|
|
 Re: لقاء مع فرقة الهيلاهوب وعقد الجلاد وبرنامج الفـن من اجل الصحة (Re: Dr. Faisal Mohamed)
|
الأخت المبدعة دوما سوما،
سلامات شاعرتنا الحنينة والشايلة هموم الغلابة شعرا وعملا وتعاملا .
Quote: *** رحيل ***
مشيت بعيد من جنبنا ..
رحلت وراك
كل الدروب والامكنه
بارياك تفتش للحنان..
الكان معاك ساكن هنا
وللبسيمات المفرهده فى الديار..
اريجها عبق سوسنه
بى ضل كلامك يا ملك ..
يا زول مجرتق مننا
شلناك وديع متل الرضيع
ضلل بهاك يا ضلنا .
منانا نلقاك من زمان
قبال ميعاد بى كم سنه
شلناك وشاح فى كل صباح
شفناك عريس بى قلبنا..
لميت معاك كل الفرح
حتى الحرف رفرف دنا
رتل غناك المن صفاك
كل المشاعر المحزنه
عب النغم جدول طرب
شتل الحنين ساحات منا
لون بساط الكون خدار
فرهد جوار النيل سنا
ذكراك صبحت تنتظر
غنوات نشيلا ندندنا
نشوفا صورتك تبتسم
نرسم خطوط بى دمنا
لوحة وفا تفضل تعيد
ايامنا قربك يا جنا
ايامنا قربك يا جنا
سومــــــا
مسقط 28/6/2004
|
Quote: سكة الزمن الصعب ..
دفرت مشاويري المأرجحه
بين الأرض وراحة السحب ..
زحمت دروب فوق لى دروب
مسحت كلامنا ألفى الكتب
دمرت سرابات المدن ..
غاصت هناك ... تحت الترب ..
نزفت شرايين البلد..
قطعت وريد وسط العصب ..
ضاقت صدور .. عبرات تزور..
حلقا نشف جف و تعب ..
زفرات تمر فوق الحلق ..
مأموره تجرح بالغصب ..
ساقت خطانا في انحدار..
لى هاوية الخوف والرعب
طبعت قوانينها الغلط
في صفحة الزمن الكعب..
والليل طويل شايل الوجع..
ضلت خيوط صبحو الدرب..
والنيل هداك صامت حزين
عبرات تسد حلقا شرب..
والجوف هضم .. مر السكات ..
لمن شبع جوعا ضرب..
ولا الفراق .. الكان حرب
من غير سلاح رغم الضرب
مدفور تلملم في الخطى..
تتعتر .0
.تصارع الشوق الغلب
تتضارا تحبس في الدمع..
السال حنين كيفن سكب
يا سكة الزمن الصعب
معووجه من أول طريق
لا فيكى صحبه ولا رفيق
إلا المتل مسيلمه ..
ومعروف كلامو بالكضب
أسماء الجنيد
مسقط
|
الشكر والتقدير لمجهوداتك المقدرة بوصفك ممثلة المنظمة في منطقة الخليج. والشكر موصول للأخ محمد الجنيد على استضافتكم للفنانة سمية حسن وفرقتها الرائعة اثناء تواجدهم بمسقط. ولمجهوداتك المقدرة بالتنسيق مع الاساتذة الكتيابي وفضيلي جماع من اجل سودان معافي وسليم.
مع خالص الود والتقدير ،،،
فيصل محمد
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست