العذابة

Quote: ذكرني هذا البوست ببوست قديم أعتبره من اجمل ما كتبت عند انضمامي للبورد كان يتحدث عن العزاية { بالمناسبة كلمة العذابة } وهي عنوان البوست خاطئة ارجو أن تعدليها لتصبح { العزابة } كان بوستي يتحدث عن الفوضى في بيوت العزابة والغريب مازال ضغطي مرتفع حتى الآن من تصرفاتهم يعني عادي يومياً القى غتاية حلة جوة التلاجة والحلة ماموجودة مرات اصحو من النوم واجد 4 سفنجات والمصيبة كلهن شمال اغتاظ جداً من المعجون حينما يعصر من الوسط واحد معانا كرعينه خشنات جداً لمن يرقد في المرتبة ويحاول ينزل بشيل معاه الملاية في كرعيه واحد عمل ملاح رجلة لأول مرة تصدقوا { ورّق } الرجلة صفقة صفقة بالله دا مش حيوان وآخر معانا عشرة سنوات لحد الآن ما اشترى مرتبة واحد يموت ينوم في سريره واحد يسافر ينوم في سريره وهكذا صابون الحمام ياويلك لو ترتكت صابونتك في الحمام بيلحسوها كلها وكذلك الشامبو وأكثر مايغيظني ان أحدهم أصلع ويستخدم شامبو لشنو ماعارف الملاح في الغداء يكون فاصوليا ولو فضل فيهو باقي للعشاء يقلبوه ليك بامية مفروكة لاتسألوني دي جات كيف انا برضو ماعارف !!!! وياويلك لو مرقت قروشك قدامهم كل واحد يبدأ يحكي ليك ظروفه واحد بحب الشعيرية نوعها كدا طويل زي صباع اللحام يقوم يختها في الحلة ويكب ليها موية من الماسورة بالخرطوش والله في النهاية ماعرفناها مشت وين الشعيرية دي 00 طبعاّ ذابت في الموية الكتيرة دي كفاية هنا