|
|
 المعهد العالي للموسيقى والمسرح... وترويض المبدعين!!
|
اهدي هذه الكتابة الي صديقي معتصم سيد احمد ودالجمام على سبيل الاعتذار عن تقصيري في بوست المعهد خاصته
ولمحبة بيننا
وسببها استطلاع رأي قامت به صحيفة الميدان الموقرة في عددها الثاني امس وقد تحدثت لهم عن المعهد واصفا له بمؤسسة لترويض المبدعين الا ان الناشر اسقط هذه الجملة وهانذا اقيمها وافصل كان الله اراد
وغرضها نقد السياسات التعليمية للمعهد ونقد ضحاياه فيما يظنون انهم بلغوا من المعرفة وهم يتمسكون باكليشيهات التفكير ويتكلسون في النظريات والكتب القديمة التي يحفظونها ولا يفقهونها
شخصي غير الضعيف تم ترويضه بالمعهد اذ انخفض معدل نشاطي المسرحي مع تقدم دراستي بالمعهد....
|
|
 
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
تقدمت للقبول بالمعهد في العام 94 ولم اجتاز " امتحان القدرات" كما قدرت اللجنة وحسمت الجدل بيني واسرتي في هذا الخصوص والتحقت بجامعة اخرى وبعد عامين ولشلاقتي تقدمت مرة اخرى بعد انقضاء العام 94 -95 الممتد
1996 – هذه ليست مزحة- وخضت امتحان القدرات مرة ثانية امام نفس اللجنة بحماسة اقل ومزاج اقل وقررت اللجنة انني اجتزت الامتحان هذه المرة ربما اصبحوا اكثر مرونة وقبلوا هذا الفاشل الذي كان لافي ساكت سنتين لكن بشرط..
قررت الادارة عقد ورشة عبثية عفوا عملية للحسم فيها بامر قبولنا النهائي في المعهد ولمدة 15 يوم كنا قد وجدنا فرصة كدفعة محتملة في التعارف والمرح اذ لم يكن اساتذة المعهد على قدر من الجدية في التعامل مع هذه الورشة وكثيرا ما كان يمر بعضهم فقط لاسكات مرحنا ...اسكتو ساكت .. امنع الكلام و theatre is not a hospital بطريقة تعلمجية الجيش كنا حوالي ال37 طالبا وطالبة كنا 11 منهم ناضجين( راشدين ) و البقية من مكتب القبول كنا نضحك ونستغرب سلوك كهذا من اساتذة المعهد – الدكاترة حاليا- فحتى ذلك الوقت كانوا بالنسبة لنا علماء هذا الفن واشياء عظيمة صورها لنا ولعنا بفن المسرح وعقولنا الشابة آنذاك....,
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
رغم ذلك توطدت صداقتنا وصادقنا انا ورفيقي حمدالنيل جروين حديثي الولادة اذ كان المعهد ايامها ملجأ لعدد كبير من الكلاب واسمينا الجروين حمد وحنفي واوصينا الدفعة ان يعتنوا بالكلبين في حال عدم قبولنا بالمعهد فلم نكن مطمئنين لنوايا الادارة التي تماحك وتماطل في قبولنا. انتهت الورشة كما بدأت وسافرنا في رحلة فنية مع فرقتنا الجمام الي عدد من القرى والمدن في الاقاليم نحمل مسرح العرائس وحبنا لبعضنا وللمسرح ونركب الاوتوستوب الي ما يشاء الطريق , نتوقف نقيم مسرح العرائس للصغار والمسرح بعد المغرب ونسافر في اليوم التالي كان سرة الجمام وسرها عفيف اسماعيل يحتملنا بكل الحب وننطلق من والي الحصاحيصا نحو مسرحنا , عماد ببو والجيتار والهارمونيكا يلعبون موسيقانا ويجملون عناء الرحلة وعبد المنعم يتحجج بأن عم محجوب (والد انتصار بيرين) قد اوصاه عليها فيحصل على تذكرتين باص على المقاعد الوثيرة .
سرقتني تفاصيل الرحلات عن مواصلة القصة . ونحن في الشواك بعد انتهاء عروضنا عرفنا ان ادارة المعهد قد قررت عقد امتحان تحريري للطلاب الراشدين ليقرروا فيه ان كنا نصلح للمعهد ام لا وكان علينا ان نقطع رحلتنا ونعود للخرطوم لاداء هذا الامتحان المثير للسخط والاشمئزاز لم تكن الادارة تعرف كيف توجه لنا الكارت الاحمر فاخذت تبتدع الطرق البايخة لايصال ذلك , كنا اربعة من اعضاء الجمام وقتها في تلك الرحلة وتلك الدفعة شخصي وحمد وعليش وجمال وتكفلت الجمام بقطع تذاكر الباص لنا للعودة وكنا نشعر انه وبعد كل تلك الامتحانات لا بد ان ندخل لهذا المعهد.
في المرة الاولى عندما لم يتم قبولي بالمعهد كنت مستاء واذكر ان عاطف خيري قال على سبيل المواساة : المعهد ده زي الحمام الجوه عاوز يطلع والبرة عاوز يخش..!!
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
كان الامتحان كالآتي:
بسم الله الرحمن الرحيم
جامعة السودان للعلوم والتكنولوجيا
المعهد العالي للموسيقى والمسرح
قسم المسرح
زمن الامتحان : ساعتان
امتحان القدرات الفنية للطلاب الراشدين المتقدمين للمعهد عام 96-1997
"تحريري"
اجب على سؤالين فقط
السؤال الاول :
اكتب ما لا يقل عن عشرة اسطر حول العلاقة بين فن المسرح وفن التشكيل
السؤال الثاني:
اكتب ما لا يقل عن عشرة اسطر حول توظيف الموسيقى في العروض المسرحية
السؤال الثالث:
اكتب ما لا يقل عن عشرة اسطر حول معاني التأصيل في حياتنا الثقافية والاجتماعية
المراقبون
الاستاذ/ عبد الحكيم الطاهر
السيد/ زاهر الكمالي
كان مكتوب على ورق فلسكاب ومنسوخ بالكربون الزمان داك والنسخة الاصلية معاي لو في زول مامصدق
لا اعرف لماذا تم قبولنا ربما للنفاق الظاهر الذي اجبنا به عن سؤال التاصيل او لسبب آخر المهم قبلنا والدفعة التي تلتنا الغوا فيها الدراسة العامة للسنتين الاولتين واصبح الطالب يأتي للمعهد متخصصا من قولة تيت مخرجين يدخنون ونقاد بنظارات منذ السنة الاولى وتم الغاء امتحان القدرات نهائيا وكان كل الذين ماتوا بسبب السياج القديم قد راحو ساكت........
