|
|
 نسوان يخلوك تسلّم عليهن 00 ونسوان مايخلوك تسلّم عليهن !!
|
مرات كده الواحد يقول يحرد
ويعمل ليهو { دقن } طويلة زي بتاعت ناس { دعوني أعيش }
وكمان جلابية قصيرة
ويحرس الجامع
كيتاً على الدنيا دي
لأول مرة أنا وست النفر نسكن في بيت مستقل
طبعاً كنا ساكنين مع الجماعة
مرة مع أمي ومرة مع أمها
كتير من النسوان بيزورن لزوم التهنئة
والبيت طبعاً ايجار
المهم لمن تجي حاجة فاطنة وحاجة كلتوم وحاجة زينب
وكل قبيلة المشلخات
تجيني جارية
تعال { سلّم } علي خالاتك ديل
ومما يزورنها ناس سوزان وجاكلين وتماضر وسوسن ورحيق
عليك امان الله لحد مايطلعن مافي زول ساكت يناديك
تهميش مابعده تهميش
قال خالاتك قال !!!
|
|
 
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: عاصم ابوبكر حامد)
|
أخوي عاصم
انت قالوا ليك نحن بننتظر لحدت مايجن ويسلمن علينا
انا بسلم براااااااااااااي
وبشوت ضفاري
لكن والله مما يكون في اسكيرت وبلوزة حايمات في البيت يشغلوك بأي شيء
ياجابوا ليك كوز ليمون بارد ومعاه الجريدة
يافالوا ليك الرغيف انتهى
المحيرني ناس الجنوب يقولوا ليك مهمشين
وناس دارفور يقولوا مهمشين
وناس الجزيرة مهمشين
اها ان شاء الله يشوفوا التهميش الياباني الأصلي
والله ناس ابوحراز لاعايزين مدارس
ولاعاوزين مستشفيات
عايزين السلام البسيط دا
سلام ناس رشا ومي وسوزي
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: انعام عبد الحفيظ)
|
انعام
Quote: ابو حراز
ما عجبني ليك والله
ست النفر لكن لقيتها غتيتة خلاص |
والله هي جنس غتاته
ماقلتوا عاوزين مساواة
لكن الحكاية مما تجي في السلام على البنيات الصغار بتقرن الفاتحة على المساواة
قال جندريات قال !!!
بحكي ليك قصة طريفة حكتها ست النفر وحصلت بكمبو المحالج الحصاحيصا
واحدة طبعاً بتغير شديد على زوجها
والله انا تمنيت أشوف الزوج البغيرو منو دا
والله شين شناة لمن غلط
المهم في بنات من كمبو المحالج بيمشن المدارس
وزولتنا دي قالت ليهو شفت ياحيوان ما اسمعك يوم ركبت ليك بت وديتها المدرسة
صاحبنا قال ليها والله لو لاقيت الواحدة { ترفس } وعاوزة تموت ما اشتغل بيها
المهم ابن الذين متفق مع البنات انهن ينتظرنه جوار البوابة الكبيرة بتاعت المحالج
وكل يوم يوصل في البنات
والمسكينة ماجايبة خبر
اها لمن قلت لست النفر { تستاهل }
كان نططت ليك عيونها
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: زول ساكت)
|
زول ساكت
| Quote: قاعد اناديك بس انت عامل فيها تقيل |
بس ماتقول لي عاوز تسلّم برضو
كمان المعاكم في السعودية ديل والله عندنهن غيرة غريبة جداً
وكان مشت معاك السودان والله الجامع ماتخليك تمشي ليه
مشيت وين
جيت من وين
اتأخرت مالك
أظرف شيء عندي أخوي الصغير لمن يقيف بكسي بتاع عرس يشيل مني القروش ويمشي هو العرس
مما يقيف بكسي بتاع { بكاء } يجوك يقولوا ليك { لف } العمة وتعال امشي البكاء
علي بالطلاق بقينا بس ناس فاتحة
وست النفر أكثر المستفيدين من هؤلاء الأموات
واي فاتحة مشيناها اقرب واحد للمرحوم تقلده وتبكي
لأني بكون دافع قروش العرس
وقروش البكسي
وقروش الكشف
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: mamkouna)
|
mamkouna
تختلفن مع بعض
وتتشاكلن
وكل واحدة تظعط شعر التانية
وكل واحدة تخربش وش التانية
وتقطعن في بعض
لكن مما تشوفن ليكن { واحدة } معصورة ترفعنها فوووووووووووووق
وبتنسن كل الخلافات
أنا عارف الرجل السوداني صعب جدا المراة تستحمله
لكن بناكلكن { حنك } ساكت
مرة قلت لست النفر في مدينة ايطالية محاصرة ضربت المرأة أروع معاني الوفاء
حيث طلب قائد الحصار أن تخرج النساء
وأن تحمل كل واحدة شيء واحد يكون اغلى ماعندها
فخرجت كل النساء وكانت كل واحدة تحمل زوجها على ظهرها
مارأيك 00 فقالت لي 00 والله مسكينات ومغفلات
يعني الحكاية دي لو حصلت عندنا في السودان
انا عارف ان كل واحدة حاتطلع وهي شايلة معاها { العدة والملايات }
وناس ابوحراز
وابوالقنفذ
وابوالقدح يروحوا فيها
قال فووووووووووووق قال !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: tasneem)
|
| Quote: انا عارف ان كل واحدة حاتطلع وهي شايلة معاها { العدة والملايات } |
اها نعلك عايزنا نشيل الرجال ونخلي الملايات والعدة والسراميس
نلم فيهن بالسنين ونجي نخليهن؟
والله بس ياهو
كنا نخش في صراع الراجل الغرقت بيه المركب
وقال زوجته ممكن يعوضها واولادو ممكن يعوضهم لكن امه ما ممكن تتعوض
كنا حنشيل عدتنا وملاياتنا لانه الرجال على قفا من يشيل......
بطل المسخرة على ست النفر
لانه الاجازة الجاية بجي بديها البوست دا مطبوع..
ونشوف ناس سوزان ديل بتقع بهن وين...
