|
|
 الاطفال والغربه *** مرهف ابني لازال بدون اصدقاء ***
|
عندما اكمل مرهف ابني عامه الاول كنت قد
كتبت .............
Quote: مرهف يكبر يوما بعد يوم
يمشي يرقص وأقدامه لا تلامس
ارض حميمة ....
ها هو يكمل عامه الأول دون أصدقاء
دون أعمام دون أن يلامس إيقاع ذلك
الشارع مسامعه ها هو يكمل عامه الأول
دون أن تحمله أمه إلى تلك الأبواب المشرعة
بابا خلف باب وأطفال الشارع يلامسوا أصابع قدميه
في منتهى الحب ... يمشي مرهف ألي ذلك الدكان
ويأتي مغبرا ... ربما بعد أن تقوى أسنانه سيسال عن
فاكهة بلادي ... الدوم واللالوب والنبق ....
يكبر مرهف واحن أنا إلى طفولتي يوما بعد يوم ها هو
يرقص و(عصام) يغني عبقرية (الكاشف) أنت عارف أنا
بحبك ولا ماك عارف .
يا مرهف أنت أكيد عارف أنا بحبك ....
|
|
|
 
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
انا اكره الغربه لاني ارى ما تفعله في ابني
لذلك اطرح هذا الامر في هذا البوست لعل نجد
بعض المختصين في مجال التربيه وعلــم النفس لنسمع
ارائهم ليعنوني على تفهم بعض ما يفعله ابني
مرات عديده اعجز عن التعامل مع زهجات مرهف
وعصبيته .
عندما نخرج للشارع مثلا ما بيقبل انو اي زول
يمسكوا من يدو ويفضل يركض يركض وفي غالبية
مشاويرنا يعود مرهف وقد اصاب الجروح ركبتيه
من اثر السقوط اثناء ركضه هذا التوق للحرية
والجري يعذبني كل يوم لاني احس بابني ...
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
.
معتصم
سلامات
و كيف هم مرهف و أريج
تحياتي ليهم .
حاسي جداً بكل البتقولو دا
بالرغم من انو نحن لسع ما
دخلنا التجربة دي و أنتم أدري .
ياخي عليك الله شوف أولاد الخرطوم تفاتيح كيف
زي ( واصل بحر ) دا
خليهو يجي بس الخرطوم
انا متأكد واصل ما بيقصر معاهو أبدا .
العجيبة كمان في واحد طلع لينا جديد
إسمو زرياب مجدي آدم
دا هو بس مجدي آدم لكن حاجة صغيرونة كدا
غايتو وريتونا حاجات عجيبة
الواحد ما كان بيتخيل يلاقيها .
يديكم كلكم العافية.
م.كرفس
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معاوية كرفس)
|
سلام يا معتصم ربنا يخلي مرهف
انتظر لما يقعد في الركن ويعمل ليه "اماجنري فريندز"
حتعرف انه اي طفل مسرحي كامل الدسم..
حوارات لا تنتهي مع ذلك الصديق الخيالي
وجري في كل البيت..
بعداك حيطالب انه صاحبو الذي اتمنى يكون واحد ما جماعة
عشان ما تعملو ساندوتشات كثيرة وجك عصير ليهم.. 
عانت ابنتي الاولى من غربة المكان واللغة..
وكان لها اصدقاء باسماء عجيبة تناسب الغربة اللغوية..
وكونها تعيش في مبنى داخلية كل الناس كبار
ويعدون للدراسات العليا.. ومثقفاتية كبار..
تستخدم عبارات و الفاظ كبيرة. لا تمت للاطفال بصلة..
وعدنا الى السودان
رفضت الذهاب الى الروضة بحجة انها بس فيها اطفال..
من الخطورة بمكان تركه يركض كما يرغب..
يفضل حمله لحين وصول الحديقة..
وربنا يحفظو...
عيد ميلاد سعيد يا مرهف الحلو...
| |
|
|
|
|
|
|
|
|
|
الموضوع جدير بالمناقشة (Re: معتصم ود الجمام)
|
أخي معتصم ود الجمام
صباحاتك بيض
شكراً
بالأمس فقط كتبت بوست تناولت فيه مشكلة الأبناء الصغار في الغربة وما يعانية الطفل سواء في أسرته أو خارجها والموضوع يتداعى ليتناول ارتباط الطفل بوطنه .. إلخ .. واستمر البوست ليوم كامل ثم اختفى دون أن يتناوله أحد بالرد أو التعليق فقط حظي الموضوع بعدد وافر من القراء يبقى السؤال هل زملاء البورد لا تهمهم مشكلة الطفل ؟ . ولا خلينا نقول أن طرحي لم يكن موفقاً(إبحث في الصفحة الثانية)
طفلك جميل ربنا يخليهو ليك فقط إبحث له عن صديق لا تنتظر حصوله بنفسه على الصديق ويأتي ذلك من خلال أسر الأصدقاء المنتقاة بعناية والذين يهتمون بالطفل وما تشيل همه فقريباً سيختلف وضعه .
