انتابتني الرهبة لأول مرة وأنا أقابل أصدقاء لم التق بهم الا عبر الأسلاك كنت أتوقع أن أحدهم سيكون فاتح خشمو زي البقرة وآخر سمين زي تجتوج وكان نفسي اشوف الزول الغير اسمو من رومانسي لأساسي دا وقرشو القرش حلقنا دا أها يازول وصلتهم ليك اول واحد قابلني أساسي قال رومانسي قال رومانسي بتاع شنو ياخي افتكرت ليك الولد وسيم ورومانسي لقيتو شاسي بتاع لوري عدييييييل كدا والكضوم منفخات تقول أكل ليهو لقيمات في الكرنتية وجاء لقينا الشرير وما معاهو أي برتكانة الزول الزول عداها لينا ضحك ساكت وكل مانقول ليهو العشاء وين يقول والله انا كلمت ليكم شيري شيري وقعت فينا جبنة وشاي والله الشاي الشربناهو في الإجتماع دا يبل ليهو حوض اسمنتي عديل والله واحد عندو لحية طويلة خلاص كان ما اتوضيت ماتقدر تسلم عليهو روبنسون جانا بي ريحتوووووو قال أوبن قال 00 كلما نقول ليهو العشاء وين يقول المزة بعد شوية ذا رين كنت متوقعوا زول جهامة كدا وغزير كالمطر لقيتو ليك تقول داقاهو مطرة بس شال ليك قهوة شيري ولما ليك فينا بالكباية الكبيرة بالله خلانا نشوف البحر طشاش طشاش قرجة جانا بي قرجتو لمست ليكم كتفو قلت يمكن الزول دا يكون شايل سكينو معاهو غايتو الجعلي ماشاء الله طاقاهو رشاقة انشاء الله تكون عند خطيبتي قال رشاقة قال سنجاوي قال لي عندي حبوبتي في ابوحراز عاوز أسألك منها قلت ليهو انا ناقص العندي ديل اوديهن وين قرشو دا لمن تدخل عليهو في البورد تقول الزول دا يديك لكمة هسع لكن وجدناه يحمل كل الظرافة قعدت ليكم جمبو عديل كدا 00 كان لابس نظارات بعدين قال المرة الجاية بشتري خروف لي ناس البورد صلاح درار تشوف الصورة حقتو تقول الزول دا اول مايلاقيك يرتب فيك لكنه انسان مرح ومضحك 00 وكل الزملاء ببورد جدة وجدتهم غاية في اللطف أها الزول الزول طاقاهو جنس شفقة قال لازم ياجماعة تتعشوا أها فتحنا خشمنا للمرارة والشية مما شفت ليكم كويرات البلاستيك بدن يطاقشن بطني قعدت تكورك زيتون هبطرش 00 معاهو مخلل 00 وجبنة وحلاوة طحنية اها روبنسون كان رئيس اللمة دي اتفضلوا ياجماعة والله لحسنا الجبنة وقرشنا الزيتون 00 الرغيف الرخيص ماجابوه لينا لكن شربنا بارد عشان نهضم بيهو الأكل دا ومشينا البيت برضو مالقينا عشاء غايتو الإجتماع الجايي لازم نتفق من بدري الشغلانية فيها أم فتفت بنجيكم وكان مافيها بنشتت ساكت
الأخ ديك الجن نسيت أقول ليك الجماعة جابو لينا برضو بيض في العشاء كنت متوقع تكون انت جبت البيض دا معاك وللا انت زول جداد ساااااااكت طبعاً توصيات الإجتماع عند الإخوان المسئولين ونحن ناس بنشاتر ساكت وسوف يغمركم يازول يازول وذا رين وقرشو بما تم لكن أهم شيء في الإجتماع هو الحضور المتألق لجميع الأعضاء
08-17-2002, 09:40 AM
ebrahim_ali ebrahim_ali
تاريخ التسجيل: 02-05-2002
مجموع المشاركات: 2968
