عزومة فرح

Quote: هذا الى الاستاذة منى عوض خوجلى بمناسبة عيد الميلاد , وبمناسبة قلمها الرشيق كل سنة وانتى طيبة يا استاذة . (1) حلوة وطيبة يا طيوبة ... ناسك طيبين ؟ أهى سنة راحت يا بت يا ذوق من شجرة عمرك وقعت ورقة وباى باى وقعت ورقة شوفتى السنوات ؟ ورقة وراء ورقة وراء ورقة نضحك ام نبكى ؟ سنوات العمر كما الديزل ديزل ومعدى وعايز انزل انا خايف من عمرى البيجرى ... سواق الديزل مستعجل يا تهدىء السرعة يا توقف مرعوب يا عمى السواق مرعوب من مشى الايام ثبت اوراق السنوات وقف يا عمو ونزلنى ما داير اللعب انا عايز انزل يا بت يا ذوق لو بالعافية او كان بالذوق ورقة وراء ورقة وراء ورقة (2) اطفىء الانوار ولعى شمعة اطفىء الشمعة وتفكرى فى ظلام الغرفة اهى سنة راحت والفاضل كام ؟ ولعى انوارك وابتسمى يا تورتة عيد الميلاد ... الشمعة حزينة ومهجورة يا شمعة عيد الميلاد ... يا مطفية ... هل انتى الرمز ؟ (3) احلى هدية فى عيد الميلاد انك تضحك وتعاين فى مرأية قزاز وتقول لنفسك - سنة حلوة وتصهين وتغش فى نفسك - الجاى احلى الجاى احلى ؟؟ طب ليه الشمعة المهجورة ... ليه مطفية ؟ (4) شوفتى السنوات يا بت يا ذوق والجاى احلى وانا شخصيا ما عرفت حلاوة فى ايامى غير تورتة عيد يوم ميلادى (5) ما خايفة من العمر البيجرى ؟ تتحدى الايام وتواصلى ؟ لعبة ايام ما بتتواصل انا شخصيا ما داير اللعب سواق يا ديزل مستعجل انا عايز انزل (6) حلوة وطيبة يا طيوبة ... ناسك طيبين ؟ سنة حلوة عليك .