فقد لاقيت نفس معاناتك مع ابني التجاني الصغير حيث أن الإنتقال من بيت لآخر في الغربة وفق ظروف العمل يقتضي ظروفاً مختلفة لجميع أفراد الأسرة فكانت مشكلته الكبرى أنه (وحده .. وحده .. وحده) واستمرت لأشهر حتى امتلأ البيت بالأصدقاء الذين استجلبهم بي (عرق جبينو) وصار أكثرنا أصدقاء .
الأطفال عزيزي أذكياء فقريباً سيغلبك ويضاهيك أصدقاء .
وعليك أن تربطه بالأسرة الكبيرة في الإجازات السنوية أو الاسبوعية ما أمكن
عادل التجاني
الدوحة
| |
|
|
|
|
|
|
|
|
|
Re: الموضوع جدير بالمناقشة (Re: عادل التجانى)
|
الجميل عادل التجاني
عذرا ان قلت لك البورد يحفل دائما بالمواضيع التي محورها
المهاتره والشكل ولا كمان يكون عندك ناس مجاملاتيها ساكت
ما كتبته مهم جدا اخي عادل المشكلة ليست في كيفية وجود الاصدقاء
المشكلة تكمن استاذ عادل في زمن الكبار وبالاخص كان الوالد والوالدة
يعملون وبكد لتحسين الاوضاع التي ابت التحسن الاشكال ببقى اشكال زمن
في ياتو زمن نقدر نراعي اطفالنا ونهتم بهم ونعطيهم الاولويه .
في ما يخص المام اطفالنا في الغربه بتراث بلدنا انا مرات قاعد افكر
تفكير بسيط عندما احكي اي حكاية لابني فيها حيوانات هل يا ترى مرهف
حيقدر يتصور شكل الحمار الحصان الخروف ما لم يشوفو يحس به حتى خروف
الضحيه بشوفو في كيس عباره عن لحمه ساكت الحاجات الناقصه في حياتهم كتيره
جدا عشان كده لمن يمشوا السودان ما بعرفوا يتعاملوا مع الواقع انا بعرف
طفل هنا وصل الثانوي وبمشي السودان اجازات طوالي لكن هناك ما بقدر يلعب
مع الاطفال من عمره دائما يلعب مع الصغار ودي عوجـــــــــــــه دي
| |
|
|
|
|
|
|
|
|
|
Re: الموضوع جدير بالمناقشة (Re: معتصم ود الجمام)
|
العزيز ادروب
تحياتي لك ولمرهف واريج
وعقبال مليون سنة
على غرار الامم المتحده وصندوق النقد الولي وكل الحاجات الدولية والاقليمية ارى انه يجب ان يكون هنالك اطفال دوليين وامميين، يعني مثلاً طفل اتولد في السودان وعاش طفولته في السعودية واتعلم في الهند ونال الجنسية الكندية وعمل في امريكا... ممكن زول زي ده نسميه سوداني او ننسبه لاي دوله في العالم لذلك يبدوا ان الجيل القادم هو الجيل الاممي الذي لاينتمي الى مكان محدد ولا الى دوله محددة ولا الى ثقافة وتراث محدد سيكون اممي الثقافة والتراث والانتماء.
عشان كده اتعامل مع مرهف بالفهم ده اسي لمن يكمل الثانوي حيمشوا ليهو دوله تانية لقراية الجامعة واكيد ما حيرجع يشتغل لا في السعودية ولا السودان حيشوف جهات اوربا وامريكا وكندا وفي الحالة دي يبقى سعودي وله سوداني وله هندي ولا امريكي وله اوربي!!
ربنا يحفظوا ليك ويجعله امميا منتشراً
تحياتي
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
الاخ معتصم
تحية و ود,
عنوان البوست يطرح موضوع فى غاية الاهمية,ومنة استشفيت أن إبنكم حفظة اللة,هو بكركم وأنكم حديثوا العهد بالابوة ولكن هذا لايعنى عدم حرصكم وهذا البوست دليل على ذلك..فقط عدم الخبرة.
