|
اغتيــــال............الرئيـــس
|
سافرت مصر سنة 2002......وصلت مطار القاهرة.....في صالة القدوم وعند نقطة تفتيش الجمارك...فتشو عفشي هو اصلا كان شنطة واحدة......وانا واقف مبتسم ومقدم كراع ومأخر كراع...وكلي ثقة في نفسي وفي عفشي الذي لا يحتوي علي اي ممنوعات....وفجأة... مفتش الجمارك..... ينادي ضابط......والضابط ينادي ضابط تاني...والضابط التناي يكورك لي تالت.....وفي ثواني الصالة كلها اتملت دبابير......واتلمو فوق شنيطي....وطلعو حجاب طبلة.... ملفوفة بي جلد...ومخيت عليها......وجا عسكري قايد كلبين الكلب مقاس اكس لارج...الكلب قدر الدحش.... وجدعو الحجاب للكلب والكلب قعد يشم....والظاهر لم يوفق في شمو..... انا شخصيا اول مرة اشوف الحجاب ابو طبلة دا....رغم عن انو في هدومي....وتظكرت...لابد انو الحجاب دا جا هنا بفعل فاعل.....المرا...المرا...مافي غيرا....اكيد دا كادوك بن كلب..وخاتينو لي في هدومي.....الطبلة فيها مفتاح...يعني ممكن تتفتح تتقفل...الظاهر عليهو دا كادوك النَقة....لانو انا عااااارف نفسي..زول نقيّق...وبراااااي....لو مسكت في موضوع اقعد انضم فيهولحدي ما يظهر موضوع تاني غيرو....عاوزين يكضموني...وفعلا.....في الايام الاخيرة دي.. بقيت احيانا احس انو ما عندي رغبة في النضم.....الظاهر لو عاوزني اكضم بيقفلو الطبلة بالمفتاح..وبي قفلة الطلبة يتقفل معاها خشمي....ساقوني كتيبة الضباط ديل.. لي مكتب....وقعدوني في كرسي...واحد فيهم قال لي... اسمع يا اخينا ما تتعبنا معاك وتتعب نفسك..وبدون لف ودوران...وبدون كلام كتير.....وما تخلينا نلجأ لاساليب مش حلوة معاك...وانت باين عليك زول محترم...تقول لنا..... علاقة ايه بي تنظيم القاعدة؟....واخر مرة شفت اسامة بن لادن والظواهري متين؟....والهدف الجاي تفجرو هنا وين؟...والناس المعاك في مصر منو؟... يلا خليك حلو.... وجاوب..... عشان نحبك....... في اللحظة دي.... فرتقو الحجاب وطلعو الطبلة...وطلعو الورق الجوا الحجاب...وفرتقوهو....اتلفت علي واحد من الضباط وضحك باستهزاء وقال لي...دا انتو خطيرين.....وكمان عاملين شفرة؟....يلا يا حلو عاوزنك تقرا الكلام المكتوب دا...فتحو لي الورقة قدامي... الورقة فيها كتابة كتيرة ومامفهومة صراحة...وفيها نجوم ..ومربعات...ومثلثات....وهيصة جواها......واحد من الضباط اشر علي المربعات....وقال لي دي واضحة... دامخطط للهدفالجاي تفجرو.....والنجوم دي واضحة.... ودي نجمة داوود...اكيد الهدف ليهو علاقة باسرائيل...... يلا اجدعن كدا وورينا الباقي...!!!!!! لا اله الا الله محمد رسول الله....دي شقاوة شنو يا جماعة ؟....ودي ورطة شنو؟........... والله يا جماعة انا ما عندي علاقة بالحكاية دي...وانا زاتي اول مرة اشوف النصيبة دي في شنطتي؟.....الضابط قال لي...لا يا شيخ؟؟؟؟..ما كلهم بيقولو كدا.....طيب يا ابن ادم دا؟ ورقة الحجاب كان مكتوب فيها يا ابن ادم......يا ابن ادم دا ... اسمو الاول منو؟هو ابوهو ادم عرفناهو..نحن عاوزين اسمو الاول..... اسمو ايه؟....... في ورقة الحجاب تحت مكتوب فيها وجعلنا من بين ايدهم سدا ومن خلفهم سدا.....الضباط مسكو في كلمة سدا..وكل واحد قعد يعاين للتاني ومطير عينو.....وواحد قال لي.......وانتو برضو جاين تفجرو السد العالي؟..... ماشاء الله.... لا دا مخطط كبير ااوي......وقلبو ورقة الحجاب....ولقو مكتوب كلام كتير ورسم وشغلانة طويلة عريضة....والكلام الواضح كان" تبارك الذي بيده الملك".....والفكي الحمار الكتب الحجاب كلمة تبارك بدل ما يكتبها بالتاء كاتبها بالميم.... يعني بقت مبارك الذي بيده الملك...الضابط جرا فيني نور طويل ونفسو قام وكفكف ايديهو..وقال يا ديني النبي ي ي ي ي؟..كمان جاين تكتلو السيد الرئيس؟.....دا انت وقعتك سودا.......انا هنا اتخلعت واتبهطت واتهجمت....وان قرصوني ما اكب الدم...قلت لو وين السيد الرئيس.؟....قال لي شوف....وختا اصبعو فوق كلمة مبارك.....هو في غيرو؟.....وبعدين بيده الملك يعني رئيس الجمهورية.... اتلمو كلهم فوق الورقة وكل مرة واحد يعاين لي ويصر وشيهو...ويعضعض في شلاليفو.....مافيها شك يا سجيمان انت رحت شمار في مرقة..والله يازاك يا الفكي الكتبت الحجاب .....وانتي يا ام الخير اصبري لي.... ان مرقت انا من دي.....اوووووعك ترجيني في البيت.............
