الـملحمـة النوبية بقلم البروفيسور عبدالرحمن إبراهيم محمد

كتير أنا بحتار وبتساءل: الناس ديل بيقصدوا شنو بالمثقفين النوبيين؟

هم منو؟ المتعلمين؟ المعا الحكومة وللا الفى المعارضة؟

هل عندهم حزب وللا منظمة؟ والحكومة بتمنع قيام أى تنظيمات تخدم المواطنين؟

بعدين متين حكومة البشير بتسمع لى رأى أى زول؟

ما هو شغلهم شغل فوضى بتحسب المنافع المالية الشخصية قبل إعتبار لأى منطق: الصق ونفذ وبعدين تعال لتق وللا صلح ولما ينهار المشروع يخلوهوا خردة. وين الخطوط الجوية السودانية أول وأعظم خطوط فى أفريقيا؟ وين الخطوط البحرية السودانية اللى كانت من أوائل الأساطيل العربية والأفريقية وفى منتهى الكفاءة؟ وين مشروع الجزيرة أكبر وأنجح مشروع فى العالم وفى تاريخ المشاريع الزراعية فى كل العالم؟

بالله مش حاجة محزنة الحصل فى سد مروى. دراسات فطيرة تفقد أقل مقومات التخطيط الإستراتيجى. وتنفيذ عشوائى لقبض العمولات ورسو العطاءآت. وبدون أى إعداد لمناطق الرحول وغياب أقل مقومات الحياة اليومية وتوفير المياه لرى المحاصيل والشتول. كردوا الناس كرد وهجروهم. وماتت زراعتهم واتعطلت دراسة الاطفال لانو المدارس ما اكتملت، والخدمات الصحية مافى. فالناس المريضة تموت وما فى رعاية صحية. وشوف المقاولين خموا قدر شنو من أموال السحت. والمشروع والسد فشلوا

وجايين يكرروا نفس المسخرة فى 3 سدود مش واحد. عشان شنو؟ والمشاريع أساسا زى ما وروهم "المثقفين" المتخصصين إو المشاريع والسدود دى ما ليها أى جدوى إقتصادية ولا بتقدم أى فائدة لاهل المنطقة وإنما حتشردهم وتدمر آثار حضارية العالم كلوا بينظر ليها بإنها رايحة تغير اسس التاريخ بالنسبة لكل العالم. ومصدر لأعظم مدخول سياحى لو تم إكمال المشاريع التنقيبية والترويج للسياحة بدل تدميرها إلى الأبد. لكن الحكومة رافضة تسمع صوت العقل. فى شنو؟ عشان عمولات باعوا بيها الأراضى مقدما؟

عشان كدا ما فى أى معنى ناس الحكومة يجو يقولوا المثقفين يطوروا المنطقة. يطوروا المنطقة كيف؟ وهم أمكانياتم شنو؟ وهم أساسا مصنفين أعداء للنظام، وأغلبهم أحيل لكذبة "الصالح" العام. وأعتقلوا وشردوا وطوردوا. والمحزن أنو اتصرفت الملايين على تعليمهم وتأهيلهم لكين جو وطردوهم من وظائفهم وحرموا أسرهم من عائلينهم. ليه؟ لانهم بيعارضوا الخطأ والفساد، وماكيزان. والنتيجة الليلة هم أساتذة فى أرقى الجامعات ومهندسين وأطباء فى اعظم المستشفيات فى الدول المتقدمة. ليه؟ لأنو الحكومة الظالمة شردتهم.

بس هل هم نسوا أهلهم وما قدموا حاجة لمناطقهم؟ جاييكم بالتفصيل.