|
|
 محمد معانا يا سجيمان ما تغشانا
|
قالوا الرباطاب ديل عينهم حارة خلاص ، وأنا ما كنت مصدق الحكاية دى ، لغاية ما لقيت سجيمان امبارح فى الماسنجر ، سألنى أولادك طيبين ، قلت ليه طيبين ، قال لى كمبيوترك داك لسه نصيح ، قلت ليه نصيح يحمد ربو ، قال لى ولما تخش الانترنت برضو بتنطط فى المواقع زى السخله العاجباها روحها ، قلت ليه لسع بنطط ، وأسئلة من النوع ده كتيرة ما ريحتنى
المهم استودعت الراجل الله ، وقفلنا الماسنجر ، وقلت اريح شوية اقوم أنطرح فى السري شوية ، وأول شى النطفى الكمبيوتر ده ، ويا دار ما دخلك شر ، طفيتو تمام التمام ، بس جيت أقوم أتعتر ليك فى سلك الكهرباء ، وأخبط ليك فى الدولاب كسرت المراية جات واقعة بى طولا ، والمصيبة مع جرة السلك من البلك الا أكان اشوف ليك الشرار جوة جهازى ، وأصوات كده تقول ليك طق طرق ، كمبيوترى لحق أمات طه ، جريت نفس طويل وما عرفت اعمل شنو بى جاى المراية مدشدشة فى نص الأوضة والكمبيوتر حرق ، والعجب جماعتى مسافرين الطائف مافى البيت ، بس معاى ولدى الكبير جاء جارى ، قايل القيامة قامت ، قلت ليه بسيطة المراية اتكسرت ، وهو قعد يكورك يابوى الكمبيوتر حرق ، قلت ليه حرق حرق ، الله بيعوض ، أها قلت اقعد اجر نفسى شوية ، جيت اقعد فى السرير ، وحات امان الله السرير أوردولب اتكسرت ملتو وجيت واقع لمن راسى خبط الحيطة وعمل جرح بليغ بى وراء ، خلينا كل حاجة والولد اتخلع لمن شاف الدم ، وقال لى يابوى ارح اوديك المستوصف ، قمت على حيلى وشفت النزيف شديد اقتنعت بى كلام ولدى ومشيت معاه المستوصف ، خيطوا لى الجرح خمسة غرز وشوفوا المقلب جينا راجعين البيت ، وطبعا أولادى ليهم يومين فى الطائف ما فى غير ولدى الكبير الودانى المستوصف ، وأتارينا نسينا باللخمة مفتاح البيت بى جوة ، والحل ، الولد قال لى يابا ما فى حل غير نكسر الباب ، وكسرنا الباب ، ودخلت البيت ، ختيت يدى فى راسى
يجازى محنك يا سجيمان ، ده كلو داسيه وين ، كمبيوترى حرق ، راسى اتفلق ، سريرنا اتكسر ، المراية اتدشدشت ، ولحقت كمان يا سجيمان لى باب البيت ، يعنى بالعربى كده ماسنجر وخراب ديار
|
|
 
|
|
|
|
|
| العنوان |
الكاتب |
Date |
| محمد معانا يا سجيمان ما تغشانا | يازولyazoalيازول | 08-21-04, 00:15 AM |
 Re: محمد معانا يا سجيمان ما تغشانا | فرح | 08-21-04, 00:16 AM |
| Re: محمد معانا يا سجيمان ما تغشانا | يازولyazoalيازول | 08-21-04, 00:22 AM |
| Re: محمد معانا يا سجيمان ما تغشانا | فرح | 08-21-04, 00:28 AM |
 Re: محمد معانا يا سجيمان ما تغشانا | يازولyazoalيازول | 08-21-04, 00:40 AM |
 Re: محمد معانا يا سجيمان ما تغشانا | Frankly | 08-21-04, 00:26 AM |
| Re: محمد معانا يا سجيمان ما تغشانا | يازولyazoalيازول | 08-21-04, 00:30 AM |
| Re: محمد معانا يا سجيمان ما تغشانا | humida | 08-21-04, 11:08 PM |
| Re: محمد معانا يا سجيمان ما تغشانا | يازولyazoalيازول | 08-21-04, 11:21 PM |
| Re: محمد معانا يا سجيمان ما تغشانا | Frankly | 08-22-04, 09:45 AM |
| Re: محمد معانا يا سجيمان ما تغشانا | سجيمان | 08-22-04, 12:15 PM |
| Re: محمد معانا يا سجيمان ما تغشانا | يازولyazoalيازول | 08-22-04, 11:26 PM |
| Re: محمد معانا يا سجيمان ما تغشانا | سجيمان | 08-23-04, 00:35 AM |
| Re: محمد معانا يا سجيمان ما تغشانا | يازولyazoalيازول | 08-23-04, 00:53 AM |
|
| |
يازولyazoalيازول
فيس بوك
تويتر
انستقرام
يوتيوب
بنتيريست