|
|
 Re: مصطفى سيـد أحمـد .... وحـدَها الجبـالُ لاتلتـقي (Re: لقمان حسن همام)
|
في ذكرى المغني الإنسان
قصيدة لكامل عبد الماجد
مالو عجلت الرحيل
ما المسافة بعيدة لسه
وإنت في عز الصهيل
ياسلام وكتين تغني
وتدهش الناس بالهديل
تنثر الفرح الموشى
وتنثر الحزن النبيل
وتوعد الناس الغلابة
بالزمان المستحيل
تعلو قاماتنا ونشابي
ونبقى بي فوق للنخيل
والأماني قطوفه تدنو
والوجود يصبح جميل
ومالو عجلت الرحيل
ماشي في الأجيال غناكا
جيل يغني ويدي جيل
وإنت زي النيل بتمضي
صافي نبعك سلسبيل
ياسلام وكتين تغني
وينجلي الهم الطويل
والأماني تعم نفوسنا
وترجع أحلامنا القبيل
ومالو عجلت الرحيل
بنسأل الطير الخداري
وبنسأل الدوح الظليل
وبنسأل المطر النهاري
وبنسأل الزمن الجميل
وبنسأل أسراب القماري
وبنسأل ألوان الأصيل
ياتو برقا جيتنا منو
وياتو رعدا وياتو سيل
ومالو عجلت الرحيل
نحن لسه مع الطيور
الما بتعرف خرطة لا دار لا مقيل
نمشي في كل الدروب
الواسعة فاقدين الدليل
فينا لسه دندناتك
وشدوك المعدوم مثيل
وفينا طيفك لسه ماثل
وفرعك العالي النحيل
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست