أكون تلك اللحظة
وأن تكون الثمرة أوراق
أوراق تجيش بالنبض
والشوق وضائع الوئام
أوراق تقيد الحكمة
تكلب على أجنحة البراق
أوراق لحفظ العناوين الضالة
والاشعار الشريدة
أوراق تسامر الاحلام
وتتأبط فتائل الاحتراق
أوراق للحبيبة
وأخرى للدولة
أوراق تحتشد لتحررنى
من هموم عابثة
فالخيال لا يحتمل
... غير الانطلاق
أوراق فى طقس حار
تتنحى للخريف
لفائف طازجة
من زمن الدوار
تلتهم شواء الذات
معطونا على دمع
مأذونا بالانتحار
أوراق تتجلى
فى خيبة الشهد
أن يكون ملحا
تلعقه الروح
جبرا أو إختيار
أوراق تميط واجهة الشعار
يسكننى من ليس من أحشائى
تزدرينى أوشحة
لا تنتمى إلى مهامى
تؤرقنى ذاتى
فنفترق على ذات المسار
أوراق للتاريخ
ترسلها معالق اليتم
إلى أنصاف الحلوق
... تتمطق
فيزدردها الانبهار
أوراق للتأمل ...
أعنى بمفاصلها الحركية
أشتد على خيالها
أتمرغ فى لهاث عذوبتها
واندمج فى أقبية السمار
فى لحاء القلب ضنى
وفى نتوءآت الاشجار قبس
يلهمنى مقصدا
ويستوفينى معنى
ففى أرجاء الروح متسع
أن يكون هناك فرح
وأحزان هنا
وأن يمزق العشاق
أقمصتهم الوردية
وأن يعتكف الاطفال عن اللهو
والبروق عن السنا
أن يزمجر النهر بكل اثقاله
وتقوم الدنا ... لاكون أنا
أن أنهض لتجلس القوافى
على حباب دن
تطوف المعانى
تخلد الذكرى وتجير المنى
| |
|
|
|
|
|
|
|
|
|
Re: حمد .. و الولد .. و الجمل . (Re: HAYDER GASIM)
|
يا حيدر يسعد مساك ..
هذه الأرض وهيطة و ماهلة ..
لا رواسٍ لها إلانا ..
ماعت إن مِعْنَا ..
و أنبتت من كل نوعٍ إن ختينا صلبنا في الجابرة دي , و قلنا يا هادي . Quote: أن أكون تلك اللحظة
وأن تكون الثمرة أوراق
أوراق تجيش بالنبض |
أوراقٌ حية يا حيدر .. حية .
أين لنا بها ؟
ذابلات الورق بالكوم ..
فكأنما الخريف مقيمٌ من أول الأمر حتى منتهاه .
يرتص الشجر اليابس .. حتى يتسيجنا .
قفصٌٌ جواهو قفص . Quote: أوراق للتأمل ...
أعنى بمفاصلها الحركية |
يا محظوظ ..
فهي تتحرك أوراقك !!!
فرحٌ بحضورك يا صديق ..
ليت عدوى الحراك تصيبني منك ..
و يصيبك مني كثير عرفان .
أشكر كلماتك اللطيفة ..
و الصوفي المندس في قصيدتك .
| |
|
|
|
|
|
|
|
|
|
Re: حمد .. و الولد .. و الجمل . (Re: نهال الطيب)
|
نهال الحبوبة ..
يجيك السمح , قولي يامين ..
من الحظوات و نعائم الدنيا ان فيها مثلك و طلال و الجريفاوي .
أقرأكم و لكم فأقول : أحححح ..
الشيمة إلى مستقر , و بحر الغد ليس بمغالب لكم ..
ليس في الأمر عجب ..
على طريقتكم تفكرون و تحلمون و تعزمون ..
لنا نحن الفرّاجة دور التصفيق و الهتاف ( ما أشقّ الهتاف ) ..
فوالله إنتو تفرحوا .
تسعديني بحضورك ..
يديكي العافية يا نهال .
| |
|
|
|
|
|
|
|
|
|
Re: حمد .. و الولد .. و الجمل . (Re: Bushra Elfadil)
|
شيخنا الشيخ ..
يا بشراي بمقدمك .. Quote: لو أن لي سكينة ..
لفصَلْتُ روحي ..
عن بَلاداتِ الجمادْ
|
أرأيت ؟؟
لا صخرة في جبل أنا .. ولا قطرة في يم ..
يقتل هذا البين بين يا شيخي .
ما ثم يقين يعصم , ولا ظنٍ يُركَنُ إليه .
كيف الدبارة ؟؟
أما ذاك الورق البنكنوتي .. الله يقطع كاريهو ..
بس يا هو : لا بريدك و لا بحَمَل بلاك .
مساء الخير يا سيدي بشرى .
| |
|
|
|
|
|
|
|
|
|
Re: حمد .. و الولد .. و الجمل . (Re: عبدالكريم الامين احمد)
|
كريم ..
يا صاحبنا في المسغبة .. ما يجنن هو الورق ..
عارف يا كريم , زماااان عملت في مكتب بريد الديوم الشرقية في عطلات المدرسة ..
كنت طالبا في مدرسة الإتحاد الثانوية العامة ( المتوسطة ) .
جدي مكاوي كان غفير تلك الدار البريدية , و كان هو ( واسطتي ) لأعمل فيها .
مهمتي كانت أن أفرز الجوابات :
هنا كريمة و الأبيض هناك و هنا كوستي و تلك عطبرة و ذي نيالا ..
و أسرح في البلاد الكبيرة و غُلبها الأكبر ..
- فُصِلتُ بسبب السرحان , فعاقبني جدي بالعمل في ( ضرب الجير ) حيث لا ورق ولا يحزنون ..
هي فقط بستلة و جردل و فرشاة كبيرة و سلم -
كنت أتأمل لساعات العصر كلها أرتال الورق و أكوام المظاريف تطلع منها الهمهمات و البكاءات و الشكاوى و الهموم و الأحلام ..
و أقعد أسرح في الناس الهمومها فايرة قدامي .
( مسكين الديك ) .
الورق يمسك بخيوط اللعبة يا صاحبي .
حيثما ورق حيثما حياة ..
أتخمونا بالورق , و حملوه مالا يطيق ..
ليس أسهل من ان تدلق عليه شوية مداد حتى تسود به حياة الناس و عيشتها ..
يا كمان ترفعهم الكلمات المكتوبات من شأن إلى شأن ..
( بيضُ الصفائح لا سود الصحائف .. في متونهن جلاء الشكّ و الريب ) .
الريبة لا تجليها الصحائف الورق ..
الريبة يا هذه الأيام تسكن إلى الورق ..
الدعاوى الكاذبات .. في الورق .
الأماني و النوايا .. في الورق .
الخداع و التدليس .. في الورق .