ابوحراز ياخي انا من صباح الرحمن فاتح خشمي وباعين ليك متين تنزل البوست بتاعك دا ذي الزول المشرور لكن ما قلت ابداع يافردة فاوفيت وما قصرت لكن برضو ما وريتنا كيف وجدت الجماعة والصورة الكنت خاتيها ليهم موضوع الاكل دا ياخي بعدين انت ما عائز تعمل رجيم ولاشنو عشان اللقيمات المنفخات ديل ينزلن شوية وتعال هنا جاي ببدلة فاري مالك ذي ما قال الزول الراقي فياخي انت مفروض تكون لابس ليك جلابية بيضاء وعمة ومركوب فاشري وشايل ليك سبحة نصف متر عشان يعرفوك انك من ناس ابوحراز برضو لسع منتظرين منك الكثير المثير الخطر
08-17-2002, 10:36 AM
garjah garjah
تاريخ التسجيل: 05-04-2002
مجموع المشاركات: 4702
باقي ليك كم خروف بيكفو بورداب جدة ياخي كل واحد بيقوم ليهو بيخروف براهو ..بس طلع زرين والليندي وابامنةوسنتامنتال ديل ممكن في خروف .قال عضة قال يمكن شمه ما تلقاها
تابعت مغازلتك لأخي بناديها ببوستك الموعود وظللت خائفاً أترقب ، برغم إني ما كنت متعطر (بأوبن) إلا أن لمحة التذكر تلك طمأنتني فابتسمت لنفسي بخبث وصمت .. ظللت أرقبك بجاسوسية لم أعنيها إلا أن ابتسامتك وأنت تراقب في أحاديث الناس واحداً تلو الآخر .. عامل زي المروحة كده يعني .. خلتني أبتسم كثيراً وأتجول في مخيلة الزول القارى التاني كوييييييس .. بقيت أنتظر وما خاب ظني .. لحظة كل ترقب لحركة أو كلام أرمق الابتسامة تلك وأقول في سري .. أها لقى ليه عبارة .. خلاص خزنا .. وهكذا دواليك لغاية ما جات في الحتة الاكتملت فيها التفاصيل .. تصدق قرأت بوستك ده قبل ما تكتبه !!!! تصدق ؟؟؟؟؟
08-17-2002, 10:48 AM
اساسي اساسي
تاريخ التسجيل: 07-20-2002
مجموع المشاركات: 16468
مثلك تماما استاذ صلاح كنت اتوقع هذا البوست من اب حراز بين الحين والاخر وانا انظر اليه اجده صامتا ومبتسما احيانا يوزع نظراته في صمت علي كل الحضور زكرني حصة القراءة الصامتة كنت اود التعليق علي ذلك حينها ولكن قلت لاصبر لاقرا ما سوف يكتبه عن هذا وكما توقعت لم يخب ظني ابدا بهذا البوست الذي قراته انت وتوقعته انا قبل كتابته ودوما لا يخيب اب حراز ظننا وان كنت اعتب عليك ابو حراز في ان اكمل السمر معك تلك الليلة ولكن علي امل القادمات
08-17-2002, 10:44 AM
abas abas
تاريخ التسجيل: 07-27-2002
مجموع المشاركات: 6255
نهنئكم علي لقياكم العامره بي الزيتون في رحاب جده وربنا يخليكم في لقيا دايمه انشاء الله وانا بقترح تلاقي بورداب الامارت عشان اناقشو شنو اعملو لذلك المبدع الفنان عبد الرحمن عبد الله
الأخ أبو حراز والكوكبة الروعة إنشاء الله المطر اليخليك تخدر والله تخجل الكلمات في التعبير عن ما تلبسنا في تلك الليلة من فرح تمدد في دواخلنا حتي التشبع من لقاء أحباب ظللنا نتابع إبداعهم عبر كل الوسائل إلا المباشر فأكتمل القمر والضياء بسطوع شموس لطالما أتحفتنا بدفء شعاعها زمناً والتجلة لك يا زول وأبو حراز
البحيراوي
08-17-2002, 11:03 AM
اساسي اساسي
تاريخ التسجيل: 07-20-2002
مجموع المشاركات: 16468
تسجيل ديجيتال يعنى، أنا عرفك زعلان عشان العضات وكده، لكن زى ما قلت ليك الموضوع فيهو خيانة، أنا طبعا كنت خلف الكواليس وبراقب، شفت ليك قرشو وروبنسون ويا زول مالين جيبهم حاجات كده ما عرفتها، بعدين الشرير وبرتقالته كان متآمر معاهم برضه، وبقيت اتسحب ليك جنبهم شوية شوية عشان أعرف الناس دى بتلوك فى شنو، ولمن ما لقيت طريقة قلت اشوف الحاجات البرمو فيها أرضا ، تتخيل لقيتها ليك شنو؟