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
| Quote: وكان كل الذين ماتوا بسبب السياج القديم قد راحو ساكت........ |
سلام محمد حنفي
كيفك
خلى نفسك طويل ما توقف تكتب.. كتابة جميلة ومتأملة..
دهشت لعدد الدفعة على ايامنا لا يتجاوزون ال 20...
السبب الميزانية..
ويتساقطون قرف او زهجا او مؤامرة من محمد فتحي..
ويتخرج نصفهم,,,
مودتي
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: bayan)
|
سلام يا دكتورة
ربنا يعين على الكتابة وشكرا لطلتك
الدفعة بتاعتنا اتضخمت اكتر بسبب طلاب رجعوا من السنة الثانية وحصلت الكم واربعين وتاني بدت في الانحسار لحدي ما اتخرجنا عشرين او واحد وعشرين على ما اذكر في واحدة اهلها طلعوها من المعهد لانو ماكويس في بدايات سنة اولتها وواحدة الولادة ومسؤليات الاسرة ما خلتها تواصل وواحدين سغالة السيستم ماخلتهم واذكر ريتشارد الذي ولى الادبار للولايات المتحدة في سنة تانية وسلوم الذي لم يطيق تاريخ الازياء و غيره من التواريخ بما فيها تاريخ المعهد زاتو في سنة اولى وفي تالته اتآمر الكيزان والادارة على حمد النيل واتقسمنا النص بالنص وبعد التخرج سافر عليش وعبد العظيم حمدنالله وربنا يجمع الشمل ويبلغ الذين هاجروا مقصدهم الذي هاجروا اليه
مودتي
حنفي
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
والله يا يا كلية الموسيقي والدرما
يا الكنت زمااااااان اسمك المعهد
تعبته وجاك الموت شيل شيلتك جوك
اهل الوجعة في شان حرايتك الشديده دي
وفي شان طول الوكت مسخن وطلبتك يزوزو
في الشمس ويضربوا في العدس ولما خلاص
يكونو بالغوا يدقشوا بي وراء ويضربو
الزبادي واحدين بالسكر وصحباني بالملح
تستاهل يا المعهد عجبني ليك .
سلام يا كابو وسلام يا دي جيل وسلام يا بيان
عليكم الله ما تقصروا ادوهو صح الصح .
| |
|
|
|
|
|
|
|
|
|
تاريخ (Re: محمد حنفي)
|
ضحكتنى
تاريخ الازياء
وكمية من التواريخ
طبعا التاريخ دا مخرج
فى كتير من المؤتمرات والورش والندوات والمحاضرات
الناس الما ناقشين بيبدو بى تاريخ الكيت والكيت
اخر مرة مؤتمر بعنوان
المسرح بين العامية والفصحى
واحد قدم ورقة عن تاريخ المسرح من يوربيدس واسخليوس وسوفكليس
وجا كاسح
ولا كلمة واحدة عن اللغة
واتخيل فى كلية الدراما
زول يحاضر عن المسرح الافريقى يبدا بتاريخ ظهور المسرح
والرقص الافريقى والتراث وشوينكا وكلام فى كلام
محاضرة النقد
تبدا
ارسطو هو اول ناقد مسرحى فى التاريخ
ومحاضرة المسرح السودانى
حتكون عن المظاهر الدرامية فى تاريخ طبقات ود ضيف الله
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Mohammed Elhaj)
|
صديقي حنفي
لك التحيه وانت تسترجع الامنا التي عشناها
فكم تذوقنا المر كي نستمر فى هذه المعهد وكم عشنا ماسي لا نستطيع ان ننساها
تذكرت الورشه التي سميت القدرات او التصفيات كما اسميتها والغريب فى الامر هذا الامتحان الذي اجوبته لا تتجاوز العشرة اسطر فقط مع المراقبه المشدده لها تذكرت كلما فيها من مشاهد تمت من قبل لجان المراقيه ان تذكرت منها كم كان مشهدا ماساويا لا يشبه عقولنا كراشدين ان صح التعبير وفعلا كنا راشدين نحمل افكارا كانت حينها اكبر من ما توقعناهو بهذه الدار تذكرتها كلها بدايه بجوليانه وختاما بريتشارد هذا الفتي الجنوبي الجميل الطل .
تذكرت ايضا تشبيه استاذنا او دكتورنا الحاج ابا ادم حينما اخفنا من هذه القارة السوداء افريقيا حينما قال(افريقيا دي زى مره عجوز شييييينه سنونها حنا حنا دي قاصد بيها هنا) لم اكن اتصور التشبيه ولكن محكوم علينا ان نتخيلها.
لنا من المواقف كثيرا سنحكي عنها بدايه بالعميد الدكتور احمد عبد العال الي الحرس الجامعي الذي له سلطة القاء احتفالاتنا باليوم العالمي للمسرح
تخيلو معي كليه الدراما المتخصصه بالدارما والمسرح لاتجرؤ على احتفال بعيدها الذي تحتفل به كل الكليات فى العالم
سنواصل
ولك التحيه مجددا كابو
عليش
كفش
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Ibrahim Algrefwi)
|
الجيريفاوي
العزيز الغالي
ارجو ان يكون الطرح على قدر الموضوع وان تكون الكلمات بها روحك التي تعشق الحرية
الأستاذ الدكتور خالد المبارك ليس موضوع هذا البوست والدكتور خالد المبارك استاذنا نحن فترة السبعينات وهو واضع فلسفة تدريس كل المواد والتزود بروح الإبتكار لأنه كان يرى ان الوقت مناسب لإبتعاث الخريجين لكل مناطق السودان لنشر المسرح لهذا على فنان المسرح ان يكون عالما في كل الفنون المسرحية وكيف يشارك اساتذة الفنون التشكيلية عمل الأعمال الفنيةوأدخل مادة السينما وبدا نواة مسرح العرائس والتي كملها الدكتور يوسف عيدابي ود. خالد كان اخلاقي متطرف وصفك الثالث له
كان ينطبق على صاحب دكان يجاور المعهد به ما لذ وطاب وكان الوحبيد الذي لايشتري منه ولا يرضى ان يكرم ضيوف المعهد من عصيره البارد ولا مشروباته الغازية ولاالروحية التي كنا نستمتع بها حتى الثمالة ( كنا صغار ) وكان أمينا على المعهد وعلى طلابه وعلى هيئة التدريس واضاف لقانون الدراسة بالخارج الكثير وله من الأيجابيات الكثير وله فضل على فنانين كثر مواقفه التي اختلف الناس عليها طال الزمن او قصر سوف تظهر الحقيقة!!