الوعود الناشزات .. في الورق .
العهود الخائنات .. من ورق .
البلد بي حالها , من يسارها الممكون ليمينها المأفون .. من ورق .
و يا حمد المبشتن ..
حمد أب نبقة ..
شيل شيلتك , الله قال بي قولك ..
الليلة الدّق .
قيل أن أحدهم قليلُ حيلة و ضبلان جسد , مسخوت و واقع في غرام العرقي السمح ..
يأتيه الندماء ليلا و يطمبجون الدنيا عنده في بيته ..
يجأرون غناءا , و يحلفون بأيمان اليمين المالكية , و أيسار الطلاق البلشفية .. صياحا صياحا , و تعلوا أصواتهم المترتحة حتى ضج الجيران بالشكوى , فتوعدوا صاحبنا بالبوليس .
حتى جاء يوم تجمع فيه الندماء و الرجل زائغ البصر خوفا من كواريك آخر الليل و انبهال خارطة البلاد في الحليفات اليمينة و الحرامات اليسارية .
إرتفعت الحناجر ملعلعة و جفل صاحبنا و استرجاهم : وطوا الصوت يا شباب .. بتجيبوا لينا الكشة .
ولا فائدة ..
قام داخلا و غاب ..
حين عاد كان يحمل في يده عاليا ( مركوبا ) كبيرا ضخما .. بمقاس عملاق ..
صاح فيهم بأعلى عقيرته المغلوبة :
تسكتوا وللا انادي ليكم سيد المركوب ده .. !!!؟
عندك مركوب فاشري مقاس 1956 يا كيكي ؟؟
| |
|
|
|
|
|
|
|
|
|
Re: حمد .. و الولد .. و الجمل . (Re: Elbagir Osman)
|
الباقر مساء الخير ..
تبدو تركيبة طيبة يا صاحبي ..
إلىّ بها , ربما فيها الشفاء .
آخر عهدي برسوماتك يبدو بعيدا ..
من أيام أخانا سيف اللعوتة و أب سفة .
أعاني من أمية بصرية يا باقر هذه الأيام - عافاكم الله -
و الأميات الأخريات التركة القديمة عاودنني ..
فكأننا يا بدر لا رحنا ولا جئنا ..
سئيلي الله يا باقر ما عدت أفرز كوعي من بوعي ..
نابل الحي مخلوطٌ بحابله ..
نحاس يضرب و حلاقيم كبيرة , ضجة و طنين ..
و كل زول مكنكش في ما ملكت يداه ( و هو أكتع من غير ذراع ولا يد ) .
.. و بس .
غايتو ..الله يكضب الشينة .
منتظر مفاجأتك ..
شكرا يا باقر .
| |
|
|
|
|
|
|
|
|
|
Re: حمد .. و الولد .. و الجمل . (Re: خالد علي محجوب المنسي)
|
سلام لك يا خالد ..
سلام على كلماتك الطيبات ..
و السلام علينا مفجوعين و مغلوبين و ضارسي حصرم و جتت طيبة يسند بعضها بعضا .
حالنا شائه يا صاحب ..
أوله جهة العِرْق , و آخره جهة الجغرافيا .
حالنا مايل يا سيدي ..
ولا حول إلا بك يا ذا الحول .
كن بخير يا صاحب ..
مودتي و شكري لك .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
كويس يا عماد
لسع فيك شدة
عدت بنا إلى الزمان الأول
زمان ألف المد
وتاء التأنيث
ونون النسوة
وجمع التكسير السالم
وكوكبة من الأفذاذ
| Quote: أستاذي محمد خير ( حِربِش |
وحسن أبوعركي وعبدالصادق
وعبدالله أبو و حضري
فيهم ومعهم تلازم المعلم والأب والرفيق
وبوصلة الطريق
وقتها الديم عندنا مدرسة ونادي وناي
وماتقدم العمر قليلآ حتى صار
قلب
و
حزب
تعب
و
شغب
و ورق منذ كراس العربي وكراس الرسم قبل أن يلوح لوح الأردواز
والمدونة الطبيعية ، ثم كراس الإنجليزي أب سطرين متجاورين ومتوازيين
و مزازات القماري
اوقات العصاري
ومرازات العجلاتي
وإبتزازات الألفة
والإلفة التي زانت ذلك الزمان الأول
و
ترميه سمبهار
أو
تصليه نار
وسيان
لو كان ولد شيريا
أو ولد هارت
ينسل من بين { الورق }
ومرة أخرى يا عماد
يايها الولد اللائذ من حرقة الأحزان
بلظى الكتابة
والجنازات تخرج منكم في إبريل ضاجة بالحياة
تردنا إلى زهو الشباب
Quote: لو تعودنا أيام الخرطوم الجديدة !!
لو يكون بربر هنا , مرسيدس , طاشين , أسامة عبدالعزيز , أو حتى ناجي الجنينة ..
|
وإبراهيم عدلان ، ليكتمل النشيج ،
و يكتمل الشجو في { شجن } أغفرلو يا حنين
و وحياة عيون الصيد
التي غارت من خدي بت طلب قبل أن تمتص الحانات ولاتسكر
قبل أن يمتص الليل نضارتها
قلت:
Quote: الريبة يا هذه الأيام تسكن إلى الورق ..
الدعاوى الكاذبات .. في الورق .
الأماني و النوايا .. في الورق .
الخداع و التدليس .. في الورق .
الوعود الناشزات .. في الورق .
العهود الخائنات .. من ورق . |
وقال ماو :
أمريكا نمر من ورق
ثم حج اليها بنو يشوع من العراق والسودان واليمن
قبل أن يلفظوا هتافهم ضد الإمبريالية
على عتبات واشنطن دي سب المقدسة
إنها لعبة خلط الأوراق
أو { شك} الورق
أين أنت يا وليد وراق
والدنيا مستودع { خزف }
وفي الختام
قبيل السلام
Quote: عندك مركوب فاشري مقاس 1956 يا كيكي ؟؟
|
إندو ، لكن عايزو تول واللا أرض ؟
أو كما قال الهاج أبوبكر تفاولا بيلو
| |
|
|
|
|
|
|
|
|
|
Re: حمد .. و الولد .. و الجمل . (Re: أبو ساندرا)
|
سمعت بلأمس يا صديقي السمبهار الكبير ..
سمعت سمعا ردني إليّ ..
( ما كان فراقنا المر ..
في نفسي أو في أيديّ ..
لكن صدودك أبا ..
قست ظروفي عليّ ..
و اتلاشت الأحلام , وين حسن ظنك بيّ )
قتلني بعد : بيّيييييي الأخيرة هذه عبدالله عربي بجرة حارة للكمنجة تقطع نياط القلب ( أسمعها و نُح يا ملعون ) .
عثمان حسين لم يُبق فينا من تماسك يا صاحب بمحن موسيقاه و أوجاع التطريب في صوته .
