حوار هادي مع مذعوري الجلابة من ثورة الهامش.

Quote: تبارك تحياتي او مرحب بيك في خندقي الصراع.

زمان في جامعة الجزيـرة وبعد احداث 94 حظر النشاط السياسي بالجامعة وجُمد الاتحاد الطلابي..
وشتت التنظيمات السياسية بالجامعة اي تشتيت خاصة بعد التدمير الممنهج الاتعرض ليهو مؤتمر الطلاب المستقلين
الكانوا اقوى التنظيمات السياسية وقت جينا برالمة واكثرها قدرة ..
وايضاً اكثرهاً تحدثاً عن انه الصراع صراع هوية واشكالية الاشكال نابع من المشكل الانساني..

بغياب النشاط السياسي والاتحاد انخرط اكثر الطلاب تلقائياً في الروابط الاقليمية لمناطقهم
وبدت تقيم اسابيع سياسية وجلسات اسرية وغيره وبقي التعريف اغلبو السائد.. فلان داك ود ناس عطبرة او علان الامدرماني
او فرتكان المن كسلا الخ .. التعريف كان في عضمو لو قابل بشاشا حايقول تعريف جهوي والا ان جاك دينق الوقت داك حايقول ليك
دا كلام عنصري رغم انه كان تلقائي نسبة لتشابه الاسماء في مجمع جامعة فيهو قريب العشرة الاف طالب ولانه اغلب الطلاب في الفترة
ديك ظهرو واتعرفو من خلال روابطهم الاقليمية لانه لا في نشاط سياسي لا ثقافي لا رياضي ..
بعد سنوات عاد النشاط السياسي مع استمرار تجميد الاتحاد .. ولانه التردي في الحياة الطلابية وبيئة معيشتهم فاق الحد
فقد كان الطلاب ينادون من خلال التنظيمات السياسية لتبني خط محدد لتحسين الوضع المعيشي للطلاب داخل الجامعة فقط ويتركوا
قصة انهم بيناضلوا حالياً لاسقاط النظام لانهم كتنظيمات سياسية محصورة بين الاربعة اركان للجامعة بتبقي قدرتها في فعل
يؤدي لاسقاط نظام بيبقي نوع من الاحلام .. لكن تنظيمات الجامعة الكانت مرتبطة بالتجمع الوطني الديمقراطي القاعد في اسمرا الوقت داك مصرة على تبني خط واااحد لابد من رحيل النظام وان طال النضال .. وتعالت اصوات الطلاب انه يا ناس نحن في جامعة
والجامعة مافي الخرطوم الجامعة اقليمية وفي الاقاليم بالجزيرة وفي الجزيرة بالنشيشيبة كدي اول شئ غيرو خطابكم لتصليح وضعنا ومعالجة اشكاليات البلاعات الطافحة في الداخليات السممت بدننا .. وصندوق نهب الطلاب البياخد مننا ايجار سكن للداخليات دي ..ومافي زول مستفيد منه .. وتالت شئ رسوم الجامعة البقي مستحيل انه يمر سمستر ما تزيد بمسميات وغيره .. ورابع شئ الكيزان البيمشو الجنوب ديل ويجو يعملوا ليهم امتحان براااهم ويلحقو الدفعة بعد سمسترين وتلاتة.. حلو دي لو انحلت لينا مع ادارة الجامعة ووزارة التعليم العالي بيبقي هين بعدين قدرتكم على حلحلة مشاكل السودان ككل المرتبطة باشكاليات الاشكال والهويـة .. وانصرف الطلاب راشدين لكافتريا اقتصاد وكافتريا الاندلس وغيرها من الكافتريات الفخيمة والتي انشئت بواسطة مستثمرين كيزان داخل الجامعة للترفيه عن بعض الطلاب وتستعصي على الاغلبية من الجوعي والمقطعين..

لكن ظلت التنظيمات السياسية راكبة راسها لآخر لحظة وشغالة للطلبة تخندقو تخندقو ضد النظام ضد الكيزان لابد ان يذهبو..
يرد الطلاب وهم خارجين ليلاً من احراش الجير او من سينما رودي.. يا شباب ما ننخدق الا تغيرو نضميكم الغير عقلاني دا نحن ناس بقو يبيتو في طلمبات البنزين وفي المساجد للوضع المزري بالداخليات كدي ورونا معالجتكم..
تاني يدقو ركن باسم التجمع الوطني الطلابي ويشبكو الناس تخندقو تخندو ولا تكونو متفرجين لا بد ان يتنتظمو سياسياً..

خرجنا من الجامعة والحال في حاله الوضع مزرئ.. الاتحاد لمن طلعنا ما اعادو نشاطو.. والكيزان قاااعدين ويمارسو في نفس استهبالهم..

بس الشئ الاغرب والمدهش انه الكتير من اهل التنظيمات السياسية الكانو شابكننا تخندقو تخندقو هم مشو ومارسو الخندقة وكانت لائقة في خندق المؤتمر الوطني ..

الخطاب يا بشبش الخطاب