دعواتكم لزميلنا المفكر د.الباقر العفيف بالشفاء العاجل
|
|
 رساله ..من بعيد
|
رساله ..من بعيد
انتظرتها سنين طويله.....(دسيت) لهفتى عليها فى الحنايا..فرشت ليها نبضى وأعمق مافى وجدانى من حنين
كلكم ياجماعه بتعرفوا
الحب
والصداقه
والخوف من المجهول
ورسالتى المنتطره ما وصلت
خبر انا متأكد...سلك التلفون شهق
حماد أدم حماد(أكوبو)......حى.......حى...حى
جاى الخرطوم قريب.....كان مفروض يجى مع وفد الحركه الشعبيه الأخير...بس مشاغله ما سمحت....يعمل فى مستشفى فى الجنوب
قال ذلك محدثى....وسكت
قرب نبضى يقيف
قفلت الخط؟وقعت منى السماعه؟ والله وقعت أنا؟؟؟؟
الفرح
بكتل....ياناس
يالطيف
مهلا
يا أحبه
حماد ياحبيبى...وتوأم روحى...يا.معلمى العظيم.....مرات قليله اتقالدنا وبكينا انا وأخيتى.(.حسب قول جدى محمد فى وصفه لحبوبتى شريكة حياته.).....كان ذلك فى امسيه مظلمه وتعيسه قرر فيها حماد الذهاب الى الجنوب والالتحاق بصفوف الحركه الشعبيه لتحرير السودان....كان بالتحديد يوم اربعاء , شهر تسعه, سنة تسع وتمانين,,بدأ الموضوع بارهاصات..وكلمات متعثره تقع وتقوم.....واصبح حقيقه زى القدر لامفر منه...بعد ان توغل حسن الترابى,وجماعته حراس النوايا فى دمنا بأحذيتهم الغليظه....وشعاراتهم المزيفه.....
بلد تطرد نسمه زى حماد؟؟؟ممكن تبقى بلد؟؟؟
مرقنا من البيت حوالى الساعه الثامنه مساء....كالعاده سقى حماد( نبته) لبنها....وحضنهاحتى نامت.....وبخطواته الثابته وضعها على العنقريب فى الراكوبه.....عاين للشجرات... والقى نظره لم تكن موضوعيه باى حال على المكان. ولم تكن معتاده..ولم يودع( منى)...كنت اراقبه بدقه..واجتهد حتى لا يندلق قلبى امامه.
جلسنا على حجرين فى فسحه خارج المنزل كانت تبدو فى نظرى..أضيق من قبر
تحدثنا ام كان الصمت سيد الموقف؟ المتأكد منه ان دموعا نزفت كالشلالات من عروقنا...حكى عن وجهته ..وكيفية الوصول الى هناك....وعندها ايقنت..ان أمرا جللا وعظيما سيحدث.......لهذا الوطن الحزين
وصانى على نفسى..... وعلى البت وأمها..ولمح لى بيقينه الذى يسبق كلماته...اننا جميعا...بلد, وتراب, وناس فى خطر حقيقى باستيلاء الجبهه القوميه الاسلاميه على السلطه...وأنه يعتقد ان الطريق الذى أختاره..بالأضافه الى أنه الطريق الصحيح فهو أكثر أمانا من وضعنا......وفعلا تعرضت المخلوقات..لأذى عميق فاقه كما ونوعا ماحدث لسكان الجنوب........وقتها..
ٍاتكلم عن (عين) برهافه حس وذوق انسانى عظيم....
قال.....
كلمتها...ومصيرى هو مصيرها....مع أه عميقه...قال
انت عليك تضميد الجراح...وفى النهايه كلنا مجروحين.
وصانى على أخته...... وبت أخته اليتيمه
ومشى.....!