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: bayan)
|
بيان
تعرفي عندنا قريبنا زوجته واقفة ليهو في حلقه
كلما تسمع ليها بخبر بكاء تلفح توبها وتجري
يوم الراجل جاي زهجان من الشغل وفجأة يسمع ليك ان البكسي بتاع الحلة كان ماشي بكاء واتقلب
والناس الفيهو كلهم ماتوا
الراجل مخلوع دخل البيت
كان جات ليك { المدام } مارقة
قام سألها 00 الله ينعلك مامشيتي مع ناس البكاء ؟؟
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
ابوحراز
اها كمان تمشي لي ناس سوزان البيت بتاعهم ما يطلعوا ويسلموا عليك
ولو فيها حبة ظرافة يسلموا عليك ما وره الباب يعني نظام خلف الكواليس وكده
اما ناس الخليج هنا كمان يجرو يدسن منك التقول بعااااتي خشه البيت..
خلي أخلاقك رياضية وأمسك قوي في خالاتك ديل أخير ليك من ناس سوزان.
أسمع الكلام ده من خالك
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: المسافر)
|
المسافر
انت تعرف نسوانا ديل مغشوشات جداً
يعني بصراحة المغتربين كذبة كبيرة
وهن بغيرن على شنو ماعارف
والله نحن زي الاسلحة الكيماوية بتاعت العراق
طلعت فشوش
وهن عارفات اغلب المغتربين مدة صلاحيتهم منتهية
كان بالملح تارة
وكان بالجداد تارة أخرى
ومرات زعلة ساكت تجيب خبرك
قال غيرة قال
هذا الهوس الذي أصاب جيلنا من الرجال
يبدو لي أنه مراهقة متأخرة
ويقول علماء النفس أنها أخطر بكثير من المراهقة الصلية
خاصة وأننا ولدنا في زمن كان من الصعب جداً أن تلتقي بامراة
وتربينا وسط آباء وجدود يحملون عكاكيزهم المضببة 24 ساعة وكأنهم ذاهبون لأم المعارك
انا شخصياً كتبت رسالة في عنفوان مراهقتي
ولم استطع أن اسلمها لصاحبتها لمدة 9 شهور
تتقطع وأعيدها مرة أخرى
خاصة وأن الحبيبة والده جزار
واي خطأ فإن عاقبته ستكون وخيمة ولافرق آنذاك بينك وبين التيس !!!
قال البرتكان نهدك مدردم قال !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: Khaalaleyaal)
|
Khaalaleyaal
| Quote: والله ياحروزة...شكلها كده حماتك دي شافت نص الفلاته الفي السودان والدول المجاورة. |
تعرف لو ما اتزوجت أنصحك نصايح مهمة جداً
أول شيء حكاية النسيبة دي 00 كل مالقيت عروس أمها ميته أتقدم ليها طوالي
ماتتردد
وياريت كمان لو كان ابو العروس اتزوج بعد نهاية الفراش مباشرة
لأنو دي حاتريحك وماحاتقول ليك وديني بيت ناس أبوي
لأنها بتكون بتكره المدام الجديدة موت
واذا دا مااتوفر شوف ليك نسيبة تكون هنية ورضية زي العندي
والله بتحبني أكثر من بنتها
واذا دا برضو ما اتوفر فهناك شيء هام جداً من أجل أن تكون حياتك سعيدة
أول شيء تفكر فيه تكسب حماتك
تسمع كلامها
وتشكر ليها بنتها قدامها
وتقول ليها والله { قهوتك } مظبوته
وبنتك دي مريحاني تمام وقايمة بكل الواجب
لأنك ياسيدي لو كسبت الحماة
تكون كسبت زوجتك
وأخوانها وأخواتها وخالاتها وعماتها وحتى أمك وناس الفريق كلهم
وبرضو بتكون كسبت ابو القدح
ماتعمل فيها راجل شرقي وتجي تقول تكسب نسيبك أول والله تروح فيها !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
Quote: أول شيء حكاية النسيبة دي 00 كل مالقيت عروس أمها ميته أتقدم ليها طوالي
ماتتردد
|
كان كده انا فاهم الشغلانة غلط قالو النسيبة بدلع العريس اكتر من العروس
ومن الصباح تشدشد فى الكبد والكلاوى والذى منو...حسى كان الواحد اتزوج
واحده امها لحقت امات طه البدلعو منو؟؟؟؟؟ البنت الزمن ديل غير الاكل السفرى
بعرفو شنو؟؟؟؟؟؟؟
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: waleed500)
|
وليد 500
انت لسه بتتحاوم بي هنا
الظاهر عليك ماعرست لسه
عامل فيها بتحب ليك واحدة من ناس سودانيز أون لاين
والله هوي مايغشنك
الواحدة تلقاها بتحب غيرك 26
مرة واحدة شابكاني بحبك بحبك
وكان عازمني ود الجزيرة في فندق كونتننتال
والله اشوف ليك زولتي هديك أون لاين مع ود الجزيرة
وحب وكلمات معسولة
الغريب نفس الكلمات الكنت بكتبها ليها قاعدة ترسلها لود الجزيرة
والله في الآخر ولا اتعشيت ولايحزنون
كمان شوف ليك كذب
قالت لي في اليوم التاني والله ام بارح مانمت نهائي
كنت في انتظارك
قال في انتظارك قال !!!
