جرب نار الغيره..

Quote: قندهار دي وين يا اخونا(شكلها ما بتاعت افغانستان) شايفها اترددت في البوست كم مرة لكنI am lost حسيت زي الناس في وادي وانا في وادي اخر والتحية للجميع

قندهار سوق كبير في امدرمان امبده..سميت قديما بسوق الناقه..أو مازال بجانبها سوق الناقه..
فيها ناس حلويين في بساطتهم السودانيه..نظام راكوبات معروشه بالقش ومفتوحه كلها علي بعض..
فيها عناقريب صغيره بدون مراتب..وكراسي وبنابر افتكر مع طربيزات صغيره..

تلقي الناس قاعده مجموعات في كل ركن فيها..مجموعات صغيره ولا مجموعات كبيره زي حقتنا الحلوه الولعت الغيره!
وبجانب الزبائن تلقي نساء من مختلف الأعمار يشووا في اللحمه..والجزارين جنبهم معلقين خرفانهم..
اول ما تصل وتقعد تتطلب الشيه بالكميه العايزها..وبتتباع بالكيلو..تتعمل وتجيك لغاية عندك..
وفي الأثناء دي يحوموا عليك البياعين..لو عايز تشتري منهم تشتري..وبتلقي شرايط غنا حلوه كتيره..
وتلقي البياخد منك حذائك لا مؤاخذه يلمعوا ليك ويجي راجع..تلقي الناس كلها مبسوطه وبتتونس بروح حلوه تذكرك قعدتك مع اهلك جوه الحوش في ساعة ظهريه ولا مغربيه..شوفت كيف؟

وتشرب الغباشه ولا البغاشه ودي معموله من الزبادي والسفن اب..وتطلب الشاي والجبنه السمحه معاها بخور التيمان وما يفضل ليك الا الوداعيه..اها زي المكان ده البيابا منو؟

قندهار دي ياها السودان..تلقي فيها السودانيين من مناطق السودان المختلفه تعاين ليهم وتبتسم
ليهم ويبادلوك السلام والتعليق.. وكمان يقولوا ليك عليك الله اتفضل اكل معانا..اها زي ديل بنخليهم؟؟

الجلابيه في..التوب في..الفستان السمح في..الصديري والسروال في..اها ده ما مهرجان يوماتي؟
ما خاتيين عليك الله لو فكرنا ما نمشبها؟

اسه مالك مفتح علي المواجع..اصله انا ما سياسيه كبيره وماعندي مشكله أمشي مع السمحين قندهار..
وماعندي وهم بتاع كواريك في النت متل اكني مجنونه..بحب الناس الهاديين الظراف زي البورداب
المشيت معاهم قندهار..يبقي شنو البيمنعنا منها؟

السودان سودانا وأهله أهلنا..والنبي فيك كان مشيت السودان تمشي قندهار..وكفي كده بكري بعدين
يطلب تمن الأعلان..واسم قندهار ده ما فضل ليه الا يخت ليه نقطةحمرا عديل فوق جبهته

اها محمد خليل جيت وادينا ولا لسه في واديك؟؟