ماذا كنا نقول ؟؟ ..
Quote: فيهم ومعهم تلازم المعلم والأب والرفيق
وبوصلة الطريق |
الله يا بركة ..
هدونا و قادوا ..
منحوا لكلنا أقصى ما يكون المنح ..
كانوا شيوعيون حُمر , و حيران طُرُق كانوا ..
من يلازم سجادة شيخه كان فيهم , و منهم من يعاقر كائنات الليل الحسان ..
لكنهم يتقدسون في الفصل أمام تلامذتهم ..
و يصيرون نُصبا عاليات من علمٍ و معارف و آداب و فنون ..
تركوها فينا و انسربنا نحن بحمولتهم إلى نهر الحياة الصخّاب .
عبرنا السبعينات يافعين بأحلام جبابرة حسبناها تلين الصخر .
فعبرتنا الثمانينات بالوأد المنظم لكل شيء يشرأب للشمس ..
و صفعتنا التسعينات مهاجرين خارجين خاسرين خافضي الرأس خائبي الحلم .
ألوك ما ألوك يا صاحبي كالقرد هنا ..
ألوك المقولة تلوها المقولة , و أتمطق بالكلام المقعر و أستلذ كما الشاة في ضل الضحا .. و أحلم .
( الوليدات خلو حجرك ريح يفوفي ..
و عين مزرزرة من شقا الفرح المرابي ..
و مُنية الوعد الدعي ) .
ضهابى نحن أم ماذا ؟ ..
كيف هو العشى الليلي يا صاحب ؟
تقول هناك أن الغول يضع يده في يد الحليف ؟ ..
فهو الغول إذن .. و ذاك حليفٌ غُلب عليه الأمر , إما أن يصافح الغول أو يزين مائدته على العشاء ..
و نحن فرّاجا .
أقول لك - جازا على أسناني - : نحن كذا و كذا و كيت و كيت ..
تردها أنت - مكرجا ضروسك - : نحن كذا و كذا و كيت و كيت ... و بس .
نقول معا و صوتانا نشاز : يا بلد .
و المسكينة الما عندها والي منسدحة قفا ترقب ( الوليدات ) ناس نجومي و محبس النفس الرهيف .
لا حول الله يا بركة ..
كم نحن كضابين و جعجاعين و ... بس .
حمد شبع ورق ..
و .. إتلاشت الأحلام , وين حسن ظنك بي ؟؟؟ .
| |
|
|
|
|
|
|
|
|
|
Re: حمد .. و الولد .. و الجمل . (Re: Tariq Mohamed Osman)
|
Quote: Quote: الريبة يا هذه الأيام تسكن إلى الورق ..
الدعاوى الكاذبات .. في الورق .
الأماني و النوايا .. في الورق .
الخداع و التدليس .. في الورق .
الوعود الناشزات .. في الورق .
العهود الخائنات .. من ورق .
|
لكن ...
للدواة دور
وللمعصم معصر
وللذهن التذهال .
فتوافقية هذا المنحني الحدي ,
تقيم إفتراضية { براءة } الورق ,
ما لم نسعى لتثبيت العوامل الأخرى .
... فإن نثبتها , فالورق الضحية ,
وفيما يشيح العدل , وإن نحركها
فلن نرى غير المسيح يعاود الصليب .
فهل هو فرح ولما إنقضت الأفراح ؟
أم هو جرح ... على جراح ؟
أم هو السعدالناتئ
نبتهله على الأتراح ؟
| |
|
|
|
|
|
|
|
|
|
Re: حمد .. و الولد .. و الجمل . (Re: غادة عبدالعزيز خالد)
|
مساء الخير يا غادة ..
سألناهم : ماذا عندكم لنا ؟ ..
قالوا : ماذا عندنا لكم ؟ .
قلنا : حَقّنا .
قالوا : الله يكسر حُقَكُمْ .
صمتنا .
و .. كان الورقُ في كل مكانٍ يُخرج لنا لسانه الحبر الأحمر ..
و تحته كلمة : أعِدْ .
فهانحن ..
يدخلنا الله في التجربة ..
و يعيدنا الإختبار منذ العام 56 ..
و النتيجة : لم ينجح أحد .
جمل حمد وقع يا غادة .
سعيدٌ أنا بطلتك هنا .
| |
|
|
|
|
|
|
|
|
|
Re: حمد .. و الولد .. و الجمل . (Re: ibrahim kojan)
|
سلام يا ابراهيم ..
يا ناس السما التامنة ..
أخرج من دائرة الأسبوع أبو سبعة أيام يا كوجان ..
أدخل في ( تِتَك ) البندقية ..
إستعد .. صوب .. أطلق ..
تخرج وردة بزؤابة سيف .
أنتظرك ( من زمن الشعراء الأماجيد .. للشعراء السجاجيد ..
من زمن الشعراء الصعاليك للشعراء المماليك ) .
و لا تزال تأبى علينا ..
يا صديقي الشحيح .
| |
|
|
|
|
|
|
|
|
|
Re: حمد .. و الولد .. و الجمل . (Re: HAYDER GASIM)
|
يا حيدر ..
أريت حالك زين يا صاحب ..
Quote: وإن نحركها
فلن نرى غير المسيح يعاود الصليب |
فهأنت تقول ما كنت أقوله ..
متى لم يشح الحق ؟؟
متى كان ميزانه العدل ؟؟
كُن بخير يا صديقي ..
فالدواة لا تدلق إلا حبر الروح ..
أعطني الروح .. أعطك الحبر ..
ليعود المسيح بعدها إلى حوارييه .
| |
|
|
|
|
|
|
|
|
|
Re: حمد .. و الولد .. و الجمل . (Re: Tariq Mohamed Osman)
|
مساك طيب و حلو يا طارق ..
الورق كائنات عجيبة يا صاحب ..
هل تلوننا هي أم نحن الملونين ؟؟
من يستخدم من ؟
من يرسف في قيد الآخر ؟
إن تحر جوابا قل لي ..
و نَلْ أجر إخراجي من هذه المتاهة .
أما اللون فحكاياه حكاية .
ليتك لا تفتح علينا أبواباً يغلبنا سدها يا طارق ياخوي ..
يادابنا بنقول الله يمرقنا من خراميج الورق .
يسعد مساك يا رجل ..
و كتير امتناني لعبورك هنا .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
عماد
الصارقيل بقى تماسيح..
والتماسيح انمسخت الى عربات ليلى علوى..
والنيل حاض، ثم لفظ اجنته واحدآ واحدة..
والشمس باعت ضياءها لشركة اجنبية تنقب عن فضة القمر..
والقمرى والدباس هاجر الى نيو كاسل فصار نوارسآ للبحر..
أما الدجاج البلدى فقد قرضه مرض (نيو كاسل) البطرى المعروف..
