|
|
 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا
|
منذ 120 سنة من اليوم دخل الامام المهدي امدرمان مظفراً بعد ان حرر الخرطوم قبلها بأيام فى 26 يناير،عبر النيل عبره ذلك الزاهد الذى رفض ان يسكن قصر غوردون باشا- القصر الجمهورى الان -و رفض وسماه مساكن الذين ظلموا انفسهم،وترك العنان لناقته بعد عبوره النهر ووصوله امدرمان لتنيخ به أنى شاءت ،فأناخت به فى امدرمان فى مكان القبة الان فكان مسكنه و مسجده و اصبح مرقده بعد ان انتقل الى الرفيق الاعلي،فصدق ما عاهد عليه الله و ما بدل تبديلا
أقلت أمدرمان؟
هيَا يا أخي
إمسك بيد الخيال و اعبر معه النيل الى يمينه"حيث سابق"،أتلمح التماعة تلك الفضية التى تحنو على ملهمها ويعلوها هلال و حربة؟؟الضريح الفاح طيبو عابق السلام يا المهدى الامام،هنالك حيث الاشواق تتكاثف كبخار محبة وحيث الحنين يقودك لا تقوده وحيث النفس تهفو والقلب يخفق..
أقلت أمدرمان؟؟
إمسك بيد الخيال و أعبر معه النيل و تمهل فاعرج يميناً الى اب روف و اتئد و انت تجتاز تلك الازقة الضيقة التى كأنما خلقت لتكون هناك و كان التاريخ يسجل فى كل لحظة توقيعه على "شهادة العجز و الاخفاق"فى ان ينل من صباها شيئاً فلم تشخ او تهرم رغم انها عتيقة عتيقة،تنحنى ظهور أبنائها فى رحلات أعمارهم أطفالاً فصبية فشباباً فكهولاً فشيوخاً ولا ينحنى ظهرها أبداً..
أقلت أمدرمان؟؟
إمسك بيد الخيال و تمهل و الذكرى قطعة سكر أذبها ببطء بداخل فم الواقع ولا أحلى..
أقلت أمدرمان؟؟
إمسك بيد خيالك و لا تطلقها أبداً ورددا معاً:
إمتى أرجع لى ام در و اعودا
اشوف نعيم دنيتى و سعودا،
ثم بح بحبك دفعة واحدة واهتف:
المن فراقك ايامي سودا
امتى ارجع لى امدر و اعودا
ثم اهتف:
من علايل اب روف
للمزالق
من فتيح
للخور
للمغالق
قدلة يا مولاى حافى حالق
فى الطريق الشاقى الترام
وامتى ارجع لى امدر و اعودا؟؟
امدرمان يا أخي حلقة راتب
تمتد بعمق "تكسبون" مرورا نفسياً بالمسبعات العشر فتنجينا فدعاء ختم القرآن الى ان تحط على دفتى دعوة قساوة القلب .
أترى لذلك معظم أهل امدرمان ليَنوا القلب؟؟
ام درمان حلقة راتب تحت الشجرة الظليلة المطلة على خور الامير ابو عنجة تتلو وراءه الشهادتين و العهد بالخلاص صباح مساء..
ام درمان حلقة راتب تذيب فوارق البشر الا من نظافة القلب و طهر النفس و السلام بالا تجعل اللهم فى قلوبنا غلا للذين آمنوا
امدرمان الشيخ الصديق احمد العجب و الشيخ احمد العجب..ودنوباوى الشامخة ببيت الامير و الاباء.
ام درمان عبدالله ود الزين وهو يلهج:
حبيبي جميل
جمال فتان
جمال تظهر سماتو الحلوة ميزات جوهر الانسان
جمال زى بقعة ام درمان
جمال فى طابعو سوداني
جمال فى شكلو انسانى
جمال ما فيهو دور تالت ولا تانى
جمال فى بيت من الجالوص
وفوق للشعبة رابط سعف منسوج من حبال و بروش
ووسط الحوش
تنوم العزة تتوسد لحاف بالعاديات مفروش
حبيبي جميل
جمال فتان
جمال رايع
جمال فى قبة او جامع
جمال فى طابية بتدافع
جمال فى طاقة بتقبل على الشارع
وقفة بتقفل الطاقة
وزحام فى شارع الصاغة
وضيف فى خلوة او دهليز
وزول نايم تحت لالوبة او جميز
جمال ما بحسو غير زولن لعب شدَت ووسط الميس
حبيبي جميل
جمال بطران
جمال شبعان
جمال زى بقعة امدرمان
وامدرمان
بيشوفا الرامد المرضان:
بلد بيموت
وعز بيفوت
وواحدة عجوزة راجية الموت
وامدرمان
بعين الشاعر الانسان
وعين البعرف امدرمان:
سلام وامان
تخش بحمار
تسوي حصان
تنوم بردان
تقوم دفيان
واسمعو كيف بقول عبدالله ود الزين
وليد الاوليا الصالحين
وليد الشهدا و الشاهدين
واسمعو كيف بقول فى ام در
وليد البر
انا امدرمان سليلة السيل
ولد ولدونى بالتهليل
انا امدرمان..
وهل انتهى الحديث عن أمدر؟؟
أمسك بيد خيالك وأعبر النيل الى الشاطىء الغربي حيث امدر،وتجول ملياً فى كل شارع و كل بيت ،فهنالك لكل شارع بوح و لكل بيت قصة تقبع فى ركن منه لتحكي -برغم عاديات الزمن- حكاية مدينة تليدة لم تمل الخلود و لم تعرف الانكسار
قطعا لم و لن ينتهى بل سأعود؛
محبتى لكم
|
|
 
|
|
|
|
|
| العنوان |
الكاتب |
Date |
| 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-12-05, 02:12 AM |
 Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | A.Razek Althalib | 02-12-05, 02:36 AM |
 Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | Habib_bldo | 02-12-05, 02:45 AM |
 Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-13-05, 06:26 AM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-12-05, 02:25 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | محمد الواثق | 02-12-05, 03:34 AM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | محمد عبدالرحمن | 02-12-05, 01:42 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | munswor almophtah | 02-12-05, 02:16 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-12-05, 02:34 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-12-05, 02:30 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-12-05, 02:28 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | عبود احمد النصيح | 02-13-05, 12:42 PM |
| Re: 12 فبراير:اليوم دخل المهدي أمدرمان منذ 120 عاماً ؛ و إمتى أرجع لى أم در و اعودا | lana mahdi | 02-13-05, 01:01 PM |
|
| |
lana mahdi
فيس بوك
تويتر
انستقرام
يوتيوب
بنتيريست