كتابـــات تدخّل الزول في أحــوال (محسن انّا مشتاقون).

Quote: منوت،... منوت يا واهب النص سيرته، ومسلّم جوابات القلوب، من حنان إلى حنان،.. قول لي شجرك كيف؟ وكيفنو النهر بي هناك،.. ياخي خليتني أجن، جن طازج، يلعن خاش كل جني القديم،.. فتشت كل الجن الفي المشلعيب، لقيتو راب،... يا خميرة ترويب العقل إنت،.. مالك ومال تلك البلاد، للسيرة نزقها يا حميم، شفت الكلام كيف؟ لما يشفى من طيش الكلام،.. وشفت الناس كيف؟ لما تشفى من شبه الناس،.... ياخي تاني بسألك، جوابات القلوب من منو؟.. شايف؟ أنا طلّعت ليك بطاقة شخصية من ريش أقرب وزة حايمة،... ما ضرّ الشجر لو أنه جلس حين أحبّ،... أنا سأحتكم وسيرتي إليك/ لديك: أنأالنبي الحزين عاطل الكلمة ومسروق الصلاة أنا البيوت، حين تنتهي إلى بيوت ليست من شكلها ألبس سوارك وحجلك من هنا، وأتوضأ حنانك، غيب يا زول غيب، إنت درويش كبير، تتوقأ حلقة الذكر، تولّع كباريت السماء الكضابة ومنتكية في بلد، الرطني، الرطني، الرطني، والمجاذيب اتسوحروا بالصلاح،... يشيلوا الكلام من القلب، يختوهوا في خشومن،... الليلة المجاذيب اتسوحروا بالصلاح،... غيب يا بركة البركة تغيب،... مالك ومال الحال؟ أنت لا تسأل عن الحال،... مثلك لا يسأل القلب، القلب بلا حال،.. شفتهن أنا مارقين، والصلاة بنيّة صغيرة بارياهن،... ياخي الناس ديل سكتن بتعرفها إنت، وأنت لا تخوض في سيرة الحال،.. خليهم متسوحرين، يخلى السدر من نبقو ويأكلوا صلاحن، سعن الموية تبهلوا الصنقرارة، يبل حلوقن الشوق،... ياخي ديل سكتن سكتك،... وتاني مرّة ما تدخل هنا، أنا نبي جاهز وإنت عارفني، براي بصبر فيها بالشديد القوي، ما تخليني أتمرعف تاني،... الناس ديل كتلوا عبد الخالق ومحمود، ديل تَرَب العاهر صلاح الدين الأيوبي، قاتل يحيى بن أميرك السهروردي،... ونحن تَرَب المفارقين،... ما تخليك في الجوار أطفش آزول