والحمام صار يبيض حصحاصآ فى روؤس المارة.. وبالذات الصلع..
وبت الجيران، انكرت طبقتها، وصعدت الى هرم المجتمع الجديد تبحث عن جدوى الذهب وحرير الشيفون..
أما الفول والزيت فقد توهم سائح اجنبى انهما عينة من مريض بالاسهال المائى فى طريقها الى المعمل..
وهكذا.. دواليب ... كما قال النجار المتحذلق!
غايتو...
| |
|
|
|
|
|
|
|
|
|
Re: حمد .. و الولد .. و الجمل . (Re: Adil Osman)
|
Quote: الصارقيل بقى تماسيح..
والتماسيح انمسخت الى عربات ليلى علوى..
والنيل حاض، ثم لفظ اجنته واحدآ واحدة..
والشمس باعت ضياءها لشركة اجنبية تنقب عن فضة القمر..
والقمرى والدباس هاجر الى نيو كاسل فصار نوارسآ للبحر..
أما الدجاج البلدى فقد قرضه مرض (نيو كاسل) البطرى المعروف..
والحمام صار يبيض حصحاصآ فى روؤس المارة.. وبالذات الصلع..
وبت الجيران، انكرت طبقتها، وصعدت الى هرم المجتمع الجديد تبحث عن جدوى الذهب وحرير الشيفون..
أما الفول والزيت فقد توهم سائح اجنبى انهما عينة من مريض بالاسهال المائى فى طريقها الى المعمل..
وهكذا.. دواليب ... كما قال النجار المتحذلق! |
عادل يا صاحبي ..
النجار صاح ..
نحنا الغلط و متحذلقين ..
و الله إنها دواليب ..
واحد ورا واحد ورا واحد .. دواليب يا عادل يا خوي .
كل دولاب طالعه ليهو دُردُمة مكرضمة بالجنبة .. و تدوس عليك بمزاج ..
كُرضُمة ناس / كُرضُمّة حيكومة / كُرضُمة هناي / كُرضُمات كتيرات ما تعرف ليها راس من قعر ..
و .. هكذا دواليب .
مرورك هنا بيريح يا عادل ..
بتأكد إني ما براي المفقوه .
و شكرا على الصارقيلات ..
دايرة ليها علبة كُبري , و مزاج مغربية .
| |
|
|
|
|
|
|
|
|
|
Re: حمد .. و الولد .. و الجمل . (Re: sumah)
|
ورقـة الطّـلاق يا عـمـاد
و ذكرتها في البدء لشهرتها التي تفوق على ورقة النكاح
كانت ثقافتنا المشفوهة أقـوى
مثل الدستور البريطاني..غير مكتوب لكنّـه ملزم..و لم يتميّز عليه دستورنا المكتوب، ميتين مرّة، و بالكومبيوتر..و (نفشـت) فيه غنم القوم مؤخّـرآ، و مكتوب بدماء شهداء نكرمهم حينآ باللّـقب و ننكص على العقب حسب الموقف المزاجي للمفتي الشاعر كابتن الكورة القائد السياسي الأوحـد!
ورقة الطلاق تدهور كبير .. مثل علاقتنا الإنسانية بالشريك..
نحن قوم لا نحترم غير المكتوب..
راجع ورطة التحالف الأخيرة..ينقصهم الورق ليوثّـقوا وعودهم
مع إني أنا اللي استخرجت قسيمة أبوي لمن اصطحب عقيلته للحج، و قد ولداني قبلها بربع قرن
كانت كلمة أبي مع المبارك ود موسى أقوى من ورقتي مع my father in law
يسقط الورق..و تحيا الكلمة
| |
|
|
|
|
|
|
|
|
|
Re: حمد .. و الولد .. و الجمل . (Re: الطيب بشير)
|
عماد العماد
الذي جاب الكلمة تِنْقاد
تربت يداك يا هذا ...
Quote: وين قبّلت .. قدامك و وراك الصّي .
ثمراً نبقاً , يأكله حمد من جوعٍ فيحبل .. ( و كل أعوامك جوع يا صاحبي ) .
( تحبل الرجال .. و الديكة تبيض بيضة وحيدة في العمر , بيضة عجزها ) ..
يحبل حمد من ( اكل ) النبق الذي ( سقط ) مع الورق .. |
| |
|
|
|
|
|
|
|
|
|
Re: حمد .. و الولد .. و الجمل . (Re: ابو جهينة)
|
يا أباساندرا ..
مساك الله بالخير ..
هبشك صاحبك ( وهبشك الما ضراك )
وانا أشك في قصة (الما ضّراك دي) لأني أنا شاكي انو صاحبك ده يكون معاهو (جان) أو شيطان كتابة ..
وقد (هبشك) صراحة حين قال لك :
Quote: ( ما كان فراقنا المر ..
في نفسي أو في أيديّ ..
لكن صدودك أبا ..
قست ظروفي عليّ ..
و اتلاشت الأحلام , وين حسن ظنك بيّ )
قتلني بعد : بيّيييييي الأخيرة هذه عبدالله عربي بجرة حارة للكمنجة تقطع نياط القلب ( أسمعها و نُح يا ملعون ) . |
قتلته (جرّة) عبدالله عربي لكمنجته (البكّاية) .. مع صوت عثمان حسين ..
ونوّحتك يا صديقي ..
أعلم أن رده عليك أعلاه اعادك ( ونحن ) لزمان أستاذ محمد خير ، ورفاقه ( الحُمر ) الميامين ،
حينما كانوا يعتقلون ، أثناء اليوم الدراسي ، بمدرسة(الزبالة) ونحن نشيعهم بنظرات دَهِشة ،
ونتابع (الكومر) حتى يختفي..
نحزن لهم قليلاً ، ونفرح لأنفسنا كثيراً (بكرة حصة أستاذ محمد خير فاضية) ونتجّهز
لـ(الكورة) وعلبة الألوان وإعمال الطين ، أو الفلاحة ..
دعنا لا نخرج هذا البوست من مساره ..
فماذا ردك على عماد يا عبدالرحمن ، خاصة بعد أن قلت
Quote: إندو ، لكن عايزو تول واللا أرض ؟
أو كما قال الهاج أبوبكر تفاولا بيلو |
أها تجري وين ؟؟
| |
|
|
|
|
|
|
|
|
|
Re: حمد .. و الولد .. و الجمل . (Re: Salah Abdulla)
|
عماد
با وجع الكتابة
انت لى
تائبا
لا ادرى
عائدا
قد تكون
ولاهيا
قد اكون
انا
وعاشقا
كما الحديد
واحبكم
فردا فردا
انه الحديد
صاحبى
فلا مزلة
ولا تراجع
حمد وصل
والجمل وصل
ولكن وليد دارفور
قاعد هناك ينتظر
مع حبى
| |
|
|
|
|
|
|
|
|
|
Re: حمد .. و الولد .. و الجمل . (Re: الطيب بشير)
|
مساءٌ حلو يا سعادتك ..
