نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
حـكايـة الـبـت الأدتنى شـاكــوش (Re: ناجى الزبير الملك)
|
عـم إسماعيل ما جاء طالع .. دي ما من عاداتو .. دايما بلقاهو واقف في الباب منتظرني .. وفي نفس الحظة .. بصادف ورده طالعة بي عربيتها .. نزلت دقيت جرس الباب .. بعد زمن جات ورده طالعة .. من الواضح انها يادوب قامت من النوم .. إتذكرت نظرية حبوبتي عن جمال المـرأة .. ياولدي .. البت لو عايـز تعرف سماحتا .. شوفا لمن تكون قايمة من النوم .. ورده كانت جميلة خالص .. رغم اثر النعاس في عيونها .. كانن ناعسـات .. صـباح الخـير يا عسـل .. وين أبوك .. برضو نايم .. لا أمس باليل .. ضربو لينا ناس عمي أحمد من البلد.. قالو حبوتي إتلحسـت .. انشاءالله البركة فيكم .. لكن دا كلام شنو البتقولبهو دا .. إتلحست .. دا كلام شماسة .. لا .. هي اصلها مـرا كبيرة ومخرَفـة .. من زمان ميته ميته .. وهسـع عـم إسماعيل وينو ؟؟ أبوي من الدغش سـافر .. و أنتي مالك ما لابسة .. ما ماشة الكلية ؟؟ لا .. الليلة ما عندنا محاضرات .. بمشى بعدين .. الساعة اتنين للمستشفي .. فجاءة خطرت لي فكرة .. خلاص .. أمشي كملي نومتك .. وزي الساعة حداشر تعالي لي في الشركة .. ومنها تمشي المستشفي .. أول ما ختيت كـراعي في الشركة .. ناديت يعقوب الفراش … تعال رتب المكتب تمام .. خليهو يلمع زي الورقة .. ضحكت من نفسي في كلمة زي الورقة .. هي الورقة بتلمع !!! مشيت مكتب الحسابات عشان اكلم الدابي بغياب عم إسماعيل .. جيت راجع لقيت المكتب بقي يلمع زي الورقة .. لأول مرة شفت زهرية مليانة ورود في نص تربيزة الإجتماعات .. قعدت في الكرسي .. اتناولت الورقة والقلم .. بديت أكـتب .. السيد مديــر الحسابات بالإنابة .. بهذا قد تقرر صرف مرتب نصف شهر .. للعامل يعقوب أدريس .. تحفيزا علي خدماته الجليلة .. وذلك خصما علي بند الحـوافـز .. قبل ما أتم التوقيع .. جا يعقوب داخل .. إتلفت يمين وشمال .. نظراتو اتسمرت علي الزهرية .. كيف يا سعادتك .. كدا تمام .. تمامين يا يعقوب .. شيل الورقة دي وديها لي الدابي .. عاينت لي ساعتي .. ما قدرت أشوفـها كـويس .. رفعت راسي وعاينت لي ساعة الحائط .. شوكة الساعات ما كانت بتتحرك .. ركزت علي شوكة الدقايق .. لقيت حركتها بطيئة .. حولت تركيزي لي شوكة الثواني .. إتـنـهـدت بإرتيـاح .. لقيت نفسي خاتي يديني في طرف التربيزة ومجنَح .. زي العايز يقوم علي حيلو في أي لحـظـة .. قـمت مشيت للمكتبة .. سحبت أول كتاب قابلني .. إغـراءات وردة النـار .. لماجـد البلداوي .. عـشوائيا فتحت صفحة .. بديت أقـرأ في جزء أخير من قصيدة …
انـهـا المـقـصـــلة .. ســاعـتي قـد أوهــنت رقـاصــــها .. وأغـلـقـت باب الزمــن فمن سيلحق الخـيول النافــرة ويـعـلــن المـســافـــــة !
