|
|
 Re: قصة .. اغتصاب شعب (Re: محمود محفوظ)
|
اغْتِصَــــــاب شَعـْـــــب
( الحلقة الخامسة )
يوم مشهود
كانت حوالي الحادية عشر ظهرا ً .. وقد كنت اعمل باستوديو مدرسة الفاروق ١ بحلفاية الملوك .. حينما حضرت الاستاذه / وجدان وقالت لي : _ ( يا استاذ .. في اتنين برة قالو دايرينك .. شكلهم كدة ناس امن .. وواقفه معاهم بره عربية بتاعت شرطة عسكرية ..
)
قلت : ( خليهم يتفضلوا
)
قالت : ( قلنا ليهم ، لاكين رفضو .. قالوا عاوزينك انت تجيهم ..
)
علي الفور .. تركت عملي وذهبت اليهم .. وما ان صافحتهم بالتحية سالوني عن اذا ماكنت انا محمود محفوظ ..
قال لي احدهم : ( لو سمحت .. عاوزينك ..
)
قلت : ( في شنو .. اتفضلوا ياجماعة )
قال : ( لا .. بس عاوزينك في مشوار قريب .. و حنرجعك تاني .. )
لمحت ان هنالك جندي شرطة عسكرية ينتظرهم بالخارج .. فاطماننت في ان البي رغبتهم بالذهاب معهم .
انطلقت بنا السيارة في اتجاه الخرطوم ، وما ان قطعت كوبري النيل الازرق حتي ادركت اننا متجهون الي القيادة العامة لقوات الشعب المسلحة ..
لثلاث مرات حاولت ان افهم شيئاً بسؤالي لمرافقي .. ولكنهما لم يردا علي سوي بكلمة واحدة .. ( خير انشاء الله
)
ما ان دلفت السيارة داخلة من احد البوابات الجانبية للقيادة العامة ، حتي تم ايقافنا ثلاث مرات ، ارتابت نفسي مع شعور بالاطمئنان تولد من التحية العسكرية التي كنا نتلقاها بمجرد ان يتحدث السائق مع نقطة التوقيف .
كانت المرة الاولي التي اشاهد فيها القيادة العامة للجيش من الداخل ..
ما ان وصلنا الي منطقة معينة حتي ، هدات السيارة من سرعتها .. اتلفت في جوانب المكان وانا في غاية الحيرة
.
وصلت السيارة الي مبني ضخم .. اكتظت جوانبه بكمية من الحرس .. كان جميعهم بزي الشرطة العسكرية المميز .. قرات اللافتة المكتوبة عند مدخل المبني : ( الادارة العـــــــامة
)
ايضاً لم افهم شيئاً .. اكبر ما تبادر الي ذهني هو ان احد الضباط الكبار يود الحاق ابنه بالفاروق ، او شئ مثل هذا ..
اسرع اثنان من الجنود بفتح ابواب السيارة ، ودعاني مرافقي الي التفضل بالدخول .. دخلت ذلك المبني الذي ترص علي جانبي ممراته من الداخل جنود الشرطة العسكرية في وضع ثابت و كانهم نسخة واحدة ..
من ممر الي ممر .. وفارقت مرافقي الذي سلمني الي مرافق آخر قادني الي مكتب كبير .. معظمه من الزجاج .. عرفني فيه مرافقي بضابط من رتبة عميد .. وقال له : ( ده الاستاذ محمود ..
)
اعتقدت انني وصلت لمقدم الدعوة اخيرا ً .. وقد نهض من مكتبه مبتسما مرحبا ً بي .. ممسكا بيدي بكلتا يديه ، وتحرك بي لخارج مكتبه ..
