يا سلالام يا (بادي) ياخي، والله مشوار لكن!

Quote: أهلنا بقولوا البقا للا ( البقاء لله).. قلت أدز ليك قدحى فى الإيميل كمواجبة وانبساطة لاحتفاليتك العبقرية بهذا العبقرى... كما قلت عن البكا.. تصدق يامحسن لو بنكتب بعيونا لغرقت كل الأحرف قبل الشهقة التالتة.. يا زول الدمع على الزى بادي دا، ليهو شيمة تختف من الحَجْرَة.. يعنى ياحبيب إذا كان ربنا ما ضَيّع الحنك البودي إلى المعدة والدبر معقول يضيع الأضان الفاتحة على جذع المخ وجخانينو؟ فبمنطق ربنا ما قَدَّ أضانناً ضيعها يكون ربنا ما قبض روح بادى محمد الطيب بل أطلقها وخلاها تصدح بدون حدود إكراما للحرف واللحن والمغنى المجوَّد.. كرم زى حق النعيم ود حَمَد الفتح المطامير للمحتاجين فتكالب عليها التجار.. ولما أخبره عماله بذلك، قال ليهم: (أطفوا الرتاين، الداير يشيل ياكل.. يشيل، والداير يبيع.. يبيع). الناس كَمّلوا مطامير النعيم ود حمد ماعدا مطمورة واحدة بها أغنية احتفظ بها خلف الله حمد.. شوف الغنا دا كيف بقاوم الجشع!! فبادي عندو مطامير الحقيبة كلها قيسها على أغنية النعيم ود حمد والمدة التي عاشتها واضربها فى عدد أغاني الحقيبة، زايد روح بادي الربنا قبل يومين أطلق عنانا من سجن الجسد .. المهم ياخوي أقطع أخدر فى عمك بادى وخلينا نطرب.. والله ضيوفك ذاتم حلوين.. وهاك دى جدعات مني لروح بادى: الصايح نعاه.. والخلوق منفجعه والبقا للبدانا.. وتانى ليهو الرجعه سلوان الحقيبة حبيبتو ست الوجعه قالت (مسو نوركم).. بادى ماخد هجعه ************************ بادى فارق الجسد البسجن الروح وفكالا العنان شان تنطلق بالبوح يغرد صوفى هيمان زى بلابل الدوح وبالغصن الرطيب كم داعب المجروح *************************** تب (ماجارو اهلو) ومابجور فى جارو مشاها 72 حول درب مسدارو اوفى حقيبتو كل حرفن عرف اسرارو خلى القمرا ترقص والكواكب غارو لك خالص تحياتى أخوك بلة موسى