|
|
|
|
|
|
|
العنوان |
الكاتب |
Date |
اغتيــــال............الرئيـــس | سجيمان | 10-19-04, 06:39 AM |
Re: اغتيــــال............الرئيـــس | خضر عطا المنان | 10-19-04, 06:57 AM |
Re: اغتيــــال............الرئيـــس | سجيمان | 10-19-04, 09:07 AM |
Re: اغتيــــال............الرئيـــس | Rama | 10-19-04, 07:07 AM |
Re: اغتيــــال............الرئيـــس | سجيمان | 10-19-04, 10:48 AM |
Re: اغتيــــال............الرئيـــس | Agab | 10-19-04, 09:59 AM |
Re: اغتيــــال............الرئيـــس | سجيمان | 10-19-04, 11:51 AM |
Re: اغتيــــال............الرئيـــس | abdalla BABIKER | 10-19-04, 10:09 AM |
Re: اغتيــــال............الرئيـــس | سجيمان | 10-19-04, 01:21 PM |
Re: اغتيــــال............الرئيـــس | Esameldin Abdelrahman | 10-19-04, 10:13 AM |
Re: اغتيــــال............الرئيـــس | شمهروش | 10-19-04, 10:55 AM |
Re: اغتيــــال............الرئيـــس | saif massad ali | 10-19-04, 03:20 PM |
Re: اغتيــــال............الرئيـــس | سجيمان | 10-20-04, 08:29 AM |
Re: اغتيــــال............الرئيـــس | سجيمان | 10-20-04, 02:42 AM |
Re: اغتيــــال............الرئيـــس | سجيمان | 10-20-04, 00:12 AM |
Re: اغتيــــال............الرئيـــس | اساسي | 10-20-04, 00:22 AM |
Re: اغتيــــال............الرئيـــس | سجيمان | 10-20-04, 09:48 AM |
Re: اغتيــــال............الرئيـــس | abas | 10-20-04, 00:20 AM |
Re: اغتيــــال............الرئيـــس | قلقو | 10-20-04, 00:44 AM |
Re: اغتيــــال............الرئيـــس | Safa Fagiri | 10-20-04, 05:24 AM |
Re: اغتيــــال............الرئيـــس | سجيمان | 10-21-04, 05:33 AM |
Re: اغتيــــال............الرئيـــس | سجيمان | 10-21-04, 03:40 AM |
Re: اغتيــــال............الرئيـــس | سجيمان | 10-20-04, 12:52 PM |
Re: اغتيــــال............الرئيـــس | برهان تاج الدين | 10-20-04, 05:44 AM |
Re: اغتيــــال............الرئيـــس | برهان تاج الدين | 10-20-04, 05:49 AM |
Re: اغتيــــال............الرئيـــس | mohamed osman bakry | 10-20-04, 06:09 AM |
Re: اغتيــــال............الرئيـــس | Ali Alhalawi | 10-20-04, 11:35 AM |
Re: اغتيــــال............الرئيـــس | Dr. Moiz Bakhiet | 10-20-04, 01:44 PM |
Re: اغتيــــال............الرئيـــس | سجيمان | 10-22-04, 02:36 AM |
Re: اغتيــــال............الرئيـــس | سجيمان | 10-21-04, 01:49 PM |
Re: اغتيــــال............الرئيـــس | سجيمان | 10-21-04, 11:39 AM |
Re: اغتيــــال............الرئيـــس | سجيمان | 10-21-04, 08:25 AM |
Re: اغتيــــال............الرئيـــس | ودالعباسية | 10-20-04, 02:02 PM |
Re: اغتيــــال............الرئيـــس | ناجى الزبير الملك | 10-20-04, 03:45 PM |
Re: اغتيــــال............الرئيـــس | سجيمان | 10-22-04, 06:40 AM |
Re: اغتيــــال............الرئيـــس | سجيمان | 10-22-04, 06:17 AM |
Re: اغتيــــال............الرئيـــس | فيصل النعيمه | 10-21-04, 02:22 PM |
Re: اغتيــــال............الرئيـــس | سجيمان | 10-22-04, 06:56 AM |
|
|
|