ولكن ارى هذه الأيام ظاهرة تحطيم وتشويهة كثير من رموزنا الفنية . اسالك من المستفيد من هذه الحملة المنظمة ، نحن لانرضى لأي فنان ان يهز عرش ابداعه ختى ولو كان على غير ملتي وديني
الجريفاوي د.خالد المبارك فنان اصيل اضاف للحركة المسرحية الكثير وهو واحد من القلائل الذين وثقوا لهذه الحركة كتابة وسوف يذهب الى العلا وتذهب معةاعماله
وسوف تبقى لنا كلماته وكتبه التي بها فلسفته الخالصة واتمنى ان تراجع حرف ونقطة
ودام صفانا
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد سنى دفع الله)
|
اثني ما قاله استاذنا السني عن خالد المبارك
الذي اجتهد حتى يصبح المعهد مؤسسة اكاديمية بعد ان كان معهد مصلحي..
واهتم بتاسيس المكتبة وخلق بنيات اساسية..
وعمل علاقات عظيمة مع جهات مانحة لانه كان ايضا يعرف ان المعهد
مؤسسة مثل الطفل الغير شرعي في فهم العقلية السودانية...
لو بقى خالد في المعهد اكثر..
لاسس قسم السينماو لتحول المعهد الى كلية تدرس الفنون باختلافها
خالد المبارك رجل مثقف وله رؤى عميقة ويحب الفن والادب
وهو احسن مدير في تاريخ المعهد
ترك بصمات واضحة فيه ومن ينكر ذلك مخاتل...
ربما كانت هناك هنات هنا وهناك ولكن يبقى اكثر من قدم للمعهد على الاطلاق..
اتمنى ان يتوقف الناس عن ترديد ما يقله البعض في خصوماتهم السياسية دون معرفة
وكل الاغتيال المعنوي الذي يحدث لاي انسان فقط لانه اختلف فكريا او
لم يتبع المعسكر المعني..
سبحان الله..
شكرا خالد المبارك.. لما قدمته للمعهد..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: bayan)
|
إبراهيم والله بالغت !!
جاي شايت ضفاري ..
مش تخلي الراجل يكمل كلامو 
ذكرتني واحد أخونا في هذا المنبر الموقر !
شكراً يا محمد السني على كلامك البعتقد إنو فيهو نقطة
مهمة ، وهي تناول الناس بالتعميم ومشاكل الحكاية دي ؛
كابو ..
كالعادة حكاياتك شيقة وفي مناطق غنية ..
فكرة الترويض دي أفتكر إنها فكرة ملازمة للتعليم بشكل
عام ..
تدخل المدرسة والجامعة عشان تكون زول " مؤهل " للقيام
بدورك ، لكن السؤال هل هو دورك فعلاً ؟؟
دورك
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد سنى دفع الله)
|
استاذنا السني
اراك تدافع عن خالدالمبارك وانا هنا لست بصدد تفنيد ذلك ولكن هذا البوست فتحته لنقاش ظلم يقع على قطاعات واسعة ويهمني هنا ان اتحدث عن المسرح ومعهده الذي كان عاليا انا شخصيا لا اعرف خالد المبارك ولايهمني موقفه السياسي كما انني لست معجبا بـ حرف ونقطة ولا ريش النعام . يمكن مسألة ذوق او مسالة جيل وهذا مربط فرسي . انا يا استاذنا انتمي لجيل من حقه ان لا يثق في كل الاجيال التي ساهمت في توريثنا هذا السخف ولا اعفي اي شخص ان يمتع نفسه بكرسي يجلس عليه ولا يحتمل مسؤلية هذا الكرسي. خالد مبارككم – اعني جيلكم- اقل ماعرفت عنه وجيله انه يمتطي وكمال الجزولي ظهور ميادين الثقافة والصحافة ليتراشقان ويعتركان عراكا زائفا لا ناقة لنافيه ولا جمل بس لانهم جو بدري وحجزوا الحته وما فعلاه ليس لائقا من كليهما وقس على ذلك . لكن ما اعرفه جيدا ان الحركة الاسلامية لم تأت باحمد عبد العال من السماء وانما مهد لحملته ضد المعهد من كانو قبله . احكوا لنا انتم الذين عشتم تلك الايام عن الذين لم يحترموا المعهد كمؤسسة واساتذة وطلاب امام انتماءاتهم الحزبية ومصالحهم الذاتية احكوا لنا عن افشال اعتصام الاساتذة فنحن لسنا شهودا علىذلك ودعونا نحاكم الجميع قبل ان يكون الكلام عنهم حراما. اسلاميين ام ملاحدة والحساب ولد!
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: سفيان بشير نابرى)
|
تعرف يا سفيان
ما بقدروا يكتبوا تأريخ مزيف لانه عندنا قبل التاريخ
ولا بعد التأريخ..
المعهد تم قيامه في عهد الديمقراطية قبل انقلاب مايو بابام معدودات..
استمر في عهد مايو يقع ويقوم..
ولكن المعهد قدم للا ذاعة جيش من المبدعين وللمسرح وللغناء
وللثقافة..
والسينما في كل مكان تجد بصمته..
بعداك لمن يود تزوير التأريخ..
سياتي سؤال
الزول دا من قبل التاريخ ولا بعد التأريخ..
مثلا مصطفي سيد احمد وعقد الجلاد
اتكونت متين قبل ام بعد..
ثم سلمى الشيخ وعمفريب وعفاف الصادق
في الاذاعة كمثال ديل قبل ولا بعد التأريخ
عماد الدين والشبلي عبدالحكيم سمة عبداللطيف
ديل قبل ولا بعد
منعم الجزولى يحي فضل لله قاسم ابو زيد
ككشعراء اغنية قبل ولا بعد
هاشم صديق قبل ولا بعد
فرقة السديم قبل ولا بعد..
كواتو بعد ولا قبل
جرهام عبدالقادر بعد ولا قبل
لمن سيزور التأريخ تبقى اعمال هؤلاء وهي نماذج فقط شاهدة
على معهد متعثر يعمل بدون امكانات
طلع فوانيس للوعي والاستنارة..
ماذا اخرج المعهد بعد 1994
في عهد التاصيل..
دا المحك...
لا يزور التأريخ دون بينات وذكر انجازات..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: سفيان بشير نابرى)
|
سلام يا سفيان كلامك جميل
لكن اكتر حاجة اتبسطت ليها انو ود خالتي الانور
يعمل انقلاب.. الوليد الشقي الشين ما هين..
يعدين حكاية يكتبوا تأريخ يخصهم
الا يقروه ليهم الناس البخصوهم وديل ما مهمين وكتار ذي الناس البتعرف المعهد
وتعرف ناسو من قبل التأريخ
لانه حيلهم دي ما حتنطلي على اي زول
الا يحدث موت جماعي لاجيال القبل التأريخ..ومسح لكل اعمالهم
ولو مسحوها ماديا كشريط سنما 90 لهاشم صديق
ما بقدرو يمسحوها من ذاكرة الناس..
