يوسف عزت نقل رسالة شفوية من حميدتي للرئيس الكيني وحمور زيادة كتب في ذلك.....

Quote: Ist möglicherweise ein Bild von ‎2 Personen und ‎Text „‎الجزيرة -السودان 2h قوات الدعم :السريع يوسف- عزت نقل رسالة شفوية من حميدتي إلى الرئيس الكيني بشأن مجريات الأوضاع بالبلاد عزت- أكد دعمنا للمبادرة السعودية الأمريكية وتطويرها بما يحقق الوقف الدائم لإطلاق النار وبدء التفاوض السياسي عزت نقل للرئيس الكيني موقفنا بضرورة معالجة أسباب الحرب من جذورها بما يعيد السودان للمسار الديمقراطي بمشاركة واسعة للسودانيين في تشکيل مستقبل البلاد #الجزيرة# السودان الرئيس الكيني وليام روتو يستقبل يوسف عزت المستشار السياسي لقائد قوات الدعم السريع بالعاصمة صمة نيروبي الجيرة AJA.Suan AJA. f السودان‎“‎‎ حمور زيادة [قبل 15 ساعة] المسار الديموقراطي يا سيادة المستشار قطعتوهو انتو لما مولتو اعتصام القصر ولميتو الناس تهتف "عسكرية بس". قطعتوهو لما قائدك وقف يردح للمدنيين ويقول مصارينا ديل اتهردن، ونرجع كيف للثكنات، واي زول نهبشو يقولو لينا ده كوز، ووالله تاني ما نقعد معاهم في تربيزة واحدة. قطعتوهو لما شاركتو في انقلاب ٢٥ اكتوبر، واعتقلتو رئيس الوزرا ومدنيي السيادي وحليتو الحكومة بقوة السلاح. قطعتوهو لما الشباب كان بيموت بالرصاص في الشوارع ضد حكمكم، وانتو تتجارو جاي وجاي تكوسو مخارجة بادرات اهلية وبمبادرة الجد وباجتماع الثلاثية في روتانا. زعيمك ما كان عندو اي مشكلة وهو قاعد لابس سماعات الترجمة وعاوز مسار سياسي مع القوى المؤيدة للحكم العسكري. رجع اعتذر؟ اوك. لكن هو ما داس رجل زول بالغلط عشان يقول سوري، ويتحول لمقاتل من أجل الديموقراطية. الزول الفضل ٤ سنين يهدد القوى السياسية بانو عندو حاضنة ادارات اهلية حتدير معاهو البلد، ويا جماعة العمدة ده ما حاجة ساهلة، لندن عندها عمدة. هل كان ملبوس وانت جيت في كم شهر عملت ليهو رقية ونصح وبقى ديموقراطي؟ هو انضغط، وانجبر يمشي في خط تسليم السلطة. زي ما قبل كده في ٣٠ يونيو ٢٠١٩ انجبر هو والبرهان ووقعوا الوثيقة الدستورية "ورجلهم فوق رقبتم". المجبور ما بيبقى قائد تحول ديموقراطي. ولا المجبور الناس حتنسى ليهو انو قائد مليشيا ارتكبت جرائم في دارفور. الناس تعاملت معاهو كشر لابد منه خوفاً من الدمار والخراب الحاصل هسه. قبلو بالدمج الممرحل، اتكلموا عن تأهيل للجنجويد. لكن مافي زول نصيح ممكن يقبل بيهو قائد تحول ديموقراطي. خاصة بعد ما ظهر انو كلام الدعم السريع الحلو البيقولو في الورش ما عندو علاقة بالواقع. في ورشة الاصلاح الامني والعسكري الجنجويد قدمو ورقة سمحة عديل. ورقة مكتوبة لعيون الخواجة. بتعترف بالتقصير، وبتحدد اوجه النقص، وبتطلب المساعدة. بعكس جهات مؤسسية تانية جات بكل استعلاء قالت انا تمام ويصلي عليّ جبريل بس محتاجين تمويل، ادونا قروش واسكتو مننا. كلام الدعم الحلو ده كان حدو قاعة الصداقة. اول ما اشتبكتو رجعتوا لذات انتهاكات دارفور. ما اتعلمتوا اي شي. فما تعشم كتير. حتلفو تلفو، وترجعوا لانو مصيركم الدمج والتسريح. ما عندكم اي مستقبل في المسار الديموقراطي الا انكم بند من بنود "عملية انهاء تعدد الجيوش". لانو وجودكم في حد زاتو مهدد لكيان الدولة وللمسار الديموقراطي. المطالبة بوقف الحرب لا تعني انكم ترعوا تاني زي ما رعيتوا زمن تحالف البرهان معاكم. انما تعني ايجاد حل سلمي لمصيبة وجودكم. حل لا تدفع تمنو البلد كلها زي ما حاصل هسه. لو استشارتك عندها عمار، قولا للقائد بتاعك. انو بدل استهبال "حماية الديموقراطية" و"محاربة الكيزان"، يعلن قبول دمج قواته بمجرد وقف الحرب.