Quote: كانت ثقافتنا المشفوهة أقـوى
مثل الدستور البريطاني..غير مكتوب لكنّـه ملزم..و لم يتميّز عليه دستورنا المكتوب، ميتين مرّة، و بالكومبيوتر..و (نفشـت) فيه غنم القوم مؤخّـرآ، و مكتوب بدماء شهداء نكرمهم حينآ باللّـقب و ننكص على العقب حسب الموقف المزاجي للمفتي الشاعر كابتن الكورة القائد السياسي الأوحـد!
ورقة الطلاق تدهور كبير .. مثل علاقتنا الإنسانية بالشريك.. |
دستورنا يصلح دستور لحفلات الزار , مرةٌ الراجل الحبشي و أخرى أولاد ماما .. و الراجل الخواجة ثالثة .
يعطله بورقة مولانا سيد السادة و صاحب القصر و بطانته المتلشة , و بأخرى يستل فينا سيف أحكام العرف و قانون الطواريء أو .. مجلسا وطنيا سيركاً جوالا .
و كله بالورق ..
يفتح الورق الممهور أبواب الثكنات للخارجين بالكاكي و الزناد , و ذات الورق المعهور يفتح أبواب السجون للداخليها بالقدرة القادرة .
و الشهداء هدية للشعب ( لزوم الإحتفالات الخطابية ) و الإستهلاك السياسي .
تاني مساء الخير سعادتك ..
مودتي العامرة لك .
عاشت ذمننا الواسعات ..
و كلماتنا الهينات ..
و ورقنا الشديد القوي ..
و .. عاشت ويستمنستر .
| |
|
|
|
|
|
|
|
|
|
Re: حمد .. و الولد .. و الجمل . (Re: sumah)
|
سمعه يا خوي ..
الله يضحك سنتك .. قول يامين .
ورق التواليت !!!!!
تمام كده , فضلاتنا كثُرَت يا سمعة ..
أصبحنا - و له الحمد وحده - أمة هضّامة لكل ما يتسع له جوفها .. و ( نفِكْ ) البيرق .
حتى الحقوق صرنا نهضمها - بعد إجترارها مرات و مرارير - و نتجشأ : ولولة طفولة و عويل ثُكل و نحيب ترمّل و .. أنين رجالٍ مقهورة .
هنيئا لنا ورق التواليت , حلالاً بلالا .
سيقش به القهر و الخيبة ما تبقى من .. عـ....ـزاتنا .
الله غالب يا سمعة
مودتي , و كن طيبا .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
و النبق النبق ..
من سدرة ورمك يا حمد ..
نبق تريان شحمان .. كضّاب .
قادر الله يا حمد ( سدرة المنتهى لا تثمر نبقا ..سدرة المنتهى تثمر إنذارا و وعيدا ) ..
يا سدرتك الضبلانة و وحيدة ..
وين قبّلت .. قدامك و وراك الصّي .
ثمراً نبقاً , يأكله حمد من جوعٍ فيحبل .. ( و كل أعوامك جوع يا صاحبي ) .
( تحبل الرجال .. و الديكة تبيض بيضة وحيدة في العمر , بيضة عجزها ) ..
يحبل حمد من ( اكل ) النبق الذي ( سقط ) مع الورق ..
و يكون حملا كبيرا كاذبا ..
يقول الناس : يا هزيل يا حمد , يا حامل يا حمد ..
تبدو في هزالك كالصارقيل البالع نبقة يا حمد ..
ثم يكون حملك خارج الرحم يا حمد ..
رحم الحلم ..
مفردات رشيقة وعميقة ..
شيقة وشائكة ...
عماد اكتب كتير ... كتير ...
دى الكتابة الانت لوباريتا بتأنى وتدبر وتفكير وخيال ، مابتقدر تكفى منهاالناس وتشبع الارض والحياة ..
واصل ياحبيب ...
القلم بيحبك .. بادلو الحب
مودتى
| |
|
|
|
|
|
|
|
|
|
Re: حمد .. و الولد .. و الجمل . (Re: الطاهر ساتي)
|
أخوي الطاهر ..
سلام ..
أشكرك يا طاهر ..
يا ريتني أباري روحي في الأول .. بعد داك الكتابة ..
مبارات الروح مكسب ..
و الكتابة عندي حالة عابرة , يا صابت و اتنفستَ , يا خابت و " نفّستَ " ..
أسعدني مرورك يا طاهر ..
و سعيد اكتر بالوصية التي ستكون في الذمة .
يديك العافية ..
مودتي
| |
|
|
|
|
|
|
|
|
|
Re: حمد .. و الولد .. و الجمل . (Re: خضر حسين خليل)
|
عماد
المحبةوالسلام ألف وأجي القى بوستك عالي
تتعلى فوق المابيك
حمد والولد والجمل
تعرف ياعماد انا لحدي ما دخلت المدرسة لم اكن اتقن الكلام
وتم خنقي بمصران خروف عيد الضحية شوفت الطقس العجيب
يعني نلازمني المواقف الدراماتيكية منذ الطفولة
المهم في الموضوع
انا اول حصة عربي ادوني و رفة كبيرة وعريضة للوالد علية الرحمهان يقابل ناظر المدرسة
والسبب حمد والجمل ؟؟اواصل !!
يأخوي عماد المدرس ما ان بدأ الدرس وقال حمد والجمل الا وفتحن عيوني من الدهشه وانتيهت اعصابي
للكلام الغلط ولم اسمع باقي الكلام لانني وقفت وقلت للمدرس
آآعيييب آولد آجمل لالالا
أكمل؟؟؟
وطوالي نادى المدرسين وكررت الكلام وكان اول جمهور لي
وجا الناظر ووداني ورقة لي ابوي !!
أكمل
| |
|
|
|
|
|
|
|
|
|
Re: حمد .. و الولد .. و الجمل . (Re: Randa Hatim)
|
اها بعد اتلمو المدرسين وبقت فرجة
قال المدرس قلت شنو ؟؟
وطوالي جمعت معلوماتي الصاح
وقلت للمدرس وجماعتوا الحاوطوني من كل الجهات
وعلى وجوهم اترسمت بسمة نص نص البتخلي الكضيمات
تترفع لي فوق شوية ما كتير
قلت حمد والجمل شنو ؟ ده المدرس
وهنا جمعت كل الغضب البتسمح بيه سنوات السبع
وتكلمت بي غضب
الولد آآأمبولا
آآبت آآدممل
وضحك الأسـاتذة بي صعلكة فرحانةوبين الدموع والدهشة وعدم التوقع
انا اردد الولد ااا مبولا البت آآآدمل
وأخذ والدي عليه الرحمة الورقة ومن دغش الرحمن على المدرسة
وادى الناظر محاضرة عن الدرس الغلط وفال ليه غيرو المنهج ولدي ما غلط انتو الغلطانين
عرفت ياخدر وياعماد كيف عرفت اول نص والرقابة
| |
|
|
|
|
|
|
|
|
|
Re: حمد .. و الولد .. و الجمل . (Re: محمد سنى دفع الله)
|
(عندما نتعود علي اللعب بالطين... سنفاجئ الصلصال بحذاقة اصابعنا...)