اسع نعمل انقلاب لاتحاد الخريجين..
لو في هل يوجد اتحاد؟
بالله سلامي لكل الشباب البتعرفهم
من المعهد ...
وليهم وحشة شديدة ولايام سمحة شديد في حياة كل من عبر
بالمعهد دارسا او زائرا او مدرسا..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: bayan)
|
تحياتي وسلامي يا بيان
Quote: لكن اكتر حاجة اتبسطت ليها انو ود خالتي الانور
يعمل انقلاب.. الوليد الشقي الشين ما هين..
|
والله انبساطتك عجبتني بس انا كنت غلطان في الاسم والزول
العمل الانقلاب هو استاذ/ انور محمد عثمان وانا صححته غلطي
ده بي هناك والانور محمد صالح يا بيان زول زين ما شين
Quote: اسع نعمل انقلاب لاتحاد الخريجين..
لو في هل يوجد اتحاد؟
|
والله يا بيان هسي بكتب ليك وجمبي شاب حلو من اولاد المعهد
هو (ياسين حسن علي شعبة الفنيات /تخصص ديكور) وفعلاً يابيان
قصة اتحاد الخريجين دي قائمة منذ زمن بس لي يوم الليلة فكرة
وبرضو واحد من أهم الناس البينادوا بيها هو الاستاذ/ أنور محمد
عثمان .
Quote: يعدين حكاية يكتبوا تأريخ يخصهم
الا يقروه ليهم الناس البخصوهم وديل ما مهمين وكتار ذي الناس البتعرف المعهد
وتعرف ناسو من قبل التأريخ
لانه حيلهم دي ما حتنطلي على اي زول
الا يحدث موت جماعي لاجيال القبل التأريخ..ومسح لكل اعمالهم
ولو مسحوها ماديا كشريط سنما 90 لهاشم صديق
ما بقدرو يمسحوها من ذاكرة الناس..
|
ما بيغلبهم وكمان ازيدك ولا بيشتغلو بيكم زاتو
يابيان الترهيب ومسخ التاريخ بالقهر مشكلة عظيمة وطويلة في السودان وذاكرة شعبنا
ايوة نعم عظيمة لكن كتر عليها وبراك شايفة انو كتير من العقول دخلت في لبث عظيم
هسي بتصدقي يا بيان بي سبب المسميات الاسلامية الكتير الموجودة في الشارع العام ده
انو بابكر ود صفية قايل انو دار الارقم (دار جمعية القرأن الكريم بحلتنا) هو ذات
نفس الدار دااااااك *
ودي وتقديري لك.
ــــــــــــــــــــــــــ
* صفية جارة في حلتنا وبابكر ابنها كما هو مذكور تقال عنه هذه القصة وتردد في الحي
لانه تخيل هذا الامر لطبيعة قدم البيت الذي عليه دار الارقم .
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: سفيان بشير نابرى)
|
Quote: * صفية جارة في حلتنا وبابكر ابنها كما هو مذكور تقال عنه هذه القصة وتردد في الحي
لانه تخيل هذا الامر لطبيعة قدم البيت الذي عليه دار الارقم . |
عثل ؤبث ود صفية دا..
موش حاجة عجيبة كلما تكاثرت هذه الاسماء كثرت النكات الذكية..
| Quote: ده بي هناك والانور محمد صالح يا بيان زول زين ما شين |
عليك الله تسلم عليه شديد قوليه بت خالتك بتسلم عليك شديد..
بالله ما تكلمو بقصة الشنا دي خليها بيني وبينك سمح؟
| Quote: ياسين حسن علي شعبة الفنيات /تخصص ديكور |
سلم عليه طبعا دي اجيال جديدة..قوليه اجتهدوا في تكوين اتحاد
الخريجين لانه دا يحكون الفصيل الحيخلص اميرتنا النائمة
من الغول...
ونحنا معاهم وسندعمهم للاخر...
يلا بالله يا سفيان اي زول من ناسنا تلقاه احفظ لي رقم تلفونه
عشان لما اجي الم فيهم...خاصة شنون..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
ومن ماتوا قبل السياج القديم ؟
يذهب فاضل العزاوي في كتابه " بعيداً داخل الغابة- في نقد الحداثة العربية "
الي ان علي المبدع الحقيقي ان يحتمل ألمه الكبير ألم الإنحياز للضحايا .
سلام ياناس المسرح ويا سفيان .
انا كتبت كلامي ده لانو عارف انو خالد المبارك ده تم استعماله كمدير للمعهد ده بغرض ترويض المبدعين ، بل ربما بهدف نزع روح الإبداع من العملية اصلاً وتخريج موظفين ومشاهير وانصاف فنانين؟
ليس اندفاعا ًولا خروجا عن السرب وموضوع البوست ، ولكن في داخل السياج القديم سياج البوست وترويض المبدعين.
كتبت كلامي ، في شأن ماتنسوا في غمرة الكتابة والذكريات الجميلة -كعادة البورد الجميل - من أفسد المسرح والمسرحيين في السودان ؟ نبحث جزرياً عن رموز المسرح في السودان وإسهامهم في الحصل ده ؟
من خلق من المبدع السواني " فنان داجن" ينتظر الصراف كل اول شهر واحتفالات اعياد الثورة ومهرجانات الثقافة الانقاذية ويختار الضحك والإضحاك اليومي المبتذل بديلاً عن المسرح المبدع. . وينتج في دراما ومسرحيات أسخف من السخف نفسه ، ماعندها علاقة بالابداع ولا بالمسرح من أساسو ؟والنتائج دي عمومية ، لكن عندها قدرة ومسؤلية في انها تفصل نفسها بوقائعها ورموزها وتاريخها.
من ساهم في ان يكون في امتحان القدرات بتاع احمد عبدالعال ، سؤال عن التأصيل ؟؟؟
من ساهم في البيع ومن الذي إشتري .
ويا سني يا صديقنا الزول ده ما بتشكر وانا اسه بتكلم سياسياً وإدرياً عن اسهامو في الترويض والتدين ده– كان من الممكن تقول لي ، ابداً الزول ده في تاريخ المعهد ما فصل الدوش؟ ولا إستهدف المبدعيين في اكل عيشهم ولا قفل المعهد ولا جاب حاج ابا ؟ ولارفد الاساتذة بتبرير " يا احافظ علي المعهد يالاساتذة " . بعدين الرموز ديل شن نفرهم . أنا شخصياً هو ما واحد من رموزي ولا يمكن .