حماد يتيم أم واب..اهله من الجزيره أبا
حماد معلم أبتدائى..عمل كثيرا فى ريف أمدرمان الجنوبى...وأغلب مدارس أمبده
ماشفت أنسان فى هذا الكون العريض بحب الأطفال زى حماد
كنا لا نفترق...ابدأ.....أبدا
حماد
ولد-بضم الواو-
متمرد
وعفيف
وشاطر
وفقير......ونضيف....نما وعيه ملازم لصدقه مع نفسه...والناس....التقينا فى زمن رحيب....دخلت شوكة الروح فى الروح.....وأتجزرت مع الأهوال والمحن...التى مرت على بلاد السودان
فى زواجى حماد كان وزيرى...عبر عن فرحه بضربى ...كلما سنحت له فرصه.....ضربا موجعا كان....ممزوج بمشاعر...ياريت لو اقدر أعبر.....! ...ياريت
ياحبيبى
حتى لو كانت الحرب تذهب بملامح الرقه على الوجوه....فانا اعرف ان رقتك لن تزول...وروحك لن تصدأ
ياصديقى
أيها الانسان العذب
الجميل
ستحضنك أمبده
وحاتغنى....مره أخرى
......سألتو عن فؤادى
اجابنى ماهو عارف
|
|
 
|
|
|
|
|
|
|
|
Re: رساله ..من بعيد (Re: عمر ادريس محمد)
|
التحية اليك العزيز عمر
ورغم ان حماد كجيل قدامنا فى العمل السياسى ولم تساعدنا الظروف ان نحتك به كثيرا ، الا انه كان انسان جمال فى تلك اللحظات التى جمعتنا به واذكر اخر مره قابلته فى منزل اولاد مالك او الصرب كما يحب ان يناديهم الصديق الراحل كمال دقدق،
له التحية واتمنى ان تجمع انت وهو وكل الرائعين فى المنافى فى امبدة - الرابعة الرائعة
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
العزيز
امبدويات
تحياتى
ردم....ردم
وأمبده جاى
.....معقول ماسمعت حماد بغنى
حبيبى يامدلل
فى حال
صفا
جمالك....؟؟؟
نص عمرك ضايع.....ومع ذلك ممكن تقدم نقد ذاتى
يمكن.....نغفر ليك
كيف قايدة الاسطول ماريل؟؟؟والشاب ,وأمهم
لك ولهم
عميق الود...والتحايا
| |
|
|
|
|
|
|
|
|
|
Re: رساله ..من بعيد (Re: حيدر حماد)
|
الاخ العزيز
حيدر حماد
فخر عظيم..
تشريفك....ودعواتك الصادقات.....لحماد وأمبده والجزيره......التى كان هذا(الغفارى) العاصى الكبير صاحب الرايه المتفرده...فى الونسه...يسميها جزيرة (أبا) ويرجع اصول رفضها بتلاوين عجيبه من الكلام الى حركه المزارعين الصينين قبل ظهور ماو بالاف السنين....واراهنك لو لم فيك....يقنعك-كيف ماتعرف- ان الرفض اصلا حركات كونيه وانسانيه مرتبطه بالجزر وان الظلم بدا فى الكون فى جزيرة (أبا) اولا ثم توزع على جهات الدنيا الاخرى....وحاتحبه حبا جما..يا عزيزى حيدر....حكمة ربنا الزول المطوس ده....يعرف تفاصيل مذهله عن دور الطائفيه السالب فى تعميق الفقر ليس باستخدام الفقراء فى اعمال السخره كما معروف فى( أبا)بل فى طمس الرفض فى نفوس اهل الجزيره بلبس الجبه وتزينها بطريقه تحجب الشمس عن المنطقه المسؤوله عن التمرد فى الدماغ حسب فتوحاته الخاصه فى التفكير ومع ذلك كان لا يتحدث قط عندما تاتى سيرة الأمام المهدى وهو جالس.....كان يقول لا يجلس الثورى فى حضرة أبو الثوار السودانين.
لك خالص الموده والأعزاز
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
العزيز جــداً، عمر إدريس..
حمادك يشبه حمادى كثيراً.. فكلاهما من الجزيرة أبا، إلا أن حمادك هو إبن "أدم حماد".. بينما حمادى هو "حمـاد يعقوب" من الجزيرة أبا، تم فصله من الجامعة وعمل في فندق هيلتون ثم أُعتقل في حُقبة نميرى لستة أشهر، ثم عاد
للجامعة كطالب خارجي، ثم، وثم.. يا بختك بمعرفة خبر "حمادك" والعقبال لينا..
