|
على حين غرة
|
ذات يوم رمضاني وانا ارش الحوش ورجليّ كافا جلبابي ومستمتعا بنسمات الهواء التي تهب على حين غرة ,, واصدقكم القول فأنا لا اعرف ما هي الـ ( حين غرة ) المهم كلما نشفت كرعيني أغدق عليها وعلى سفنجتى من الخرطوش ,,, لذيذ ذلك الشعور وانا اضع طرف اصبعي على فم الخرطوش متلقيا دفق المياه الشديد متمنّعا وراغبا اللحظات التي يفلت فيها أصبعي فترتد عليّ المياه وأنا بين التمنّنع والرغبة ,, ,, ذلك الوجع اللذيذ عندما تطعنك شوكة وكل مرة تدغدغ حول المكان ,, يسمونه مضض ,,, واظن (على مضض) جاءت من هنا او من اين لا ادري ,,,,, كان لجذع شجرة النيم نصيب كبير من مرشّاتي ,,, يعجبني ساقها المقشر ,,, يعجبني لون ساقها بخليط الوانه البهيج ,, يذكرني دائما ان الطبيعة الوانها مركبة . لفت انتباهي نملة تدب بين قشور ساق الشجرة أزعجها الفيضان الذي تسببت فيه من غير خريف ,, وضعت الخرطوش بين فردتي السفنجة وتركت الماء يندلق ,,, تعجبنى المياه تعرف طريقها ودربها دون مساعدة ,,, مددت يدى ووضعتها على الساق في الطريق الذي لابد للنملة ان تسلكه ,,,,,, دبت النملة وواصلت دبيبها الحثيث الى ان وصلت الى راحة يدي ,,, كعادتي في الكلام مع نفسي بصوت مسموع قلت لها : - الحاصل شنو ما نكون ازعجانك وقطعنا نومك ؟ - نوم شنو يا خوي !! انا واقعة في مشكلة كبيرة - قولى بسم الله ,,, في شنو - انت ما ملاحظ انو النمل اختفا من الحوش ليهو مدة؟ - لا والله ,,, الصيام ده ما مخلينا نلاحظ اي حاجة - الجماعة كلهم فقدوا الغريزة بتاعتهم وبقوا بفكروا زيكم - ده كلام شنو ده ؟ ومالهم ,,! ,,,سببهم شنو ؟ - شموا ليهم حاجة كدة ما عارفاها شنو - دي حاجة شنو البشموها في رمضان؟ - بري ها ,,,, ما عارفاها شنو ,,,,, وكمان المضايقني اكتر شئ إنهم بقوا يبزغوا ساي ,,, ما خلو ليهم رصيف ولا بلاط ,, اخ , توف , طج طبج - دا ما زاتو الخلاني أخلى ركوب الحافلات ورا ,,, ترى جنس الرزاز الما معروف جاي من وين ده ,,, هسع انت عتعملى شنو ؟ - الخلا عادتو قلت سعادتو كو كرو ,,, كو كرو يدق الباب ,, الضرب ضرب ابي محجن ,, بل هي قرجة جارنا ابو قرجة الذي يدخل دون انتظار صدى قرجتة - ها ناس الموية دي طالقينها مالكوم
|
|
|
|
|
|