سالنا الاستاذ عبدالمجيد سرور... من منكم يقول الشعر?
لم يستجب احد ... قررت ان اتجرأ واقول شيئا عسي ان يغفر لنا الاستاذ بسؤال اخر!!!!!!
فقلت:
غريبان..
غريبان في هذه القافله..
غريبان ..ماودعتنا المدينه..
مابح صوت المسيح في الكنيسه..
لم تذرف المجدليه دمعة حزن..
تجف الدموع علي الوجنتين تموت.. تموت..
وترحل في الغسق السرمدي بقية انفاسنا الذابله
غريبان..يا اصدق الاصدقاء يا آخر القادمين علي الدرب
يا آخر السابله.....
نظر الي استاذ سرور بعمق او هكذا تخيلت...
سألني ما هذا ????
قلت شعر!!
قال شعر?
نعم!
خسئت ايها المجنون هذه هضربه.. دجل.. كلامك هذا كلام شيوعيين ساكت!!
وانكم تشوهون اللغه ايها المأفون
يازنديق يا ....واوصاف اخري لم افهمها ولم احاول!!!!!!!!!!!!!!!!!!!
جلست كلماته علي صدري مثل صخرة آل يا سر
احد..احد
لم ناكل الورق
لم ناكل النبق
لم نحتفل بالصلصال
اذ لم تتعود اصابعنا علي الطين......................
اخوي الجميل عماد مازال هنالك مليون سرور... سناكل ميتين ابو الورق ذاتو!
كوجان
| |
|
|
|
|
|
|
|
|
|
Re: حمد .. و الولد .. و الجمل . (Re: ibrahim kojan)
|
Quote: غريبان..
غريبان في هذه القافله..
غريبان .. ماودعتنا المدينه..
مابح صوت المسيح في الكنيسه ..
لم تذرف المجدليه دمعة حزن ..
تجف الدموع علي الوجنتين تموت .. تموت..
وترحل في الغسق السرمدي بقية انفاسنا الذابله
غريبان .. يا اصدق الاصدقاء يا آخر القادمين علي الدرب
يا آخر السابله..... |
الفم مكموم بالورق ..
يقول لك أستاذك سرور عليه السلام :
ليس من أمل في ظهور مسيح جديد ( يا كافر ) .
و كلنا أكمَه و أبرص و بنا من الإعاقات ما بنا ( يا عيان ) .
و لا من مجدلية ( يا شهواني ) .
ولا شجرٌ تهزه فيساقط ثمره بلحاً ولا نبقًاً .. ولا ورق ( يا زنديق ) .
لا روح تنفخ في آخر القادمين ( يا مُلحد ) ..
لا درب , لا سابلة ( يا طاشّي ) .
إبراهيم يا صديقي ..
ورق الناس مباح ..
ورق السلطان سلاح ..
فاظفر بذات البياض , ترِبَتْ يداك .
(عندما نتعود علي اللعب بالطين... سنفاجئ الصلصال بحذاقة اصابعنا...)
اللللللللللله يا ابراهيم .. هو ذاك .
| |
|
|
|
|
|
|
|
|
|
Re: حمد .. و الولد .. و الجمل . (Re: محمد سنى دفع الله)
|
المناهج دوماً أفسدت الكثير يا عزيزي السني
أفسدت علينا حتي بهجة الانتصار المزيف
كل شئ يتحول الي ضده لكنني أعترف لك الان
بأنني عرفت أخيراً دور حمد والجمل ومساهمتهم
في صنع الابداع الذي تتجسده
شكراً السني
..........
ياعماد
كرهتنا ياخ واصل
| |
|
|
|
|
|
|
|
|
|
Re: حمد .. و الولد .. و الجمل . (Re: Randa Hatim)
|
الرفيقة الحلبية .. رندا ..
إزيك يا أم حاتم ..
غايتو شغل حلبه ظااااااهر ..
لكن نحنا الكلام السمح ما بناباهو ..
عِلاّ الفيك إنعرفت ..
أنا برضو مفتقدك يا رندا ..
ما يفتر حماسك بفعل القهر و أوكازيونات الكلام الهيّن ..
و الورق المحشي رغاوي و فقاقيع ..
واصلي .. متابعين معاك .
تسلمي يا رندا ..
مودتي .
| |
|
|
|
|
|
|
|
|
|
Re: حمد .. و الولد .. و الجمل . (Re: محمد سنى دفع الله)
|
| Quote: وجا الناظر ووداني ورقة لي ابوي !! |
طلّقوك يا سني ؟؟
الطلاق البائن بين المنهج و الحال .
منهج حياتنا الفارِق .
و حالنا الملبّك ..
بخت الرضا كانت تقول لينا في الورق :
لمسَ الولدُ الأسدّ ..
فعل و فاعل و مفعول به ..
الولد يلمس الباحش يا قول وليدنا في دارفور .. ده موضوع جايز ( شفت الله قادر كيف ؟ )
لكن المفعول به يفضل " مفعول به " ( منصوب ) ( بالفتح ) ..
عملاً بالغاية الكريمة : إن غلبك سدّها .. وسّع قدها .
عليه فليس للولد آآآآمـ .... ـولا .
غلطان و ستين غلطان يا سني ياخ ..
و تستاهل يطلقوك .
| |
|
|
|
|
|
|
|
|
|
Re: حمد .. و الولد .. و الجمل . (Re: خضر حسين خليل)
|
خضر ..
بعد تخرجي عقب القراية أم دق لستاشر سنة فالصو ..
عوض دوكة فقعني بالحقيقة في بهرة استحقاقها و نحن جلوس قدام بيتنا ..
في يده عود .. وفي يدي ما في يدي .
: أها .. و بعد ده .
: بعد ده شنو يا عوض ؟ .. كيف يعني ؟؟
: أها .. بس ياها دي كل الكبّة ؟؟
.. أهو إتجارخت يا أصلي .. ورقتك و طبقتها ..
تاني نومتك شنو ؟
( فبُهِتَ الذي كفر ) .
طابق ورقتي بيميني ..
و مبهوتٌ كيوم ولدتني أمي .
قول واحد .
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
عماد يا عبدالله والمتداخلون الاعزاء ...