لكم الود.. قُفاف، قُفاف..
عدلان.
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
الله
كيف ياعدلان..؟
حماد يعقوب مرشحنا-الحزب الشيوعى السودانى- الدائره الثانيه فى المهديه والثورات عام 86 وبعدها نجع ورجع...وحتى وقت قريب كان يعمل فى الجزيره ابا فى واحده من وظائف القلق و(الودار) التى ظهرت اخيرا كملجأ للافندى المطارد فى عهد السلطان البشير وبطانته.
انا احتفى بحماد أدم وجزيرته(أبا) وفى بالى تلك الكوكبه من الأنسانين المهذبين الافذاد من اولاد الجزيره اباالذين رفدوا حياة المدن السودانيه ومنها امبده بكل ماهو أصيل وعفيف وصادق من قيم تراها على وجوههم....وتعرف انهم منها.
حماد أدم
بشير عبد الصمد
أدم الجبارى
والقائمه تطول
لك ياعزيزى الجميل
أفضل
التحايا
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
انت طبيب عندك
شفاى
حماد
ياخدر
راجل ولعه
عميق
وبعرف كيف يواسى الناس
المحتاج عنده...طفل ,صديق,أم
صاحب حق يعلو على الوجود نفسه
وحماد....ياخدر
حماد....خدر
حماد
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
غرفة
حماد
حاجه بديعه.......نضيفة بشكل.....يغيب منها ايام.....ودايما مفتاحه معاه......ندخل
يا
ابن
امى
اى حاجه فى حتتها بالضبط الملايه مشدوده تلمع....والكتب مرصوصه...بعنايه تشهيك القرايه ومع ذلك
كان حماد كثير الشكوى من غبار عالق لانراه.....فى الغرفه
وهناك
ذلك الشعار....المهيب على الحائط
اذا انتكست قوى التقدم...مرة فانتصاراتها لاتتوقف
أو
أشتم رائحة شيئا يحترق ....أرجو ان لايكون عقلى
التوقيع
جندى أمريكى فى فيتنام
حماد فى سكنه ريفى حتى النخاع........وعصرى شديد التدقيق فى كل شى
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
حماد
انسان
حلو
واحده من حسان زمانا كتبت له رساله ملتبسه وشديدة الغموض.....تحاججنا فيها كثيرا,واقنعته بأنها ليست رساله عاطفيه.
فكتب
لها
رغم العزال
انا شهيد الاصابع التى كتبت أسمى
حماد
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
الاخ عمر
تحياني
هذه رسالة الاستاذ راشد تنضح حبا وشوقا لذلك النبيل حماد
فرحات العزيز وبنت أمى التى بيمينك وِكليتاىّ وتلك التبلدية ومن بالدياِر ومن يستحق
عاطر المودة والاعزاز المكين و لعمر ادريس ذلك الساموراى السميدع ارتالٌ من المحبة ومثلها للباذل البزاخ الباشق فى تحليقه النبيل حماد آدم حماد الشُداع
فقد فتح بوسته أبواباً لو تعلمان عصيةً
كنت أتنسم اخباره كلما مر بأرباضنا الكماندر ياسر عرمان وكان يحدثنى عن مثابرته على الكتابة و تسجيل تجربته التى لا شك غنيه و مليئةً كغنائه و امتلاءهّّّّ كثمرة العنب
عرفته و هو بعد بالمرحلة الوسطى وكنا نسبقه فى المرحلة الثانوية
الجزيرة ابا و ثلة التوق تلك واحلامنا النبيلة والتفائل والتعطش للمعرفة و أجتراح المعجزات ياهٍ ويالها
الشفيف العفيف ذلك الأسود النحيف الطيب عبد الله
وحماد يعقوب ضرس الفحولة ذلك الذى عناه عدلان عبد العزيز
وصلاح محمد عيسى الذى يهبنا الفوح و النشر كلما هفا ببردتيه ريحٌ من تالا الوطن
