** الأستاذ محمود: بين تفجير الدين الاسلامى نوويا ...وبين نشر الفاتيكان للرسالة الثانية **

Quote: 3/ أن اللغة العربية هى إحدى معجزات القرآن فى رصانتها وانضباطها. فهل يعقل أن تجد بها أخطاء نحوية لاتوجد عند شعراء جاهليين من جنس البشر؟

انت هسع مش اتفقت معاي انه النحو وضع بعد القرآن، طيب نقوم نخضع القرآن للنحو؟؟؟، ما بتجي مش كده؟! مفروض نخضع النحو للقرآن وليس العكس، فاذا في خطأ نصلح النحو

تعرف دي ذكرتني بقصة الشافعتين القاعدين يتونسوا وبيشربوا في شاي الصباح، قامت واحدة تحكي للتانية حلمها الحلمت بيه في الليل، ما مذكر الحلم كان شنو لكن، بعد ماانتهت صاحبتها ردت ليها "لكن حلمك ده ما غلط"

دكتور بلة

ما كنت ماشي كويس، وبالمناسبة انا كلامك ده كله متفق معاك مية في المية، لكن حكاية نقوم نضبط القرآن ده هسع ما بتفق معاك، لسبب بسيط: منو البقدر يحدد انه ده خطأ نحوي؟، الناس المجضمين العربي هسع كلهم قروه من الكتب الوضعت بعد القرآن فبالتالي ما عندهم فكرة عن العربي كان كيف قبل ما يكتبوه في الكتب، فالناس الكتبت في النحو واللغة العربية اللهجات السبعة ولا الستة ولا الخمسة ولا البلاغة، ديل كلهم اجتهدوا من عندهم ما فيهم واحد حضر زمن العربي العربي

فلو لقيت الزول ده، البيولدوه من بطن امه بيرفع الفاعل وينصب وخبر ان بدون ما يدخل ليها روضة، فانا ما عندي مانع ومستعد اكافح معاك عشان اقنع ليك كل علماء المسلمين فردا فردا، بس انت عليك تجيب لي الزول ده وبعدها قشة ما تعتر ليك

بعدين حكاية التحدي وانه الجماعة حاولوا وقطعوا رقابهم وجبت مسيلمة كمثل. احب اوضح نقطة بسيطة، انه التحدي كان قبل الجماعة ديل ما يسلموا، مسيلمة ده مااسلم وبعدين عمل فيها نبي، فقصته مختلفة عشان كده احسن خليه على جنب، نجي للوليد ابن المغيرة، الوليد سمع القرآن وكان ممن فصحاهم وجابوه عشان يجضم ليهم القرآن ده ويفندوا ليهم حتة حتة، الراجل اندهش وغلبوا اليقولوا، والقصة معروفة، فلا يعقل انك تتحدى ليك زول في حاجة وانت ما عارفها او لا تجيدها، دي من البديهيات، فلو افترضنا جدلا انه سيدنا محمد صلى الله عليه وسلم، نجر القرآن من راسه، (والعياذ بالله)، كان برضو بيكون مجضمة لكن لا يعقل يجي ينصب ليهم الفاعل ويقول ليهم اتحداكم، ما بتجي كده

فانا اختلافي معاك هسع انحصر في انه: انت بتقول انه القرآن فيه اخطاه نحوية ويجب تصليحها، وانا بقول ليك انه الناس الكانوا مجضمين العربي ما لقوا فيه اخطاء دي خلينا نحن الما بنعرف الواو من الواو الضكر ، مرة تانية لو في واحد على ظهر هذه البسيطة بيعرف عربي، عشان يجي يطلع الاخطاء دي، فانا من هنا وعلى رؤس الاشهاد مستعد اضامن معاك عشان نقوم نصلحها

اها رايك شنو؟

لك التحية عزيزي