شوف ليك واحدة { أتلم } عليها
العرس جميل جدا 00 وحاتعرف ان نص عمرك ضائع
ثلاثة انواع من النساء لو اتزوجتهن قيامتك بتقوم
لكن ما حا اقول ليك على الهواء مباشرة !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: وضاحة)
|
وضاحة
| Quote: شكلك عينك طايرة وقلبك رهيف وست النفر ناقشاك |
قال طايرة قال
والله العين تقول لفوها بشريط لاصق
ولابنقدر نرفعها فوق
والقليب بعد الغربة والله اصبح زي الفريزر برود مابعده برود
بعدين السؤال : نحن لمن يجونا رجال زايرين كان شباب وللا مدة صلاحيتهم منتهية
طوالي بنقول للمدام أمشي سلمي على الجماعة ديل
انتن ياكافي البلاء تسلمن وتسألن وتهازرن وتضحكن
وعايزاتننا نحن لمن نجي نسلم لازم الواحد يتوضأ ويقرأ الاخلاص والمعوذتين
تخريمة :
كان الطلاق تركوا أمره للنساء
والله أحلف انو 90% من الرجال السودانيين يلقوا نفسهم في الشارع
يعني نحن شوية أحسن
ممكن تمرق نص الليل بالجلابية والعراقي
لكن قالوا جماعتنا في أمريكا وكندا لمن الواحد يطردوه يطلع بالبطانية نص الليل
نسيبتي الغريبة مابترضى الحقارة للرجال
لمن تشوف ليها راجل { أضينة } تقول ليك 00 ها 00 والله دا غفير باب سااااااااااااي
عندنا واحد قريبنا بيعمل في مجلس الوزراء
والله يومي بيغسل ملابسه وملابس زوجته والأطفال
أنا بغتاظ منه لأني مرات أزوره في البيت
يقوم يقول لي { عليك الله ناولني الملاية دي عشان أديها { دعكة } تانية
قال دعكة قال
أها زي الحيوان دا مفروض يجضموه
تجضمني قال 00 والله كان أعضيها !!!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: sharnobi)
|
شرنوبي
مشتاقين والله
قابلت واحد في السودان اسمه شرنوبي
قلت ليهو انت زولنا بتاع سودانيز أون لاين ؟؟
قال لي لا 00 والله أنا سمسار
أها كأني ضربتني صاعقة
مسكت جلابيتي في خشمي وقمت جاري صووووووووووووووف
مسئول من الخير ان شاء الله تكون اتزوجت ؟؟
شايف واحدة فاتحة بوست عن الرجال العوانس
وكمان قال شنو { راجل الخمسين }
قل لها ما احلى الزواج بعد الخمسين !!!
جدي تزوج وعمره 80 سنة
وعروسه كانت اليوم كله تضحك
وعندما نسألها جدو كيف ؟؟
تبتسم بعمق وتقول آآآآآآآآآآآآآآه
يعني معناها مبسوطة !!!
قال بت العشرين قال !!!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: sharnobi)
|
شرنوبي
Quote: يا زول لزوم الفضيحة
شنو
خليها فى سرك
ما نحن زملاء |
عاد أنا قدرك ؟؟؟
قال زملاء قال
واحد صاحبي مغرم بالزواج الثاني وأصر أن يتزوج
هذا الحديث في اجازتي 00 والغريب أن زوجته بتتحداه
وبتقول الزول دا ماحايعرس لأني عارفاهو كويس وعارفه أدق أسراره
يوم الراجل عملها ودخلني في حتة ضيقة جداً
وقال لازم أوصل عروسه الكوفير والاستديو وأحضر معاهم الحفلة
سألته قدام العروس { يازول انت بتقدر على العرس وللا حركات منك }
ابتسمت العروس على مضض
يازول مشينا الكوفير والاستديو والحفلة
وشهر العسل كان محلي
مشيت الصباح عندي كاميرا وقلت ندي الجماعة فرصة ونمشي ليهم بعد الساعة 11 صباحا
القى ليك العريس متمحن وقاعد في الكرسي
يازول خير ؟؟
قال : والله العروس شردت البارح بالليل !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: إسحاق بله الأمين)
|
أخي اسحق
يعني دي شوية احسن من زولتنا العانس وجاها عريس 95 سنة
قالت لي العريس كيف ؟؟
قلت ليها والله بصراحة لو عاوزة تعرسي الزول دا لازم تكوني بتعرفي غسل الجنازة !!!
وكلامنا ماوقع واطة
عليك امان الله زولتنا نفسها بعد اسبوعين مشت تعزي في صاحبك
يعني لو عرستو كان نرفع صيوان العرس من هنا
والجماعة يركبوا صيوان العزاء من هنا
هسي عرسها واحد { نص مكنة }
والله الليل كله { يكح }
والظاهر زولتنا ما اظنها مارقة من غسل الجنازة
تلفوني 0507063205 تلفونك ضاع مابين فداسي وودربيعة
ولي عودة لهذه القرية الوادعة التي زرتها على حين غفلة من أهلها
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: maia)
|
مايا
حلوة دي 00 كمان قال نانسي عجرم
هيفاء وهبي
أليسا
فيفي عبدو
Quote: يعني لو جوكم زيارة نوعية ناس نانسي عجرم وهيفاء وهبي
انت حيختوك في بيت الاشباح !!! |
سألتني مرة ماهي فنانتك المفضلة ؟؟
قلت لها : أنا أستمع كثيراً لملكة الغناء اللبناني فيروز
وأموت حينما أستمع لوصيفتها الأولى !!!
فقالت لي : وصيفتها دي منو :
قلت لها : بالطبع صاحبة كلمات والجريدة وكن صديقي وطوق الياسمين
الرائعة حد الدهشة : ماجدة الرومي
ومنذ ذلك اليوم أصبح تلفزيوننا في البيت على خصام مع ماجدة
كلما تأتي ونكون سوياً يبدأ الريموت في فعلته
ونجد أنفسنا فجأة بقدرة قادر مع توم وجيري
وبرضو الواحد هنا بيضحك شوية
مرات يشطح الريموت حتى يصل بك لفضائيات البعارين كما يسمونها !!!
لهذا لابد أن تقول أنا أكره اليسا ونانسي وهيفاء
حتى لايلحقن امات طه !!!!
قال زيارة نوعية قال !!!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: رهف)
|
رهف
| Quote: برى منكم يارجال الزمن دا الواحد عينه اباتشى مش طايرة ليها حق ست النفر بعد شوية ناس خالتى كلتوم ديل ذاتهم بكون عندك فيهم راى |
حتى ناس كلتووووووووووووووم !!!!
والله عاد لو دا حصل نقول بس سجمنا
ونمشي طوالي نحرس الجامع ونحضر محاضرات ناس ابن تيمية وابوحنيفة
نحن والله ياجماعة أخذنا عقابنا بمايكفي في الدنيا والآخرة
قرينا كلية الزراعة ابوحراز وكانت مذكر
وقرينا في كلية الاعلام برضو كلها مذكر
نسوي شنو ياجماعة أكثر من كده
يعني الواحد يكون السنة كلها على وضوء !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: محجوب البيلي)
|
البيلي
Quote: قال
Quote: Single
قال |
ياخي ديل في السودان مما تقول للواحدة أنا متزوج تقوم جارية منك صوف
يعني مالنا نحن مدة صلاحيتنا منتهية ؟؟؟
كدي يادكتورة شوفي لي قلبي دا مايكون فيهو خشخشة
دي واحدة قريبتنا اتزوج راجلها عليها
وشعرت بي دقات قلبها زايدة بعد ماجاب زوجها العروس الجديدة من الفندق
اها كانت عندنا دكتورة مابتقدر تعاين ليها أكثر من مرتين من جمالها
وزولتنا دي مشت ليها
الغريب انها هي الخطبت لي راجلها
وعاملة فيها انو الزواج التاني ما بيأثر عليها
والله يوم العرس كانت قايمة بكل الواجب
وضربت مثال للمراة المثالية القوية الواثقة من نفسها
وكمان شنو قال { اشترت هي فستان الزفاف هدية من عندها
ورقصت مع العروس في الحفلة
والله الناس كلهم كانوا مبسوطين منها
اها بكرة العريس وعروسه فطروا وجابوا ليهم البكسي عشان الفندق
كان زولتك دي { اتوهطت } في الكرسي
وقالت الا يسوقوها هي الفندق !!! ويخلوا العروس الجديدة
قدر مامسكنا فيها ياخالة انتي من امس صابرة وقمتي بكل الواجب
مالك عاوزة تطبزيها
قالت والله كان جاء عمر البشير ما أنزل من هنا
قلنا ليها ساعة الحكاية جابت ليها عمر البشير والله دا شيء مابنقدر عليه
وبرضو الواحدة تقول لي راجلها عرس ساي كان عاوز تعرس
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: محمد الطيب حسن)
|
محمد الطيب
مرة فعلاً زارتنا واحدة حنكوشة
وصاحبك توووووووووووووووش جاء داخل
المهم هذا يدخل في باب { السلام بالصدفة المحضة }
طبعاً السلام كان بصيغة غريبة جداً { هاي عثمان } !!!
غايتو شوف عيني دي جابو ليها الشاي بااااااااااااارد
عشان تكرطعوا وتتوكل
وأنا عليك امان الله قالوا لي البت الصغيرة عيانة ولازم هسي تجيب الدواء من الصيدلية
والبنية والله تلعب وتضحك وتجري ومشت معاي للصيدلية كمان
والدواء مدته انتهت وماضاقت منو ولا ملعقة
اها مافي طريقة تسأل تقول الضيوف وين ؟؟
لكن براها ست النفر قالت لي والله البت دي تتكلم عديل مما تشوف ليها راجل تقوم تلوي لسسانها وتقلب عينيها !!!!
قال مضاد حيوي قال !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
ابوحراز سلام متين الجيه، حمدلله على السلامة بنياتك والاسرة الكريمة كيف حالهم، بت عمنا جزاها الله خير عارفك تمام . زمان لو تذكر وفى لحظة( طلاشة منى) وعدتك بزمليتى فى الدراسة التى اصبحت وزيرة فى احد الولايات ، طبعا الزولة ما صدقت وطالبت برقم تلفونك حتى تخطبك مباشرة ، وعملت لك قصيدة مطلعها
ابوحراز يا فنان 00000 يا مكسر النسوان ،الى ان تقول 000 شارياك شارياك 0000 يا الله متين القاك ، المهم انى خشيت عليها من الصدمة وصرت اتهرب منها الا ان اتصالا منها مساء اليوم قالت فيه ، المشتهى الحنطير يطير( حاشاك من الكلام ) طبعا ده كلام زعل منها ساكت، وقالت زولك طلع عينو زايغة ، وعندى ضيوفى من بنات جنسى وفيلتى كبيرة الزول اراقبو كيف ، خاصة وانها تقيم مع خادمات من بلدين ممن اشتهر بناتها بالحلاوة والملاحة المهم الوزيرة رفضت. اهى خلنى اقوم اعمل ساتر لانو جاراتنا اللبنانيات فى زياره لام محمد، طبعا السمع بس يكفى عن السلام .
| |
|
|
|
|
|
|
|
|
 Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: هجو الأقرع)
|
والله اتذكرت أيام الجامعة قاعدين لمة بنات وقاعد معنا زملينا مهترش في كنبة واحدة قامت جات زولة من بنات السعودية عاملة ما بتصافح سلمت علينا كلنا ولمن وصلته هو مادي ليها يده احرجته زي الترتيب وطبعا دي ما المرة الاولى اها فلان اتحرق شديد قال ليها ياهناية: الله زاتو قال ما تحكوها معاي عشان ما احكها معاكم
تحياتي أبوحراز
والمنبر مفرهد بعودتك
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: نهال الطيب)
|
الأخت نهال
| Quote: والله اتذكرت أيام الجامعة قاعدين لمة بنات وقاعد معنا زملينا مهترش في كنبة واحدة قامت جات زولة من بنات السعودية عاملة ما بتصافح سلمت علينا كلنا ولمن وصلته هو مادي ليها يده احرجته زي الترتيب وطبعا دي ما المرة الاولى اها فلان اتحرق شديد قال ليها ياهناية: الله زاتو قال ما تحكوها معاي عشان ما احكها معاكم |
الراجل جاب ليهو حديث شريف من إنتاجه الخاص
والله لكن دي زعلة بطالة جداً
مفروض الواحدة لو ماعاوزة تسلم تكتب ليها لوحة صغيرة تعلقها على صدرها
زي عبارة { مذبوح على الطريقة الاسلامية }
لكن السودانيين بطبعهم عندهم الحنية
والواحد عاوز يسلم بأي طريقة
والمشكلة زي ماقالت واحدة أختنا بعد مايسلم عليك يقول ليك أخبارك الخاصة شنو
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: هجو الأقرع)
|
أخي هجو تحياتي وطبعاً الجوال اتسرق وضاعت الأرقام
تذكر طبعاً واحد اخونا من أهل العوض اتزوج في العمارات
لأنو ولده اتزوج بنت المرأة نفسها
وبعدين الولد لمن ابوه قال ليهو ياولدي أنا عاوز اتزوج أم زوجتك دي
الولد دخل في اضافرينو وقال ليها يابا 00 لكن أمي 000!!!