وووووووو
مصفى بشاره
آدم الجبارى
بدوى تاجو
صلاح عبد الله
و التيمان
و وطنٌ بحجم الأحلام
وهى كبييييييييييييرةٌ
شكراً لهذا الوفاء ياعمر وحتى نتحلق حول نارها فى أمسيةٍ من تلك التى
لنا حديث مع نهديها فى الأسحار
راشد سيد أحمد
| |
|
|
|
|
|
|
|
|
|
Re: رساله ..من بعيد (Re: خدر)
|
عندما كنت اتجول في المناطق المحررة واتجاذب اطراف الحديث مع عساكر الجيش الشعبي عن امالهم في التعليم واحلامهم . . كان بعض منهم يقولون انه يوجد رجل اسمه حماد في الجنوب ولم يمنعه صوت الحرب من تعليمعنا فك الخط.. وله فضل مسح امية كثير من الذين حرمهم الوطن القراية والكتابة
ليتكم تدلوني عليه
منال
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
Quote: إذهب يا بوست
إذهب يا بوست
إذهب يا بوست
كي تُزين صدر الصَفحة الاولي راضيًا مرضيًا |
خدر
كان حماد
يعشق بعض أغانى حمد الريح
السواقى ألنايحه نص الليل
حنين الدنيا ممزوج فى بكاها
زى طيورا فى الدروب محتاره
تفتش فى جناها
القيوم والناس بتسأل عن صبيه
فارقت حلتنا
زى طيرا غريب
سافر عشيه
ياسلام
ياسلام
منك
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
| Quote: وعندما تقابله قل له ان صديقه ابجقادوا والحبوب يبحثون عنك كثيرا |
العزيزه
منال
كل القصه ومافيها وحتى صباح اليوم
حماد طيب وموجود....ولم يصل الخرطوم بعد
سلامى
لجميع الأعزاء بطرفك
| |
|
|
|
|
|
|
|
|
|
Re: رساله ..من بعيد (Re: عمر ادريس محمد)
|
جاء الأمل ......مات الأمل
وماجيت
ياحماد
القصه دى ما تبقى كده؟
لمتين
فطين حسها اتقرش ....حدثنى الزول الليله ...منزعجه شديد ...فى نص الكلام بقت تسكت, وتعاين فى الفراغ ...غالتو ....وهجت فيه , ولو فى طريقه كان ضاربته....كسرنى الحنين فى صوته.... قلت ليه معليش قول ليها عمر قال ليك حماد فى الطريق ...اتصبرى شويه, وكانت الكلمات زى دموع متيبسه تدخل لاجوه, وتهرد فى الحتات الانت عارفها لما يكون الكلام نى ....كان كلامى نى ياحماد ماعارف انت وين؟ وحاتجى متين .
تذكر مره ابيات شعر ...فى الحقيقه كلام مجانين قالها زول مامتذكره
بلا جموح فى الذكاء
بل
بحسن
نيتى
الى متى اظل معذب .....انا....حكمك كان عليها قاطع وسريع ....ده كلام نى.....الزول زعل واتوهدب واتشاكلنا بعدها ...منهك كنت وما داير تتفاهم ..حاولت اقول ليك عصلجت وقفت لمبه.....يتخايل ليك وقتها اى حديث غير عن الخطه الواقعيه وامكانية تحقيقها للخلاص من العسكر والكيزان ضرب من التسويف
وقمت مشيت
وما جيت راجع لسه
شوف ياحبيب ..عذبتنا ياخ... حتى لو بعدك حصل فى لحظات ملونه بى لون اقرب للاخضر من بين جميع اللوان ..طق العصب المجنون فى الروح ..وماجات سليمه كما هو متوقع ...قلت اقول ليك من بدرى وعاينت ..جاى ...جاى لقيتك جنبى ..بس ماموجود
والله العظيم ياحماد خلى بالك
انت حاتجننى
وبعدها
وينك
يا
ح
م
ا
د
| |
|
|
|
|
|
|
| |
عمر ادريس محمد
امبدويات
Farahat Sayed
خدر
nada ali
فيس بوك
تويتر
انستقرام
يوتيوب
بنتيريست