**** في حلتنا وتحت ضل نيمتنا ****

Quote: بت الجنيد سلام طبعا جابتنى الونسه مع الحبوبات والضل البارد ده شايل لى جريده فوق راسى من الهجيره وصارى عين من الشمس ووراى شافع سايق ليه لستك ترتار،وكان ما مسكته كان كشح ليك الجبنه فى هدومك مع انه حبوبتى قالت القهوة كان انكشحت فى هدوم الزول جاياه قروش.. يعنى مسكته حساده منى ساكت... وشايف حبوبتك رابطه راسها بى دلقان اخدر..نعلها عافيه... وطبعا حبوبات زمان كان لما تقعد جنب الواحده فيهن ريحه حلوه خلاص.. مزيج من الصندليه والبن والكركار وبخور التيمان والمحلب.. والله يا سوما اتذكرت ريحة توب حبوبتى .. احى يا الغربه بت ال ك ل ب.. انشاء الله تعقرى... اها انا مره قاعد مع حبوبتى طيبه بت ود عمار فى ضل نيمتنا جات قمريه ركت فى النيمه وبتقوقى.. وكان الكلام ده فى نص عهد نميرى وبداية الغلاء، والبنزين والعيش بالصفوف وانعدام المواد التموينيه.. جاز..بصل...زيت...صلصه.. كلهن فى شبه المعدوم .. المهم حبوبتى دى كانت مره حكيمه خلاص الله يرحمها قالت لى يا الصديق ياولدى مالو نضم قمريكم ده مازى نضم قمرى زمان؟؟ قلت ليها كيف يا حبوبه؟ قالت لى زمان قمرينا كان بقول احمدو ربكم ..احمدو ربكم،، قلت ليها ماتراها قمريتنا بتقول احمدو ربكم.. قالت لى برى وحات الحاج القلمو ما ظلمو.. (الحاج ده خالى كان ضابط بوليس فى المناقل.. اسمعى قلمو الما ظلمو دى..طبعا ماساله فى بروف عنده دكتوراة فى تخصيب اليورانيوم او علم الجينات) المهم قالت لى.. تاخد الحاج قمريكم ده يتوارى لى بقول بطريقتكم ..بطريقتكم..بطريقتكم.. ضحكت فعلا قمرينا بدل غناهـ... لكن اظن الزمن البقينا ندق فيه بناتنا فى اقسام البوليس ده.. بقى يقول سجم اماتكم..سجم اماتكم..واللا الترابه فى خشمكم.. ايهم اشبه بهذا الزمن القمىء.... اها النجيك واوريك ونسة جاراتنا حبوبات كده.. ود محاسن بتى وديناهـ الاسبتايله ..وسوا ليه صورة الاشاعه.. لقو عنده انتهاب رووى.. تنط التانيه دحين ما كتبولو مضاد حلوى؟؟ شن خبرنى غايتو صرفولو كباسين حمر كده.. اى ياهو المضاد الحلوى بنفعو لكن.. اسماء الجنيد خسمتك بالرسول ما تفوتى من الضل ده وانقلي البوست ده عشان الشرشفه واللا الشحتفه حقت بكرى ابصلعه ده انا مسميها هادم اللذات ارشفتو دى.. نلاقيك من الارشيف يا حبوبة اسماء، وجرى الفاتح على الضل ده.. باقى هو ود حبوبات بدرجة فارس ليك وليه وللعيال تحياتنا،،،