صوت الباب لمن فتح .. قطع حبل أفكاري .. دخل يعقوب .. مبتسم ابتسامة عريضة جواها نوع من الخبث .. جوك ضيوف يا سعادتك .. قاعـد براهو .. إتفضلي خشـي .. دخـلت الورده .. في الوكت دا كنت أكملت مطلع قصيدة إغـراءات وردة النـار
سـأفهرس المتاحــف مـدنـا للشـيخوخـة وأتـرجـم الفـراغ .. هـديلا للنـوافــذ منـذ تيبـَســت كـفـَـاى أغــريت النبـاح بالزكــام … وهـيأت الـوردة مـقـتلا للجفاف
يعقوب .. قبل ما اقول ليهو اتخارج .. طـلع وقفل الباب وراهو .. لقيت نفسي بسلم عليها بالأحضان .. عيونها الكاتلاني زادن وسـاع .. اتملن بالدهشــة .. بسـرعـة نزلت يديني .. مديـت يدي ومسكت إيـدها .. ما فكيتها إلا لمن قعدت في الكرسـي .. أهــلا بالعســل .. والله الشــركـة نـورت .. لو عارفين كدا .. كان كلمنا جـماعة الكهربا يقطعوها .. أو نقول لي العميد .. يلغي قصـة المحاضـرات خـالص .. سـمعت صوت الآذان . رفعت راسي وعاينت للساعة .. شوكة الساعات كانت بتتحرك .. مش معقول .. أربعة ساعات مرَو بالسرعة دي .. لعنت في سري .. اينشتاين والنسبية .. أربعة ساعات كانو من أحلي سنين عمري .. اكتشفت حاجات في وردة .. ما عرفتها طول السنين الفاتت .. عرفت أنو ورده .. كل يوم بتتولد في جـواي من جـديد .. شدتني بي اسلوبها في الأنتقال من موضوع لي موضوع .. أكتر حاجة عجبتني فيها .. كلامها عن الإسـلام العصرى .. مفهومها للحجاب وعمل المرأة .. من جـمال الدين الأفغاني نمشي لي أسامة بن لادن .. ومن روجيه جارودي .. نرجع لي أبو حنيفة .. إتكلمنا عن الحب والغزل في أشـعار العـرب .. وجهجة المتنبي في بحثو عن السلطة .. في الساعات الشوية دي .. و بالقدر الكبرت بيهو ورده جواي .. صغرت أنا في نفسي .. حسيت بي سطحيتي .. ونفختي الكضابة .. حتي بديت أِشــك .. انو الجالس مع وردة .. ما أنا .. قفلت باب الفلكسواجن واتلفت وراي .. شفت الموظفين كلهم واقفين .. يصورو في لحظات الوداع .. مشيت مدنقر لحـدي مل دخلت مكتبي .. قـريت في عيونهم .. المـدير الهراش يتـهــزم في معركة متكـافــئة
آهـ يا ورده .. زمان ما كنت بدعو ليك .. لكن الليله بدعو عليك
و مازال للحكايـة بقيــة
|
|
|
|
|
|
|
العنوان |
الكاتب |
Date |
حـكايـة الـبـنت الأدتـنى شـاكــوش | Ali Alhalawi | 05-12-04, 01:11 PM |
Re: حـكايـة الـبـنت الأدتـنى شـاكــوش | سجيمان | 05-12-04, 01:48 PM |
Re: حـكايـة الـبـنت الأدتـنى شـاكــوش | الرشيد أحمد القاسم | 05-12-04, 02:17 PM |
Re: حـكايـة الـبـنت الأدتـنى شـاكــوش | الرشيد أحمد القاسم | 05-12-04, 02:18 PM |
Re: حـكايـة الـبـنت الأدتـنى شـاكــوش | Ali Alhalawi | 05-12-04, 03:00 PM |
Re: حـكايـة الـبـنت الأدتـنى شـاكــوش | Ali Alhalawi | 05-12-04, 03:05 PM |
Re: حـكايـة الـبـنت الأدتـنى شـاكــوش | ابو جهينة | 05-12-04, 03:28 PM |
Re: حـكايـة الـبـنت الأدتـنى شـاكــوش | Ali Alhalawi | 05-12-04, 03:56 PM |
Re: حـكايـة الـبـنت الأدتـنى شـاكــوش | Raja | 05-12-04, 03:38 PM |
Re: حـكايـة الـبـنت الأدتـنى شـاكــوش | Ali Alhalawi | 05-12-04, 04:03 PM |
Re: حـكايـة الـبـنت الأدتـنى شـاكــوش | THE RAIN | 05-12-04, 03:39 PM |
Re: حـكايـة الـبـنت الأدتـنى شـاكــوش | Ali Alhalawi | 05-13-04, 12:39 PM |
Re: حـكايـة الـبـنت الأدتـنى شـاكــوش | مريم بنت الحسين | 05-12-04, 04:03 PM |