انتو شاربين شنو ؟؟؟
عربى ناس الوزارة عرفنا ، حقكم دا عربى ؟؟
انا بقيت من غير الناطقين بها ولا شنو ؟؟؟
اغيب واجى القى العربى دا اتشقلب كدا وانا ما فاهمة حاجة !!
ذى ما بقول الكودى هذه المداخله نموذجا
Quote: للدواة دور
وللمعصم معصر
وللذهن التذهال .
فتوافقية هذا المنحني الحدي ,
تقيم إفتراضية { براءة } الورق ,
ما لم نسعى لتثبيت العوامل الأخرى .
... فإن نثبتها , فالورق الضحية ,
وفيما يشيح العدل , وإن نحركها
فلن نرى غير المسيح يعاود الصليب .
|
ح تفهمونى ولا بس اتداخل ذى دا ؟؟؟؟؟؟؟؟؟؟؟؟
| |
|
|
|
|
|
|
|
|
|
أمل وبدر وأزمة بلد (Re: دينا خالد)
|
بدر درس
أمل درست
بدر لعب الكورة
أمل دخلت المطبخ وساعدت الأم
أمل مطيعة و {طشت الغسيل} ينهك جسدها الصغير
تكور جسدها إعلان نحو الزواج و {غطا الماعون}
(ومانحن الا مواعين لكم)
وبدر {مالو ماجابوا سيرتو}
من يوم دخلنا المدرسة رسمنا سيرتنا وفقا لورق المناهج {هو عندنا مناهج؟}
درسنا المعلقات وعبلة وعنتر استلبوا قلوبنا ولم تفرهد تاجوج كما ينبغى، وظل ورق العشق يتناسى ارثنا المحلى
والجغرافيا... تكدست الاوراق بجغرافيا الوطن العربى وماعرفنا عن جنوبنا الا جوه الممطر طول العام
وتناسوا فاكهة افريقيا الطازجة فى منتصف استواء القلب، كبرنا وصرعتنا الهوية.
كبرنا ولم نواجه الذات بعد من نكون، عالم تعجن فينا وفى تاريخنا ومانحن الا ظل لاحلام جميلة لم نفعل شىء لاجلها، شىء ينبغى فعله، شىء يتجاوز سب البلد الى فعل آخر.. العالم يرسم خطاه نحو ورق الهوية الانسانية ومازلنا نرتق جلباب القبلية فى أبشع صورها... {مش دى القبائل الدرسونا ليها فى ورق شجرة النسب}،عرفنا عن المك نمر، عن الشايقية والجعلية وبالكاد نعرف تاريخ الدنيكا والنوير وفوق كل ذلك كان ومازال الورق الثقيل بسياسة التمكين يغفل نسبتنا للانسانية
الابرتهايد، فلسطين وبلد المليون ميل
ولم نعرف عن لومببا وقادتنا العظام فى افريقيا كما ينبغى
ومالسودان الا قطر {مجدوع فى الخارطة الافريقية}
عرفنا عن هوية هدى شعراوى ولم نعرف عن مندى وأشول ولهفة نساء سواكن و {برضو النقة مستمرة عن تحرر المرأة...} المعرفة ضرورة، تجربة هدى شعراوى وغيرها من نساء ثورة المليون شهيد ولكن فقه القلب يوجه بوصلة قلمه فى قلب ورق تاريخنا المسكوت عنه، حتى ورقنا مركزى وورق الهامش أكلته الغنم التى أفرختها سياسيتنا التعيسة
قلبت ورق المدرسة الاولية وانفتحت شهية البحث عن ثقافة السلام فى ورقنا ومناهجنا فما وجدت غير {منقو قل لاعاش من يفصلنا}...
الورق هو السياسة المصنوعة منذ فجر تاريخنا، تاريخ ينبغى اعادة قراءته وكتابته وفقا لمشئتنا وانسانيتنا
حمد مسكين
وأنتم ايضا مساكين
ورق مخصص للذهنية الذكورية
,امل المستلبة تتبناها وهى فى هامش الكتاب تعد عدتها نحو بيتها السعيد
ومنقو يعد عدة انفصاله
وآدمو وحواية يموتون حربا وجوعا
ودستورنا {يا اولاد ماما} يكبل إنسان السودان
وساستنا مشغولون بورق الخصخصة وتوزيع زجاجات عبأوا فيها دمناوأحلامناوبعض مشاعر ماخلناها تندثر
تصفحت كتابنا الاول ولم اجد حديث عن الشجر والكواكب وحماية الأرض
لن يكون الورق منتمى للقلب مالم:
لا تمييز... أمل وبدر سواسية
لا تهميش... امل وأشول، محمد وملوال أسنان مشط التنمية
لا سلام إجتماعى دون حماية للبيئية والتنمية المتوازانة
لاتصالح الا حين نخط على ورق هويتنا الانسانية دستورا لحقوق المواطنة المتساوية
و.....
و.....
و.... شكرا لفتح شهيتى للبحث ونفض الغبار عن مسودة فى هذا الاتجاه، ورق مكدس فى رف قلبى أنفض عنه الآن صفاره وانحت وقد أعود الى حفرياتى التى بدأتها منذ أعوام إن استطعت الى ذلك سبيلا....
ولك الود ولمن مروا/ن من هنا
| |
|
|
|
|
|
|
|
|
|
Re: حمد .. و الولد .. و الجمل . (Re: دينا خالد)
|
دينا يا حنينة ..
روّقي شوية و أديها صنّه .
الأمير حسن عطية في مرة من المرارير و هو بيغني على المسرح و عبدالله عربي وراهو بالكمنجه :
( حُبو زي النيل ساري في وجداني
في الملامح عربي و في الجمال سوداني ) ..
أبو علي عليه السلام كان لما يجي المقطع : " في الملامح عربي " ..
يقوم يقبل علي عبدالله عربي و يأشر عليهو ..
هسع أنا أأشر ليك على وين ؟
خارج النص :
في الختام يا دينا نحنُ مشتاقون مشتاقون مشتاقون ..
و أنتم غائبون غائبون غائبون .
و السلام .
| |
|
|
|
|
|
|
|
|
 Re: حمد .. و الولد .. و الجمل . (Re: Emad Abdulla)
|
Quote: و النبق النبق ..
من سدرة ورمك يا حمد ..
نبق تريان شحمان .. كضّاب .
قادر الله يا حمد ( سدرة المنتهى لا تثمر نبقا ..سدرة المنتهى تثمر إنذارا و وعيدا ) ..
يا سدرتك الضبلانة و وحيدة ..
وين قبّلت .. قدامك و وراك الصّي .
ثمراً نبقاً , يأكله حمد من جوعٍ فيحبل .. ( و كل أعوامك جوع يا صاحبي ) .
( تحبل الرجال .. و الديكة تبيض بيضة وحيدة في العمر , بيضة عجزها ) ..
