خمسون دولار دعما لاتحاد طلاب جامعة الخرطوم الجديد

الاخوة الأعزاء .. طابت أوقاتكم

علي بالدين والايمان كلامكم ده كلو ما كلام زول عاوز يدعم ولا حاجة .. كلام ما عملي بالواضح كده. وكما قال الأخ أحمد أمين .. الاتحاد ده ما عندو حساب؟ وحتى لو ما عندو .. مش ممكن اي واحد يتصل بيه ويديه الحد الأدني من النقد المطلوب لفتح حساب في اي بنك؟ وبعد داك كل زول وضميره .. يرسل البيقدر عليه

أنا شخصياً لم اعوّد نفسي على الهروب من المساهمة في الموضوعات التي تستحق المساهمة .. لكني غير مقيم في اي من البلاد الذي ورد ذكرها في هذا البوست

وبالواضح كده .. وولله العظيم لو كنت قارون .. ولو مكلت خزائن الدنيا والآخرة .. ما ارسل قرش واحد لهذا الاتحاد. هذا الاتحاد الذي سمعنا فيه عن تآمر القوى الطائفية والمتخلفة على القوى الحديثة حتى في داخل التحالف الواحد .. أنا سوف لن أذرف عليه دمعة إن أفلس أو تبخر في الهواء

ولكم الشكر .. بس عليكم الله حاولوا ابتعدوا عن حركات القوى الحديثة دي .. نعمل لجنة عشان تنبثق منها لجنة فرعية واللجنة المنبثقة تنبعج منها لجنة بت حرام .. واللجنة بت الحرام المنبعجة عن اللجنة المنبثقة تختفي عن الأنظار ولا أحد يعرف مصارف ما جمعته .. وفي النهاية الجهود كلها تكون استهلكت في تكوين اللجان واللجان المنبثقة. سووا الشغل عديل .. اتصلوا برئيس الاتحاد .. وقولوا ليه ياخي افتح ليك حساب في بنك الجن أو اي بنك .. وبعد داك أكتبوا رقم الحساب هنا .. وكل زول وضميرو وحرصو ويدفع

انتو بالمناسبة بتحتاجو لكانتونا في الموضوع ده

مع السلامة

(عدل بواسطة Shinteer on 09-23-2003, 12:05 PM)
(عدل بواسطة Shinteer on 09-23-2003, 12:06 PM)