Re: حـكايـة الـبـنت الأدتـنى شـاكــوش | Mamoun Zain | 05-12-04, 05:07 PM |
Re: حـكايـة الـبـنت الأدتـنى شـاكــوش | Ali Alhalawi | 05-12-04, 05:31 PM |
Re: حـكايـة الـبـنت الأدتـنى شـاكــوش | ابو جهينة | 05-12-04, 05:38 PM |
Re: حـكايـة الـبـنت الأدتـنى شـاكــوش | عوض الله الفولانى | 05-12-04, 06:10 PM |
Re: حـكايـة الـبـنت الأدتـنى شـاكــوش | Ali Alhalawi | 05-13-04, 12:45 PM |
Re: حـكايـة الـبـنت الأدتـنى شـاكــوش | Ali Alhalawi | 05-13-04, 12:21 PM |
Re: حـكايـة الـبـنت الأدتـنى شـاكــوش | مريم بنت الحسين | 05-12-04, 06:00 PM |
Re: حـكايـة الـبـنت الأدتـنى شـاكــوش | Ali Alhalawi | 05-13-04, 12:26 PM |
Re: حـكايـة الـبـنت الأدتـنى شـاكــوش | Ali Alhalawi | 05-13-04, 12:27 PM |
Re: حـكايـة الـبـنت الأدتـنى شـاكــوش | طيفور | 05-13-04, 03:55 PM |
Re: حـكايـة الـبـنت الأدتـنى شـاكــوش | مريم بنت الحسين | 05-13-04, 05:37 PM |
Re: حـكايـة الـبـنت الأدتـنى شـاكــوش | Ali Alhalawi | 05-14-04, 05:03 PM |
Re: حـكايـة الـبـنت الأدتـنى شـاكــوش | Ali Alhalawi | 05-14-04, 05:06 PM |
Re: حـكايـة الـبـنت الأدتـنى شـاكــوش | طيفور | 05-14-04, 05:45 PM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:28 PM |
Re: حـكايـة الـبـنت الأدتـنى شـاكــوش | مريم بنت الحسين | 05-14-04, 06:46 PM |
Re: حـكايـة الـبـنت الأدتـنى شـاكــوش | ناجى الزبير الملك | 05-15-04, 01:28 AM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 06:11 PM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:24 PM |
Re: حـكايـة الـبـنت الأدتـنى شـاكــوش | خالد الأيوبي | 05-15-04, 04:09 AM |
Re: حـكايـة الـبـنت الأدتـنى شـاكــوش | Kostawi | 05-15-04, 05:23 AM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 06:04 PM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:43 PM |
Re: حـكايـة الـبـنت الأدتـنى شـاكــوش | AnwarKing | 05-15-04, 08:47 AM |
Re: حـكايـة الـبـنت الأدتـنى شـاكــوش | tasneem | 05-15-04, 10:10 AM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:16 PM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:55 PM |
Re: حـكايـة الـبـنت الأدتـنى شـاكــوش | Ali Alhalawi | 05-17-04, 05:48 PM |
Reمسلسل الشاكوش | Ehab Eltayeb | 05-18-04, 04:17 AM |
Re: Reمسلسل الشاكوش | Ali Alhalawi | 05-18-04, 03:31 PM |
Re: Reمسلسل الشاكوش | Ali Alhalawi | 05-18-04, 03:36 PM |
Re: Reمسلسل الشاكوش | Ali Alhalawi | 05-19-04, 04:05 PM |
Re: Reمسلسل الشاكوش | ودقاسم | 05-19-04, 04:33 PM |
Re: Reمسلسل الشاكوش | Ali Alhalawi | 05-19-04, 05:32 PM |
Re: Reمسلسل الشاكوش | المسافر | 05-19-04, 10:05 PM |
Re: Reمسلسل الشاكوش | ناجى الزبير الملك | 05-19-04, 11:50 PM |
حـكايـة الـبـت الأدتنى شـاكــوش | Ali Alhalawi | 05-20-04, 04:49 PM |
Re: حـكايـة الـبـنت الأدتـنى شـاكــوش | مريم بنت الحسين | 05-20-04, 11:37 PM |
Re: حـكايـة الـبـنت الأدتـنى شـاكــوش | haneena | 05-21-04, 00:01 AM |
Re: حـكايـة الـبـنت الأدتـنى شـاكــوش | صديق الموج | 05-21-04, 05:55 AM |
Re: حـكايـة الـبـنت الأدتـنى شـاكــوش | Ali Alhalawi | 05-21-04, 02:16 PM |
|
|
|