|
Re: في الذمة : الحكومة تجرد اسلحة الجنجويد ، فمن يجرد المتمردين من اسلحتهم (Re: محمد عبدالقادر سبيل)
|
الأستاذ سبيل سلام ولي المتداخلين معاك الخطوة الصحيحة للحل في رأيي إننا نحاول نلاقي أرضية مشتركة تحمي حقوق كل فرد , نسيّد القانون ونتساوى قدّامو _ عرب أو غيرو زي ما بتقولوا عن مشكلة دارفور _ قانون يكفل حق الراعي والمزارع ويفصل بينهم مراعيهم وحواشاتهم . قانون نستمدو من إداراتنا الأهلية , كبارات القبيلة , يقعدوا يتحاوروا زي زمان بعيد من ناس غرب أفريقيا وباول وعرب الجامعة .
بعد مانوفق في توطين القانون ومراقبة تطبيقو ممكن نتكلم عن إجراءات ثقة زي نزع السلاح من جميع الأطراف المتحاربة , عشان ما نضيع في أس المشكلة منو وأساسا شنو , حيظل كل فريق ينادي ويستنصر , والمحرقة ... الله يهوّن .
وحتى لو سلمنا إننا ننزع السلاح من جميع الأطراف , حنعمل شنو لي مشاكل الحدود في ظل غياب سيادة الدولة عليها , دول الجوار خط فتنة , حدودنا خط ناري وإنت أدرى بي تداخل القبائل بين السودان وتشاد وليبيا مثلاً في المنطقة المعنية في دارفور . السلاح هناك متوّفر أكتر من دواء الملاريا في صيدليات الخرطوم يبقى كيف نحلم إننا ننزع السلاح ؟ .
حفرة النحاس , سيادة الفرانكفونيين , القرن الأفريقي الجديد , البترول , صراع الكراسي , مرارات الحرب علي جميع الأطراف في شرقنا وغربنا وجنوبنا وحتى الشمال , الفقر , الجوع , حق المدرسة , أطراف العاصمة المهمّشة , وحتى شاكوش البت الجبرتها الظروف ترضى بي مغترب جاهز فتح الدرب لينا ولي غيرنا ... جوانب من المشكلة . يعني الحالة الإقتصادية دورها شنو في الحل ؟ والإجتماعية ؟ وال .. وال .. وحتى السياسية رغم إنها دي هي زاتا المفروض نجتثاها من جذورا وننسى إننا إتملينا مرارات من ساس ويسوس والسوس النخر العشم ؟
غلطنا لامن طلعنا ناس الخرطوم وما دخلنا غابة السنط أو طلعنا جبال طورية والمرخيات ؟ قصدت بي كلامك تسليط الضوء , قمت نصرت جماعة علي جماعة , أكتب بي صورة شاملة عن القضية , قلمك يستحق إنو تسطر بيهو الحقيقة كاملة .. وللحين داك كل الأماني ليك ولي البلد بي سلام يكفل الحرية والمساواة دون تمييز .
أبنوسي
|
|
|
|
|
|