قال ليهو أمك تطير في السماء
هو برا امك دي الغتس حجرنا شنو ؟؟؟
والله ابن أختي الذي تركت ريالته سايلة تزوج محامية شهيرة وغنية جداً
كان يحمل لها شنطتها
اليوم عريس لهذا المراة
والله العظيم كلما اعاين فيهو أقول { أشهد ألا اله الا الله وان محمداً رسول الله }
تغيرت حياته تماماً الآن
وقبل فترة رأيته في سهرة تلفزيونية بجوار المدام
والغريب مازال يحمل الشنطة حتى يومنا هذا
ولكن يركب معها في سيارتها الفارهة
وعندما يقابلني يرفع لي يده من خلف الزجاج
وكأنه يقول لي { كيتاً عليك ياخالي }
الوزيرة دي ماعندي معاها اي مشكلة
بس أهم شيء زياراتها تكون بسيطة خاصة بالليل
ماتقوم فجأة تقول لي الجماعة عندهم تهليل !!!
لك تحياتي 00 ياجماعة ماترجعوا السودان 00 البلد جميلة والله
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: Gafar Bashir)
|
أخونا جعفر
Quote: عايزين السلام البسيط دا
----
القال ليك منو بسيط
مانديلا اتسجن 28 سنة
د.جون قرنق حارب اكتر من عشرين سنة ... عشان السلام
وحركات دارفور بتحارب لحد هسي
خلي الجرسة وواصل كفاحك لسة الطريق طويييييييييل |
يعني بالله معناها نحن بنجاهد وماعارفين
تاريني زمان مفتكر البجاهد الا يقول { هي لله هي لله }
والله ان كيدهن عظيم
عاوزات بالطريقة دي يدخلننا الجنة !!!
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
Quote: كان بالملح تارة
وكان بالجداد تارة أخرى
ومرات زعلة ساكت تجيب خبرك |
حاولت طوال الأيام الخمسة الماضية أن أفهم هذا المقطع ... ولم أفهم
استعرضت كل معلوماتي في الكيمياء والأحياء وحساب المثلثات... و"سمير التلميذ"، لأصل إلى العلاقة بين "الملح" و"الجداد" و"الزعل"... فلم أصل.
إلى أن غادرت السودان، كان الملح في الملاحة ... أو في الملاحات.
وكان الجداد في القفص ... أو في الشوّايات
وكان الزعل مرفوعاً ... والأعمال بالنيّات
محجوب يريد أن يعرف *
------------------
* مشروع بوست مستقبلي. حتى لا ينط واحد ويسطو على الاسم 
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: Manar Mahsoub)
|
Manar Mahsoub
والله الزواج جميل جداً
ورائع
ولحظاتو مابتتنسي
والانسان مابيشعر بقيمته الحقيقية الا لمن يكون متزوج
وأهم شيء زوجته تكون معاه
يبثها همومو وتبثو همومها
ويعيشوا في عالم رومانسي
خالي من الكلوسترول
والميتافيزيقية
والكلام المعقد الكثير البنسمعوا كل يوم
{ الكلمة الفوق دي بحاول من سنتين عشان اقدر أنطقها
وتاني في مدينة أمريكية فيها أختنا تماضر شيخ الدين
برضو قدر ماحاولت أنطقها ماقدرت كلها كده { سينات وشينات }
الزواج هو : زوجة بسيطة وزوج بسيط يعيشوا في عالمهم الساحر
لكن مايعاب على الزواج
أنه تتخلله جرعات غيرة زائدة ودي بتغطي على بهارات الزواج الجميلة
قال همبرقر قال !!!
ديل معناها ناس اسكيرت وبلوزة
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: Manar Mahsoub)
|
ياجماعة نعمل شنو
كان قعدت تسلم عليها اليوم كله
تقول ليك كرهتنا العيشة ياخي
وكان حرستها اليوم كله تقول ليك بس زي كديسة الخلاء
كلما يمرقوك بره البيت نلقاك جيت راجع بي سرعة
وكان مشيت بره واتأخرت يقولوا ليك :
{ بس تهرب من البيت تقول فيهو اشباح }
وكان قعدت في الصالون وماجيت اتكلمت 00
يقلوا ليك مالك الليلة مادي بوزك زي أم سيسي !!
وكان في بنات وجيت سلمت عليهن الرماد كال حماد
يقولوا ليك بس مما تشوف ليك طرف بلوزة تقوم وتقع
وتدخل وتمرق بدون شغلة
أها ياجماعة نلبد تحت السرير وللا نسوي شنو ؟؟
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
Quote: قبل فترة جيت داخل البيت وأنا مبسوط
كان في المدام وأمها 00
قلت ليهم والله الليلة قابلت واحد لذيذ جداً اسمو { الحوري }
واتونسنا مع بعض
وعازمني بكرة أتغدى معاه في بيته
بالله بعد شوية البيت كلو سكت ساااااااااااااي
وأشوف ليك الناس دي كلها { محمرة } فيني
ياجماعة الحاصل شنو ؟؟
بالله كان أسمع ليك كلهم
الحوري دا تاني ماتباريهووووووووووووو
والله احترت وقلت ليهم مالو الراجل دا ياجماعة
حرامييييييييييي ؟؟
قالوا لا 00
كوووووووووووووووووز ؟؟؟
قالوا لا 00
أنصار سنة ؟؟؟؟؟؟؟؟؟؟؟
قالوا لا 00
جنجويد ؟؟
قالوا لا 00
أها مالو 00 جريمتو شنو ؟؟
قام قالوا 00 ياخي دا معرس اربعة !!!!!!
سبحان الله له في خلقه شئون
عشان كدا ابن الذين كان مبسووووووووووووط !!!
علي بالطلاق الغداء مامشينا ليهو
قال { لفقت } معاك قال !!! |
ابو حراز اخوي والله الحال من بعضو يعني كلامك ده صورة متكررة لمعظم الرجال وانا واحد منهم
وهاك دي ....