الاطفال فى العمر 2-4 سنوات هى مرحلة مهمة فى حياتهم وهى مرحلة تحوير الشخصية عند الاطفال وإكتشافها وبناء العلاقات الانسانية وغالبا ما يتصفون بالعناد ويذهبون يسارا اذ طلبت اليمين..وهذا شىء طبيعى ..
من الواضح انك تحبة جدا لذا غالبا ما تصتحبة معك فى واجباتك الاجتماعية ويجلس معك أثناء زيارات الاصدقاء لك..(على حسب استناجى الذى يتحمل الخطأ).وقد تعود على ذلك ,وربما مجتمع الكبار اصبح اكثر جاذبية لة???/,لذا لم يحاول بناء صداقات مع الصغار ????? وربما ان البيئة التى تعيشون فيها, على خلاف السودان,لاتشجع فيها الاسر على الاختلاط (مع أبناء الاجانب)..???كل هذة التساؤلات تسطيع الاجابة عليها ومن ثم التعامل على هذا الاساس.
مرحلة الروضة (بعد العام الثالث )هى اهم مراحل بناء الشخصية وتعلم الكثير من المقدرات الحيوية للتعايش مع الآخرين من نفس الفئة العمرية وتطور الذهن والوعى بالمحيط الحيوى والبيئى للطفل,كذلك تعلم الطفل العمل فى المجموعة,هذا شىء مهم للغاية,حيث يأتى الطفل وهو متأكد تماما بانة مركز الكون,ثم يكتشف أخيرا انة فرد ضمن مجموعة.
كلى ثقة يأخى بانكم تحسنون التربية وستنشئون قرة عينكم على أفضل ما يكون..
لكن التربية هى تربية مهارات حياتية من قبل وفضائل تعلم من بعد..
لكم التحية وآسف على اللغة إن رأيتموها غير مناسبة ,الغرض هو بناء جيل جديد بطريقة عصرية
أخوك الاكبر
محمد مكى
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: محمد مكى محمد)
|
الاخ العزيز محمد مكي
التحايا والود
اشكرك في البدايه على مداخلتك القيمه
المجتمع النحنا عايشين فيهو اخي محمد دع عنك اهل البلد هم صعبين
وانا شخصيا ما برا انو هم ممكن يضيفوا الى ابني شي لان المجتمعات دي
مبنيه على افكار عنصرية مبالغ فيها وذات نتائج سيئه جدا على الاطفال احكي
لك بعض منها ... وواحد منها حدث مع مرهف في الروضه
كانت امه معاهو يجري ويلعب في الروضه قامت المعلمه مسكتو وقدام امو قالت
ليه ( تتحبا مع انك اسمـــــر ) دي معلمه في روضه ... دي ازمة كبيرة جدا في مجتمعات
الخليج اعرف معلم سوداني اضر الى ارسال ابنائه الى السودان لانو الاطفال عقدو اطفالو
سماركم وشعركم هي مواضيع هايفه لكن بتخلق اسئله في اذهان الاطفال عشان كده كتير
من اولاد المغتربين لمن يتربوا هنا بحاولو بقدر الامكان يتنصلوا من سودانيتهم في لغتهم
في لبسهم في ثقافتهم ...
جانبك الصواب في ما قلت كمان ظروف عملي انا والمدام كان ليه اثر كبير في انو نحنا ما نختلط
بعدد كبير من الاسر لكن نحن هنا ساعين في تكوين ملتقى اسري يجمع عدد من الاسر السودانية
واقامت برامج ترفيهيه للاطفال وللاسر سيكون ضمن برامجه الاهتمام بثقافة الطفل وتطوير مواهب
ابنائنا ...
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: يازولyazoalيازول)
|
معتصم
لا زلت اذكر ذلك اليوم في المدينة المنورة
جئتها لنسعد بكم انت واريج
كنا انا وسامر ...وانتظرنا تحت شمس حارقة سيف اليزل لقرابة الساعة
ركبنا مع بتاع ليموزين غرموه زي 900 ريال لانو ما مشي السكة باقل من 200كيلو في الساعة...
