*** حج بنو جكة ***

Quote: يا قول حبوبتي الله يرحما: يهووووون الله. والله ياهو الفضل. ومرات تقول: بِدع يا بلآل، عندما يكون الأمر عجب. دايرين لينا عريبي متخلف من السعودية يجي يالرآآآآآآحة يدخل في كعبتم دي بي ضهر ليل، ويقول كدي يتبرز ويزوغ. أها، النهار البشير وكت يكلموهو، يقول كدي يلِم الناس في الساحة الخدرا. بعد يرغي ويزبد يكشحلوا كم طلآق في فضاء الساحة الخدرا، ونضر فوقوا حقت السعودية إلا يخليها صعيداً زلقا. الجماعة يطرحولهم كم عطاء لإستيراد أفيال من الهند، وطبعاً العطاءات دي حاتكون صورية سااااكت لأنو السيّد المتعافن زمااااان جاب الفيلة وقبض الفي النصيب. أها بعد داك بيكونوا دايرلهن دليل. دي طبعاً حا يتنافسو فيها طبالين السعودية لكن الأقرب إليها ولدنا عمر أطال الله عمره نسبةً لأنو الناس ديل ما بيبقوا بلآهو. أها قطعتُن البحر اللحمر شاحد المولى الكريم يلِم فوقهم الطير الأبابيل يعدِمُن نفاخة النار. مُنتهى السفه والإستهتار بالدين. كلوووو سكتنا عليهو كمان جاتنا كعبة؟؟؟!!! السعودية دي فيها الآف المطوعين، والنت فيهو ملآيين المواضيع والفديوهات المصورة البتوضح مناسك الحج والعُمرة. خلآس يعني إقمتم العدل في الأرض ونشرتوهو بين الناس وبقى ان تلتفتو لتعليم الناس مناسك الحج بهذه الطريقة التي لا تخلو من الإستهتار؟؟؟!!! عليكم الله من هسّع ورونا منو الحايجي بكرة يقولنا ما أُريكم إلا ما ارى ولا أهديكم إلا سبيل الرشاد. اتوقع ان يقوم بهذا الدور السيّد علي عثمان نسبةً لما لديه من إمكانيات كبيرة في مجال المكر والدهاء.