عن أي ترويض نتحدث ؟
بل عن اي مسرح نتحدث علي كتابة محفوظ بشري بملف الايام عن إحتفالات المسرح السوداني ؟
كتبت كلامي عن خالد المبارك ده بأفق سياسي وإداري ، ولست متخصصا في النقد المسرحي "مهنياً"
ولا اتحدث يابيان والسني عن المسرح الذي انتجه " المبدع خالد المبارك !!! " لانو فكرة ترويض المبدعين دي فكرة سلطوية قديمة فكرة بتدخل مع تقاطعات الثقافي والسياسي وتشابكاته. وترويض المبدعين ده بتم بواسطة ناس في الغالب الانظمة بتاخذهم من داخل المبدعين وبتكسر عينهم وإنسانيتهم علشان تستعملهم في مشروع ترويضهم لصالح شنو. شفت ترويض القرود قبل كده بستعملوافيه حديدة من ا لنار وبدخلوها في مؤخرة القرد ؟
الحصيلة مشوهة ياناس المسرح ؟مسرح خالي من الإبداع ؟ خالي من المسرح ؟ مسرح قواد يخدم السادة والحاكمين ؟
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Ibrahim Algrefwi)
|
يا جريفاوي يفضل حديثك وجهة نظر خارجية
لم اعرف ابدا مثلا ان خالد المبارك قد فصل الدوش.. دي معلومة جديدة
لانه الدوش كان يدرس في المعهد لحين تخرجي سنة 1985
حاج ابا كان طالبا سني يرا ولم يكن استاذ الى ان تخرجت ..
اذا اردت ان تكتب عن المعهد
اذهب وراجع التواريخ...
لم يكن هناك اي اكاديمي يهتم بالمسرح مثل خالد المبارك
بعد ضم المعهد الى التعليم العالي.. ولذلك وقع الاختيار عليه..
فقط الان لتغير موقفه السياسي صارت تكال له التهم
جريفاوي انت لم تكن يوما طالبا في المعهد
حتى تحكم على شخص ادار المعهد من سنة 1977 الى سنة 1981
فلا يمكن ان تغالط من كان يدرس في تلك المؤسسة
ويعرف ما قدمه الرجل..
لا احد يدجن اي فنان الفنان تدجنه نفسه..ورغباته
ولا توجد مؤسسة تدجن فنان.. ولم ار طيلة فترة دراستي اي
فنان مدجن,,
هذه اشياء جديدة..
اما قولك انهم ينتظرون مرتبات لقول مردود كيف تتوقع ان يعيشوا؟
اما موضوع امتحان القدرات المكتوب هذا فشئ جديد..
في المعاينة خاصتي سالني استاذ سؤال مستفز
حيث كنت اللبس توب قالي لي: تطلعي التوب دا ولا لا بسة روب نوم تحتو.
غضبت جدا ورفضت تماما هذا السؤال ورفضت اقلع ثوبي..
وخرجت وانا اعرف انني سافشل.. واخبرت المسجل
استاذ على خندقاوي...
وبعد فنرة ظهرت النتيجة كان اسمي مكتوب رقم 8
فالشخص الذي لا يريد الاجابة على سؤال التاصيل يمكنه اي يفعل ذلك..
ويكتب ما يريد...
يا جريفاوي ما تحاول تعمل انك ادرى بشعاب مكة احسن من ناسها..
| Quote: من أفسد المسرح والمسرحيين في السودان ؟ نبحث جزرياً عن رموز المسرح في السودان وإسهامهم في الحصل ده ؟ |
وهذا اتهام جماعي خالي من الموضوعية... في اي مكان وزمان وتاريخ
هناك خيارات للفنانين. فلماذا نطالب ان يكون الفنان
صوت من لا صوت له او ميوله السا سية توافق جهات بعينها..
حتى نرضى عنه..
| Quote: وينتج في دراما ومسرحيات أسخف من السخف نفسه |
الدراما نفسها لتنتج تحتاج لاشياء كثيرة جدا
اهمها الاموال الكافية..
ولذلك في اي بلد في العالم هناك مسرح ممول يقدم فن راقي
وفن تجاري يقدم الجمهو ر عايز كدا..
غير السنسرة و الاجهزة الامنية..
سنويا كان المعهد يقدم دبلوماته المختلفة المعمولة على اساس اكاديمي
مسرحيات راقية ممولة من ميزانية التعليم العالي.. في المواسم يقدم الطلاب
فنا راقيا مسرح طليعي تجريبي يقدمه مجانا.. اسهاما منهم في دفع الحركة المسرحية..
كان الحضور كثيف جدا لا اذكر ابدا طيلة فترة دارستنا ان رفض اي مشروع لطالب
لتاصيل.. اي طالب يختار ما يريده يطرح ما يريده حرية كاملة..
راينا دوريمات وسارتر وميلر وجيكوف واريبال و يونسكو و بكيت
لوركا محمد عبدالحي الطيب صالح الخاتم محمد محي الدين زنكنة ومحمود دياب
الخ الخ مئات الكتاب من جميع المدارس والجنسيات والبلاد
هذا كان في عهد خالد المبارك اومن اتو بعده من العمداء
بالمقابل هناك مسرح الدولة متمثل في الموسم المسرحي الذي تموله وزارة الثقافة..
ثم هناك المسرح التجاري..
| Quote: ترويض القرود قبل كده بستعملوافيه حديدة من ا لنار وبدخلوها في مؤخرة القرد ؟ |
لم يكن طلاب المعهد قرود ولن يكونوا ولو عايز ذي الكلام دا بنشبعك منه..
اهم حاجة تعرف الا تحكم عن فترة ما شوفتها او حضرتها او كنت جزء منها
وتسمع كلامات عنها وترددها...
طالما انك ما ناقد كما قلت.. فأنت شنو عشان نحدد منطلقك ونرد عليك.؟
بس الاهل صبرو والجيران كفرو..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: bayan)
|
| Quote: ابداً الزول ده في تاريخ المعهد ما فصل الدوش؟ ولا إستهدف المبدعيين في اكل عيشهم ولا قفل المعهد ولا جاب حاج ابا ؟ " |
| Quote: ولارفد الاساتذة بتبرير " يا احافظ علي المعهد يالاساتذة |
اتمنى من الطلاب الذين كانوا في المعهد في السبعينات
ان يكتبوا عن الازمة التى ادت الى فصل بعض منسوبي الحزب الشيوعي..
للفائدة العامة.. ومعرفة ما حدث حقيقة..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
سلام يا كابو جاتني الرسالة دي من أجل المشاركة في هذا البوست من اختنا المسرحية أميرة الشيخ .