يوم الخميس كان عندنا موعد في سفارة الرياض مع سعادة القنصل أحمد يوسف والمناسبة كانت فترة
إعداد لتكريم الفنان القامة عثمان حسين والحمد لله بحكم عملي في وزارة الخارجية السعودية تمكنت
من عمل التأشيرات لكل من عثمان حسين وذوالنون بشري والفنان الشاب فيصل الصحافة ’ ما علينا
المهم في الموضوع جيت من العمل يوم الخميس بدري لان الوزارة لا تعمل يوم الخميس وعلي طول دخلت
الحمام الله يكرمكم وغيرت ملابس العمل ولبست جلابية وعمامة وشال كل ده ومرتي تتفرج في التلفزيون
شوية كده إنتبهت لي وقالت لي علي وين إنشاء الله قلت ليها الله إنتي نسيتي مش كلمتك قبل كده وقلت
ليك يوم الخميس عندنا موعد في السفارة أنا وأمير الجمري وعادل جبارة وسيف علي البشير , عشان
موضوع التكريم بتاع عثمان حسين , قالت لي ايوه ايوة إتذكرته وخلاص وانا ماشي علي باب الشقة
عشان أطلع إلا وأشوف ليك المرة جارية من هناك واتشبحت لي علي باب الشارع !! يا مرة مالك في شنو؟؟
قالت لي والله طلوع ليك مافي .. ليه يا شيخة في شنو ؟؟ قالت لي الليلة يا خوي الخميس يعني السفارة
يوم الخميس كل شغلها ( عقد الزواج ) وشكلك كده بصراحة ما عاجبني أظنك ماشي تعملها وتتزوج علي
أتزوج عليك بالله ده كلام ؟؟ أقول ليك ماشي معاي فلان وفلان , عارفة هو فلان وفلان ديل موش أصحابك
أظنهم هم ديل شهودك تخيل يا ابو حراز اخوي الفكاني منها شنو ؟؟ قالت لي خلاص ولدك
لازم يمشي معاك ! طيب يعني الولد ماشي يمنعني !! يا شيخة حرام عليك خلاص أنا بخليهو يمشي معاي
وأخيراً فتح باب الشفقة قصدي باب الشقة , تقول لي صاحبك متزوج اربعة نسوان !!!!؟؟؟؟؟؟
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: هاشم أحمد خلف الله)
|
هاشم أحمد خلف الله
Quote: ومرتي تتفرج في التلفزيون
شوية كده إنتبهت لي وقالت لي علي وين إنشاء الله قلت ليها الله إنتي نسيتي مش كلمتك قبل كده وقلت
ليك يوم الخميس عندنا موعد في السفارة أنا وأمير الجمري وعادل جبارة وسيف علي البشير , عشان
موضوع التكريم بتاع عثمان حسين , قالت لي ايوه ايوة إتذكرته وخلاص وانا ماشي علي باب الشقة
عشان أطلع إلا وأشوف ليك المرة جارية من هناك واتشبحت لي علي باب الشارع !! يا مرة مالك في شنو؟؟
قالت لي والله طلوع ليك مافي .. ليه يا شيخة في شنو ؟؟ قالت لي الليلة يا خوي الخميس يعني السفارة
يوم الخميس كل شغلها ( عقد الزواج ) وشكلك كده بصراحة ما عاجبني أظنك ماشي تعملها وتتزوج علي
أتزوج عليك بالله ده كلام ؟؟ أقول ليك ماشي معاي فلان وفلان , عارفة هو فلان وفلان ديل موش أصحابك
أظنهم هم ديل شهودك تخيل يا ابو حراز اخوي الفكاني منها شنو ؟؟ قالت لي خلاص ولدك
لازم يمشي معاك ! طيب يعني الولد ماشي يمنعني !! يا شيخة حرام عليك خلاص أنا بخليهو يمشي معاي
وأخيراً فتح باب الشفقة قصدي باب الشقة , تقول لي صاحبك متزوج اربعة نسوان !!!!؟؟؟؟؟؟
|
ياخي دي منجضاك نجاض عيش الريف !!!!!
انت الصدق ليك شنو ؟؟؟
كان تقول ليها ماشا اشيل الفاتحة في المرحوم حاج أحمد ود ام خير
في واحد صاحبنا برضو كان زي حلاتك كده
والمدام واقفة ليهو في حلقه
وعنده صاحبه عازمو حفلة كاربة
أها قال للمدام والله صاحبي عمتو ماتت
ونحن مسافرين { الحلة بتبعد 5 كيلو }
لكن بت الذين دي عندها خبر من بدري إنو ابو القدح معزوم على حفلة
بيني وبينك النسوان مرات عندهن الحاسة العاشرة
وزيادة في التمويه
بعد لبس العمة جاء راجع
قال شنو قال 00 نسى قروش { الكشف بتاع الفراش }
وصاحبتنا دي بعد ساعتين لفحت توبها ومشت وراه
أها عديل مشت لي ناس الحفلة
ولقت ليك صاحبنا دا يرقص بمزاج
نادوه ليك بره الحفلة وطاااااااااااااااااخ !!!
قالت ليه ياحيوان فاتحة شنو البيرقصو فيها !!!
قدامي 0000
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: صديق الموج)
|
صديق الموج 00 الله يجازيك ضحكت معك بعمق
انت ياأخوي من زمن الوسخ وباقي العيش والبامية المفروكة
عليك امان الله عيشة واحدة مابتفضل عشان يرموها في الزبالة
وناس النفايات نديهم قروش وماقاعدين نديهم نفايات
والله فعلاً نادوني للببسي
لكن وقفت لينا في خشم الباب
وبعد جينا من البقالة تقول داخله عليهم دبابة
مشت كاسحة الألغام { ست النفر } ونضفت الطريق من اي شيء
لاخلت ليها بلوزة حايمة ولا اسكيرتي طائر !!!
وبعديها قالوا الصالون جاهز
ولو عاوز تمشي النادي بدري برضو مامشكلة
ونبهوني برضو انو نادي النيل الحصاحيصا الليلة لاعب مع الشبيبة الحصاحيصا
والله قلت ليها بعد كدا حقو تقري لينا النشرة الجوية !!!
تعرف انت من قبيلة { المنتهية صلاحيتهم }
أنا عارف نوعك دا لو جو ناس سوزان وجاكلين بخلوكم تحرسوهم !!!
