|
Re: صفحة بانوراما المهجر بجريدة الخرطوم اليوم موضوع عن نظام القبول لطلاب الشهادة العربية ( المئ (Re: ghariba)
|
أبو صلاح كيفك...
شكراً على التوضيح ولو إنه شهراً ما لي فيه نفقة وشهر نفقتي نافقوني فيه ولو تذكر السنة الماضية ،، سنة الكوتة الله يكوت ويدود راس الإخترعه لينا وبهدلنا بيها وإنشاالله تبقاليهوا في عياله وعيال عياله...
أريته يتبالى بي مصيبة تدفعه دم قلبه القاعد أدفعه أنا سنوياً بالدولار الأخضر الما بيجي إلا بنزف الدم الأحمر...
سنة سواها علينا كبيسة مش براها كمان كل سنوات الدراسة التالية لها...
حسي بس يا ود غريبة بحكم إنك قريب من ناس السفارة وهم وليدات الحكومة والحكومة عندها السلطة نحنا ناس سنة الكوتة ديل ذنبنا شنو؟؟؟؟ أولادنا وبناتنا لو طبقوا عليهم نظام الخصم القديم 11% كان دخلوا قبول عام وكان طبقوا عليهم نظام المئييييييييينننننننيييئئة (حتى الواحد ما قادر يكتبها خليك من يقولها) برضوا كان لحقوا القبول العام... لكن وزير التعليم العالي البروفيسور المادفعوا أهله مليمة حمرا في تعليمه من المدارس الصغرى ومروراً بالإبتدائية والوسطى والثانوي والجامعة وسفرتها الكان بيعزم فيها أصحابه ويكون قعد في الداخلية بعد ما أتخرج واشتغل لغاية ما عرس ولا مشى البعثة المجانية للماجستير ثم الدكتوراة وما بعدها وكلة على حساب محمدأحمد دافع الضرائب يعني أبوي وجدي وأبوك يا صلاح وجدك وفي النهاية يجي يفتري علينا بأنظمة من راسه تجيب لينا الهوا عمرنا كله؟؟؟ وطبعاً يا أبوصلاح نظام الكوتة كان مبهم وما مفهوم وحسب ما سمعنا وشفنا حصلت في ظله بلاوي وغنوا من وراه عالم ...
المهم بعد الهضربة دي كلها أصله نظام السجم ما خلى لينا عقل تفتكر ما من حقنا نرفع قضية على التعليم العالي ونطالب بإصلاح الوضع ومساواتنا يا مع القبلنا ولا مع البعدنا؟؟؟
ولا أقول ليك عمي قرنق بيصل بالجمعة وبنشتكي ليه كان يبقى أخير من ديك ... ولا أقول ليك الشكوى لغير الله مذلة ..
شكيتكم على الله يالأزيتونا...
الشايقي
|
|
|
|
|
|
|
|
|