**** في حلتنا وتحت ضل نيمتنا ****

Quote: ود عمى الموج كيفنك سنه حلوه عليك وعلى ست بيتك وعقابك جيت يعلم الله من بكان بعيييييد اجرجر فى كرعينى باقى رطوبة البلد دى اظنها سوت لى روماتزن جاى اشحد الله اللمة ما تكون فرتكت لكن ما شاء الله وتبارك الله الخلق منداحة وريحة القلوة راشه الساحه الوجوه وضاحه والنفوس مليانه ود وسماحه سوما وود الموج شكيتكم على راجل الزريبة يزربكم بى شوك صنط فى شان ما تمرقوا من الضل البارد ده ضلها باااارد آآآآ عل انا بحس بيهو فى عضامى هجير وسموم لى هسى اسعلونى مالك؟ عمرى 7 سنه وود عمى احمد زايد منى بى سنتين جيت ساكيه من نص الحله اخسم فيهو بالتكسروا وتدشدشو يدينى نفس باقى هو كان قادى ليهو قصبة عيش ناشفه بعد ما نقاها ومولعا زى السجاره هو يبطرع وانا عاضى جلابيتى وجارى وراهو فى ضل النيمه كان قاعد خالى ( الله يغمد روحو الجنة) يتوضأ لى صلاة العصر كحلنا ليك جارين ودخاخين القصبة مدخنة قطر تعالوا تعالوا هنا ود عمى قدامى وقف وانا ما شايف خالى جيت توش كابسو ليك من الخلف فرامل مافى قبضتك ياود الكتكه ،،، لمن القصبة بى نارا وقعت تل قدام كرعين خالى عاد العيون ما مرقت متل البلى واحس ليك الواطا رمضا تحت كرعينى حااااره نار تنجض فينى مع اننا كنا واقفين فى ضل النيمه بتشربوا السجار آآآآ جنيات !!!!!! يوسف ،،، هوى آآآ يوسف ناولنى سوط العنج ده يوسف ود المبارك دا (الله يرحموا) كان عندو كارو موديل 60 مكنتا حصانيييييين عندو سوط عنج بتمسّح معاه كل يوم بالليل بى زيت السمسم وبرقدو جنبو تشيل جناهو ولا تشيل السوط منو ساق شجرة النيم ديك لببونا ليهو وود المبارك ما سك ايدين الواحد فينا بالجهة التانية بالدور خالى نزل فينا عشره سيطان لى هسى وسمهن فوق ...... من الزمن داك دحين ياود الموج اكان درتنى باكل ليك النيم لكن حلفت ما بقعد فى ضلها عل ام العيال نيمتها راوياها بالمحنة والسمحين الملمومين فيها ديل خلوا ريحتها طلح ويانى المتفرجخ فيها