Quote: تحية وسلام محمد مكي حنفي (كابو) تتذكر يا حنفي :-
((قال:- ثم من؟ قال:- حاج أبا، قال:- ثم من؟ قال:- حاج أبا، قال:- ثم من؟ قال:- حاج أبا ثم أحمد عبد ألعال ))
وأنا مابتفسر وأنت ما تقصر،،
أميرة الشيخ
|
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: سفيان بشير نابرى)
|
في فترة مضت كتبت في جريدة الصحافة (الملف الثقافي ) عن المنهج في المعهد وعن كادر التدريس وامور اخري بحوزتي ارشيفها .....المهم .... كنت طالب وقتها في المعهد في السنة التانية موسيقا ... وكنت محروم من امتحان مادة اللغة الانجليزية لانو ماكنت بدخلها.....المهم بي قدرة قادر لقيت نفسي محروم من كل المواد ...وطبعا لازم امتحنها بديل ....واتذكر انو المرحوم اميقو حرمني من مادة الصولفيج لانو في يوم من الايام جيتو وقلت ليهو نحنا عاوزين نعمل سمنار حول مادة الصولفيج وكنا عاوزين نستدرج استاذ اميقو عشان نعلق علي طريقة تدريسو السيئة لمادة الصولفيج ....المهم فشل السمنار نسبة لوجود جواسيس وصلو الخبر .....المهم .... نرجع لموضوع المقالات .... جيت بعد المقلات دي قدمت طلب لامتحان البدايل ماطلني فيهو السيد / احمد عبد العال ...لغاية ماانتهت امتحانات البدايل .... وسمح بعدها بانو الاقيهو ....دخلت مكتبو ...قعدت ...حاول يتذاكي علي لكن كان مكشوف بالنسبة لي ....سألني : انت كتبت مقالة في الجريدة ولا حاجة ذي كدا؟ قلت ليهو انا كتبت اكتر من مقال ، قال لي طيب انت عندك راي في المعهد وفي الاساتذة وفي المنهج مالك جاي تقرأ تاني ؟؟؟ (وهنا واضح انو كان بيقرأ الانا بكتبو ).... عاوز ارد علي سؤالو ...قال لي دقيقة انادي رئيس قسم الموسيقا وكان وقتها (بشير صالح )....المهم .... بشير صالح جا ...كرر علي احمد عبد العال السؤال تاني ... ليه جاي تقرأ في المعهد وانت عندك راي فيهو ؟؟؟ قلت ليه وبي طريقة مستفزة ذي طريقتو : انا عاوز بكلاريوس بس ذي ناس كتار هنا في المعهد ماراجين مزيكا منو . رد علي بي كلام معناهو اعتذر عن كلامك الكتبتو في الجرايد دا ( مساومة يعني ) ...قلت ليهو لا .... قال والله احييك يا (ابني ) علي شجاعتك دي ....وبشير صالح قااااااااااااعد يسمع في الكلام .... وفجأة بدون مقدمات انقلب السيد / احمد عبد العال الي شخصية مختلفة ....ضرب مكتبو بي يدو ضربة قوية (للتخويف طبعا) وجدع علبة السجاير في جهة والولاعة في جهة ....ودخلت في هستيريا وصوتو وصل كل المكاتب الفي الدور التاني ولا التالت ماعارف .... وانا قاعد بعاين ليهو بعين غاندي لما يعزف الفلوت (عين الغنماية) ....هنا اتدخل بشير صالح رئيس القسم قال ليهو ( انت مالك يادكتور هايج كدا ) ....والدكتور زايد في ثورتو ذي التور ... المهم .... هدأ الدكتور بعد الصرعة دي .. سألتو قلت ليهو الحايحصل شنو ؟؟ قرارك شنو ؟؟؟ قال لي انت مفصول ... قلت ليهو مافي مشكلة اجي استلم قرار الفصل متين ؟؟ قال لي بعد يومين ... الي الان لم استلم قرار فصل ....ولم ارجع من يومها لاستلامو .
بالمناسبة
احمد عبد العال في يوم من الايام عمل ندوة يتكلم فيها عن مدرسة الواحد حقتو دي ... حاول فيها جاهدا انو يربط بين الواحدية والتوحيد ....والله العظيم انا ماشفت مهذلة فكرية ذي العملها احمد عبد العال دي ....والله الي الان انا ماعرفت هو بيتكلم عن شنو ...لا ورانا الواحدية ولا ورانا التوحيد.... وانا المسكين كنت ماسك ورقة وقلم وعاوز اناقش ...قام السيد احمد عبد العال بجلالة قدرو قال مافي داعي للمناقشة ...بي بساطة قفل باب النقاش .
دا كان عميد كلية الموسيقا والدراما ...فمابالك بحاج ابا...ماجستير اضأءة وطفا المسرح كلو يوم الدبلوما
سلام
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
سلام يا بيان .
معليش ياستي ،
الكلام ساخن ، لكن ما أسخن من ماسورة النار الفي مؤخرة القرد ، القرد المروض؟
وعلشان تفهمي أنا شنو وأسهل عليك ، فانا كلامي الماعاجبك ده .أنا كلامي ده .
فافهميني وناقشيني من منطلقوا وبس وما تجي تعملي لي كوت وتطلعي الكلام من سياجو ؟
من أفسد المسرح والمسرحيين في السودان ؟
لنبحث جزرياً عن رموز المسرح في السودان وإسهامهم في الحصل ده ؟
السؤال ده ماحق زول؟ ماحق طلبة الموسيقي والمسرح براهم . بعدين نحن جزء من المسرح ده ،من المعهد ومحنتو. نحن جمهوره ومتابعنه ،ولا المسرح لذاته وفي ذاته ؟ والمسرح ده طالما انو بيتحرك في مساحات العمل الثقافي الإنساني بالضرورة عندو تقاطعاتو مع العملية التنموية والسياسية والإبداعية ، زي ما بالضرورة الاختلاف في المواقف ووجهات النظر البيني وبينك للأدوار والسؤال الإجتماعي للفنون .
بعدين يا ستي ، سؤال التأصيل ده وكلام أيات من الذكر الحكيم كان بيحدد انو الطالب المقدم للمعهد ده قدراته بتأهلوا لدراسة المسرح ولا لا؟ يلا تتصوري يادكتورة في كم زول ما بهمو الذكر الحكيم علي قدر مابيهموا المسرح .
جماعتك ديل يا ست بيان إبتذلوا المسرح وإبتذلوا رسالتو الأكاديمية والثقافية ، وحولوه لي مدرسة بتخرج طلاب ضعيفين مؤهلاتهم بتنفع لي أوبريت الشهيد " بذرة الحق" وطقوس أحمد عبدالعال وقاعة الصداقة والتطبيل . فنانين حسب الطلب السياسي يادكتورة ؟
ماهندا عليش قال ليك، الحرس الجامعي ده بقدر يوقف احتفالات الطلبة باليوم العالمي للمسرح .