عظام دجاج وشى عظام شية وما شابه، أنا طبعا نباتى لكن لمن شكيت فى الموضوع، شلتها وشميتها ونقشت ليك الموضوع، فجأة الشرير شافنى، ما شفته كان جارى وراى ساكينى، هسه أنا بقول ليك فى الكلام ده بعد ما جبت معاى أساسى بودى جارد، ما بقدر على العصابة دى
أها دى الحكاية كلها، والله ساى يستر على، لو اللقاء الجاى ما شفتنى، تأكد انهم اغتالونى
هوي ياجماعة أبو حراز ده ما يغشكم بكلامه الذي قاله في هذا البورد والله أبو حراز ده الظاهر عليه بقى طابور خامس وما يقول للناس إنه ما أتعشى وبعدين ده اتخنق من اللحمة لامن يازول يازول أداه دلدوم في ضهره علشان اللقمة تنزل من زوره قال زيتون قال يا أبوحراز إنت ما تغش الناس بصورتك الخاتيها في البورد ده دي أكيد اتصوررتها وإنت في الثانوي وبعدين ناس الخرمة ديل مشغلينك في كمينة بتاعت طوب ولا شنو ، وبعدين أوعه تكون بت الناس الغاشيها بصورتك دي مفتكرة الصورة دي جديدة . أكان كدي الرمادة في خشمها ولك التحية وتاني مرة ما تغش الناس وتنقل صورة مغلوطة عن الاجتماع علشان الناس ما يفتكروا إنه فعلاً ما اتعشيت يا أخي قول الحمد لله ده الخير كان باسط واللحمة دي بالكوم وما عرفنا الباقي نوديه فين ومن المعروف إنه جدة ما فيها كلاب علشان نديها الكرتة
لك التحية الجعلي
08-18-2002, 06:27 AM
ابوحراز ابوحراز
تاريخ التسجيل: 06-27-2002
مجموع المشاركات: 5545
الجعلي قال اتخنق من اللحمة قال بعدين صورتي الموجودة في البورد دي والله عملتها قبل 3 شهور ماتشوف الواحد منفوخ كدة زي كفر التراكتر تقول اني الصورة دي أخدتها من زمان ياخوي دي جديدة ولو عاوز واحدة بالمقاس الحالي ماعندي مانع لكن بيني وبينك فكرت شوية وقلت حقو الواحد ينزل صورة خطيبتو عشان النقة الكتيرة دي تقيف بعدين شايفك بتحمر فيني ساكت يوم الإجتماع عملت ليك شنو
قال خنقتو لحمة قال
08-18-2002, 06:47 AM
degna degna
تاريخ التسجيل: 06-04-2002
مجموع المشاركات: 2981
الأخ الثوري دقنة والله لو جيتونا هنا في الطائف كان ضبحنا ليكم جمل زي حقك الراكب فيهو دا لكن هنا الجماعة كان الطبق الرئيسي عندهم زيتون وبعد دا كلو قالوا ابوحراز خنقتو اللحمة ياخي والله ولا عضة واحدة ماشفناها في جدة والمشكة الناس الكنت قاعد معاهم جيت لقيت ليك ست البيت مولعة عيون الغاز كلهن عشان تعمل لينا العشاء قلنا يازولة هوي عشاء شنو الدايرة تسوي يللا اطفي نيرانك ديل نحن متعشيين في سودانييز أونلاين
قال سودانيز أونلاين قال
09-02-2002, 01:56 PM
mohsin_alsla7aby mohsin_alsla7aby
تاريخ التسجيل: 04-29-2002
مجموع المشاركات: 1166
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
ebrahim_ali
garjah
SalahDirar
اساسي
abas
البحيراوي
THE RAIN
degna
mohsin_alsla7aby
فيس بوك
تويتر
انستقرام
يوتيوب
بنتيريست