|
Re: عاميتنا السودانية .. (Re: فيصل نوبي)
|
الاخوان الاعزاء .. وليد طه .. تمبس وفيصل نوبى كيفنكم والنعلكم بخير يا الطيبين اول بالتبادى زى ما بتقول حبوبه .. نضمى معاكم كلو بكون بالعاميه ..لاننى اعشقها حد الثماله .. عذرا فى العباره الفاتت لانها ما بالعاميه .. رمضان كريم عليكم وتصوموا وتفطروا على الف خير
بالنسبه لى انا يا وليد يا خوى .. بتكلم معاك حسب عنوان البوست .. لكن زى ما قال تمبس واخونا فيصل الجماعه بجو يطقطقوك فى كلامك ده .. والله يخربنى كان فرزت كلامهم ولا مقصدهم .. يعلم الله الله يا تمبس يا خوى مانى عارفاك لقيت شنو ..قدر ما بحرت وعويناتى زغللن فى كلام وليد طه ده ما لقيت لى شيتن كتر ..(بى ضم الكاف ) حقيقى عجبنى البوست.. عاميتنا ممتعه جدا يا اخى وليد .. ونفسها حنين محنة اهلنا .. ونحن السودانيين عموما تلقائيين .. يعنى ما بنكون قاصدين معنى الكلمه حرفيا ..زى ما صاحبنا القال لى لى الدكتوره بالله اسمعى ...لووووووول .. طبعا ضحكت من الاعماق .. اتخيلتو جاى عيان ولا محموم ومصدع وقرفان وداير ليه علاج بسرعةالبرق والصاروخ .. نحن اصلوما عندنا صبر لى اى شىء .. خاصه المرض ..لهلاهين لهلهة عدوك يا يابا .. المهم قلت اجى اتاوق بى جاى واقول رأى المتواضع .. وبكل صراحه معاك فى رايك فى انه اعلامنا مقصر تماما .. حسب تجربتى المتواضعه فى الكتابه .. معظمها بالعاميه ..بحس انها بتصل للكل بكل بساطه .. بساطةاهلنا الطيبين الحنينين .. وبالمناسبه دى بهديكم يا الحنان .. من القصائد الجديده ... قصيدة رباية الكبار .. واتمنى انها تعجبكم.. وتغير رأى تمبس وفيصل فىانه البوست للعاميه .. يا جماعه شايفاكم كلكم شباب ما معاكم حرمه غيرى .. ممكن تجيبو طوبه تختوها جمب التكل ده ..انا ما بزعل وحات الله ... لكم كل الود والمحنه .. ورمضان كريم ..
***رباية الكبار *** ترباية ما بتنقاس من طينة بحر.. بسندو فوقو الراس لينة طبع .. رضعت حكر مو كاس عزة وفضيله.. وسادة للفراس شدة و حزم.. ترس الدميره الساس مشهود بالكرم.. ما بنخرو الوسواس سند التواقى خليل مع المحراس مطمورة الدرت سيف الضهارى وفاس سباق اللوارى سقف الاهل كدباس بطوف بالديار.. حشاهو من حراس ابواب القبيلة .. اوتاد بلا ترباس قنديلها البضاوى. دليل برا اجراس ضى برق الشرق فى وميضو فايت الماس يطمن الحارى.. ويرحمن المحتاس
اسماء الجنيد مسقط
|
|
|
|
|
|
|
العنوان |
الكاتب |
Date |
عاميتنا السودانية .. | walid taha | 10-12-05, 06:11 AM |
Re: عاميتنا السودانية .. | tmbis | 10-13-05, 03:56 AM |
Re: عاميتنا السودانية .. | walid taha | 10-17-05, 05:25 PM |
Re: عاميتنا السودانية .. | فيصل نوبي | 10-13-05, 08:51 AM |
Re: عاميتنا السودانية .. | soma | 10-14-05, 03:31 AM |
Re: عاميتنا السودانية .. | walid taha | 10-17-05, 06:14 PM |
Re: عاميتنا السودانية .. | walid taha | 10-17-05, 05:35 PM |
Re: عاميتنا السودانية .. | محمد عبدالرحمن | 10-17-05, 05:46 PM |
Re: عاميتنا السودانية .. | walid taha | 10-22-05, 04:56 AM |
Re: عاميتنا السودانية .. | هشام مدنى | 10-17-05, 05:52 PM |
Re: عاميتنا السودانية .. | walid taha | 10-22-05, 02:59 AM |
Re: عاميتنا السودانية .. | فيصل نوبي | 10-17-05, 06:08 PM |
Re: عاميتنا السودانية .. | ابو جهينة | 10-18-05, 04:16 AM |
Re: عاميتنا السودانية .. | walid taha | 10-29-05, 03:21 AM |
Re: عاميتنا السودانية .. | Ahmed Mohammed Osman | 10-18-05, 07:08 AM |
Re: عاميتنا السودانية .. | فيصل نوبي | 10-20-05, 05:52 PM |
Re: عاميتنا السودانية .. | waleedi399 | 10-29-05, 03:45 AM |
Re: عاميتنا السودانية .. | عبد الناصر الخطيب | 10-30-05, 12:30 PM |
Re: عاميتنا السودانية .. | عبدالرحمن الحلاوي | 10-30-05, 11:55 PM |
Re: عاميتنا السودانية .. | عبدالرحمن الحلاوي | 10-31-05, 01:42 AM |
Re: عاميتنا السودانية .. | عبدالرحمن الحلاوي | 10-30-05, 11:56 PM |
Re: عاميتنا السودانية .. | walid taha | 11-08-05, 01:46 AM |
|
|
|