حاج أبا ده مرة قال لي ديل طلبه صعاليق ساي ؟
فصل تعسفي ، سياسي واكادميي مانزيه اطلاقاً ، وتحجيب قسري للطالبات ، وإسلمة فنون ؟
ويعطلوك سنة اوسنتين من الدراسة ، ياريت لو بسبب نشاط سياسي مناهض للتدجين .، بسبب عرض مسرحي يا بيان . ياما تحترم نفسك وتبقي ولد " فنان كويس" او ماسورة النار ؟
اها " إدارياً وسياسيا ناس " ريشة النعامة ديل باعوا المسرح لبذرة الخلاص وللهوس الديني وماسورة النار ؟
أتفق معك في أن الحوجة لإفادات من عاصروا فترة إدارة مايو للمسرح عليهم ان يكتبوا عن تفاصيل النكسة وعلي ناس الصادق وقفيل " مستودع الشيوعيين والديمقراطيين ده" يفيدونا ، أما ناس احمد عبدالعال وإدارتهم فنحن ،نحن وحدنا نعرف قوداتهم للنظام وأيات الذكر الحكيم . وما اتعسها من مائدة تتكوم فيها جثة الحرية .
عموماً ياستي ، كلام حنفي مع محرر الميدان ده أنا عجبتني فيهو إضاءة لماحة جداً ، إنو المحصلة النهائية الأن مافي مسرح في السودان في مبادرات فردية لفنانين مسرحيين محروقيين بالسؤال وبحاولوا شق الجدار ؟
______________________
ياكابو ، والله أسفين عل وجهات نظرنا ، السياسية في محل المسرح ده . لكن الترويض ده كعب وشرايط النكت وسخف التلفزيون وإدارة المسرح كتر علينا ، بقي بخرج مهزلين وفنانين طيبين وجميلين خلاس ؟
والناس دي ما شايفة الترويض والسمسرة ده .
طبعاً لن تشكر ياشاب علي همك .
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Ibrahim Algrefwi)
|
| Quote: جماعتك ديل يا ست بيان |
شوف يا جيرفاوي لانه الكلام رخيص جدا وعشان ما تقول مرقت الكلام من سياجو وافهمك صاح
حدد لي معنى العبارة دي ومنو هم جماعتي ديل؟
عشان ارد رد يليق..ما خارج السياج
| Quote: إدارياً وسياسيا ناس " ريشة النعامة ديل باعوا المسرح لبذرة الخلاص وللهوس الديني وماسورة النار ؟ |
ابدا دا اتهام غير صحيح لانه ناس ريشة النعام المتفها دي ترك المعهد سنة 1981
يعني قبل 26 سنة..وبع عدد من المبعوثبن و اساتذة يشار لهم بالبنان
ومكتبة لا باس بيها.. وطلاب احرار يفعلون ما يريدون
ويخرجون اي مسرحية في راسهم دون حجر.. دا المعهد الانا شوفتو
ودرست فيه حرية كاملة..
لغاية ما جات الانقاذ... وهدت كل شئ..
حاج ابا كان طالب ولم يكن استاذ..
عندنا ترك خالد المعهد...
والمعهد من يومه لديه مشاكل كبيرة جدا اكبر مننا ومنك انت المهتم بيه
وقد اضربنا عام بحاله لهذا السبب..
ولكن عمرو ما كان يعاني من ازمة حرية او تعبير
كانت مشاكل المكان والاساتذة المقيمين..
وعندما حلت بابتعاث عدد كبير لم يعد جزء كبير منهم..
كما قلت لمعتصم جيلنا لا يعرف ما حدث لهم ويجب ان يكتبوا عن فترتهم..
ولكن لا يمكن ان يكتبوا عن فترة لم يشهدوها كما تفعل انت
فقط لانه خالد المابرك ترك الحزب الشيوعي ووافق على وظيفة من حكومة الوحدة
المشترك فيها الحزب الشيوعي ببمثلين صار هو الذي خرب المعه..
وصارت ريشة النعام حاجة بطالة..
اكتبوا عن الفترة التي لم نشهدها
ولا تكتبوا تخبروننا كيف عشنا..
تنقل اقوال متواترة...
| Quote: وقفيل " مستودع الشيوعيين والديمقراطيين ده" يفيدونا |
من دخولي المعهد الى خروجي لم ينجح شيوعي واحد في الدخول الى الاتحاد
ولذلك قولك معقل الشيوعين دي اشاعة كبيرة
لم يهتم ابدا الطلاب بالانتماءات السياسية
كانوا احرارا بمعنى هذه الكلمة..يكتبون الشعر والقصص ويدرسون المسرح
والكل يمارس ما يريده دون تأطير او لافتات...
ولذلك كان مستودع للفن ومحبي الفن وابدا ما كان مستودع للشيوعين
او الجبهة الديمقراطية..او اي حزب آخر
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Ibrahim Algrefwi)
|
اهلا اميرة الشيخ وجاييك في الكلام وما بقصر...
اهلا صديقي المشاغب الجريفاوي " الودعاء الطيبون (المروضون) يرثون الارض في نهاية المدى"
هل اواصل قليلا في حكايتي بعد الشكرلكل الافاضل الذين تفضلوا بدلائهم هنا , فعلا شكرا
زي ما قلت نحن كناعدد من الطلاب الناضجين بمعنى ان لنا تجاربنا من قبل كما كان هناك طلاب من مكتب القبول فكانت مسألة ترويضنا بجد شاقة لهم ومستفزة لنا, قبل ان ندخل المعهد عرفنا قصر الشباب والبشير الريح وكانت تلمنا كلية الفنون التي انتقل اليها احمد عبد العال تاركا المعهد في عناية الكتور سعد يوسف وكان بينهما بروفيسورالفاتح الطاهر.وفي كلية الفنون كان الطلاب القدامى وقتها يشكون ان امتحان القدرات قد الغي واصبح الطلاب يقبلون في الكلية كغيرها من الكليات لا احم ولا دستور وعشان ما تقولوالزول ده بناقض نفسو انا ارىان امتحان القدرات ضروري على ان تحترم اللجنة نفسها وتكون امينة وما تقلع هدوم البنات- يا د. بيان- كان الشباب يحملون البوردات في صالة في دار الاتحاد وبيرسموا لفترات تحت اشراف اساتذة وطلاب قدامى يملؤهم الحرص ان تأتي اجيال جديدة من الفنانين برؤى طازجة ودماء حارة لاداعي لان تبرد او يطأطي اصحابها رؤسهم من اجل ضمان استمرارية وجودهم في الاوساط الفنية والثقافية . ويعمل غربال القدرات بعدله وجوره حتى يصل الذين يستطيعون الوقوف امام محاولات تدجينهم وهناك من له مصلحة في التدجين وهناك من تنفقع مراراتهم عندما يكون هناك ولد او بنت قادر على قول اللاء لان دورهم هو شطب اللاءات من القواميس ياد. بيان واسف لرواد البوست والدكتورة ان اوجه الكلام لها فهي لا تظن ان هناك مؤسسات تدجن وان الفنان يدجن نفسو بنفسو ولو كان ذلك حقيقيا لما احتاجت الانقاذ ان تزعج صفو البروف احمد عبد العال وطاقمه المخلص عناء مراقبتنا واستدعاء الطلاب الي مكتبه ليستوضحهم ان كان قد صافح زميلته بلذة ام خوة ساكت!