وعبر ممر طويل يكسوه السجاد الاحمر الفخم ، سار بي مرافقي العميد / الذي سالته .. (
فهمونا حاجة ياجماعة)
قال .. وهو يفجر ضحكة عالية : ( معقول .. معقول يا استاذ انت ماكلموك انت جايي وين ..... فضحكت معه
)
واكملنا ضحكتنا العالية ونحن ندخل مكتبا ً كبيرا ً .. وقف صاحبه الشاب مربوع القامة .. مفتل العضلات يرتدي الزي العسكري بآانق ما يكون .. مبتسما ً
قال العميد 
: تصور ياجـِلاس زولك ماعارف جايي هنا ليه )
: ضحك الرائد جلاس وهو يشد علي يدي بقوة قائلا ً : (
اهلا استاذ محمود .. معاك محمد هاشم جلاس. انا سامع بيك كتير ... وشايف العمل العظيم الانت بتعملوا .. .. والله ده يوم جميل انو الواحد الليلة قابلك شخصيا ً)
ولم املك الا ان اواصل ضحكي وانا اكرر ( .. والله انتو حيرتوني .. من حلفاية الملوك ولي هنا وانا بسال ، وما في جواب . )
قال جلاس : ( انت يااستاذ في مكتب رئيس الجمهورية ...)
رددت علي الفور : ( مكتب رئيس الجمهورية ... !!!)
قال : ( ايوه .. و الريس قال عاوز يشوفك .. وعندو معاك موضوع .)
كانت مفاجاة غير متوقعة مني .. واسرعت ارتب افكاري لاستوعب الامر ، ولاخمن .. ما الموضوع الذي عند رئيس الجمهورية معي
اجلسني جلاس علي كرسي وتقدم خطوتين من باب ضخم فتحه واطل منه للداخل مبتسما ً قائلا ً : ( استاذ محمود وصل .. )
واشار لي بالدخول
وتقدمت باتجاه الباب .. وما ان دخلت حتي اذا بي امام مكتب رئيس الجمهورية عمر حسن احمد البشير .. الذي وقف عن كرسيه حينما تقدمت منه وصافحني بقوة وبحرارة : ( اهلا استاذ محمود .. اهلا .. مرحب بيك .. اتفضل ..اتفضل .)
وجدت نفسي امام انسان طيب .. متواضع ..
طلب لي كوب من مشروب الكركدي البارد .. وبدا بفتح موضوع مدارس الفاروق في صورة تساؤل : )
في الحقيقة انا سمعت عن مشروع المدارس بتاعتك .. وعرفت انها ماخده صدي واسع في المجتمع .. انا ماعارف الفكره شنو ؟؟ فنسمع منك ..(
شرحت له الفكرة العامة للمدارس .. تحدثت عن التدهور في مجال التعليم العام ورغبتي في وضع نموذج للمدرسة الاساسية يمكن ان يحتذي او يؤخذ كمرجع
سالني عن اي صعوبات تواجه العمل .. فاوضحت سروري الشديد من عملي تحت مظلة الادارة العامة للتعليم برئاسة د. معتصم عبد اللرحيم وكذلك الوزير الاستاذ حسن عثمان رزق .
اتكا البشير علي كرسيه .. و شعرت انه يبدا الموضوع الذي احضرت من اجله قائلا : )
كلمني حسن عثمان رزق عنك ، واداني فكره عن مدارسك .. رايك شنو في انك تعمل فرع بمنطقة القيادة العامة .. عشان اولاد الضباط والموظفين ..(
اجبت 
والله دي مشكلتنا الآن ، في انو في كتير من الاولاد بجو من الخرطوم لحلفاية الملوك وشمبات .. فلو وجدنا فرصة زي دي .. يكون ساعدنا كتير من الاسر ..(
وعد بتقديم المساعدة عند الشروع في هذا الامر
قال
ابدا معاك الموضوع .. اللي عاوز آخد رايك فيهو كراجل عندك خبره في مجال التعليم الخاص ..