قال تمبس قال !!! ان شاء الله صاحبك دا يكون عرس وجضيماتو نزلن شوية
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
Quote: تعرف انت من قبيلة { المنتهية صلاحيتهم }
أنا عارف نوعك دا لو جو ناس سوزان وجاكلين بخلوكم تحرسوهم !!! |
والله يا ابوحراز كلامك صاح وانا لاحظت كده فى الاجازة الفاتت كان عندنا بنية جيرانا كده
زمان الحفلة الما بجى فيها انا هى ما بتمشيها زاتو، المرة دى وحاتك قاعد انا وعندهم
كان بارتى يشهد الله ما عزمونى كلموا اخوانى واخواتى الصغار وسمع اضانى واحده
قالت لى اختى صديق نجيب ليه عشاه هنا وبحرس البيت...وحاتك العبرة لامن خنقتنى
وقد كان...لكن قايلنى اكلتو..انمعست فول،جماعتك لقو الصحن جنبى الصباح قالوا لى مااتعشيت
ليه؟ قلت ليها كنت تعبان نمت وانا يبقى لى زاد عينى للصباح ما لاقت...بعد كم يوم
جونى الشفع يتجارو قالوا لى عم عبد الله مات ...اول زول كلمونى انا التقول انا ود المرحوم
وكمان قالوا لى جيب معاك الكفن وقد كان باقى اخوى امين مال الجمعية والكفنه كفانا
الله واياكم لبستن (مع انو مافى طريقة)..قاعدات فى بيتنا..
والمرة التانية رسل لى زوج خالتى لى عقد بتو ومشيت وحضرنا العقد ويوم العرس وكان
فى دار الصيادلة جو شالو عربتى قالو يجيبو العروس وقد كان ووحاتك لما جونى راجعين
ووصلنا النادى عوضى رجعت امى وخالتى ومعاهن مرتين بيت العرس قلت يا ولد ميزان
حسناتك وكفى كسبت عفو امك واجر خالاتك..وتانى يوم عندهم صبحية بدت الساعة خمسه
مساء فى البيت واتا فى الصالون قالوا لى تعال نقط للفنانة وفعلت ما امرت..ما وقفت
بعد النقطة دقيقتين امى قالت عندها ود احويا ليها حصل ليه حادث ومشينا
شفنا الولد ورجعنا قالو لى عربيتك النرجع الفنانه وشالوها يعنى عربية وبنزبن وخمسين الف.
شفت يا ابو حراز البقت علينا انعل ابو اخلاق الكبر زاتو ..حاجة تافهة خلاس.
بعدين الظريفة يوم جانى ولدى وهو فى الجامعة هناك وانا فى الصالون لقطوا
الكراسى وصلحوهن فى شنو ياجماعة؟ولدى قال لى عندنا بارتى لى صاحبنا ماشى يقرا
فى الهند وجميل لو حضرت معانا يا بابا لكن من طريقة حلاقة شعرهم وتسريحة البنيات
المعاهم والشريط الشغلوه عرفتها ليك دى مادعوة عشان احضر ..انا ما نجيض معناها
يا معولق شوف ليك حته اترمى فيها عاوزين نعمل بارتى فى الحتة ...
قال وجميل يابابا كان حضرت معانا ووحاتك البتغنى ديانا حداد والا كاظم الساهر ما عارف
وانا غير اساميهم دى حرم بغنو العوبه والا الدنيا ما دوامة ما عارفه يجازى محنكم
يا شفع...
المهم ابوحراز يااخوى نحن السابقون وانتم اللاحقون استوا خلفنا يرحمكم الله،،،
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: صديق الموج)
|
صديق الموج
| Quote: المهم ابوحراز يااخوى نحن السابقون وانتم اللاحقون استوا خلفنا يرحمكم الله،،، |
والله العظيم دا تهميش غريب جداً
انا لو في محلك بشوف اقرب غابة وبتمرد فيها
اسوأ شيء في هذه الدنيا أن يهمشوك وأنت في ريعان شبابك
وبيني وبينك دا تهشيم مش تهميش
يازول أقول ليك حاجة
انعل ابو الدنيا دي
أعمل ليك سبحة كبيرة
وخلينا نستوي خلفك
انتو ياكن بعد كده ناس جامع سااااااااااااااكت
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
أبوحراز كيفنك
كان في مرة عجوز لامن مكرمشة قام راجله عرس فوقه، وبعد سبعة أيام جاها مبسوط راكب "حمارو" (مع عدم المؤاخذة) وريحة الدلكة ما تديك الدرب، بس مما شمت ليك الريحة، النار انطلقت فيها، وبدون ما تشعر قامت ماسكه ليك سرج الحمار وقعدت تهز فيهو بقوة وماعارف القوة دي جاته من وين، (الغيرة دي كلامه تاني)، وتقوم ترميهو ليك وتكسر ليك مخروقتو وما خلتو اتهنأ بمرتو الجديدة، شفت جنس الحسادة دي ياخوي ، وبعد ده كلو قلبه ما برد عليهو وقامت قالت ليهو ما بتخجل ، جاييني منها مكحل وكمان مدلك، ادلكوك بالقطران. والمره يا ابحراز أخوي كان بلغت التسعين مابترضى اجيبو ليها ضرة
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: إسحاق بله الأمين)
|
[Bأخي اسحق
تعرف أنا في الأول فهمت انها كسرت مخروقة { الحمار }
لكن فهمت أخيراً انو العريس هو الذي تبهدل مثل هذه البهدلة
والله فعلاً عندهن غيرة مبالغ فيهاأحياناً كثيرة تصل لدرجة المرض
والمشكلة الراجل نفسه تلقاهو مايساوي اي شيء ويغيرن عليه
لدرجة انه يصدق انه مازال في ريعان شبابه
بس المشكلة الماقادر افهمها حتى الآن
اي واحدة قريبتنا زوجها اتوفى بقت مابتسمع كويس
ماعارف { الطرش } دا علاقته بالموت شنو ؟؟
عشان كده أنا اصبحت تلقائيا
كلما اقابل واحدة من قريباتنا زوجها متوفي برفع صوتي
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
أها النوع الشين وقاهر دا لو قابلتو في الطريق وسلمت عليه
الله قال بي قولك لو ما جيت البيت وقلت أنا قابلت فلانة وسلمت عليها
دا نوع كاتلو الشمار
طوالي تجي في البيت وتقابل ست النفر