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
ازيكم يا شباب
كابــــــــــــــــــــــو
ازيك يا جميل اكتب واكتب واكتب
معليش كنت طاشي من بيتي لي يومين وما خشيت
نت في يومين الطشه دي على العموم انا من زمان دايرك
تكتب ولو سمحتا عليك الله عرج لينا على مركز المسرح من اجل
ثقافة السلام ولو في صور من عروض جماعة الجمام القديمه ديك
برضو نزل لينا صور وانا راجــــــــــــــــــع ليك شيل الصبر
معتصم سيد احمد
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
استاذنا محمد السني انت حددت تلاته محاور للنقاش انا بديت في الاول (سياسات القبول) ومنتظرك
حاحكي شوية عن ما بعد القبول وادوات الترويض
بعد ما تم قبولنا ونحن بين مصدقين وما مصدقين بقينا نتجارى في لم القروش للتسجيل والرسوم الباهظة جدا طبعا عملنا اغبيا وما فاهمين وقعدنا نتلايق ونستهبل عشان يعفونا او يخفضو لينا لكن اضان الحامل طرشا .. ومشينا عمادة الطلاب والبتاع داك .. صندوق دعم الطلاب وكانت اضان الحامل .. اطرش (على وزن ازرط) المهم بقينا نلقط .. مشيت مصلحة المعاشات طلعت شهادة المعاش بتاعت ابوي ومكتوب فيها انو معاشو ستة وتلاتين الف جنيه والرسوم الطلوبة مية خمسة وتلتين الف جنيه وبرضو ابو .. ابا ...
طلاب المعهد كلهم لو ما ببالغ كانوا من الفقرا او متوسطي دخل شديييد وبرضو نفسنا فاتحة نقرا فنون !!
انا قبل دخولي المعهد كنت بدرس في جامعة ام درمان الاهلية وهي جامعة خاصة, بالقروش يعني لكن كانت بتعفي الطلاب وكتير منهم من الرسوم وبتاخد منهم الفين جنيه رسوم البطاقة بس - رحم الله البروفيسور محمد عمر بشير- الاهلية ما جامعة بالقروش وبس
في الجامعة ام قروش كانت رسوم دراستي في سنة اولى 25 الف جنيه وزادت في تانية بقت 52 الف وفي تالته 75 الف وفي اولى في المعهد اللي هو حكومي سنة اولى 135 ّّ!!
ونحن بنتجارى ونحنس يوم طلعنا الطوابق الفوق ديك انا وحمد النيل صحبي وابو لينا. ونحن نازلين لقينا راجل ابيييااااض ولا وردي ما عارف وشو وش صلاح وفيهو علامات الانبيا شايل تحت اباطو كتاب, يا رياض الصالحين يا تفسير الجلالين او حاجة بالشكل ده وطالع بتؤدة , عاين لينا .. اتضايرنا فتحنا ليهو الدرب طلع وعاينا لبعض ونحن بننزل حمد قال لي بصوت عالي : الليلة يا كابو الراجل ده جاي يقفل المعهد تاني...
وقمنا جارين نزلنا السلم عشان نوزع الشمار واكيد طقش اضانو صراخ حمد
اها يومين تلاته بدت الدراسة
طلع شيخنا بدرس علم الجمال
الله يرحم بروف احمد الطيب
ما كان مقرر علم الجمال من الكتاب اياهو التحت اباطو داك!!!!!!!!!!!!!!!!!
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
كابو
قبل دقائق بس شفت البوست بتاعك ده..ولن تتصور سعادتى بعودتك الجميله الى( كابو).. اخيرا سمحت لهذا المارد ان يخرج من قمقمه..اكتب فالدنيا مازالت نديه..وانت مازلت ملئ بالجمال..
بعدين طلع الفى بيت الكلاوى (اللاب توب ) عارفنى بتكلن حن شنو..عدد واحد كابو مدنكل وكتر من زيت السمسم..
لك التحيه مجددا ..
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: محمد حنفي)
|
اواصل شوية
الراجل بتاع علم الجمال هو البروفيسور مصطفى عبده
ولانو مافي نظرية دراما وتاريخ مسرح اسلامي كان المدخل هو علم جمال اسلامي برعاية مصطفى عبده وهو مؤلف الكتب البدرسها للطلاب ولست ادري اين اجيزت كمناهج لانها لاتحترم عقل طالب الفنون ولكن في زمن الانقاذ حيث لم تعد للطلاب كلمة ولا للاتحادات الطلابية وجود والاساتذة ضابين ضيلهم بين رجليهم كان كل التخريف يمر فوق رؤسنا واول ترويض يتم هو باقناعك انك تدرس كلام فارغ ومناهج متهالكة بصبغة علمية ودينية كمان عشان لو ناقشت الاستاذ يطلعك ملحد ويهدرو دمك والاستاذ الدكتور قور المستنير شخط فيني يوم في محاضرتو لاني كنت بناقش فيهو ولم يحتمل ذلك
: شيوعية وماركسية وديايكتيك اها وبعد داك
الكلام ده اذكره جيدا واندهشت وقتها من هيجانه خاصة وان النقاش لم يكن عن الشيوعية ولا الماركسية لكن العواطف بتاعته حساسة شوية تجاه الطلاب الممكن يكونوا منفتحين وجريئين!!!
| |
|
|
|
|
|
|
|
|
|
Re: المعهد العالي للموسيقى والمسرح... وترويض المبدعين!! (Re: Elmosley)
|
شرفت البوست استاذ موصلي
ما يحفزني هو وجود المتابعين والمدركين لورطة الفن في بلادنا وكمان هناك من وقفوا عصيين على الترويض لم ينصاعو لبريق المال ولا المناصب ولا المجتمع المنفصم الذي يتأفف مننا. عظيم الي حد لا يوصف الدوش .. عمر الطيب الدوش الذي عاش ورحل انسانا وفنان
اهدي له هذه الكتابة وهو يستحق تمثالا...
مودتي
حنفي
| |
|
|
|
|
|
|
| |
bayan
عصام عبد الحفيظ
سفيان بشير نابرى
mohmmed said ahmed
Mohammed Elhaj
Mohamed Ahmaed Olyesh
Ibrahim Algrefwi
محمد سنى دفع الله
طلال عفيفي
معتصم ود الجمام
هاجر سيد احمد
Elmosley
فيس بوك
تويتر
انستقرام
يوتيوب
بنتيريست