يحبل حمد من ( اكل ) النبق الذي ( سقط ) مع الورق ..
و يكون حملا كبيرا كاذبا ..
يقول الناس : يا هزيل يا حمد , يا حامل يا حمد ..
تبدو في هزالك كالصارقيل البالع نبقة يا حمد ..
ثم يكون حملك خارج الرحم يا حمد ..
رحم الحلم ..
الحلم !! ( أيّ الأحلام صَدَقَتْ .. يا أيها المنجمون ؟؟ ) .
و بعد ده كلو ..
جمل حمد ظلع !! |
الله الله يا عماد..
ولا أزيد
| |
|
|
|
|
|
|
|
|
|
Re: حمد .. و الولد .. و الجمل . (Re: نهال كرار)
|
شكرا نهال كرار ..
يديك العافية ..
لكن عايني الحال العلينا ..
شفتي المغسة يا نهال البقت علينا و الهملة و الكيمان الهبطرش ؟؟
كيمان وين ما قبلتي .. وكل زول يكورك : علينا جاي ياااا ..
البلد سئيلي الله بقت سوق مطلوق .. عليك يا ربي يا سيدي .
البضاعة كلها يا ضبلانة يا وسخانة ..
الفُرجة زاتا بقت وسخانة .
و حمد يباري في الكواريك الورق , مبسوط من كبرة السوق ده و ناس : علي الطلاق و علي الحرام ديل ..
و راديو السوق يعلم الله بطاريتو نزلت و هو معلق في : عازة في هواك .
عازة شنو يا حمد التلولح ليها راسك ؟؟
هو أول إنت عندك راس ؟؟ ..
خليك في لقيط الكواريك الورق و مبارية حلم السجم ده لامن تمرقا في أم طرقاً عراض .
حمد حلمان حامل بنبقة يا نهال ..
و مش نبقة ساكت , نبقة مدردمة و شبعانة و .. مليانة سوس .
حمد راجي الري قال .. شفتي خيبة حمد .
راجي الورق السمح الملون ده ( الورق الهايف بكل ألوانه ) .
ورقة حمرا تديهو ليك كف من جهة اليسار .. كف صرّاجي : إنت يا زول يا طربنش إنت .. معانا وللا مع الخيانة ؟؟
تلفتو ليك ورقة صفرا من جهة اليمين .. و تراااح تديهو ليك كف صاموطي : أنطق يا بهيمة .. معانا وللا مع الخيانة ؟؟
نان يا حمد يا أب نبقة .. ناسك ديل بي كلامهم ده , يبقو الإتنين خيانة ..!!!
إتملطشت يا عديم الوالي ..
يا أب نبقة يا بوحميد .
لا عندك شدرة تضربا تاني ..
لا في نبق ..
لا ناس يشفقو على حالتك الشلش ..
لا ضهرا تسند عليهو ..
لا سجم لا رماد .
لسه بتحلم ؟؟ ..
شوف سؤالي كمان , هو إنت أصلاً قاعد تنوم ؟؟
حلمان شنو يا حمد ؟ .. يللا قول لي !! ..
: ( ..................... )
لا حولااااااااااااا .. ده كلووووو ؟؟
يا حليلك يا النايم على حيلك ..
حيلك شنو ؟؟ .. هو إنت خلو فيك حيل يا حمد ؟
أقول ليك قولة يا حمد : إتدمدم و نوم آآآخوي .. أكان قدرت ..
نامك بلا يخمك يا الغشيم .
ً
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
كانت تختبئ بين ثنايا الورق...
كلما امر بها احس بانني اعرفها ولكني لم استطع ان اسالها ربما مجرد حديثي قد يجرحها
انا صعلوك ولكني جميل...........
هي اكثر من الصبح عندما يطلق انفاسه ليأذن للعصافير ببداية.. الغناء!!
هي الحياه عندما تصير الحياه في مثل وهجها!!
كانت اناشيد الورق
كانت حروف الورق
كانت يا عماد ......دين الورق
كانت ... لو قدر لي ان اختار لاخترت الحياه.. اخترتها
لا اعرف لماذا كتبت هذه الكلمات ربما .. فقط وجدت عماد هنا امامي
فقلت اكتب
يالله زي ما تجي تجي
تحزم فانا قادم
كوجان
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
كانت تختبئ بين ثنايا الورق...
كلما امر بها احس بانني اعرفها ولكني لم استطع ان اسالها ربما مجرد حديثي قد يجرحها
انا صعلوك ولكني جميل...........
هي اكثر من الصبح عندما يطلق انفاسه ليأذن للعصافير ببداية.. الغناء!!
هي الحياه عندما تصير الحياه في مثل وهجها!!
كانت اناشيد الورق
كانت حروف الورق
كانت يا عماد ......دين الورق
كانت ... لو قدر لي ان اختار لاخترت الحياه.. اخترتها
لا اعرف لماذا كتبت هذه الكلمات ربما .. فقط وجدت عماد هنا امامي
فقلت اكتب
يالله زي ما تجي تجي
تحزم فانا قادم
كوجان
| |
|
|
|
|
|
|
|
|
|
Re: حمد .. و الولد .. و الجمل . (Re: Emad Abdulla)
|
كانت تختبئ بين ثنايا الورق...
كلما امر بها احس بانني اعرفها ولكني لم استطع ان اسالها ربما مجرد حديثي قد يجرحها
انا صعلوك ولكني جميل...........
هي اكثر من الصبح عندما يطلق انفاسه ليأذن للعصافير ببداية.. الغناء!!
هي الحياه عندما تصير الحياه في مثل وهجها!!
كانت اناشيد الورق
كانت حروف الورق
كانت يا عماد ......دين الورق
كانت ... لو قدر لي ان اختار لاخترت الحياه.. اخترتها
لا اعرف لماذا كتبت هذه الكلمات ربما .. فقط وجدت عماد هنا امامي
فقلت اكتب
يالله زي ما تجي تجي
تحزم فانا قادم
كوجان
| |
|
|
|
|
|
|
| |
Emad Abdulla
طلال عفيفي
عامر تيتاوى
مامون أحمد إبراهيم
Hussein Mallasi
بدر الدين الأمير
Ibrahim Algrefwi
Osman Musa
ALGARADABI
Elbagir Osman
عبدالكريم الامين احمد
Bushra Elfadil
نهال الطيب
عبدالرحمن عبدالله أبوشيبة
HAYDER GASIM
خالد علي محجوب المنسي
أبو ساندرا
ibrahim kojan
غادة عبدالعزيز خالد
Adil Osman
sumah
الطيب بشير
ابو جهينة
عصام عبد الحفيظ
الطاهر ساتي
خضر حسين خليل
محمد سنى دفع الله
دينا خالد
Ishraga Mustafa
بهاء بكري
khaleel
فيس بوك
تويتر
انستقرام
يوتيوب
بنتيريست