في الحقيقة قبل فترة كنا في عطبره .. وحضرنا حفل لتكريم حفظة القرآن الكريم .. وكان في طفل .. اسمو الطاهر .. لفت نظري ، عمرو حوالي تسعه سنوات ، الولد ده من شرق السودان .. حفظ كل القرآن الكريم من عمرو ستة سنوات .. بالاضافة لعدد كبير من الاحاديث النبوية .. وهو ذكي ذكاء خارق ، ابوه متوفي ، انا جبتو معاي الخرطوم .. معاي في البيت .. و بعد فترة زارنا جده .. الولد ابي يرجع معاهم .. فجدو وافق انو يخليهو لينا هنا .. انا شخصيا بتباخت بيهو .. ففكرنا في مستقبله .. هل نلحقه بمعهد ديني ، وللا نوديهو المدارس العادية ، طبعا حينسي الشي الحافظه(
واصل الرئيس
قبل ايام في رمضان .. كنا عاملين افطار جماعي .. هنا في القيادة العامة .. وكان الطاهر موضوع النقاش .. وفي الحقيقة انا كنت قلقان .. خوفا من مرور الايام ونسيان القرآن .. وانشغاله باللعب .. وكان جنبي الاستاذ سبدرات - وزير التربية الاتحادي - وكنا بنتناقش في الحاقه بالمدارس الابتدائية ومشكلة ان عمره كبير علي الصف الاول الابتدائي .. فقام سبدرات بسؤال استاذ حسن رزق بصفته الوزير الولائي .. استاذ حسن قام ذكرك .. واتكلم عن تجاربك السابقة .. والمدارس بتاعتك .. ووعدنا بانو يتكلم معاك في الموضوع ده ، انا الليله استعجلت وقلت اقابلك شخصيا و آخد رايك .. )
هل الولد ده ممكن ياخد مقررات المرحلة الابتدائية
؟؟ وفي كم من الزمن .. مع العلم بانه ضعيف المعلومات في اللغة العربية والرياضيات .. وطبعا مافي تاريخ ولا جغرافيا ولا حاجة ..
تلخص حديثي عن تجربتي السابقة في اختصار سنوات التعليم .. وان ذلك يتوقف علي عقلية التلميذ ومدي استعداداته للتلقي .. وان هذا الامر لايمكن ان اتحدث عنه الا بعد اسبوع من الاختبارات .. يتقرر بعدها حجم الجرعات المناسب توصيلها له وزمن الفترات الدراسية اليومية ، بالاضافة الي دراسة الحاقه بصف دراسي معين ،، مع متابعته بكم معين من الدروس الخاصة ..
عليه تم الاتفاق علي ان يتم احضار الطاهر في اليوم التالي لمدرسة الفاروق ١ واخذه في الخامسة مساءا ً ..
و انتهي اول لقاء لي مع رئيس الجمهورية بوصية منه علي ان يعامل معاملة عادية كاي تلميذ بالمدارس ..
وودعته وانصرفت
في اليوم التالي قمت بعمل اجتماع مصغر مع مدير مدرسة الفاروق ١ الذي طلبت منه اجراء اختبارات مفصله عن قدرات التلميذ الجديد / الطاهر اوهاج محمد .. بالاضافة الي وضع مادار بالامس موضع السرية ، وذلك مؤقتا ً حتي تخرج التقارير صادقة عن مستواه الحقيقي .. وعدم سلوك اي خصوصية من المعلمين في التعامل معه .
بنهاية الاسبوع تمت دعوتي الي لمكتب الوزير حسن عثمان رزق الذي سالني عما دار بمكتب رئيس الجمهورية .. والتقرير الذي تم اعداده عن التلمذ الطاهر .. قمت بتسليمة التقرير بصورة الي البشير .
تم العمل مع التلميذ الطاهر بالخطة الموضوعة من قبل ثلاث معلمين خصوصيين ، اضافة الي الحاقه بالصف الرابع الابتدائي لعامين دراسيين متتاليين
كان لالحاق الطاهر بالفاروق الاثر الكبير في اجتذاب كثير من ابناء جنود وضباط القوات المسلحة وابناء المسؤولين بالدولة .. مما ادي دعم موقف الفاروق ،
كذلك ادي فيما بعد الي فهم خاطئ في اوساط العامة من ان الفاروق مدارس مدعومة من النظام
.. مع العلم بانني لم اتلق جنيها واحدا ً كدعم للمدارس جراء علاقة المدرسة برئاسة الجمهورية او الجهات الحكومية الاخري ..