ابوكم سلم علي
أبوكم قال لي وقال وقال
أبوكم والله وقف معانا وشالني معاه
وحكايات لا ليها أول ولا ليها آخر
وإنت بس تنتظر الراجياك
اعصار غونو بعد منتصف الليل يجيك ويقضي على اليابس والخضر
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
حتى نهايتي من كتابة هذا البوست كنت أتوقع أن الرجال فقط هم المضفورين في موضوع السلام على الجنس اللطيف
لكن لم يخطر ببالي أبداً أن هناك نساء مضفورات وممغوسات لدرجة الاستفراغ
فقد حكت لي احداهن يوم أمس وهي إمراة شابة وملتزمة نص كم
قالت لي أن زوجها ما إن يرى طرف توب سوداني الا ويسلم عليه
والغريب لو شاف ناس الاسكيرت والبلوزة
لايهدأ له بال لو لم يسلم ويقتحم غرفة النسوان
والغريب أنها لاتسلم نهائياً على الرجال الا المحرمين منهم
وتحدثت معه كثيراً في هذه الظاهرة ولكن لاحياة لمن تنادي
وتقول أنها تحبه بعمق
وفي الوقت نفسه لاتحب أن يسلم على اي إمراة غيرها
لكن الراجل ماشاء الله متمرد لدرجة ماطبيعية
وتخشى أن يكون مصاباً بمرض نفسي
خاصة وأن له تجربة نفسية سابقة عندما كان في أوج مراهقته
حيث كان يسرق الملابس النسائية من { سلكة الملابس }
وقلت لها بالنسبة للأخيرة فهذه علاجها ساهل جداً
وحتى يتكافى الناس شر هذا الرجل على المراة أن تضع الملابس النسائية تحت الملابس الرجالية
وبالتالي تقطع عليه الطريق ويهرب حينما يرى سراولاً ذكورياً يتمدد بكل سماحته على الأرض
ياسبحان الله
والله لم أكن أتوقع أن هناك نساء مقهورات لهذه الدرجة
الله يحفظ ناس ابوحراز
| |
|
|
|
|
|
|
|
|
 Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
Quote: أها النوع الشين وقاهر دا لو قابلتو في الطريق وسلمت عليه
الله قال بي قولك لو ما جيت البيت وقلت أنا قابلت فلانة وسلمت عليها
دا نوع كاتلو الشمار
طوالي تجي في البيت وتقابل ست النفر
ابوكم سلم علي
أبوكم قال لي وقال وقال
أبوكم والله وقف معانا وشالني معاه
وحكايات لا ليها أول ولا ليها آخر
وإنت بس تنتظر الراجياك
اعصار غونو بعد منتصف الليل يجيك ويقضي على اليابس والخضر |
ضحكة من الاعماق .. متابعه واستجمام ابو حراز ..تسلم
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: هند محمد)
|
شكراًهند محمد على المشاركة
اتمنى أن يكون هذا البوست قد خفف كثيراً على الجميع
وأعرف أن كثير من المتزوجين قد خفف عليهم معاناتهم
وبعضهم معنا هنا بالبورد
ولكن الجماعة خايفين
وتحت تحت ارسلوا رسائل عن طريق المسنجر
والله كلهم شواطين
تشوف الواحد هنا في سودانيز تقول القبة فيها فكي
لكن خلف السواهي دواهي
واحد فيهم قال والله مرتو واقفة ليهو في حلقو
ومكراهو العيشة
لكن خايف منها
وخايف أكثر من أمها { أمها من النوع القاهر }
وزوجتو بتستمد قوتها من أمها الشينة دي
غايتو قلت ليهم أي واحد فيكم يتزوج ليهو واحدة امها { حية } الا يكون غلطان !!!
مفروض الواحد يخليها بعد تفطس وبعد داك يعرس باطمئنان
قال النسيبة السودانية مسكينة قال
| |
|
|
|
|
|
|
|
|
|
Re: نسوان يخلوك تسلّم عليهن 00 ونسوان مايخلوك تسلّم عليهن !! (Re: ابوحراز)
|
| Quote: قال النسيبة السودانية مسكينة قال |
وقبل أن يجف مداد هذه العبارة الأخيرة
يدخل أحد الأصدقاء الى مكتبي ساخطاً
والغريب أنه أتاني قبل أسبوع من أجل التوسط لتمديد الزيارة لنسيبته
وبالفعل تم ذلك بعد صعوبة لأنها استهلكت كل التمديدات المطلوبة
الرجل يحب زوجته بعمق
وهي تحبه أكثر
تمدد كما ذكر على سريره وطلب كوب ماء من زوجته
وذهبت الزوجة بكل الود من أجل أن تسقي زوجها ماءً
ولكن الأم المتسلطة قالت له ابنتي حامل وليس هي لجلب الماء
قالتها بالطريقة السودانية { بتي مابتاعت مراسيل }
وقام أخونا لحظتها بكسر كباية الماء والخروج من المنزل !!!
بالله عليكم الله النسيبة دي مش شايته ضفاري !!!
لماذا لاتترك الحب ينمو
ويسمو
ويرتقي
والله لن أقبل من والدتي ان تحدثت بهذا الأسلوب مع كل نسيب لدينا
المشكلة الزوجة رضيانة
والموية ليست منشولة من البئر بل من الثلاجة
ذكرتني بالدكتورة المتغطرسة والتي سخرت مني عندما قلت لها بكل براءة
{ والله يادكتورة أنا بالليل بشرب موية كتيييييييييييييييييييرة }
قامت قالت لي : ماتشرب كان شارب أصلك ناشلا من البير !!!!!
والله طلعت منها عطشان
زي المنحوسة دي الله يكون في عون زوجها
ان شاء الله مايعرسوها نهائي
قال ناشلا قال !!!!
| |
|
|
|
|
|
|
| |
ابوحراز
عاصم ابوبكر حامد
bayan
انعام عبد الحفيظ
إدريس البدري
mamkouna
زول ساكت
غادة عبدالعزيز خالد
احمد معتصم الطيب
ASAAD IBRAHIM
Mustafa Mahmoud
abas
Khaalaleyaal
المسافر
waleed500
وضاحة
Raja
sharnobi
إسحاق بله الأمين
رهف
salma subhi
محجوب البيلي
محمد الطيب حسن
هجو الأقرع
نهال الطيب
Mohamed E. Seliaman
هاشم أحمد خلف الله
صديق الموج
محمد على طه الملك
Habib_bldo
هند محمد
فيس بوك
تويتر
انستقرام
يوتيوب
بنتيريست