صداح وجدناه يغني
الخال بدرالدين العوض كان موجود
غنينا ورقصنا للصباح...وفي الصباح مشينا جدة ووصلني سامر الي المطار لاسافر بعدها لابها
مرهف من اجمل الاطفال
لا تقلق عليه
فعزيز صديقه رجل فنان...سيتعامل معه بشكله الجميل
لا تقلق صديقي
وزي ما قال ليك كرفس
خليهم يجوا السودان...فهناك واصل وزرياب (مجدي بحر+مجدي ادم).
وسنغني لهم مع محجوب
وجيلا جاي حلو الشهد...
صبايا وفتيه يمرحوا في صباح الغد
عيونهم برقهن لماح
سؤالهم رد
لك التحية ادروب وخالص سلامنا لام مرهف
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
الجميل جدا ود النوبه
التحايا من هنا لحدي عندك يا لذيذ
مرهف راجع راجع السودان ليعيش وسط الاهل والاصدقاء
ما قلت لي الايام جرت شديد يا موسى وسامر صاحبك بقى محمول
ولا بقى جوااااااااااااااااااااااال عديل كده ...
الامنيات عندك يا جميل وعقبال نستنى سيف اليزل في السوق العربي
ونركب امجاد لجبرة نحضر عقد موسى النوبي
لك وللسودان حب عظيم
معتصم ومرهف واريج
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
ود الجمام؟؟؟؟؟؟؟؟؟؟؟؟؟؟؟؟
يا الله من من اعضائنا هنا يعرف الجمام
اولادك اخي المعتصم اتركهم على حالهم هذه فما عادت ثقافتنا وما عادت عاداتنا تعنى شيئااليهم ولا يعابون في ذلك لانها دورة الحياة .
اسالهم واسال كل اعضاء المنبر العام عن معنى الجمام وربما اشك في انك لا تعرف معناها .
الجمام اخي المعتصم يحفر في داخل مجري النهر بعد ان يجف تماما - حفرة على عمق قدم واحد فقط داخل مجرى النهر تخلي الموية تتدفق هبطرش ( هبطرش كتييييييييييرة )
هى ماء نقية ماء حلوة - الجمام عزيزى المعتصم كان محل تلاقي الحبيب مع حبيبته والجمام كان وكان وكان .
نواصل
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
مرحلة الروضة (بعد العام الثالث )هى اهم مراحل بناء الشخصية وتعلم الكثير من المقدرات الحيوية للتعايش مع الآخرين من نفس الفئة العمرية وتطور الذهن والوعى بالمحيط الحيوى والبيئى للطفل,كذلك تعلم الطفل العمل فى المجموعة,هذا شىء مهم للغاية,حيث يأتى الطفل وهو متأكد تماما بانة مركز الكون,ثم يكتشف أخيرا انة فرد ضمن مجموعة.
ده كلام مية فى المية
ما قاله اخونا محمد مكى
اخى معتصم
عانينا مثلكم ولكن ؟؟
اهم شىء الاسر الصدبقة المنتقاة بدقة شديدة لان تأثيرها مباشر على الاطفال
اين نواديكم .
اليس لديكم نادى سودانى ؟؟
تكلوا عن السودان عن التاريخ والعادات والتقاليد عن الحبوبات .
طلب منى ابنى وضاح ان يحكى عن طفولته فى الامارات وساعطيه هذه الفرصة ويعمل بوست مهم جدا عن هذه التجربة .
لا انصحك بان يختلط مرهف بباقى الجنسيات المختلفة ابدا ومهما كانت الظروف .