وقد ادي تسرب اشاعات علاقتي بالنظام و معرفتي القوية بالبشير فيما بعد الي حياكة مخططات في غاية الاتقان تعتمد علي التهم المتعلقة بالخيانة العظمي والتجسس كضمان لعدم تدخل رئيس الجمهورية او اي من معارفي واصدقائي من المسؤولين ، اضافة الي التهم الاخلاقية الغريبة التي تخدم نفس الغرض اضافة لتدمير سمعة المدارس .
بداية التصادم
في الحلقة السادســـــة
|
|
 
|
|
|
|
|
| العنوان |
الكاتب |
Date |
| قصة .. اغتصاب شعب | محمود محفوظ | 04-17-04, 07:29 PM |
| Re: قصة .. اغتصاب شعب | اساسي | 04-17-04, 07:45 PM |
| Re: قصة .. اغتصاب شعب | محمود محفوظ | 04-17-04, 08:33 PM |
| Re: قصة .. اغتصاب شعب | ali othman | 04-17-04, 09:36 PM |
| Re: قصة .. اغتصاب شعب | عبدالله | 04-17-04, 09:53 PM |
| Re: قصة .. اغتصاب شعب | Deng | 04-18-04, 00:32 AM |
 Re: قصة .. اغتصاب شعب | محمود محفوظ | 04-21-04, 06:54 AM |
| Re: قصة .. اغتصاب شعب | محمود محفوظ | 04-21-04, 07:12 AM |
| Re: قصة .. اغتصاب شعب | محمود محفوظ | 04-21-04, 10:07 AM |
| Re: قصة .. اغتصاب شعب | محمود محفوظ | 04-21-04, 10:43 AM |
 Re: قصة .. اغتصاب شعب | ahmed haneen | 04-21-04, 07:22 PM |
| Re: قصة .. اغتصاب شعب | محمود محفوظ | 04-21-04, 10:37 PM |
| Re: قصة .. اغتصاب شعب | محمود محفوظ | 04-22-04, 08:02 AM |
| Re: قصة .. اغتصاب شعب | محمود محفوظ | 04-22-04, 08:41 AM |
| Re: قصة .. اغتصاب شعب | Shinteer | 04-22-04, 03:32 PM |
| Re: قصة .. اغتصاب شعب | haleem | 04-24-04, 10:07 AM |
| Re: قصة .. اغتصاب شعب | محمود محفوظ | 04-24-04, 11:35 AM |
| Re: قصة .. اغتصاب شعب | haleem | 04-24-04, 11:42 AM |
| Re: قصة .. اغتصاب شعب | محمود محفوظ | 04-24-04, 12:00 PM |
| Re: قصة .. اغتصاب شعب | haleem | 04-24-04, 01:20 PM |
| Re: قصة .. اغتصاب شعب | AnwarKing | 04-24-04, 03:02 PM |
| Re: قصة .. اغتصاب شعب | zozo | 04-25-04, 03:50 AM |
| Re: قصة .. اغتصاب شعب | haleem | 04-25-04, 07:53 AM |
 Re: قصة .. اغتصاب شعب - الســـابعة | محمود محفوظ | 04-26-04, 08:18 AM |
| Re: قصة .. اغتصاب شعب | محمود محفوظ | 04-28-04, 10:14 AM |
| Re: قصة .. اغتصاب شعب | سارة منصور | 04-29-04, 03:38 AM |
| Re: قصة .. اغتصاب شعب | سارة منصور | 04-29-04, 06:28 AM |
| Re: قصة .. اغتصاب شعب | محمود محفوظ | 05-04-04, 01:24 PM |
|
| |
فيس بوك
تويتر
انستقرام
يوتيوب
بنتيريست