الـملحمـة النوبية بقلم البروفيسور عبدالرحمن إبراهيم محمد

كتر خير البروف اللى رغم إحتضان أرقى الجامعات والمنظمات العالمية ليهو بعد ما فصلوه عديمين الضمير ما نسى حبو الأول لى أرضه ولى أهله. والله لو تعرفوا قامة الرجل دا ما بتجو تكتبو كلامكم الفارغ دا. ياخى دى قصيدة أجمع كل الناس إنها من أرقى ما أتكتب من الشعر ولخصت تاريخ وعطمة ومآسى النوبة فى أجمل تصوير.

أنا عندى شعور قوى جدا إنو كل أسماء المتداخلين هى لزول واحد بغرض التمويه أو هم فعلا أكثر من زول لكن صرفو ليهم نقاط للكتابة حولها (سكريبت يعنى) وما عندهم أى علاقة بالنوبة وما شافو أى حتة فى النوبة فى حياتهم. وكل الكلام عن "ألعن أبو الأنقاذ" كلو تضليل بس. وكل المداخلات وكلامها الفارغ بتتلخص فى أربعة نقاط:

1- الأشعار كلام فارغ وما بتجيب فايدة

2- الناس مضللين ودايرين يهاجرو من أرض النوبة القاسية

3- المثقفين ما عملو أى حاجة

4- الحضارة ماتت

طيب أولا:

1- الظاهر أنو رئيس قسمكم ما عندو معرفة عن قيمة الشعر فى إثبات الهوية وتعبئة الناس للعمل والإبداع. أرقى جامعات العالم بتخصص أقسام كاملة للشعر وكل دولة عندها جوائز سنوية للشعر وكل بلد عندها شاعر قومى واليونسكو و نوبل بكافؤو الشعراء من كل أنحاء العالم بالجوائز لأن الشعر ضمير الأمم والشاعر محترم فى أى حته فى العالم إلا فى السودان بعد ما جا النظام المجرم دا. لكين دا كلام ما ماشين تفهموهو لأنكم ناس ضبح وكتل بس ما فى مشاعر ولا انسانية

.

2- الناس المضليين الدايرين يسيبو البلد ويرحلو ليه بيتظاهرو بالآلاف فى كل القرى والمدن النوبية وحتى فى العاصمة وليه الحكومة كتلتم قبل كدا والان بتضرب فيهم وبتعتقلهم لو هم فعلا دايرين يهاجرو ويسيبو البلد

3- أقسم جازم بإنو أى واحد منكم (دا لو كنتو فعلا ما زول واحد) ما شاف ولا قرية واحدة فى أرض النوبة. لأنو الخضرة الفيها وآلاف النخيل البيحرقوها عملاء الحكومة عشان يجبروا الناس على الرحيل، والناس بتعيد زراعتا كلها مسقية ببوابير جايبنها الجمعيات النوبية فى أطراف العالم بمن فيهم كل الكفاءآت الشردتم الحكومة بكذبة الصالح العام. ولعلمكم كل المدارس والشفخانات والمستشفيات شغالة بعون ذاتى بوفروهو المثقفين القلتو عليهم فاشلين. وأتحدى أى واحد يثبت لى أنو الحكومة بتمول المدارس والمستشفيات اللى هى كلها بالعون الذاتى من الفاشلين الإنتو بتتهموهم. وفى كدا الحكومة بتعاكسهم بإنها بتصادر كل الأدوية والأجهزة بالإدعاء بإنهم ما عندهم رخص إستيراد، بالله مش عار حكومة تحارب مواطننها؟ وتمنع منهم الكهربا لأنهم بيعارضو السدود، وكمان تصادر منهم الواح الطاقة الشمسية وتمنعها عشان بوابير الموية ما تشتغل. بالله مش عار؟ وتجو تقولو إنو المثقفين ما قدمو حاجة؟

المثقفين النوبيين هم البنو السودان بكل التجرد من طلائع الحركة الوطنية وثوار 24 كان عبيد حاج الأمين ولا السيد فرح (بتعرفو منو السيد فرح "جيفارا أفريقيا؟") وشعراء الوطنية خليل فرح وتوفيق صالح جبريل وجيلى عبدالرحمن، والمهندسين الخططو المدن ناس عمنا الباشمهندس أحمد بدر وكل مجارى العاصمة وشوارع ظلتها ألاشرف عليها عمنا محمود على أدريس بتاع التنظيم، وادارة السكة حديد والوابورات والبريد والبرق، وطلائع الأطباء ناس دكتور ساتى وعبدالحميد إبراهيم وجراحين العيون محمد شريف وحسن هارون والمهندسين... واللستة تطول باللى قدموهو المتعلمين والمثقفين النوبيين ناس إبراهيم أحمد وزير المالية وداوؤد عبداللطيف، وغيرهم. ومافى يوم قالو دا إمتنان على الوطن بس بى كل التجرد أسهمو فى بناء الوطن. ولو فعلا واحد فيكم نوبى كان بيعرف أنو الأطباء النوبيين بيجو من انجلترا وامريكا والخليج عشان يعالجو اهلهم مجانا ويفتحو ليهم عيادات ويمدوهوم بالدوا. فبطلوا الكذب. انتو ما شفتو أى حته فى النوبة خليك من الأدعاء بانكم نوبيين

كدى شوفو العظمة البتزعجكم دى وبجيكم راجع لسه.