حبى لمرهف العسل وللاسرة الكريمة
ام وضاح
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
معتصم الحبيب كنت بكتب فى الخرطوم (الجريدة )عمود اسمه فياقة حريم
امكن ناس مرهف ديل لمن يقومو ويشبو نوع الكلام الكتبتو دا يبقى ليهن رطانه
اسد الخلا
الكلام عن اغانى الحماسة والنغمة الفيها من تحفيز على القتال وغيرها خلتنى اسال نفسى يا ربى متل وليداتنا الصغار ديل بنطربوا لجنس الغنا دا؟ وما قصرت مشيت للعيال بنات واولاد وسالتهن ( هسى متل الغنا البغنى فيهو الوليد دا بتعرفوه ؟ ) تلاته من الخمسة هزوا لى راسن ، والله يا خالتى ستنا ما بنعرف حرف من الكلام البقول فيهو الزول البغنى دا ، واحدة قالت ناس امى بحبوه مرات بشغلوا شرايط ونحنا بنسمعا معاهن لكين كلام زى الرطانه
وكت قالوا لى كلام زى الرطانه صنيت وقلت كدى النديهن فرقة يقولو البعرفوه ، تانى شغلت ليهن اغنية (اسد الخشش الضرية ) واحد منهن قال لى يا خالتى ستنا الكلام دا يعنى شنو ؟ وفى اسد خشش واسد خلا واسد بيت ؟ شكيت العوجة على الله ، دحين يعنى المغنواتى من الصباح يسوى فى الفوت وانتوا ما معاهو ؟ هسى المعنى يعنى اشرح الغنوة ولا نسمعا ؟ ولا اخليهن من الموضوع دا كلو كلو ؟
قعدت اشرح فى الكلام حق الاغنية وكتين خلاس اتضايقو منى خليتن ، اجى يا بنات امى والناس يقولو التراث والخوف من (اندثار التراث ) وهو التراث زول مهموم بيهو مافى ديل وليداتنا يعنى متل الغنا حق الحماسة دا مع الجيل الجديد حقو راح (جيل نانسى عجرم ، وهيفاء وهبى ، وديفيد جريج ، وفيفتى سنت )
عاد جيت راجعة بلحيل مكروبة والدنيا دى مسخانه على ، يعنى ديل ناس بعد كم سنه ما حيعرفو الحبوبة يعنى لانهم ما بقولو حبوبة بعد شوية ، وبعد شوية الكاشف حيكون محلو زى ما هسى حاصل اى واحد من الوليدات البغنو ،بالمناسبة مغنى شاب فى اذاعة من الاذاعات الكتار قال:
ـ حاغنى اغنية من اغنيات الزميل عصام محمد نور
وانقروا الغنوة كانت شنو (رحلةفى طيارة للكاشف) عاد الفضيحة مسكتنى ، طيب قلنا المغنى يغنى على هواه ، معد البرنامج وين ؟ مخرج البرنامج وين ؟ مدير الاذاعة ذاتو وين ؟ كيف غلطة زى تحصل ؟ مش لانو الكاشف فوق الناس ولا سيد الغنا ، لانو دا تاريخ وحق من حقوق الكاشف اننا نحترمو ، زايد انه المعلومة البتصل عبر الراديو بتلصق فى الذاكرة للابد
ودا ان دلّ على شى بدل على انقطاع الموهبة ، يعنى فى الدنيا كلها الزول بظهر بغناهو لكين بظهر بغنا ناس تانيين هسى كاظم الساهر دا يوم واحد من ايام بدايتو ما سمعناهو غنى لناظم الغزالى الا فى حدود محددة ، وغيره من المغنيين البعتزو بيهن وليداتنا
الواجعنى انو اى زول حفظ ليهو كلمتين من الغنا القديم ونقز لينا بيهو كانو الوريث الحقيقى ولا ضقلا يعتر ولا نقابة تنتر بقصد نقابة الفنانين ولا الحقوق الملكية عندها راى مخالف
وبعد دا الكلام فيهو اخطاء فادحة ، سمع اضانى مغنية بتقول ( اسد الخشخاش الضرية ) وزول ما صلح الغلط دا ، يعنى دا فى الممنوع لو رجعنا كلمة ( الخشخاش لاصلها ، حكاية عجيبة
المهم فى الكلام دا كلو ونهايتو وغايتو انحنا لابدن من اننا نراجع تراثنا من الاندثار ونسجل للناس البعرفو قيمتو قبل ما الوكت يروح ونبقى فى يا ريت ولو كان ، اقعدوا عافية وانشاء تراثنا القشة ما تعتر ليهو
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
Salamat,
You are raising a number of issues, the first one is linking your kid to his home culture and many people have given you suggestions.
I would like to comment on the other issue which is related to the behaviour of your child: The rule of thumb in dealing with children is ignoring bad behaviour and rewarding good behaviour, by igonoring their bad behaviour it will eventually stop and rewarding good behaviour will encourage it to continue. Ofcourse this is easier said than done and needs a lot of patientce and persistence.
Parenting is no easy job but there is a lot of help available and there are many good books and websites which provide information on parenting skills, supernanny would be amongst the popular ones.
Hope you find this helpful
Regards
Sami
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: Foetus)
|
العزيزه سلمى
الكلام ده كلو من شنو ؟
المشكلة انو انت بعيد عن الوطن بالتالي بعيد عن الشارع عن ثقافته
وعن حراك المجتمع مع انو المجتمع هسه بقت فيهو متغيرات كتيرة تخلي في
اطفال عايشين في السودان لكن معرفيا ضعاف جدا في تراثهم وثقافتهم المحلية
انا ما بقول انو الزول عايش في الخرطوم ويكون عايش بذاكرة زول مولود ومتربي في البطانه
لكن للاعلام دور كبير في توصيل الموروث الشعبي مثال ( الدوبيت ) ما دام جبنا سيرة البطانه
لكن ده ما قاعد يحصل ..
طيب نقول اغنية الشايقية بقت مسموعه في مناطق كتيرة من السودان ليه لانها مركز عليها من قبل
اعلام المركز هل التركيز ده لقتو اغاني البجا ود البدري مثلا ومغنين كتار او اغاني النيل الازرق
نحنا عندنا مشكلة كبيرة جدا في اجهزة الاعلام عندهم في التلفزيون المغترب ده يعملوا ليهو
برنامج تلفونات ورسائل واهدي لفلان ولعلان انا اكتر برامج بكرهاالموجه للمغتربين سطحيه جدا
وسمجه وما بقدر اقعد قداما دقائق ..
ليه ما نحاول عبر التلفزيون نعكس التراث ده لاطفالنا في كل الدنيا وجو السودان قبل كم يوم
حضرتا في النيل الازرق سهرة من بورسودان تغني فيها اطفال بورسودان بتراث البحر الاحمر والبجا
يا سلام كانت قمه في الروعه اطفال رقصوا بجاوي وبني عامر وسماكه ..
بس كمان في ظاهره بالمتجاره بابداع الاطفال انا لمن كنت في السودان في ناس بعملوا فرق استعراض
من الاطفال وقدموهم في احتفالات الحكومة والتلفزيونات والاطفال لا يصلهم من مشاركاتهم دي اي شي
حتى لبس الاستعراضات بكون تعبان وملتق ساكت ..
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: معتصم ود الجمام)
|
معتصم
سلامات
والله مشتاقين وليك زمن طويل جدا
لا تشفق عليه فزمنه مختلف .. ولكني أخشى علينا نحن
آخر صورة ليهو كان قبل السنة اعتقد .. ما شاء الله مر زمن طويل قبل أن نلتقي
تحياتي لأريج وليهو جدا وهم مالين عليك البيت
ياخي مشتاقين وياريت ترسل لي تلفونك من جديد لاني فقدت كل الأرقام المعاي وسأتصل عليك غدا
لدينا الكثير الذي لم نقله
تحياتي لعبدالعزيز وسامر وكل الأخوان المعاك أو القريبين منك
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: GamarBoBa)
|
العزيز جدا اسامه معاويه
والله العظيم بركة الجيت بجاي
ارسلت ليك ايميل على ايميلك القديم جا راجع
كنت عاوزك ضروري جدا انا حارسل ليك تلفوني على
المسنجر الان والله ليك وحشه شديد وين اراضيـــك الان
لك تحايا مرهف واريج
موسى ود النوبه
قبل فترة عندما تاجل سفر غاده الى الصين قالت انو
في ايران ممكن تتعمل العملية فكرت في اسامه معاويه
والحمد لله انو غاده ستسافر الى الصين في القريب ولكم
جميعا الود
| |
|
|
|
|
|
|
|
|
|
Re: الاطفال والغربه *** مرهف ابني لازال بدون اصدقاء *** (Re: GamarBoBa)
|
عييييييييييييييييك يا موسى العيال كبرت
وعقبال اولادك يجكو في الحوش قول اميييييييييييين
وبحر عندو حق لو واصل من هسه عاوز يصاحب عمو المثقف الكبير
مصعب ود الجكيكه عشان بكره يبرم شعروا ويقول لابوه انا افتكر انو
الناس ذي تقوم تقعد عشان تناقش الحته دي والله لا يجيب زعل يا مصعب
شايفك حواراتك جميله في الميدان وانت نجم في كل الميادين بس ما تزعل مننا
مشتهي لي لمه في حوش كبير نقعد نحنا الكبار ديل كوم والاولاد يدورا دافوري
لكم جميعا الحب
| |
|
|
|
|
|
|
| |
معتصم ود الجمام
Asma Ali
معاوية كرفس
bayan
نهال الطيب
سلمى الشيخ سلامة
عادل التجانى
بركات بشير نجار بشير
محمد مكى محمد
يازولyazoalيازول
الطيب شيقوق
essam&amal
Foetus
أسامة معاوية الطيب
فيس بوك
تويتر
انستقرام
يوتيوب
بنتيريست